تحـــذيــــــر تحذيـــــــر حق القطرين والمقيمين

[بـــاروود]

السلام عليكم

بدش ف الموضوع

اليوم اخوي وهو معود من الدوام عند اشارات راس بوعبود جات سياره وقفت احذاه فيهاا واحد يدعي انه ايطالي ويتكلم عربي مكسر رفع يده وسلم على اخوي وقاله ممكن تنزل الجامه المهم نزل الجامه قاله سيارتك وايد حلوه وعاجبتني وقام يضحك معاه ويقوله رمضان كريم ولعت الاشاره قاله صف على اليمين نبي نتعرف انا احب القطرين وناس طيبين هاي كله طبعأ باللغه الانجليزيه الاخ ماصدق خبر وصف قام يقوله انا جاي من ايطاليا وشتغل في مصنع ماركت ريبن وانا من الاساس من ميلانو واليوم طيارتي المهم وقام يمدح اخوي وانت انسان طيب مبين من ويهك واخوي على قولت المثل (امدحه وخذ بشته) المهم عطاه اربع نظارات ريبن قاله هذيلا مراح تلقاهم في قطر مانعطيها غير ناس الفي أي بي وانت صرت صديقي ولازم اعطيك ذكرى خذه بالكلام ودشله في سوالف الاسلام وانه زار مركز الفنار لتعريف بالاسلام وعطاه اول شي نظاره قاله هذي مني لك وعقب قاله انت متزوج قاله لا قاله عيل اكيد عندك غيرل فرند هذي نظاره لها عشان تميزون انت وياها ضحك اخوي رد عليه وقاله ماعندي قاله انت شاب وسيم وراح تلقى وحده حلوى وقاله هذي نظاره حق اخوك والنظاره الرابعه قاله حق صديقك المفضل (يور بست فرند) المهم اخوي حاول يرده بس هو حطها في سيارته وقاله لازم تاخذهم واجبر اخوي عقب قام يتمسكن يقوله بطاقت البنك ختربت علي وانا ودي اشتري عطور حق امي واختي ابي منك بس هل خدمه لنه طيارتي اليوم ومافي وقت باشتريلهم من المطار قام اخوي وعطاه 1000 ريال ويقولي الريال وهو يكلمه كان يتلفت وايد ومرتبك ....
شكيت ف الموضوع وكلمت واحد من ربع وقالي عنهم منتشرين في قطر وصايره معا كذا واحد
طلعت مافيا منتشره في قطر هم عباره عن لبنانين يسون نفسهم ايطالين وانهم من ميلانو وتصيدون حق الشباب
عاد قالي اخوي من وصفه قالي سياره صغيره سوده ولا حكليه والريال الي فيها موشم وحاط وشم بالعربي على يده اليسار يقول حق اخوي احب العرب واسمع اغاني عربيه
حبيت احذركم وياليت الي يتعرض حق مثل هل الموقف ياخذ رقم سياره ويبلغ عنها او يراغب شخص ويبلغ عنه شرطه تحياتي لكم وسمحولي على الاطاله

[Locale]

اكثروا هالايام
اخوك واعليه طيب وايد يللا دفعت بلا عنه ان شاء الله

[المحقق كونان]

مشكور على التحذير

[aziz4z]

مشكور على التنبيه , في ناس كثر طيبيين أمثال أخوك
واحد يقولك أسمع أغاني عربية , و أروح فنار , صك الباب في وجهه , و قوله بااي .
أنا حدي الهندي اللي يبيع مسواك أدفع له عشر ريال و يعطيني معاه كتيب أذكار

[CH Engineer]

4 نظارات ريبن كوبي درجة اولى ب 1000 ريال

سعر المافيا ارخص من سعر تجار المنتدى وبدون عمولة المندوب

[wanted boy]

بـــــــــال للحين موجود ,, جاني قبل شهرين عند البيت ,, يقولي تحب الموضه ؟ وقالي عنده بدل ايطالي في السيارة وانه يبي يسافر دبي ولازم يبيعهم وانه محتاج الفلوس ,, سحبت عليه قلتلته مبب فاضيلك

[رُفق المجنّا]

نفس الموقف حصل لي في فيغاس ! ولكن السيناريو غير والبضاعه غير

ولكن كان واضح إنه يستقصد العرب والخليجيين بالذات من خلال الكلمات العربية اللي كان يرددها

هل الخليجي أو العربي ينضحك عليه بسرعه ليتم استقصاده بهذه الطريقة حتى في بلاد العم سام !

أنا اعرف ناس في المولات من يجيهم المسوّق يتنافض الواحد منهم ويتبلعم ويشتري غصب ! أعتقد أننا بحاجة لمزيد من الجراءة , نعود أنفسنا ع ( لا )!

[بوخالد911]

من الأساس لا تعطيهم وجه
ولا تاخذ ولا تعطي وياهم

شكراً للتنبيه

[رجل الجزيرة]

طيب أخذوا رقم سيارته وبلغوا عليه.

[qatari 111]

بالعكس اخوك ربحان 4 نظارات ب 1000 ريال .. واسلوبه حلو معاه

اتمنى يجيني يمكن احصل عنده بضاعه طيبه

[HotBlood]

هذي الشي يصير في لندن كثير مع العرب بنفس الطريقه او يقولك انا مسافر ومتاخر على الطياره وعندي جاكيتات اصليه ماركه توني شاريها بقراطيسها

ويقولك بعدين انا محتاج فلوس الحين ضروري وشكله كلش مايحوي انه نصاب ويحاول يبيعها عليك بسعر رخيص

لان الجاكيتات اصلا كلها تقليد

فالظاهر هالاشكال وصلت الدوحه

واعتقد النظارات اللي عند اخوك تقليد يمكن ماتسوى 100 ريال

[قطريه ماركه]

اخووك عطاه ويه

لازم من البداية ما ينزل الدريشة و لا يصف السيارة على جنب معاه

[@فهد@]

مشكور اخوي ودفعة بلا

بعد عندك كم واحد يتصيدون عند مدخل سينما فيلاجيو .. من يشوفك يقول لك ممكن تشارك بمسابقه وتاخذ جايزه .. شله نصابين حقين التايم شير .. طبعا شفتهم في اماكان وايد في الخليج في دبي يحطون لك بنت اول ماتنزل من الطياره وفي اماكان كثيره .. ارجو الحذر من هالنصابين ..

[blackjacket]

انا جاني واحد بنفس المواصفات من فتره يبيع قماش بدلات و طبعا نفس القصه و خليته عقب ماكمل كلامه قلت له القماش ما عليه كلام و حلو
بس حسافه انا مالبس بدلات :rolleyes2: اذا عندك قماش ثوب باخذ كل الي عندك !
سحب نفسه وراح

[عاشق العديد]

من ميلانو عيل .. صصصكه واحد بين عيونه تخلي يحكي لبناني جبـلي ..

[مختلفة عقليا]

السلام عليكم .,

دفع له ليش !! حتي النظاره هدية

ليش معطيه افلوس ., !!

اللي يبي يبيع ايني بالويه ويقول عندي بضاعه كوبي ون ., ولو حبيت اخذ ., هاي الصح

ياني مره واحد عند السياره اشرت له بيدي وخر وركبت وحركت ,’ ما استوعب اوقف لواحد او وحده اتم اتقولي هالكلام !! نعم من قلب نعم

انا وحده متصالحه مع الحكومه اذا جفت شي وشكيت ., اتصل لهم علي طول ., كيفهم عاد يسون اللي يبونه :nice:

ويسلموو .,

[شبح الصمت]

هالموقف صار لاخوي بس اخوي ما خذ منه ولا نظارة

وصوب البندر صاد اخوي كان يكرك وواقف وجاء صوبه

[الزعفراني]

والله كريم اخوك .. وينه ياخي عرفني عليه خل اتحبل له .. عندي كم تي شيرت فراري :)

[الزعفراني]

4 نظارات ريبن كوبي درجة اولى ب 1000 ريال

سعر المافيا ارخص من سعر تجار المنتدى وبدون عمولة المندوب

ههههههههههههههههههههه

[دااانة قطر]

على كثر ال BCs ولاكو فايده
والله شعبنا على نيااته

[sweet qatar]

جزاك الله خير على التحذير

[لاميزون]

بالفعل لى صديق واجه نفس هدة القصة من شهر تقريبا فى الكورنيش

[@north_star@]

انا وقفني واحد من اسبوع تقريبا صوب الميرة اللي في المطار والسيارة ايجار والمهم سحبت عليهم وفعلا منتشرين بشكل كبير

[كازانوفا]

لا حول ولاقوةالا بالله

[musel999]

مره من زمان كنت مع رفجي عند رمادا في الليل وقفني واحد وقالي انا ايطالي و عجبتني سيارتك (مع انها كروزر عادي) وابي اعرض عليك شي مميز قلت له تفضل قالي انا عندي قطع قماش غاليه وانا اجيبه من ايطاليا قلت له لا شكرا قالي سعر مميز ماتحصله قلت مشكور وماعندي فلوس اصلن قالي رفيجك قلت له ماعنده قال سيارتك كشخه وماعندك فلوس قلت ايه تبي شي وحركت عنه

[طرف محايد]

4 نظارات ريبن كوبي درجة اولى ب 1000 ريال

سعر المافيا ارخص من سعر تجار المنتدى وبدون عمولة المندوب


ههههههههههههههه

رد قوي

[بشائر]

الله يجزيك خير على التنبيه
وفعلا كثروا هالفترة بشكل مو طبيعي
وسبحان الله توني بكتب عن نفس موضوعك ( باختلاف بسيط) إلا شفتك طرحت التحذير
بارك الله فيك ..
أمس تحديدا الظهر شفنا سيارة سعودية فيها شابين واحد ملتحي والثاني عادي ومعاهم ولد عمره تقريبا 8 سنوات
يوقفون الناس في المواقف ( سيارة وحدة قطرية والثانية بعد لقطري ) اظنهم يتصيدون هل قطر يطلبون منهم فلوس
ومادري شيقولون لهم .. سألنا صحبة السيارة شيبون؟ قالت كلامه مكسر شوي ماظنهم ( عرب ) !!المهم كلها دقايق إلا ونشوف دوريات الشرطة تدور في المكان ..
الحمد لله الشرطة مفتحين عيونهم لهالنوعية اللي يترزقون باسم الدين ... حسبي الله على كل من يستغل الدين في
مصالحه الشخصية .
وفقك الله

[partyQtr]

^^^^

اعتقد هم نفسهم اللي وقفوني امس صوب فت ول اللي في الغرافه وانا طالعه ومعاي اخوي الصغير
واجوف 2 في سيارة لونها رصاصي يطالعوني والحقوني لين سيارتي واللوحه سعوديه اول شئ سلم
توقعته مضيع عقب تم يخربط انا جاي من المدينه وكلام وايد اخر شئ فهمت انه يطر انا انحرجت اشلون هو
ماتوقعتهم بيطرون قلت له ماعندي كاش ومافي ايه تي ام هني وحركت يخرعون بصراحه


هالمكان اتمنى تكون فيه دوريه لانه في مصري بعد كذا مره وقفني اول شى يقول تبين زراع وعقب ماعندج

10 ريال @@ ومن كم يوم واحد اسيوي يوم قلت له اشتغل قالي عندي عطور تبين @@

[بشائر]

^^^^

اعتقد هم نفسهم اللي وقفوني امس صوب فت ول اللي في الغرافه وانا طالعه ومعاي اخوي الصغير
واجوف 2 في سيارة لونها رصاصي يطالعوني والحقوني لين سيارتي واللوحه سعوديه اول شئ سلم
توقعته مضيع عقب تم يخربط انا جاي من المدينه وكلام وايد اخر شئ فهمت انه يطر انا انحرجت اشلون هو
ماتوقعتهم بيطرون قلت له ماعندي كاش ومافي ايه تي ام هني وحركت يخرعون بصراحه


هالمكان اتمنى تكون فيه دوريه لانه في مصري بعد كذا مره وقفني اول شى يقول تبين زراع وعقب ماعندج

10 ريال @@ ومن كم يوم واحد اسيوي يوم قلت له اشتغل قالي عندي عطور تبين @@

صادقة ..
دوريات الشرطة ماتقصر دائما قريبة ومتواجدة لكن بعد أتمنى تكثيف تواجدهم بشكل أكبر خاصة هالفترة
صيف والناس إجازات وحلو( الطر من قطر ) ..:)

[بـــاروود]

انا ماهمتني الالف ريال ًالحمدلله كلنا في خير ونعمه بس مثل اني مارضيت على اخوي او ماتمنيت يصيده هل موقف اكيد مراح ارضى على اخواني الي ف المنتدى وثاني شي ذيله يبتدون بنظارات وملابس لكن عقب الله يعلم شعندهم من افكار وبلاوي لوهي على نظارات تهون الله يحفظ البلاد ويديم علينا نعمة الامن والامان

[7llo]

شكثر عالم جي , اطنشهم ماعطيهم شي واتم رايح مكمل مشاويري

[الدبلوماسي]

هالعصابات منتشره ف باريس صوب الشانز يبيعون ملابس فخمة بس قياسات غلط ما تركب على البنى آدم فرز ثالث بس اول مره اسمع بوجودهم ف قطر وطبعا نفس القصه اليوم بسافر ومحتاج فلوس الخ

[بوحارب]

الله يغربل بليسهم ههههههههه انا شفتهم في لندن

وقالوا لي نفس الكلام خخخخخ

حلوه إيطالي هذي :)

انا إسباني مافيه معلوم عربي

عربي زعيف

[معماري قطري]

4 نظارات ريبن كوبي درجة اولى ب 1000 ريال

سعر المافيا ارخص من سعر تجار المنتدى وبدون عمولة المندوب

هههههههه كلهم غش هنيه وهناك .. لو صادفني واحد مثله باشتكي له الحال باقول له انا مفلس مثلك وتبي نظاراتك خذها

وفي المنتدى الله يزيد ويبارك .. واحد يبيع بلاط يقول عنه بورسلان وما خلا شيء زين ما حطه فيه ومحله بين البيوت في الدواعيس والظاهر بيت .. لا وشرس وويهه قوي يرد على اللي يعجبه واللي ما يعجبه ما يرد عليه .. وعارض بلاط في صورة سابقة وعارضه مره ثانية إِنه دفعة جديدة قلت له هذا نفس اللي في الصورة الأُولى تم يلف ويدور .. مثل ذيلا يبي لهم مكافحة.

[معماري قطري]

والله كريم اخوك .. وينه ياخي عرفني عليه خل اتحبل له .. عندي كم تي شيرت فراري :)

الزعفراني بكم ابيهم

[شيخ الديرة]

اللي محيرني ليش محد منكم خذلهم صور، ووصلها للشرطة. الموبايلات ياجماعة الخير فيها أقوى سلاح، الكاميرا.
:pic::pic::pic::pic::pic::pic:

[خريجة 2011]

مشكور أخوي ع التحذير جزاك الله كل خير
الله يستر علينا وعلى بلادنا ان شاءالله

[بوغانم995]

وذو كل نعمتاً محسود .....كفو عليك على هذا التحذير وأعتقد التحريات لهم دور كبير في استتاب الأمن والأمان في قطر ......يجب ان يكون المواطن شرطي لبلده ...حتى لا يقع اخيه في براثم الأحتيال ...ويمكن تتطور الأمور الى مايحمد عقباه ...اللهم سلم ...وبس

[مواقف النجادة]

احسن من اغلب محلات النظارات عندنا .. يحاسبونك على نظارات اصلية و يعطونك كوبي غش .. ووزارة (التجار) لا حس و لا خبر ..

على الاقل اللبناني عطاك كوبي بسعر الكوبي ..

[رRاAدDاAرR]

4 نظارات ريبن كوبي درجة اولى ب 1000 ريال

سعر المافيا ارخص من سعر تجار المنتدى وبدون عمولة المندوب




تم قصف جبهة تجار المنتدى بنجاح

:happy:

[Qtr37]

قبل كم شهر كنا عند الاشارت مع الوالد وكان بيكلمه واحد شكله عربي بس كان يتكلم انجليزي و الوالد ما عطاه ويه