بخصوص امتحانات الدور الثاني !!! تخبيط المجلس الأعلى للتعليم

[قوت القلوب]

السلام عليكم ورحمة الله وبركاته


بداية الف الف مبروك لأبنائنا الطلبة اللي نجحوا ومنها للأعلى إن شاء الله واسال الله ان ينفع بهم البلاد والأمة الاسلامية.

أما بالنسبة للطلاب اللي عليهم دور ثاني !!

تفاجئنا أن الإمتحانات بعد العيد مباشرة!!!
بدون مراعاة لحال المجتمع القطري في هذا الوقت بالذات ، لأن معظم الناس تسافر فالصيف وعامل حجوزاتها من طيران وسكن وقطارات وفيز وغيره.

وإذا كان المدرسين والمدرسات نفسهم بيكونون في إجازتهم الرسميه اللي ينتظرونها بفارغ الصبر كل عام ومجبورين عليها ومتقيدين بها مع الطلاب، وطبعا لايكاد يخلو منزل قطري من مُدرس أو مُدرسة وغير أبنائهم الطلاب اللي قد يكون واحد منهم أو أكثر رسب وله دور ثاني .

صارت حالة استنفار بخصوص توقيت امتحانات الدور الثاني الكل متفاجئ بالتاريخ بعد العيد مباشرة!!

ليش مايكون قبل انتهاء اجازة المدارس باسبوع اوبعد الاجازة حتى 30/8؟؟؟؟!

ليش اتجيب مدرسين عمل اضافي عشان تمتحن الطلاب في هالوقات ؟!!

السفريات مليانه ناس يعورون القلب اختربت اجازتهم واخسروا فالتذاكر وغيره ، وناس كان لهم علاج كنسلوا ومدرسات ومدرسين اصبحوا مقيدين خلاص لان اجازتهم مرتبطه بالطلاب وعندهم احد ابنائهم راسب !

ومب كل العوايل تقدر اتخلي اعيالها بروحهم عند خدم او عند ناس من الاهل وغيره

يعني الصراحه احنا رمضان وسمعت من الدعاوي على متخذين القرار ما الله به عليم من القهر اللي صاب الناس في هذا التخبط في القرارات !!!

لان اللي يقرر شخص من الاداره فالمجلس الاعلى وغير مرتبط باجازة محدده باني عليها امال انه بيرتاح فيها بعد جهد عام كامل من التدريس ، وبيسفر اهله ويسعدهم في هالاجازه .

اترك التعليق لكم وانا متاكد ان في ناس كثيره من القهر مب عارفه اتراجع من ولا تشكي حق من لان احنا فرمضان ولا في رادو ولا غيره

[بطل الفريج]

انا عن نفسي مرتاح من التاريخ .

[@north_star@]

لكل مجتهد نصيب والشرهة على الاولاد الراسبين لانهم هم الي تسببوا بتاخير اهاليهم وتغيير برنامج السفر والاجازات

[شيخ الديرة]

ليش مايكون قبل انتهاء اجازة المدارس باسبوع اوبعد الاجازة حتى 30/8؟؟؟؟!


يكون متأخر للتقديم على الجامعات, اذا نجح

[حسن]

الصراحه مالهم حق خربو على هل قطر السفر ومايدرون ان السفر اصبحت فريضه واجبه على كل قطري

ياريت يخلون الامتحانات قبل بدايه العام الدارسي بيومين

ونتمنى لكم النجاح وسفره سعيده

:)

[العنيده]

هو تاخير النتايج شوي اربك الحسبه
الله يعين ان شاء الله وبالتوفيق للجميع

[غايه الطواش]

لالالالالا مالهم حق يخربون على هل قطر اجازتهم

بس العيال يرسبون عادي!!

اسفه بس مذهوله من الموضوع

[عاشق العديد]

لالالالالا مالهم حق يخربون على هل قطر اجازتهم

بس العيال يرسبون عادي!!

اسفه بس مذهوله من الموضوع

والله نفس الفكره ..
يعني بدال مايكون العتب على الطالب العتب على المجلس الاعلى ..
انا اشوف وقتهم مناسب انه مايمتحن الطالب وهو صايم يخلص العيد والصيام ويمتحن وعقبها سافر وين ماتبي تسافر الله يحفظك ..
انا من وجهة نظري اشوف الوقت مناسب .. وبالتوفيق للجميع ..

[ضوى]

لالالالالا مالهم حق يخربون على هل قطر اجازتهم

بس العيال يرسبون عادي!!

اسفه بس مذهوله من الموضوع


حتى بهاي بيلومون المجلس الاعلى للتعليم !!!!!

وعلى فكرة ترا المدرسات اللي بيداومون فهو بكيفهم وبمقابل مادي وهم اللي وافقوا ، مب إجبار هو

[دااانة قطر]

الحمدلله ماعندنا حد راااسب
والله يوفق الللي عليهم دور ثااني



في اي تااريخ تبدأ الاختبارات؟

[بوراشد82]

راسب ومدلعينه ومودينه سفرة!!! وعقب يلومون المجلس !!!

[وحيد-الشوق]

ترى السفر مب واجب او ضرورة في الحياة تذكرتك الغيها والمفروض اي شخص يحجز قبل يتأكد من سياسة الالغاء للتذاكر والفنادق ويختار التذكرة الي عليها استرداد القيمة مع خصم بسيط وكان الله غفورا رحيما

ولاتنسى الامتحانات بعد العيد مب في العيد !!!!!!!!!!!!!!!!

يمكن اتعاطف مع البعض للأمانة لكن انا مستحيل احجز وادفع فلوس بدون التأكد من ولدي انه ناجح او اخوي او غيره لازم التخطيط يكون صحيح للسفر مب اي كلام

لحد يزعل من الحق الغلط غلطكم انتوا :)

[Ţĥę őήę]

العيال ما رسبوا الا من إهمال الأهل لا مبالاتهم
مايسألون الولد عن دروسه نجح رسب عادي

[دااانة قطر]

الاختبارات قبل العام الدراسي الجديد بأسبوع يعني رجعوه نفس نظامنا السابق عندهم أكثر من شهر الدراسه مو نفس العام واللي قبله بعد النتائج باسبوعين

[Rashid554]

اذا ولي الامر يسفر ولده الراسب اظن لازم في قانون يمنع ولي الامر والولد لان هذا اهمال من ولي الامر ،،، الصراحه هالموضوع قمه في التخبط!!

[قوت القلوب]

بعض الردود !!!

الظاهر الاغلبيه من زمن الطيبين >>> تنجح تسافر ماتنجح انت كافر!

يمكن الولد رسب بسب اشياء كثيرة غير الاهمال

وانا اشوف السفر مهم جداً لتغير النفسيه للجميع ودافع لإعادة النشاط وزيادة العطاء

[شيزكيك]

انا اوافقك الراي اختي واصلا جداول الدور الثاني طلعت متاخر جد الناس احجزت التذاكر والفنادق
وطالما المجلس محدد مراكز للاختبار المفروض يمتحنونهم الحين ويطلعون النتايج وهل

[يمامـة]

زمن العجايب..

طالب راسب يكافأ بالسفر..

البعض يقول لربما رسب لظروف خاصة .. مب المفروض
يقعد ويدرس ويقدم اختباره وعقب يفكرون في سفره ؟


الناس تغيروا وصاروا يدلعون عيالهم بشكل مستفز وفي الأخير
كل اللوم على المجلس الاعلى للتعليم..

[ضوى]

زمن العجايب..

طالب راسب يكافأ بالسفر..

البعض يقول لربما رسب لظروف خاصة .. مب المفروض
يقعد ويدرس ويقدم اختباره وعقب يفكرون في سفره ؟


الناس تغيروا وصاروا يدلعون عيالهم بشكل مستفز وفي الأخير
كل اللوم على المجلس الاعلى للتعليم..

شي عجيب والله

[يمامـة]

شي عجيب والله

والله يا ضوى من عقب اختبارات الثانوية العامة وظهور النتايج
عشت حالات صدمة و دهشة واستغراب من امور كثيرة حولي..
بداية من نسبة بنتي غير المتوقعة نهاية الى اولياء الأمور اللي ما يدرون
شنهو المطلوب منهم في مثل هالزمن ..

أم تقول بنتي يايبة 97% ما اقبلوها في جامعة جورج تاون
طيب بنتج هذي كم نسبة ايلتزها؟ هل تعرفين شنهو متطلبات جامعة جورج تاون؟

بنت ثانية مسارها طبي وفي الاحياء درجتها نازلة ولكن نسبتها عالية مع انها عندها اليتز
هذي اشلون ممكن يقبلونها في كورنيل؟

شاب نسبته95% ما عنده اي سي تي والايلتز 5.5
شنهي فايدة نسبته وهو ما عنده متطلبات دخول تكساس..

طالب ثالث عنده ايه سي تي الحد الأدنى وعنده 7 اليتز
ورفضوه كارنيجي ميلون ونسبته93%
وعلامته في الرياضيات نازلة في شهادته .. اشلون ممكن يقبلونه ؟

يصرخون ليش عيالنا حطاينهم تأسيسي في الهندسة في جامعة قطر
مع عيالنا نسبهم فوق 90% وفي اللي 98%!!!
ترى في متطلبات للتخصصات ما يصير الواحد لأن نسبته عالية تعال وطب في التخصص
اللي يعجبك..

حتى السبونسر اليوم لو بياخذ طالب مثلا في الهندسة ويايب نقول99%
اول شي يشوفون درجاته في الرياضيات والفيزيا حتى لو عنده اليتز..
واييب قبول سنة أولى في الجامعة ..

لأن عدم قبوله سنة أولى يحرمه من كفالته دراسيا..
اللهم بعض الشركات عندها شروط خاصة وما تطبق على الكل ايضا..
للأسف الشديد للحين كمجتمع نتعامل مع ثقافة النسبة بينما الجامعات الكبيرة
تعترف بمواد التخصص فقط..

قلة قليلة جدا من الناس ينتبهون لدرجات عيالهم في مواد التخصص للجامعات اللي بينتبسون
لها .. اما احنا وانا وحدة من هالناس نركز على النسبة العامة في الشهادة ..
حتى لو عيالنا يايبين المتطلبات ومقبولين في الجامعات وباذلين مجهود كبير
تلقيننا ننسحب سحاب للثقافة الاجتماعية العوية..

ومع هذا اليوم نشوف ليش المجلس الأعلى ما راعى ظروف السفر
لاولياء أمور الطلاب الراسبين :"(

يا عالم الدولة تكافئ المتفوقين تبون المجلس الأعلى يراعي الراسبين؟

مب زمن عجيب وبس الا مصيبة المصايب..