[ شباب اليوم .. والنووووم !!! ]

[الزعفراني]

أغلب الشباب اليوم إلا ما ندر .. يرد من الدوام ويسحبها بنومه لين قبل المغرب واحيانا لين عقب المغرب ..

لا صلاة عصر لا صلاة مغرب .. واول مايقعد يصحصح .. ياخذ له شاور .. يتزقرت .. يركب موتره يتصل حق ربعه .. وهياته معاهم .. يا تجمعات عند الكرك ومشاوير من كتارا لى اللؤلؤه ..

يا هياته في المجمعات التجارية وقعدات الكوفي شوب .. يا قعده في المجلس ولعب ورقه والا بلاي ستيشن .. ناس بشواربهم ويلعبون بلاي ستيشن وين قاعدين ؟

يعني تحس ان هالفئة عايشين على هالروتين .. ويوميا على هالمنوال .. وفي الويكند حدث ولا حرج ليلهم يقلب نهار ونهارهم ليل .. يعني الترفية مطلوب لكن مش يوميا !!!!!!!

تحس هالفئة مالهم أي دور أو اسهامات في المجتمع .. سواء في اعمال تطوعية او حتى فعاليات شبابيه او ثقافيه او تعليميه

مجرد كائن حي يقوم الصبح .. يداوم .. يرد البيت ينام .. يقعد ويضيع وقته في أشياء كان بالامكان يستبدلها بشيء يفيده ويفيد غيره ..

قَالَ رَسُولُ اللَّهِ ، صَلَّى اللَّهُ عَلَيْهِ وَسَلَّمَ :

" نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ : الصِّحَّةُ وَالْفَرَاغُ " .

كل واحد فينا فيه جانب ايجابي .. وكل واحد فينا يعرف نفسه ويعرف هو بشنهو يتميز سواء من موهبه او قدرات .. يحاول يستغل هالفراغ

في تنمية هالقدرات او توظيف موهبته في خدمة نفسه وأهله والمجتمع .. ويحاول يطوّر من قدراته ويسخرها لخدمة الناس .. يفتح مخه شوي

ويشوف اشلون وفي اي مجال هو ممكن يقدم خدمة لبلاده وللمجتمع و لأفراد المجتمع اللي ممكن يحتاجون لخدماته او أفكاره .. أو موهبته

واذا ماصار هالشيء ..

ياعمي أقل القليل يصل أرحامه .. بدال الهياته من مكان لا مكان بدون هدف .. في ناس ما يعرفون بيوت عمامهم ولا خوالهم ولا قرايبهم

الا في المناسبات ..


بس خلاص..اللي عندي كتبته

فتكو بعافيه ....

[الأسبانية للمصاعد]

اي والله صادق

السبب طول الدوام والزحمة

اول 12 في البيت واتقيل

[حمد 2002]

اخوي ماذا تقصد بالشباب هل هم جيل الثمانينات ولا التسعينيات ولا السبعينيات ولا الالفينيات ؟!

[المحاميه]

عندكم حمد
احسن مثال لكلام الاخ الزعفراني

[ya3coub]

شنو هالشغل الي يخلص 12 !!!

بخصوص كلامك يالزعفراني ما قد شفت احد من هالفئة بس اسمع عنهم وايد و ودي اعرف من وين يجيبون هالوقت علشان كل هالشغلات بيوم واحد و هل يشبعون نوم قبل الدوام ؟

بس موضوع النوم اخلص دوامي 5 ونص ارجع البيت اصلي و اقعد مع الوالدة عقبها ارقد لين ثاني يوم الصبح

و هاي حالي 6 ايام بالأسبوع

و الأعمال التطوعية اسويها بعد الدوام علطول و لله الحمد استمتع فيها و تهون تعب الشغل

بعادتي ادور على شي جديد عمل جديد تطوعي او انجاز جديد اذا مافي حياتي اتكون دوام و أهل و نوم

[ام خليفه79]

كفيت ووفيت في الطرح


بصراحة هذا اللي صاير هالأيام وأغلب الشباب جي

الله المستعان

[راجي العفو]

صباحك خير يالزعفراني ..

هذي النوعية الله يعافينا منها ، عالة على المجتمع .. ولو حصّل على شهادة دكتوراه !

الشخص لا بد أن يكون إيجابي و يفيد الناس ..

ضيـــــاع الصلوات !! .. الله المستعان ...

والأهم في العموم .. أن الناس ستتحسر على لحظة لم يذكروا فيها اسم الله ..

مع التحية ..

[Rider]

موضوعك اخوي الزعفراني مميز وفعلا كثيرا من الشباب للاسف هذا روتيتنه اليومي واذا حد قاله من اهلك ودنا المكان الفلاني قال مشغول ياخوي التربيه تلعب دور

[ودي أكون]

بالفعل والله المستعان

بالنسبه لي .. ماعندي مانع يرقدون يوم كامل .. بس الاقل وقت الصلاه قوم صل وعقبها رد كمل نوم ..

الله المستعان

[الجـــوديّ]

هالوضع طبيعي للي ماعنده ارتباط بهواية أو هدف في الحياة ومب عارف هو ليش موجود في هالدنيا

[peace-qtr]

هاي بالنسبه للي ماعنده حياة عقب الدوام

[ANONYMOUS]

ع الاقل احسن من يضيع وقته في اشياء غلط


بعدين النوم عباده :)

[JN000N]

قالو نوم الظالم عباده
ماقالو نامو عن الصلوات

[بـارود]

عايشين على هامش الحياة إلا من رحم الله
همه يومه ولو تسأله عن مستقبله يقولك الله كريم !
ضياع القدوات وتوفر المادة من أسباب فتور الشباب
وتقضية وقتهم في كل ما هو تافه وغير نافع

[نوار قطر]

اخوي ماذا تقصد بالشباب هل هم جيل الثمانينات ولا التسعينيات ولا السبعينيات ولا الالفينيات ؟!

ليش حمد كل جيل له طقوس معينه ،،، ؟ ترى ياما شباب مواليد السبعينات يتصرفون تصرفات بزران ،، حتى البزر تلقاه اعقل واثقل منه ،،

[جبر ال جبر]

من أحلى المواضيع الي قريتها الحين صلاه وبعلق عقب مشكور ع الموضوع الزعفراني

[البوررصة]

اخوي ماذا تقصد بالشباب هل هم جيل الثمانينات ولا التسعينيات ولا السبعينيات ولا الالفينيات ؟!

....................

[R 7 A L]

نمط الحياة والناس في المجتمع
هو السبب الرئيسي

[ms-qtr]

كل شي على التربية

[راعي ال VXR]

للاسف الشديد نسو بان كل يوم او ساعه مضت نقص من اجلهم ويفرحون بالايام المقبله
الدنيا لحظه.. كالمسافر يريح من عناء السفر عند ظل شجره ويتركها ...

[عنيــــد]

موضوع الصلاة مافيه تهاون و لا لعب ..

اما باقي نقاطك في الموضوع فانا ما استغرب هالشي و لا احمل كامل المسؤولية للشباب ..

التربية و المجتمع و الدولة ايضاً لها دور باللي يحصل ،،

بعض الفراغ اصعب مما قلت .. بعضه كان يودي عيالنا في حوادث و استعراضات و نهايات مأساوية للاسف الشديد ..

[عنيــــد]

موضوعك يا الزعفراني متشعب جداً و في كل نقطه ممكن ناخذ فيها وقت طويل بين اخذ و رد ..

نقطة الهياتة في المجمعات زادت بشكل كبير في السنوات الاخيرة ،، و الاسباب متعددة طبعاً الانسان هو يتحمل مسؤولية نفسه و لكن في نفس الوقت احنا كمجتمع لنا دور ..

الشباب اللي انت تتكلم عنهم نعرف هدفهم و الكل يعرفه و هو المغازل .. الحل بكل بساطه زوجوا الشباب .. كمجتمع واجب نخفف تكاليف الاعراس و نحرص على زواج عيالنا و بناتنا في سن مبكرة ..

الاب و الاخ الاكبر وينهم عن عيالهم او اخوانهم ؟ المجالس صارت فاضيه و قليل من الجيل الصغير من يهتم في الجلوس فيها ..


و غيره و غيره والله اشوف طاقات الشباب تروح هدر و كان بالامكان استغلالها بشكل افضل و اجمل و لكن بعض التعقيدات و قلة مجالات الترويح عن النفس ساهمت في اللي يصير ،،

[ناصر30]

هذى نتيجه طبيعيه

لاقدوه ولاتحمل مسؤوليه البيئه للى حواليه تساعد على هالجو

مع وجود الرفاهيه وقله الوعى وعدم وجود هدف في الحياه

وقبل كل هذا الوازع الدينى مفقود وش تتوقع منهم ؟

الحل تصحيح المفاهيم واعادة تاهيل من الاسره والمجتمع والدوله


موضوعك في الصميم استاذي

لك كل الود

[طلعة الروح]

هذى نتيجه طبيعيه

لاقدوه ولاتحمل مسؤوليه البيئه للى حواليه تساعد على هالجو

مع وجود الرفاهيه وقله الوعى وعدم وجود هدف في الحياه

وقبل كل هذا الوازع الدينى مفقود وش تتوقع منهم ؟

الحل تصحيح المفاهيم واعادة تاهيل من الاسره والمجتمع والدوله


موضوعك في الصميم استاذي

لك كل الود

لا المجتمع يبيلة اعادة تأهيل
الشاب منهم عنده يقترض بنص مليون حق سياره بس ماعنده حق يتزوج ويكون عائله
فاقد الشي لا يعطيه

[همر]

ابهاتهم واجدادهم كدوا واتعبوا ... خلوهم يتمردغون في النعيم ...


وبعدين اللي مداوم هذا ما أدى دوره تجاه المجتمع ؟!!

ماله حق يشوف نفسه باقي يومه ؟!!

ولا لازم يكون شعله من النشاط المتقد في خدمة الوطن والمجتمع ؟!!


هل ماتطالبون به واجبات ام كماليات ام مثاليات ؟!!!

[دلال قطر]

كل شي على التربية

مو كل شي على عاتق التربية من وجهة نظري الشخصية
فيه بعض الاباء يقضون اغلب يومهم نايمين او لاهيين بالحياة
ومالهم اي تأثير ايجابي على ابناءهم
وعيالهم على العكس تماما تحصلهم عنصر مفيد بالمجتمع ومب عاله
لا باس الواحد ينام لكن ماينام عن وواجباته تجاه ربه ونفسه وهله ووبلاده !

[الزعفراني]

اخوي ماذا تقصد بالشباب هل هم جيل الثمانينات ولا التسعينيات ولا السبعينيات ولا الالفينيات ؟!

جيلك انت :anger1: