إختفاء إسم العروس من بطاقة حفل الزفاف.. ليش؟

[الشقردي90]

ماذا سيحدث في هذا العالم لو أضفنا إسم العروس بدلاً من (كريمة فلان)؟ في هذا العصر الذي وصل فيه إسم المرأة القطرية إلى كل مناحي الحياة بإستثناء بطاقة الدعوة لحفل*زفافها!!
بما إن إسم المرأة ليس عورة، والإسلام لم يحرم كشف اسم المرأة عند الرجال فلماذا نخفي اسمها؟؟

مارأيكم؟

[QATAR 77]

و متى اسم العروس كان ينحط

[HotBlood]

ما فيها شي انت وكيفك من زمان الناس تحط اسم العروس في البطاقات
طبعا انا اتكلم عن بطاقات الحريم بس

[الشقردي90]

صحيح هو ماينحط.. السؤال ليش؟

[VX.R]

عيب ، ومنقود

[الشقردي90]

ليش ماينحط اسم العروس في بطاقات الرجال مثل ماينحط اسم العريس في بطاقات الحريم؟

[حراير قطر]

احلف عاد

انت شنو مستفيد من الاسم :waiting:

[الشقردي90]

قيادة المرأة للسيارة كانت عيب والحين صارت عادي، كثير أشياء كانت عيب والحين صارت عادي، الا هالشيء !!

[الشقردي90]

وش نستفيد من اسم العريس؟

[راجي الْعفو]

السؤال اللي يمكن يتوجه :

ليش نحب نظهر الحريم وكل ما يتعلق بهم - عموما - من غير حاجة ، و الأصل انهم يكونون محفوظات و مستورات و مصانات عند أهاليهم ؟

هل الجمال في إظهارهن أو في حفظهن ؟

والموضوع أظنه متكرر لأن تم طرحه سابقا بشكل أعم ..

مع التحية ..

[طبيب قطري]

مب سالفة عيب .. الموضوع بكل بساطه ان اهل العروس هم اللي عازمين العالم مب هي!

[khalid Qtr]

معروف ان اسم المرأة لا يُذكر في مجتمعنا إلا للضرورة ، وبعد أوجه نفس السؤال اللي فوق .. انت شنو مستفيد من الاسم ؟؟!

[الشقردي90]

تعتقد ان اسم المرأة سوف يفتن الرجال؟

[حراير قطر]

وش نستفيد من اسم العريس؟

لانه الناس اتعرف اسم ولدي وما يعرفون العروس

والعكس صحيح اذا الناس اتعرف اسم بنتي وما يعرفون اسم المعرس

لازم ينحطون الاسمين مع بعض ببطاقه العروس

والمعرس ما يصير يحطون اسمه مرته بالبطاقه

ويلا عاد صير شقردي وحط اسم مرتك بالبطاقه لين عرست

[بوحارب]

ماله داعي أبدا هالشي ولا منه اي فايده

[الشقردي90]

معروف ان اسم المرأة لا يُذكر في مجتمعنا إلا للضرورة ، وبعد أوجه نفس السؤال اللي فوق .. انت شنو مستفيد من الاسم ؟؟!

موب سالفة استفادة.. هو مجرد نقاش حول ظاهرة غريبة وهي ان فيه أشياء كثير تغيرت في مجتمعنا الا هالشيء.. السؤال: وشمعنى هالشيء هو اللي ماتغير؟

[الجـــوديّ]

خلنا نقول .. جرت العادة !

مع أن الأصل .. يجب أن تعرف الأنساب .. ومن مناسب من ... على أساس أن الزواج في أساسه الإشهار !

مايصير إشهار على اسم نكـــرة !!!!

الصحابة كانوا يعرفون زوجات الصحابة .. وما كان عندهم عيب أن يذكر اسمها اذا مرت

بالعكس تذكر الصحابية وباسمها .. ويوسعون لها الطريق احتراماً واجلالاً .. وهذا ديدنهم .. احترام المرأة وتقديرها مو طمسها!

ولين الحين نلقى عند بعض الشيبان انه يعرف كل رجال من متزوج ومن مناسب وباسم الزوجة ...


العيب إحنا صنعناه بفكرنا البالي ... حتى يمكن الجاهلية الأولى ماسووا مثلنا !

[الشقردي90]

خلنا نقول .. جرت العادة !

مع أن الأصل .. يجب أن تعرف الأنساب .. ومن مناسب من ... على أساس أن الزواج في أساسه الإشهار !

الصحابة كانوا يعرفون زوجات الصحابة .. وما كان عندهم عيب أن يذكر اسمها اذا مرت

بالعكس تذكر الصحابية وباسمها .. ويوسعون لها الطريق احتراماً واجلالاً .. وهذا ديدنهم .. احترام المرأة وتقديرها مو طمسها!


ولين الحين نلقى عند بعض الشيبان انه يعرف كل رجال من متزوج ومن مناسب وباسم الزوجة ...


العيب إحنا صنعناه بفكرنا البالي ... حتى يمكن الجاهلية الأولى ماسووا مثلنا !

بالنسبة للقبائل البدوية المعروفة، لازالوا يتعزوون بإسم المرأة (اخو فلانة) ويعتبرون اسم المرأة امر يدعو للفخر والعز، اما الحين صار اسم المرأة مدعاة للخجل والحرج !!

[الجـــوديّ]

^

أراها من أجمل العادات بصراحة ... ولا فيها انتقاص أبداً من رجولتهم

[الشقردي90]

لانه الناس اتعرف اسم ولدي وما يعرفون العروس

والعكس صحيح اذا الناس اتعرف اسم بنتي وما يعرفون اسم المعرس

لازم ينحطون الاسمين مع بعض ببطاقه العروس

والمعرس ما يصير يحطون اسمه مرته بالبطاقه

ويلا عاد صير شقردي وحط اسم مرتك بالبطاقه لين عرست

انا الحمدالله تزوجت.. الفال للعزابية (:

[QATAR 77]

انا الحمدالله تزوجت.. الفال للعزابية (:

مين سعيدة الحظ الي اخذتها ؟

[الشقردي90]

^

أراها من أجمل العادات بصراحة ... ولا فيها انتقاص أبداً من رجولتهم


يعني تأيدين إخفاء اسم المرأة في بطاقة حفل الزفاف فقط ام في كل مناحي الحياة؟

[خوي الدرب]

طيب وأنت ليه تدور اسم العروس ؟

[حسن]

ماله داعي أبدا هالشي ولا منه اي فايده

اي والله ماله داعي العرس بكبره
من وجهه نظري

وايد كبرو هل الامور وسو منها ازمه
ودك يملج وخلاص ولو سكاتي بعد ابرك

:victory:

[QATAR 77]

اي والله ماله داعي العرس بكبره
من وجهه نظري

وايد كبرو هل الامور وسو منها ازمه
ودك يملج وخلاص ولو سكاتي بعد ابرك

:victory:

ليش مسيار :eek5:

[بوحارب]

اي والله ماله داعي العرس بكبره
من وجهه نظري

وايد كبرو هل الامور وسو منها ازمه
ودك يملج وخلاص ولو سكاتي بعد ابرك

:victory:

وانا اتفق معاك

ما يسوى عليه الواحد يتم مديون خمس سنين عشان عرس ههههه

[الجـــوديّ]

يعني تأيدين إخفاء اسم المرأة في بطاقة حفل الزفاف فقط ام في كل مناحي الحياة؟

عني شخصياً .. ليش أخفيه .. هل هي ارتكبت منكر والا اسمها نجس ؟!

لا طبعاً ...

لكن حالياً جرت العادة على اخفاء اسم العروس.... ويجب أن تحترم عادات الشعوب

ولو قلنا نبي نصحح الوضع ونرجع للأصول ونخلي الاشهار كامل ..

يبي لها رجال كبار يقرون هالشي علشان يتعوده الناس ويصبح عادة جديدة يتم تداولها خلافاً للعادات البالية

:

على كثرة الردود للحين مالقيت جواب يقولنا ليش يخشون اسم المرأة ؟

[الشقردي90]

مين سعيدة الحظ الي اخذتها ؟

عفواً اخوي.. مافهمت سؤالك.. انت تسأل عن اسم زوجتي؟

[الشقردي90]

مين سعيدة الحظ الي اخذتها ؟

عفواً اخوي مافهمت سؤالك.. انت تسأل عن اسم زوجتي؟

[QATAR 77]

عفواً اخوي.. مافهمت سؤالك.. انت تسأل عن اسم زوجتي؟

انت تبي تعرف اسماء بنات الناس فعامل الناس كما تحب ان تعامل

[R 7 A L]

ليش نشوف مواضيعك مثل هالموضوع مع احترامي الشديد لصاحب الموضوع اخوي الشقردي

تنخر في العادات والتقاليد الحميدة الي نعتز بها ؟
هل هذة ضريبة اندماج عادات وتقاليد المجتمعات الاخرى معنا ؟

[راجي الْعفو]

عني شخصياً .. ليش أخفيه .. هل هي ارتكبت منكر والا اسمها نجس ؟!

لا طبعاً ...

لكن حالياً جرت العادة على اخفاء اسم العروس.... ويجب أن تحترم عادات الشعوب
ولو قلنا نبي نصحح الوضع ونرجع للأصول ونخلي الاشهار كامل ..

يبي لها رجال كبار يقرون هالشي علشان يتعوده الناس ويصبح عادة جديدة يتم تداولها خلافاً للعادات البالية

:

على كثرة الردود للحين مالقيت جواب يقولنا ليش يخشون اسم المرأة ؟

جزاج الله خير .. الجواب هو المظلل بالأحمر ..

والعادة يعمل بها ما لم تخالف الشرع ..

واذا تغيرت العادة مستقبلا لإظهار أسماء النساء ولا ترتب على ذلك ضرر أو أي محظور، فما في باس ..

المسألة سهلة ..

[حسن]

ليش مسيار :eek5:

ليش ياخوك لامن جاب طاري المسيار الحين

:(

انا اقول عشى بسيط عقب العوده من السفره وخلاص

شكثر بتوفر مبلغ وقدره

وترا على فكره المسيار زواج شرعي ولا غبار عليه
الحين وايد عندهم بيزات وتبي تعرس
وهي برضاها محد جبرها

[الشقردي90]

انت تبي تعرف اسماء بنات الناس فعامل الناس كما تحب ان تعامل



اسمحلي الشيخ بس انت يمكن مافهمت الموضوع، انا اقصد لما يكون فيه مناسبة فرح مثل حفل الزفاف اللي هو عبارة عن زواج بين طرفين، ليش مايتم إشهار اسم الطرفين في هالمناسبة؟
اما يجي واحد منا والطريق ماعرفه ولايعرفني ويقولي تعال قولي اسم زوجتك !! هذا موضوع ثاني

[مضارب دوسري]

مين سعيدة الحظ الي اخذتها ؟


انت تبي تعرف اسماء بنات الناس فعامل الناس كما تحب ان تعامل

انت:nice:

[العلياا]

ليش نشوف مواضيعك مثل هالموضوع مع احترامي الشديد لصاحب الموضوع اخوي الشقردي

تنخر في العادات والتقاليد الحميدة الي نعتز بها ؟
هل هذة ضريبة اندماج عادات وتقاليد المجتمعات الاخرى معنا ؟

سبحان الله كان نفس التساؤل اللي يدور في بالي !!

[الشقردي90]

ليش نشوف مواضيعك مثل هالموضوع مع احترامي الشديد لصاحب الموضوع اخوي الشقردي

تنخر في العادات والتقاليد الحميدة الي نعتز بها ؟
هل هذة ضريبة اندماج عادات وتقاليد المجتمعات الاخرى معنا ؟

مواضيعي دائماً تنخر في العادات والتقاليد !! هذا أول موضوع لي في المنتدى (:

[حسن]

ليش نشوف مواضيعك مثل هالموضوع مع احترامي الشديد لصاحب الموضوع اخوي الشقردي

تنخر في العادات والتقاليد الحميدة الي نعتز بها ؟
هل هذة ضريبة اندماج عادات وتقاليد المجتمعات الاخرى معنا ؟

ايوه صدقت يارحال

احنا الكثير منا خلاص انطحن معاد به اندماج

بس اذا كان للا حسن انا ماعندي مانع

ويارجل ليش اسوي بطايق اساسا خلونا نستتغل التكنلوجيا الحديثه
يسون بطاقه للاثنين بس وصوره على الواتس اب
مثل ماسوالنا عاهد في عرس ولده وحضرنا شنهي المشكله البطاقه الى مجرد تبليغ
ولو بعد محد بلغنا ودرينا بنروح انا الرياييل ماعندنا مشكله

:victory:

[Dmy Enabi]

مايهمني حطوه ولا ماحطوه

[R 7 A L]

ايوه صدقت يارحال

احنا الكثير منا خلاص انطحن معاد به اندماج

بس اذا كان للا حسن انا ماعندي مانع

ويارجل ليش اسوي بطايق اساسا خلونا نستتغل التكنلوجيا الحديثه
يسون بطاقه للاثنين بس وصوره على الواتس اب
مثل ماسوالنا عاهد في عرس ولده وحضرنا شنهي المشكله البطاقه الى مجرد تبليغ
ولو بعد محد بلغنا ودرينا بنروح انا الرياييل ماعندنا مشكله

:victory:



اهلنا لولين ماعرفوا للبطاقات
حتى في وقت قريب
خاصة مثل هالمناسبة الكل راح يدري عنها حتى لو انه مسافر برا

[حسن]

اهلنا لولين ماعرفوا للبطاقات
حتى في وقت قريب
خاصة مثل هالمناسبة الكل راح يدري عنها حتى لو انه مسافر برا

ايه

اهلنا الاولين

الله يرحمهم ويرحم من بقى منهم

احنا ندري ياريال ومن كبر الدوحه الحين بس الناس سوت لها فنتك جديد
وياريت منه فايده
مبلغ وقدره وينحذف في الزباله تكرمون
فانا اقول لو نستغل التكنولوجويا الحديثه وببلاش
احنا ماعندنا بس غيرنا بيرضى

هاهاها

والله مايسير العرس وبيسر الضرب بين ام فلان وفلانه
هاهاها

[الجـــوديّ]

عجيبين احنا ...

نتعزا ونستميت علشان العادات في حين الثوابت محد درا عنها ... وصفحات المنتدى تشهد!




أصلاً بدت ترجع البطاقة الموحدة للدعوة مثل بطاقات لاول في بداية التسعينات

وتوضح عرس الرجال وين مكانه وعرس الحريم وين مكانه .. وبلا مصاريف زايدة


وإجازة نهاية أسبوع سعيدة للجميع ،،

[Rider]

لو يذكرون السيرة الذاتية مره وحده احسن

[باراكودا]

و متى اسم العروس كان ينحط
أيام اللولو
من عام 78 لين 1982م

[وليف الشوق]

انت خلك في حفل الرجال وبس وبطاقات النساء ودعواتهم مااعتقد لك شغل فيها وليش نحط اسماء بناتنا ؟

[ريم الشمال]

محد بيمنعك من أن تحط اسم العروس إذا هذا سنع عندكم
بس الناس مذاهب وكلن له سنع يخصه

[الشقردي90]

محد بيمنعك من أن تحط اسم العروس إذا هذا سنع عندكم
بس الناس مذاهب وكلن له سنع يخصه


بالنسبة لي شخصياً ماشوف فيها شيء لكن المجتمع راح ينتقد هالشيء، في حين ان عمل المرأة في مكان اختلاط صار امر عادي !!

[ريم الشمال]

بالنسبة لي شخصياً ماشوف فيها شيء لكن المجتمع راح ينتقد هالشيء، في حين ان عمل المرأة في مكان اختلاط صار امر عادي !!

ما دام عادي إذا لا تلتفت لهم ، بالنسبة للأختلاط في مجال العمل أنا أيضا ليس ضده ولا معه
لأن هناك من النساء من تضطر أن تعمل لظروف تخصها وهنا أنا لا اكون قيم عليها مادام حافظ نفسها وتطبق ما طلبه منها الإسلام وهو عدم الاختلاء

[الشقردي90]

ما دام عادي إذا لا تلتفت لهم ، بالنسبة للأختلاط في مجال العمل أنا أيضا ليس ضده ولا معه
لأن هناك من النساء من تضطر أن تعمل لظروف تخصها وهنا أنا لا اكون قيم عليها مادام حافظ نفسها وتطبق ما طلبه منها الإسلام وهو عدم الاختلاء

صعبة اني ما التفت لهم.. الإنسان لازم يرضي مجتمعه عشان مجتمعه يتقبله..

[الحاقول]

اســــم المـــرأة ليس بعــــورة .. واسم المرأه مذكور في القران الكريم
بس المشكله في العادات والتقاليد الباليه

[Aaziz]

انت توك 16 مشاركه و داش علينا بهالموضوع الي ناخره السوس

وش تبا .... لانك جديد :rolleyes2: اقرا الصوره في توقيعي شي ضروري
الشغله الثانيه العادات و التقاليد خط احمر و سبق تم نقاش كل الجوانب ،، ابحث في المنتدى و بتلقى كل المواضيع ،، عشان ماتكرر ،، شكلك لابس دريس رقم 1 و شاد فيه الحيل.
ختاما تعرف معنات نكنيمك الي مختاره ؟
هل تعرف انه مايركب مع موضوعك ... شقردي في ايش ؟ اذا هذي علومك

[aloosh]

ارحمو المراء فقد اهترت من المواضيع عطوها وقت مستقطع

[الشقردي90]

انت توك 16 مشاركه و داش علينا بهالموضوع الي ناخره السوس

وش تبا .... لانك جديد :rolleyes2: اقرا الصوره في توقيعي شي ضروري
الشغله الثانيه العادات و التقاليد خط احمر و سبق تم نقاش كل الجوانب ،، ابحث في المنتدى و بتلقى كل المواضيع ،، عشان ماتكرر ،، شكلك لابس دريس رقم 1 و شاد فيه الحيل.
ختاما تعرف معنات نكنيمك الي مختاره ؟
هل تعرف انه مايركب مع موضوعك ... شقردي في ايش ؟ اذا هذي علومك


(ناخرة السوس).. (لابس دريس رقم واحد) !! وشفيك معصب؟