ابي اركب كاميرا مراقبه في البيت اشلون؟اطلب من النت والا؟

[دايموند]

السلام عليكم

قررت اركب كاميرا مراقبه في البيت

بس ماعرف شنو لازم اشتري؟او المتطلبات والملحقات؟
كالانترنت والرسيفر والخ؟

حد يفهمني شالمطلوب عشان اركب لي كاميرا مراقبه؟

وهل اقدر اطلبها من النت ووين ارخص مكان احصل فيها كاميرا مراقبه اشبك فيها بالجوال؟

وهل لازم النت يكون نت منزلي والا عادي واي فاي؟

والسموحه ع استفسارتي الكثيره وشكرا لكم

[الفني]

مرحبا اختي شيك على الخاص

[محمد11]

اخوي لاتطلب من النت لان سالفه لازم موافقه من لجنة الاتصالات ..
اذا تبي خذ من دبي 6 كاميرات مع الدي دي ار 2000 ريال
والتركيب ف ركب ف الدوحه ب 1500 او 1000 ريال

هني كل غالي

[محمد 93]

انا ابي اركب بعد من يدلني وجزاكم الله كل خير

[احب قطر]

انا توني مريت بتجربة كاملة ، وراح اذكر لكم جميع التفاصيل للي حاب يستفيد ، وانا حاضر للرد على اي استفسار :

بداية كانت بدالة البيت خربانه ، قلت فرصة اجدد البدالة واركب نظام الاي بي سسستم ، من ميزاته ان تقدر تشبك البدالة بالإنترنت ويكون موبايلك تحويله للبيت سواء كنت داخل او خارج الدوحة بالاضافة الى انك تقدر تبرمج البدالة من اي مكان سواء داخل او خارج البيت ، واخترت نوع Grandstream UCM 1602 سعرها 269 دولار
وطبعا فيها العديد والعديد من المزايا اللي محتاجه لموضوع كامل لشرحها

المهم ، والتليفونات في انواع كثيره تركب عليها من 30 دولار الى 200 دولار

وقلت فرصة اذا راح اركب هالبداله أني اركب كاميرات ، واخترت نوع الكاميرات من نفس الشركة ، وطبعا مهم معرفة حجم العدسة ، لان اذا المداخل لازم تعطي زاوية كبيره وإذا في الحوش ومن بعيد نوع العدسة غير ، طلبت 5 كاميرات طلعوا علي تقريبا 690 دولار ، وميزتهم انهم يشتغلون على واير الشبكة فقط من دون واير كهربا . وميزتهم أيضاً أني ممكن أحط لكل كاميرا رقم تحويله واتصل عليها من خلال البدالة وأشوف من التلفون نفسه الكيمرا.

وعلشان التخزين طلبت mini dvr 8 channel وهذا حجمه جداً صغير بحجم apple tv بسعر 54 دولار وطلبت هارد دسك للتخزين حجم 5 تيرا بايت ، يعني ممكن اخزن بتقنية HD من ال 5 كاميرات لمدة شهر .

وعلشان اشغل الكاميرات عن طريق الشبكة من دون واير كهربا لازم اركب نوع معين من السويتش ، طلبت cisco sf 220 قيه توصيل هل 24 جهاز او تلفون او كاميرا بسعر 400 دولار ، وطلبت واحد خارجي فيه 8 وصلات للكاميرات اللي برع شريته من الدوحة بسعر 950 ريال وفيه 8 وصلات ، السبب ان عندي ستور برع وأقدر أوصل واير واحد فقط من داخل البيت الى الستور وطبعا وصلت فيه كذلك تلفون المطبخ وغرفة الخدم للانتركم فقط.

وغيرت وإيرات التلفونات من الوايرات العادية الى وإيرات الشبكه cat 6 واطلعو علي بما يقارب 2000 ريال من دون سعر التوصيل ، وأخذت سوكتات لان كل سوكتات التلفونات اللي في البيت تتغير الى data point وأخذت نوع تمبي بسعر 80 ريال للسوكت.

وكذلك جرس الباب لازم نوع اسمه ip door phone وأخذته بسعر 250 دولار

كل الأجهزة دخلت عادي الا الكاميرات ، لازم تجيب موافقة المجلس الأعلى للاتصالات ووزارة الداخلية ، المجلس الأعلى مكانهم في ابراج النصر خلف برج برزان وفيها رسوم 40 ريال اذا مستعجل وعادي تطلع الموافقة ، وبعدها تأخذ الموافقة الى ادارة النظم الأمنية وفي صيغة كتاب عندهم ، وترجع تأخذ الموافقة من عندهم بعد 4 الى 5 ايام.

ووصلت عالبدالة خط من الانترنت علشان الخدم يكلمون أهلهم ببلاش ، تطلع التكلفة للهند تقريبا 9 درهم للدقيقة ، والفلبين تقريبا 20 درهم للدقيقة ، ووايد كان لها مردود إيجابي عليهم ولو انهم ما يتكلمون وايد.

هاذي تجربتي كامله وطبعا انا بنفسي برمجت كل شي ، وعملت نظام vpn أني اقدر ادخل على شبكة البيت من اي مكان في العالم وأشوف البدالة او الكاميرات .

وانا حاضر للرد على اي استفسار

[دايموند]

احب قطر

السالفه معقده خليتني اكرهه الكاميرات

هههههه

[دايموند]

انا كل ااي ابيه كاميرا وحده مع تسجيل
مع امكانيه شبكه بالواير ليس وبالجوال

[حمد بن سعد]

اهم شي مش ويرلس عشان محد يخترقها من برع