استفسار عن اسبانيا

[Bin Hood]

السلام عليكم ورحمة الله وبركاته

يا اخوان ان شاء الله في مخطط سفر حق مدريد و برشلونة نهاية شهر اغسطس

فحبيت استفسر منكم مشكورين عن الإمكان التي تنصحون بها

الاسواق المطاعم الأماكن الاثرية المتاحف الملاعب

كوفيشوبات مميزة محلات او منتجات أو تور سياحي

بغيت نصائح بشكل عام

لحد يقول لي غير الوقت او الدولة ما في مجال

وجزاكم الله خير

[Bin Hood]

وينكم يالربع !!

[al saad]

في برشلونه عليك بالباص السياحي في خط احمر وخط اخضر اعتقد ب 20 يورو بويديك كل معالم برشلونه المهمة وتقدر تنزل أي مكان تبيه وكل ساعه في باص في نفس المكان الي نزلت فيه والتذكرة لطول اليوم وفيه عروض حسب الأيام

[Bin Hood]

شكرًا اخوي السعد

وشو الفرق بين الأحمر والأخضر

يقولون في شارع الرمبلا ، وشو هو بالضبط

وجزاك الله خير

[Diwan]

مرحبا اخوي ..

والله اللي فهمت ان عندك معلومات عن المدينه فقط تبي نصائح عامه ..

اخوي في برشلونه اسكن في شارع الرامبلا وانصحك با فندق المريديان موقعه ممتاز ..وكل شي حولك ..
شارع عباره رصيف (جزيره) بنص فيها كشكات ومهرجين ومطاعم .. وغير المحلات والمطاعم اللي صوب شارعين .. وساحة كتلونيه وشارع الماركات وغير الدواعيس اللي فيها محلات عجيبه ورخيصه ..

[start555]

انصحك بالدواعيس اللي عند شارع الرامبلا ( برشلونه )

[Bin Hood]

شكرًا اخواني ديوان و ستارت

باشوف شو موضوع الدواعيس !!!!

ان شاء الله انزل موضوع اذا عدت بداية شهر تسعة

على فكرة اول مرة باروح ان شاء الله

بس أنا ما احب أشوف الصور واروح احس يقلل متعة اكتشاف البلدة

[monatee]

العام رحت برشلونه ومدريد

وفي العيد هذا بنروح برشلونه لان بناخذ كروز منها


كم مده السفره مالتك ؟ عشان اقولك اشلون ترتب

[Bin Hood]

من واحد وعشرين اغسطس الى خمسة سبتمبر

[monatee]

سفرتكم تعتبر 15 ليله

من رايي تحاول تدخل مدينه ثالثه معاهم ،، ولا راح تمل وخاصه فمدريد

5 ليالي برشلونه
5 ليالي جنوب اسبانيا ( مالقا او ماربيا )
5 ليالي مدريد


بالنسبة لبرشلونه : افضل الفنادق الميرديان وماجستيك من فئه 5 نجوم
و اولفيا بلازا 4 نجوم وموقعه مقابل الساحه بالضبط

اشهر معالم برشلونه هي ساحة كاتلونيا ومنها يمتد شارع الرامبلا السياحي
وينتهي عند تمثال كولمبوس بالقرب من الواجهه البحريه

مقابل الساحه من الجهه الاخرى شارع غارسيا التجاري يضم محلات الماركات الشهيره
وايضا بالقرب من الساحه محل الكورنر الانجليزي ،، ينفع حق تشتري الصوغ :p

وبين الدواعيس ككل بتحصل محلات تجاريه ،، راح تكتشفها بنفسك

وعندك سوق الخضار ( لابوكوريا ) في منتصف شارع الرامبلا يعتبر من اقدم اسواق الخصار والفاكهه واللحوم

وعند الواجهه البحريه تقدر تتمشى وبتلاقي مجمع هناك ،، والاكوريوم بعد

وبالنسبه للباص السياحي الخط الاحمر افضل لان يمر على اكثر المعالم السياحيه
والباص بتلقاه عن الساحه ،، وانت شوف اللي يناسبك ، وتقدر تنزل منه وتبدل براحتك
وافضل مكان تنزل من الباص لما يروح المناطق العاليه وتكمل مشي لين اعلى نقطه في برشلونه وتنزلها بالتلفريك
والتلفريك راح ينزلك عند الواجهه البحريه

وطبعا لاتنسى تروح ملعب الكامب نو ،، وياخذونك بجوله سياحيه بجميع ارجاء النادي
وتنتهي عند الستور مالهم ومنها تقدر تشتري فنايل اللعيبه الاصليه ،، الذهاب اليه بالتاكسي او الميترو

الاوت ليت في قرية لاروكا la roca village outlet
تبعد 50 دقيقه بالسياره ،، ويمكن الذهاب لها بالتاكسي او بالباص المخصص لها
التاكسي راح ياخذ عليكم وايد يمكن يوصل للتاكسي الواحد 500 ريال ذهاب بس
اما الباص الاسود بتلقاه عند الساحه بدايه شارع غارسيا ،، مواعيد تواجد الباص مكتوبه ع العامود

اذا معاكم اطفال ،، ممكن تاخذونهم ملاهي تيبيدابو وتقع على قمه جبل

========================

واذا حابين الذهاب لمدينه زياده ،، فلاتفوتكم بلاد الاندلس ( جنوب اسبانيا )

ممكن تطلعون من برشلونه بطياره وانصحكم بطيران شركة Vueling Airlines
التذكره ماراح تتعدى 250 يورو للشخص ذهاب فقط

تاخذون طياره من برشلونه لين مالقا ،، وممكن تسكنون مالقا نفسها او تروحون لمدينه جنبها اسمها ماربيا
والمسافه بين الثنتين نصف ساعه بالسياره ،، وراح تلاحظ ان الجنوب الاسباني ابرد من برشلونة ومدريد وخاصه في الليل تنخفض درجه الحرارة بشكل ملحوظ

وافضل مناطق السكن بالقرب من بويرتو بانوس Puerto Banus ماربيا

فنادق بويرتو بانوس كثيره وكل واحد احلى من الثاني ،، واسعارهم بشكل عام ارخص من فنادق برشلونه ومدريد

هناك راح تشوف نفسك ساكن بمكان شبيه باللؤلؤه قطر ،، محلات الماركات على طول رصيف الميناء والميناء يضم الكثير من اليخوت الفاخره اغلبية اصحابها عرب،، المكان فعلا جميل وشاعري ومايتفوت ،، والصور ابلغ من الكلام

بعض الصور لماربيا بالقرب من ميناء Puerto Banus من تصويري :

89460

89461

89462

89463


سكنا الفندق اللي يقع ع اليمين
Park Plaza Suites Apartamentos

89464


والاماكن الترفيه والفعاليات راح تلقاها بصاله المطار عند الوصول بكثره وايضا عند الفندق

والمدينة تصلح لتأجير سياره والتنقل فيها لمزيد من المتعه والاستكشاف.

========================

والذهاب الى مدريد بالقطار في محطة قطارات ملقا ،، يمكن حجز تذاكر القطار هناك او من احد مكاتب السفريات هنا

مدريد راح تختلف عن برشلونه و مدن اسبانيا الاخرى ،، في مدريد راح تلاقي الملاهي الليليه بكل داعوس وبتلاقي بنات الليل تارسين الشوارع بكل حزه :(

ومع هذا ،، فالتسوق في شوارع مدريد لها متعه خاصه وبعض المحلات تظل مفتوحه لوقت متأخر
وحتى يوم الاحد بعكس مدن اوروبا الاخرى

واشهر شوارع التسوق في مدريد غران فيا gran via ويفضل السكن بالقرب منه
ويمتد غران فيا الى ساحه كلاو وتتفرع شوارع اخرى تجاريه من هذه الساحه

الاماكن السياحيه
متحف لا سيرا دي La Sierra de متحف الشمع يناسب جميع الاعمار ، تتميز الأعمال الشمعية بروعتها.
حديقة حيوان و أكواريوم مدريد Zoo Aquarium de Madrid
فانيا Faunia حديقة حيوانات ونباتات
اكوا بارك Aqua Parks حديقة مائيه
ملعب سانتياغو برونابيو ، واخذ جوله سياحه فيه ،، والذهاب بالميترو افضل

========================


واي استفسار حاضرين

ورحلة سعيدة :victory:

[Bin Hood]

أختي monatee

مشكوووووورة على هذا الشرح الوافي

بالنسبة للاوت لت هل يسوى ؟؟

وكيف عن المطاعم ،،، كنتاكي موجود !!
وهل توجد المطاعم التركية ؟؟

لفت نظري ان الفنادق أرخص بكثييييير من لندن وأوربا بشكل عام

[monatee]

أختي monatee

مشكوووووورة على هذا الشرح الوافي

بالنسبة للاوت لت هل يسوى ؟؟

وكيف عن المطاعم ،،، كنتاكي موجود !!
وهل توجد المطاعم التركية ؟؟

لفت نظري ان الفنادق أرخص بكثييييير من لندن وأوربا بشكل عام


الاوت ليت الصراحه حلوو ،، والمكان منظم وشرح على شكل بيوت جنب بعض
وتصل الخصومات لبعض البضايع 70%
وفيه مطاعم وكافيهات ، ومنطقة للعب الاطفال تقدر تخلي العيال وتتسوق براحتك

كنتاكي موجود في شارع الرامبلا تقريبا في المنتصف بس ماعندهم روتي مع الاكل :waiting: ماعرف ليش
اسبانيا بشكل عام لك عليها في مطاعمهم :secret:

قليله جدا هي المطاعم العربيه والتركيه والهندية وبعيده ،، والروحه لها بالتاكسي اذا كان يدل هالمطاعم ،، فالافضل اتمون على الفاست فود المعروف عندنا او اذا بتاخذون شقه ممكن تطبخون ، لان فيه كارفور فيه جميع الاحتياجات موجود في الرامبلا

مافي مقارنه بين لندن واسبانيا ،، لان طبيعي العالم كلها في لندن والاسعار ترتفع نفسها نفس باريس وميونخ ،، وفوق هذا الاقتصاد الاسباني شبهه منهار فبتلاقيها ارخص مدن اوروبا

بس حط بالك من الحراميه تعتبر برشلونه المركز الثالث على مدن اوروبا من بعد روما ومدريد في السرقات ،، وخاصه في شارع الرامبلا :telephone:

[Bin Hood]

شكرًا

كنتاكي حلال عندهم ؟؟؟

دام عندهم مشاكل اقتصادية شكلي بشتري شقة

[monatee]

شكرًا

كنتاكي حلال عندهم ؟؟؟

دام عندهم مشاكل اقتصادية شكلي بشتري شقة

لا مب حلال :(

حكومة اسبانيا قبل فتره اعلنت اللي بيشتري له عقار عندهم بيحصل على اقامه دائمه :deal:

والعفو اخوي

[al saad]

شكرًا اخوي السعد

وشو الفرق بين الأحمر والأخضر

يقولون في شارع الرمبلا ، وشو هو بالضبط

وجزاك الله خير

الأخضر والاحمر هو لون خط سير الباص مش لون الباص كل الباصات حمر الأخضر يوديك جوله في مناطق شرق والاحمر غرب فخذلك جوله في الخط الأحمر وجوله في خط الأخضر وبتشوف برشلونه كلها في يومين
والباص يوقف عند شارع الرمله

[al saad]

شكرًا

كنتاكي حلال عندهم ؟؟؟

دام عندهم مشاكل اقتصادية شكلي بشتري شقة

خلك مع مكدونلد والفش فليه اضمن ولا فلافل عند الاتراك ^___^

[Bin Hood]

تسلم اخوي Al saad

ما قصرت

أقول يصير البس شيرت مدريد وانا في برشلونة ؟!
والأب يسوقون لي حفلة ؟!

[عاشق الدمعة]

ههههه نصيحة أخوي، خلك برشلوني في برشلونة ومدريدي في مدريد، وإسكن عند شارع لارامبلا وفيه ناس يسمونه شارع رملا في برشلونة، وعندك الفنادق كثيرة وأدخل على موقع hotelscombined وشوف الفنادق وتقييمها، وأنا عجبني فندق اسمه ريالتو Rialto المهم حاسب من السرقات وأنا شخصياً انسرق مني لاب توب في استقبال الفندق وشفت التصوير وشفنا اللي سرق اللاب توب بس للاسف قال لي الفندق إنه ماله شغل، وسويت تقرير ومحضر بالسرقة عند الشرطة وإلى يومك ما حصلته، ولا تشيل شنطة ارقبة او يد في طلعاتك لأنهم يراقبونك ويلاحقونك، والأماكن كثيرة مثل ما اذكروا الأخوان والأخوات قبل ولا تنسى الأوت لت،والمطاعم قبل ما تطلب تأكد منهم إذا حلال وإلا حرام؟ أما مدريد ما رحت لها إلى حد الآن لأني برشلوني هههههه وبالتوفيق إن شاء الله

[Bin Hood]

ههههه نصيحة أخوي، خلك برشلوني في برشلونة ومدريدي في مدريد، وإسكن عند شارع لارامبلا وفيه ناس يسمونه شارع رملا في برشلونة، وعندك الفنادق كثيرة وأدخل على موقع hotelscombined وشوف الفنادق وتقييمها، وأنا عجبني فندق اسمه ريالتو Rialto المهم حاسب من السرقات وأنا شخصياً انسرق مني لاب توب في استقبال الفندق وشفت التصوير وشفنا اللي سرق اللاب توب بس للاسف قال لي الفندق إنه ماله شغل، وسويت تقرير ومحضر بالسرقة عند الشرطة وإلى يومك ما حصلته، ولا تشيل شنطة ارقبة او يد في طلعاتك لأنهم يراقبونك ويلاحقونك، والأماكن كثيرة مثل ما اذكروا الأخوان والأخوات قبل ولا تنسى الأوت لت،والمطاعم قبل ما تطلب تأكد منهم إذا حلال وإلا حرام؟ أما مدريد ما رحت لها إلى حد الآن لأني برشلوني هههههه وبالتوفيق إن شاء الله

تسلم يا دمعة الفرح

[Unique_inter]

ما ادري عنها بالتوفيق

[Bin Hood]

للرفع لأخوانا بوتميم