استفسار عن البنيان

[سالي 123]

السلام عليكم ورحمة الله وبركاته
اختي عندها قطعة ارض وتبي تبينيها فيلا صغيره بس ما تعرف وين تسوى الخريطة وكم تكلفة البنيان اذا كان لأيجار وعلى كم شهر يخلص .:shy::shy:

[Aaziz]

- كم مساحة الارض ؟
هذا سؤال مهم

- هل الارض في منطقه سكنيه خارج الدوحه او داخلها و هل هي على شارع تجاري مثلا ؟
هذا سؤال مهم .. لانه في التصميم انت تستهدف من ياجر الفله
هل مستأجر عادي (عائلة) او تاجير الفلا حق مثلا كوافير او شركه ؟

الاخوان هنا بارك الله فيهم جدا نشيطين و راح يفيدونكم ان شاءالله .

اعرف وحده عربيه شغاله في مكتب سوت لي خريطه بـ 12 الف
تصاميمها بسيطه جدا .

اذا ما نصحوج الشباب في مكتب معين يكون افضل راح اعطيج رقم المهنده هذي

بالتوفيق ان شاء الله

[سالي 123]

في الصخامة مساحتها تقريبا 490 على الشارع

[Aaziz]

اها ،، اذا مافيه مجال الا فيلا سكنية واحده والله اعلم
بسهوله تلقون تصاميم حلوه و رخيصه في بنائها بالحجم الي يتناسب مع الارض الي عندكم .

عندج كلا من
معماري قطر - شموخ دائم - بن غيث
راح يفيدونج ان شاءآلله و مايقصرون مع حد بارك الله فيهم و في ذريتهم

اهم شي تعرفينه ايش المرغوب اكثر للتاجير .. هل مثلا وجود مجلس خارجي او ملحق خلفي خارجي (مطبخ و غرفه خدامه و مخزن) و البنتهاوس و غرفه سائق << شوفي اي من هذي الاشياء مرغوب و يزيد من قيمه الاجار .

و بالتوفيق ان شاءالله.

[سالي 123]

مشكور ماقصرت

[محمد سعيد]

حسب مساحة البنيان ممكن يخلص عليج المتر مع تسليم مفتاح تقريبا 1500 ريال طبعا بنيان تجاري

مثال : مساحة البنيان 400 متر نربع فالسعر بيطلع عليكم 600 الف ريال هذا سعر تقريبي اذا سعر البنيان للمتر 1500 ممكن تحصلون اكثر او اقل

سعر الخريطة ممكن 12000 ريال اكثر او اقل بشوي

حطوا استشاري يتابع البنيان مع المقاول

اذا الفلوس جاهزة ممكن خلال 6 شهور البيت يكون جاهز

بالتوفيق

[سميسمة كافيه]

اختي كلمني اعطيك رقم رجال قطري امين ومحترم ومواعيده بالدقيقه وان شاء الله يساعدك

[خليفـة]

المقاول الي يبني لي حالياً اكثر من ممتاز
امين ودقيق في عمله
اذا تبي رقمه قول لي برسله لك
على الخاص

خليفة