ابي اطلب رنقات من موقع.. حد جرب؟

[الـخـور]

السلام عليكم ورحمة الله وبركاته

بغيت نصيحتكم ياخوان..

ودي اطلب رنقات من احدى المواقع.. بس مادري هل يدخلون قطر لاني سمعت ان الجمارك صارو صعبين

حد جرب يطلب من موقع .. ويعطينا تجربته

[Aaziz]

على كل رنق لازم تجيب قيد منشأه ،، هذي اشتراطات المواصفات و المقاييس

مابي اتكلم في هالموضوع عشان ما اقول شي اندم عليه

[al saad]

الشيخ وزنهم اغلى منهم في الشحن نصيحه روح دبي ولا الشارقه وبتحصل العجب ويتجربهم يركبون ولا لا لنه بعض الرنقات يحكون في البدي مع السكان ولا في الدرام ويل

[الـخـور]

اخوي عزيز مافهمت شالمواصفات الي يبونها


السعد .. انا مابي رنقات تجارية دبي اغلبه تجاري .. مو مشكله ادفع شوي عشان احصل الاصلي

[Aaziz]

الخور ،، طال عمرك وزاره الاقتصاد و التجاره شدت حيلها بطريقه خاطئه و حطت شروط و طلبات تعجيزيه و كثير منها مبالغ فيه لدرجه كبيره جدا عليك انت كمواطن و ايضا على التجار و هالشي حرمك كمواطن انك تستورد بعض الاغراض لاستخدامك الشخصي و تسبب علينا ايضا ان التاجر عشان يورد بضاعته العاديه يظطر يدفع مبالق وقدرها لاستخراج شهادات قيد منشئه و طلبات اخرى كثيره .
قضايا كثيره مرفوعه الان في المحاكم بسبب هذا التصرف الخاطيء و اذكر كانت فيه اتصالات و شكاوي في وطني الحبيب صباح الخير بهذا الخصوص .
انا و الربع كنا نجيب تاير الميشلان ب 800 ريال مقاس 20 من الوكيل في امريكا و تاريخ تصنيعه ماعدى عليه شهر او شهرين و يباع في الدوحه ب 1500 و تاريخه من سنه مصنع ،،،، هالكلام من 4 سنوات او 5 ,, الان اظطر ارسل التواير لاحد المعارف من دول الجوار و اروح اركبهم عنده و الرنقات ايضا طبقو عليها نفس الشي .
من شهر واحد من الربع لف الدوحه يبي تاير 20 لموتره النيسان مالقى ،، يبي تاير واحد فقط لانه ضرب رصيف و الوكيل ماعنده ؟ هل يظطر يركب اربع تواير من ماركه ثانيه في هالحاله ؟

واحد من الربع يشارك في سباق الحلبات و الدرغ ريس ،، يطلب تواير (سليك تاير) تواير مخصصه للحلبات تستخدم لسباق واحد تقريبا وهي تواير معروفه لاهل التخصص و تصنعها شركات عالميه كبيره منها دنلوب و بيرلي ،، هالتواير مايكون عليها تاريخ تصنيع و بعضها بالطلب ،، تطلبه و يتصنع لك .. ربعنا في الجمارك مانعين دخولها ،، يقول لك ماعليها تاريخ تصنيع ،، طيب الله لايهينك ماعندك شخص مختص مافيه تلفون تسئل ؟ فيه نت ادخل اكتب اسم التواير و في خمس دقائق بتفهم الوضع البضاعه الي واصلتك ،، خصوصا انهم اربع تواير لاستخدام شخصي .

المهم احنا كافراد تضررنا بشكل كبير في موضوع التواير و الرنقات ،، الطلب من النت اوفر بكثير و عندي مجال الاختيار واسع و الجوده عاليه جدا ،، شركات كبيره متخصصه بتصنيع الرنقات و التواير من عقود مضت و الاخوان يقولون جيب لنا اوراق قيد منشأه ؟ شدخلني انا ،، ادخل على النت و اكتب اسم الركه و ادخل موقعهم و شوف مستوى الشركه ،، و قارنه مع محلات الرنقات الي عندك في الدوحه على خط سلوى صوب البنغال هناك .

المهم طال عمرك .. عندك حالين ،، اما تطلبهم و تطرشهم لحد في الامارات او البحرين او السعوديه و تروح تركبهم هناك .. او انك تجازف و تطلبهم و انت و همتك وياهم .
فيه حل اخير ،، بنشريه خط سلوى الي عند جسر الصناعيه :rolleyes2:

[ya3coub]

أخوي الخور شنو نوع الرنقات الي تبيهم ومن اي شركة ؟؟


اذا في منهم فالدوحة لناس طلبوهم من النت توكل على الله لأن موجودة مواصفاتهم بالمواصفات و المقايس و ايضا غير ذلك تأكد منهم عن طريق الإتصال برقمهم

الحين ببعث لك رابط على الخاص لموضوع انا حطيت فيه معاناتي مع هيئة المواصفات و المقايس بإدخال طقم رنقات غير موجود بالخليج و كانت علي ارضيات بالقطرية و معاناة

فكله يعتمد على اسم الشركة و النوعية الرنقات و بفيدك بما اني عانيت معاهم فوق الــ3 شهور

[الـخـور]

اشكرك اخوي عزيز على توضيح مسالة التواير ... صراحة شيء محزن جدا
ودي اطلب رنقات من ماركة معروفه فامريكا ومشكلة الدوحة ماعاد في محلات يبيعون رنقات حلوة... ولو في تلقى الاسعار دبل
----------------


اخوي ya3coub ... الله يجزيك خير
انتظر منك التفاصيل
والرنقات الي ابيها من ماركة dub و Savini
ودامك مريت بمثل هالتجربة فياريت تفيدني من خبرت او ارقام الجهات الي اتواصل معهم لاعرض عليهم قبل لاطلب واتوهق
وجزاك الله خير

[LiL iNVe$ToR]

من شهر جبت رنقات من امريكا ..والاجراءات كانت سهله ..ماتعطلت لان الرنقات اصليه ومادخلت المواصفات والمقاييس.

[الـخـور]

من شهر جبت رنقات من امريكا ..والاجراءات كانت سهله ..ماتعطلت لان الرنقات اصليه ومادخلت المواصفات والمقاييس.

تسلم عالافادة ...
راجع الخاص اخوي

[saud580]

أخوي ترى الموضوع سهالات انا جايب رنقات 22 حق الرنج مرتين مره تجاريه و مع التواير و مره اصليه و مع التواير بعد مافي اي شي ولا اي تعقيد

اهم شي اذا ماتبي تعور راسك الي بيشحنهم لك خل يكتب اغراض شخصيه

لان اذا كتب تواير هذي لازم تمر على المواصفات و المقاييس

[فقط قطر]

مابي اتكلم في هالموضوع عشان ما اقول شي اندم عليه

خير اخوي...تراها الا رنقات....ايش دخل الندامة والتحسف في الموضوع