شرايكم في مكيفات gree

[][ Q6r ][]

السلام عليكم ورحمه الله وبركاته


شرايكم في مكيفات gree اسبلت لفيلا جديدة في قوه التبريد وتسرب الماء والصيانة السيرفس ما بعد البيع
،، ممكن اللي جربه لمدة اكثر من 5 سنوات ويفيدنا

[][ Q6r ][]

محد مركب هالمكيف :)

:telephone:

[مضارب دوسري]

انا من الناس اللي بيركبون بس انت اخوي طالب شهادة شخص استخدم المكيف 5 سنوات
وللامانه يمكن محد من الاعضاء استخدمه 5 سنوات

[captin]

اشوفهم داخلين بحملة دعائية قوية في الجرايد والاذاعة

أهم شي تتأكد من ان الكمبرويسور من نوع بيستون وانه امريكي أصلي
والباقي من قطع بلاستيك واكسسوارات امرها سهل .

http://www.greeac.com/aboutus.html

في الرابط راح تلاقي معلومات عن المصنع الرئيسي في الصين ومراكز التجميع في اماكن
ثانية في العالم مثل البرازيل وباكستان وفيتنام .

عشان تتأكد من الخدمات والجودة اطلب من المبيعات ارقام تلفونات بعض الزبائن
اللي اشتروا المنتج قبل 3 او 4 سنوات وأسألهم عن جودة التبريد وخدمات ما بعد البيع
وسرعة الاستجابة عند الاتصال للصيانة ومدة الصيانة .

بالتوفيق ان شاء الله

[الضمين]

وعليكم السلام ورحمة الله وبركاته
أتوقع صعبه تحصل حد مجربه خمس سنين لان اغلب الناس ما عرف هالماركه الا من سنتين او ثلاث سنين وجاي
عموما انا مركب 3 مكيفات روتري من سنه ونص والحمدلله أمورها طيبه .. ملاحظتي على الطنين ونص دفع ألهوا على اقل درجه قوي يعني ماتحتاج تزود على المروحة بس مشكلته صوته مزعج
اما الطنين هادي وماله صوت
وبالتوفيق

[الحـ قطر ــب]

توكل على الله نوع جيد جدا والصيانه اعتقد مذكور في العقد انهم لازم يخلصون الصيانه خلال يوم ( تاكد )

[حالي الذوق]

السلام عليكم
انا مركب مكيفات جري لكامل الفله من نوع جري واستخدمهم 3 سنوات.
لا انصحك ولا انصح اي شخص بتركيب هذي المكيفات. 3 مكيفات ضرب الكومبريسر عندي . وتسريب الماء حدث ولا حرج بسبب ضيق مخرج الماء.
ادفع اكثر وارتاح عندك جنرال وفوجي مثلا.

[][ Q6r ][]

وفي بعد اشخاص اشتكت من جنرال الاصلي ،، والاسعار فرق بينهم والواحد يحتار وشو ياخذ

[الـخـور]

تبي نصيحتي ومن تجربة سنوات طويلة
مكيفات دايكن الماليزية والي قطعها يابانية
من شركة تدمر انصحك فيها

واذا تبي الاغلى جنيرال

واذا تبي الاغلى والاجود متسوبيشي بس ماله داعي غالي وايد

[iamqtri]

بالنسبة للاسعار اشوفها ممتازه

الشباب جربوها 3 سنوات وماشتكوا من شي

اهم شي الكمبريسر يكون بستن مش روتر

والصيانه حاليا ممتازه بس اتوقع بعد ثلاث سنوات تصير حالها حال اي شركه بسبب زيادة المبيعات

انا مركب متسوبيشي الافضل اتوقع في هالنوع من المكيفات وشركه عريقه بس الصيانه الله يعزك :anger1:

ونصيحه لو ركبت المكيفات:

1) وقت التركيب خلهم يضبطون السلوب (الميلان) للمكيف صوب بيب الماي ويكون معتدل... يعني مايكون مايل بزياده ولا يكون مسنتر
2) نضف الفلتر كل اسبوعين لان جونا مغبر ومرطب وهالشي بيجنبك انسداد بيب الماي
3) صيانتك حاول تكون قبل موسم الصيف بشهر شهرين يعني على شهر 3 بالكثير اتصل لهم لاني لاحظت انهم فالصيف يعتفسون

[iamqtri]

واذا ماخت هالنوع

خذ نوع يكون الكمبريسر بستن ويفضل الياباني او الامريكي فقط

[خزامئ]

انا جربتها سبلت
من سنه ونص
اول سنه ممتازه
بعد السنه قلت اشيك عليه واغسله مثل كل البيت بدايه الصيف نشيك ونغسل
قالو حن مانغسل الضمان مافيه غسيل
انا كل الشركات الي اعرفها بعد سنه فيه غسل مجاني
قالو ماعندنا ذي الخدمه
وغسلنها 150 من اربع شهور
ومن رمضان وهو هواه مش بارد
كلمنهم وجاونا
قالو يحتاج غسيل :(
عسا ماشر كل اربع شهور:(
غسيل
لاحول ماعندنا حل غيره وغسلنا
وكلها علئ حسابنا ولا انصح حد ياخذه
هاذا رايي الشخصي

[خليفـة]

خذ مكيف دايكن من تدمر
وبتعرف شنو معني الراحه

خليفة

[مضارب دوسري]

طل اللي يشتكون من جري اتوقع انهم ماخذين كمبريسر روتري
الروتري
نفس ال جي وباناسونيك وسامسونغ وغيرها من المكيفات

قبل الشراء
لازم تشتري
اما كمبريسر بستن مثل جنرال وفوجي وجري
او
امريكي مثل كليفنتور ودايكن

غيره لااااااا


وعلى فكره اللي اعرفه ميتسوبيشي ماعندهم مكيفات بستن ؟؟؟؟

[خليفـة]

طل اللي يشتكون من جري اتوقع انهم ماخذين كمبريسر روتري
الروتري
نفس ال جي وباناسونيك وسامسونغ وغيرها من المكيفات

قبل الشراء
لازم تشتري
اما كمبريسر بستن مثل جنرال وفوجي وجري
او
امريكي مثل كليفنتور ودايكن

غيره لااااااا


وعلى فكره اللي اعرفه ميتسوبيشي ماعندهم مكيفات بستن ؟؟؟؟

حتى دايكن يالغالي
ماعندهم بستن للطنين
لكن عندهم تقنية افضل من البستن لبو طنين
والطنين ونص يجي بستن
تقييم الدايكن ممتاز .. والدليل استخدامة في كثير من المساجد
والمباني الحكومية
الواحد يدفع زيادة بسيطة .. ويرتاح لفترة طويلة

خليفة

[السيليه]

جرب فوجي انا جربته ممتاز

[][ Q6r ][]

خذ مكيف دايكن من تدمر
وبتعرف شنو معني الراحه

خليفة

جربته المكيف ؟؟ وكم سنه معاك ؟

[][ Q6r ][]

جرب فوجي انا جربته ممتاز

كم سنه وانت تستخدمه ؟

[عقرب]

فوجي لا يعلى عليه ممتاز وتبريده كذلك

[][ Q6r ][]

فوجي لا يعلى عليه ممتاز وتبريده كذلك

فوجي سعره قريب من جنرال واللي سمعته تصنيعهم نفس بلد التصنيع ،،

[kuwari]

امجرب الكيف من سنتين بارد وممتاز والحين امركب بيبات المكيفات من عندهم للبيت الجديد

بس حاسب تاخذ حجم اكبر من الغرفه مثال غرفه 5 في 5 طنين يكفي

[][ Q6r ][]

لا هنت اخوي عالنصيحه ،، وشكلي باخذ لان اشوف اسعارهم الافضل :)

[لجين قطر]

ما انصح فيها بصراحه

[مرهوب]

اشوفها ناجحه عندي بس اخذ من طنين وفوق

[ريتويت]

شوف من تجربه صراحه المكيف يبرد زين وحلو بس عقب سنه تقريبا تلقاه ينزل نافوره ماي ويبتدي يبي تصليح وادفع عاد

[(المهندس)]

احنا شركة تركيب مكيفات ماعندنا وكالة معينه نتعامل مع الجميع ولكن نفضل تركيب جنرال او ميتسوبيشي اريح لنا وللعميل

طبعا اتكلم عن مكيفات سبيلت دكت

[CiTy]

السلام عليكم ورحمة الله

بخصوص مكيف قري موجود عندي منه واحد ركبته وماكان في نيتي اني اركبه من الكسل مريت صوب المحل وكان قريب مني وتدخلته قلت اشوف
وما وعيت الا وانا شاري واحد طنين ونص خلال يومين ركبوه :nice:
عندي غرفة 4 في 4 ركبت فيها جنيرال طنين ونص وتبريده كانه مكيف توه يتعلم التبريد . يبرد على استحياء
اما Gree ركبته في غرفة سته في خمسة وتبريده عجيب ديماً اخليه على 20 او 21 اما الجنرال ديما على 18 ابيه بس يبيض الوجه
الفرق ان الجري صوته اشوي عالي لكن تبريده فوق الممتاز . هل راح يتغير بعد كم سنة او يتم على حاله مادري بس حالياً تبريد عجيب
وبخصوص اللي يقول انه ينزل ماي هذه مشكلة كل مكيف وهو امر عادي فقط سلك المواسير وامورك طيبة بس في ناس ماعندها خبره او دراية ان المواسير
مالت التصريف تنسد مع الايام وعلى بالها ان العيب من المكيف وهو ماله خص في المكيف مجرد انسداد في مواسير التصريف الخارجية .
وشكرا
^_*

[][ Q6r ][]

لاهنت اخوي على الرد

[ameeer3]

مكيف ممتاز وبااااارد - بس عليك بالصيانة والتنظيف - وبالنسبة للشركة ما عليها كلام من ناحية الخدمة ما بعد البيع

[][ Q6r ][]

مشكور اخوي ،،،،،،،،،،،

[عيسى111]

مكيف جيد وشديد البرودة وصيانة سريعة الغسيل خلال أربعة وعشرين ساعة ويكلف مئتين وخمسين ريال

أهم شيء يكون ممر تصريف المياه كل مكيف بنفسه تحمل تخليهم شبكة وحده أو حتى مكيفين في شبكة لازم كل مكيف بنفسه

وتحتاج لمكينة شفط خاصة بالماي للتنظيف الدوري والأفضل كل شهر مرة والسسب كثرة العادم في البلاد والذرات الصغيرة لأن المكيف طول الوقت يفلتر جو الغرفة ومنها تنسد المواسير

ومكينة شفط الماي عبارة عن مكنسة هوائية خاصة بشفط الماي وفي نفس الوقت تستخدم استخدام عادي وقيمتها ستمائة ريال تقريبا تحصلها في اللولو أو كار فور

وطريقة تنظيف مواسير المكيفات بتركيب إنبوب الشفط في آخر مجرى الماء الخاص بكل مكيف وتشغيل ماكينة الشفط لتقوم بدورها في سحب جميع الترسبات من انبوب تصريف المكيف وتسليك المجرى بشكل جيد

[عيسى111]

نسيت أقول لك من الأفضل فلتر الهواء داخل المكيف يتم تنظيفه اسبوعيا

[رذاذ]

مركبه اكثر من 6 شهور وتمام التمام
بستن وباارد ولا عليه اي ملاحظه

[رذاذ]

الشركه جديده وعليه اقبال محدن استخدمه 5 سنين

[][ Q6r ][]

شاكر لكم :)

[Class - Qtr]

السلام عليكم

مركب المكيفات من ( سنتين ) بستن والحمد الله 3 مكيفات عندي بلا مشاكل

كل سنه مرة التنظيف للمكيفات وخدمتهم جيدة وشركه ممتازة من وجهه نظري

[قدها وقدود]

السلام عليكم ورحمه الله وبركاته

بصراحه المكيف اشوفه ماعليه كلام واحد من الربع ركب مكيفين وكل واحد 2 طن في المجلس صار لهم تقريبا سنتين

وللحين مافي اي مشاكل بارد ويدف ماشاءالله اذا شغلنا المكيف اللي عاليمين الشباب يجلسون عاليسار من البرد واذا اللي على اليسار

شغال نجلس عاليمين من البرد وماشاءالله مكيف ماعليه كلام ودرجة البروده على رقم 23 و 24 واحيانا 22