هل ثبتت اسعار الاراضي او في نزول

[QATAR 77]

هل ثبتت اسعار الاراضي او في نزول

[SeniorTrader]

قصدك في ارتفاع

[بوحمد1]

كل ارتفاع يتبعه نزول والعكس ايضا

حبه فوق وحبه تحت

[الارياف العقارية]

الاسعار في ارتفاع ولكن انا اتوقع ان الاسعار تنزل لان بهالاسعار محد راح يشتري

[SeniorTrader]

اغلب القطريين يقدرون يدبرون مليون ريال اقل شي

الرواتب عاليه والبنوك تعطي تسهيلات

مااضن ينزل شي معنى ودي تنزل ونشتري

[أسد الجزيرة]

القطريين قاعدين على مغارة علي بابا في نظرتكم ما تدرون ايش ظروف الناس

على كلام اثنين من ربعي عندهم مكاتب عقارات يقولون البيع قليل جداً

[مهاا]

مو كل قطري قادر يوفر ثلاث ملايين وأكثر حق العقار ،، وتأكد اخوي الأغلب اذا اضطر بياخذ هالمبلغ من البنك وبيتم عمره كله يسدد ،،

[QtrGate]

الي اشوفه
أن العقار ينعرض بسعر مرتفع والبيع بسعر بعيد عن سعر العرض
في عقارات أكملت 3 أشهر معروضه
والطلبات أصبحت نادرة بالمقارنة للبيع الهائل
ومع عروض ازدان والفلل ب 1.400.000ريال تم جذب أغلب الشباب القطري
الفلل والأراضي للطب صار نادر
لاكن الأراضي التجارية والمحلات الطلب مستمر
وسوق الشقق بدأ ينتعش

أنني أرى الانهيار قريب جدا ( للأراضي والفلل )
بل تنتظر أي خبر سلبي وسترون العجب
الله يرزق الجميع كل خير

[محمد أبوشيخة]

يحليل الدلالوه يتصلك يقولك عندي لك عقار روعه ومايتفرط وتروح تعاين يطلع عقار عادي ولا تشطيب تجاري بحت وفي بعض الاحيان النااااادرة يصدق ويطلع العقار جيد وتشطيبه جيد وهني يبتدي الخراااااط واللف والدوران بخصوص السعر وهو يكون رافع عن السعر اللي يبيه راعي الحلال بالراحة من 15% الى 20% ولما تصيده بزاويه يقولك انا بس وسيط وراعي العقاري هو اللي طالب هالسعر ولما تقوله عطني تيليفون راعي الحلال يقوم يتشرد ولما توصل لراعي الحلال وينكشف الدلال سبحان الله يختفي، واللي يقولك انا راعي مكتب عقار ويطلع طرطنقي حتى بدون تصريح للعمل بمهنة الدلاله ولا تطلع سيدة/بنت وتقولك انا عندي مكتب عقاري ومش دلاله وتطلع تشتغل من بيتها وحطالها مكتب بالمطبخ وعبالها شركة عقارية ولا cr ولا سجل تجاري ولا يحزنون، طبعا" الكلام هاذي حق اصحاب الذمم الوسيعه واللي الحلفان بالله عنده عادي وهو كاذب ولاكن والحمد لله يوجد بعض الدلالين المحترمين صادقين والله يزيد من امثالهم ويفكنا من اللي مايخافون الله، والعقار ان نزل ولا طلع مش مهم او الاولى حاليا" تنظيف مهنة الدلاله من عديمي الامانه وتقنين المهنة بطريقة فعاله.

[قطر833]

مابي اعلق على المشاركات السابقه بس( الي تكلمت في اساس الموضوع) مانبي نزعل اخوانا
اخوي في شي اسمه النشره العقاريه -وزارة العدل
العقار ثابت+ في ارتفاع اغلب المناطق الي تسوى وتقدر تشوف كل منطقه وسعرها كيف يمشي
2- الاهم من ذيه كله علماء الغيب الي في المنتدى ازعجونا بخرابيطهم،، بتشوف الانهيار،، بتشوف الطوفان
اخوي موضوع المستقبل مرهون بالحكومه القطريه ادرس تحركاتها بتفهم العقار وين رايح
السكني ماقربوا صوبه وكاهو في ارتفاع ولا وقف،، العماير كذلك لحد ماوصلت للعائد الشبه متدني ووقف ارتفاعها
التجاري الحكومه افترت عليه ب20 شارع تجاري ( ويافرحه ماتمت راجع شروط الاراضي الجديده والارتدادت ) وتم التجاري مرتفع وبيوقف على مسالة العائد
اخوي بكره تقرر الحكومه وقف تدفق الاجانب نعم بتشوف العقار يريح وينزل،، بكره تقرر الحكومه جلب ناس وموظفين ومشاريع ضخمه بتشوف العقار منتعش وفي ارتفاع والي الكل شايفه الدوله ضغط مشاريع وشغل وبزنس
اي كلام من غير دليل وغير منطقي تركه عنك

[مرحوم قطر]

انا عن نفسي اشوف ان مافي منطق معياً ممكن تمشي عليه الاسعار في قطر

ارتفاعات عشوائيه و على الاهواء و المزاج

دلالوه حراميه ((( مش الكل بس نسبه كبيره )))


انا عن نفسي ادور عقارات صارلي فتره اشوف في هبوط و في نفس الوقت اشوف في ارتفاع


مثلاً في ام قرن اراضي تعتبر قريبه من بعض و احجماها من 550 الى 650

في تفاوت كبير في الاسعار لقيت في نفس الوقت و مسافات بسيطه بينهم يعني في نفس المنطقه

و كلهم اراضي طواليه الواجهه من 14 الى 16 و اسعارهم من 290 الى امس كلمني واحد يعرض علي على 250



كل اصحاب المكاتب الي اعرفهم انصحوني اني ما اشتري الحين و كلهم يقولون لي الطلبات تكاد تكون نادره


انا ما اتصل على مكاتب عقاريه عندي ربعي و ادور في النت و اتمشي في الفرجان

الي تعجبني اشوف رقمها و اكلم صاحب العقار دايركت و يعطيني السعر


و اتصلت على ثلاثه او اربعه حاطين اعلان في الجريده و اكتشفت بعد الاتصال انهم دلالوه

و الجنسيه وحده ما تتغير من كثر ما يتصلون لي يعرضون الي عندهم هددتهم اني اشتكي عليهم في الشرطه عشان افتك منهم

تموا يرسلون لي مسجات على الوتساب و العروض منهمره علي كان يقولون لي تكفا اشتر



في اعتقادي و على حد فهمي لسوق قطر و ان الموضوع ماشي باهواء

ترى الملاك بيزهقون في النهايه و غصب طيب بينزلون الاسعار



هذا و الله اعلم

[بـــاروود]

عقب قرار منع تقسيم الكل توقع نزول اسعار الفلل لاكن للاسف ارتفعت الاسعار... وانا اتوقع الأسعار راح تثبت اما نزول مستحيل يصير قبل كاس العالم لنه مثل ماذكر اخوي المشاريع شغاله والاجانب كل يوم يزيدون وغير الي يجيبون عوايلهم وذا بدت الإجارات تنزل عقبها بتشوف نزول ف الاسعار