انت شبتقدم لليوم الوطني؟

[المحاميه]

السلام عليكم ورحمة الله وبركاته


صبحكم الله بالخير


وتستاهلون هالأجواء الجميله


والله يباركلنا ف قطر وف ناسها



موضوعي هذا جداً مهم لانه يتكلم عن أغلى يوم من شهر ديسمبر


يوم تفرح فيه بلادنا وتطلع بأحلى طله

يوم يفرحون فيه عيالنا وكلن يعبر عن نشوته بطريقته


انجي للجد..

فهمنا انك تحب قطر وانك تستانس ف هاليوم المهم

بس قولي يافلان وقوليلي يافلانه

انتو شاللي بتقدمونه في هاليوم؟


مثل ماتعرفون مابقى شي على يوم (18) .. شنهي مساهمتك .. انجازك .. شاللي فكرت تسويه في هالعيد؟


شاركونا باللي بتسونه في هاليوم ..
هل تطوعت؟ هل بتشارك مثلا بصوره في حب الوطن أو جهزت قصيده؟ هل عندك فكره أو ابداع خاص لهاليوم؟ هل بتشارك في برنامج او حتى بتوصل رسالتك باتصال؟
فكرت تروح وتشارك قطر فرحتها؟ بتروح العرضه؟


أتمنى الكل يكون متفاعل ف هاليوم ويقولنا شنو بيسوي .. ش بيقدم لنا في هاليوم
أتمنى محد يقول باقعد فالبيت أو بيكون يومي كله نوم



أنت قطري .. عيل أكيد عندك شي
حملة حب الوطن قول وفعل ..

[حمد 2002]

انا كل ايامي فداء للوطن وللدين الاسلامي ولخدمه المجتمع ،،

[بريق الحق]

بقدم النصيحه بعدم الذهاب الى المسيرات الي منتشره فيها المنكر

[حسن]

السلام عليكم ورحمه الله وبركاته

ومبروك عليكم المطر

ويو ما جميلا للجميع

بما ان اليوم الوطني قريب حبيت اطرح لكم فكره واخبر طرحتها من قبل ولا في مانع نطرحها من قبل

الموضوع يختص بالمشاركه البنائه

الكل عارف ان اليوم والوطني قريب وهناك ايضا اليوم الرياضي وغيره

ونحتاج الى ترتيبات قبلها وبعد وجهد كبير من قبل المسؤلين

فاني من مؤيدي مشاركه الجميع وخصوصا الطلاب
لماذا لا تستفيد منهمومن طاقاتهم الشبابيه في خدمه الوطن والمساهمه فيه
يعني تشكيل فريق من المدارس لمساهمته في عمليه التنظيم
لهذه الايام ولااحتفالات وماتقدمه الدوله من مناسبات
مثلا لعمليه التنظيم والمساعده في الكورنيش غيره ويسير لهم جدول ويشاركون في خدمات كثيره
مثل التزين الترتيب التنظيف النظافه صبغ الارصفه
شي جميل ان تزرع فيهم منذ الصغر حب العمل التطوعي ليكونون شباب مساهم في نهظه الوطن
الصراحه هذه الفكره اطرحها لتصل الى وزير التربيه ولدراستها ولاخذ بها
وزارعه روح العمل والمسؤليه والاعتماد على النفس والمشاركه الجماعيه وان يكون فرد ايجابي لخدمه هذا الوطن منذ الصغر

اتمنى مشاركتكم وسماع ارائكم بهذه الفكره
ونستفيد من خبراتكم واقتراحاتكم في الموضوع

لنرتقى بهذا الوطن

وشكر للجميع

وتحياتي لكم

اخوكم حسن

:)

[بوحارب]

كلنا فداء للدين وللوطن وللقائد

على طول وليس في يوم 18/12 فقط

[حمد 2002]

كلنا فداء للدين وللوطن وللقائد

على طول وليس في يوم 18/12 فقط

صادق والله ،،

[حسن]

انا كل ايامي فداء للوطن وللدين الاسلامي ولخدمه المجتمع ،،


كلنا فداء للدين وللوطن وللقائد

على طول وليس في يوم 18/12 فقط

هذين الردين يمثلوني


:victory:

[عاشق العديد]

اتفق معاك ..

واتمنى هالمره يكفلون بعض الموظفين من المؤؤسسات الحكوميه وبعض الوزرات .. بنهم يشرفون على تنظيم الحفل الوطني ..

ونشرهم في الكرنيش لو كان في تجاوزات .. مش الاعتماد فقط على رجال المرور .. لانه مساكين شيبقى لهم .. لازم كلنا نتعاون ..

وواتمنى يكون التطوع هذا مش اجباري كل واحد وراحته .. الي يبي يروح والي مايبي يقعد بالبيت ..

[العلياا]

الحمدلله جهزنا توزيعات وبروشرات للدوام عن قطر

اما على المستوى الشخصي

انا كبنت اقدم لـ قطر بإني احشم نفسي عن الروحه سواء للمسير العسكري او المسيرة ليلا
عشان ما نشوهه اسم قطر وبكرا اللي يسوى وما يسوى يتطنز على الفيديوهات اللي راح تنتشر بشكل خرافي اذا فيها بنات
احنا نسوي جمعة في البيت العود او بيت وحدة من البنات ونجيب كيك وجمعة ووناسة بينا وبين بعض

[بوحارب]

الحمدلله جهزنا توزيعات وبروشرات للدوام عن قطر

اما على المستوى الشخصي

انا كبنت اقدم لـ قطر بإني احشم نفسي عن الروحه سواء للمسير العسكري او المسيرة ليلا
عشان ما نشوهه اسم قطر وبكرا اللي يسوى وما يسوى يتطنز على الفيديوهات اللي راح تنتشر بشكل خرافي اذا فيها بنات
احنا نسوي جمعة في البيت العود او بيت وحدة من البنات ونجيب كيك وجمعة ووناسة بينا وبين بعض

هذي البنية تمثل بنت بلادي الأصيلة :)

[عاشق العديد]

هذي البنية تمثل بنت بلادي الأصيلة :)

اتفق معاااك وبقوه ..

[حسن]

هذي البنية تمثل بنت بلادي الأصيلة :)

والنعم ابها

:)

[حمد 2002]

والنعم ابها

:)

+3 ،،

[حسن]

الحين موضوعي دمجوه مع الموضوع المحاميه

:omg:

انا هدفي غير ياجماعه الخير

على العموم هذا دليل التعاون الافكاري بين الاثنين وانا واحد ماعندي مانع

فا يالماحميه نسوي نظام شفتات لاداره الموضوع لارضاء الطرفين
يعني راعي النصيفه سالم

:victory:

[همر]

الحين موضوعي دمجوه مع الموضوع المحاميه

:omg:

انا هدفي غير ياجماعه الخير

على العموم هذا دليل التعاون الافكاري بين الاثنين وانا واحد ماعندي مانع

فا يالماحميه نسوي نظام شفتات لاداره الموضوع لارضاء الطرفين
يعني راعي النصيفه سالم

:victory:



الله واكبر يابوعلي قمت تبوق مواضيع المحاميه ؟!!

بعد لو تبوق مواضيع حمد بمشيها لك .. لكن هذي ..

قويه .. قويه .. :weeping:



المهم انا في اليوم الوطني بنام :(



ماراح اسافر حالي حال غيري عشان ماتقولون

عني غير وطني بعد خوش اجازه ترى من

الاربع لين السبت ...



بوعلي طبعاً بيحتفل مع السمج :(

[نوفا91]

انا عن نفسي جدولي فاليوم الوطني بالضبط نفس عليا الحب

[موظف ((حكومي]

كلنا فداء للدين وللوطن وللقائد

[قطري 777]

والنعم ابها

:)

+3 نعم ياعليا تاهلتي معنى للمرحله القادمه الف الف مبروك ههههههاي العليا من شفتها تسوي البرغر وهي اسهمها مرتفعه فوووق عندي ....

[العلياا]

+3 نعم ياعليا تاهلتي معنى للمرحله القادمه الف الف مبروك ههههههاي العليا من شفتها تسوي البرغر وهي اسهمها مرتفعه فوووق عندي ....

هههههههه ضحكني ردك
أي وحدة من البنات بتكتب نفس كلامي الكل راح يرفع لها القبعة

وصدقني الغالبية العظمى من البنات هذا جدولهم في نفس هاليوم
الصبح نشوف الفعاليات فالتلفزيون وفالليلة جمعة الاهل والاحباب لان هذا مكانا

الله يجزاكم خير جميعا

[ودي أكون]

بما إني قطرية .. راح أرفع أسم قطر بجلوسي ف البيت

لا للمسيرة لانها للرجال ..

[Rider]

انا بنام مانصدق يوم أجازة وحب الوطن مب لازم حد يسوي شي علشان يثبت انه عنده وطنية

[المحاميه]

ليش ياجماعه كل موضوع تاخذون منه الشين وتخلون الزين


الله يهديكم بس


لي عوده برد مفصل على كل رد


أتمنى قبل ماتردون تشوفون الموضوع من الناحيه الايجابيه

بسكم شكاوي وتفكير في صوب واحد

[بوحارب]

بما إني قطرية .. راح أرفع أسم قطر بجلوسي ف البيت

لا للمسيرة لانها للرجال ..
المسيرة للبزران وليس للرجال

زين ما حطيتي لنا فتوه بعد ههههههههههههه


ليش ياجماعه كل موضوع تاخذون منه الشين وتخلون الزين


الله يهديكم بس


لي عوده برد مفصل على كل رد


أتمنى قبل ماتردون تشوفون الموضوع من الناحيه الايجابيه

بسكم شكاوي وتفكير في صوب واحد

يعني الحين نرد بكيفك ولا بكيفنا !!!

ياخي كيفي يه خخخ

[ودي أكون]

المسيرة للبزران وليس للرجال

زين ما حطيتي لنا فتوه بعد ههههههههههههه



(( وإذا خاطبهم الجاهلون قالوا سلاما ))


صدق الله العظيم

[راجي الْعفو]

ردود البنات تثلج الصدر ..

الله يثبتكم و يزيدكم و يهدينا جميعا ..

[بوحارب]

(( وإذا خاطبهم الجاهلون قالوا سلاما ))


صدق الله العظيم

ما شاء الله انقلبتي من خريجات الأزهر هههههه

زين ما قلت شي انا ;)

[بصمة قطرية]

كل سنه في 18/12
الجمعة والإحتفال عندي في البيت ..
الصغار يستانسون و نشوف البث المباشر
في التلفزيون ..
طبعاً بدون مبالغة اسوي شغلات بسيطة
أهم شي الجمعة والوناسة ..
و أحضر الإحتفال في مدرسة عيالي تاريخ 17/12
كل سنه ..
الله يديم أفراحج يا قطر يا عروس الخليج ..

[ya3coub]

وشاح عليه اسم و علم قطر مع دبوس صغنطوط جميل

بدله رسمية الى الدوام و ربما زيارة السفارة القطرية اذا في اي فعاليات و ابضا التطوع للترتيب و مساعدتهم بالتنظيم خصوصا اذا في شي للطلاب

ما اعتقد اني احتاج أسوي شي معين لليوم الوطني لان كلشي الواحد يسويه المفروض بحب الوطن. سوائا عمل "بذمه و ضمير و الحفاظ على أمن و أموال الدولة" ، تربية الأبناء على الأخلاق الحميده، التواضع و التعامل الحسن مع الأجنبي و المواطن كل هذه لاشياء تكون على مدار العام تمثل حبنا لبلادنا

يكفيني اني ارجع ان شاء الله الدوحة بعد اليوم الوطني كأحد أوائل المهندسين بخبرة العمل مع نظام السكك الحديدية و إنشاءاتها تحت اقدم ادارة "London Underground" و ان شاء الله اقدر أستفيد اكثر و اطبق و اتكون لي يد او حتى بصمه صغيره لبناء وطني و تحضير الأفضل لي و لكل شخص عايش على ارضنا الحبيبة

اتوقع هاي شي بسيط للي أقوم به لدولتي غير الاعمال التطوعية و المجتمعية على مدار العام

[رجل مثالي]

نتمنى الأمن والامان والخير لدولتنا العزيزة وللجميع

[غايه الطواش]

اتطوع .عندي بروجكت مع كتارا
شغلات تعكس الحياه القطريه قديما فالمناسبات

[حسن]

شي جميل والله ياغايه

بس ياجماعه الخير دمجتو موضوعي وقتل مع موضوع المحاميه

مايسير جذي عاد

ياربيت يتم فصله بااسرع وقت ن فكرتي غير وهي غير

حرام يقتل موضوعي بدم بارد

:(

[همر]

شي جميل والله ياغايه

بس ياجماعه الخير دمجتو موضوعي وقتل مع موضوع المحاميه

مايسير جذي عاد

ياربيت يتم فصله بااسرع وقت ن فكرتي غير وهي غير

حرام يقتل موضوعي بدم بارد

:(



دقيقه ونص صمت حداد على موضوعك :swoon:

[bohilal191]

كلنا فداء للدين وللوطن وللقائد

للأسف في هذا اليوم انا دوام

[حياة]

جدولنا نقوم الصبح ونشوف المسير الوطني
وفي الليل نجتمع مع اهلنا في بيت واحد مننا
والبنت ماتروح للمسيره وش حادها
زحمه وخرابيط وتصرفات من االبعص غير صحيحه

[جبر ال جبر]

منتظرين الاعبين بكافه القطاعات وخصوصا القدم واصحاب الابراج الي انعطو اراضي مجانا من الدوله واصحاب المزارع وضع اليد الي اغلبها كراجات وسكن عمال واخيرا بعض المواطنين الى قطو ديونهم من شهر نشوف تضحياتهم في وطن ماقصر معاهم او بمعنى اصح في مسؤلين بالدولة ضبطو اوضاعهم ....... اما احنا مانهايط ونفوشر بالي راح نقدمه لوطنا لانه احنا اكبر من نفاق وكلام ينقال ولكن افعالنا هي الفيصل في هذاك الوقت وقاتل الله النفاق ما اقبحة

[رُفق المجنّا]

اذا عن الجدول فاليوم الاول العرضة
واليوم الثاني المسير الوطني ومن ثم العرضة والعنة اخر الليل

[khalid525]

انا قررت أسافر
بكون سفير اليوم الوطني بالخارج

[رهج السنابك]

كب كيك

[OM_OMAR_QATAR]

حبيت السؤال،

يصير اجاوب ههههه ..

انا صممت .. تاتوز ، وكنت جداً فرحانة بالنتيجة لم استلمتها
وكان جهد مشترك ، بحثت طويلا عن خطاط مناسب يبرزه بشكل انيق
لما اقول طويلاً يعني ثلاث مواسم، بس ربج من يسخر يجمع الأسباب
وايضاً كان للزخارف الأسلامية الطابع فصل طويل بالبحث والاختيار
وكثير من الجزئيات الجميلة ،
وبس يمكن انجاز يمكن لا ..

واكثر موقف كان بفضل الله تسخير كبير ولطيف وجميل وجرعة تشجيعية الهية
تميت اكثر من اسبوع ادور بالنتشعار اليوم الوطني

صصصدفة وانا اقلب بالانستغرام صدفة بحته
الا اشوف موقع البلدية عا لانستغرام توووووووووه من ثلاث دقايق بسسسسسس
منزل شعار اليوم الوطني والابيات له،

ثاني يوم ادخل البلدية من جديد
الا حاذفين الصورة

المهم صارت بجيبي هههههههه
دقيقة انا سردت قصة حياتي، اروح اختصر الرد .. ترة شلت اربع اسطر ونص هههههه

[العنيده]

الحمدلله جمعت الاهل والفرحه معاهم كبنت افضل لي ..

ينعاد علينا بخير يارب والله يدوم الامن والامان ان شاء الله
دامت افراحج ياقطر

[ودي أكون]

وشاح عليه اسم و علم قطر مع دبوس صغنطوط جميل

بدله رسمية الى الدوام و ربما زيارة السفارة القطرية اذا في اي فعاليات و ابضا التطوع للترتيب و مساعدتهم بالتنظيم خصوصا اذا في شي للطلاب

ما اعتقد اني احتاج أسوي شي معين لليوم الوطني لان كلشي الواحد يسويه المفروض بحب الوطن. سوائا عمل "بذمه و ضمير و الحفاظ على أمن و أموال الدولة" ، تربية الأبناء على الأخلاق الحميده، التواضع و التعامل الحسن مع الأجنبي و المواطن كل هذه لاشياء تكون على مدار العام تمثل حبنا لبلادنا

يكفيني اني ارجع ان شاء الله الدوحة بعد اليوم الوطني كأحد أوائل المهندسين بخبرة العمل مع نظام السكك الحديدية و إنشاءاتها تحت اقدم ادارة "London Underground" و ان شاء الله اقدر أستفيد اكثر و اطبق و اتكون لي يد او حتى بصمه صغيره لبناء وطني و تحضير الأفضل لي و لكل شخص عايش على ارضنا الحبيبة

اتوقع هاي شي بسيط للي أقوم به لدولتي غير الاعمال التطوعية و المجتمعية على مدار العام

اجمل رد يستحق الثناء عليه

[قطر love]

الصبح دوام مثل كل سنه بسبب التنسيق مع لخويا واحتلالهم لمواقف الدوام ههههه

لانه الدوام قريب المسير وهذا شي خاص بالامن الداخلي وانتشارهم ومن بعدها اريح شوي وللعرضه 17/18 فالعرضه وبعدها للعنه اعلام واحتفالات بالعنه احسن من الهشتك بشتك فالكورنيش والتردح والتسدح

[aloosh]

عني ما راح اسوي شي لان ما فيه اماكن الواحد يبدع فيها
مسيره وعرضات فقط

يسون مسابقه اختراع شي ويكون له مكان الناس تبدع فيه

حب الوطن بقلب موجود

بس نبي شي يشجع الناس مو يوم ويمر عادي

[منابر خالده]

باروح المسيرة في الليل ��

[غير البشر]

ماشاء الله عليكم يا المحاميه وحسن على الموضوع

الله يعطيكم العافيه

بالنسبه لي انا ماروح مكان كلش غير العرضه وبس من العصر لين فليل

نرزف لين تطيح يدنا هههههه

لاني صج استمتع با الاجواء والترتيبات والتنظيم

واليوم هذا غالي علينا

الله يديمه علينا ويديم لنا الامن والامان

اللهم امين

[غير البشر]

الحمدلله جهزنا توزيعات وبروشرات للدوام عن قطر

اما على المستوى الشخصي

انا كبنت اقدم لـ قطر بإني احشم نفسي عن الروحه سواء للمسير العسكري او المسيرة ليلا
عشان ما نشوهه اسم قطر وبكرا اللي يسوى وما يسوى يتطنز على الفيديوهات اللي راح تنتشر بشكل خرافي اذا فيها بنات
احنا نسوي جمعة في البيت العود او بيت وحدة من البنات ونجيب كيك وجمعة ووناسة بينا وبين بعض



كفوووو عليج والله

رد يثلج الصدر

اتمنى كل البنات يسون نفس الي تسوينه وبنفس طريقه الاحتفال

وانا معاهم هذي تمثلنا ومعاها الاخوات نوفا و ودي اكون كفو عليكم والله

[Azizuk]

انا راح أشارك جميع المشاركين في المسير صباحا مشاركة فعليه

والعصر راح أشارك في العرضة مع العيال لمدة يومين

هذا غير درب الساعي شبه يومي من يوم الاثنين يوم الافتتاح

وتاريخ 19 انا مسافر مع العيال أوروبا نغير جو لأنهم يبون skiing كلعاده

[roma27]

حب الوطن مش يوم حب والوطن كل يوم انا فداء لله ثم الوطن حب الوطن مثل حب الام والأهل والعشيرة حب الوطن بذكر تاريخ قطر المجيد وأبطال قطر اللي قدموا أنفسهم دفاعا عن الوطن ودافعوا عن قطر في عصر مؤسس قطر الشيخ جاسم بن محمد ومنهم الشيخ احمد بن محمد الي كان من ابطال قطر والشيخ ثاني بن جاسم والوجيه علي العطية وجاسم درويش وغيرهم من أبناء قطر ومن أجدادنا هؤلاء غيرهم من أبناء قطر قطر الدوله الوحيدة اللي لم تستطيع الدوله العثمانية ان تحتلها تاريخ قطر من يقرأه يجد ان أجدادنا كم كانوا شجعان كم هم ابطال كانت كل الغزوات الخارجيه على شرسه ولكن أجدادنا دافعوا عنها بشراسه

[Abdullah_89]

على صعيد العمل منظمين احتفال تاريخ 15 و 16 و 17 للعامة للإحتفال باليوم الوطني

على الصعيد الشخصي مسويين احتفال تاريخ 17 فالبيت مع اليهال

وطبعا درب الساعي ماراح افوت فرصة زيارتة

وتاريخ 18 مع الشعب فالمسيرة

أتمنى السنة مايكون في رش واغاني ورقص هابط من فئة الجهله اللي يحسبون ان اليوم الوطني يوم رقص وسمردحة

[قلوب قطر]

مشاركتي باليوم الوطني ليس مقتصرة على اليوم الوطني فقط اللي هو 18/12 ولكن
من السنة اللي فاتت تطوعت في حملة كلنا قطر و اللي تم اطلاقها السنة اللي فاتت في مركز قدرات للتنمية في مدينة الخور و المستمرة لمدة خمسة سنوات.. و هذه الحملة تتضمن عدة قيم و منها قيمة الاحترام تم تغطيتها السنة الماضية و السنة الحالية راح يتم انطلاق قيمة الإخلاص و تستمر إلى ديسمبر 2015 و من هنا أكون قد شاركت في ترسيخ قيم مهمه للمجتمع القطري حتى يرتقي البلاد و أول الفعاليات اللي راح اتطوع فيها هي بطولة لبرثة للصقور في مدينة الشمال و من ثم فعاليات لمسة وفاء المخلصين للوطن في مدينة الخور

وكل الشكر لك على هذا الطرح

[طبيب قطري]

انا اشوف ان اهم شي هو بذل الجهد للمحافظه على المظهر الحضاري لهذا اليوم..
بالتوفيق للجميع

[الكنج]

بعد ما رجعت المياه لمجاريها

حجوزات دبي فل فاليوم الوطني ...

[بو الجوري]

موضوع جميل ..

أنا عن نفسي .. تاريخ 17 بروح الدوام أخلص لهم ترتيبات كم شغله للحفله اللي مسويينهـا للموظفين ..
وعالساعه 11 بالكثير بسحب عليهـم وبروح عرضتنـا ، لأنه غالبا سمو الأمير يشرفنا العصريات ..
وبنتم هناك لين آخر الليل ..

ويوم 18 من الـ 10 لين الليل فالعرضه .. وطبعاً يتخللهـا زيارة القبائل المجاوره ..

و بحاول هاليومين أودي العيال لـ درب الساعي ..
لأنه مكان جميل ويستحق الزياره


وبس و الله

[Right]

بسافر ، وإن ما سافرت بنام وأرتاح :victory:

[3li]

الله يحفظ لنا قطررر وحكامها

[تلفزيون قطر]

انا عن نفسي اقول مهما قدمنا في حق بلادنا قطر فهو قليل

ولكن بداء العمل الفعلي للتجهيزات لليوم الوطني من تاريخ 20/11/2014 لين تاريخ8/12/2014 يوم الإفتتاح ومازال العمل مستمر حتى تاريخ 20/12/2014 في درب الساعي وماراح يوقف العطاء والولاء لدولتنا الحبيبة لين يوقف العمر ..

دامت قطر فخر لنا في كل جيل
الي تباهت في نهار أعيادها
على خطى جاسم راعي المجد الجليل
الي حماها من ردى حسادها
حدد معالمها على الدرب الطويل

عسى الله يديم علينا الأمن والأمان وعلى بلاد المسلمين أجمعين

[برشلوني قطر]

دامت قطر فخر لنا في كل جيل
الي تباهت في نهار أعيادها
على خطى جاسم راعي المجد الجليل
الي حماها من ردى حسادها
حدد معالمها على الدرب الطويل

عسى الله يديم علينا الأمن والأمان وعلى بلاد المسلمين أجمعين

اللهم آمين...

[بنت رجال]

اتفق مع الأخوات لا للمسيرة بنتابع العرض ع التلفزيون ع الاقل نشوف الامير والعرض أوضح والله يدوم الأمن والأمان ع قطر