مطلوب شركة مقاولات لبناء فيلا

[Fahad Alqahtani]

السلام عليكم ورحمة الله وبركاته

كما هو موضح بالعنوان ، مطلوب شركة مقاولات لبناء فيلا عن طريق بنك التنمية.

الموقع في المعراض، ومساحة المبنى الكلية 832 متر مربع ، مساحة الارض 960

والبناء يكون تسليم مفتاح

ويفضل ترشيحات العملاء للشركة

وشكرا

[معماري قطري]

الله يوفقك .. موقعك قريب للصناعية ومن أَفضل المواقع لسهولة الوصول .. يبقى ترتيب العقد والرسومات والمواصفات والله يوفقك في مقاول شاطر .. للأَسف كل اللي اعرفهم مشغولين وبعضهم غاليين .. لو ما يهمك السعر وايد شوف كونسيرف .. موقعهم في السد فوق بوكيه للأَقمشة ولا جي ال سي وموقعهم فوق فوشون من ورا.

لاحظت كثيرين من أَول سعر ما يرجعون للمقاول وهذا غلط .. المفروض المفاوضة ومناقشة السعر مع عدة مقاولين وبعدها ما يسمى ضربهم في بعض بحيث تاخذ عرض سعر مقاول مب مرتاح له وتروح للي مرتاح له وتقول له شوف عندي عروض أَحسن وتحاول فيه ينزل سعره وممكن تعدل شوي في المواصفات أَو تشيل بعض الشغلات تخليها عليك .. مثال الأَبواب والنوافذ بس تشترط إِنه يسوي الفتحات بدقة وبقياس صح ويعبي الطابوق اللي في الحواف بالخرسانة وتركب براحتك .. الدرايش قبل والأَبواب ممكن آخر شيء .. والأَبواب كثيرين الحين يسونها جاهزة بالكامل ومصبوغة في ورشة خاصة وتتركب بقراطيسها ما تشيلها الا قبل السكن والتنظيف.

[Fahad Alqahtani]

مشكور اخوي معماري وما نستغنى من نصائحك ،، بالنسبة للسعر عز الله انه مهم بالنسبة بس مهب معناه اني أفضل السعر على الجودة ولا معناه اني أعلن افلاسي بعد ما اسكن البيت ،، ان شاء الله ألاقي مقاول جيد ون شاء الله مع الإشراف الجيد بيزيد من جودة البناء ،،وهذا بيت العمر لازم الواحد يفكر قبل اي قرار يتخذه ويستشير اهل الخبره من امثالك .

[معماري قطري]

مشكور اخوي معماري وما نستغنى من نصائحك ،، بالنسبة للسعر عز الله انه مهم بالنسبة بس مهب معناه اني أفضل السعر على الجودة ولا معناه اني أعلن افلاسي بعد ما اسكن البيت ،، ان شاء الله ألاقي مقاول جيد ون شاء الله مع الإشراف الجيد بيزيد من جودة البناء ،،وهذا بيت العمر لازم الواحد يفكر قبل اي قرار يتخذه ويستشير اهل الخبره من امثالك .

الله يوفقك .. ممكن مع نزول الأَسعار شوي هالأَيام يكون فيه متنفس والبنيان سهل لو فيه استشاري زين ومتابع زين ومواصفات ورسومات واضحة .. اللي يبي يحفظ بنيانه من عوامل الجو يركب عازل حراري بحيث يغلف البيت بالعازل خرسانات وطابوق .. يركب درايش معزولة بعد عن الغبار والصوت والحرارة .. يستعمل حديد مغلف .. المصبوغ مثل ما يسمونه ولا هو تغليف بقشرة تمنع الصدأَ .. ما يهتم بالشكل على حساب المتانة والصمود .. وما يروح للتعقيد الزايد ويترك البساطة المريحة .. مثال التكييف كل ما بالغت فيه كل ما دخلت في مشاكل مستقبلية وخساير ولو حاب اللي بدكت ركب لغرف النوم المهمة والأَماكن اللي بتكون فيها طول اليوم .. الباقي شوف سبلت نوع زين أَفضل لك .. الحجر أَما تركب نوع زين وتركيب ميكانيكي لو حاب أَو تنساه وتصبغ صبغ أَبيض نوع ممتاز مثل جوتاشيلد وتنسى الحجر وتكلفته.

من رايي غرف النوم ضروري تسوي مع كل غرفة غرفة ملابس اللي بباب تدخل فيها وتمشي وتختار بدون أَبواب للكبتات داخل وبحيث تكون تكفي لملابس على الجهتين مع بعض الأَدراج والرفوف لو حبيت وحتى صندوق تجوري .. عرض 1.8 متر كفاية 60 سم للملابس و60 ممر و60 ملابس على الجهة الثانية .. ولو تبي تقسم غرفة عندك تقدر تقسمها بحائط طابوق 10 سم خفيف .. ممكن لو تبي الطيني يكون تقريباً ربع الطابوقة العادية في الوزن ولو تبي الأَبيض الخفيف اللي يسمونه السيبوريكس لو تركب 10 سم بيجيك وزنه يقارب سدس وزن الطابوقة العادية 20 سم.

الكهربه خذ أَفضل ما في السوق ولا تنسى تمر الدرويش وغيرهم من الموردين الكبار .. الخسارة في الكهرباء وتجهيزاتها ربح على المدى الطويل .. وإِهتم بمقاول كهربه زين واستشاري عنده كهربائي يتابع .. مهندس كهربه يعني وابتعد عن المهندس الشامل بتاع كله.

[معماري قطري]

لو ما سويت مناور سقفية خصوصاً للصالات والممرات حاول تضمنها في التصميم أَو تطلب من المقاول يسويها النور حياة.

[Fahad Alqahtani]

الشكر متواصل لك اخوي العزيز .. ومثل ما قلت الخسارة في الكهرباء ربح على المدى البعيد .. ومن اولياتي في الجدوة هي الكهرباء والعازل المائي .

[الكواري 1972]

بالتوفيق ان شاءالله

[Fahad Alqahtani]

بالتوفيق ان شاءالله

اجمعين ان شاء الله