الكلمه الطيبه مو حرام وليست بفلوس

[لمت اب]

أخواني أخواتي

لماذا نستخسر الكلمه الطيبه للأخرين

رجل مرور ينظم حركة السير في عز الشمس
مو حرام تقول له جزاك الله خير
او يعطيك العافيه او شكرا اخوي
وليش نطوف من قدامه نافخين المكيف حده والمسجل شغال ولا نلتفت له ولا نعبره
مو حرام تقول للفراش الي ينظف المكاتب ويحرص على راحتك شكرا
مو حرام تقول لمن يكنس الشارع امام بيتك ويخلصك من القاذورات ان تقول له شكرا
مو حرام تمر على شخص تسلم عليه وانت ما تعرفه
سمعت عن مسلم توفي مو حرام تدعوا له
شخص افادك بمعلومه او نصيحه او حذرك من شيء بكتابة موضوع في المنتدى او تغريده
لا تبخل عليه بالدعاء
وللعلم فان هناك ملك موكل اذا دعيت لأخيك المسلم قال الملك ولك مثله


الحمد لله ان ديننا العظيم حث على الكلام الطيب والفعل الطيب
وحتى تبسمك في وجه اخيك صدقه

[MAZEN37]

سبحان الله في ناس فيها خياس نفس غير طبيعي
كبر وجلافه وقلة ذوق مع كل شخص مع انهم يخدمونه
بس امراض نفسيه بعيد عنك
قدوتنا الرسول ص كان يحترم الخادم والزوجه ويرحم الفقير ويعطف على الاطفال
وكان يدعو اللهم احشرنا مع المساكين
اللهم لا تفتنا قبل الموت ولا ترحمنا وتعفو عنا

[مختلفة عقليا]

السلام عليكم .,

والله ما بسوي هالشي الا ., اللي قلبة نظيف وفيه احساس لكل كائن حئ .,

الكلمه الطيبه لها تاثير ., علي كل شي (( في علم الطاقة )) وفي البشر بصفه عامة .,

ويسلموو .,

[ya3coub]

الكلمة الطيبة المصحوبة بابتسامة

تكسر الكثير من الحواجز

و الي مكشر و يتعامل بهالأسلوب ينفرون الناس منه لو من يكون

و لقوله تعالى :"ولو كنت فظا غليظ القلب لانفظو من حولك"

الإسلام و الرسول ربونا على مكارم الأخلاق و حسن التعامل و التصرف حتى مع من يسيء إلينا


الي يعود نفسه على الكلمة الطيبة بيتعود انه يبادر فيها حتى قبل ما انه يشكر و يرد على الناس بكلمة طيبة

و الي يسوي خير المفروض انه يبتسم و يفرح لما يفعله انصدم من البعض لما يتصدق او يعطي العامل مبلغ نقدر كأكرامية او صدقه يكون معبس

[abu m7md]

قال رسول الله صلى الله عليه وسلم : انما بعث لأتمم مكارم الاخلاق . او كما قال عليه الصلاة والسلام....
الصلاة والزكاة والصوم والحج . كله موجود مسبقا وانما بعث ليصححها لنا ويوجهنا الى الطريق الصحيح
ولله المثل الاعلاء .
انا كل ما امر على دورية او رجل مرور اتبسم له واضحكه اشوي . وحزات يكون معاي ماي اعطيه اياه . وربعي يقول لي ملقوف انت تبيه يخالفنا وش دراك بنفسيه قاول لهم ما عليكم مني انا حر بتصرفي .
فعلا استغرب التكشير فالويه مع انه اي شخص يكشر في ويهي ارجع اكلمه واحاول اضحكه واذكر في امور توسع صدره


اذكر مره كنت في سيلين اصلي المغرب واحذاي دورية فيها واحد ينتظر رفيجه يرجع من شان يصلي بعده
نطرتهم لين ماجتمعوا فالموتر وادش عليهم واسلم كانوا مخيسين وقلت لهم كلمه انا بروح لللعديد بحدق وانتم افتروا هني القطري فهم شالمقصد وضحك بقو والله يا اخوان انه ضحك بقو وخويه مب فاهم شي ووعتهم اذا رجعت وحصلتهم بعطيهم من الصيد .
ولا ننسى اخواني انه تبسمك في وجهك اخيك لك صدقه

طولت عليكم
اخوك
ابومحمد

[Qatar Perfume]

يا حي الكلمه الطيبة.. ترفع المعنويات..

بعض الناس الكلمه الزينة ماتطلع منهم ولا يعجبهم شي وكله مكشرين..

مافي احلى من ابتسامه امي او ام زوجي لو امدح لها شي اطبخته او حتى ملابسها..

الكلمة الطيبة تحبب الناس فيكم..

[alsoq]

كفايه انك تبتسم ويكون وجهك بشوش معا العامل وعامه الناس
والكلمه الطيبه تشرح صدر من يسمعها وتشيل الكبر في النفس

[يمامـة]

الكلمة الطيبة المصحوبة بابتسامة

تكسر الكثير من الحواجز

و الي مكشر و يتعامل بهالأسلوب ينفرون الناس منه لو من يكون

و لقوله تعالى :"ولو كنت فظا غليظ القلب لانفظو من حولك"

الإسلام و الرسول ربونا على مكارم الأخلاق و حسن التعامل و التصرف حتى مع من يسيء إلينا


الي يعود نفسه على الكلمة الطيبة بيتعود انه يبادر فيها حتى قبل ما انه يشكر و يرد على الناس بكلمة طيبة

و الي يسوي خير المفروض انه يبتسم و يفرح لما يفعله انصدم من البعض لما يتصدق او يعطي العامل مبلغ نقدر كأكرامية او صدقه يكون معبس

:victory:

[T A L A L]

-




بس بعد مرات نقول كلمة طيبة ونتفاجئ بردة فعل غريبة !
يعني البعض من كثر ما الناس مخيسه ما صار يتوقع كلمة طيبة ..
وصار الكل مخيس اعوذ بالله :weeping: شيء غريب والله !
ترى نظرة اغلب اهل الخليج للقطريين انهم شعب نفسية ومخيس :eek5: ؟
تتوقعون هالكلام اللي يقولونه عنا صحيح ! وهل احنا بالفعل شعب مخيس ؟


انا الحمد لله شخص كلمة شكراً , مشكور , ما قصرت على لساني دايم ..
مع كبير ولا صغير ولا هندي ولا قطري ولا عربي شيء احبه فيني والله :nice:





-

[طير حوران]

صدقت بيض الله وجهك

جزاك الله خير الجزاء

[يمامـة]

-




بس بعد مرات نقول كلمة طيبة ونتفاجئ بردة فعل غريبة !
يعني البعض من كثر ما الناس مخيسه ما صار يتوقع كلمة طيبة ..
وصار الكل مخيس اعوذ بالله :weeping: شيء غريب والله !
ترى نظرة اغلب اهل الخليج للقطريين انهم شعب نفسية ومخيس :eek5: ؟
تتوقعون هالكلام اللي يقولونه عنا صحيح ! وهل احنا بالفعل شعب مخيس ؟


انا الحمد لله شخص كلمة شكراً , مشكور , ما قصرت على لساني دايم ..
مع كبير ولا صغير ولا هندي ولا قطري ولا عربي شيء احبه فيني والله :nice:





-

بخصوص سؤالك في السابق ابدا ما كان الانطباع عن القطريين انهم مخيسين النفس
لأنهم بسطاء كانوا وعلى سجيتهم ,, لكن ممكن هالصفة لحقت فيهم بسبة التطور
وزيادة الخردة ..

[لمت اب]

اعزائي شكرا لكل من شارك وافادنا في الموضوع
خاصه الأخت المختلفه
قطر برفيوم
والسوق وابو محمد ويعقوب ويمامه
.................................................. ..ز
اختلف بشده مع ماذكر ان شعب قطر معروف انه متعالي او مخيس النفس
شعب قطر معروف من قديم الزمان انه شعب طيب ومتواضع وخلوق جدا جدا
يمكن ينافسنا في التواضع والأخلاق بعض الشعب العماني فقط
وفيه ملاحظه او معلومه ماحبيت اذكرها ولكن الان مضطر اذكرها وهي :
معروف عند الكثيرين انه اذا مر عليك شخص وانت واقف في السوق او المسجد او في الشارع
وسلم عليك فأعرف انه قطري صحيح
اما اذا ما سلم ومر كأنه مايشوفك فأعرف انه غير قطري
حتى لو لبس غتره وعقال وحتى لو كان عنده جواز قطري
أهل قطر فيهم هذه العاده من زمان انه يسلم على كل من يلقاه قدامه
واذا شاف رجل غريب في مسجد حارتهم او منطقتهم لازم يعزمه على القهوه
واذا استجاب للقهوه يعرض على الغريب العشاء او الغداء
قمة السذاجه والخواء ونقص المعرفه عندما يأتي واحد لشخصين يتحدثون مع بعض
ويسلم على واحد لانه يعرفه ويترك الثاني لانه مايعرفه
يجب أن لا يخص بالسلام من يعرفه دون من لا يعرفه
(عن عبد الله بن عمرو أن رجلا سأل النبي صلى الله عليه وسلم أي الإسلام خير قال تطعم الطعام وتقرأ السلام على من عرفت وعلى من لم تعرف)
ومن الخطأ ان يأتي لجماعه ويقول سلام عليكم يا راشد مثلا
فالسلام حتى لو شفهيا يجب ان يكون للجميع
صدمه اذا كان شعب قطر اصبح يعرف بانه متعالي ومخيس النفس
تدرون هذا ايش يعني ؟؟
يعني ان هذا الجيل اصبح جيل خاوي
منظر بلا مخبر
فلوس بلا سياسه ولا حنكه وما ابي اقول بلا مرجله بعد
لان السلام وبساطة الوجه وفلة الحجاج وادخال السرور على الغير مرجله
عسى الكلام الي سمعناه عن اهل قطر مو صحيح

[T A L A L]

-






انا لما ذكرت نقطة نظرة الخليج " شعب قطر مخيس وشايف نفسه "
انا قطري واكيد يزعلني لما اشوف نظرة الخليج لنا بهالطريقة ..
بس الحق ينقال , بعض القطريين مو الكل مخيسين النفس مع الكل مو احد بعينه ..


والمشكلة لو شخص او ثنين بنقول ظروف او فيهم شيء او متضايقين من شغله :weeping: !
بس نسبة كبيرة منهم , وبعضهم لا يكون مخيس مع الاجانب اكثر من القطريين ..
يعين اشوف ربعي يسولف معي ويضحك وفجاة لما يجي يطلب من مطعم يخيس النفس ويعصب ؟
ليش يعني ابي افهم ! توك وش زينك ليش قلبت وصرت مخيس مع هالفقير المسكين !


ترى الابتسامة صدقه وحلو الواحد يبتسم , بس الموضوع تعدا مرحلة ان احنا بين بعض ..
صرت نظرة عامة ل شعب قطر انهم مخيسين وهالكلام يجيني من اصدقاء لي من دول الخليج !


وذكرت الاخت " يمامة " سبب انه كثرت الخردة وتطور دولتهم خلاهم بالطريقة هذي :eek5:
تشوفون ان هذا سبب مقنع لخياس النفس مع الكل او مع الاجانب ! مادري سؤال صعب والله ..




-

[Qatar Perfume]

تذكرت موقف مره كنت في الكلية شفت وحده منقبه و لابسه عبايه راس عبايتها كانت مغبره وايد الظاهر تسندت على السور وماشافت عبايتها فقلت لها ترا عباتج مغبره ..انبهها اكيد اي شخص ما يحب يكون بهالمنظر ملابسه عليها غبار .. طالعتني بذيج النظره اللي خلتني اتحسف اني تكلمت :eek5: حتى ما كلمتني ولا انطقت..

فيه بنت ثانيه شفتها في الجمعيه كانت الشيلة عدله بس طالعه رقبتها من ورا وهي ماتدري فقلت حق زوجي روح بكلم البنت قلت لها اختي ترا ارقبتج طالعه ابتسمت لي و قالت جزاج الله خير و عدلت شيلتها ..

[khalid525]

كلامك مضبوط لمت اب واعتقد هذا السلوكيات من اولويات الدين

[فيصل99]

كفاية حديث الرسول صلى الله عليه وسلم بما معناه (أكثر مايدخل الناس الجنة تقوى الله وحسن الخلق) وقال (ذهب حسن الخلق بخيري الدنيا والاخرة)

صراحه ماشفت واحد راعي خير من زمان وشايف الخير قبل لاينولد إلا متواضع وصدق من قال مايتواضع الا الكبير

وماشفنا التكبر والكبر الا من حديثي النعمة الي احشاءه مملؤه فقر وهو في الحقيقه بلا شك يعاني من مرض نفسي معقد وقلة ثقه فالنفس يعوضها بالكبر عن خلق الله

وكفايه حديث الرسول الرادع عن التكبر الذي يقول (لا يدخل الجنة من كان في قلبه مثقال ذرة من كبر) لمن كان له قلب أو القى السمع وهو شهيد .

خل يتكبر الي يتكبر مرده يستوي جثة متعفنه يندفن في التراب تتغذى عليها الديدان ولا يملك يسوي شي المسكين

[أم محمد 90]

حتى فالدوام لما موظف عندك يسوي شغل فوق طاقته ويقعد لين مابعد الدوام ودوم يجي بدري عكس موظفينك مو حرام لو قلت له كلمه ترفع معنوياته !!!