بغيت افصل جلسة ( مراتب )

[اللوز]

السلام عليكم
اخواني مساعدة لو تكرمتوا
بغيت افصل جلسة ( مراتب ) لجلسة حديقة دائرية
وين تنصحوني بشغل نظيف ومرتب
وهل هناك مواصفات معينة للجلسة
وجزاكم الله خيرا

[بوحارب]

ليش ما تفصل كراسي خشب وتلبسها جلسات شعبية!

[اللوز]

ليش ما تفصل كراسي خشب وتلبسها جلسات شعبية!

مشكور يا بو حارب على المشاركة
انا مسوي في الحديقة جلسة دائرية من اسمنت وابي اركب عليها تلبيس حق الجلسة

[قطر love]

روح محلات التنجيد ورى البنوك شارع حمد الكبير في هناك محلات اختار السدو والقماش والدوشق والاسفنج كله حسب اختيارك تدفع

[صباح]

انصحك
روتانا لتنجيد شارع الريان القديم عنده سوري اسمه سعيد
ممتاز مررره

[نور الحور]

موفق اخوي اللوز .. في محلين ممتازين للتنجيد

برافو بشارع سلوى

وكي اند ايه بشارع سلوى بعد بس الجهة الثانية

[(عبدالله)]

من خلال زيارتي لعدد من المحلات الأسبوع اللي فات على طريق سلوى وسوق الخميس والجمعة

اتضح لي إن معظمهم حرامية وكذابين واستغلاليين إلا من رحم ربي.. وإذا الواحد ما فاصلهم صح ... بيكون ضحية غفلة.. في السعر والمواصفات الفنية (وهاذي الأهم..المواصفات الفنية)... وقبل الاستلام يتأكد من التنفيذ حسب الاتفاق (أنصح يكون كل شي مكتوب بالسعر والمواصفات ومدة التنفيذ والدفعات والتوصيل والتركيب).

مشكلتنا هل قطر ما نناقش ولا نفاصل وناخذ الأمور بالثقة العمياء..

لما أدخل المحل وأناقش وأحكّر .. يزعلون مني ويصرفوني يعرفون إن ماوراي فايدة يستغفلوني أو يقصون علي.. وكذا واحد منهم يقول لي أول مرة يجينا قطري يناقش في هالامور.. خذ وخلاص!!

أولاً: يقولون لي إن القماش سوري... واكتشف إن صيني ولما أحكر له يغير كلامه

ثانياً: الخشب يستعملون انت وحظك هل يستخدمون خشب صلب اندونيسي للهيكل ولا نوع رخيص ما يعمر؟.. والmdf الخارجي هو الوحيد اللي ممكن يصدقون فيه عن نوع الخشب.. لكن صيغ تجاري ..

ثالثاً: يقولون لك اسفنج الجلسة ضغطه 100 في النهاية تكتشف ان حاط ضغط أقل وفوقه طبقة اسفنج

رابعاً: السعر مبالغ فيه جداً جداً.. الجلسة الأرضية (مع دوشق 10-15 سم) تبدأ من 320 ريال !! في السعودية (الدمام مب الحسا لأن الحسا شغلهم أي كلام.. والرياض أرخص وأرخص بعد وشغلهم أفضل) بنفس المواصفات اللي هني تبدأ ب120 ريال!!.. يعني مساحة صغيرة مثلاً 20 متر في الدوحة تكلف 6400-7000 ريال .. و20 متر في السعودية تكلف مع التوصيل 3000-3500 ريال.
بالنسبة لي اذا السعر غالي عندنا لكن مواد زينة وصدق في التعامل ماعندي مشكلة أريح بالي.. لكن شغل تعبان وغالي ومقصوص علي!!

خامساً: ما يعطون ضمان ولا يبون يكتبون شي في الاتفاق من المواصفات الفنية

عموماً.. بمر محلات مقترحة من الأعضاء مثلا برافو وكم محل في سوق واقف ونشوف

والله ييسر