بكاء هستيري بدون توقف

[ثابت]

السلام عليكم ورحمة الله

اتمنى لو احد فيكم مر بموقف مثل موقفي هذا ان يرشدني للحل او نصيحة اعمل بها

انا عندي ولدي الصغير توة رايح صف اول لكن المشكلة كل ما اذهب بة يبكي ويخاف من اي شخص غريب كان طفل او بالغ لدرجة اني احزن لمنظرة وهو يبكي والان اقول لة يا بابا انت شاطر نام علشان باكر اوديك المدرسة من يسمع اسم مدرسة يبكي ويتم يترجاني ما يبي يروح والله انا محتار شسوي معة محتار شسوي بصراحة موقف جدا صعب .

[طبيب قطري]

اخوي الله يحفظ ولدكم ، هو مافيه اي شي غير انه ماتعود ينترك في مكان جديد ومع اشخاص جدد غير الاب والام وباقي افراد اسرته ماتعود يبعد عن محيط اسرته بمعنى اخر..
الحل انك تثق في المدرسه والمدرسين انهم بيقدرون يدمجونه ويعودونه يلعب مع باقي الاطفال.. ولكن هذا الموضوع ممكن ياخذله وقت من اسبوع الى ثلاثه اسابيع.. والبكاء امر طبيعي جدا فلا تقلق..

[R 7 A L]

اكيد يعاني

انصحك تأخذ اجازة وتكون قريب منه
فرغ نفسك له و وص عليه في ادارة المدرسة
ولا غير المدرسة

[ثابت]

اخوي الله يحفظ ولدكم ، هو مافيه اي شي غير انه ماتعود ينترك في مكان جديد ومع اشخاص جدد غير الاب والام وباقي افراد اسرته ماتعود يبعد عن محيط اسرته بمعنى اخر..
الحل انك تثق في المدرسه والمدرسين انهم بيقدرون يدمجونه ويعودونه يلعب مع باقي الاطفال.. ولكن هذا الموضوع ممكن ياخذله وقت من اسبوع الى ثلاثه اسابيع.. والبكاء امر طبيعي جدا فلا تقلق..

جزاك الله خير اتمنى والله يتغير

[ثابت]

اكيد يعاني

انصحك تأخذ اجازة وتكون قريب منه
فرغ نفسك له و وص عليه في ادارة المدرسة
ولا غير المدرسة

جزاك الله خير هو انا كلة معة طول اليوم اكون جالس معة او اخذة معاي لما اطلع وقليل اطلع بحكم عملي ارجع متاخر لكن اذا قصدك اخذ اجازة علشان اروح معة المدرسة و اجلس معة طول اليوم ما يصير بس اسلمة المدرسة و اروح و امة تمر تاخذة الظهر لني اكون بالدوام ما اطلع الا مع العصر الله يعين والله الواحد ودة يكون جنبهم على طول بس صعبة الحياة الحمدلله على كل حال وجزاك الله خير على النصيحة

[حسن]

ياخوك عادي عيالي نفس الشي وخصوصا في اول مرحله
خل امه توديه وتقعد معاه شوي شوي وبعيدن بتخليه ويلها مع الطفال
بس هل يوم كان في الروضه نفس الشي ولا تغير
ولا تشوف اخصائيه اطفال مادري عاد عندنا هني ولا لا

وبشرنا

[حمد 2002]

كلنا مرينا بهالشيء يوم كنا يهال بصف اول ابتدائي :shy: ..

الله يحفظه ياارب ويطلع من الأوائل المتفوقين

[للصبر اخر]

اخوي انت اخطات جزاك خير كان لازم قبلها بسنه تعودده
اذكر الوالده كانت كل كم يوم تودي اختي الصغيره الروضه وتقولها شوفي يلعبون ويرسمون ويلونون لين ماتاقلمت وصارت تبي تروح
وعلى طول سجلتها السنه اللي بعدها
حاول انك تمشي معاه باسلوب الهدايا
يعني قوله بكره ان شاء الله اوديك المدرسه وعقبها لو انت ماصحت نروح نشتري هديه لك ومن هالقبيل
حببه وحاول تزرع فيه انه يحب المدرسه

[نوار قطر]

اكيد يعاني

انصحك تأخذ اجازة وتكون قريب منه
فرغ نفسك له و وص عليه في ادارة المدرسة
ولا غير المدرسة

بالعكس اذا سوى هالشي صعب عليه يتركه وبيتعلق فيه زياده وبيروح المدرسه لان ابوه معاه وفعلا هو بيسكت بس مرد الابو يروح عنه ف بيرجع يصيح ولابيستفيد من قعدته معاه ،،، نصيحه من اخت ياخوي نزله ووص عليه المدرسات واطلع عنه خله بيصيح مره مرتين اسبوع وبيسكت ،، حببه فالمدرسه كافأه باشياء يحبها لي خذته مثلا وده ياخذ له لعبه او شي يحبه بس طبعا مب كل يوم عشان مايربط روحته حق المدرسه بالهدايا ،، انا كنت انزل بنتي واسمعها تصيح والله اني اركب السياره وانهد من الصياح عليها ،، بس عشان مصلحتها،،

دوس على قلبك وخله ومرده بيتعلم

[بريق الحق]

غير جو الولد وخله يحتك مع العالم اكثر فالمسجد والاماكن العامه

[النهار]

اخوي شوف تلفزيون قطر في برنامج يتكلم عن نفس الشكوى الي عندك

[MAZEN37]

سؤال انت وديته روضه قبل

[نوار قطر]

لحظه انا توني منتبهه ان الولد فالصف الاول،، معقوله انكم مادخلتوه روضه من قبل،،، ترى ذي اكبر غلط واذا كنتو موديينه بس متغير عليه الجو من مكان كان متعود عليه لي مكان مايعرفه فشي طبيعي ارجع واقول لك مرده بيتعلم وبيتعود

[المحاميه]

زين شالسبب؟

يعني جذي من اول يوم؟

ولا تعرض حق موقف قبل كره فالمدرسه

لازم تعرف شاللي يضايقه وليش مايبي يروح

اكيد فيه سبب وجيه

[ودي أكون]

الله يعينك والله

اهم شيء لا تدخل معاه الصف.. لين الباب والسلام عليكم.. خله بيصيح يوم يومين ثلاثه..
بعدها بيتعود .. والمدارس عندهم اسلوب التعامل مع الطلاب فلا تخاف ولا تحاتي اخوي..

والله يهدي من نفسه ويبلغكم فيه ان شاءالله يارب

[أين الحل ؟]

أخي الفاضل اذا استخدمت جميع السبل دون فائدة عليك بأقرب مطوع جنب بيتك يقرأ عليه ويرقيه
مش اقل من ثلاث مرات . وتشربه ماء مقري عليه وتدهنة بزيت زيتون مقري عليه لمدة اسبوع
وانشاالله راح تشوف نتائج جيدة وتحسن .

[ضوى]

اذا ماقد دخليته روضة من قبل فأكيد بتعاني فترة ، بس مثل ماقالت نوار دوس على قلبك وخله بيتعلم وبيتأقلم هاي سنة الحياة

[نور الحور]

يا حياتي قطع قلبي الولد :(

أخوي ثابت .. الحلول كثيييرة .. بس أهم شي الولد يبيله طولة بال ومسايسة ..

كل يوم قص عليه قصة ولد أو بنت (مو هو ) يروحون المدرسة ويتعلمون ويلعبون .. والأنشطة اللي يمارسونها ..

حط له معززات .. مثلا لصق له نجوم في لوحة عن كل يوم يروح المدرسة فيه وما يصيح

كثر من الاحتضان والتقبيل له والتأكيد إنك أنت وأمه الله يحفظكم موجودين وبترجعون تاخذونه

خلك أنت او أمه بجانبه حتى ينام كل ليلة مع قصة حلوة قبل النوم

اتفق مع المدرس على متابعته أول بأول ويمكن تتصل بهم كل فترة تتطمن

اتفق مع المدرس يركز شوي عليه ويشجعه ويعطيه نجوم بعد لو كان ملتزم أو شارك ...أو ...

لما تنزل معاه المدرسة خل يدك بيده ولا تتركه واحتضنه وقبله خله يشوف نظرة ثقة .. ووصله للصف واستودعه ربك ولا تبين له أي تعابير تعاطف

أو خوف عليه .. وسلم واطلع بدون لا تلتفت نهائياً حتى لو صاح

ولما ترجع تاخذه استقبله بالأحضان وشجعه وقول له إنك اشتقت له وانك فخور فيه

ولما يرجع تحاور معاه عن اللي صار بالمدرسة ولو عبر عن خوفه أو كرهه لا تنكر عليه .. بالعكس سايره وطبطب عليه وفي نفس الوقت شجعه

وطبعا لا تنسى تقرأ الأذكار عليه وتستودعه ربك في كل الأحوال


فترة إن شاء الله وتعدي :victory:


وطمنا عليه :)

[رجل تعليم]

الله يكون بعونك أخوي وترى هي حالة طبيعية جدا ونعيشها نحن كمدرسين كل عام مع فئة قليلة من التلاميذ
الحل بسيط جدا وجد جد عملي
هو لا يرغب في المدرسة طيب خليه على راحته
لكن
كل يوم وديه يمر بجانب تلك المدرسة ويشوف السور والاطفال عند دخولهم وخروجهم من غير ما تجبره على الدخول

اوكي
إذا أمكننك خليه يشوف الأطفال من أعلى السور وهم يلعبون في الساحة
إذا أمكنك خلي المدرس يخرج لعنده ويكلمه ويسلم عليه ويشجعه بأن يقول له تعالى تشوف كيف نلعب أا وباقي الأطفال في الحجرة لعبا شيقة
حاول أن تجعله يعتقد أن المدرسة مكان للعب الشيق وليس مكانا للعمل والتحصيل
إذا أرهقك ولم يبدي استعداده فاحرص على أن تكون وإياه أمام باب المدرسة لحظة خروج الأطفال ... خليه يشوفهم كيف يمرحون ويجرون وكل هذا سيشجعه
ثق بي هذه حلول ستبدي إن شاء الله أثرها بعد أسبوعين على أبعد تقدير
وأروع ما يمكنك القيام به هو أتطلب من مدرسه أن يخرج للسلام عليه أمام باب المدرسة
شيئا فشيئا سيعتاد على هذا ، واطلب من الادراة أن تسمح لك باللعب معه والوقوف معه في ساحة المدرسة لحظة الإستراحة
اطمئن هذه حالة عادية لا تدعو نهائيا للقلق ، والله يسهل عليك وعلى الجميع