موضوع متجدد: قصتي مع السمنة و قص المعده

[venum]

السلام عليكم ورحمة الله و بركاته




هنا راح انزل لكم قصتي مع عملية قص المعده او التكميم اختلفت الأسماء لكنها نفس الشيء
و بحدث الموضوع باخر المستجدات و المعلومات و كل شيء يصير معاي من الألف الى الياء
واتمنى من كل شخص سوا هالعمليه او مهتم فيها يشاركنا





بعد سنوات عديدة من المعاناه مع السمنة

و بعد الكثير و الكثير من المحاولات الفاشلة لانقاص الوزن

قررت اسوي قص معده.


قبل ما ابدء فالموضوع راح اعطيكم شوية معلومات عني

وزني 112 و طولي 167 و كتلة الدهون 40%

انا انسان رافض اسوي هالعملية و الكل يحن علي اسويها

طبعا انا كنت ملتزم في رياضه و ماخليت دايت او ادويه ماخذتهم

قبل 3 شهور صار عندي انزلاق قضروفي فالظهر و دسك و وقفت تمارين وكل شيء

و كلام الدكتور قال هذي مشكلته الوزن لازم تنزل لكن نفسيتي من عقب الدسك اختربت

طبعا حزتها مافكرت في عملية التكميم

السبب اللي خلاني اسوي التكميم انه عندي ضغط عالي و توني في بدايه السكر و الحمدلله على كل حال

فكرت فالموضوع كل مره اقول لا مابسوي عمليه و بمشي على نظام صحي و رياضه تمر الأيام و الأسابيع و الحاله ماتغيرت

فقررت اخيرا اسوي عمليه عقب الأستخارة و اخذ راي الاهل و الاصدقاء.

وسويتها.


يتبع

[النهار]

متابع اخوي

[QATAR 77]

نفس حالتك و افكر بالعملية

[venum]

متابع اخوي


اتشرف فيك


نفس حالتك و افكر بالعملية

استخير ياخوي ولاتستعجل بنفس الوقت لاتخلي الناس يخوفونك منها بدون سبب و الله يوفقك

[venum]

قررت اسوي العمليه






شهر 11 كلمت مستشفى الأهلي استفسر عن العملية قالو لي لازم تاخذ موعد مع الدكتور الأستشاري و اقرب موعد كان يوم 6-12-2014

اخذت موعد مع الدكتور

يوم الموعد رحت المستشفى و دخلت عالدكتور و استفسرت منه عن العمليه و نصيحته

بعد الأستفسار تطمنت و قلت بسويها,,

كلمت الدكتور انه يحاول يشوف لي موعد قريب لانه انا ادرس و كان الفاينل عندي اخر يوم في نص شهر 12 وبرجع للدوام يوم 12-1-2015

قالي الدكتور انت وشطارتك بعطيت تحويله على دكتور التغذيه و دكتور النفسيه و طلب مني فحص دم شامل و فحص اشعة الصدر و فحص المعدة اشعة باريوم ( اشعه ملونه) و تلفزيون

طلعت من الدكتور و سالت الأستقبال عن التحويله قالو موعد لكن الحمدلله نفس اليوم دخلت على دكتورة التغذيه و قالولي تعال اليوم الثاني الصبح عشان دكتور النفسيه و مريت على قسم الأشعه و قالو تعال بكره حق الفحوصات لكن مافي موعد تلفزيون قريب, طلبت منهم اكلم دكتورة التلفزيون ورحت لها وقلتلها انا موعد الاشعه مالتي بكره و انا طالب ابي الحق اخلص قبل لا ابدء التيرم الجاي الي هو هالشهر و جزاها الله خير ماقصرت و قالت تعالي بكره و انت صايم قبل الاشعه


ثاني يوم الصبح تاريخ 7-12 رحت لهم صايم و قابلت دكتور النفسيه و سويت الاشعه و التلفزيون و رجعت البيت

بعدها باسبوع كلمت المستشفى بخصوص الموافقه من صحه قالولي الاوراق ما ارسلناها لانك لازم تشوف دكتور التخديرقبل و للأسف محد بلغني

عطوني موعد وياه ثاني يوم و قابلته

بعدين اكدت عالمستشفى عشان يطرشون اوراقي لتامين صحه

بعدها بثلاث ايام اتصلوا علي من المستشفى و قالولي صحه ارفضو لانه اوراقي ناقصه يبوني اسوي تحليل بول وانتم بكرامه

رحت سويت التحليل و بعدها بيومين جات الموافقه و لله الحمد

بعد الموافقه رجعت للاستشاري عشان تحديد موعد العمليه و قال لي اقرب موعد يوم 20-1 و الموعد بالنسبه لي بيكون بعيد و داخل ع وقت الدوام و كلمت الدكنور يشوف لي موعد غيره والحمدلله كان على حظي في موعد تكنسل و حددوا لي بداله

يوم 8-1 و سويت العمليه و الحمدلله



يتبع

[فيصل الفيصل]

الحمدلله على كل حال وعلى سلامتك
ان.شاء الله يكون موضوعك مرجع لكل شخص حاب يسوي العملية

[رهج السنابك]

اهلا بك في عالم الرشاقه يالدب : )

[venum]

الحمدلله على كل حال وعلى سلامتك
ان.شاء الله يكون موضوعك مرجع لكل شخص حاب يسوي العملية

ربي يسلمك من كل شر اخوي, واتمنى ربي يقدرني و اخدم اخواني و اخواتي فهالمنتدى بذكر قصتي لهم.

اهلا بك في عالم الرشاقه يالدب : )

تسلمين اختي, ماهمتنا الرشاقه الواحد يدور صحته

[..er..]

الحمدالله ع السلامه ..

وموفق خير ان شاء الله .. ونشوفك تطامر وتناقز ان شاء الله :p

[ابوعلي]

الحمدلله على السلامة اخوي

ومتابع

[نفسي عزيزه]

الله يبلغك مرادك اللهم امييييييين

[راشد محمد]

الحمد لله عالسلامه

[ودي أكون]

الحمدلله عالسلامه اخوي

[venum]

الحمدالله ع السلامه ..

وموفق خير ان شاء الله .. ونشوفك تطامر وتناقز ان شاء الله :p

الله يسلمك ياخوي


الحمدلله على السلامة اخوي

ومتابع

الله يسلمك اخوي


الله يبلغك مرادك اللهم امييييييين

جزاك الله خير عالدعوه الطيبه ولك بالمثل يارب


الحمد لله عالسلامه

الله يسلمك اخوي

[venum]

يوم العملية



صبحكم الله بالخير,, ونكمل الموضوع



طبعا بعد تحديد الموعد الممرضة عطتني بعض التعليمات,, اول شيء لازم اصوم عن الأكل قبل العملية بيومين واصوم عن الشرب ليلة العمليه

المهم,, ليلة العمليه مانمت من التوتر و رحت لهم مواصل الصبح و دخلوني الغرفه .

كان على كلامهم انه عمليتي بتكون الظهر او العصر, لكن ما حسيت فيهم الا الممرضه داشه علي الساعه 11 تقولي عمليه :rolleyes2:

نزلوني وكنت في قمة التوتر وصلت لمرحلة قمت افكر اشلون اشرد من المستشفى :eek5:

ودوني صوب العمليات و حطوني في غرفه تجهيز العمليه والممرضه خلتني و راحت وتميت ربع ساعه اسمع اصوات الممرضين داخل غرفه العمليات يجهزونا

المهم هالربع ساعه مابغت تعدي,, مر علي الجراح يشوفني قبل العمليه ويقولي لاتخاف كل شي تمام و ان شاءالله امورك طيبه و انا حزتها قلبي يرقع يمشي ميتين

الدكتور طلب من دكتور التخدير يعطيني ابره مهدئه وو عطوني الابره و عقب حسيت اني ريلاكس عالاخر و كنت مستانس بعد ههههههههه :shy::nice:

دخلوني غرفه العمليات و كل شوي تجيني ممرضه تسال عن اسمي, و فالاخير رفعت يدي و قلتلهم بصوت عالي هلووو ماي نيم از حمد :telephone: تاثير الابره :nice:

المهم الممرضه الهنديه تسندرت مني و تقولي يو وانت تو سليب وانا اقولها نو و فالاخير اقنعوني وحطوا الماسك في ويهي و عقب نمت




يتبع

[white bird]

الحمدلله ع سلامتك آخوي ..
و آن شاءالله توصل للوزن اللي ودك فيه بصحة و عافية ^-^ ..
آما يوم العملية ههههههههههههه
و الآبرة دخلت مزاجي بتنفعني وقت الآمتحانات :happy:

[الحياة الخالدة]

الله يعطيك الصحة و العافية أخوي حمد

كمل واحنا معاك

[venum]

الحمدلله ع سلامتك آخوي ..
و آن شاءالله توصل للوزن اللي ودك فيه بصحة و عافية ^-^ ..
آما يوم العملية ههههههههههههه
و الآبرة دخلت مزاجي بتنفعني وقت الآمتحانات :happy:

ربي يسلمك اخوي مدري اختي :shy:

الابره مالها حل من الاخر :secret::nice:


الله يعطيك الصحة و العافية أخوي حمد

كمل واحنا معاك

اله يعافيج اختي و ان شاء الله مستمر فالموضوع عشان افيد اخواني و خواتي اعضاء المنتدى

[حسن]

الحمدلله على السلامه

بس معلومه للجميع البعض يفكر ان العمليه تقضى على السكر والضغط وهي عامل مسبب فقط
لان بعد العمليه وقف الاكل بنسبه 90% فشي طبيعي كل شي ينزل
وعندي مثال اخوي بعد علاج شنوات طويله مع السكر والضغط والكلسترول وبعد مانزل وزنه وبدون عمليه ولا رياضه
بس قل اكله وانتهي كل شي والدكتور سكر ملفه وقال لا عاد يراجعني الى هذه اللحظه
الحمدلله

[رهج السنابك]

يومين صيام؟ يعني كلش لا اكل ولا شرب يومين
يالهي من بيتحمل

[مراد2015]

الحمدلله على السلامه

بس معلومه للجميع البعض يفكر ان العمليه تقضى على السكر والضغط وهي عامل مسبب فقط
لان بعد العمليه وقف الاكل بنسبه 90% فشي طبيعي كل شي ينزل
وعندي مثال اخوي بعد علاج شنوات طويله مع السكر والضغط والكلسترول وبعد مانزل وزنه وبدون عمليه ولا رياضه
بس قل اكله وانتهي كل شي والدكتور سكر ملفه وقال لا عاد يراجعني الى هذه اللحظه
الحمدلله

كلامك عدل عملية القص بس سبب في نزول السكر ومثل ماقلت شي طبيعي ينزل السكر مافيه اكل ومحدود الله يشفي جميع المرضى

[الأصيلة]

الحمدالله على السلامة
أخوي ممكن نعرف اسم الدكتور اللي عمل لك العملية ؟

[U Welcome]

تستاهل السلامة أخوي حمد

ومتابعين للتكملة

[زقرتي ومزاجي]

متابع :)

[venum]

الحمدلله على السلامه

بس معلومه للجميع البعض يفكر ان العمليه تقضى على السكر والضغط وهي عامل مسبب فقط
لان بعد العمليه وقف الاكل بنسبه 90% فشي طبيعي كل شي ينزل
وعندي مثال اخوي بعد علاج شنوات طويله مع السكر والضغط والكلسترول وبعد مانزل وزنه وبدون عمليه ولا رياضه
بس قل اكله وانتهي كل شي والدكتور سكر ملفه وقال لا عاد يراجعني الى هذه اللحظه
الحمدلله

الله يسلمك اخوي حسن، وكلامك صحيح مانختلف عليه و يستاهل السلامه اخوك، و بالنسبه لي سويتها عشان الدسك

[venum]

يومين صيام؟ يعني كلش لا اكل ولا شرب يومين
يالهي من بيتحمل

يومين صيام عن الاكل اختي بس مسموح بالسوائل

[venum]

الحمدالله على السلامة
أخوي ممكن نعرف اسم الدكتور اللي عمل لك العملية ؟

الله يسلمج اختي الاصيله، سويت العمليه عند الدكتور فوزي جادالله

[venum]

تستاهل السلامة أخوي حمد

ومتابعين للتكملة

الله يسلمك اخوي ولكم و اتشرف بمتابعتك

[venum]

متابع :)

ياهلا فيك :)

[venum]

كلامك عدل عملية القص بس سبب في نزول السكر ومثل ماقلت شي طبيعي ينزل السكر مافيه اكل ومحدود الله يشفي جميع المرضى

اللهم امين

[venum]

اعتذر عن التاخير في الردود و تكملة الموضوع ،، للحين فالمستشفى و اغلب الوقت نايم من الادوية، و اشكر جميع من مر على الموضوع و لاتنسونا بدعواتكم

[رهج السنابك]

عشان يصير موضوعك احلا ومشجع اذا تقدر حط صور قبل وعقب بعد شهرين ثم كل فتره نزل صوره طبعا ممكن تخفي الوجه

[رجل مثالي]

ممكن بالرياضة والمشي يعني رياضة
المشي بشكل يومي و
على استايل طعام ريجيم أفضل
والاشتراك في محل الجم الرياضي
افضل من العمليات

[venum]

عشان يصير موضوعك احلا ومشجع اذا تقدر حط صور قبل وعقب بعد شهرين ثم كل فتره نزل صوره طبعا ممكن تخفي الوجه

ان شاءالله

[venum]

ممكن بالرياضة والمشي يعني رياضة
المشي بشكل يومي و
على استايل طعام ريجيم أفضل
والاشتراك في محل الجم الرياضي
افضل من العمليات

صحيح كلامك اخوي، بس يشهد الله كنت امشي عالدايت و رياضه و مشي كل يوم لفتره طويله ينزل من وزني ظ¥ كيلو و يردون لي في اسبوع المشكلة ياخوي ترا كل شخص غير عن الثاني في ناس عندهم حرق السعرات يختلف عن ناس المتابولسم يختلف من شخص لثاني، و في ناس مشكلتهم من الغده. و قدر الله ماشاء فعل و اشكرك على مداخلتك .

[venum]

بعد العملية





مساكم الله بالخير،، نكمل وش صار عقب العمليه




صحيت من البنج في غرفة الافاقه و الشيء الو حيد اللي اذكره الوالده الله يحفظها كانت عندي و يوم شفتها استانست و خنقتني العبره الله لايحرمني منها. طبعا عقب نمت و صحيت كنت فالغرفه يمكن تقريبا عالعصر. طبعا اول يوم عالمغذي حاطين ادوية مسكنه للالم و كان ممنوع من الاكل و الشرب. اول يوم الالم كان غير مستحمل خصوصا اول ماصحيت من البنج اذكر اني كنت مب قادر استحمله بس يوم حطو لي مسكن الالم في المغذي صار الالم مقبول يعني مقدور عليه.


العمليه منظار 3 فتحات و فيه فتحه رابعه طالع منها القسطره و للحين ماشالوها. ثاني يوم زارني الدكتور الصبح يوم الجمعه و طمني الحمدلله و كلامه يريح قالي الامور الحمدلله وسمح لي اشرب ماي بس 30 مل كل ساعه :rolleyes2: والحمدلله احسن من لاشيء.

طبعا الحمدلله قدرت امشي و ادش دورة المياه ونتم بكرامه و المشكله الوحيده اللي مسببه الالام كان موضوع الغازات في البطن تكرمون.

اليوم الثالث الي هو اليوم نزلوني اسوي اشعه للمعده عشان يتاكدون مافي تسريب و لله الحمد الاشعه زينه و رجعت نمت. قعدت قبل شوي و حصلت اكل فالغرفه :omg:

سالت الممرضه قالت هالاكل لك الدكتور سمح لك تاكل طبعا اقصد بالاكل شوربه ماي و جلي و عصير بطيخ.

عصير البطيخ ماله حل :nice:

الحمدلله، اشرب بالراحه عالخفيف و مافي احساس بالجوع لكن شوية الالام فالبطن و الادويه شغاله.




يتبع اذا طلعت بالسلامه ان شاءالله ،، لاتنسونا من دعواتكم

[MirusS]

أهم شي الحمدلله على سلامتك يالذيب
ولا تحاول تجهد نفسك وايد هالايام

[ابن التويم]

الله يسهل عليك و شوي شوي ترجع تمارس حياتك الطبيعيه بس بالشكل الجديد طبعا :)

[محمد عبدالرحمن]

اخونا الكريم venum، الحمد لله على سلامتك و كل انسان صالح أجرى أي عملية، اذا ممكن رقم الغرفة علشان نقوم بالواجب الشيخ.

تحياتي،
محمد عبدالرحمن

[النظامي]

الحمد لله على سلامتك يا venum،

واهم شي حبوب الفيتامينات لا تتركها واستمر عليها لأنها تعوض النقص اللي حصل بعد العملية

وننتظر منك الاجمل

[qtr-1st]

http://3lnar.com/%D9%88%D9%81%D8%A7%D8%A9-%D8%A7%D9%84%D8%B4%D8%A7%D8%A8-%D8%A7%D9%84%D8%A8%D8%AD%D8%B1%D9%8A%D9%86%D9%8A-%D8%A8%D8%B9%D8%AF-%D8%B9%D9%85%D9%84%D9%8A%D8%A9-%D8%B1%D8%A8%D8%B7-%D8%A7%D9%84%D9%85%D8%B9/

[رجل الجزيرة]

هذولا مشكلة الناس إلي عندهم السكر عالي كله مستعجلين، الله يرحمته ويثبته بالقول الثابت اللهم آمين يا رب العالمين.

[][ الوحيد ][]

اهم شي الفيتامينات و الكالسيووم ,, و اذا بديت تاكل لازم تفضل الاشيااء الصحيه !
و اهم شي ماتشرب و تاكل في نفس الوقت ..
ويبيلك فتره لين تصيد ميزانيه المعده الجديده ,,

و تستاهل السلامه

[venum]

أهم شي الحمدلله على سلامتك يالذيب
ولا تحاول تجهد نفسك وايد هالايام

الله يسلمك ياخوي


الله يسهل عليك و شوي شوي ترجع تمارس حياتك الطبيعيه بس بالشكل الجديد طبعا :)

اللهم امين, جزاك الله خير


اخونا الكريم venum، الحمد لله على سلامتك و كل انسان صالح أجرى أي عملية، اذا ممكن رقم الغرفة علشان نقوم بالواجب الشيخ.

تحياتي،
محمد عبدالرحمن

الله يسلمك يالشيخ عزيز وغالي ماتقصر ياخوي وان شاءالله بيرخصوني اليوم


الحمد لله على سلامتك يا venum،

واهم شي حبوب الفيتامينات لا تتركها واستمر عليها لأنها تعوض النقص اللي حصل بعد العملية

وننتظر منك الاجمل

الله يسلمك ياخوي و ان شاءالله بمشي عليهم

[venum]

http://3lnar.com/%D9%88%D9%81%D8%A7%D8%A9-%D8%A7%D9%84%D8%B4%D8%A7%D8%A8-%D8%A7%D9%84%D8%A8%D8%AD%D8%B1%D9%8A%D9%86%D9%8A-%D8%A8%D8%B9%D8%AF-%D8%B9%D9%85%D9%84%D9%8A%D8%A9-%D8%B1%D8%A8%D8%B7-%D8%A7%D9%84%D9%85%D8%B9/

الله يرحمه و يغفر له..

و كل شيء بيد رب العالمين ياخوي تعددت الأسباب و الموت واحد

[venum]

هذولا مشكلة الناس إلي عندهم السكر عالي كله مستعجلين، الله يرحمته ويثبته بالقول الثابت اللهم آمين يا رب العالمين.

اللهم امين


[ الوحيد ][;9922199']اهم شي الفيتامينات و الكالسيووم ,, و اذا بديت تاكل لازم تفضل الاشيااء الصحيه !
و اهم شي ماتشرب و تاكل في نفس الوقت ..
ويبيلك فتره لين تصيد ميزانيه المعده الجديده ,,

و تستاهل السلامه

الله يسلمك اخوي ولاهنت عالنصايح ان شاء الله بمشي عليها

[يمامـة]

الحمدلله على السلامة ويا الله يكتب لك الخير من العملية و ما عليك من المحبطين يمينك ويسارك ..

المهم تعرض للشمس ولا تنسى اللبن والحليب وابتعد من العصاير المعلبة وخلك على الطبيعي
والشوربات احرص تضاف لها أنواع كثيرة من الخضار الورقية عند ضربها في الخلاط..

[venum]

الحمدلله على السلامة ويا الله يكتب لك الخير من العملية و ما عليك من المحبطين يمينك ويسارك ..

المهم تعرض للشمس ولا تنسى اللبن والحليب وابتعد من العصاير المعلبة وخلك على الطبيعي
والشوربات احرص تضاف لها أنواع كثيرة من الخضار الورقية عند ضربها في الخلاط..

الله يسلمج اختي وماقصرتي عالنصايح ان شاءالله اطبقهم

[بصمة قطرية]

الحمدلله على سلامتك أخوي ..
عليك بالفيتامينات و المكملات الغذائية
أهم من كل شي ..
و الأكل الصحي إبتعد عن الغازات و الدهون و السبايسي ..
الله يبلغك مرادك ..

دخلت مزاجي الإبرة
بقول للدكتور يوم الخميس يعطيني الإبره ..

[venum]

الحمدلله على سلامتك أخوي ..
عليك بالفيتامينات و المكملات الغذائية
أهم من كل شي ..
و الأكل الصحي إبتعد عن الغازات و الدهون و السبايسي ..
الله يبلغك مرادك ..

دخلت مزاجي الإبرة
بقول للدكتور يوم الخميس يعطيني الإبره ..

الله يسلمج اختي,, وماتشوفين شر ان شاء الله

[هيلو كيتي]

الحمدلله على السلامة , اجر وعافية ,, واعرف وايدين من الي سووها ماشاءالله عليهم الحين صحه ورشاقه وجماال :nice:

التزم بارشادات الطبيب والفيتامينات لاتهدها ,

ولاتنسي اتحط صورتك قبل وبعد :victory:

[venum]

الحمدلله على السلامة , اجر وعافية ,, واعرف وايدين من الي سووها ماشاءالله عليهم الحين صحه ورشاقه وجماال :nice:

التزم بارشادات الطبيب والفيتامينات لاتهدها ,

ولاتنسي اتحط صورتك قبل وبعد :victory:

الله يسلمج اختي وان شاءالله بلتزم بكلام الدكتور

بخصوص الصوره قبل و بعد ما اوعدكم :shy::rolleyes2:

[venum]

السلام عليكم ورحمه الله وبركاته







نكمل بعد العمليه ...

يوم الأحد الظهر مر علي الدكتور وطمني الحمدلله الامور كلها طيبه و سوا لي تحليل دم عشان يتأكدون ان الامور زينه

بعد ساعه طلعت النتيجه و كانت زينه الحمدلله و قر الدكتور يشيل القسطره عشان يرخصني اطلع للبيت

الحمدلله شالو القسطره و عطوني موعد عقب اسبوع عشان اشيل الخياطه و متابعه مع الجراح,

الدكتور كتب لي علاج اخذه , حبوب للمعده حبه يوميا لدة اسبوعين قبل الفطور و حبوب مسكنه للألم 3 مرات عند الضرورة بس.

سألت الدكتور عن الفيتامينات قالي مايحاج لاني مسوي قص مب تحوير قلتله فيه ناس اعرفهم ياخذون فيتامينات قال انا اقولك مايحتاج :rolleyes2: المهم شكلي باخذهم :nice:

قبل لا اطلع عطوني التعليمات و نظام الاكل ,الجدول الصراحه اشوفه جيد لاباس به.

المرحله الاولى :

3 ايام سوائل شفافه, مثل الماي و العصير المخفف مثل التفاح و الرمان و شوربات شفافه بدون شي او مرق.

الحمدلله خلصت هالمرحله و دشيت عالمرحله الثانيه.

المرحله الثانية:

المدة اسبوعين.

المسموح: السوائل الشفافه + الشوربه الخفيفه بدون شيء بس مرق + لبن و حليب و زبادي قليل الدسم + كاسترد + مهلبيه + جلي + شاي + يانسون + بابونج

الحمدلله بديت فيهم وكل شيء تمام ولله الحمد

من الاشياء المهمه فالجدول انه اشرب لترين ماي يوميا عشان مايصيدني جفاف لكن لحد الحين مب قادر اكمل نص لتر :(


طبعا الكميه قليله مقدر اكثر و احس بالامتلاء على طول.

بعد العمليه الشيء الوحيد اللي لاحظته ان السكر ينزل عند وايد و يوصل لل 70 وهالشيء محسسني بالتعب وكل ماحسيت السكر نازل اخذ حلاوه مص او اشرب عصير.



وسلامتكم ,, يتبع ان شاءالله

[طموحي عالي]

خذ فيتامين ضروري اخوي*

والا بيصيدك.شحوب وشعرك بيساقط <<< تحاتي شعرها

بس مستغربه انا لان والدتي مسويتها بمستشفى حمد وعلى طول عطوها فيتامينات ومع ذلك تاثر شعرها والبشره

وماتشوف شر يارب

[Al-Kuwari]

خذ فيتامين ضروري اخوي*

والا بيصيدك.شحوب وشعرك بيساقط <<< تحاتي شعرها

بس مستغربه انا لان والدتي مسويتها بمستشفى حمد وعلى طول عطوها فيتامينات ومع ذلك تاثر شعرها والبشره

وماتشوف شر يارب

الفيتامينات يسمونها supplements

يعني مكمل غذائي

تغطي قصور فيتامينات الاكل ولكن ما تغني عن الاكل الصحي او الفيتامينات اللي نحصل عليها من الاكل

فشي طبيعي انها ماتغطي كامل احتاج الجسم خصوصاً بعد العملية وقلة الاكل والاعتماد عالسوائل بكثرة


اخوي venum ما عليك شر واجر وعافية ان شاء الله يالشيخ

عقبال مانشوفك رشيق ان شاء الله

[venum]

خذ فيتامين ضروري اخوي*

والا بيصيدك.شحوب وشعرك بيساقط <<< تحاتي شعرها

بس مستغربه انا لان والدتي مسويتها بمستشفى حمد وعلى طول عطوها فيتامينات ومع ذلك تاثر شعرها والبشره

وماتشوف شر يارب

ان شاء الله باخذ فيتامينات لكن عقب شهر من العمليه
والله يقوم الوالدة بالسلامة ويتمم لها على خير
الشر مايجيكم اختي


الفيتامينات يسمونها supplements

يعني مكمل غذائي

تغطي قصور فيتامينات الاكل ولكن ما تغني عن الاكل الصحي او الفيتامينات اللي نحصل عليها من الاكل

فشي طبيعي انها ماتغطي كامل احتاج الجسم خصوصاً بعد العملية وقلة الاكل والاعتماد عالسوائل بكثرة


اخوي venum ما عليك شر واجر وعافية ان شاء الله يالشيخ

عقبال مانشوفك رشيق ان شاء الله

صحيح كلامك اخوي ماتعوض بالكامل بس تعتبر مكمل غذائي فقط

الشر مايجيك اخوي الكواري و جزاك الله خير

[venum]

عن اذن الادارة الكريمة بحط صورة من حسابي الانستغرام واخفيت الأسم عشان ما اسوي دعاية لنفسي

ردي اليوم على واحد من الشباب في الانستغرام بخصوص العمليه

http://store2.up-00.com/2015-01/1421615061261.jpg (http://www.up-00.com/)

[بصمة قطرية]

الله يسلمج اختي,, وماتشوفين شر ان شاء الله

الشر ما يجيك يارب ..

[بشائر]

الحمد لله على سلامتك اخوي
وجزاك الله خير على هذا التقرير المفصل واللي بيكون مرجع لكل شخص يفكر يسوي العملية وتراوده المخاوف ..
الله يديم عليك الصحة ويمتعك بالعافية والسعادة ..
موفق الشيخ..

[يمامـة]

في نقطة جدا مهمة لكل من يسوي التكميم.. وهي لا تستعجل في سرعة نزول الوزن..

يعني لا تعتبر نزول الوزن بشكل كبيرة في وقت محدد انجاز..

الانجاز انك ما تخلي وزنك ينزل بسرعة كبيرة.. فعدد وجباتك وكثر من اعدادها
وكل في اليوم خمس مرات وجبات قلية او ست او 8 حتى..

المهم الوجبات هذي فيها كل الناصر الطبيعية اللي تفيد جسمك..

فلا تسوي مثل هالناس اللي طاحوا في السيرلاك او البكسويت او الشبس او الكوافي..

واشجعك على قراراك والله يكتب لك الخير ان شاء الله..

[venum]

الحمد لله على سلامتك اخوي
وجزاك الله خير على هذا التقرير المفصل واللي بيكون مرجع لكل شخص يفكر يسوي العملية وتراوده المخاوف ..
الله يديم عليك الصحة ويمتعك بالعافية والسعادة ..
موفق الشيخ..

الله يسلمج اختي الكريمة

وان شاء الله الموضوع يخدم كل من يفكر في العمليه و يكون عند حسن ظنكم.