محمد وحمد وقله الادب !!!!!

[حسن]

السلام عليكم جميعا

موضوعي الليله عن وموقف صار امامي في الحلاق


كنت في الحلاق ودخل علي ولدين اعمارهم حروه 13 و14 وابوهم
يطلب منهم يحلقون وهم يعاندون وبقوه وشوي جلسو يحلقون بعد
ماسمعت منهم كلام بذي في حق ابوهم وهم يرداداونه وهو بصوت خافت ينهرهم
شوي الا الود يتهاوش مع الحلاق عن التحديد ويوصف الحلاق بالحمار كرمكم الله
والاب يحلق ساكت
من دخلو مع ابوهم والحديث اللي دار بينهم الصراحه صدمت من تصرفاتهم
مع العلم عرفت الاب ومانتبه لي
المنظر اسلوب شي مش طبيعي وفي هذه السن
ماتوقعت من ابوهم بهذا الوضع ولا يحرك ساكن مع العلم انه في الاربعينات


دارت في راسي اسئله كثيره

ياتري ايش السبب اللي مراهق يتتطاول ولسانه طويل بشكل بشع ؟
وكيف سلوكهم في المدرسه ؟
اين التربيه وين دور النشا وين دور الام وين دور المدرسه ؟

في اعتقادي ان فصل التربيه عن التعليم اكبر خطاء ولا صارت ؟


انا اقترح عوده التربيه الى وزاره التعليم ولا القادم شي بتشوفونه من انحدار في الاخلاق !!

مارائيكم يااخوان


اترك لكم التعليق

تحياتي

[البارع]

أسئل الله العلي القدير ان يصلح عيالنا وبناتنا

[مزوحي]

السبب الرئيسي الأم والأب وخاصة الأب لأنه ما خبزهم عدل من قبل

هذا الدلع وما يسوي الله يستر عليهم ويهديهم

[جبر ال جبر]

والله مشكله كبيره ياحسن اذا الولد مايحشم ابوه ويتكلم هشكل طبعا التربيه فيها نقص واسمحلي اقولك هذا من فسق ودلع الام والابو لهم وخصوصا الام وتحصل شخصيه الابو ضعيفه جيلنا وجيل ابهاتنا تخسي تكلم في مجلس والكبار يتكلمون وتعلمنا السنع والذرابه والاحترام منهم المجالس مدارس اما الجيل اليديد مصيبه اذكر اخوي اكبر مني بسنه بس مب كفو ادخن قدامه مع انه هو يدخن احتراما له النفاهيم تغيرت ومع الاسف الجيل الجديد اغلبه مهزوز ومعتقداته وثقافته مفلسه الا من رحم ربي

[حسن]

أسئل الله العلي القدير ان يصلح عيالنا وبناتنا

اي والله صدقت
ولكن من همل فقد واعتقد من خلال مااشوف اباء ومعاملتهم مع ابنائهم
الكثير ماعنده اسلوب تربيه
وكنت انصحهم بعدم استخدام الفاض ياكلب ولا ياحمار اجلكم الله
ترا نسمعها
وواقوله عامله معامله رجل من صغره ولا تصغر بااسممه حمود ولا عبود

نادوهم بااسمائهم

الكثير ينقصه معرفه التربيه وهذه حقيقه


شكرا يالبارع ونسائل الله الهدايه والتوفيق

[بريق الحق]

التربيه الله يسلمك مب اتيب اعيال وتقطهم عند الخدم

كل سن وله تربيه والضرب مطلوب عشان يتعلم السنع والناس الي يرافجهم من هم وش اعلومهم هذي بعد مطلوبه
ترى التربيه مب بس اوديه المدرسه وخلاص هو بتعلم
للاسف بيئة المدرسه بيئه فاسده مع احترامي فالوقت الحالي
تبي تربي اعيالك تابع اعيالك

[بوحارب]

الدلع الزايد مشكلة

والله لو ولدي لا ينضرب ضرررررب :)

ع العموم الخلل من داخل البيت يا حسن

والله يصلح عيالنا وعيال المسلمين :)

[MirusS]

عادي لاتستغرب فيه ناس عندهم هالكلام مثل السلام عليكم
وأصلا اليهال ياخذون من تصرفات أبهاتهم يعني تحصل ألاب ولا الام نفس الاسلوب ف عشان جي الابو يجوفه عادي ولا يحاسبهم

الله يهدي ويصلح الجميع

[حسن]

السبب الرئيسي الأم والأب وخاصة الأب لأنه ما خبزهم عدل من قبل

هذا الدلع وما يسوي الله يستر عليهم ويهديهم


مرحبا بك يامزوحي

صدقت ويقول الشاعر الام مدرسه

ولكن الاب ودور المدرسه اكبر غلط فصل التربيه عن التعليم

شوف ياخوي
والله لم امد يدي على اي واحد من عيالي ولا عمري صرخت عليهم
الحمدلله وبفضله
ربتهمهم امهم وبرقابه مني شديده وافتخر ماربوهم خدم لله الحمد
والى الان اوديهم واجيبهم واعلمهم واتحاور معهم فيالروحه والجيه
واعلمهم الصح من الغلط والادب والهدؤ وحازو على شهادات الاخلاق والكل شكر عليهم
تعبت وحرمت من اشيائ كثيره لاجلهم
مااقدر اهملهم هذولا نعمه وامانه ومحاسبين عليها
الاصراحه الاخلاق اهم شي اذا مافي اخلاق سلم على الامه

ترا الموقف صدقوني اكبر من ماوصفت انا كتبت شي بسيط جدا
ولد يقول لبوه باشوف وش تسوي بعدين
بكل وقاحه


شكرا لك يامزوحي ولمرورك

تحياتي لك

[حسن]

والله مشكله كبيره ياحسن اذا الولد مايحشم ابوه ويتكلم هشكل طبعا التربيه فيها نقص واسمحلي اقولك هذا من فسق ودلع الام والابو لهم وخصوصا الام وتحصل شخصيه الابو ضعيفه جيلنا وجيل ابهاتنا تخسي تكلم في مجلس والكبار يتكلمون وتعلمنا السنع والذرابه والاحترام منهم المجالس مدارس اما الجيل اليديد مصيبه اذكر اخوي اكبر مني بسنه بس مب كفو ادخن قدامه مع انه هو يدخن احتراما له النفاهيم تغيرت ومع الاسف الجيل الجديد اغلبه مهزوز ومعتقداته وثقافته مفلسه الا من رحم ربي

مرحبا يااخ جبر

صدقت والله العله من البيت واذا الساس خراب اكيد كل شي خراب
تصدق ابوههم اعرف من منه خر من عيني على طول وفكرت على طول انه في البيت خرطي
لان السن هذا مايتصرف الى شايف شي جايد
اتصدق انا مدخن على خفيف ومبتلى به مع العلم اني اكره شربها ولا عمري دخنت قدام عيالي
ولا يعرفون
لاني انا مبتلي فيها واكرها اتمنى اخلص منها اليوم قبل بكره منوتي والله يعني على تركها
ان شاء الله

وبانسبه لجيل السابق فعلا كنا ننظرب ويهاوشونها ونخاف ولكن الحين بعد ماتعلمنا
وشفنا طريقه التربيه من ناس فاهمين فطبقنا كلامهم والحمدلله نتيجتها طيبه
وهذا انا شفته في الغرب كيف يتعاملون مع عيالهم وشلون ماتسمع له حس
والله لا يضربونهم ولا شي
انا ضد الضرب طريقتي اتحاور معهم وغرست فيهم قيم التربيه
والحمدلله والله يشكرون على اخلاقهم وهدؤهم
الرتبيه السليمه تخلق جيل سليم راقي

وبالنسبه للجيل الجديد الاحظ فيه تمرد خطير الصراحه يخوفون

الله المستعان

وشكرا لك ااخوي جبر

[رهج السنابك]

دلع زايد
عدم اهتمام بالتربيه خاصه هالعاده الي عندنا كخليجيين تفريخ سبع وثمان وعشر
تداول كلام قله ادب في البيت ومحد ينهر ويقول عيب ياماما

[R 7 A L]

تربية غلط او معدوم او ضعف شخصية ابيهم
وحدة من هالامور هي السبب

[حسن]

التربيه الله يسلمك مب اتيب اعيال وتقطهم عند الخدم

كل سن وله تربيه والضرب مطلوب عشان يتعلم السنع والناس الي يرافجهم من هم وش اعلومهم هذي بعد مطلوبه
ترى التربيه مب بس اوديه المدرسه وخلاص هو بتعلم
للاسف بيئة المدرسه بيئه فاسده مع احترامي فالوقت الحالي
تبي تربي اعيالك تابع اعيالك

مرحبا يابريق انت جبت الضيب من ديلوه على مايقولون وانا قلتها في كلامي قبل

المتابعه والرقابه والنصح وتربيهم تربيه صحيحه
اما بيئه المدرسه فاسده مادري الصراحه يمكن تقصد بعض المدارس
ولكن الحين اذا المدرس ادب له طالب ولا قاله اف تجيك امه وتشتكي


انا اطالب بعوده الترببيه لوزراه التعليم وبمنهج متطور وبتفعيل القوانين
التربيه فن واسلوب اذا الولد ماتربي صح من البيت مافي فايده ولا المدرسه مكمله مارائيك بهذا القول ؟

حياك الله يابريق

:)

[راجي الْعفو]

وعليك و رحمة الله

هلا بالنوخذه

الامر الأساسي في الحادثة اللي ذكرتها هو ما قالوه الاخوة موضوع التربية

وأركز على أمر وهو :

التربية تكون على الدين الاسلامي

لا على العادات فقط

فلما تقول له لا تسوي جي ، مب لانه عيب و الناس وش بتقول

لا ، يربيه على انه نهاه عن فعله معينه لان الله حرم هالشي

فيربطه دوم بربه و يخوفه بالله و يغرس فيه موضوع المراقبة والثواب و العقاب يوم القيامة من يوم و هو صغير

والأب لا بد له من الشدة ان احتاج الى ذلك وقد يستعمل الضرب

لا كما يدعيه البعض من ان الضرب لا ينفع

فهذا كلام يخالف النهج النبوي


لك التحية

[حسن]

الدلع الزايد مشكلة

والله لو ولدي لا ينضرب ضرررررب :)

ع العموم الخلل من داخل البيت يا حسن

والله يصلح عيالنا وعيال المسلمين :)

هلا هلا

صدقت والله يابوحارب الخلل من البيت الصراحه انا انقهرت على اسلوب الاب شنهو كان مثل القمله المقصوعه
الصراحه هذولا مهب صغار وش تضرب فيه
هذا يبيله اب ديت للفكر كامل ولد شكبر يعني ماخذ على هل الامور منذو مبطي
الى ان اشتد عوده

الصراحه استغربت من الطريقه والصوت العالي
ولا يتهاوش مع الحلاق ويختاض والاب ساكت
الصراحه موقف اول مره يمر علي ولكن تتوقع في امثال محمد وحمد شكثر عندنا !!!

حياك الله يالضيب

:victory:

[حمد 2002]

السلام عليكم جميعا

موضوعي الليله عن وموقف صار امامي في الحلاق


كنت في الحلاق ودخل علي ولدين اعمارهم حروه 13 و14 وابوهم
يطلب منهم يحلقون وهم يعاندون وبقوه وشوي جلسو يحلقون بعد
ماسمعت منهم كلام بذي في حق ابوهم وهم يرداداونه وهو بصوت خافت ينهرهم
شوي الا الود يتهاوش مع الحلاق عن التحديد ويوصف الحلاق بالحمار كرمكم الله
والاب يحلق ساكت
من دخلو مع ابوهم والحديث اللي دار بينهم الصراحه صدمت من تصرفاتهم
مع العلم عرفت الاب ومانتبه لي
المنظر اسلوب شي مش طبيعي وفي هذه السن
ماتوقعت من ابوهم بهذا الوضع ولا يحرك ساكن مع العلم انه في الاربعينات


دارت في راسي اسئله كثيره

ياتري ايش السبب اللي مراهق يتتطاول ولسانه طويل بشكل بشع ؟
وكيف سلوكهم في المدرسه ؟
اين التربيه وين دور النشا وين دور الام وين دور المدرسه ؟

في اعتقادي ان فصل التربيه عن التعليم اكبر خطاء ولا صارت ؟


انا اقترح عوده التربيه الى وزاره التعليم ولا القادم شي بتشوفونه من انحدار في الاخلاق !!

مارائيكم يااخوان


اترك لكم التعليق

تحياتي

على موقف شاذ وغريب ونادر صار أمامك سويتها ظاهره وقمت ونزلت موضوع بالحوار العام ؟

ليش دايما تقحم النساء والامهات في كل مواضيعك؟

ليش اتعب نفسك !! بدال هاللف والدوران قول النساء هم السبب والسالفه منتهيه ؟!



اتقي الله يابوعلي فيما تكتب وأحترم شيباتك اللي بلحيتك !! ..


وشكرا ..

[حسن]

عادي لاتستغرب فيه ناس عندهم هالكلام مثل السلام عليكم
وأصلا اليهال ياخذون من تصرفات أبهاتهم يعني تحصل ألاب ولا الام نفس الاسلوب ف عشان جي الابو يجوفه عادي ولا يحاسبهم

الله يهدي ويصلح الجميع

مرحبا يافايبر

صدقت والله ويرجع الى الاساس هو السبب التربيه تعلب دوركبير منذ الولاده
من اللي يربي الان منذ الولاده ؟ من اللي يهتم بالطفل الان ؟ من يستقبل الولد بدايه من الافطار والذهاب والاياب وحتى الالعاب يالمجعات ؟؟

هني مربط الفرس

:victory:

حياك الله يافايبر وشرفتنا برايك


:)

[<اضرب واشرد>]

أخوي حسن الموقف اللي واجهته نادر الحدوث ويعود لضعف شديد في شخصية (الأب) لدرجة يهينه ابنه المراهق ويشتمه .. (الله يعينه على ما ابتلاه)

والمفروض الصراحة تزفهم وتعطيهم درس ماينسونه وتعين الأب المغلوب على أمره في تربيتهم :)
أو على الأقل تبين لهم أنك متضايق بتعبير/كلمة/تصرف

تسلم ع الموضوع والله يخلف على الأب ويصلح عياله

[حسن]

أخوي حسن الموقف اللي واجهته نادر الحدوث ويعود لضعف شديد في شخصية (الأب) لدرجة يهينه ابنه المراهق ويشتمه .. (الله يعينه على ما ابتلاه)

والمفروض الصراحة تزفهم وتعطيهم درس ماينسونه وتعين الأب المغلوب على أمره في تربيتهم :)
أو على الأقل تبين لهم أنك متضايق بتعبير/كلمة/تصرف

تسلم ع الموضوع والله يخلف على الأب ويصلح عياله

السموحه من الاخوان تجاوزت ردودهم لي عوده غدا بس هذا الجميل يضرب لي على الاوتار الحساسه

تصدق اقول في نفسي لو هذا ولدي واسمالله على ولدي
كان شحرتهم بجميع امواس الحلاقه في المحل ورميتهم برع
هذولا عمل غير صالح بالنسبه لي
الصراحه الاب كان هو الطامه الكبري بالنسبه لي شطول وعرض اثنين زعابيط يهزئزنك
ولا لارضخهم في الشارع وارميهم في اقرب حاويه
خييه على هذه التربيه
الحمدلله والله لا يبلانا

والله بغيت ازفهم ولكن تعرف جيل يامامي الحين لو زفيته بنطلك الابو وبيقولك وش دخلك انت
الصراحه ممامرت علي شخصيه ابو مثله والله ودك ترقدبه هو الاول

الصراحه مسوين فوضى استفزوني بشكل فضيع بغيت اصير مثل المارد واشوحهم كلهم برع

تصدق تمت الاسئله تدور في راسي دوراه واقول هذولا شلون في المدرسه شكلهم فوضوين
ومسببين بق بروبلوم

حيالك الله يااضرب واشرد ومن الحين انا مستعد لموضوعك الجديد

:)

خوش موضوع

:victory:

نراكم غدا ونكمل الحوار

[R 7 A L]

أخوي حسن الموقف اللي واجهته نادر الحدوث ويعود لضعف شديد في شخصية (الأب) لدرجة يهينه ابنه المراهق ويشتمه .. (الله يعينه على ما ابتلاه)

والمفروض الصراحة تزفهم وتعطيهم درس ماينسونه وتعين الأب المغلوب على أمره في تربيتهم :)
أو على الأقل تبين لهم أنك متضايق بتعبير/كلمة/تصرف

تسلم ع الموضوع والله يخلف على الأب ويصلح عياله

هذا هو المفروض اذا عجزوا الاهل عن تربية عيالهم يأتي دور المجتمع وكان هذا الشي حاصل في الماضي اذا اخطأ الطفل او المراهق وشافه احد من جيرانة او جماعته يوقفه عند حدة
الحين لا اذا احد تكلم على الولد وهو غلطان دافعوا عنه اهله ويمكن يتهاوشون مع هذا الناصح

[MAZEN37]

ذكرتني
كنت مره في الحلاق مع ولدي
وقام ولدي ورفع صوته علي الحلاق يقوله شوي شوي
المهم انا ماعجبني تصرف ابني
وفجاءه تكلم الي قاعد يحلق جنب الولد يقوله ايوه عليك فيه
العن والديه تفل عليه ماعليك منه
انا نصدمت صراحه ماعرفت شقول
المشكله رجال كبير
التزمت الصمت وعقب قعدت افهم ابني وارقع
الخلاصه انه المجتمع له دور في تربية النشئ
المشكله اخ حسن انه احنا تخليني عن واجباتنا

[حسن]

دلع زايد
عدم اهتمام بالتربيه خاصه هالعاده الي عندنا كخليجيين تفريخ سبع وثمان وعشر
تداول كلام قله ادب في البيت ومحد ينهر ويقول عيب ياماما

مرحبا بالاستقراطيه
صحيحي بس تختلف من بيئات عندنا وفي مجتمع واحد
فعلا التربيه لها دور كبير وزمان لما شفت بدايه التغير كنت اقول الوقت الجاي اصعب على الام والاب
ان يهتمون اكثر
عكس جيلنا قبل كان المجتمع يربي اما الحين كلن في حاله
فا رؤيتي اقول فيها

يجب ارجاع التربيه للتعليم وفرض قانون صارم

شكرا للمشاركه

:)

[مختلفة عقليا]

السلام عليكم .,

التربية يا حسن ., يقولك فاضفر بذات الدين تربت يداك .,

عشان الواحد لا بغي يتزوج يدور ام مو بس زوجه ., ومو اهله يجوفونها ترقص ,’ ويخطبونها !!

المهم ,’

الخلل من الاهل في هالموضوع ,’ لانهم اصغار علي اني اعاتبهم .,

بس انا ضد الاخوان اللي قالوا نضربهم ,’ انعلمهم ونشد ونجتهد واهم شي (( ما نتعب ))

ويسلموو .,

[حسن]

تربية غلط او معدوم او ضعف شخصية ابيهم
وحدة من هالامور هي السبب


هلا هلا برحال
كلامك صحيح والتربيه من وين بيجبونها غير الام الاول والاب ثاني
اما ضعف شخصيه ابيهم اسكت لا تذكرني كان هو خايف يتكلم
تصدق ولا يسمعون ويحرجونه
والمشكله الحين مهب مثل الاول ولد اخوك لو يسوي شي غلط
من يخبر امه يجيك اخوك شايط عليك ولا الاول كفو تسوي غلط
الا يرقدبك الجار ولو اشتكينا قال احسن كان كسر روسكم
يفرحون بالادب مهب الاحين ولا المدرس دز طالب يابيييه تسمع شكوه الام
وسبع البرمبمه متذري وراها

ماتشووفني يارحال اطالب بتمديد زياده الخدمه الوطنيه انا اشوف شي ماتشوفه وانشد النهار


حياك الله يارحال

[حسن]

وعليك و رحمة الله

هلا بالنوخذه

الامر الأساسي في الحادثة اللي ذكرتها هو ما قالوه الاخوة موضوع التربية

وأركز على أمر وهو :

التربية تكون على الدين الاسلامي

لا على العادات فقط

فلما تقول له لا تسوي جي ، مب لانه عيب و الناس وش بتقول

لا ، يربيه على انه نهاه عن فعله معينه لان الله حرم هالشي

فيربطه دوم بربه و يخوفه بالله و يغرس فيه موضوع المراقبة والثواب و العقاب يوم القيامة من يوم و هو صغير

والأب لا بد له من الشدة ان احتاج الى ذلك وقد يستعمل الضرب

لا كما يدعيه البعض من ان الضرب لا ينفع

فهذا كلام يخالف النهج النبوي


لك التحية

هلا هلا

حيالله باخونا راجي

صحيح كلامك التربيه هي الاساس ولكن من يربي الان وهل التربيه بنفس مستوى التطور العلمي الثقافي الديني !!!
نحط كلام انشائي ونصفصف والغالبيه مايدرون عن هو دار عيالهم حقيقه
الصراحه وبحكم تجربتي لم استخدم الضرب نهائي
مااقول ماينفع لان مااقدر اقيس فيه وعليه والقول اللين عندي له سحر اكثر من العنف هذا شي طبيعي

ذكرتني بحسينوه يوم ضربه خاله قحطه وش سوا فيه رغم ان حسينون كان هادي وخاله مهب راضي يتفاهم


ههههههههه

الصراحه الموقف اللي شفته لو تعاونو العيال على الابو اتوقع لاشبعووه ضربا زين كان يرد عليهم بعد العشرين كلمه كلمه
هذا اكثر انجاز كان يقدمه

ياخسارتك بالليالي بس من من دكر على قوله عطى

طبعا ياراجي الدين والاخلاق مهمين بالتربيه وتهذيب النفس
بها ترتقي الشعوب

شكرا لك وعلى مداخلتك

:victory:

[القبطان اكس]

بوعلي

كلامك صح وياما شفنا هالشي

لان العقل - جمع عقال - ما غردت على روسهم من قبل

مرة اثنين زعابيط مروا من عندي واحد سلم علي يحليله والثاني قاله ليش اتسلم لا وجدامي

والله تربية وقحة كنت باسطره بس قلت خله ايولي

[حمد 2002]

وهل الظرب هو معيار للتربية اخ حسن ؟

[حسن]

ذكرتني
كنت مره في الحلاق مع ولدي
وقام ولدي ورفع صوته علي الحلاق يقوله شوي شوي
المهم انا ماعجبني تصرف ابني
وفجاءه تكلم الي قاعد يحلق جنب الولد يقوله ايوه عليك فيه
العن والديه تفل عليه ماعليك منه
انا نصدمت صراحه ماعرفت شقول
المشكله رجال كبير
التزمت الصمت وعقب قعدت افهم ابني وارقع
الخلاصه انه المجتمع له دور في تربية النشئ
المشكله اخ حسن انه احنا تخليني عن واجباتنا

هلا هلا

مرحبا بمازن لوانا منك كان رديت على الرجل ونصحته وقلت له بدال ماتنصحه تعلمه هذه العلومه
الوقت هذا علينا احنا التربيه من الداخل وهي بعدين تنتقل للخارج اتوماتيكيا
وتظهر باسلوب راقي
ماهو المجتمع يتشكل من افراد يعني احنا اللي نتحكم به

الله المستعان

شكرا لك يااخ مازن على المشاركه

:)

[بو خليفه 123]

زيادة الرواتب هي السبب :shy:

[حسن]

السلام عليكم .,

التربية يا حسن ., يقولك فاضفر بذات الدين تربت يداك .,

عشان الواحد لا بغي يتزوج يدور ام مو بس زوجه ., ومو اهله يجوفونها ترقص ,’ ويخطبونها !!

المهم ,’

الخلل من الاهل في هالموضوع ,’ لانهم اصغار علي اني اعاتبهم .,

بس انا ضد الاخوان اللي قالوا نضربهم ,’ انعلمهم ونشد ونجتهد واهم شي (( ما نتعب ))

ويسلموو .,



وعليكم السلام

فعلا الخلل من التربيه لا يختلف عليه اثنان ومن البيت وبالتحديد من الام اولا وثانيا الاب

صحيح راعيه الدين ولمن وينها في وقتنا الحالي وكم نسبتها في المجتمع وشنهو الدين اللي تعرفه !!

اسئله تحتاج مناهج وتعليم وقيم وثوابت وعلماء نفس
المسؤليه وينها لا حد يقول والله نقدر نربي وعيالنا على الخدم لين يكبرون هذه الاسطونه المشروخه
عيال اذا من صغرهم ماتعلمو الادب مافي فايده لين اكبر وبيسيرون عاقين شفت نماذج كبيره وشفت نماذج صغيره
والله ان يردون على ابوهم في المجلس بشكل فضيع وكل واحد منهم متزوج بعد
هذه نتيجه خلل تربيه اساس تعبان

الصراحه الوقت اللي جاي اصعب وجيل الل يستر

اونا ارفض اسلوب الضرب ولا استخدمه نهائيا والنتائج عندي مبهره صراحتا

الى الحين ماوصلت الى هذا المستوى

شكرا على المشاركه يامختلفه

[عثرة جواد]

السلام عليكم

شسالفه اليوم المواضيع عن التربيه اليوم العالمي للتربية :tease:

انا بقولك قصه واحد عندنا ف الفريج

الله يسلمك عندنا واحد كبير ف العمر والزوجة مب كبيرة واايد عندهم عيال اكبار

تخيل كل خميس وجمعة هي عند اهلها ويا بناتها والخدم والاب ويا عياله

وتقرير اتجي مفصله حق الام بذمتك وين شخصية الريال

وين تربية العيال وشلون واااي بر بيكون غيض من فيض

عساك ع القوة

[طبيب قطري]

لاتلوم الابناء.. اذا هم مب متربيين يعني الاب والام هم السبب ، اهمالهم وانشغالهم بأشياء اخرى وسهوله رمي ابناءهم للخدم حتى يربوهم بس بالاخير الاهل بيدفعون الثمن ، بيحصلون عقوق وقلة احترام !

[حسن]

بوعلي

كلامك صح وياما شفنا هالشي

لان العقل - جمع عقال - ما غردت على روسهم من قبل

مرة اثنين زعابيط مروا من عندي واحد سلم علي يحليله والثاني قاله ليش اتسلم لا وجدامي

والله تربية وقحة كنت باسطره بس قلت خله ايولي


الله المستعان

يقول الشاعر

انما الامم الاخلاق مابقيت فان هم ذهبت اخلاقهم ذهبوا

وهذه مصيبه

التربيه والاخلاق الحميده مطلوبه كل شي يعود على الاساس منذ البدايه

فانا لازلت اطالب بعوده التربيه الى التعليم لانها هي الصح

تصدق امس يقولي اخوي عن شخص يعرفه

يقول استغربت من تصرفات الولد ولسانه الطويل

يقول يضرب هرن ويتحلطم على ابوه ليش مايفتحله الباب

:omg:

الى هذه الدرجه وصلت لدي البعض الى درجه اخوي يقول ماعاد اروح له مجلسه استحي من اللي اشوفه

:omg:

الله يصلح الحال

وشكرا ياقبطان ونورت الموضوع

[القبطان اكس]

الله المستعان

يقول الشاعر

انما الامم الاخلاق مابقيت فان هم ذهبت اخلاقهم ذهبوا

وهذه مصيبه

التربيه والاخلاق الحميده مطلوبه كل شي يعود على الاساس منذ البدايه

فانا لازلت اطالب بعوده التربيه الى التعليم لانها هي الصح

تصدق امس يقولي اخوي عن شخص يعرفه

يقول استغربت من تصرفات الولد ولسانه الطويل

يقول يضرب هرن ويتحلطم على ابوه ليش مايفتحله الباب

:omg:

الى هذه الدرجه وصلت لدي البعض الى درجه اخوي يقول ماعاد اروح له مجلسه استحي من اللي اشوفه

:omg:

الله يصلح الحال

وشكرا ياقبطان ونورت الموضوع


الله يطول في عمرك يا بو علي

والله انا معك بشأن ارجاع التربية للتعليم

اتذكر جيلنا مال التسعينيات ايام الثانوية .... والله كنا انموت خوف يوم انشوف ضابط المدرسة وكأنه عزرائيل عليه السلام

احين الزعبوط يتهاوش مع المدير

[بشائر]

وعليكم السلام ورحمة الله وبركاته

استنكارك لمثل هذا السلوك دليل على حسن تربيتك لعيالك
الله يحفظهم ويبارك لك فيهم ..





ياتري ايش السبب اللي مراهق يتتطاول ولسانه طويل بشكل بشع ؟


سببين :
أولهما : التربية وطريقة الأسرة في التعامل مع بعضها ويعتمد أساسا على أخلاق الزوجة اللي بيطلع العيال على شاكلتها وأخلاقها... وما الطفل إلا مرآة تعكس حقيقية تعامل وسطه فيما بينهم ..
ثانياً: قد يكون دينا يـُقضى ..



وكيف سلوكهم في المدرسه ؟



مزعجين فوضويين لا يحترمون أحد ولا يأتون إلا بالقوة والسلطة ..
والأدهى إن والدينه مايرضون حد يوبخهم من المدرسين أو الإداريين !




اين التربيه وين دور النشا وين دور الام وين دور المدرسه ؟



هالمدرسة شتسوي وشتخلي ! إذا مافيه تعاااون حقيقي مع أولياء الأمور ماتقدر تسوي شي ..
والمفروض إن أولياء الأمور يساعدون إدارة المدرسة ويدعمونها ولا يزعلون من أي إجراء يؤخذ تجاه أبناءهم
شريطة أن يكون بحجم الخطأ المرتكب ..






انا اقترح عوده التربيه الى وزاره التعليم ولا القادم شي بتشوفونه من انحدار في الاخلاق !!




وأنا اقترح عمل دورات تدريبية مكثفة خاصة لأولياء الأمور تعلمهم كيف يعيدون مافاتهم من تقويم سلوك أبناءهم
بعض أولياء الأمور محتاجين لتربية قبل لا يلزمون بتربية أبناءهم .. والله المستعان..

عجبني مسج وصلني فيه قصة رجل أعمال متدين .. مشغول بتجارته وملازم لشركته من الصبح لين العصر..
ودائما يشارك في الأعمال التطوعية بعد فراغه من عمله فعاتبه صديقه وقال له يومك كله مشغول عن عيالك
ولما تلاقي وقت فراغ تشغل نفسك بعمل تطوعي؟ عيالك أولى بهالوقت ..
فرد عليه بأنه يعترف أنه مقصر وبعيد عنهم لكنه دائما يدعو الله لهم بالهداية ويشارك بالأعمال الخيرية بنية صلاح أبناءه
وأخبره بأن أبناء بفضل الله طائعين له محافظين على صلاتهم ويحفظون القرآن ..

احفظ الله يحفظك وافعل الخير وانو به صلاح أبناءك وابشر بالخير..

[يمامـة]

بو علي..

الاساس هي التربية..

لا تتوقع الطفل بيتعلم كلمات بذيئة من خارج المنزل ويستخدمها بشكل مستمر
الا اذا الوالدين كانوا من مستخدمي هالكلمات او من النوع اللي ما يهونون عليهم عيالهم
ينقال لهم اف علشان ما يكسرون بخواطرهم..

فلو رجعنا للاسباب اقولها وبكل اسف ان مافي تربية في البيت.

مستحيل المدرسة بتربي لنا عيالنا.. المدرسة راح تلجم قلة ادب عيالنا
لكنها مستحيل تربي ولدي وهو اساسا قليل الادب في البيت..

واقول وبكل اسف.. النموج اللي شفته في منه نسخ بدرجات اقل او اعلى
العيال ما يعرفون الادب والاحترام وبر الوالدين في الكلام معاهم..

و مالك الا تردد اللهم عافنا مما بليتهم..

[حسن]

وعليكم السلام ورحمة الله وبركاته

استنكارك لمثل هذا السلوك دليل على حسن تربيتك لعيالك
الله يحفظهم ويبارك لك فيهم ..




سببين :
أولهما : التربية وطريقة الأسرة في التعامل مع بعضها ويعتمد أساسا على أخلاق الزوجة اللي بيطلع العيال على شاكلتها وأخلاقها... وما الطفل إلا مرآة تعكس حقيقية تعامل وسطه فيما بينهم ..
ثانياً: قد يكون دينا يـُقضى ..



مزعجين فوضويين لا يحترمون أحد ولا يأتون إلا بالقوة والسلطة ..
والأدهى إن والدينه مايرضون حد يوبخهم من المدرسين أو الإداريين !




هالمدرسة شتسوي وشتخلي ! إذا مافيه تعاااون حقيقي مع أولياء الأمور ماتقدر تسوي شي ..
والمفروض إن أولياء الأمور يساعدون إدارة المدرسة ويدعمونها ولا يزعلون من أي إجراء يؤخذ تجاه أبناءهم
شريطة أن يكون بحجم الخطأ المرتكب ..





وأنا اقترح عمل دورات تدريبية مكثفة خاصة لأولياء الأمور تعلمهم كيف يعيدون مافاتهم من تقويم سلوك أبناءهم
بعض أولياء الأمور محتاجين لتربية قبل لا يلزمون بتربية أبناءهم .. والله المستعان..

عجبني مسج وصلني فيه قصة رجل أعمال متدين .. مشغول بتجارته وملازم لشركته من الصبح لين العصر..
ودائما يشارك في الأعمال التطوعية بعد فراغه من عمله فعاتبه صديقه وقال له يومك كله مشغول عن عيالك
ولما تلاقي وقت فراغ تشغل نفسك بعمل تطوعي؟ عيالك أولى بهالوقت ..
فرد عليه بأنه يعترف أنه مقصر وبعيد عنهم لكنه دائما يدعو الله لهم بالهداية ويشارك بالأعمال الخيرية بنية صلاح أبناءه
وأخبره بأن أبناء بفضل الله طائعين له محافظين على صلاتهم ويحفظون القرآن ..

احفظ الله يحفظك وافعل الخير وانو به صلاح أبناءك وابشر بالخير..

جزاك الله خير

يابشاير

افضل رد شفته ولا قصور باللباقي جبتي الحقيقه واضحه وهذا الواقع واللي حاصل 100%

ومؤيد لكل ماذكرتيه وفي حل للكثير من الظواهر السيئه

اعتقد لو طبق اللي تقولينه لو 90 % اعتقد بنتفوق على العالم في كل شي

مشاركه جميله وانا سعيد بها

وشكرا على الاضافه الجميله


:)

[sweet qatar]

بو علي..

الاساس هي التربية..

لا تتوقع الطفل بيتعلم كلمات بذيئة من خارج المنزل ويستخدمها بشكل مستمر
الا اذا الوالدين كانوا من مستخدمي هالكلمات او من النوع اللي ما يهونون عليهم عيالهم
ينقال لهم اف علشان ما يكسرون بخواطرهم..

فلو رجعنا للاسباب اقولها وبكل اسف ان مافي تربية في البيت.

مستحيل المدرسة بتربي لنا عيالنا.. المدرسة راح تلجم قلة ادب عيالنا
لكنها مستحيل تربي ولدي وهو اساسا قليل الادب في البيت..

واقول وبكل اسف.. النموج اللي شفته في منه نسخ بدرجات اقل او اعلى
العيال ما يعرفون الادب والاحترام وبر الوالدين في الكلام معاهم..

و مالك الا تردد اللهم عافنا مما بليتهم..

عيالنا يتعلمون كلام بذيء جدآ من المدرسة

في مواقف كثيرة احرجونا فيها جدام الناس .. بس هاي طبيعة الياهل




حسن

بالنسبة لموضوعك

ما يحتاج تحليل .. دام الابو ما زرع له هيبة واحترام في قلب عياله
لاتستغرب من قلة أدبهم


حتي لو كانت الأم ذابحة نفسها ..

قلنا وبنعيد البيت يعتمد علي الرجال

[حسن]

بو علي..

الاساس هي التربية..

لا تتوقع الطفل بيتعلم كلمات بذيئة من خارج المنزل ويستخدمها بشكل مستمر
الا اذا الوالدين كانوا من مستخدمي هالكلمات او من النوع اللي ما يهونون عليهم عيالهم
ينقال لهم اف علشان ما يكسرون بخواطرهم..

فلو رجعنا للاسباب اقولها وبكل اسف ان مافي تربية في البيت.

مستحيل المدرسة بتربي لنا عيالنا.. المدرسة راح تلجم قلة ادب عيالنا
لكنها مستحيل تربي ولدي وهو اساسا قليل الادب في البيت..

واقول وبكل اسف.. النموج اللي شفته في منه نسخ بدرجات اقل او اعلى
العيال ما يعرفون الادب والاحترام وبر الوالدين في الكلام معاهم..

و مالك الا تردد اللهم عافنا مما بليتهم..


مرحبا باليمامه مرحبا بالمربيه الفاضله مرحبا بصاحبه العقل الرشيد مرحبا بحكيمه المنتدي

انتى اللي يقول عنها الشاعر الام مدرسه

فعلا

انا كرجل استفتدت منك كثيرا وفي تربيه ابنائي ولك الفضل بعد الله

وهذا المفروض ان تعلم من بعض

من دون اشوف الرد واقراءه اعرف ردك تماما

لا يفتي واليمامه في الموضوع وخصوصا التربيه


الاساس مثل ماذكرتي هو البيت وهذه الصفه مخصصه للام والشعراء مدحو الام بشكل كبير
ولكن

هل امهات زمان زي الحين !!

الحقيقه والواقع لا حيث ان التربيه اتندت للخادمات وهذا واقع الغالبيه العظمى كان مهب الجميع
فاكيد بتكون هذه النتيجيه

باقولك شي تعرفين لو عندنا منظمات متطوره وتعني بحقوق الطفل مثل الدول المتقدمه
لا شفتي الكثير منهم يافي السجن ولا عيالهم مسحوبين منهم
لكن الحمدلله ماوصلنا لاى هذا المستوى من تطور القوانينن
ام عزوز تقول السنه تبي تجدد عيد زواجها ال40 في بولندا لان مشهورين بالبقر


مشاركه قيمه وانتي مكسب لهذه البلد وهذا المنتدي الشامخ
ولازت اقول المفروض يكرمونك بالام المثاليه اللي اصبحت من النوادر

ووتستاهلين 21 طلقه مدفعيه من العيا ر الثقيل

لا تتاخرين علينا ترا وجودك يخلق ننوع من التوازن الفكري في المنتدي لا الكثير الحين مخوخهم
انحصر في البانكيك ولا الهوت دوق

:victory:

:victory:

[ثابت]

كل راع مسؤول عن رعيتة امام الله
و اتمنى من الدولة سن قانون يجرم من يهملون اولادهم ومعاقبتهم لعدم تعليم ابنائهم الادب والاحترام ومكارم الاخلاق التي جاء بها الاسلام والرسول محمد صلى الله علية وسلم

احد المواقف التي بصراحة صدمتني وتركت في نفسي حزن شديد لفترة كنت ذاهب اخذ اطفالي من المدرسة وكان هناك طفلين جالسين مع بعض صغار في السن في الابتدائية تلفظ وانا مر بالقرب منهم في المدرسة بكلمة عنصرية و انا اعرف دول كثيرة تغرم وتسجن كل من يقول هذي الكلمة العنصرية يقصد بها لطلاب اخر غير موجود احترام لكل القراء لن اذكر الكلمة تفاجأت و وقفت التفت على الطفل الي قال الكلمة العنصرية ومعها كلمة غير اخلاقية قلت لة عيب شلون تتلفظ بهذي الكلمة تم يطالعني الطفل مثل الي مستغرب اني اقول لة عيب كانة اصبحت كلمة عيب هي القريبة والكلام البذيئ هو العادي اتمنى كل شخص و اخص الامهات ان تربوا ابنائكم با الاخلاق الطيبة التي حث عليها رسول الله صلى الله علية وسلم حتى لا تندمون عندم يكبرون على هذا الشيئ الله اما بلغت الله اما فشهد.

[النهار]

اذا الاب ضعيف الشخصيه والام قوية الشخصيه يكون الناتج اطفال قليلي الادب
وقس على ذالك اطفال المطلقه والارمله والمخلوعه لاحد يجي يتفلسف ويقول الكلام هذا خطاء والام لوحدها ما تقدر تربي
زمان لول الاب والعم والخال .... حتى الجار كان مثال المربي
حسن شفت وسمعت اشياء لاطفال من الصف الثاني ابتدائي وانت طالع تشيب لها الولدان
خلني ساكت احسن

[sweet qatar]

اذا الاب ضعيف الشخصيه والام قوية الشخصيه يكون الناتج اطفال قليلي الادب
وقس على ذالك اطفال المطلقه والارمله والمخلوعه لاحد يجي يتفلسف ويقول الكلام هذا خطاء والام لوحدها تقدر تربي
زمان لول الاب والعم والخال .... حتى الجار كان مثال المربي
حسن شفت وسمعت اشياء لاطفال من الصف الثاني ابتدائي وانت طالع تشيب لها الولدان
خلني ساكت احسن

اسمح لي يا النهار جانبك الصواب

محد مثل الثاني .. مطلقة عن مطلقة تفرق وكل وحدة علي قد تعبها


أعتقد الأخ حسن حط لك مثال عيال مع ابوهم

لا تجيب لي طاري المرة

أول مرة أعرف ان الرجال يسترجل حسب شخصية مرته

الي اعرفه ان الرجال رجال سواء مرته قوية ولا مهزوزة

[qtr qtr]

يعتمد على اخلاق الاب والام في تربية عيالهم .. فلا ترمي التربيه على وزراة التربيه او هيئة التعليم العالي لانهم مب هم اللي مخلفين عيالنا عشان نرمي عليهم تربية عيالنا .
وطبعا البيئه اللي يعيشون فيعا العيال له تأثير كبير اثناء غياب دور الاب والام في مراقبتهم نوع البيئه اللي حولين عيالهم من رفقاء السوء ..

[qtr qtr]

اذا الاب ضعيف الشخصيه والام قوية الشخصيه يكون الناتج اطفال قليلي الادب
وقس على ذالك اطفال المطلقه والارمله والمخلوعه لاحد يجي يتفلسف ويقول الكلام هذا خطاء والام لوحدها ما تقدر تربي
زمان لول الاب والعم والخال .... حتى الجار كان مثال المربي
حسن شفت وسمعت اشياء لاطفال من الصف الثاني ابتدائي وانت طالع تشيب لها الولدان
خلني ساكت احسن

اخوي النهار اخالفك الرأي بخصوص اذا غاب دور الرجل في تربية العيال سواء اب او اخ كبير او عم او خال او جد ان الام ماتقدر تربي عيالها اصابعك مب سوى اخوي ..

في ارامل ومطلقات خرجوا وربوا وطلعوا رجال يسند لهم الظهر في اخلاقهم وتربيتهم .. حتى المتزوجه اللي شخصيتها اقوى من زوجها لان قد يكون الزوج ماله شخصيه قدام عياله او طبعه شخص ضعيف لاسباب اخرى منذ صغره .

[بشائر]

جزاك الله خير

يابشاير

افضل رد شفته ولا قصور باللباقي جبتي الحقيقه واضحه وهذا الواقع واللي حاصل 100%

ومؤيد لكل ماذكرتيه وفي حل للكثير من الظواهر السيئه

اعتقد لو طبق اللي تقولينه لو 90 % اعتقد بنتفوق على العالم في كل شي

مشاركه جميله وانا سعيد بها

وشكرا على الاضافه الجميله


:)

الله يرفع قدرك اخوي ..

[بشائر]

اذا الاب ضعيف الشخصيه والام قوية الشخصيه يكون الناتج اطفال قليلي الادب
وقس على ذالك اطفال المطلقه والارمله والمخلوعه لاحد يجي يتفلسف ويقول الكلام هذا خطاء والام لوحدها ما تقدر تربي
زمان لول الاب والعم والخال .... حتى الجار كان مثال المربي
حسن شفت وسمعت اشياء لاطفال من الصف الثاني ابتدائي وانت طالع تشيب لها الولدان
خلني ساكت احسن

أخوي النهار .. الله يسعدك ..
اسمح لي أنا بتفلسف عليك وبقول لك (( الكلام هذا خطأ )) .. والأم تقدر تربي عيالها بدون أبوهم ..
شرط أن تكون ذات دين وخلق .. لا تظلم الأرامل والمطلقات
ولكن أصابعك ماهي سوا .. قد ينطبق كلامك على البعض ولكن لا تعمم بارك الله فيك فالأيام أثبتت صحة كلامي..

[حسن]

كل راع مسؤول عن رعيتة امام الله
و اتمنى من الدولة سن قانون يجرم من يهملون اولادهم ومعاقبتهم لعدم تعليم ابنائهم الادب والاحترام ومكارم الاخلاق التي جاء بها الاسلام والرسول محمد صلى الله علية وسلم

احد المواقف التي بصراحة صدمتني وتركت في نفسي حزن شديد لفترة كنت ذاهب اخذ اطفالي من المدرسة وكان هناك طفلين جالسين مع بعض صغار في السن في الابتدائية تلفظ وانا مر بالقرب منهم في المدرسة بكلمة عنصرية و انا اعرف دول كثيرة تغرم وتسجن كل من يقول هذي الكلمة العنصرية يقصد بها لطلاب اخر غير موجود احترام لكل القراء لن اذكر الكلمة تفاجأت و وقفت التفت على الطفل الي قال الكلمة العنصرية ومعها كلمة غير اخلاقية قلت لة عيب شلون تتلفظ بهذي الكلمة تم يطالعني الطفل مثل الي مستغرب اني اقول لة عيب كانة اصبحت كلمة عيب هي القريبة والكلام البذيئ هو العادي اتمنى كل شخص و اخص الامهات ان تربوا ابنائكم با الاخلاق الطيبة التي حث عليها رسول الله صلى الله علية وسلم حتى لا تندمون عندم يكبرون على هذا الشيئ الله اما بلغت الله اما فشهد.

مرحبا يااخ ثابت

فعلا انا اتفق معك وطالبت بوضع قوانين صارمه مثثل الدول المتقدمه
او تفعيل دورها وين دور الاسره وين دور حقوق الطفل
كلها ماشوف لها اثر
ليش مايسير هناك ربط بالاخصاييءن في المدارس بهذه الادارات وليس تحت مضله المجلس
الاعلى للتعليم ياخذون دورهم الصحيح في المجتمع


اتمنى ان نوصل الى هذا الرقي من القوانين

شكرا لمداخلتك القيمه

:)

[مشـــــاعر]

اسمح لي يا النهار جانبك الصواب

محد مثل الثاني .. مطلقة عن مطلقة تفرق وكل وحدة علي قد تعبها


أعتقد الأخ حسن حط لك مثال عيال مع ابوهم

لا تجيب لي طاري المرة

أول مرة أعرف ان الرجال يسترجل حسب شخصية مرته

الي اعرفه ان الرجال رجال سواء مرته قوية ولا مهزوزة

+1

معروووف كل عيب يقطوونه ع آإلمرررة . .
والأب آإلخبل قاعد مع عيآإله وماله شخصية حتى يهآإوشهم . .

تفكيرررر عقيم ومستحيل يتعدل :anger1: . .

[آل فيصل]

الخلل فالبييييييت الخلل فالبييييييييييت يا اخوان

[حسن]

اذا الاب ضعيف الشخصيه والام قوية الشخصيه يكون الناتج اطفال قليلي الادب
وقس على ذالك اطفال المطلقه والارمله والمخلوعه لاحد يجي يتفلسف ويقول الكلام هذا خطاء والام لوحدها ما تقدر تربي
زمان لول الاب والعم والخال .... حتى الجار كان مثال المربي
حسن شفت وسمعت اشياء لاطفال من الصف الثاني ابتدائي وانت طالع تشيب لها الولدان
خلني ساكت احسن

صدقت يالنهار في كل حرف قلته والشواهد كثيره ونشوفها كلها ترجع الى الاساس وعامود البيت والتربيه
والام مدرسه كماقال الشاعر كل الاقواويل والحقائق تقول الام وحتى الحضانه مكفوله حق للام يعني الرجل بيعيد
عنهاا
ماانقول ماينلام لا والله الا يلام ولكن لما اشوف لسان طويل وتهديد !!!
اعتقد وضع الزوج في البيت مهب مضبوط مع العلم اني عرفت الاب وشكله من النوع الضفعه اللي يسمونه عندنا
شفنا عيال المطلقه والمعلقه والارمله الكثير منهم على خلق وادب واحترام

شكرا يالنهار على هذه الاضافه الجميله وخصوصا انا وانت اباء ونعرف التربيه ونحن في الحياه الحقيقيه
مشكله من اللي يجيك ثاير في العجه لا تزوج ولا خط ولا ملج ولا ولا ولا شي ويملي علينا اسلوب التربيه

شكره على النماذج اللي قدمتها يالنهار

:victory:

[حسن]

اسمح لي يا النهار جانبك الصواب

محد مثل الثاني .. مطلقة عن مطلقة تفرق وكل وحدة علي قد تعبها


أعتقد الأخ حسن حط لك مثال عيال مع ابوهم

لا تجيب لي طاري المرة

أول مرة أعرف ان الرجال يسترجل حسب شخصية مرته

الي اعرفه ان الرجال رجال سواء مرته قوية ولا مهزوزة

مرحبا ياسويت

كلام النهار صحيح 100 % والنهار اب ومربي وعنده خبره ولا تنسين عميد الاعضاءء بالسن
عكس اللى يرد وهو ماتزوج ولا دخل معترك الحياه الزوجيه يعني دفاع باطل في باطل
المسئله مهب ان اسائه للمراءه ولا هو تقليل المره ودورها مع العلم اقتصر الافقط على العمل = اي الوظيفه وراتبها اما دور البيت والتربيه
الخدم والكيميرات خيل دليل مانقول الكل نقول 98%عاشان محد يزعل !!
يعني حطي في بالك انتي وغيرك المعدوده على الاصابع والاثنين المساندين
انا واموت في الانا

نعم ذكرت ابو الاعيال معاهم والاب مثل مذكر لك النهار ضعيف شخصيه وفي منهم كثر كثر في زمنا هذا ونسبه لا يستهان بها
يعني فوق 70 الى 80 %على حسب احصائياتي المؤكده
يقولون اطعم الفم تستحي العين
يعني الزوجه تعمل ومعاشها فوق فوق فوق فا شي طبيعي ماتفتكر فيه وتشوته برع وهذا واقع
الشخصيات تلعب فيها الخبره التعليم القياده مهب كل اب يقدر يقود ومهب كل ام تقدر تقود
هذه مميزات تكتسب من اراده ونفسيه وخبره واحتكاك واهداف وعقل نظيف

وبعدين اتفق معاك في الجزئيه ان الرجل رجل وماعليه من شخصيه مرته قويه ولا ضعيفه ولكن الذكور اكثر من الرجال في وقتنا الحالي

وهذه ا تفق معاك 100% ولا غبار عليه

وهذا وجب التوضيح لك

تحياتي ياسويت
:)

[حسن]

يعتمد على اخلاق الاب والام في تربية عيالهم .. فلا ترمي التربيه على وزراة التربيه او هيئة التعليم العالي لانهم مب هم اللي مخلفين عيالنا عشان نرمي عليهم تربية عيالنا .
وطبعا البيئه اللي يعيشون فيعا العيال له تأثير كبير اثناء غياب دور الاب والام في مراقبتهم نوع البيئه اللي حولين عيالهم من رفقاء السوء ..

الفرد هو المؤثر في المجتمع والمجتمع يقوم على افراد البيئه دائما نظيفه ولكن الانسان عدو البيئه واكبر مدمر لها

مقدمه بسيطه

كلامك كلام معقول وموزون اخلاق الاب والام لها دور كبير ولاام اكبر لانها المدرسه
ولا ننساى الحيز الاكبر من يفتح الى الدنيا الى ان يشتد عوده كله في حظن امه
الاب يستلم بعدين ويكمل المشوار في بناء الشخصيه
اختلف معاك في عدم وزاره التعليم وانا اقولها بالفم المليان اكبر خطاء الغاء وزاره التربيه من التعليم
هذا المنطق يطبق في المانيا عندهم انظمه قويه وعيال في قمه الادب
اما في الدوله العربيه ماتصلح يبا احنا العالم الثالث المتخلف هذه حقيقه وين وين نوصل الى تطور اوربا
باقيلنا مراحل كبيره

فانا اطالب باعاده وزاره التربيه والتعليم مثلها مثل باقي الدول
لان الطالب يقعد اكثر وقته في المدرسه واذا كان هناك تربيه صحيحه مثل الشويفات وغيرها من المدارس الاجنبيه
بتشوف تغير اما تجيك الام السانها يلوط اذانها ولا تكتب لك موضوع ولا في وطني الحبيب
وتقولك المدرسه ولا المدرسه قايله حق عيالي اف انا ماقولهم هذه الكلمه ولله الاف منك امثالك
ياامنا مهب كفو نقدر نشتكي على مدرس مع العلم كل صبحيه ناخذ فلقه
مهي كفو بس مدرس يقول حق اب ولدك سلوكه سئ
والحين من تسمع من يدافع عن العيال سؤاء هني ولا في كل مكان غير الام

انشاء الله وصلت لك الفكره ان الزواره تتحمل جزء كبير من العلميه وارجاع التربيه للتعليم
بحكم انهم يتسلمون الطفل ومن هو صغير واكثر وقت يقضيه معاهم فكيف مانحملهم المسؤليه !!

تحياتي لك يا قطر قطر

:)

[شيخ الديرة]

هناك كذلك جانب أخر في التعمد على تربية الأبناء على أن لا يكونوا خجولين او بناتيين في التصرف, وهنا يتم الخلط بين الوقاحة والشجاعة, والغوغائية وحب المبادرة. ... الخ

أبحث عن فيديو تحت عنوان "تف على عمك"

http://www.youtube.com/watch?v=sF-hS3NeYy8

[القبطان اكس]

هناك كذلك جانب أخر في التعمد على تربية الأبناء على أن لا يكونوا خجولين او بناتيين في التصرف, وهنا يتم الخلط بين الوقاحة والشجاعة, والغوغائية وحب المبادرة. ... الخ

أبحث عن فيديو تحت عنوان "تف على عمك"

www.youtube.com/watch?v=sF-hS3NeYy8



صدقت والله

في زعابيط جدامي يتحرشون في بالغين ..... صج يتكفخون , بس ايبينون انهم كبار .

[حسن]

الخلل فالبييييييت الخلل فالبييييييييييت يا اخوان

مرحبا يالفيصل

اكيد الخلل من البيت مافي شك وهو السبب الاول وغير الاسباب الاخري

شكرا ياخوي

وحياك الله

:)

[حسن]

هناك كذلك جانب أخر في التعمد على تربية الأبناء على أن لا يكونوا خجولين او بناتيين في التصرف, وهنا يتم الخلط بين الوقاحة والشجاعة, والغوغائية وحب المبادرة. ... الخ

أبحث عن فيديو تحت عنوان "تف على عمك"

http://www.youtube.com/watch?v=sF-hS3NeYy8



هلا هلا

حيالله بشيخ الديره وين هل الغبه ياخوك

صدقت

الصراحه صدمت من الفيديو هذا مدمر الله يخزي من سواه
يعلمون الطقل على ارتكاب الجريمه من الصغر

لا حول ولا قوه الا بالله

شكرا ياشيخ الديره

وشرفت ونورت الموضوع

:victory:

[ابن الخربة]

ياتري ايش السبب اللي مراهق يتتطاول ولسانه طويل بشكل بشع ؟
وكيف سلوكهم في المدرسه ؟
اين التربيه وين دور النشا وين دور الام وين دور المدرسه ؟
اخي حسن
اشكرك على اسئلتك وملاحظاتك ويبدو انك لم تشاهد ما يحدث في غالبية المدارس وبخاصة الثانوية والاعدادية ، الاجابة على اسئلتك يحتاج الى وقت طويل وتفكير عميق ودراسات متعمقة ومتخصصة لكني اشكرك جدا على استنكارك وشعورك المنكر لما حدث ويحدث كثيرا ولكن كان من الافضل ان تبدا الحديث مع والدهم لتنتقل للدرجة الاعلى من مراحل تغيير المنكر وهو اللسان بدل القلب .
في عجالة دور الاسرة بحاجة الى اعادة نظر في مثل هذه الحالة فهو العامل الاهم والاقوى ولا ننسى دور مؤسسات المجتمع التي انتقلت الى التكسب بدل التعليم والتنوير .

في اعتقادي ان فصل التربيه عن التعليم اكبر خطاء ولا صارت ؟