ســــائـــق تتمنــــى له الإنقـــــراض الســـــريع؟؟؟

[Super Cool]

السلام عليكم و رحمة الله و بركاته
,
,
,
موضوعي بسيط لكنه يسلط الضوء على شريحة "للأسف" مب صغيرة من السائقين الي وجودهم مضر لنا كلنا...هنا ما أتكلم
عن السرعة ولا هالأمور بل أتكلم عن الفئة اللي تعتبر نفسها أفضل من غيرها و ما تحترم وجود الآخرين فالشارع...أغلبنا عانى
من هالفئة و انا متأكد أن بعض كتاب المنتدى ينتمون لهالفئة المزعجة جداً...أتمنى منكم المشاركة بإضافة فئات جديد لعلنا نفتح
بعض العيون على عيوبها و أخطائها...سائق تتمنى زواله و إنقراضه اليوم قبل بكره؟؟؟


- سائق يحجز له موقفين فالمجمعات كأن موتره بير بترول توهم مكتشفينه...يالله بمفتاح حلييييييي في نص الباب علشان يعرف ان الله حق!!!
- سائق يسكر شارع ضيق جدام سوبرماركت علشان يطلب له "باربيكان"...يالله بواحد يصك بريك في وجهه و يخليه يسبح الطبلون كامل!!!
- سائق يتجاوز من اليمين عند الإشارة كأن الي فالسيد غنم في زريبته...يالله بسيخ حار يقضض توايره الأربع في عز الظهر و الجوال مافيه شحن!!!
- سائق يطلع عليك من اللفة بدون مايشوف و بدون إشارة و ان هرنت له يعصب...يالله يطلع في وجه همر بريكه خربان ينتف أم "السني موديل 97"!!!
- سائق يمشي 40 في شارع حيوي و يهذر فالجوال و يطاوح بالموتر يمين يسار...يالله بسيارة زبالة تنقلب عليك و تسبحك حفاظات هنود مستعملة!!!
- سائق يرقد على أم البريك كأنه طوق نجاة مال التيتانك وبينه وبين الإشارة كيلوين ونص...يعل يجيك شد عضلي من كتفك لين أصابع ريولك و ما تطال البريك شهرين!!!

في غيرهم؟ المجال لكم

[وطن]

كنت أفضل يكون
سائق تتمنى له الهداية سريعا
و ظاهرة تتمنى انقراضها

:victory:

[ضوى]

اعوذ بالله مقبلين على شهر الخير والتسامح وانت تدعي بمثل هالدعاوي اعوذ بالله

ياااارب يهدينا واياك ، واذا الواحد غلط على الاقل تقول ان شاء الله ينصك بمخالفة ماليه مب تدعي دعاوي بصحته يارب شنهي هالقسوة في القلوب

[Super Cool]

الموضوع مافيه شخصنة ولا اسماء نهائياً وما يزعل منه اللي مرتكب هالأمور

[وطن]

اعوذ بالله مقبلين على شهر الخير والتسامح وانت تدعي بمثل هالدعاوي اعوذ بالله

ياااارب يهدينا واياك ، واذا الواحد غلط على الاقل تقول ان شاء الله ينصك بمخالفة ماليه مب تدعي دعاوي بصحته يارب شنهي هالقسوة في القلوب

صادقه ضوى


يا أخوي مب زين تذكر الملائكة تقول ولك بالمثل

[Super Cool]

أكرر لم يتم توجيه الحوار إلى "شخص" بعينه و إنما إلى ظواهر و "عاهات" اللي ما يرتكبها ما عليه شي

و بصراحة متناهية الي يتحسس من الطرح يشككني انه "راعي سوابق"

[تغلبية]

انزين .. خلنا نقول الله يهديهم ويصلحهم ولا يتسببون في ترويع المؤمنين هذيلا اللي يزيغون قلبي ويتجاوزون من اليمين وخاصة الشباب القطريين

ياأخوي انت مهاراتك عالية في السواقة وتعرف تحفص وتخمس وتدخل يمين ويسار في الشارع في جزء من الثانية

أنا اشكاري تروعني .. ؟!!!!!

الشارع مب لك بروحك .. ومب في كل مرة بتسلم الجرة

عاد تعال فكك عمرك من دعاوي الناس عليك لي صادفت مرة ملاك.

[ضوى]

سبحان الله عشان ننصحك ونذكرك صرنا من اصحاب السوابق ؟

[بوخالد911]

هاذي مواقف سلبية موجودة

وأتمنى اختفائها اليوم قبل بكرة

ومبارك عليكم رمضان مقدما

[هداف]

والله كلامك في محله الشوارع فيها من المخالفات والبلاوي ماهو اكبر وادهى من سرعه وتواير بالون !!!!

وماعليك موضوعك في محله والمخطيء يستاهل العقاب الرباني قبل العقاب المدني وطنش لمدعين المثاليه !! خذ وخل

[q6ri_vip]

كل اللي ذاكره مهب شي جديد الكل عارفه أما أنك أتدعي ع خلق الله ماقول الا الله يهديك بس

[S S]

ضيف عليهم اصحاب التلفونات الي يتمشى على سعه ويطرش ويقرا

[Super Cool]

يستخسرون على الفقير موتة الجمعة
يعني اذا ما بقى لي الا الدعاء بعد هذا ممنوع!!!
المظلوم يدعي و على الله الإستجابة إن شاء كذلك
اما اني أحاسب على مشاعر "الظالم" فهذي فعلاً جديدة

[Rider]

انا الي يقهرني أكثر اذا واحد غلطان واذا طقيت له هرن قام يأشر بيده وكانك انت الغلطان

[Super Cool]

نضيف عليهم

- سائق يقف في مواقف المعاقين وهو من كثل عضلاته كأنه جدر عزايم
- سائق مخيم فالخط السريع و حالف ما يطلع منه لين بعد عيد الأضحى
- سائق محول دريشة موتره إلى مكب نفايات كيميائية و إشعاعية

[R 7 A L]

انزين .. خلنا نقول الله يهديهم ويصلحهم ولا يتسببون في ترويع المؤمنين هذيلا اللي يزيغون قلبي ويتجاوزون من اليمين وخاصة الشباب القطريين

ياأخوي انت مهاراتك عالية في السواقة وتعرف تحفص وتخمس وتدخل يمين ويسار في الشارع في جزء من الثانية

أنا اشكاري تروعني .. ؟!!!!!

الشارع مب لك بروحك .. ومب في كل مرة بتسلم الجرة

عاد تعال فكك عمرك من دعاوي الناس عليك لي صادفت مرة ملاك.

لاتخصين الشباب القطري الله يجزاك خير
كل من هب ودب صار اسوء منهم

[تغلبية]

^

أخص الشباب القطري .. لأنهم هم من عندهم المهارات العالية ويلفون علينا .. بكروزراتهم وانا سيارتي صالون ..

الله يحفظهم مرات يمرون خطف مثل الزهبة من يميني ... !

الاجانب .. حتى لو تجاوزوا ماتكون سرعتهم عالية .. وبصراحة تجاوزهم يبط الجبد أكثر منه يروع.

[حسن]

اسكت ياسوبر كول

كل يوم اشوفهم والحين قبل هذه اللحظات
من الصبح اولهم للاسف مره راعيه البورش الاسود بومخفي
واخرها راعي باص السمبوسه
بالنسبه لي انا في السواقه شرس جداجدا يعني عادي اشوف اللي مهب راضي يتعلم
اعلم بطريقتي الخاصه

ويوميا نعلمهم شنسوي نساهم في بناء بلدنا ومساعده رجال الامن

وكنت من مطالبن عوده الخيزرانه الى الخدمه العسكريه

وللعلم وردتني معلومات ان اختبار القياده للحصول على الرخصه
تم التشديد عليه

وانا اشكر ادراه المرور لتنبهم لهذه النقطه

واشكرك على طرح هذا الموضوع ونتمنى التركيز على القادمون
لان المشكله مهب فينا
هنا فرق بين النسبه بيناوبينهم


وشكرا لك تحياتي

[يمامـة]

الموضوع مافيه شخصنة ولا اسماء نهائياً وما يزعل منه اللي مرتكب هالأمور

هاهاها
تتمنى له الانقراض ظنيت الديناصور رد مرة ثانية..

بشكل عام اشوف استخدام كلمة انقراض مب معناه انك تبي السائق ينقرضون كبشر
ولكن تصرفاتهم هي اللي تبيها تنقرض وتختفي واتفق معاك..

[وطن]

سبحان الله عشان ننصحك ونذكرك صرنا من اصحاب السوابق ؟

لا يا ضوى هو قال يحس
:rolleyes2:


يعني مب أكيد احنا اصحاب سوابق


أخوي سوبركول
نصيحتنا لك
عشانك مب عشاننا

واظنك متابع للمنتدى وتعرف من اصحاب السوابق من غيره

[العنيده]

يارب تنقرض هالتصرفات لانها صارت غير مقبوله نهائيا
سواقنا امس يلف على السيارات يوم كلمته يقول كله نفر يسوي سيم سيم :secret:
زحمه ويبي يدخل يمين قالت له امي لا قام ياشر في سيارات دخلت
شاحنه مسرعه يبي يتجاوزها كلمناه قال لازم امر بسرعه الكل مر :)

البعض صار يقلد في الخطا والمخاطر زادت بس الواحد المهم يقول اللهم استودعتك نفسي والله الحافظ

[عثرة جواد]

ايه والله اخوي ف ناس يتعبون القلب وانت اتشوفهم والي يقهرزياده لين تجيك الزحمه

وهم يطلعون ياكثرهم

موضوعك مهم ويعطيك العافيه

[مشاكل]

والله اني صرت اتجنب اطلع من البيت والسبه هالاشكال اللي تجيب المرض

[طلعة الروح]

احب اضيف على النقاط اللي ذكرتها :

سائق يبطل باب موتره على سيارتك بأعلى قوه عنده ويقشع أم الصبغ
(تعقدت من هالسالفة لدرجة قمت اصف بعيد عن السيارات وامشي ههه ولا أزعل نفسي)

[توشيبا]

السلام عليكم و رحمة الله و بركاته
,
,
,
موضوعي بسيط لكنه يسلط الضوء على شريحة "للأسف" مب صغيرة من السائقين الي وجودهم مضر لنا كلنا...هنا ما أتكلم
عن السرعة ولا هالأمور بل أتكلم عن الفئة اللي تعتبر نفسها أفضل من غيرها و ما تحترم وجود الآخرين فالشارع...أغلبنا عانى
من هالفئة و انا متأكد أن بعض كتاب المنتدى ينتمون لهالفئة المزعجة جداً...أتمنى منكم المشاركة بإضافة فئات جديد لعلنا نفتح
بعض العيون على عيوبها و أخطائها...سائق تتمنى زواله و إنقراضه اليوم قبل بكره؟؟؟


- سائق يحجز له موقفين فالمجمعات كأن موتره بير بترول توهم مكتشفينه...يالله بمفتاح حلييييييي في نص الباب علشان يعرف ان الله حق!!!
- سائق يسكر شارع ضيق جدام سوبرماركت علشان يطلب له "باربيكان"...يالله بواحد يصك بريك في وجهه و يخليه يسبح الطبلون كامل!!!
- سائق يتجاوز من اليمين عند الإشارة كأن الي فالسيد غنم في زريبته...يالله بسيخ حار يقضض توايره الأربع في عز الظهر و الجوال مافيه شحن!!!- سائق يطلع عليك من اللفة بدون مايشوف و بدون إشارة و ان هرنت له يعصب...يالله يطلع في وجه همر بريكه خربان ينتف أم "السني موديل 97"!!!
- سائق يمشي 40 في شارع حيوي و يهذر فالجوال و يطاوح بالموتر يمين يسار...يالله بسيارة زبالة تنقلب عليك و تسبحك حفاظات هنود مستعملة!!!
- سائق يرقد على أم البريك كأنه طوق نجاة مال التيتانك وبينه وبين الإشارة كيلوين ونص...يعل يجيك شد عضلي من كتفك لين أصابع ريولك و ما تطال البريك شهرين!!!




في غيرهم؟ المجال لكم


لا اله الا الله

ادع لهم بالهدايه افضل من الدعى عليهم


انت وانا واللي يسوق اكيد سوا هالاشياء اللي ذكرتها سوا عن قصد او بدون قصد

الا اذا انت معصوم من الخطاء .؟!

اذا انت قد سويت اللي ذكرته ماقول الا الله يهديك ويهدينا معك

[توشيبا]

يستخسرون على الفقير موتة الجمعة
يعني اذا ما بقى لي الا الدعاء بعد هذا ممنوع!!!
المظلوم يدعي و على الله الإستجابة إن شاء كذلك
اما اني أحاسب على مشاعر "الظالم" فهذي فعلاً جديدة

اي ممنوع

انت دعيت علي اللي يسوي كذا افرض ابوك اخوك عمك خالك ولد عمك ولد خالك صديقك سواها ترضى عليهم في دعوتك هاذي ..؟

[المحقق كونان]

المرور مايقدر عليهم

بس شاطريين يخالفوني بتهمة عرقلة الطريق وانا انتظر في المواقف أدور موقف

شفت شلون الظلم

[نيساني]

اعوذ بالله مقبلين على شهر الخير والتسامح وانت تدعي بمثل هالدعاوي اعوذ بالله

ياااارب يهدينا واياك ، واذا الواحد غلط على الاقل تقول ان شاء الله ينصك بمخالفة ماليه مب تدعي دعاوي بصحته يارب شنهي هالقسوة في القلوب


كلام منطقي وجميل

[Eng. q6r]

اكاد اجزم ان شوارع قطر اصبحت (( البقاء للأقوى ))

[Dmy Enabi]

عرفنا عقوبة التجاوز من اليمين بس ياجماعة شنهي مخالفة التجاوز من اليسار حد واجه هالموقف ولالا تكون واقف في أمان الله يجيك واحد من اليسار ويتجاوزك هذي صراحه نكته طيب احنا عيال البطة السودا شنو وضعنا

[Charisma]

سجل عندك

سائق جاي على سنه ويكبس لك ويلحم في موترك والشارع اساسا زحمه قدامك ويمينك
ودك تنزل له واتقول له الشيخ ابرزت الصور ؟ بدون فوتشوب الله يخليك

سائق عند الاشاره ماسك اقصى اليمين يتفادى الزحمه وعند الاشاره وقف
ينطر الاشاره تفتح .. وطبعا وراه عالم يبون يروحون يمين هذا ودك
بالهدد مال بو حارب ويكون عليه صدام صب وادزه .

[Dana’1]

على كذا ...أنقرضت الديرة!!

[هامور البورصة]

السلام عليكم و رحمة الله و بركاته
,
,
,
موضوعي بسيط لكنه يسلط الضوء على شريحة "للأسف" مب صغيرة من السائقين الي وجودهم مضر لنا كلنا...هنا ما أتكلم
عن السرعة ولا هالأمور بل أتكلم عن الفئة اللي تعتبر نفسها أفضل من غيرها و ما تحترم وجود الآخرين فالشارع...أغلبنا عانى
من هالفئة و انا متأكد أن بعض كتاب المنتدى ينتمون لهالفئة المزعجة جداً...أتمنى منكم المشاركة بإضافة فئات جديد لعلنا نفتح
بعض العيون على عيوبها و أخطائها...سائق تتمنى زواله و إنقراضه اليوم قبل بكره؟؟؟


- سائق يحجز له موقفين فالمجمعات كأن موتره بير بترول توهم مكتشفينه...يالله بمفتاح حلييييييي في نص الباب علشان يعرف ان الله حق!!!
- سائق يسكر شارع ضيق جدام سوبرماركت علشان يطلب له "باربيكان"...يالله بواحد يصك بريك في وجهه و يخليه يسبح الطبلون كامل!!!
- سائق يتجاوز من اليمين عند الإشارة كأن الي فالسيد غنم في زريبته...يالله بسيخ حار يقضض توايره الأربع في عز الظهر و الجوال مافيه شحن!!!
- سائق يطلع عليك من اللفة بدون مايشوف و بدون إشارة و ان هرنت له يعصب...يالله يطلع في وجه همر بريكه خربان ينتف أم "السني موديل 97"!!!
- سائق يمشي 40 في شارع حيوي و يهذر فالجوال و يطاوح بالموتر يمين يسار...يالله بسيارة زبالة تنقلب عليك و تسبحك حفاظات هنود مستعملة!!!
- سائق يرقد على أم البريك كأنه طوق نجاة مال التيتانك وبينه وبين الإشارة كيلوين ونص...يعل يجيك شد عضلي من كتفك لين أصابع ريولك و ما تطال البريك شهرين!!!

في غيرهم؟ المجال لكم

انا معاك ، والعينات اللي ذكرتها اسميهم ( لزهيويه ) ، مايعرفون النظام تلقاه ماسك يمين ويلف عليك وينتقل من مسار لمسار اخر بدون تركيز ، مافي فرق بينه وبين لزهيوي

[فرفوش]

- سائق يحجز له موقفين فالمجمعات كأن موتره بير بترول توهم مكتشفينه...يالله بمفتاح حلييييييي في نص الباب علشان يعرف ان الله حق!!!
م
كفوووووو هههههه وزيد عليها اللي يسكر عليك باب السائق ويخليك تنط من الباب الثاني :nice:

[شيخ الديرة]

على كذا ...أنقرضت الديرة!!

وأنا شيخ من بعدها ؟؟:omg:

[Super Cool]

اي ممنوع

انت دعيت علي اللي يسوي كذا افرض ابوك اخوك عمك خالك ولد عمك ولد خالك صديقك سواها ترضى عليهم في دعوتك هاذي ..؟

اي نعم أرضى لو من ما كان...الدعوة من حقي و الله يعلم بالأحوال و المسببات

مع إن مافي سبب على وجه الارض يشفع لمثل هالأفعال الرديئة كاصحابها

من حقي الدعوة و لله تعالى الحكم...إن شاء أن يستجيب أو يتجاوز

[Aaziz]

https://www.youtube.com/watch?v=NeNIMmXW2aM

[بوحارب]

ق يطلع عليك من اللفة بدون مايشوف و بدون إشارة و ان هرنت له يعصب...يالله يطلع في وجه همر بريكه خربان ينتف أم "السني موديل 97"!!


^

اااااااااااااااخ يا كثر هذي الفئة يا سوبر كول
والله ودك تنزل له وتسطره تسطر بس السالفة فيها تسحب للمراكز

مالنا الا نقعد في البيت ونخلي الشوارع لذولي الخبلان :)



سجل عندك

سائق جاي على سنه ويكبس لك ويلحم في موترك والشارع اساسا زحمه قدامك ويمينك
ودك تنزل له واتقول له الشيخ ابرزت الصور ؟ بدون فوتشوب الله يخليك

سائق عند الاشاره ماسك اقصى اليمين يتفادى الزحمه وعند الاشاره وقف
ينطر الاشاره تفتح .. وطبعا وراه عالم يبون يروحون يمين هذا ودك
بالهدد مال بو حارب ويكون عليه صدام صب وادزه .



ههههههههههه هههههههههههههه

[فيصل99]

اي والله صدقت

[حمد بن سعد]

الله يصلحهم ويهديهم ان شاء الله

[qrt_trading]

نضيف عليهم

- سائق يقف في مواقف المعاقين وهو من كثل عضلاته كأنه جدر عزايم
- سائق مخيم فالخط السريع و حالف ما يطلع منه لين بعد عيد الأضحى
- سائق محول دريشة موتره إلى مكب نفايات كيميائية و إشعاعية



سائق لا يقف في موقف المعاقين ولكن يقف بين موقفين للمعاقين على الخطوط الصفراء(ويعه)

[فلتة زمانها]

هاهاهاهاها موضوعك عجيب احب الي يكتب بطبيعته بدون مثاليه
شوف اخوي السواقه الحين محتاجه طولة بال لانه الغالبيه ماعندهم
ذوق وثقافه ومن الي اشوفه البنت يحترمون سواقتها حتى لو تلف عالعالم:tease:

[كلام ساخر]

الممنتدى يضم عشرات الالآف من الأعضاء
والكل أنكر مسؤوليته
حينها لم يبق غيري متهماً
ولذا سأتحمل خطاياكم جميعاً
وسأقول إنني أنا الذي أتجاوز ممن الييمين
وأنا الذي يسبب كل المشاكل المرورية
اتفقنا انني هو ذلك الشاب او الرجل

ولكن يا جماعة الخير لنضع النقاط على الحروف
أولا باب النصيحة لا يوجه بهذا الشكل
بالدعاء علينا كمخالفين < باعتبار اني مخالف لقوانين المرور
الدعاء لنا ثم الدعاء لنا كشباب
نبي الله موسى لما اراد الدخول على فرعون قال الله له (فقولا له قولا ليناً)
واحنا احوج لهالكلام اللين

ثانيا لو انا فعلا من هالشباب المتهورين
هل تتوقع اني بتاثر بكلامك من دعاء وغيره
طبعا لا لأني ارفض النقاش بهذه الطريقة
هناك طرق اقناع المفروض تتبعها
تكون منطقية ومتسلسلة

ثالثا القانون هو من يأخذ مجراه
والقوانين اعتقد انها كافية
ولو زادت ايضا ما هناك مشكلة
لان فيها النفع العام

رابعا قررت التوقف عن جميع المخالفات

[Aaziz]

الممنتدى يضم عشرات الالآف من الأعضاء
والكل أنكر مسؤوليته
حينها لم يبق غيري متهماً
ولذا سأتحمل خطاياكم جميعاً
وسأقول إنني أنا الذي أتجاوز ممن الييمين
وأنا الذي يسبب كل المشاكل المرورية
اتفقنا انني هو ذلك الشاب او الرجل

ولكن يا جماعة الخير لنضع النقاط على الحروف
أولا باب النصيحة لا يوجه بهذا الشكل
بالدعاء علينا كمخالفين < باعتبار اني مخالف لقوانين المرور
الدعاء لنا ثم الدعاء لنا كشباب
نبي الله موسى لما اراد الدخول على فرعون قال الله له (فقولا له قولا ليناً)
واحنا احوج لهالكلام اللين

ثانيا لو انا فعلا من هالشباب المتهورين
هل تتوقع اني بتاثر بكلامك من دعاء وغيره
طبعا لا لأني ارفض النقاش بهذه الطريقة
هناك طرق اقناع المفروض تتبعها
تكون منطقية ومتسلسلة

ثالثا القانون هو من يأخذ مجراه
والقوانين اعتقد انها كافية
ولو زادت ايضا ما هناك مشكلة
لان فيها النفع العام

رابعا قررت التوقف عن جميع المخالفات

200+
:thumbup1:

[توشيبا]

اي نعم أرضى لو من ما كان...الدعوة من حقي و الله يعلم بالأحوال و المسببات

مع إن مافي سبب على وجه الارض يشفع لمثل هالأفعال الرديئة كاصحابها

من حقي الدعوة و لله تعالى الحكم...إن شاء أن يستجيب أو يتجاوز

معقوله حد يرضى يدعي علي ابوه ..؟؟؟

يانك ابن عاق او مريض


شكرا

[حسن]

كل من يستخدم الجوال اثناء القياده وهم كثر لاينعدون ولا يحصون اليوم الصبح
بغيت اصور كم واحد وحده ولكن مااسعفني التصوير

[معماري قطري]

الله يجزيك بما دعيت إِن شاء الله

شهالكلام السوقي البشمرقاوي على قولة إِخونا حسن .. يا اخوي سمحوا لك تصور كل واحد من هالأَشكال اللي ذكرت وتبلغ عنه

[حسن]

الله يجزيك بما دعيت إِن شاء الله

شهالكلام السوقي البشمرقاوي على قولة إِخونا حسن .. يا اخوي سمحوا لك تصور كل واحد من هالأَشكال اللي ذكرت وتبلغ عنه

لا ابشرك البشمرقى كثر والحين زادو عليهم اللويا جرقا

صبحك الله بالخير يامعماري

[معماري قطري]

هاهاهاهاها موضوعك عجيب احب الي يكتب بطبيعته بدون مثاليه
شوف اخوي السواقه الحين محتاجه طولة بال لانه الغالبيه ماعندهم
ذوق وثقافه ومن الي اشوفه البنت يحترمون سواقتها حتى لو تلف عالعالم:tease:

انا تعودت احترم سواقة الجميع لكن فيه أُمور أَوقات تطلع الواحد من طوره .. أَمس تناحست مع باص كروة يبغي يدخل جدامي بالغصب ووقفت وأَشرت له يروح سيده ويوم فتحت الجامة والهندي شافني لأَن السيارة مخفية عرف إِنه بينضرب وراح سيده .. كانت سواقته بالقوة ولا يبي يصف في آخر السيد ويبي يدخل جدام الكل وبالغصب.

[معماري قطري]

لا ابشرك البشمرقى كثر والحين زادو عليهم اللويا جرقا

صبحك الله بالخير يامعماري

صباح الأَنوار إِخوي حسن .. ايه والله كثروا وزاد الاستهتار .. واحترام القانون والسواقة صح واجب ديني وأَخلاقي ووطني وشخصي .. يا اخوي واحد يمشي شوي شوي ويلاحظ إِنك بتاخذ سيده وبتسرع جدامه لا يجيك ويصك عليك .. ما فيه أَخلاقيات مثل اللي نشوفها قبل.

مقدر لكاتب الموضوع تعديده لهذي المواقف لكن الدعاوي حرام والحكومة شكلها شغالة على الحلول .. وآتمنى يكون فرض القانون بالقوة اللطيفة واللي يتوقف فيها الشخص ويتحاسب بالطيب وينذر أَول مره وإِن كرر يتحاسب .. والمسئلة سهلة إِنذار ويتسجل في الكمبيوتر وإِنذار ثاني يتسجل ولو حصل الشرطي إِنذار سابق تتضاعف المخالفة ويتحول الإِنذار لمخالفة .. والمعاملة لازم تكون وحدة للكل وتكون طيبة في نفس الوقت والتسامح مهم.

[معماري قطري]

لا ابشرك البشمرقى كثر والحين زادو عليهم اللويا جرقا

صبحك الله بالخير يامعماري

زين يا اخوي سؤال يشدخ نفسه على طاولة الحوار

شالفرق بين اللويا جرقا والبشمرقة؟

[مختلفة عقليا]

انا تعودت احترم سواقة الجميع لكن فيه أُمور أَوقات تطلع الواحد من طوره .. أَمس تناحست مع باص كروة يبغي يدخل جدامي بالغصب ووقفت وأَشرت له يروح سيده ويوم فتحت الجامة والهندي شافني لأَن السيارة مخفية عرف إِنه بينضرب وراح سيده .. كانت سواقته بالقوة ولا يبي يصف في آخر السيد ويبي يدخل جدام الكل وبالغصب.
هلا .،

سؤال بس .، اشلون يعني درا انه بينظرب !؟

والله ابي أسوي لهم هالحركه ،، كل اشوي حد ظاهر بويهي .، :weeping:

ويسلموو

[حسن]

زين يا اخوي سؤال يشدخ نفسه على طاولة الحوار

شالفرق بين اللويا جرقا والبشمرقة؟

والله يامعماري شكلك بتورطني في هذا الموضوع وبتزعل علينا راعي الموضوع

شرحهم طويل
وهم لهم مواصفات قد شرحتها قبل تجديد المنتدي
هم قريبين من الدرباويه
بس سياراتهم غير
ويطالعك بطرف عين ومنزل خشم موتره وناكس العقال واريل الموترولا يلوح
كان ذيل كلب امه سلقه وابوه جعري الله يعزك وكل من يقرا

بعدين اكملك

:telephone:

[حسن]

هلا .،

سؤال بس .، اشلون يعني درا انه بينظرب !؟

والله ابي أسوي لهم هالحركه ،، كل اشوي حد ظاهر بويهي .، :weeping:

ويسلموو

لا لا لا

هذا اعترف خطير اصبح المنتدي يشكل تهديد على الامن القومي
والسبب الرئيسي على خشونه المراه
احذفو الردود اللي تعلم المراءه القوه والشراسه

احنا ناقصين ياخويا

[فلتة زمانها]

هاهاهاهاها موضوعك عجيب احب الي يكتب بطبيعته بدون مثاليه
شوف اخوي السواقه الحين محتاجه طولة بال لانه الغالبيه ماعندهم
ذوق وثقافه ومن الي اشوفه البنت يحترمون سواقتها حتى لو تلف عالعالم:tease:

معظم اللي في كروه يسوقون برعونه وحتى بعض العرب الي توهم متعلمين
السواقه بعد سواقتهم تجيب المرض بس شنسوي نتحمل
انزين شنهي هالحركه الي سويتها يوم نزلت الجامه
لاني اتعرض لمضايقات وناس تلف علي يمكن عشان موتري صالون :(

[طلعة الروح]

معظم اللي في كروه يسوقون برعونه وحتى بعض العرب الي توهم متعلمين
السواقه بعد سواقتهم تجيب المرض بس شنسوي نتحمل
انزين شنهي هالحركه الي سويتها يوم نزلت الجامه
لاني اتعرض لمضايقات وناس تلف علي يمكن عشان موتري صالون :(

ماله خص والله لا صالون ولا فوريل ولا شاحنه نافعه معاهم
اللف والدوران والدخول المفاجئ لعبتهم يعني لو ماتوخرين بسرعه دشوا فيج ، مب محترمين أن في موتر قدامهم

[khaldoon]

ضيف عندك يا راعي الموضوع....السايق اللي قدامك واقف على الدوار كأنه متسمر بالاررض ولا يتزحزج ملي متر و السيارات من اليمين و اليسار تتحرك و تدخل الدوار و تروح و انت مب قادر بسببه و خايف هو يدش الدوار تقول يقفز من جبل و تهرنله ولا يرد

[غير البشر]

اي ممنوع

انت دعيت علي اللي يسوي كذا افرض ابوك اخوك عمك خالك ولد عمك ولد خالك صديقك سواها ترضى عليهم في دعوتك هاذي ..؟


لا محد من جماعته يخالف كلهم من بعيد :tease:

[Super Cool]

ضيف عندك يا راعي الموضوع....السايق اللي قدامك واقف على الدوار كأنه متسمر بالاررض ولا يتزحزج ملي متر و السيارات من اليمين و اليسار تتحرك و تدخل الدوار و تروح و انت مب قادر بسببه و خايف هو يدش الدوار تقول يقفز من جبل و تهرنله ولا يرد

اوووووه هالنوع تلاقيه متسمر و قاظب السكان بيدين و عيونه مبحلقة و العرق يصبصب...كأنه بينط على قطار متحرك في فلم هندي!!!






لا محد من جماعته يخالف كلهم من بعيد :tease:

الي يخالف يستاهل ما جاه....ليش هالمبدأ صعب على البعض؟؟؟

لو أخوك أو أبوك أو أو أو خالف شرع الله...الله بيحاسبه

كذلك الحال لو خالف أحد منهم قوانين البلد القوانين تسري عليه

ليش أدّعي المثالية؟ التجاوزات ما تمشي عندي و المتجاوز يستاهل ما جاه

[معماري قطري]

هلا .،

سؤال بس .، اشلون يعني درا انه بينظرب !؟

والله ابي أسوي لهم هالحركه ،، كل اشوي حد ظاهر بويهي .، :weeping:

ويسلموو

أَحيانا اللويا برقاوي أَو الشمرقاوي تكون عنده حاسة سادسة ويشوف الشرار يطلع من عين اللي معصب عليه ويعرف إِنه لازم يلتزم .. انا سويتها مره ونزلت وصورت واحد مخالف في الوجه ومن خوفه دخل على السيارات غصب بغى يدعمهم علشان يبين في الصورة إِنه داخل المسار وهو كان ساد مسارين ويبي يدخل بالعرض .. يعني عادي كنت باسوي مشكلة مع سواق كروة

بالنسبة للنساء التصوير يكفي ولا بس تسجيل الرقم وتقديم بلاغ

[معماري قطري]

والله يامعماري شكلك بتورطني في هذا الموضوع وبتزعل علينا راعي الموضوع

شرحهم طويل
وهم لهم مواصفات قد شرحتها قبل تجديد المنتدي
هم قريبين من الدرباويه
بس سياراتهم غير
ويطالعك بطرف عين ومنزل خشم موتره وناكس العقال واريل الموترولا يلوح
كان ذيل كلب امه سلقه وابوه جعري الله يعزك وكل من يقرا

بعدين اكملك

:telephone:

وصفك دقيق بس بعد صعب علي .. انا خلاص حفظت المصطلحين بس ما ادري للحين انا بشمرقاوي ولا لويابرقاوي ولا ما ينطبقون علي التصنيفين

[معماري قطري]

معظم اللي في كروه يسوقون برعونه وحتى بعض العرب الي توهم متعلمين
السواقه بعد سواقتهم تجيب المرض بس شنسوي نتحمل
انزين شنهي هالحركه الي سويتها يوم نزلت الجامه
لاني اتعرض لمضايقات وناس تلف علي يمكن عشان موتري صالون :(

الله يعينج والله .. انا كانت سيارتي صالون ووالله تأَذيت من أَهل الجيات القطريين والبشمرقيين واللويابرقاويين كله يجون وراي مسرعين ويلزقون في الصدام واعصب واخذ الرقم وابلغ والشرطة يحطون تعقيدات منها تعال قدم شكوى ولازم الصبح وقصة طويلة.

خذت فورويل وارتحت وريحت بالي اللي يقرب مني يقرب بمسافة ما تضايق أَما قبل يحسون ان سيارتي نمله تمشي في الشارع.

[مختلفة عقليا]

أَحيانا اللويا برقاوي أَو الشمرقاوي تكون عنده حاسة سادسة ويشوف الشرار يطلع من عين اللي معصب عليه ويعرف إِنه لازم يلتزم .. انا سويتها مره ونزلت وصورت واحد مخالف في الوجه ومن خوفه دخل على السيارات غصب بغى يدعمهم علشان يبين في الصورة إِنه داخل المسار وهو كان ساد مسارين ويبي يدخل بالعرض .. يعني عادي كنت باسوي مشكلة مع سواق كروة

بالنسبة للنساء التصوير يكفي ولا بس تسجيل الرقم وتقديم بلاغ


هلا .,

مالي الا مطراش 2 ., :victory:

ناقصين هالاشكال في الشارع .,

ويسلموو .,

[بوحارب]

ماله خص والله لا صالون ولا فوريل ولا شاحنه نافعه معاهم
اللف والدوران والدخول المفاجئ لعبتهم يعني لو ماتوخرين بسرعه دشوا فيج ، مب محترمين أن في موتر قدامهم
أمسكوا الخط الأوسط اي الأيمن وانا اضمن لكم عدم التعرض
لأي ازعاج من قبل الشباب وغيرهم


ملاحظة؛ انا واحد ماستحمل اشوف حد ماسك الخط السريع
ويمشي slowly !!!

اعطيه من ذاك الزنون اللي يشق جبهته هههههههه

[معماري قطري]

أمسكوا الخط الأوسط اي الأيمن وانا اضمن لكم عدم التعرض
لأي ازعاج من قبل الشباب وغيرهم


ملاحظة؛ انا واحد ماستحمل اشوف حد ماسك الخط السريع
ويمشي slowly !!!

اعطيه من ذاك الزنون اللي يشق جبهته هههههههه

في بلاد القانون فيها لك عليه بس اتحداك تسوي هالشيء في أَمريكا ولو يمشي 10 أَميال تحت السرعة القانونية و10 أَميال تفرق في شارع سرعته 55 ميل

[دنيا الاسهم]

حسبي الله ونعم الوكيل في اللي يسوون هالحركات بالشلرع
كلهم مروا علي
يارب تعدل الاوضاع اللي الكل عجز منها

[عاهد بن علي]

عسى الله يهديهم

[hanayen]

بصراحه انا أتمنى ان تنقرض معظم أخلاق السائقيين
بصراحه كل واحد يعتقد ان الشارع حق ابوه يكسر على اللي واقفين في السيد عادي
يحفص في الفرجان عادي
يسوق السيارة تمر عليك كأنها صاروخ
يجي وراك ويفلش في عينك رغم ان يشوف ان الشارع زحمه وما يمشي
تمر سياره الإسعاف وتشوف خمه تمشي وراها منتهزه الفرصه
ولا اللي يبطل دريشته ويبدأ يقط الزبالة ولا يفتح الباب ويتفل في الشارع الله يعزكم

تعبنا مع العيشه مع المنحطين أخلاقيا

والله من زود ما صار الكل مستعجل ممكن الواحد يمر عليه واحد فعلا مستعجل وما يصدقه
اسأل الله لهم الهدايه نحتاج ان نرقى باخلاقنا لتكون قطر واجهه حضارية تتميز بدينها واخلاقها

[طلعة الروح]

أمسكوا الخط الأوسط اي الأيمن وانا اضمن لكم عدم التعرض
لأي ازعاج من قبل الشباب وغيرهم


ملاحظة؛ انا واحد ماستحمل اشوف حد ماسك الخط السريع
ويمشي slowly !!!

اعطيه من ذاك الزنون اللي يشق جبهته هههههههه

ماكنت أقصد الخط اليسار تحديدا، أنا تكلمت بشكل عام، حتى لو انك ماسك خط اليمين وفيه مخرج على اليمين (خط فبراير كمثال)، اللي يجيك من المخرج فلت ويبي يدش فيك بدون انتباه
هذي مشكلة بحد ذاتها وقس على ذلك الكثير.