لو مطوع ملتحي ولابس غتره وعقال ؟ وزوجته متنقبه !! .. حياكم

[حمد 2002]

السلام عليكم ورحمه الله وبركاته

لو مطوع ملتحي ولابس غتره وعقال وزوجته منقبة !! عادي يتمشون بشوارع امريكا ؟!

مممم اتوقع الجواب صعب واكيد بيحصلون لهم مضايقات ويمكن يعتقلونهم !! ...

إذا لماذا لما اجنبي ولا أمريكية ولا أمريكي يلبسون ملابس غير محتشمه بقطر وببلدانا العربية والإسلامية مانسويلهم شيء ؟!

من الي يثير المشاعر هذا أو ذاك .. ومن الي مخل للآداب هذا أم ذاك ؟!

بالتوفيق ..

[خليفـة]

تساؤل جميل يا حمد

عشان كذا الكل يطالب بالمعاملة بالمثل

خليفة

[مرتبش]

في ثقافة سائدة في معظم انحاء العالم..الثقافة الغربية ولذلك هم ماشيين حسب اللي متعودين عليه..

سؤال.. شكثر اجانب يدخلون الاسلام عندنا؟ اليوم في الجريدة اعتقد 25 فليبيني مشهرين اسلامهم.. تظن لولا التسامح اللي قاعدين نعيشه ونمارسه بيسلمون؟

[عاشق العديد]

..

موضوع جميل ياحمـد ..

انا والدتي جاتني امريكا .. الله يطول بعمرها ان شاء الله ..

نعم صح كلامك في نظرات وفي الي يضحك من بعيد لبعيد محد يقدر يقول شي بالوجه .. لانه القانون الامريكي مايسمح لرجل الشرطه يهين اي ديانه ايش كانت .. فامبالك مواطن عادي ..
في ناس نعم يكونون عايشين بالخليج وعارفين وفي البعض يقوم من مكانه يقولك انا اعرف انه العادات والتقاليد ماتسمح انه رجل يكون بجانب بنت ..
فتقدر تقول ربع شعب يجيك عارف عن المنقبه وعن الثوب والغتره ويكن لهم احترام اما الباقين حدث ولاحرج والله لايوريك .. ياما صارت مشاكل

في قطر احنا تربينا انه نحترم اين كان ولانغلط على احد هاي نعمه من الله ..
اتمنى من وضع لوائح مثل الي عملوها الصحه الاوليه وجريدة الشرق اتوقع .. في بعض الابراج .. انه احترمي المكان الي انتي فيه ولاتلبسين كذا وكذا وكذا ..
لكن اطاالب بنشر هاذي المنشورات فالمطار عند نزول الاجانب .. او توزيعها فالطياره ..
وتشديد عليها في المجمعات ..
ومنع منعا باتا لبس ملابس السباحه الفاضحه في المسابح وهالامور ..

تحياتي لك اخوي حمـد وابدعت ..

[Charisma]

وعليكم السلام ورحمه الله وبركاته

مرحبا اخوي حمد ..

النقاب غير ممنوع في امريكا .. وبالنسبه للبس الفاضح من الاجانب في قطر .. فهذا لاخلاف عليه .. الأغلبيه الساحقه ضد هالتصرفات .. ولكن ( البعض) ينظر لهم نظرة التحضر والتمدن والتطور والرقي .. اضف الى ذلك الغزو الثقافي والفكري .. في المسلسلات والرسوم ومحلات الازياء ..الخ سهلت لتقبل مثل هالاشكال في مجتمعنا مع انكار الاغلبيه لهم. :rolleyes2:

[بومحمد المطاوعه]

اقسم بالله العظيم لو اروح امريكا ولا اي دوله

ماعندي مانع ان ألبس ثوب وعقال

وماعندي مانه ألبس بدله

ولكن افضل انا كرجل ان اتجنب الثوب علشان ماتكون الأعين علي كثيره

ولكن ام عيالي ستظل على العبائه والنقاب

لو كنت في أسرائيل


شكرآ لك ياخوي حمد

موضوعك قيم

[شيخ الديرة]

من الي يثير المشاعر هذا أو ذاك .. ومن الي مخل للآداب هذا أم ذاك ؟!


أي مشاعر تقصد؟
وأي أداب تقصد؟

مشاعر الشعوب تختلف, وأدابهم وقيمهم تختلف. من الخطأ أختزال الفرق.

[مشاكل]

الفرق في النسبة اخوي حمد
نسبة الاجانب عندنا اكبر بكثير من نسبة الملتزمين بالدين الاسلامي عندهم
ولذلك يكون المسلم او المسلمة الظاهر عليهم الالتزام بالمظهر العام ملفت للنظر في دول الغرب

لو ترجع قبل ثلاثين او اربعين سنة واكثر عندنا ،،، مافي شك ان اي شخص في ذاك الوقت لو يشوف احد الاجانب في وضع سفور سيلفت النظر وسيجد الاستهجان

ولذلك قلت ان النسبة والتناسب تلعب دور فالموضوع

[qatari911]

http://www.youtube.com/watch?v=KiNnPcdZxDs

[qatari911]

http://www.youtube.com/watch?v=h7gq0_Xtp9o

شوف هالمقاطع فيه الي محترم الاسلام وفيه الي مايحبهم المقطع الثاني شوف الامريكي الي بلبس الجيش شرد على الي يسب الرجل المسلم
فيه الشين والزين
وحطيتها في كذا رد لان مسموح لي احط فيديو واحد برد علشان كذا حطيتها بكذا رد

تحياتي

[الخيالة]

سووا من فترة حملة رفلكت يور رسبكت او مادري شي جذيه نسيت و ووزعوا كتيبات و تي شرتات في المجمعات بس بعد فترة وقفوا يعني ماشوف شي مفروض مايسكتون لنا الحق نطلب منهم يلبسون لبس محتشم اللي اشوفهم في الدوام جنه جايين البحر و الأجانب المطار محد يقول شي ماخذين راحتهم والباقيه بعد ساكتين

[بوحارب]

حريمنا في لندن يتمشون بالنقاب والأمور طيبة

ولكن

لابد من قانون يجبر الأجانب على الاحتشام واحترام العادات والتقاليد

[أسد الجزيرة]

شفت متقبات في وسط نيويورك و لا حد تعرض لهم

[الكنترول]

كلام جميل ,,, منك يالذئب

[alsoq]

في امريكا مطاوعه وملتحين وزوجاتهم منقابات ولا احد يعارضهم
المصيبة انك في دوله اسلاميه ولا يحبون المطاوعه الملتحين هنا الطامه ويحبون المتبرجات

انا زرت امريكا وكنت في ولايه فيها من بكستان وافغنستان واليمن ومصر وكلهم ملتحين ونقاب للزوجات ما شفت احد يضايقهم

مثل ما عندك في دولتك الاسلاميه لا يحبون الملتحين والمنقبات هم عندهم بعد شرذمه

مقارنه ليست في محلها لانك لم تذهب الى امريكا وترى بعينك

[خليفـة]

http://www.youtube.com/watch?v=h7gq0_Xtp9o

شوف هالمقاطع فيه الي محترم الاسلام وفيه الي مايحبهم المقطع الثاني شوف الامريكي الي بلبس الجيش شرد على الي يسب الرجل المسلم
فيه الشين والزين
وحطيتها في كذا رد لان مسموح لي احط فيديو واحد برد علشان كذا حطيتها بكذا رد

تحياتي

المقطع معروف وقديم
واعتبره عمل طيب
لولا ان الممثله المسلمة خربتها آخر المقطع بالحضن الي ماله داعي
ههههه

عموما للأسف المسلمين انفسهم في أوروبا وامريكا
فاهمين الاسلام غلط
فكيف نتوقع من غير المسلمين ان يفهموا حقيقة هذا الدين العظيم

خليفة

[عاهد بن علي]

فعلآ تسائل جميل كصاحبه

[بصمة قطرية]

سافرت بالنقاب و شفت كثير غيري منقبات ..
بالنسبة للأجانب مجبورين يحترمون ديننا
ما نجبرهم يلبسون لبسنا بس نجبرهم يحتشمون ..
و هالشي من حقنا و من حق الدولة انها تلزمهم ..
بس نبي إحترام و إحتشام
ما نبي تعري في كل مكان ..!!

[بصمة قطرية]

سووا من فترة حملة رفلكت يور رسبكت او مادري شي جذيه نسيت و ووزعوا كتيبات و تي شرتات في المجمعات بس بعد فترة وقفوا يعني ماشوف شي مفروض مايسكتون لنا الحق نطلب منهم يلبسون لبس محتشم اللي اشوفهم في الدوام جنه جايين البحر و الأجانب المطار محد يقول شي ماخذين راحتهم والباقيه بعد ساكتين

حملة ( إعكس إحترامك )
حملة ممتازة
نتمنى إنها تتطور أكثر و يكون لها صدى أكبر
و توصل للكل ..
جهات كثيرة دعمت هالحملة ..
في مكتبة إبن القيم عند الباب
ملصق كبير مكتوب عليه ( أظهر إحترامك )
موجود باللغتين العربية و الإنجليزية ..
عجبني كثير و تمنيت لو هالملصق موجود عند
مدخل كل مجمع و محل و مكتبة ..
كان موضح فيه و مكتوب اللبس المحتشم ..
جزاه الله خير اللي حطه ..

[R 7 A L]

عشت فترة طويلة في امريكا
ماشفت الي قلت عنه

بالنسبة للوضع عندنا
لازم اول شي نشوف مثل ماقال اخوي عاشق العديد كُتيبات مطويات اي شي بداية من القطرية قبل ماتنزل وفي المطار وكذلك في المجمعات
صحيح لن يختفى مانرى بس راح يقل

[يمامـة]

في ثقافة سائدة في معظم انحاء العالم..الثقافة الغربية ولذلك هم ماشيين حسب اللي متعودين عليه..

سؤال.. شكثر اجانب يدخلون الاسلام عندنا؟ اليوم في الجريدة اعتقد 25 فليبيني مشهرين اسلامهم.. تظن لولا التسامح اللي قاعدين نعيشه ونمارسه بيسلمون؟

اتفق معاك يا مرتبش في نقطة التسامح اللي نعيشه بفضل من الله..

بس بعد لازم ما نغفل نقطة ان لازم تكون عندنا قوانين مسنودة و مستندة على تعاليم الدين
وروح الدين في بلادنا..

الدول الغربية ان ما كانت هناك قوانين تمنع لبس الحجاب او الظهور بالشكل الإسلامي
الا ان الشعوب هناك بشكل عام تعاني من " الإسلام فوبيا" فهي تنفر وتخاف من أي شي
له علاقة بالإسلام.. طبعا ما نقول كل الناس وكلن الصورة السيئة عن المسلمين بالإضافة
الى كرههم للاسلام والمسلمين يخليهم يتعرضون بالاساءة لأي مظاهر الإسلام..
والاساءت هذه تكون من الاغراب.. ولكن من يتقرب من التعامل مع المسلمين
تتحسن صورة الإسلام والمسلمين في ذهنه فيبطل شغل العنصرية وياهم..

فعودة لولدنا حمد فنقول له:
من حقنا ان تسن قوانين تضبط الملابس في بلادنا بداية من بنات البلاد لين بنات الأجانب وحريمهم..

المصيبة اليوم في بناتنا اللي فصخوا الحيا وتخلوا عن ابسط ابجديات الستر والحجاب
ومن ثم نلتفت للاجنبيات اللي كل وحدة صارت تستعرض بجسدها من باجزاء مكشوفة منه..

شكرا لكم

[رهج السنابك]

مادري بالعكس لما اروح دوله اجنبيه ارتاح ماحس حد يطالعني كأني بعبع او مشمئز من النقاب
عكس بقطر حتى مره وحده صرخت علي شيلي النقاب مافي الا وانتي قالتها بطريقه مستفزه واذا رحت اي مكان احس اني كائن غريب في قطر
من جذي صرت البس النقاب لو سافرت برا واشيله في قطر :)

[يمامـة]

مادري بالعكس لما اروح دوله اجنبيه ارتاح ماحس حد يطالعني كأني بعبع او مشمئز من النقاب
عكس بقطر حتى مره وحده صرخت علي شيلي النقاب مافي الا وانتي قالتها بطريقه مستفزه واذا رحت اي مكان احس اني كائن غريب في قطر
من جذي صرت البس النقاب لو سافرت برا واشيله في قطر :)

قوية حبتين يا الاستقراطية!!

يعني ما يوصل الموضوع لدرجة انج تشلينه في قطر وتلبسينه برع قطر!!

هو النقاب ينلبس علشان الناس ولا علشانج عندج قناعة بضرورة تغطية الويه؟!!

ومع هذا وايد سافروا وبنقباتهم وتعرضون للمضايقات.. ووايد سافروا بنقاباتهم ومحد كلمهم..

لكن في الأخير ما اعتقد ان النقاب منفر وغير مقبول في البلاد....................> يبي لج تحليل نفسي هالمرة
ببلاش من غير فلس حمر!!

[رهج السنابك]

لا بصراحة انا مالبسه قناعة بحكم وجوبه انما استحباب


جهزي لي الشيزلونغ وساعة التنويم المغناطيسي احس مخي يبي له اعادة برمجة

[يمامـة]

لا بصراحة انا مالبسه قناعة بحكم وجوبه انما استحباب


جهزي لي الشيزلونغ وساعة التنويم المغناطيسي احس مخي يبي له اعادة برمجة

موضة قديمة انت .............> الحين في طرق ثانية للتنويم مب شرط ساعة البندول!!

بس امانة عليج عقب ما اخلص منج اعيدي برمجتي لأني محتاجة اكثر منج :(

[بومحمد المطاوعه]

عافانا الله مما ابتلاهم

[Dmy Enabi]

السلام عليكم ورحمه الله وبركاته

لو مطوع ملتحي ولابس غتره وعقال وزوجته منقبة !! عادي يتمشون بشوارع امريكا ؟!

مممم اتوقع الجواب صعب واكيد بيحصلون لهم مضايقات ويمكن يعتقلونهم !! ...

إذا لماذا لما اجنبي ولا أمريكية ولا أمريكي يلبسون ملابس غير محتشمه بقطر وببلدانا العربية والإسلامية مانسويلهم شيء ؟!

من الي يثير المشاعر هذا أو ذاك .. ومن الي مخل للآداب هذا أم ذاك ؟!

بالتوفيق ..

هلا حمد ممكن يحصلون مضايقات ولكن هذا يكون تصرف فردي الناس في اي مكان في العالم عليها ان تحترم قوانين البلد الي هي فيه بس انا بطرح التساؤل بطريقة ثانية ليش احنا نطالب بحقوقنا في أمريكا او غيره ونجوف انه غصبن عليهم يوفروها لنا بينما تضيق صدور كثير منا اذا هم طالبوا بحقهم ترى هم مب مسلمين ويشوفون هذي عاداتهم ومب غلط بس عندنا غلط وعيب خنكون منصفين الستر والاحتشام ومراعاة الذوق العام امر لاجدال فيه نظرة فقط للإيقو إلي بداخلنا ان احنا لنا حق في كل شي وهم يحترمون قانون البلد انا جفت عنصرية في حياتي مثل بعض العرب عمري ماجفت العرب ماخذين حقهم وزيادة ومتقلديناعلى المناصب وفي بعضهم وزرا في ألمانيا وبريطانيا وفرنسا وحريم بعد لكن انا صراحة عمري ماسمعت اجنبي مسك منصب وزير

[رهج السنابك]

موضة قديمة انت .............> الحين في طرق ثانية للتنويم مب شرط ساعة البندول!!

بس امانة عليج عقب ما اخلص منج اعيدي برمجتي لأني محتاجة اكثر منج :(

انتي تهبلين اشحلاتج مخج يجنن بلد ولا تتجنين


بسم الله ماشاء الله

[qatara]

السلام عليكم ورحمه الله وبركاته

لو مطوع ملتحي ولابس غتره وعقال وزوجته منقبة !! عادي يتمشون بشوارع امريكا ؟!

مممم اتوقع الجواب صعب واكيد بيحصلون لهم مضايقات ويمكن يعتقلونهم !! ...

إذا لماذا لما اجنبي ولا أمريكية ولا أمريكي يلبسون ملابس غير محتشمه بقطر وببلدانا العربية والإسلامية مانسويلهم شيء ؟!

من الي يثير المشاعر هذا أو ذاك .. ومن الي مخل للآداب هذا أم ذاك ؟!

بالتوفيق ..

في اميركا اهون من فرنسا وعنصرتها وكرهها للاسلام

[مختلفة عقليا]

السلام عليكم .,

في قانون يجرم هالشي ؟! لا

انتهي النقاش .,

ويسلموو .,

[Super Cool]

معلوماتك خطأ

في كثير في امريكا و غيرها بثيابهم و بنقابهم ولاحد مسوي لهم شي
بل انا شخصيا اعرف واحد سافر و درس و تخرج وهو يداوم بثوبه!!

لكن بالعودة الى الموضوع الموضوع متعلق بمقدار الإحساس بالخطر
مب متعلق بأمر ديني أو تحيز...للعلم المضايقات الي تصير للمسلمين
في امريكا صنفت رسمياً على المستوى الرابع بعد السمر و اليهود و
الشاذين جنسياً....بس في ناس تكبر الموضوع و تزود بهارات

[romoz]

النقاب و الثوب ترا عادي في الخارج و بالاخص بريطانيا و امريكا

بس فرنسا و بلجيكا هم العنصريين و ما يقبلون الاسلام و العرب



اما هنا و الحقيقة تقال ان اغلب الاوربيين محترمين و يحترمون مجتمعنا ، بس البلا في الاسيويين و سكان شرق اوروبا ، همج لا يحترمون قانون و لا انسانية


الله يحفظ ديرتنا و يستر على المسلمين

[العنيده]

تساؤل جميل يا حمد

عشان كذا الكل يطالب بالمعاملة بالمثل

خليفة

:thumbup1: المعامله بالمثل لا اكثر

[يمامـة]

انتي تهبلين اشحلاتج مخج يجنن بلد ولا تتجنين


بسم الله ماشاء الله

يا بعد شبدي انتي.. كلامج جميل قدا خالص اوي ...> ركزي على حرف القاف
قبل اغلاق الموضوع ( شسالفة نروح نرجع والمواضيع تغلق؟؟!!)

[R 7 A L]

يا بعد شبدي انتي.. كلامج جميل قدا خالص اوي ...> ركزي على حرف القاف
قبل اغلاق الموضوع ( شسالفة نروح نرجع والمواضيع تغلق؟؟!!)

اعتقد اغلاق بعض المواضيع المؤقت للتنقيح وحذف بعض الردود الي تخرج عن صلب الموضوع


واجد نشطح وندردش ونبتعد عن صلب المواضيع وانا منهم كان الله في عون المشرفين
استحملونا واصبروا علينا يا اخوان

[يمامـة]

اعتقد اغلاق بعض المواضيع المؤقت للتنقيح وحذف بعض الردود الي تخرج عن صلب الموضوع


واجد نشطح وندردش ونبتعد عن صلب المواضيع وانا منهم كان الله في عون المشرفين
استحملونا واصبروا علينا يا اخوان

ايه جزاهم الله كل خير.. بس المرونة حلوة ترى في ترك المواضيع وان فيها بعض الشطحات
ومع هذا ما اقدر أقول شي.. أخاف توصلني رسالة خاصة فيها انتي اشدخلج:weeping:

[فاهم وساكت]

انا فامريكا وخلني اوصف لك موقف امس شفته..

شقتي تطل على المسبح والجاكوزي الي تحت.. اول ماقمت من النوم مريت صوب الدريشه الا لمحت بنتين لابسين عبايه وشيله وقاعدين بالجاكوزي !!!

بصراحه انا انا ماقدرت امسك نفسي والله ضحكت ضحك المنظر يعني غلط في غلط ... وعادي محد كلمهم ،، بس شوف هالنوعيه مابلوم الناس لو ضحكو عليهم لان المنظر مب طبيعي بصراحه هههههههههههههه يعني عبايه وشيله وقاعدين بالجاكوزي فشلونا والله خخ

[رهج السنابك]

ترا الشطحات ملح المواضيع
اشطحوا اشطحوا





شكلي بانشطح على راسي

[يمامـة]

ترا الشطحات ملح المواضيع
اشطحوا اشطحوا





شكلي بانشطح على راسي

من يومي هذا اللي اشوفه ان الشطحات بهارات المواضيع..

يعني الواحد لما يقرى شطحات اهنيه وهناك تلقين عضلات ويهه تتمدد..

اما من غير شطحات تحصلينا مثل أبو الهول اللي يتهاوش مع ذبان ويهه وهو يطق طق على الكيبورد..

عاد سامحوننا ياللي تشوفون كل شي................> شطحنا اشوييية بس اشوووية.