دلالي العقارات

[جوال 11]

هنالك فئة تضحك على الناس وتسرح وتمرح والقانون ما يطالها دلالي العقارات يشترط اخذ نصف الايجار من المالك والنصف الاخر من المؤجر وفي الشهر يكوش على مبلغ لا يحصل عليه صاحب الشهادات وبعضهم يعمل شخصي تحت اسم مكتب مجرد يطلع اعلان في الجريدة ورقم الجوال وبعضهم مكاتب وهمية والناس على نياتها .
لابد من وضع قانون لهذه المهنة حيث انها مهنة من لا مهنة له وبعضهم يتعدون على املاك الناس كالدخول للعقار دون علم صاحبه .
هل من اذن صاغية من المسؤلين .

[alsoq]

حراميه دلالين
يبي يقصبك ويقصب الشاري

نصيحه لا احد يعتمد عليه لو تبيع عقارك بنفسك افضل لك

[Grnas]

بس نص شهر؟

طلب دلال من صاحب عقار خمس شهور مقدم . ليش؟ لأنه عنده واحد بوقع معاه خمس سنوات... شنو يضمن راعي الحلال أنه المستأجر بكمل سنة وبعدين تراكض في المحاكم وشيكات متأخرة؟

[شموخ دائم]

,

,


مرحبا

شكرا على الموضوع

هذا الموضوع كبير ومهم جدا في كل دوله
لان قطاع العقار قطاع كبير جدا وله تاثير واضح على التضخم بكل دوله
وللاسف عندنا ما عليه تركيز من الدوله ولا عليه عقوبات او تفتيش ( نهائيا )

ومن المهم اعطاء موظفين العقارات بالمكاتب ( بطاقه صلاحيه ) ممارسه المهنه
مثل بطاقه ( المندوب ) بالشركات او بطاقه ( مخلصين) الجمارك
يلبسها موظف العقاري يعلقها وتكون بارزه امام الزباين وهو يعاين العقارات
حتى يثق فيه البائع والشاري

عمرنا ما سمعنا مسكو شخص يعمل بدون ترخيص !!!
مع ان عددهم بالمئات تارسين البلد
عمرنا ما سمعنا اغلاق محل عقارات لتجاوزه القوانين !!
حقيقه القانون غائب عن هذه المهنه


والحل يحتاج 3 خطوات وتكاتف 3 اطراف

1- الطرف الاول الدوله من خلال ( تفعيل قوانين ) العقوبات والحزم مع كل من يمارس المهنه بدون ترخيص وترحيله من البلد .

( واحد غير مرخص ويدخل وزاره العدل ماسك الملكيات ويسجل الارض او العقار عينك عينك وياخذ اتعابه ( الدلاله ) امام الموظفين دون الاكتراث لقوانين الدوله !! شي غريب فعلا

2- الطرف الثاني ملاك العقارات عدم التعاون مع ( الافراد ) والتعامل مع مكاتب العقارات المعتمده والمرخصه فقط وهذا يحتاج ( وعي ) وعمله حمله توعيه للناس
لان هذا يضر بقتصاد البلد من خلال ارتفاع الاسعار الغير طبيعيه

3- الطرف الثالث ( المشتري ) عدم الذهاب مع الدلالين الى مواقع الاراضي او البيوت وهو لا يملك بطاقه بيع وشراء العقارات وليس لديه اوراق ترخيص .


هناك ضرر يقع على الزبائن دون محاسبه او دون عقاب مثل تضييع وقت الزبون يوعده ولا يفي بوعوده
وزياده الاسعار والتلاعب فيها وايضا بيع عقارات غير مخول في بيعها واعطاء معلومات مغلوطه بهدف التضليل
ويمتلك اوراق العقارات بدون علم المالك

كثير من الصفقات تتوقف بسبب تدخل اكثر من دلال في الموضوع .

,

,

اخوك

شموخ دائم

[دايموند]

يبتها ع الجرح

[بوحارب]

اكثر اللي مخربين سوق العقار في قطر المصريين

[وحيد-الشوق]

صاروا يدخلون ذهب ومبالغ مايحلمون فيها وبعضهم حتى سيارة كحيانه ماعنده !!

[Mbarkaji]

ضعو قوانين و فعلوها بس لاتقطع رزق احد قطع الاعناق ولاقطع الارزاق. ترغŒ انا موب دلال

[جبر ال جبر]

90% منهم يشتغلون في وظايف حكوميه وماعندهم مكاتب ولازم تنظيم وخربو سوقنا واغلبهم مع الاسف من جنسيه وحده وشغل لف ودوران وكذابين واخد بال سعاتك

[ملك المشاعر]

للاسف اغلبهم نصابين والكذب اكثر من الصدق عندهم

[جبر ال جبر]

http://www.qatarshares.com/vb/showthread.php?591316-%E1%E1%C8%ED%DA-%C7%D1%D6-500-%E3%CA%D1-%DD%ED-%C7%E1%D0%CE%ED%D1%E5/page3
يالله خذ هذي النوعية

[جوال 11]

ضعو قوانين و فعلوها بس لاتقطع رزق احد قطع الاعناق ولاقطع الارزاق. ترغŒ انا موب دلال

[color="#000000"]من قاله يجي قطر ويكذب على الناس ونقول هذا رزقه خلكم من العاطفة المحتال يحاسب ويحترم قوانين الدولة/color]

[جوال 11]

اكثر اللي مخربين سوق العقار في قطر المصريين

صدقت في هذه اغلبهم يتكلم عن تقسيم العقار ولما تقول له ممنوع فيه قانون يرد عليك محدش بيعرف وبعضهم فيه جراءة يكسر قفل باب العقار بدون وجود المالك ويدخل العقار كانه ملك ابوه

[دايموند]

http://www.qatarshares.com/vb/showthread.php?591316-%E1%E1%C8%ED%DA-%C7%D1%D6-500-%E3%CA%D1-%DD%ED-%C7%E1%D0%CE%ED%D1%E5/page3
يالله خذ هذي النوعية

هههههههههههه

[BoFahed]

صدقت في هذه اغلبهم يتكلم عن تقسيم العقار ولما تقول له ممنوع فيه قانون يرد عليك محدش بيعرف وبعضهم فيه جراءة يكسر قفل باب العقار بدون وجود المالك ويدخل العقار كانه ملك ابوه

يا رجال عرضت عقار صارت لي مواقف تنفع تصير حلقة في طاش ما طاش ههه خذ عندك :

اللي صادني اني راعي البيت وفي نفس الفريج و يسندري ليل نهار علشان يبيع البيت مع انه لوحة مكتب ثاني معلقة!!!!

اللي يدش البيت ويخربط برش علا تلفون المكتب المعلق اللي انا متفق معاه ويتصل لي يقولي انا من طرف راعي المكتب وجبتلك شراي يلا نروح التسجيل العقاري نسجل !!!!

هذا غير اللي مخسس في رفيجه بنفس المكتب ويتصل عل الشراي ويخرب البيعة ويجيب له بيت ثاني ارخص وعرفت بعدين انه علشان متهاوشين علا نصيب العمولة !!!

هذاغير اللي يجي يشوف العقار عن طريق السمسار ويجيني علشان يطير حق السمسرة وما خلا حدمن طوايف طوايفي (فضحني ههههههههه) يتوسط علشان السعر

اخر شي رحت عند الخطاط في سوق العلي وسويت لوحه عليها رقمي وتوفقت اموري ولله الحمد في اقل من اسبوع بدال شهرين عرض ومراكض وحرق اعصاب وخساس من شراي يقولك اشتري اشتري اخر شي يخرب البيعة ويقول ما اقدر ظروفي ما تسمح المسامحة الشيخ :anger1:


الصراحة السالفة يبيلها تنظيم ومن قلب بعد لانه السوق انترس اشكال مالها داعي وبالاخير المواطن والاقتصاد هو المتضرر



العالم صارت مسعورة والخساس عندهم ببيزه

[wesam82]

من أمن العقوبة أساء الأدب


و


لاتخاف من الغني إذا جاع ، خاف من الفقير إذا شبع

[جوال 11]

كثير مما يضعون اعلانات يكونون بتاشيرة زيارة ويشتغل في الدولة دون حسيب او رقيب حتى المدرسين يدخل الدولة بتاشيرة زيارة ويدرس بدون فحص طبي ولا يعرف اخلاقه مجرد يشتري تذكرة على القطرية ويعطى تاشيرة لمدة شهر ويجدد

[CH Engineer]

المفروض ممارسة مهنة الدلاله تكون بطريقة رسمية
يعني لازم يكون تابع لمكتب وله بطاقة تثبت هالشي من جهة رسمية لانها صارت عشوائية بشكل مؤذي

والشي الثاني يعدلون النسب 1% كانت على ايام اول يوم سعر الارض 100 و300 الف ريال يحط الدلال بجيبه 3000 لانه يتعب

الحين كل شي الكتروني وعالنت حتى لو تبي تشوف الارض ادخل رقم البن على برنامج البلدية وتعرف التفاصيل والمكان والدلال وظيفته مجرد مكالمة تلفونية واذا كثر يوصفلك المكان وفي اغلب الاحيان يكون ملقوف
و اخر شي يطالبك ب1% 50-60 الف على شنو!!!!!!!

[sweet qatar]

والشي الثاني يعدلون النسب 1% كانت على ايام اول يوم سعر الارض 100 و300 الف ريال يحط الدلال بجيبه 3000 لانه يتعب

الحين كل شي الكتروني وعالنت حتى لو تبي تشوف الارض ادخل رقم البن على برنامج البلدية وتعرف التفاصيل والمكان والدلال وظيفته مجرد مكالمة تلفونية واذا كثر يوصفلك المكان وفي اغلب الاحيان يكون ملقوف
و اخر شي يطالبك ب1% 50-60 الف على شنو!!!!!!!

أتفق مع هالراي .. لازم تتغير سالفة النسبة ويصير مبلغ يحددونه المالك والمشتري كلن بكيفه

[دايموند]

المصيبه اشوف في بنات دشوا عالمجال !!!!

[جوال 11]

المصيبه اشوف في بنات دشوا عالمجال !!!!

كلمتني وحدة منهم وقالت بس اربع عوائل في الفيلا وبتقسم الفيلا قلت لها فيه قانون وكيف بيعيشون مع بعض قالت ازاي عادي كلهم من نفس الجنسية اذا الرسول صل الله عليه وسلم حذر من الحمو اخو الزوج كيف رجال ونساء غرباء يعيشون مع بعض .

[محسن العجي]

بيض الله وجيهكم

انا والعياذ بالله من كلمه انا عندي مكتب عقارات

وللاسف ان اغلب ( جنسيه معينه ) هم الي ماسكين الشغل يعني مسوين لهم لوبي المشكله مب في هذي

المشكله ان اغلبيتهم مثل ماذكرو الاعضاء يشتغلون بفيزه زياره وهو مب تابع لمكتب عقارات .

والشي الثاني المشكله ان الدوله غاضه النظر عن قوانيين العقارات في الدوله ومحاسبه الي يشتغلون بدون مكتب ناهيك عن المشاكل الي تحصل بين المندوبين بينهم البين .

والمفروض من الدوله انشاء بطاقه مندوب عقارات و المفروض من التسجيل العقاري ما يقبل اي معامله الا ببطاقه مندوب عقارات يكون رسمي تابع لمكتب مرخص .

وحتى الجرائد ماتقبل اي اعلان الا لما يكون عند المندوب بطاقه عقارات يسمح له ينزل اعلاناته لان الاعلانات الي في الجرايد 90 بالميه منها ارقام اشخاص ماعندهم مكاتب

وفيه ناس دلالين قطررين قدام في السوق قابلو الوزير كذا مره يحاولون يحلون مشكله الدلاله في الدوله لكن مافيه تجاوب .

منها يكون مثلا ان المكتب العقاري المرخص هو يقدر يخلص البيع والشرا عن طريقه في المكتب بدال الروحه للسجل العقاري

هذا بما يخص بالعقارات

اما التقسيم في الدوله مشكله لازم لازم يشوفون لها حل

ومثل ما الجنسيه الي ماسكه العقارات هي نفسها ماسكه تقسيم الفلل

يعني فيلا يأجرها من راعيها بـ 16 الف يقسمها ويأجرها هو بـ 25 الف وبعلم المالك و 7 عوائل في فيلا !!!!!

واسمحو لي فضفضت ههههه

وعساكم على القوه

[sweet qatar]

المصيبه اشوف في بنات دشوا عالمجال !!!!

من زمان الحريم لهم حصة في هالسوق

والحين الشغلة مب صعبة .. هي وسيط ممكن حتي ماتشوفينها ولاتشوفج


بعض الدلالوه عليهم تصرفات غريبة

مثل الي يعنيك لآخر الدنيا وعقب يومين يقولك ما نقدر نكمل البيعة !!


او الي يغريك بشي عدل عقب يقولك ماعندي المفتاح و يلف فيك علي اشيا ماتسوي !!

[جبر ال جبر]

انا في دلال سوداني رواني بيت وقالي راعيه طالب المبلغ الفلاني وقلت له اوكي عمولتك محفوظه عطني رقم المالك وانا بتفاهم وياه احنا قطريين ونعرف لبعض قال انا مسافر بكره السودان بس الله يخليك عمولتي محفوظه قلت له ابشر وقالي بعطيك المصري الي مباشر مع المالك هو بياخذ عمولته من المالك وانت تعطيني عمولتي 1% قلت تم
المهم سافر الاخ السوداني وكلمت المصري دايركت وقالي انا معاي شركاء ويبون عمولتهم !!!!
قلت والسوداني قالي ماعرفه بس هو يعرف رقمي قلت زين والزبده الحين ,,,, قالي تعطينا العموله احنا قلت مايخالف الحين خلونا نخلص البيت ولاجا وقت التسجيل ماراح نختلف قالي اوكي (ويشهد الله اني ناوي اعطي السوداني لانه هو من دلاني البيت والمصرين بعد مب مقصر وياهم مع انه السوداني انكرو معرفتهم فيه)
رحنا الوكره مكتب تاجير سيارات وحصلنا دلالل رقم 3 الحين وبعد هو مصري جلست معاه وقلت البيت شفته وعجبني وابي اشتريه ونبي نكلم المالك قال اوكي كلم دلال رقم 4 قدامي وقال المالك رفع السعر 200 الف قلت خلاص عطنا المالك وانا بتفاوض وياه قال لا
المالك مايبي يكلم حد قال الي يبي البيت يجي التسجيل العقاري واخلص وياه ,,,ماوعيت الا السوداني يقرقع علي بالتلفونات من السودان وحشرني 30 اتصال رنه ويسكر من الساعه 2 الظهر لين 3 وانا مقيل قالي المصري كذاب وانا ابي عمولتي وحقي برقبتك لين يوم الدين !!!!!
لانه البيت انباع وهو عرف ويحسب انا الي شريته ويكلمني معصب بعد الاخ يعني فوق شينه قواه عينه

[جبر ال جبر]

وفي دلال اشتهرت سالفتة باع برج ب650 مليون ريال وهو نفسه يعرف المالك ويعرف الشراي ومفهم كل واحد فيهم انه معاه شخص ثاني ويوم قبض عمولته كانت مبلغ محترم ومادخل الشيكات في البنك لانه دايمن يستجوبة البنك اانه كيف هالشخص براتب 6000 ريال يدخل كل هالمبالغ بين فتره وفتره من خلال استماره فيها مصدر الايداع فخاف في اخر عمليه له وقال للشراي والبايع في موضوع البرج ابي عمولتي كاش الاول قاله اوكي بعطيك اياه كاش وعطاه كاش وخلص منه اما الثاني شك فيه قاله ليش ومبلغ كبير مثل هذا ليش تبيه كاش ماعندك حساب في البنك وحكرله وعرف انه كذاب في امور وايد وهو من فضحه وصاده وللعلم الدلال جديد في السوق وماعنده رخصه مزاوله الوساطه العقاريه(الدلاله ) وشغله مبني كله على التجسس ومعرفه وين الملاك وعقبها يجيب الشرايين عن طريق مكاتب وطلعو بلاوي سودا عنه

[نجدي قطري]

والله ألهبتوا حماسنا بسوالف الدلالين.
هاي الله يسلمكم قبل أكثر من ثمان سنين قررت بأشتري بيت وطلع علي بمليون وميتين.
المهم الدلال حس إنّي محتاج البيت والسكن فقال لي ترى راعي البيت معيي ينزل السعر وما يبي يدفع عمولته، فالعمولة كاملة عليك 2%، 1% عنك و1% عن المالك. المهم ورضيت وعطيته الفلوس وخذت الإيصال.
بنكي هو المصرف، ومثل ما تعرفون تعاملاته أبطأ من السلحفاة، فمر الوقت واتصل فيني الدلال ويقول ترى المالك هوَّن. قلت له زين عيل رجع لي بيزاتي. طقه جني، وقال مالك شي عندي. المهم قلت له خير إن شاء الله، المحاكم طريقها معروف، وقام يتراقل وقال لي في النهاية تعال خذ رقم المالك وفلوسك ووقع على ورقة إنّك ما تتعامل مع المالك من ورانا.
ويوم أتصل في راعي البيت، رجال أجودي من عيال الكوّاري إن ما خانتني الذاكرة، قال لي ترى آنا ما قلت حق الدلال مابي أدفع العمولة، وقال اصبر ويحطني في اتصال ثلاثي مع الدلال ويقول له هاه وش صار مع الشاري، يقول الدلال خذ فلوسه وهون وحتّى 500 ريال ما عطانا حق الاتّصالات.
وهذاني أقولها حسبي الله عليه وعلى كل من يبي يبوق فلوس الناس من غير وجه حق.

ثقافة الخليجي كيس دراهم هذي لازم تنمحق محق.

[Dmy Enabi]

حبيت أنبه في بعضهم يقولك براويك المكان وهو نصاب أصلا ويطلب منك عمولة ومقدم 6 شهور ،أحذروا هذيلا نصابين مافي شي مقدم 6 شهور حسب علمي
أي دلال تروح معاه قوله ودني المكتب وخل كل شي عندك رسمي وموقع ومن حقك تطلب صورة من السجل وقيد المنشأة ،انتبهوا لأن قيد المنشأة إذا كان ساري معناته عندهم مكتب ،لكن لو بس سجل ممكن مطلعه لكن ماعنده مكان حتى لو ساري
لاتستحون خلوا ويهكم بليته هذا حقكم لكن في نسبة كبيرة مع الأسف ماعندها الوعي

[مخطط قطري]

نسبة قليله مع الاسف الي تتحلى منهم بالصدق والامانه وبعلمكم ليش المشاكل تكثر في هالمجال (تبي تعرف النفوس ارم الفلوس) لانه فيها فلوس ودراهم وبيزات ومصاري وجنيهات وليرات بدون مجهود وتعب وركز لي في الاخيره يمكن شوي يلعوزونه الملاك بس يتحمل ويضطر يكذب ويلف ويدور مثل شريطي السيارات ومثل السمسار ودلال العقارت وسمسار الغنم والمزادات
الكل يبي فلوس بدون تعب ومجهود وخصوصا اذا صادف اشخاص حمقى وسذج يستغل هالشي
ومع الاسف القطري يتحمل جزء من هالمسؤليه على الوضع الي وصلنا له
في الاخير اقول لكل شخص سواء مالك او شراي او دلال اتق الله وراك موت وحساب والفلوس تروح وترد واذا الله كاتب لك نصيب غصبن عنا راح يجيك بس اتركو عنكم سوالف الفهلوه والاستغفال والكذب

[R 7 A L]

وفي دلال اشتهرت سالفتة باع برج ب650 مليون ريال وهو نفسه يعرف المالك ويعرف الشراي ومفهم كل واحد فيهم انه معاه شخص ثاني ويوم قبض عمولته كانت مبلغ محترم ومادخل الشيكات في البنك لانه دايمن يستجوبة البنك اانه كيف هالشخص براتب 6000 ريال يدخل كل هالمبالغ بين فتره وفتره من خلال استماره فيها مصدر الايداع فخاف في اخر عمليه له وقال للشراي والبايع في موضوع البرج ابي عمولتي كاش الاول قاله اوكي بعطيك اياه كاش وعطاه كاش وخلص منه اما الثاني شك فيه قاله ليش ومبلغ كبير مثل هذا ليش تبيه كاش ماعندك حساب في البنك وحكرله وعرف انه كذاب في امور وايد وهو من فضحه وصاده وللعلم الدلال جديد في السوق وماعنده رخصه مزاوله الوساطه العقاريه(الدلاله ) وشغله مبني كله على التجسس ومعرفه وين الملاك وعقبها يجيب الشرايين عن طريق مكاتب وطلعو بلاوي سودا عنه

بما ان فيه جهه مسئولة
انتمنى انها تعمل على أكمل وجهه في هذا المجال

[BoFahed]

نسبة قليله مع الاسف الي تتحلى منهم بالصدق والامانه وبعلمكم ليش المشاكل تكثر في هالمجال (تبي تعرف النفوس ارم الفلوس) لانه فيها فلوس ودراهم وبيزات ومصاري وجنيهات وليرات بدون مجهود وتعب وركز لي في الاخيره يمكن شوي يلعوزونه الملاك بس يتحمل ويضطر يكذب ويلف ويدور مثل شريطي السيارات ومثل السمسار ودلال العقارت وسمسار الغنم والمزادات
الكل يبي فلوس بدون تعب ومجهود وخصوصا اذا صادف اشخاص حمقى وسذج يستغل هالشي
ومع الاسف القطري يتحمل جزء من هالمسؤليه على الوضع الي وصلنا له
في الاخير اقول لكل شخص سواء مالك او شراي او دلال اتق الله وراك موت وحساب والفلوس تروح وترد واذا الله كاتب لك نصيب غصبن عنا راح يجيك بس اتركو عنكم سوالف الفهلوه والاستغفال والكذب

صادق اخوي وانا انصح كل قطري وقطرية بانه يتابع حلاله بنفسه ونجوز عن الثقة العميا اللي خلتنا عرضة للنصب والاستغفال

شفيها لو الواحد باع عقاره ولا سيارته بروحه يحط اعلان بالجريدة والمنتديات مايبيلها تعب ولازم يتحمل شوي العالم بالعكس بتتعرف علا ناس وبتتعلم من شخصيات تشوفها واذا يخاف الاحراج يخلي حد من اقاربه ولا ربعه هو اللي يقابل الشرايين وهو يتفق معاهم بالتلفون

[الامير]

اتمنى تخصص الجريده الشرق للبيع ولا يجاره حق القطريين ويكتب على اعلى صفحه
(من الملك مباشره)
صدقوني بتخف نصب
بس شهر وشوف كيف دلالين يستخفون

[شبح الصمت]

الله يعطيك العافيه

بتكلم عن واقع تجربة

كنت شراكة مع شخص في مكتب عقارات ولكن ما صار نصيب لانه الي معاي كان ما يسمع الكلام الله يهداه ..

المهم انا كنت اشتغل وسيط

بس وسيط على اشياء مباشرة

شيء من المالك او عندي شراي ..

قعدت سنتين وفي هالسنتين والحمد لله طلعت بسمعة طيبه لا نصبت على احد ولا رفعت في عقار احد والا ماطلت وقلت معاي اثنين ثلاثة او من هالكلام الي يدور ..


الحمد لله ما امدح في نفسي ولين اليوم في مستثمرين يتصلون فيني لاجل ادور لهم على اشياء ولكني اصرفهم بطريقة حلووه


لاني كرهت الشغله من الدلالين الي يكذبون مش الكل طبعاً البعض منهم ..

انا كلامي سيده ما احب الف ولا ادور وما احب احد يكذب علي يقول انا وانا واخرتها اهو ما عنده شيء ..


الله يرزق الكل ولكن الله يسامح الي يحاول انه يستغفل الناس ..

[Riku3]

من كم شهر حطيت اعلان في المنتدى طلب ارض .. لوعوا جبدي اتصالات ووعود وكذب ومحد يقابلك مباشر وحتى الاراضي ما يدلونها !! ..

والي يضحك ان جانتي نفس الارض من 4 دلالين وكل واحد يقول مباشر مع المالك ! .. سوداني و2 مصريين وواحد يقول قطري بس ما ظنتي عليه زلات اعتقد سوري .. لا وكل واحد مسمي نفسه بو حمد ، بو خليفة ، بو فهد بلفيت يحسسونك انهم شخصية .. مصري وبو فهد كلش مب راكبه :/ .

كل واحد يقول سعر ويزايد ويقول المالك ما ينزل !! .. وكل واحد سعر بفرق مب بسيط .. وجيت بيوم اشوف واحد منهم متصلي يقولي ترى الحين رايحين التسجيل خلاص وبمبلغ كذا ، والمالك يقول لو تزيد 200 الف من نصيبك هههههه .. قتله الله يوفقكم الارض ما ابيها .

[technical]

بسم الله الرحمن الرحيم ، لماذا لا يوجد سوق للعقار مثل سوق الأسهم ، ويتم عرض الاراضي والفلل للبيع او للاجار ! وكل المعلومات واضحة ، والسلام.

[شبح الصمت]

بسم الله الرحمن الرحيم ، لماذا لا يوجد سوق للعقار مثل سوق الأسهم ، ويتم عرض الاراضي والفلل للبيع او للاجار ! وكل المعلومات واضحة ، والسلام.

في الشيخ في قطر سيل

وفي بعد موقع ثاني ما يحضر لي ..

بس خذها مني صاحب العقار ما يبي يعرض وما له بارض كل يوم يروح ويطلع له مشتري ..

فيقط كل شيء على الوسيط والوسيط في منهم من يخاف الله في كلمته وفي منهم الي عادي

وفي منهم من ينشر العقار في السوق ويحرقه حراق ..


ما نقول ما في وسطاء يشتغلون بنفسهم فيهم خير في كثير ولكن الاغلبية من الوسطاء الغير صادقين خربوا على غيرهم ..


الله يستر على الجميع

[sweet qatar]

اي والله في ناس فيهم خير



مب دايماً العيب من الدلال

أحياناً المالك عله .. او الشراي غير واضح


بالنسبة للمواقع موجودة ومن كم شهر كانت مفيدة فعلاً

بس العيب ان ممكن اي حد ياخذ التفاصيل والصور و يدخل في البيعة

وتلقي عشرين دلال عارضين نفس الفيلا او الأرض بدون علم المالك

[شبح الصمت]

اي والله في ناس فيهم خير



مب دايماً العيب من الدلال

أحياناً المالك عله .. او الشراي غير واضح


بالنسبة للمواقع موجودة ومن كم شهر كانت مفيدة فعلاً

بس العيب ان ممكن اي حد ياخذ التفاصيل والصور و يدخل في البيعة

وتلقي عشرين دلال عارضين نفس الفيلا او الأرض بدون علم المالك


صدقتي سويت لانه في ناس ما تبي تكلف على عمرها ..

انا واعوذ بالله من كلمة انا اشوف اعلان والرجال الي عندي يدور ما يحب يعور راسه فاتصل في صاحب العقار اقوله انا عندي المشتري موجود بتعطيني عموله من صوبك وباخذ عموله من صوب المشتري بخلص لك وفي البعض يقول خلاص باخذ من صوبا لمشتري قنوووع والبعض لا من الصوبين ..


اخر عملية بيع وشراء وقفت عليها والاثنين عندي


المشتري ابو رفيجي

والبايعين ورثة


تصدقين وقفوا البيعه على 100 الف

قلت حق المشتري اخذ العقار انصحك اخذه اخذه لا توقف راح يتسمع للناس وقاموا يقولون له غالية ومدري ايش المشكلة موقعه حلووو وفي منطقة جديدة


المهم راحت خلال 6 شهور من بيعتها جابت حق راعيها مليون ريال زيادة في يده تخيلي ..

ولد ابو رفيجي متحسف يقول ليتنا وليتنا قلت له ليت وياليت ما تفيد قول الحمد لله وربي يعوضكم بلي احسن


ومن عقبها خلالالالالالالالاص وقفت كفايه عوار راس منها رزق طيب بس عوار راس

[sweet qatar]

اوف يا شبح انا انقهرت

لكن سبحان الله أرزاق


بعض البشر صدورهم ضيقة أعوذ بالله

داخلين حرب مب سوق

[شبح الصمت]

اوف يا شبح انا انقهرت

لكن سبحان الله أرزاق


بعض البشر صدورهم ضيقة أعوذ بالله

داخلين حرب مب سوق


اسمله عليج من القهر خيتووو

يا كثر الاشياء لو اقولج تقولين لا يبه تتغشمر

مره وقعت على عقد عموله طلع باسمي بـ 15 مليون تخيلي ..

محامي وكل شيء

الارض حق رفيجي قيمتها 265 مليون والمشتري وحده بس الي تحتها حاولوا يضربون في القيمة لكنها اعرفت انه في لعبة وفركشت السالفة


تخيلي الي معاي الي كان جايبها ما رقد عدل لمدة اسبوع يتحلم في العمولة


والله اني ما افتكرت لاني عارف هالاشياء تعور القلب بتقولين لي اشلون حسبوا العمولة بقولك لانه رفيجي ضبط الموضوع والارض لهم


ولو تجري جري الوحوش غير رزقك ما تحوووش ..


ومره خلصت بيت حق رجال تخيلي معرفتي فيه قويه قالي بعطيك عمولتك كاملة قريب الـ 35 الف

تخيلي يوم خلصتها له جاء يعطيني الفين ريال في ذمتج سويت مهب قهر قمت وقلت له ما ابي عمولتك وخلها لك عقب قام يدخل وسطاء مع انه عنده ملايين الله رازقه بس الله يسامحه ويغفر له ولنا ..

المهم لاحترامي له رحت مجلسه وراضني بعد بس بنص العمولة ..

خليها على الله تتعبين واخرتها تعبك حق شهور يروح خالي بلاش


فعشان كذا انا تركتها والرزق مهب منها


واحيي اصاحب المكاتب الجادين الي ما يحبون يلفون ويدورون وفي اسماء كبيرة في السوق كلمتها تمشي على الكل ..

[دايموند]

معليه حد يشرح لي شنو الفرق بين الوسيط والدلال
وكم كل واحد فيهم ياخذ نسبه؟

[شبح الصمت]

معليه حد يشرح لي شنو الفرق بين الوسيط والدلال
وكم كل واحد فيهم ياخذ نسبه؟

هم الاثنين نفس المسمى .

الوسيط والدلال اختلاف بالاسماء فقط ولكنهم نفس العمل ونفس التخصص ..

العمولة معروفه في حال بيع عقار ( فيلا ، بيت شعبي ، مجمع سكني ، عمارات ، ابراج )
1 بالميئة من البائع
1 بالميئة من المشتري

او على حسب الاتفاق انا عندي عقار قلت للوسيط انا ما اعطي عموله خذ عمولتك من المشتري والعكس ..

او الايجار يختلف الايجار طبعاً يكون نص شهر معروف

او على حسب العقد في ناس تاجر مجمعات كبيرة وتاخذ ايجار شهر كامل عاد عندج الحسبه

المجمع فيه 40 فيلا والعقد لمدة سنتين او 3 او اربع

ياخذ ايجار شهر كامل بس نص عمولة عن الفلل كلها ..

فكله على حسب الاتفاق

وفي ناس تخلصين لها وتسحب عليج ما عندها اي مشكلة الامور طيبه في الروب

[Engineer]

على طاري الدلاليين
لي قصة شخصية بس انا البائع
حطيت عقار لي بمكتب قريت اسمه بالوسيط و كان الاتفاق بسعر معين
المهم بعد فترة اتصل فيني واحد كان معاي بالشغل وقالي انت حاط بيت بمكااتب عقارات! قلت له اي بس بمكتب واحد قالي انا طلعت اعاين البيت و عرفت انه بيتك فقالي السعر اللي عارضه غالي شوي قلت له ليش كم معروض قالي فوق سعري ب 200 الف!
و يوم كلمت الدلال قالي هذا المعروف بالسوق نرفع السعر علشان نتناقش مع الشراي قلت له هونت مابي ابيع
بعد ماتم عنده العقار شهرين!
وبعته على الرجال مباشره باقل بشي بسيط من اللي كنت عارضه
لازم يا جماعه ان البايع يكون طرف مباشر لا يخلي الدلاليين يخيطون و يبيطون بحلالك ويطمعونك
والله المستعان

[بنت مريخ]

واذا ابي ابيع او اشتري عقار بدون دلال وانا ماعندي خبره
شسوي؟؟؟
علموني

[دايموند]

شكرا ع التوضيح شبح الصمت

بنت المريخ
عندج الجرايد