اقتراح لتفادي الازدحامات المروريه ...

[Mohammed2]

السلام عليكم ورحمة الله وبركاته

تقريبا جميع سكان دولتنا الحبيبه قطر يعانون من الازدحامات المروريه وخصوصا في أيام العمل صباحا ومساء.

وفي بعض الشوارع والتقاطعات يكون فيها أعمال توسعة وتعديلات للشوارع.

مثال: تقاطع عبدالغني (تيوتا ولكزس) فيه اصلاحات لكن في بعض الأحيان يتم اغلاق التقاطع بالكامل ويجبر مستخدموا الطريق بالدخول في الطرقات الداخليه ويحدث ازدحام مروري كثيف جدا لدرجة أن تقاطع المطار يتوقف, وبعض الأحيان يكون التقاطع مفتوح جزئيا.

الناس لايدرون متى يتم اغلاق التقاطع بالكامل وفي أي وقت حتى يتجنبوا الذهاب اليه, فعندي اقتراح بأن يتم تركيب كاميرات فيديو 24 ساعه في التقاطعات والشوارع الرئيسية مثل طريق 22 فبراير والكورنيش والدائري الثالث, وظيفة هذه الكاميرات تصوير فيديو مباشر للطريق ويتم عمل برنامج على App Store وظيفة البرنامج عرض حركه السير مباشرة اذا كان الطريق مزدحما جدا يمكن تفادي هذا الطريق واستخدام طريق آخر الازدحام يكون فيه أقل

أتمنى أن يتم اخذ هذا الاقتراح في عين الاعتبار ودراسته من قبل وزارة الداخلية أو الجهة المعنية.

واذا في اي اقتراحات مفيدة اتمنى الكل يشارك برأيه

[H H]

مع انك تقدر تشوف الطرق المزدحمه في الخريطة ويخلونها لك بالاحمر لكن ماراح تكون بجودة اقتراحك!
مع وبقوه.

[الجـــوديّ]

مع وبقوة

خاصة ان في تطبيقات هاتفية بهذا الشكل وناجحة جداً

حتى لو ما كان فيه تصوير حي مباشر .. يكفي بوضع خطوط حمراء عل خارطة الطريق في التطبيق

تدل على وجود زحمة في هذي الشوارع والاقتراح باستخدام الطرق البديلة

وتكون الهواتف مثبته في السيارة وفيه متحدث يرشد السائق للطريق وينبهه قبل بفترة أي الطرق يستخدم

ويفترض هالتطبيقات تتحدث على طول.

[Mohammed2]

الخطوط الحمره موجوده في بعض البرامج مثل خرايط قوقل وتبين اماكن الزحمه والاماكن الخفيفه لكن ماتدري عن دقتها.
اذا كان في نقل مباشر من الكيمرات وتشوف حركه السيارات والشارع من الجوال هذا افضل بكثير

[jeep-srt8]

:victory:

[معماري قطري]

وليش ما يبدأَ العمل في العاشرة ليلاً لين 5 الفجر وبتقنيات حديثة وبحيث يكون الاغلاق جزئي .. شفت شوارع وجسور تركب في ساعات قليلة في الليل ويتم نقل الشغل بواسطة التلفزيون في أَمريكا .. العجيب صارت حادثة لشاحنة علقت تحت جسر وحركت عارضة خرسانية كبيرة وكان الجسر خطر يمشون عليه وهو حيوي .. وتم البدء مباشرة ظهراً في العمل وبمواكبة الشرطة تحرك المرور وتم إِزالة الجسر بعدد عوارض كبيرة وطويلة وإِعادة تركيب الصالح منها وتغيير التالف .. وتأَخر المقاول ساعة وحده عن الموعد المحدد في منتصف الليل وتم الانتهاء من العمل قرب الساعة وحدة وكله بمواد خرسانية وتركيبات خاصة .. وما اقول المقاول خارق ولا ساحر ولا عنده آلات غير متوفرة عند مقاولينا بس عمل مشترك وتخطيط صح وشغل معمول حسابه.

[Taiki]

يا شباب في برنامج و مدعوم من وزارة المواصلات او جهة حكومية ثانية
انا استخدمه و موثوق ميه في ميه و يعطيك الازدحام اول باول

هذي اللنك للاندرويد ( سامسونج )

https://play.google.com/store/apps/details?id=com.qmic.itrafficmon&hl=en

وهذي اي او اس ( ايفون )
https://itunes.apple.com/qa/app/masarak-itraffic/id541575727?mt=8

وهذا موقعهم الرسمي
http://www.masarak.com/
و ادعولنا

[airbus]

يعني لو موجود الكاميرت بتخف الزحمة ياخي في كل داعوس تحصل زحمة

هدا النظاف موجود في كل اوروربا و امريكا ادا في زحمة في شارع تاني يكون فاضي و يوفر عليك وقت اما اهنا كل الشوارع زحمة ممكن بعد سنة شهور تبي تصف في بيتكم متحصل مكان داخل البيت

[aziz4z]

قصدك نفس اللي في الصورة , في الصين يستخدمون هاللوحات إلى المخارج فيها زحمة ولا لا
90046
الناس كلها راح تتحول إلى الشوارع الثانية و بتسبب زحمة , بس لو يحذفون كم من إشارة و تقاطع اللي في الشوارع , أمورنا راح تكون زينة

[Mohammed2]

يعني لو موجود الكاميرت بتخف الزحمة ياخي في كل داعوس تحصل زحمة

هدا النظاف موجود في كل اوروربا و امريكا ادا في زحمة في شارع تاني يكون فاضي و يوفر عليك وقت اما اهنا كل الشوارع زحمة ممكن بعد سنة شهور تبي تصف في بيتكم متحصل مكان داخل البيت

اخوي في الاقتراح ماكنت اقصد التخفيف من الزحمه
اقرى العنوان

اقصد وانت فالبيت قبل ماتطلع من البيت ورايح مشوارك تفتح البرنامج وتشوف الطريق اللي بتسلكه اذا فيه زحمه كثيفه او يمكن في اغلاق مفاجئ او اي شي معطل حركه السير، فورا وانت فالبيت بتعرف ان هذا الطريق فيه مشكله وبتاخذ طريق اخر يكون فيه الازدحام اقل.

لان كذا مره اطلع واتفاجئ ان الطريق تم اغلاقه او في تحويله او شي من هالقبيل وتضاعف الزحمه فيه، عالاقل من هالبرنامج بعرف ان في مشكله قبل ما اطلع من البيت.

ولا اشرايكم؟

[فاهم وساكت]

انا مستغرب بان فيه اشياء وايد موجوده بالدول المتقدمه وبسهوله ممكن نطبقها بما ان قطر صغيره والفلوس مابتشكل اي مشكله في تنفيذها ...

مثلا اغلب الشوارع عندنا يكون فيه رصيف بينا وبين الشارع المتجه الاتجاه المعاكس .. لو فرضنا انك رايح مكان معين وهالمكان على يسارك بس انت لازم تاخذ الشارع كامل وتوصل عند الاشاره وتكوع ... لان فيه رصيف يفصلنا عن الشارع الثاني وهالشي ماشوف له داعي ابدا بالعكس مسبب زحمه ..

الحل ان الرصيف ينشال ويخلونه شارع عليه خطين لونهم مختلف .. واذا تبي تلف يسار تمسك هالخط وتنطر الشارع الثاني يفضى وبعدها تدخل يسار وبس .. حل بسيط وويوفر علينا مبالغ كبيره بدال ماتحط رصيف وسالفه !


وانا مع اقتراحك، يعطيك العافيه

[حسن]

شوف الزحمه فيكم فيكم هذاانا متنباء بها من زمان
لاتحاتي اللي جاي بعد ازيد انت لين الحين في رينج ال2 مليون شلون لين وصلت 4 مليون
وعقبها الدعم في 6 مليون
هذه موجوده مش من وحي الخيال
الحل هو انشاء شبكه قطارات ومواصلات على مستوى عالي ورفع سعر البترول
وانشاء مدن جديده خارج العاصمه على الاقل ب 50 كليلو وانشاء طرق جديده ذات 12 مسار

وانشاء مواقف للسياكل وطرق خاصه بهم

واذا على البرنامج انا باقولك احسن برنامج وبدون ستلايت يشتغل
لا تقرب الشوارع الرئيسيه نهايئا
ادخل الطرق الداخليه وبين الفرجان هذه مايدلونها الاجانب وهما دائما يسلون الشوارع
الرئيسيه
اناهذه سياستي للروحه والجيه
لا ني ابن البلد واعرف مخارجها ومداخلها البريه والبحريه بعد بس الجويه صعبه شوي

بالتوفيق

[Mohammed2]

شوف الزحمه فيكم فيكم هذاانا متنباء بها من زمان
لاتحاتي اللي جاي بعد ازيد انت لين الحين في رينج ال2 مليون شلون لين وصلت 4 مليون
وعقبها الدعم في 6 مليون
هذه موجوده مش من وحي الخيال
الحل هو انشاء شبكه قطارات ومواصلات على مستوى عالي ورفع سعر البترول
وانشاء مدن جديده خارج العاصمه على الاقل ب 50 كليلو وانشاء طرق جديده ذات 12 مسار

وانشاء مواقف للسياكل وطرق خاصه بهم

واذا على البرنامج انا باقولك احسن برنامج وبدون ستلايت يشتغل
لا تقرب الشوارع الرئيسيه نهايئا
ادخل الطرق الداخليه وبين الفرجان هذه مايدلونها الاجانب وهما دائما يسلون الشوارع
الرئيسيه
اناهذه سياستي للروحه والجيه
لا ني ابن البلد واعرف مخارجها ومداخلها البريه والبحريه بعد بس الجويه صعبه شوي

بالتوفيق

ايوه انا ادري ان الزحمه موجوده لامحاله

بس اللي انا اقصده ان الشخص عالاقل يكون على علم بان الطريق اللي بيقصده فيه زحمه زايده عن الحد المتوقع

مثال: انا كل صبحيه استخدم شارع الكرنيش بعض الايام الطريق الزحمه لكن السيارات تتحرك مافي مشاكل، وبعض الايام الزحمه تكون كثيفه فوق المتوقع.

انا ممكن اني افتح البرنامج اللي اقترحته وانا فالبيت واشوف اذا الزحمه خفيفه او غير محتمله واتفاداها قبل ماطيح فيها.

اكيد اغلبنا صارت معاه هالسالفه انه يكون متعود على زحمه معينه في طريقه ويفاجئ في يوم الزحمه تكون مضاعفه ويقول ياليتني لو رحت من طريق ثاني.

[Mohammed2]

ابشركم خلصو من تقاطع عبدالغني :)

[R 7 A L]

اخوي
اكثر الاجانب
حتى لو الطريق موقف قدامهم ماراح يستخدمون طرق اخرى
يمكن مايدلون وخايفين يضيعون
يمكن مايبغون يجازفون ويغامرون

[Mohammed2]

اخوي
اكثر الاجانب
حتى لو الطريق موقف قدامهم ماراح يستخدمون طرق اخرى
يمكن مايدلون وخايفين يضيعون
يمكن مايبغون يجازفون ويغامرون

وهذا افضل لنا احنا كمواطنين، اغلبنا اذا مب كلنا ندل الطرقات في البلد فاذا شفنا من خلال التطبيق ان في زحمه كبيره جدا في الطريق اللي قاصدينه، من البدايه بنسلك الطريق الثاني ونتفادا الزحمه الكبيره.

[hamadazoz]

يفاوتون بين اوقات الدوامات راح تخف الزحمه

دوارات مانبي اشارات بس

[خبير أسهم]

مطلوب من ادارة المرور اخذ التجارب من بعض الدول التي قضت على مشاكل الازدحام

واعتقد هناك حلول كثيرة

[(عبدالله)]

أحيانا حركات صغيرة تجيب نتايج كبيرة

شركتنا في راس لفان سوت حركة حلوة كحل ولو مؤقت

عدلت في مواعيد الدوام وحطت فيه خاصية المرونة (احضر مبكر وغادر مبكر يعني ابدأ 6:30 وغادر 2:30 ) أو(احضر متأخر وغادر متأخر 7:30 وغادر 3:30)

الداوم الأصلي من 7:00 إلى 3:00 ... وعن تجربتي أنا أطلع من بيتي في العزيزية قبل الساعة 5:40 الصبح وأوصل دوامي في لفان بالضبط 6:30 بدون زحمة ولا نرفزة

يعين بالضبط 50 دقيقة وانا ملتزم بالسرعة المحددة

أما اذا طلعت بعد ال6 أوصل في ساعة وربع.. وإذا طلعت 6:30 أوصل في ساعة ونص وأكثر

فعلا".. بورك لأمتي في بكورها

الله ييسر للجميع

[Mohammed2]

يفاوتون بين اوقات الدوامات راح تخف الزحمه

دوارات مانبي اشارات بس


مطلوب من ادارة المرور اخذ التجارب من بعض الدول التي قضت على مشاكل الازدحام

واعتقد هناك حلول كثيرة

نعم اخواني في حلول كثيره للزحمه

لكن الزحمه في النهايه شي لابد منه

وانا في موضوعي ما اقصد القضاء على الزحمه لا، اقصد في اقتراحي كيف ان احنا نتفادا الزحمات الكثيفه قبل الدخول فيها. يعني من البرنامج اللي ذكرته قبل ماتروح دوامك او المكان المقصود تطلع على حاله الطريق اللي بتسلكه هل الزحمه طبيعيه او ان في مشكله مثل حادث او اعمال طرق والزحمه صايره غير محتمله، عشان يمديك تسلك طريق ثاني الزحمه فيه اقل.

في موضوعي ما اقصد نضع حلول للزحمات اقصد ايش هو رايكم في الاقتراح اللي ذكرته في بدايه الموضوع وشكرا.

[طلعة الروح]

مع وبقوة

خاصة ان في تطبيقات هاتفية بهذا الشكل وناجحة جداً

حتى لو ما كان فيه تصوير حي مباشر .. يكفي بوضع خطوط حمراء عل خارطة الطريق في التطبيق

تدل على وجود زحمة في هذي الشوارع والاقتراح باستخدام الطرق البديلة

وتكون الهواتف مثبته في السيارة وفيه متحدث يرشد السائق للطريق وينبهه قبل بفترة أي الطرق يستخدم

ويفترض هالتطبيقات تتحدث على طول.

من الفاضي اللي بيركب سيارته ويشغل هالتطبيقات

[alsoq]

ما خليت طريق مختصر ولا داعوس وكل يوم اغير الاتجاه كله زحمه بزحمه

الحل بناء جسور ومد الريل الجديد للجميع مدن قطر هذا هو الحل اذا الريل بس لمناطق معينه بدون ما تشمل الفرجان ما فيه فايده

[sweet qatar]

اقتراحك حلو ومفيد جدآ

أحياناً حادث أو إغلاق لفة أو مخرج
يسببون زحمة فجأة

فلو الواحد عنده علم بيتجنب الطريق ويستبدله بآخر

يعطيك العافية

[sweet qatar]

والي يقول محد يعرف الطرق الداخلية الا المواطنين

أقولهم سلامتكم .. كل طريق فرعي معاي أجانب
ان بغيتوا جنسيات عربية او آسيوية اما اوروبيين ما شفت

[بريق الحق]

الصراحة من وجهة نظري لازم يصكرون جميع الاشارات الي على خط الكورنيش ويخلون ويبون جسر نفس دوار العبيدلي عشان الي يبي يلف يسار هذا افضل حل

[راجي الْعفو]

وعليك و رحمة الله ..

الله يحيك اخوي ..

الطريق ما يتحمل إشارات ..

جسور و أنفاق .. هذا افضل حل ..

[بومحمد911]

اقتراح جيد اخوي .وعندي اقتراح اضيفه على اقتراحك لعلى وعسى يمكن ينفع وهو يركبون مثل الاشارةقبل ماتدخل الشارع بمسافة ويعطيك الضوء الاحمر اذا الشارع تجاوز الازدحام فيه لمسافة معينة مما يتيح للسائق اخذ شارع بديل.لكم مني التحية.