استفسار عن اوروبا لوسمحتو

[V.I.P_QATAR]

انا حجزت على فينا والرجوع بيكون من ميونخ وبيكون خط الرحلة فينا ليلتين وبعدها فينيسيا 4 ليالي وبعدها بمر على زلامسي 3 ليالي وبعدها ميونخ 4 ليالي بس المشكلة حصلتها بعد ماحجزت في السيارة ادور سيارة سبورت مثل اودي ار 8 بي ام دبليو ام 6 من هذه المواتر وماعرف شلون احجزها او هل اكنسل زيارة فينا واخليها على ميونخ بس الحجز مايتكنسل يعني بخسر 3500 ريال

[شموخ دائم]

,

,


مرحبا

اخوي الكريم

لا تنكسل ( فينا ) ترى هي اجمل من المانيا من وجهه نظري البسيطه
والسفر منها بالسياره بحد ذاته متعه

عندك مشكله الطريق من فينا الى فينيسيا 5 ساعات ونص تقريبا

اما زلامسي وميونخ قريبين من بعض جدا ويستاهلون الزياره

هي بس فينيس مو على خط السير لباقي المدن لانها جنوب شوي
اذا تقدر على المسافه توكل على الله
المناظر روعه بالطريق
ومحطات البترول مرتبه ونظيفه للاستراحه ومطاعمها زينه

بالنسبه للسياره ماعندك مشكله
المشكله كلها في ( الفان ) العائلي صعب تحصله
اما السيارات الباقيه ماعندك مشكله

اودي
مرسيدس
بي ام دبليو

ممكن يعطونك اي سياره منهم حسب المتوفر( وقت وصولك )
وكلها سياره جديده
لانهم نفس الفئه


مر على شركه hertz اما تحجز من النت من موقعهم
وتستلم السياره من مطار فينا او من احد فروعهم في فينا
على حسب رغبتك

او تمر فرعهم في قطر وتقدر تدفع هنا لو حبيت وتستلم السياره هناك من فينا
وتسلمها في ( ميونخ ) اخر مدينه لك

انا سنه 2012 استلمتها من فينا وسلمتها في ميونخ بكل سهوله
سلمتها في مكانهم الرئيسي في محطه القطار ميونخ
لانها كانت قريبه من الفندق الي سكنته

وكان خط الرحله
فينا \سالزبورج\ زلامسي \ ميونخ

ان شاء الله الاخوان يفيدونك اكثر

واخونا العزيز غير البشر ما شاء الله خبره يفيدك اكثر مني


,

,


اخوك

شموخ دائم

[غير البشر]

ابدددعت اخوي شموخ دائم
بصراحه كفيت ووفيت ماشاء الله عليك ماخليت لنا شي ههههه

انا مع اخوي شموخ دائم فيينا حلوه وتستحق الزياره وخاصه اذا كانت اول مره

بالنسبه لجدولك وطريقه سير الرحله غلط وتعب عليك وايد

مادري حجزت تذاكر او لا
لو ماحجزت من رايي نحجز كالتالي

الدوحه - فيينا - فينسيا - الدوحه

يعني الذهاب الي فيينا
والعوده من فينيس للدوحه

وخط سير الرحله كالتالي

فيينا ومنها بالسياره الى ميونخ المسافه 5 ساعات
وتمر عن طريق مدينه لينز
وبعدها من ميونخ تروح جنوب الى سالزبورغ وزيلامسي المسافه ساعتين و 45 دقيقه

ومن زيلامسي الى فينيس المسافه 5 ساعات ونص

لو تروح من فيينا او ميونخ الى فينيس بتاخذ 7 ساعات


هذا الترتيب مناسب لك اكثر

وان شاء الله بنزل لك خاطره توضيحيه بعد اشوي

وبالتوفيق

[غير البشر]

وهذي حارطه الرحله اخوي تفضل


فيينا الى ميونخ الى زيلامسي الى فينسيا

http://up.arabseyes.com/uploads2013/21_06_14140338384084691.png (http://up.arabseyes.com/) العاب (http://games.arabseyes.com)

[V.I.P_QATAR]

شكراً لك يا خوي غير البشر وشموخ دائم على تفاعلكم معي

[qatarman8008]

الاهم من مسار الرحلة انه وش الاماكن اللي نروحها واش الاشياء اللي نقدر نسويها غير الشوبيق طيعا..
ترى اللي اول مرة يروح احتمال كبير يضيع وقته في اماكن ماتسوى ويخلي اللي تسوى..