ايش الي صار في شبابنا؟؟!!!!

[سعادة الوزير]

السلام عليكم ورحمة الله وبركاته،،

بدون مقدمات، راح ادخل في الموضوع على طول بهالسؤال الي موجه للشباب من الجيل الحديث (مواليد الثمانينات) :

ايش الي صار فيكم؟؟؟ وشنهو معنى الدوارة والحواطة يومياً عند المجمعات والاسواق؟؟؟

حد يمر يوم عند اللاند مارك مثلاً ويشوف العجب العجاب!!! تقول حجاج يطوفون بالكعبه (مع الفارق طبعاً)!! .. حتى بعد الساعة عشر وبعد المحلات ماتسكر تلقاهم لين الحين يلفون بسياراتهم والله مثل المجانين!!

اقسم بالله اني كرهت اروح هالاماكن بسبب هالتصرفات السخيفة، مع العلم ان بيتي قريب من هالمجمع وعندي ولله الحمد عيال وودي اني اوديهم هناك يلعبون او للسينما، لكن وين تقدر تدخل هناك بسبب الزحمة الي يتسببون فيها.

والمصيبه انهم لازم يوقفون بسياراتهم عند مداخل الاسواق، طبعاً السبب معروف، ويزاحمون الحريم في دخلتهم وطلعتهم! .. انا بس اقول للي يسوي هالحركات، ترضى على هلك يتزاحمون بين سيارات الشباب بهالشكل؟؟؟

ورجال المرور والدوريات مايقصرون وياهم في المخالفات، بس للأسف طلعت لنا موضة جديدة بهالخصوص، وهي ان هالشباب قاموا يكشخون بستيكر المخالفة!! وكأنه فخور بنفسة! وتحصل الي مخلي على سيارته ستيكرين وثلاثة واربعة! وكأن كل مازادوا ، كل ما حس ان رجولته زادت (طبعاً بعيدة عن خشمة).

هذا الوضع الي بس في المواقف وانت داخل السوق، طيب ادخل السوق او المجمع، وتشوف العجب العجاب!! ،، كل انواع قلة الادب وقلة الحيا موجودة!! وانا ادري ايش الرد على الهكلام، بيقولون لك كله من البنات، هم الي يسوون الاغراءات، وانا اقول طيب، لما تسافر وتشوف بنات الغرب، تستجري تسوي نفس الحركات؟؟ بعدين ربك بيحاسبك انت بروحك، ولا وقت الحساب بتقول لربك انا مايخصني هم الي اغروني؟ وبالمقابل، تعرف يا اخي الشاب ايش جزاء وفضيلة غض البصر؟؟ اترك لك البحث.

والمصيبة الاخرى هي الموضة الي طالعين بها الشباب (وللأسف فيه منهم كبار ايضاً) وهي الشعر الطويل والي يتشبهون فيه بالنساء والعياذ بالله. واذا جيت تنصحة يعطيك عذر اقل ما يقال عنه انه اقبح من ذنب!! بيقولك ياخي الرسول (عليه الصلاة والسلام) كان شعره طويل، طيب كلامك سليم، بس لاتنسى ان الرسول (عليه الصلاة والسلام) ايضا كانت لحيته طويلة، وكان يقصر ثيابه، وكان يلبس إزار وقميص، وكان يلبس عمامة، وكان يتسوك، .... ال آخرة من صفاته الكريمة، يعني اشوف ماعجبتك من صفاته الا الشعر الطويل؟؟ بعدين صحيح هو شعرة طويل، لكن ما حث المسلمين على تطويل شعرهم، ولكن الي جاء في الحديث وبالنص : (من كان له شعر فليكرمه) يعني الي شعره طويل لازم يحافظ عليه وينظفه من باب النظافة لا اكثر. يا شباب اتقوا الله و لاتفشلونا قدام الناس الله يخليكم!! ترى والله العظيم ان الي يطول شعره ترى شكله يفشل ويضحك!.

وكذلك من ضمن سلوك الشباب هو الاستهتار في سواقة السيارة، وتحصلة يسوق السيارة وكأنه توه مسجل الشارع باسمه، ما يدري ان نص الي يمر عليهم يدعون عليه من كثر ماهو مأذي خلق الله!

انا طبعا ما اعمم هالكلام، لكن للأسف الغالبية العظمى والي صار الكل يشتكي منهم، الصغير والكبير.

تعبت وانا اكتب وان شاء الله لنا تكملة لهذا الموضوع، وادعوا للجميع بالهداية

[المخلب]

طيب عطهم البديل ! وهم صدقني بيسمعون كلامك :)

[سهم طايش]

و الله يا خوي كلامك صحيح 100%

مدري ليش يروحون و يردون و دوارة حوالين المجمع بلا فايده من المغرب لين يسكر المجمع

كل واحد بسايله لين كتوفه و قاعد على صوب و يحوس

ما يتمللون ما تلوع جبودهم من الدواره

يجب ان تتخذ ادارة المرور اجراء بحق اللي يدور من غير سنع اكثر من مره

و اللحين طايحين بالثياب المخصره كانهم دلال رسلان

صج مخديين

[وطن]

الله يهديهم ان شاء الله

[سعادة الوزير]

طيب عطهم البديل ! وهم صدقني بيسمعون كلامك :)

البديل سهل ومتوفر، هو ميالس الرياييل

[سعادة الوزير]

و الله يا خوي كلامك صحيح 100%

مدري ليش يروحون و يردون و دوارة حوالين المجمع بلا فايده من المغرب لين يسكر المجمع

كل واحد بسايله لين كتوفه و قاعد على صوب و يحوس

ما يتمللون ما تلوع جبودهم من الدواره

يجب ان تتخذ ادارة المرور اجراء بحق اللي يدور من غير سنع اكثر من مره

و اللحين طايحين بالثياب المخصره كانهم دلال رسلان

صج مخديين

ذكرتني ياخوي (سهم طايش) ايام ماكانوا يسجنون الي يدور عند الاسواق بدون سبب، ياريت لو يطبقون هالقرار مرة ثانية، صدقني مستعد احب خشوم ويتطبق مرة ثانية!

[سعادة الوزير]

نسيت اني اضيف شغله مهمة، يا ترى ماتظنون ان دوارة الشباب 24 ساعه هو سبب رئيسي للزحمة الحاصلة حالياً في الشوارع؟ والدليل انك لما تشوف السيارات المستعمله المعروضه للبيع، تلاقي موديل 2006 وماشي 100 الف!! شلون ماتدري!

[aljaber1]

نتمنى من الله ان يصلح الحال ويهدي الجميع ..
وحقيقة لولي الامر دور .. واللمجتمع دور ..
والوسائل الاعلام دور في التوعية ..
والمؤسسات الدوله دور في الردع ..

وشكراً الطرحك الي يلقي الضوء على مشكله
فعلاً موجوده ونتمنى زوالها ..

[عفريت ^ كشخه]

والمصيبة الاخرى هي الموضة الي طالعين بها الشباب (وللأسف فيه منهم كبار ايضاً) وهي الشعر الطويل والي يتشبهون فيه بالنساء والعياذ بالله. واذا جيت تنصحة يعطيك عذر اقل ما يقال عنه انه اقبح من ذنب!! بيقولك ياخي الرسول (عليه الصلاة والسلام) كان شعره طويل، طيب كلامك سليم، بس لاتنسى ان الرسول (عليه الصلاة والسلام) ايضا كانت لحيته طويلة، وكان يقصر ثيابه، وكان يلبس إزار وقميص، وكان يلبس عمامة، وكان يتسوك، .... ال آخرة من صفاته الكريمة،

يعني ماعتقد انه هالشي حرام
مدام الرسول كان يطول شعره متسواي
مو مطول شعره على قزع
يعني هالشغله كلمن يسويها

وثاني شي
الشباب ما قصد اي ناس مابا حدد يعني هم معرضين للأنحراف
يعني تشوف بنيه مادري شو لابسه
يعني تتوقع انا محد بيطالعها
لو انها محترمه وحاشمه روحها محد بيطالعها

وهاي الي عندي

والسموحه

[صـــمـــ قطر ـــت]

اسال اي واحد له في هالسوالف ترضى على شوفاتك واهلك بيقولك مليون لا لكن بنات الناس عادي مب جنه المفروض يفكر في هالجمله الي ترن في الاذن

( يمهل ولا يهــــــــمل )...... كما تدين تدان ...... الي تسويه في بنات الناس راح تشوفه قدام عينك بيصير لك ولا تقدر اتقول شي

سبحان الله .... والله الي يسوي هالحركات ( فيه نقص ) .... والمشكله يقول ان انا ريال

اذا وصلت الرجوله حق هالشي فانا اقول الحمد لله والشكر على العقل

رجوله اتطلع صيتك على بنات خلق الله وشوفات الناس ماشوف رجولتك تطلع لين صار الصج لو اشتكت عليك وحده( يبي يشرد ) وسحبتك ذيك الساعه شي يفتخر فيه .....!!!! ( انه رجوله ).....!!!!

والي يسوي هالحركات تلقى ربك بالييه .... ماقول غير الحمد لله والشكر

صج في شباب والنعم فيهم وفيه شباب والله وجودهم والعدم واحد مخهم محدود .......

الكلام راح يكثر لكن ماتقول غير الله يهدي الجميع ويهدي هالنوعيه من الشباب والي يقول البنات ايسووون هالشكل يعني مب وايد ان اتغض البصر ...... المشكله اتقول حق العالم الله يهديك او الله يهديج يضحكون عليك جنه انت الي مينون ومب صاحي .... الحمد لله على كل حال وفي الاخير الله يهدي هالنوعيه من الشباب ...:)

[سهم طايش]

الله يصلحهم

و الله انا اخاف يصيدهم شي من هالدواره

ما هو التفسير العلمي لهذه الظاهره ؟

و هل هذا يعتبر مرض نفسي و هل ممكن علاجه بالادويه ؟

البندول ما اظن ينفع

يمكن يبي لهم دهان بفكس على الظهر و على سيت السياره يمكن يقرون و يهجعون

اذا ما فاد ذي كله ما لهم الا الخيازرين المنقعه في ماي و ملح و تلشط فيهم لين يقولون بس

دواره دواره دوارة دوارة دواره و بعدين ,,,,,,,,,,, اخرتها شاي كرك عند النعيمي

[المخلب]

وربي الدواره هذي شئ زين شبلاكم انتوا !! .. خذوها من الجانب الايجابي ..

احنا مع الشباب ساعات ندور لين ساعات متاخره بالليل ..

سوالف .. ناخذ ونعطي .. نتكلم بالبورصه .. نسولف عن مجالات الحياه ..

يعني ونهضم .. جلست البيت تسبب المتن ! .. على الاقل الدواره بالسياره تحرك الجسم ! ..

بعدين بسبب هل الدوراه .. ساعات نشوف واحد امبنجر التاير عنده نساعده ! (( يعني مفيديين للوطن ! والمواطن )) .. وله ساعات واحد يبي توصيله نوصله اذا على طريقنا ..

ترى في اشياء ايجابيه كثيره انتوا مغلقين عينكم عنها ! ..

:) :) :) :) :) :) :) :) :) :) :)

[سعادة الوزير]

الله يصلحهم

و الله انا اخاف يصيدهم شي من هالدواره

ما هو التفسير العلمي لهذه الظاهره ؟

و هل هذا يعتبر مرض نفسي و هل ممكن علاجه بالادويه ؟

البندول ما اظن ينفع

يمكن يبي لهم دهان بفكس على الظهر و على سيت السياره يمكن يقرون و يهجعون

اذا ما فاد ذي كله ما لهم الا الخيازرين المنقعه في ماي و ملح و تلشط فيهم لين يقولون بس

دواره دواره دوارة دوارة دواره و بعدين ,,,,,,,,,,, اخرتها شاي كرك عند النعيمي

اضحكتني يا سهم طايش اضحك الله سنك :)

بصراحة فعلاً يجب على ولاة الأمر دراسة هذه الظاهرة الغريبة علينا، الموضوع صاير شي غريب!

اما بخصوص كافتيريا النعيمي فحدث ولا حرج، يوم اشتكينا سكروها، والحين ردوا فتحوها مرة ثانيه وكنك يا بوزيد ماغزيت!! والله يا جماعة اني كرهت السكن بهالمنطقة بسبة هالناس. لا والمصيبه ماتحلالهم السوالف الا في السيارات ووسط الشارع، تروح تعبي بترول ولا تسحب من الصراف الآلي الي هناك وانت مع هلك تحصل الف سيارة حواليك.

رسالة اوجهها لهالصنف من البشر : يا اخي قر في بيتك وفكنا الله يرحم لي والديك.

[بنت الحرمي]

اخوي سعادة الوزير..

اول شي اشكرك جزيل الشكر لطرحك هذا الموضوع

اعتقد هالمشكلة اللي اشرت لها والقابله للأزدياد للأسف..

لها اكثر من سبب مثلاً غياب الوازع الديني، غياب الرقابة الاسرية ، السطحية اللي يعيشها الشباب او البنات ، المادية اللي يفكر فيها بعض الشباب لأمور كثيرة ..الخ..

انا عن نفسي واكيد في كثير من الناس جذي كرهت دخول المجمعات بسبب هالفئة من الشباب او البنات..

والله حرام ولله عيب اللي يسوونه ،، لكن لا رقيب ولا حسيب ولاحياة لمن تنادي..

الثياب اللي يلبسونها ما تصلح الا للأعراس ولا الحفلات والمكياج نفس الشي والتصرفات المشينه والمعيبة اللي تسيء لنا احنا كقطريين ومسلمين وعرب وتسيء لهم بلا شك ..

انا اعتقد هالفئة مهم خذوا مخالفات مهما الواحد نصحهم ماراح يفيد معاهم ..


ما نقول الا الهداية من رب العالمين ..الله يهديهم ويصلح حالهم ..

يعطيك العافية اخوي سعادة الوزير لطرح لهذا لموضوع .. ولك جزيل الشكر

[سعادة الوزير]

اخوي سعادة الوزير..

اول شي اشكرك جزيل الشكر لطرحك هذا الموضوع

اعتقد هالمشكلة اللي اشرت لها والقابله للأزدياد للأسف..

لها اكثر من سبب مثلاً غياب الوازع الديني، غياب الرقابة الاسرية ، السطحية اللي يعيشها الشباب او البنات ، المادية اللي يفكر فيها بعض الشباب لأمور كثيرة ..الخ..

انا عن نفسي واكيد في كثير من الناس جذي كرهت دخول المجمعات بسبب هالفئة من الشباب او البنات..

والله حرام ولله عيب اللي يسوونه ،، لكن لا رقيب ولا حسيب ولاحياة لمن تنادي..

الثياب اللي يلبسونها ما تصلح الا للأعراس ولا الحفلات والمكياج نفس الشي والتصرفات المشينه والمعيبة اللي تسيء لنا احنا كقطريين ومسلمين وعرب وتسيء لهم بلا شك ..

انا اعتقد هالفئة مهم خذوا مخالفات مهما الواحد نصحهم ماراح يفيد معاهم ..


ما نقول الا الهداية من رب العالمين ..الله يهديهم ويصلح حالهم ..

يعطيك العافية اخوي سعادة الوزير لطرح لهذا لموضوع .. ولك جزيل الشكر

اختي كلامج سليم بالنسبة لنقص الوازع الديني، لكن المفروض احنا ما ننتظر لحد ما يسدون هالنقص عندهم، المفروض نطالب بعقوبات مدنية ضدهم( مثل السجن او الجلد او سحب السيارة او الرخصة)، مثل ماكان الحال قبل 10 سنوات او اكثر شوي. لان المثل يقول من آمن العقوبة اساء الأدب، وكذلك يقولون اضرب المربوط يخاف المفتلت.

اما عن البنات فانا ماراح اتكلم عنهم، لان الي يسوونه ممكن تسويه اي اجنبية في البلد، حتى لو تستروا كلهم الاجنبيات بيظلون غير متسترات، يعني من غير العدل بصراحة ان نعذر الشباب على افعالهم ونقول لازم ان البنات يتسترون قبل!!

الحكومة او وزارة الداخلية لازم تتدخل باسرع وقت لوقف هالظاهرة ووقف هالاستهتار عند حده.

[قناص قطر]

السلام عليكم

بالعكس

الدوارة تساعد الاقتصاد القطري

اولا : كم مرة بفول الموتر بالبترول هذا يساعد الاقتصاد

ثانياً : للصيانه كم مرة بالشهر بغير سفايف هذا يساعد الاقتصاد

ثالثاً : لابد بنهاية السنه بيعمل عملية ( من كثر القعده ) ( البواسير ) باحد المستشفيات وخاصة العمادي وهذا يساعد الاقتصاد القطر


الله يصلح حالهم ان شاء الله

[غزلان]

الله يهديهم جميعا


تسلم سعادة الوزير

[ROSE]

للاسف اخوي سعادة الوزير اللي حاصل ان الشباب

(البعض منهم )

لاتوجد لديهم اهداف او مسعى يسعون اليه ويرجع السبب الى الاهل في الاول والاخير


بعدم زرع الاعتماد على النفس مع التخطيط المسبق للمستقبل

فنجد الشاب يولد ومستقبله امام عينه وسبل الراحه والرفاهيه قد وجدت لديه
فماذا يفعل غير تضييع الوقت في ( الدواره والمغازل ) وهنا اكرر البعض منهم


لا مانع من الخروج برفقة الشباب والجلوس في القاهاوي بين الحينه والاخرى ولكن

لمناقشة امور البورصه او الاقتصاد او التعليم او ماشابه اي امور مفيده ممكن ان تعود

بالفائده على هذه الجلسة


والذي نشهده وللاسف عكس هذه الامور

اصبحنا نفضل الجلوس بالمنزل على الخروج ومشاهدة هذه المناظر المخجله للذي

يحصل بالمجمعات والمرفقات العامه

بارك الله فيك على طرح هذا الموضوع

[لمت داون111]

كلامك صحيح اخوي سعاده الوزير والله فيه مناظر ماودك تطلع وتشوفها واشكال الله لايرويك

وكل يوم طالعه علينا موضات جديده وغريبه والشباب طافو البنات بالاهتمام بشعورهم وقذلهم ( الحمدلله والشكر )

بصراحه اتفق معاك بكل ماذكرت الا بشي واحد وهو الدواره

يعني انا عن نفسي مادور 24 بس حزات احب اطلع اتمشي واغير جو مع ربعي ... شفيها ؟؟

بتقول قعده ميالس الحمدلله الميالس يامكثرها وكل يوم نقعد فيها بس الواحد يتملل بعد

مافيها شي لو رحنا تمشينا شوي صوب الكورينش ولا النصر ولا اماكن الشباب المعروفه

انا مادافع عن الكلام الي تقوله بالعكس انا متفق معاك لانه والله حزات لما اروح النصر دقايق واطلع وارد مثلا بعد ثلاث ولا اربع ساعات اشوف نفس المواتر ونفس الشباب يتمشون للحين .. عنبوه البترول ماخلص؟؟

بس بنفس الوقت اقول لاتظلم الشباب ترا الدوحه صغيره ومافيه اماكن نروحها

وتسلم علي الطرح المفيد :)

[لمت داون111]

الله يصلحهم

و الله انا اخاف يصيدهم شي من هالدواره

ما هو التفسير العلمي لهذه الظاهره ؟

و هل هذا يعتبر مرض نفسي و هل ممكن علاجه بالادويه ؟

البندول ما اظن ينفع

يمكن يبي لهم دهان بفكس على الظهر و على سيت السياره يمكن يقرون و يهجعون

اذا ما فاد ذي كله ما لهم الا الخيازرين المنقعه في ماي و ملح و تلشط فيهم لين يقولون بس

دواره دواره دوارة دوارة دواره و بعدين ,,,,,,,,,,, اخرتها شاي كرك عند النعيمي
:nice: :nice: :nice: :nice: :nice: :nice:

[سعادة الوزير]

كلامك صحيح اخوي سعاده الوزير والله فيه مناظر ماودك تطلع وتشوفها واشكال الله لايرويك

وكل يوم طالعه علينا موضات جديده وغريبه والشباب طافو البنات بالاهتمام بشعورهم وقذلهم ( الحمدلله والشكر )

بصراحه اتفق معاك بكل ماذكرت الا بشي واحد وهو الدواره

يعني انا عن نفسي مادور 24 بس حزات احب اطلع اتمشي واغير جو مع ربعي ... شفيها ؟؟

بتقول قعده ميالس الحمدلله الميالس يامكثرها وكل يوم نقعد فيها بس الواحد يتملل بعد

مافيها شي لو رحنا تمشينا شوي صوب الكورينش ولا النصر ولا اماكن الشباب المعروفه

انا مادافع عن الكلام الي تقوله بالعكس انا متفق معاك لانه والله حزات لما اروح النصر دقايق واطلع وارد مثلا بعد ثلاث ولا اربع ساعات اشوف نفس المواتر ونفس الشباب يتمشون للحين .. عنبوه البترول ماخلص؟؟

بس بنفس الوقت اقول لاتظلم الشباب ترا الدوحه صغيره ومافيه اماكن نروحها

وتسلم علي الطرح المفيد :)

بالعكس ياخوي لمت داون، انا ماقول مايطلعون، بس الي قاعد يصير الحين شي مب طبيعي!! تحصلهم يلفون في ساحة المواقف بالساعات هذا شي حتى المتخلف عقلياً يستغرب منه!!

اما على طاري شارع النصر، انا هالشارع صرت ماقدر اروحله بسببهم، بصراحة مافيني اضيع ساعة من وقتي في الزحمة هناك عشان شغلة 10 دقايق.

[لمت داون111]

بالعكس ياخوي لمت داون، انا ماقول مايطلعون، بس الي قاعد يصير الحين شي مب طبيعي!! تحصلهم يلفون في ساحة المواقف بالساعات هذا شي حتى المتخلف عقلياً يستغرب منه!!

اما على طاري شارع النصر، انا هالشارع صرت ماقدر اروحله بسببهم، بصراحة مافيني اضيع ساعة من وقتي في الزحمة هناك عشان شغلة 10 دقايق.
صدقت والله

وعسى الله يهديهم ويهدينا وياهم:nice:

يعطيك العافيه اخووي موضوعك حلو والله :)

[لاداعي]

يعطيك العافيه اخوي