أفضل طريقة لربط الأعمدة بالقاعدة foundation

[Hamad_qa]

المختصين و أخونا معماري قطري .. هل الربط الموضح في الصورة جيد ؟
تعليقكم على استقامة كرسي أسياخ العمود و شبكها بالقاعدة

89099

[معماري قطري]

سامحني والله ما تبين الصورة عندي

وزين انك منتبه والمفروض الإِستشاري يتابع لأَن المشكلة المقاولين كثير منهم غير مؤهلين وكثير منهم يختارون طرق سهلة .. حتى تركيب بسكوتة ما يركبون صح وحتى خرسانة يدورون أَرخص ردي مكس أَو يسون خلط في الموقع ويترسونها ماي .. شفت مره بيت لصديق منشلخة الزاوية وهذا بعد نهاية البناء والصبغ وقرب السكن .. واللي باني له مقاول صديق له ويمدح فيه لكن طلعت فيه شلوخ عرضية حتى البلاط متكسر .. ودرت حوله وصلت للزاوية ذي في الحوش الا متكسرة من تحت من الخارج وبرجلي تكرمون رفستها وطلع حديد العمود غير متصل نهائياً بالقاعدة.

استغرب من الكثيرين ويمكن انت منتبه وعندك استشاري بس كثيرين أَما يدور استشاري يوقع وخلاص أَو حتى ما يعين استشاري نهائي أَو الاستشاري يكون مشرف غير مؤهل وبتاع كله وما يعرف كله وهذي مشكلة كبيرة .. أَي حد بيبني وبيدخل مشروع قيمته مليون ويمكن 2 أَو 3 أَو حتى 10 مليون على وقتنا الحالي لازم يحط بين 5 إِلى 10% من المبلغ كاستشارات .. والوقت الحالي الإِستشاريين الجيدين هذي حسبتهم .. من يعرف حدود مساحة بنيانك ويقدر تكلفة البنيان حسب متطلباتك ومساحتك يحط 5% كتكلفة للتصميم وتقريباً 5 % كتكلفة للإِشراف وبعضهم شوي أَقل .. غيرهم واللي يشتغلون بدون ذمة وشغلهم بالكامل غير مهني يسعر برخيص وايد يمكن تسعيره 1000 للإِشراف ويشرف صح بس تشوف سعر المقاول يزيد وتطلع نواقص كثيرة تضطر تدفع قيمتها حول 20% وأَحياناً أَكثر .. وهذي الزيادة يعتبرونها تعب الاستشاري ويتقاسمونها الاستشاري والمقاول وممكن مهندس الاستشاري وفورمان المقاول .. ويطلع المالك خسران تعب وضغط نفسي وخداع ما يقدر يثبته ومال وبنيان غش.

[Hamad_qa]

http://s8.postimg.org/vzmqxehtx/image.jpg

أتمنى تكون الصورة واضحة الحين اخوي معماري

[$الملياردير$]

اخوي معماري مابعد كلامك كلام والله يبارك لك في رمضان .....اخوي حمد لازم تشغل الاستشاري صح ومن خلال تجربة شخصية صج بتحس بالفرق مابين استشاري بوختم و بين واحد يمر الموقع 3 مرات أسبوعيا و يكون محترف وتقدر تجيب واحد زيارة عشوائية بشيك استلام الحديد او اي مقاول ثاني من ربعك بشيك تشيك دبل عشان ترتاح .... في النهاية هذا بيت عمرك لازم تتعب وتجتهد فية و لا تتهاون في العظم و أعماله من خرسانات وغيرة وربي يوفقك

[Hamad_qa]

جزاك الله خير اخوي الملياردير

الاستشاري اللي عندي قايم بواجبه بس أنا ياخوك من النوع اللي يدخل عمره في كل صغيرة و كبيرة
منها تأكيد و منها اكتساب معرفة و خبرة

[معماري قطري]

زين ما قصرت بينت الصورة .. عجبني الحديد يذكرني بمؤشر بورصتنا بكره إِن شاء الله.. عندك نهايات الحديد المفروض تنصبغ ايبوكسي وعندك أَسيام التربيط المفروض تكون خضرا مغلفة .. خرسانة النظافة نظيفة والتربيط صح وبتغطيه الخرسانة وبيستوي قطعة وحدة معاها

يمكن شكك قصر الحديد المربوط من تحت وهذا يعتمد على التصميم الإِنشائي والمفروض دوم يكون معقوف على شكل حرف يو حتى يثبت خصوصاً مع نوعية الحديد المغلف .. يسمونه الإِرساء أَو Anchoring بحيث يكون معلق الحديد بطريقة معقوفة داخل الأَساس وكذلك حديد الأَبيام داخل الأَعمدة وحديد الأَرضيات داخل الأَبيام .. نبه الاستشاري لهالشيء وهذا لا تهتم له إِن شاء الله قوي وما فيه أَي خطورة .. ولا تنسى تركيب البسكوتات من الجوانب واستخدام الهزاز وقت صب الخرسانة .. والله يوفقك وحاضر حق أَي صور.

[معماري قطري]

اخوي معماري مابعد كلامك كلام والله يبارك لك في رمضان .....اخوي حمد لازم تشغل الاستشاري صح ومن خلال تجربة شخصية صج بتحس بالفرق مابين استشاري بوختم و بين واحد يمر الموقع 3 مرات أسبوعيا و يكون محترف وتقدر تجيب واحد زيارة عشوائية بشيك استلام الحديد او اي مقاول ثاني من ربعك بشيك تشيك دبل عشان ترتاح .... في النهاية هذا بيت عمرك لازم تتعب وتجتهد فية و لا تتهاون في العظم و أعماله من خرسانات وغيرة وربي يوفقك

الله يبارك وللجميع إِن شاء الله ويبلغنا طاعته وصيامه وقيامه

ما شاء الله يبين شغل اخوي حمد نظيف والله يوفقه ولازم نؤكد على بعض الأُمور اللي تخليه أَفضل

[معماري قطري]

جزاك الله خير اخوي الملياردير

الاستشاري اللي عندي قايم بواجبه بس أنا ياخوك من النوع اللي يدخل عمره في كل صغيرة و كبيرة
منها تأكيد و منها اكتساب معرفة و خبرة

معاك حق والكل يستفيد من النقاش ومن الصور .. بس لا تهتم وايد عندك الأَساس لازم عميق وعمقه ما يبين وأَحياناً حتى لو الحديد محطوط سيده فيه الخرسانة تضغط بقوة خيالية لأَنها تنتفخ وتستوي جزء واحد مع الحديد والحزوز اللي تشوفها تسوي ترابط قوي وفي النهاية بيوتنا مبالغ في تصميمها الإِنشائي كثير .. يمكن شفت الصور اللي لبعض البيوت حتى حديد يمكن 10% من الحديد اللي نستخدمه.

[Hamad_qa]

تسلم اخوي معماري على ملاحظاتك اللي دايما نستفيد منها
الأشياء اللي كانت لي ملاحظات عليها هي استقامة الكانات او الرنقات و ان ما تكون المسافة بينهم اكثر من 15سم
أيضاً وجود 4 رنقات rings في القاعدة نفسها تكون مشدودة ع العمود من الأربع جهات .. مادري اذا هالنقطة مهمة ولا لا

عموما شاكر لك اخي العزيز

[معماري قطري]

العفو إِخوي الكانات تقصد بها الحديد الأُفقي اللي رابط الحديد العمودي صح؟

انا تبي الصج حتى اسمها بالانجليزي نسيته .. انت شكلك مهندس فرش ما صدى مخك مثلي .. هي إِخوي المفروض مذكورة وموضحة في الرسومات الإِنشائية وحسب التصميم الإِنشائي واللي مثل ما قلت لك دوم يكون مبالغ فيه ويحسب حساب حتى لو كانت مفقودة بالكامل .. هذي أَهميتها أَكبر في الأَبيام وقريب من العمود وكل ما زاد القرب يزيد العدد وتقل المسافة بينها حسب حسابات معينة بسبب ال shear forces عاد شترجمتها هذي اعتقد اللي هي القوى اللي تسبب شلوخ افقية وهذي خطرة جداً في الأَبيام ودليل على خلل كبير وضعف واحتمال الإِنهيار.

في العمود تحصلهم يحطونها تحصيل حاصل وعادة وحتى بدون حسابات دقيقة .. لا تهتم الا لو كانت موجودة في الرسومات وما تنفذت صح.

[Hamad_qa]

توك شباب ياخوي :) يعطيك الصحة والعافية
صحيح أنا مهندس بس تخصصي ماله خص أبد في البنيان :/
و كلامك صحيح الكانات هي الحديد الأفقي اللي رابط الأسياخ العمودية
راح اتشيك على الخرائط واتاكد من المواصفات الموجودة
مشكور يا طويل العمر

[معماري قطري]

العفو يا سميي .. شفت شلون انا لماح وكشفت حقيقتك

زين أَي تخصص إِنت؟ ما شاء الله معلوماتك المدنية والإِنشائية قوية .. انا من القلائل اللي عندهم بكالوريوسين معماري ومدني بس تبي الصج ممارستي كلها معمارية وفي المدني أَقل القليل.

[Hamad_qa]

تخصصي يالسمي هندسة ميكانيكية
الشهادة هي مجرد خطوة أولى صغيرة تجي بعدها الخبرة وهي الشهادة الفعلية
وانت ماشالله عليك غني بالخبرات اللي مرت عليك

[معماري قطري]

تخصصي يالسمي هندسة ميكانيكية
الشهادة هي مجرد خطوة أولى صغيرة تجي بعدها الخبرة وهي الشهادة الفعلية
وانت ماشالله عليك غني بالخبرات اللي مرت عليك

الله يوفقك إِن شاء الله والهندسة الميكانيكية تخصص قوي ومطلوب بعد بس الأَهم تتخصص أَكثر وتاخذ ماجستير في تخصص هندسي مطلوب ومفيد .. والمفروض الدوائر الحكومية تشجع المهندس القطري في تطوير نفسه بالدورات التخصصية والدراسية وحتى بالمشاركة في التصاميم الهندسية للمشاريع وفي البناء سواءً إِدارة أَو إِشراف