عسى ماشر شصار ف العرب؟

[JN000N]

السلام عليكم ورحمة الله وبركاته




ابغي اعرف هل تغيبت عن الدنيا وفجأه وعيت وماعادو الناس مثل ما كانو!
متى صار التغيير؟
من متى احنا نشوف سياره مبنجره عالشارع مانوقف لها؟
من متى واحد يسوي حادث محد يلتفت له
من فتره ام عبدالرحمن كتبت ان يوم سوت الحادث في سيارات مروا صوبهم محد وقف
ومن كم يوم حد من هلي سوا حادث ومحد التفت صوبه
والاخير الي غرق ف البحر!!!!! اخوه مايدري انه اخوه الي يغرق وقاعد يشوف واحد من بعيد ف البحر ياشر له ولا يروح له يساعده وف النهايه يوم يابوه جثه انصدم ان هذا اخوه!
يعني لازم انا اعرف من الشخص المدعوم او الي بيغرق او الي محتاج مساعده عشان اوقف له!!

واحد غريب محد بيساعده؟ محد له

بنت والا ولد صغير يضيع ف حديقه يشوفونه العالم يصيح محد يساله وين هلك والا يفكر يوديه للسكيورتي! لا طبعا ف الطقاق اهم شي عيالهم موجودين محد منهم ضايع


الله يرحم ايام قبل لين بنجرت السياره مب اقل من سيارتين يوقفون لهم
الله يرحم ايام ف رمضان قبل الفطور بنص ساعه شباب عمانين مسوين حادث ع خط الشمال ومات الي مات منهم وبقى الي بقى وعمي وقف لهم واتصل للاسعاف وتم معاهم يلقن الي بيموت الشهاده لين الله توفاه وتم لين جاو الشرطه والاسعاف وخذوهم ماجانا الا عقب الفطور بفتره قريب العشا ! احين في حد بيسوي جي؟ لا طبعا الفطور اهم :)

جد والله شصاير ف العرب؟
واحد ينضرب ف الشارع عادي يمرون جنبه مرور الكرام ويقولون خلوهم اثنين يتفاهمون! لا ما يتفاهمون اقل شي تسويه لو ماتبي توقف لهم تبلغ الشرطه
لا اصلا حتى الشرطه ماعاد لهم بارظ نفس قبل
الصبح الساعه 6 يصير حادث تتصل للشرطه يقولك الي يرد عالتلفون يالله صباح خير ومتجبد وماله بارظ حتى يعرف وين صار الحادث

شسالفه شصار ف العالم شهالحال اللي وصلوا له العالم

محد يبي الاجر محد يبي يسوي خير؟
وين صنائع المعروف؟ والا بس برودكاست نطرشه ويبلفيت نبي الاجر لين طرشناه بدون ما نسويه؟


لا والله الموضوع جدا محزن ويضيق الصدر
كنت اشوف واقول حاله حالتين ما تاثر بس زادو الحالات وصار شي طبيعي يصيدك شي ف الشارع محد يوقف لك

[qtr qtr]

من ناحية الحوادث البسيطه ولا التاير بنجر فهذا عادي الجوال معاه يتصل باخوه او حد من ربعه او الدريوال ..

اما الحوادث القويه والمتضرره الحمدلله دايما اجوف العالم توقف وتساعد .. ماقد مر عليي حادث من الحوادث القويه محد حوليه .

[نفسي عزيزه]

من فتره بنجرت على خط الشمال ووقف لي ستاندر فيه شباب شالوني شيل والله ماسويت شي احرجوني :(

الدنيا فيها خير ان شاء الله

طبعا الظاهره الي قلتيها موجوده بس ولله الحمد مامرت علي اسمع عنها بس

[القبطان اكس]

صراحة موضوع مثير وجميل وذو قيمة

المشكلة ان بعض الناس وخاصة الحريم اذا حد وقف لهن ايفكرون جاي يتعرف وصارت لي كذا مرة بحيث اتقول الحرمة مب شغلك خلني بروحي

بخصوص الحوادث الواحد لازم ايحاذر لانه فيها نيابة وشرطة لأنهم قد ايفكرون انك المتسبب

هذا بشكل عام لكني أميل لمساعدة الناس او على الأقل اطلب اقدم المساعدة لهم

[كيلو حديد]

للحين في الناس خير
بس احيانا لو تبغي تساعد تجيك مصيبه
يا يتبلون عليك يا تبتلش بمشكله ويتهمونك او اي شيء
واذا حرمه محد يتركك الكل يظن فيك ظن السوء

بصراحه ما يقصرون الشباب
والحمد لله نوقف اذا الموقف يساعد
الخير باق يا بنت الكرام

[حسن]

لازال الخير في امتي

:)

الصراحه اللي معدنه اصيل اصيل لو طال الزمان والردي يبقى ردي لو قصر الزمان
دائما اوقف واساعد اي شخص حتى العبريه اشيلهم واوصلهم
فعلا

الناس تغيرت للاسؤا والقادم ادهى وامر

رؤيتي

:)

[القبطان اكس]

لازال الخير في امتي

:)

الصراحه اللي معدنه اصيل اصيل لو طال الزمان والردي يبقى ردي لو قصر الزمان
دائما اوقف واساعد اي شخص حتى العبريه اشيلهم واوصلهم
فعلا

الناس تغيرت للاسؤا والقادم ادهى وامر

رؤيتي

:)

مرة وقفت لعامل مطعم نوبي ووديته الطوارئ وكان مسكين تعبان في الشارع

يحليله أخذ رقمي وعزمني في مطعمه بلاش وكل ما اروح اكل بلاش

عاد مب أني ما شايف خير بس والله هو يعزمني

[حسن]

مرة وقفت لعامل مطعم نوبي ووديته الطوارئ وكان مسكين تعبان في الشارع

يحليله أخذ رقمي وعزمني في مطعمه بلاش وكل ما اروح اكل بلاش

عاد مب أني ما شايف خير بس والله هو يعزمني


جزاك الله خير

تكفي ودني وياك المطعم اجرب اكله مال بلاش يقولن عنه حلو وكثرمنه

هاهاها

[القبطان اكس]

سكر من زمان

[حفيد الأنصار]

^^ خسرته :(

[باراكودا]

سكر من زمان

كل يوم عنده تاكل ببلاش لازم يفلس ويسكر .

[النهار]

جنون كل الي ذكرتيه يصير عندنا هني ولا في دوله ثانيه

[توشيبا]

الحمدالله اي حد اشوفه محتاج مساعده اساعده

الا واحد في سلين مغرز طنشت له وحلفت علي الشباب في العنه محد يقوم ويساعده

لي انه يستاهل اقوله نسم شوي من هوا التواير وبتطلع يقول لا علي شان اذا رجعت اروح للبيت ماعبي هوا من جديد

طنشت له وحركت عنه

ومره واحد مبنشر ساعدته وسويت له البنشر لي انه شايب بس خلاني اقفل واعصب

طلع بوكه يقول لي كم حسابك ياني عطيته كلام وصار يتبلكم في الكلام

هذا واهو شايب من الطيبين متى كانت المساعده بفلوس

[JN000N]

جنون كل الي ذكرتيه يصير عندنا هني ولا في دوله ثانيه

يصير عندنا هني للاسف :(
مايبت كلام من عندي والله يالنهار ان كل شي كتبته صار اذا مب قدامي او لي صار لناس من هلي
واقل مثال مشهود عليه مثال ام عبدالرحمن

اترك كل شي قلته وركز على الي غرق ف البحر وشوف حالة اخو اللي مات الحين شلون متحسف قد شعر راسه انه ما انقذ الي كان ف البحر

[راجي الْعفو]

وعليكم السلام و رحمة الله و بركاته ..

أمر مؤسف إن مسالة المعونة للناس أصبحت قليلة جداً ..

ولكن بعض الناس قد يتردد من المساعدة تخوفا من بعض الشخصيات - طبعا الكلام ان لم يكن في موقف حرج -

اما المواقف الحرجه فلا بد من المساعدة أيا كان الشخص ..

الله يصلح الحال ..

[القبطان اكس]

كل يوم عنده تاكل ببلاش لازم يفلس ويسكر .

خخخخخخخخخخهههههههه

الله يسامحك

[JN000N]

انا ماقول ماعاد في خير ف الناس
لكن مب نفس قبل
انا ذكرت هالامور لكن ما انكر ان في ناس قطعو اليحر وساعدونا ف ركن يوم غرزنا وكانت المايه بتسقي ومافي وقت لكن جزاه الله خير ساعدنا ومب عشان شي بس هو واحد من اهلنا يدري ان محتاجين مساعدته والا بنتوهق لين تثبر المايه
بس الصج محد قام يساعد حد
كلن يالله نفسي
كونسبت الفزعه نفسه بدا يخف عن الجيل الحالي والاجيال الجايه الا من رحم ربي

[العلياا]

يا ويلي على اللي غرق يا جنون :(
شلون حالة اخوه احين وشكثر ندم وتحسر والله شي يعور القلب

بالنسبة لي وبكل امانة اشوف ان الدنيا بعدها بخير
مرة وحدة وقفت وعلى طول وقفوا لي وساعدوني وان شاءالله ما اتكرر
ان شاءالله انها حالات فردية وشبابنا فيهم الخير والبركة

[حسن]

لاحد يخلط الامور ويسمع القيل والقال

ماتوفى من غريق والبحر متر قدر ومكتوب له وهناك سبب
الله يرحمه

[R 7 A L]

الشر يعم
والناس قامت تخاف
بس مازال الخير موجود
واحد من الشباب يمكن تذكرون قصة وهو راجع من السعودية في اخر محطة محطة القحطاني حصل له عبري يبغي يروح لقطر وصله معه خلصوا من سلوى في بوسمره مسكوهم بعد مافتشوهم وحصلوا مع العبري مخدرات المهم راعي السياراة تلته وتلعوز لين ظهرت براءته في اعتقادكم هالشخص لو يحصل احد يأشر بيوقف له بعد الس صار له

[رهج السنابك]

مره كنت بالامارات وتوهقت قلت باخذ المترو لاقرب محطه من المكان الي ابيه انزل من المحطه وابي اكمل دربي بتاكسي للمكان لانه شغله ضروريه ولازم انجزها
نزلت من المحطه ولا تاكسي راضي يوقف لي لانه وقت تبديل شفتات وتميت ساعه يمكن
الا راعي سياره فخمه رقمها احادي ويحوس يحوس واخر ماعجز قال بوصلج لاقرب مكان ومن هناك خذي تاكسي للمكان الي تبينه بالنسبه لي كان مثل طوق النجاه لكن والله رفضت وتصنمت مكاني يمه شي يخوف الشارع ارحم هاهاهاها

صار لي حادث من كم شهر ادق ع الشرطه يقول نتغدى مافي دوريه نطرشها وانا واقفه بالشمس الحارقه! طيب عيب راعوا ان بنت داقه عليكم هل الغدا اهم!


ومره كان بيخطفني باكستاني ولاحد فزع لي :(

ماقول غير الله لا يحوجكم لاحد ولت تمرون بظروف تحناجون فيها للناس
الطيب بهالزمن صار قليل

[JN000N]

لاحد يخلط الامور ويسمع القيل والقال

ماتوفى من غريق والبحر متر قدر ومكتوب له وهناك سبب
الله يرحمه

انا لو ما اعرف اي شي عن الموضوع ما كنت تكلمت
ومب قيل وقال :)
صح كان في سبب لكن هو اشر لاخوه عشان يجيه لكن اخوه ما قام له وتم لين غرق بان مافيه حيل كان يوصل للسيف

[JN000N]

الشر يعم
والناس قامت تخاف
بس مازال الخير موجود
واحد من الشباب يمكن تذكرون قصة وهو راجع من السعودية في اخر محطة محطة القحطاني حصل له عبري يبغي يروح لقطر وصله معه خلصوا من سلوى في بوسمره مسكوهم بعد مافتشوهم وحصلوا مع العبري مخدرات المهم راعي السياراة تلته وتلعوز لين ظهرت براءته في اعتقادكم هالشخص لو يحصل احد يأشر بيوقف له بعد الس صار له

في مثل هالامور يمكن صج الواحد يخاف
لكن مب معناته احكم عالكل من تجربه وحده

[JN000N]

مره كنت بالامارات وتوهقت قلت باخذ المترو لاقرب محطه من المكان الي ابيه انزل من المحطه وابي اكمل دربي بتاكسي للمكان لانه شغله ضروريه ولازم انجزها
نزلت من المحطه ولا تاكسي راضي يوقف لي لانه وقت تبديل شفتات وتميت ساعه يمكن
الا راعي سياره فخمه رقمها احادي ويحوس يحوس واخر ماعجز قال بوصلج لاقرب مكان ومن هناك خذي تاكسي للمكان الي تبينه بالنسبه لي كان مثل طوق النجاه لكن والله رفضت وتصنمت مكاني يمه شي يخوف الشارع ارحم هاهاهاها

صار لي حادث من كم شهر ادق ع الشرطه يقول نتغدى مافي دوريه نطرشها وانا واقفه بالشمس الحارقه! طيب عيب راعوا ان بنت داقه عليكم هل الغدا اهم!


ومره كان بيخطفني باكستاني ولاحد فزع لي :(

ماقول غير الله لا يحوجكم لاحد ولت تمرون بظروف تحناجون فيها للناس
الطيب بهالزمن صار قليل

هاي الي اقصده
الطيب قلييييييل وصارو الناس بس يسوون الطيب حق الي يعرفونهم وبشكل نادر بعد

[ضوى]

الخير مامات يا بنت الاجاويد ، بس الناس صارت تخاف من اللي تسمعه وتشوفه

شخصيا انا اوقف لاي حرمة اشوفها ناطرة تاكسي او اي حركه بضيقة او اي حرمة سيارتها واقفه بشارع بمسنشفى بجمعيه ، واقول الحمد لله انه مب انا لانه المواقف جدا صعبه
اتذكر مرة حرمة تمشي بالشارع العام وهوا قوي كسرت خاطري ركبتها ووصلتها لبيتها كان مسافة عم بيتي بس قلت الحمد لله اللي الله قدرني ووديتها بيتها ، وسبحان الله دارت الايام والشهور وتلاقيت معاها بعياده طبيه وساعدتني جدا والله اني ماتذكرتها هي تذكرتني
وانذكر مرة واحدة بمحطة بترول تتلاغى مع العامل ماعندها فلوس البترول وصوتهم عالي والا يطلب لها الشرطة وقفت بعيد وطرشت للعامل الفلوس مع ولدي الصغير وخلاها تمشي ، يارب لا تحوج احد الا لك ولا يلجأ الا لك في كل اموره

[حسن]

انا لو ما اعرف اي شي عن الموضوع ما كنت تكلمت
ومب قيل وقال :)
صح كان في سبب لكن هو اشر لاخوه عشان يجيه لكن اخوه ما قام له وتم لين غرق بان مافيه حيل كان يوصل للسيف

الناس متغيره والوقت شبه معفوس...!
راحوا اهل الطيب والباقي هل الثرثره

عرفت حاجه تناسب ضيقين النفــوس
لا تقرب اللي تحبه واجد ترى تخسره

:)

انه التغير القادم

رؤيتي

[بو خليفه 123]

تقديم الإحسان و مسايرة المستضعفين هي من طيب المنبت و شجاعة القلب عندما تساعد الغريق او شخص تسبب بحادث . كلامك فيه من الصحه و اصبح الكثير "اللهم نفسي"

مازلنا في قطر بخير و راعي الفزعه بيتم راعي فزعه فهذي خصله زرعها الله فيه و مازلنا افضل من الغرب , هناك تقع جريمة قتل امام الاعيان ولا احد يحرك ساكن و تستمر الحياه ..

[بريق الحق]

لا ماعليكم الخير موجود الحمدلله

انا الصراحه اوقف حق العالم ماعندي مشكله

[همر]

انا ماوقف حق حد

وما اساعدالا اللي فعلا بعد التمحيص

والتحميص احس انه محتاج مساعده..


، رؤيتي ، :(

[حسن]

انا ماوقف حق حد

وما اساعدالا اللي فعلا بعد التمحيص

والتحميص احس انه محتاج مساعده..


، رؤيتي ، :(



يعني
الحين شلون بالتحميص ولا تحميض بتعرف هذا محتاج المساعده
لا لا لا

ياتساعد يادعوه صادقه من قلب نظيف بالتوفيق له للمدعى عليه

اما هذا الكلام مايمشي ياهمر

اسكت عندي صور لمواقف مساعدات وانقاذ مشرفه ورفضت لقاء تلفزيوني
علشان الحديث بها
بالصور والفيديو
الناس باخذ بالالاف عليها وانا ادفع الاف لهم

هنا الفرق ياهمر

يدا تبني ويدا تهدم

:)

[حمد 2002]

عسى ماشر شصار ف العرب؟.

اختي جنون ،،

في البدايه حبيت اشجعت على الكتابه واعتبرها محاوله جيده منج ولكن يجب كذلك ان لاتلغي الجانب الايجابي لدى العرب ومازال هناك ناس فيهم الخير لأمتهم العربيه والخليجيه والإسلاميه ، وكان من الافضل والأجدر ان تعطينا براهين قويه لكي نقتنع بأطروحتك تلك ، لأن الحالات التي ذكرتيها فرديه جدا ولايجب ان تعمم على مجتمع عام وشامل ، وبكلامك هذا تبينين للعالم العربي والخليجي بأن النخوه والفزعه اختفت وتلاشت لدينا ، السؤال هنا انتي عنوان موضوعك ذكرتي السؤال التالي (( عسى ماشر شصار ف العرب؟. )) فهل انتي لحقتي على حقبتين وجيلين على الاقل من العرب المتواجدين بالدوله لكي تقارنين مابين تلك الحقبه ومابين الحقبه والجيل المتواجد حاليا !! ، وفي الختام حبيت اوجه لكي نصيحه وارجو ان تأخذيها بعين الاهتمام من اخوج الصغير حمد 2002 ، عند كتابه اي موضوع ما ، يجب ان تكون لدى الكاتب حجه وبراهين قويه يقدر يقنع بها الرأي العام والجمهور المتلقي .

شكرا جزيلا ..

[النظامي]

الفزعه والنخوه موجوده عند العرب في دمهم

والحالات اللي تكلمتي عنها استثنائية ...... لكن بشكل عام الناس بخير وحنا طيبين

تسلمين على الموضوع المفيد ... وننتظر منج الاجمل

[Dana’1]

ماشر إن شاءلله يا جنون..
الخير مازال موجود إن شاءلله وإن قل...والشين موجود في وقتنا الحالي..وحتى لو ماكان أكثر هو إلي يعم للأسف

مو بس على المستوى والأمثال إلي ذكرتيها...حتى على المستويات الأعلى من كذا حال العرب ما يسر بتاتا البته@@

[همر]

يعني
الحين شلون بالتحميص ولا تحميض بتعرف هذا محتاج المساعده
لا لا لا

ياتساعد يادعوه صادقه من قلب نظيف بالتوفيق له للمدعى عليه

اما هذا الكلام مايمشي ياهمر

اسكت عندي صور لمواقف مساعدات وانقاذ مشرفه ورفضت لقاء تلفزيوني
علشان الحديث بها
بالصور والفيديو
الناس باخذ بالالاف عليها وانا ادفع الاف لهم

هنا الفرق ياهمر

يدا تبني ويدا تهدم

:)


انها الفطنه يا بوعلي

نعم يجب ان يكون الرجل فطيناً

وكما قال المثل حرّص ولا تخوّن

اما انت فلو ان منك اثنان يا ابا علي

لما بقي في الارض جعو :(

[شيخ الديرة]

هذي الأيام الناس لازالت تود أن تقدم الخير والمساعدة, لكن المشكلة ان اللي يساعد يجيه يوم يندم أنه ساعد, لأن يحط نفسه في موقف لا يتوقعه

مرة بعز الحر وأنا وحدي بالسيارة راجع من الشغل وأشوف قريب من بيتي حرمة وخدامة وكم طفل حايرين بنفسهم مرة يمشون ومرة يوقفون بالشارع,

الفكرة الأولى اللي جت في بالي أنه اوصلهم مكان لأن لا يمكن أن يحصلون تكسي او شي في منطقتنا, أو قد يكون هناك مشكلة صحية عند أحد الأطفال أو أو أو

مشيت بسرعة قليلة جدا بالقرب منهم وأنا ملتفت عليهم, أريدهم يؤشرون أو يقولون شي,

مع الأسف الشديد قررت أن أتركهم بحالهم

هل هناك من يراقبهم ويحطني في مشكلة لما أساعدهم؟
أنا وحدي وقد يتهموني بشئ لأن لا أعرفهم أو أعرف نواياهم ..

لما دخلت دورة تدريب الأنقاذ وأنا في دولة غربية, ذكر المدرب بصريح العبارة أن هناك الكثير من المتدربين يمكنهم المساعدة, ولكن حسب أحصائيات الشرطة والمحاكم, يقعون في مشاكل قانونية بسبب أتهام ذوي المريض للمنقذ بسوء التصرف وزيادة الأذى

[مشاكل]

بالعكس ،،، انا اشوف شبابنا فيهم الخير ويتسابقون على فعل الخير ولله الحمد

[JN000N]

وانا ما قلت مافيهم الخير بالعكس انا ذكرت ان الطيب موجود بس قليل
لكن برغم بعض المواقف الي ذكرتها ما زلت مصره ان التربيه من جيل لجيل تختلف
وبدت تخف المبادىء الي تربو عليها الي قبلنا
من جيل لجيل بدا يخف معنا الفزعه
مره وحده جات لواحد من شيبان منطقة من مناطق قطر تشتكي ان الشرطه بياخذون ولدها وباقي عالعيد يومين وهي تبيه يعيد عندها مسكه الشايب عنده وقالهم تعالو عقب يومين خذوه او انا بجيبه لكم بنفسي بس خلوه يعيد عند امه*
يعني الي سواه خلاهم يتركونه هاليومين على ضمانته هو ولو ما راح الولد عقب يومين المركز بيتمشكل الشايب
لكن مافكر جذي هو فكر انه قد كلمته وانه بيسوي الخير ف ام الولد لين عقب العيد وتنحل مشكلته


هذا الكلام الي قلته صار قبل اكثر من 25 سنه
ف هالوقت في حد جذي! والله انهم نادرين
محد يضمن حد ولا حد يوثق ف حد وصارو العالم من اسباب عدم مساعدتهم للغير هو انهم يخافون يبتلشون


شاب قطري شاف هندي وفلبينيه بمنظر مخل ف الشارع ويوم تدخل وبغا يوديهم المركز او يتصرف انسجن هو بحكم انها قالت انه يتحرش فيها وابتلش الريال

انا لو بتكلم ب المواقف من اليوم لين السنه اليايه مب خالصه
لكن الحجه مب بالمواقف ولا مثرتها
حتى لو بنظركم انها فئه بسيطه ما تاثر عالمجتمع ف انا اقول ان هالفئه كانت نادره وتزيد مع الوقت
انا من هني اطالبكم كلكم ومافيها شي لو طالبت ب هالشي
ولا اعتبره تدخل
لكني اطالبكم تزرعون هالمبادىء ف عيالكم وتثبتون هالقواعد فيهم مهما مر الزمن يتمون مثل ماهم مايتغيرون
كل واحد يتعامل بنيته الصافيه واجره عند الله مايضيع

المساله مب مساله بس نوقف ف الشارع لحد ونساعده
الموضوع اكبر من جذي بوايد ولازم ننتبه عليه
ليش نرضى بالتيار المر الي دايما يردده حسن ويقول انه جاي؟ ليش مانوقف ضده
ماعلي من المجتمع حولي تغير او شنو صار فيه ليش اتاثر فيهم
علي من بيتي وعيالي اسنعهم على سنع الاوليين ولو كل واحد يفكر جذي ويبدا من بيته ويحاول عالاقل لو بالكلام يثبت هالامور ف الاجيال الجايه كانت ازمه الادهى والامر ما بتخوفنا

[دااانة قطر]

الحمدلله والله يبعدنا عن شر الحوادث
اي حادث اول شي اتصل على999 وبعدين ابتدي اختي واخواني
هلي يوصلون قبل الشرطه مع انهم ابعد
واي احد يعرض علي مساعده اشكرهم واقول اخواني جااييين :nice:




الحمدالله اي حد اشوفه محتاج مساعده اساعده

الا واحد في سلين مغرز طنشت له وحلفت علي الشباب في العنه محد يقوم ويساعده

لي انه يستاهل اقوله نسم شوي من هوا التواير وبتطلع يقول لا علي شان اذا رجعت اروح للبيت ماعبي هوا من جديد

طنشت له وحركت عنه

ومره واحد مبنشر ساعدته وسويت له البنشر لي انه شايب بس خلاني اقفل واعصب

طلع بوكه يقول لي كم حسابك ياني عطيته كلام وصار يتبلكم في الكلام

هذا واهو شايب من الطيبين متى كانت المساعده بفلوس

لاتلومه يمكن مسكين متعود محد يساعده الا بقلوس يمكن اقرب الناس له عودوه على هالشي وصدقني في ناااس ماتمشي الا بالفلوس
ماكان في داعي تسمعه حجي دامه شايب وجان رديت عليه رد لبق وباحترام

[A bin M]

البعض صار ما يوقف بس اكثر شي الناس توقف اذا احد تعطل او حادث

[دااانة قطر]

مره كنت بالامارات وتوهقت قلت باخذ المترو لاقرب محطه من المكان الي ابيه انزل من المحطه وابي اكمل دربي بتاكسي للمكان لانه شغله ضروريه ولازم انجزها
نزلت من المحطه ولا تاكسي راضي يوقف لي لانه وقت تبديل شفتات وتميت ساعه يمكن
الا راعي سياره فخمه رقمها احادي ويحوس يحوس واخر ماعجز قال بوصلج لاقرب مكان ومن هناك خذي تاكسي للمكان الي تبينه بالنسبه لي كان مثل طوق النجاه لكن والله رفضت وتصنمت مكاني يمه شي يخوف الشارع ارحم هاهاهاها

صار لي حادث من كم شهر ادق ع الشرطه يقول نتغدى مافي دوريه نطرشها وانا واقفه بالشمس الحارقه! طيب عيب راعوا ان بنت داقه عليكم هل الغدا اهم!


ومره كان بيخطفني باكستاني ولاحد فزع لي :(

ماقول غير الله لا يحوجكم لاحد ولت تمرون بظروف تحناجون فيها للناس
الطيب بهالزمن صار قليل

:eek5::rolleyes2::omg: عندنا هني هالكلام؟؟؟؟

[عاشق العديد]

والله شوفي ياجنون ..

انا كنت لو احصل واحد واقف ماعنده شي اوقف له ..

لكن من بعد ماشفت انه العالم مايوقفون لي .؟
وبعض العالم الي افزع لهم ياخذون الاسبير ومايردونه اتصلهم مايردون بعد .؟
والي خذا جيك مني ومارده بعد .؟

والي مره خذ موتري ودا هله ونقعني شكثررر .. وقلنا نبلعها .. يالله ..

لكن شفت انه ع ابسط شي محد يوقف لي ..
مره من المرات نسيت اعبي بترول ومليون موتر مر علي ..
ولا احد وقف لي ..

فالنهايه كل ما احد يمر جنبي مطلع له فلوس اقوله تعال ولك الي تبي .؟
ولا احد جا اخر شي بلغت وقلت لهم انا موتري واقف فشارع واحتمال حد يدعمني ..
وانا واقف في باركن اصلن لانه لو باركن بيطنشوني .. فا جاني واحد الله يزاه خير عطاني بترول وفك ازمتي ..

[دااانة قطر]

الخير مامات يا بنت الاجاويد ، بس الناس صارت تخاف من اللي تسمعه وتشوفه

شخصيا انا اوقف لاي حرمة اشوفها ناطرة تاكسي او اي حركه بضيقة او اي حرمة سيارتها واقفه بشارع بمسنشفى بجمعيه ، واقول الحمد لله انه مب انا لانه المواقف جدا صعبه
اتذكر مرة حرمة تمشي بالشارع العام وهوا قوي كسرت خاطري ركبتها ووصلتها لبيتها كان مسافة عم بيتي بس قلت الحمد لله اللي الله قدرني ووديتها بيتها ، وسبحان الله دارت الايام والشهور وتلاقيت معاها بعياده طبيه وساعدتني جدا والله اني ماتذكرتها هي تذكرتني
وانذكر مرة واحدة بمحطة بترول تتلاغى مع العامل ماعندها فلوس البترول وصوتهم عالي والا يطلب لها الشرطة وقفت بعيد وطرشت للعامل الفلوس مع ولدي الصغير وخلاها تمشي ، يارب لا تحوج احد الا لك ولا يلجأ الا لك في كل اموره

كثر الله خيرج . يختي صرت اخاف اوصل اي وحده في الشارع اذا كنت بروحي خاصة من كم موقف
تبتلشين معاهم يسردون لج قصة حياتهم ومعاناتهم وماعندهم وجهة معينة بس امشي
والشياب يكسرون خاطري لين يأشرون لي وماقدر اوصلهم

[Dana’1]

هذا موقف لشباب من الجماعه ..أصغرهم بالمتوسطه وأكبرهم بالثانوي

كانوا بالبحر ناسيه الوقت بالبضبط بس ماكان فيه أحد غيرهم و سياره نسوان أم مع عيالها عالبحر محترمين وماشافوا عليهم شي..لكن أستغربوا وجودهم بهالوقت..المهم يقول إلا أثنين من العرب سكارى لعوزوا هالحريم ويتحرشون فيهم بطريقه مستفزه والحرمه خافت*

عاد هالشباب ماقصروا في هالأثنين أجتمعوعليهم وسنعوهم..المره لمت عيالها وتمت تدعي لهم*وحركت


هالسالفه ممكن من 3 سنوات تقريبا

[شبح الصمت]

الله يوليج العافيه جنون وكلامك فيه من الصح الكثير واحس طالع من قلبج وبقووه

:eek5:


العالم قامت تخاف اول شيء من هالحوادث لانه راح يدخلون في مسئالة قانونيه اشلون وكيف وفي ناس ما تبي هالشيء فيقول انا اش علي ..

حادث خلاص ببلغ ولا راح اوقف


مره صار حادث قدامي والحادث كان شبه قوي ومن قوة الصدمه والله انه في مره مسكينه تمت واقفه ما قدرت تمشي لين تطمنئت على الشخص المصاب وكان في مصاب وهالمصاب من حياة الروح طلع من الدريشة وطاح على الارض بس فيه ضربه في راسه واتصلت في الاسعاف وتم معاي يعلمني شسوي ويسالني وين الرضوض الي فيه والاصابات وقالي خله على حالته لين توصل سيارة الاسعاف وتميت منتظر لين اوصلوا وعقب سالتهم تبون مني شيء قالوا لا ..

وحالات كثيرة وعن الامور الثانية صادقه في ناس ان شافوا واحد فقير وسيارته على قد حاله محد وقف له وسحبو عليه ولو واحد راهي وداق دنجر بس على جمب وقفوا له على طول ونفس الحالة بعد بخصوص البنات بنت متعطلة ذاك اليوم قدامنا موترها ما يمشي تخيلي مسكين رفيجي وقف لها يقول لها تبين شيء ولا بطلت له الجامه اشدعوة هي جزاتنا وقسم بالله انه رفيجي من الحره ادبغه على وجهها وحرك قال طز هذه جزات الي يسوي خير حق هالاشكال احسس اطلعت من قلبه صح مسكين

كان يبي الاجر وراح الاجر عقب ما عصب ..


وفي حالات كثيرة الناس قامت تخاف تركب ناس غرب او تساعد ناس غرب لا تلومين البعض من القصص الي قاعده تسمعها



الله يحفظنا ويحفظكم ويحفظ من على ارض قطر والمسلمين آجمعين

[بنت مريخ]

العام في فيلاجيو محل اتش اند ام
ولدي عمره ثلاث سنوات طلع و خلاني في المحل دورته في المحل ماحصلته
حصلته واقف يصيح جدام البحيره والناس يمرون صوبه ولاهمهم الى يسولف مع رفيجه ويضحك
و الى يمرون يطالعونه ويمشون عنه
لين الحين منصدمه
ماقهروني الا اثنين قطريين مرو عليه يطالعونه ويضحكون و مشوا عنه
يارب لاتبلينا

[shadad]

جزاك الله خير . امس واحد بنشر قدام بيتي من الجهه الثانيه من الشارع شفته وانا رايح لطريقي للصاله. رحت له وحاولت افك تاير سيارته ما في فايده ..خليت سيارتي عنده ورحت مشي لبيتي وجبت العده وبعد ما ركب الجيك عنده ..ـاكدت لما قال لي ان ولده بيجي وقتها دقيت سلف ورحت الصاله .
مو كل الناس مثل بعض . يعطيك العافيه .

[حسن]

شدعوه ليش الخوف من المسألة القانونية

مجرد أخذ بيانات ثواني ايش المشكله

احنا مهب دوله بوليسية مثل ماقرات من الردود
انا الاد نفيع

وصف يضرب به القطري الأصيل
ماذا دهاكم ياقوم
قبل فتره ذكرت قصتي مع الولد الأفريقي اللي لقيته وبلغت وانتظرت الدورية والحمدلله طلع أبوه وسلمت بعد أخذ بياناته الشخصيه
وانا اللي قمت بها وزدت الجهات الأمنية بذالك
كنت في ألمانيا وفي شارع المشاة
واذا بطفله في وسط الساحه بين الألف من البشر
واقفه تبكي ذهبت لها ووقفت معاها وسائلها وهديت من روعها وانتظرت وانا أتلفت بين العامة
وكانت سعوديه
لايتجاوز عمرها السنوات
وبعد ربع ساعه واذا برجل يخطفها بلمه وضمه قويه
إذ كان أبوها ماتخيل منظر الفزع في عينيه
شكرنا وحرصنا عليه وطلبنا منه ترك عنوان السكن والاسم ورقم الهاتف مع الأطفال
أفضل

اللي فيه النخوة بقطر ولا خارجها

انها تسري بالدم يابشر

قال أخاف من المسائلة القانونيه

جببولي أكبر محقق في العالم

:)

هذه

رؤيتي

[رهج السنابك]

دانه قطر
والله بقطر وكلها صارت لي :)

[MirusS]

يحيكم مواقفكم أكشـنها :( هع هع

الله يحفظكم من كل شر ويديم نعمة الامن والسلام علينا جميعاا

[سميسمة كافيه]

للحين في الناس خير
بس احيانا لو تبغي تساعد تجيك مصيبه
يا يتبلون عليك يا تبتلش بمشكله ويتهمونك او اي شيء
واذا حرمه محد يتركك الكل يظن فيك ظن السوء

بصراحه ما يقصرون الشباب
والحمد لله نوقف اذا الموقف يساعد
الخير باق يا بنت الكرام

كلام سليم