وهاذي صورة .. السايق .. الخادمة .. الطفله .. السياره

[ودي أكون]

السلام عليكم ورحمة الله وبركاته


وصلني اليوم على الوتساب .. رسالة الام/ الاب.. اللي تحتوي على تحذير.. مفادها ان السايق كان يروي طفله صور او فيديوات ف جواله ربما تكون غير لائقه.. جزاهم الله خير على هالتنبيه.. وفيها صورة للسايق مع صورة غير واضحه للطفله الحمدلله .. مع رقم السياره..

بصراحه انا يوم وصلني المسج عالوتساب ماحبيت ابدا هالحركه.. ومن شويات وصلتني للاسف مره ثانيه.. تم تناقل المسج للتنبيه

الهدف التنبيه .. حلو.. لكن تنبيه ب هالطريقه ب النسبه لي انا اشوفها غلط.. وهاذي تعتبر غلط ف حق الطفله او بحق كل من يعرفها او اهلها .!
وهالكلام مو بس حق هالسالفه.. حق كل السوالف اللي فيها امور شخصيه لاي شخص كان .. ك تصوير رقم السياره او او او ..


نعم اللي يخاف على اعيال الناس.. ينزل من السياره ويطلب رقم الام او الاب من الدريول او ادارة المدرسه وينبهم ويخبرهم ب هالشيء.. بدون تشهير

واذا كان بوده تنبيه .. ف بعد ما ياخذ رقم الاب او الام .. يطرش رساله تنبيهيه بدون صور او عالاقل بمواصفات السياره وانتهي الموضوع بدون ارقام الخ

اللي خلاني افتح الموضوع لان من فتره بعد نفس السالفه كان عن ولد صغير ماذكر الموضوع بالضبط.. بس اتذكر ان في رقم الموتر وماحبيت هالطريقة من التنبيه لاني حسيت ان فيها تشهير والله اعلم


انتو شرايكم ..؟

وبالنسبه للامهات والاباء.. الله يهديكم شلون اتأمنون اعلكم على الخدامه والدريول...؟!.. لو ذهب كان حافظتوا عليه اشد تحفظ...! .. ترا العيال اغلى من الذهب وكنوز الدنيا..
واللي مايقدر يوصل اعياله بنفسه .. والله ان الباصات أأمن من هالدريوليه والخدم

والله المستعان

[الجـــوديّ]

وعليكم السلام ورحمة الله وبركاته ،،

توني اقول على حق اهل الواتساب ان اللي صورت ماعندها سالفة الله يهداها

افضحت الناس وسوت بلبلة من غير اثبات ويقين

اذا تبي تروح تكلم اهل البنت باسكات مب في برودكاست


ونفسج انا استغربت شلون تنترك بنت صغيرة مع دريول أو أي ريال غريب !

[بوحارب]

جزاك الله خير ع الموضوع ودي أكون

انا اشوف التشهير ماله داعي*
وألاحظ الكثير صار يطرش مقاطع وخصوصيات الناس !!

والنقطة الثانية هي اللي تعور القلب
كيف الواحد يخلي بنته او ولده الصغير لعبة بين أيادي الخدم !!

الله يحفظ هالأطفال مساكين !

[qatara]

في ذمة الأمهات
الي تاركين امانه بهذا الحجم بيد الخدم
خاصة الأطفال الصغار لانهم مسئولية الام اكثر من غيرها

ويا كثر هالحالات

حسبنا الله ونعم الوكيل

[بصمة قطرية]

للأسف الجوالات اللي بكاميرات صارت سلاح ذو حدين ..
ممكن التصوير ينفع و ممكن يضر ..
يعني مثل ما قلتي انتهاك خصوصيات ناس ..!!
و تفس الوقت دليل و اثبات عشان الأهل يصدقون ..

الأطفال أمانه
حسبي الله و نعم الوكيل في كل أب و أم ضيعوا هالأمانه
و تركوا أطفال صغار مع دريول ..

[قطر love]

ما راح اتكلم عن الشق الاول لاني معترض عليه

بس الشق الثاني عن التربيه بكره الامهات والاباء بيكبرون وينرمون في دار العجزه او بيد الخدم والممرضات ويشتكون عيالنا عاقين ومايهتمون وقطونا اذا كانت تربيتكم من الاول غلط فهذا الشي راح ينعكس عليكم فالكبر ازرع تحصد !!

[حسن]

شكرا ياودي اكون على الموضوع

ماشفت الرابط ولا جاني ولا مستنكر بحكم اني اشوفه على الواقع
ويوميا وذكرت مرارا وتكرار ونبهت بخطوره الوضع بحكم اني في قلب الحدث
والمنظر اصبح كريه جدا ولا يشرف بلادي من مستوى الاهمال اللي وصلنا له
واعتقد اني طرح فكره باالزاميه الباصات وبقوه قانون وكانت هناك معارضه من البعض
من انه ركوب الباس يعتبر اهمال ولكن في وجهه نظرهم اهمال ابنائهم مع سائق وبعضهم بنات لحالهم واطفال
في نظرهم مهب اهمال يعتبر السائق ولي امرهم ويحل محل الاب
منطق عجيب وغريب وذكرته شيخه المسند في محفل دولي وهو سياده التناقض بشكل كبير
انا من مؤيدي استخدام هذه الاجهزه والتصوير لتوثقق الووقائع وانا استخدمها في حياتي
قد ينزعج منها البعض لان بينه وبين نفسه عارف ولكن مايبي يشوف الحقيقه وعن اهماله الجسيم وعيوبه
وطلبت من وجهه نظري سن قوانين لحمايه هؤلاؤ الاطفال ولو لزم القانون بالعنايه بهم من قبل مراكز ايواء مخصصه
مشكلتنا نكابر في الخطاء ولا حد يبي يعترف بالخطاء وهذه الظاهره شفتها بالانتشار
وسيطره الفوضوين على الراي الحكيم وتاثيره في المجتمع عشان مايبون يسمعون اخاطئهم
ولا يبون يصلحون انفسهم لانهم عاجزين عنها داخليها
طالبت بوضع ضوابط بالنسبه للعماله المنزليه وخصوصا في ضل الرواتب العاليه
بسبب رؤيتي المستقبليه بان الفرد عندا بيصبح عديم الانتاج ومرفهه فقط والغير يشتغل عنه
واخر تقرير للتنميه الادريه على مااعتقد كان مخزي مع ان البعض هاج وماج بسبه انهم هم
واخر شي يصايحون غثونا الاجانب
اذا كان هناك قرار بتقليل لااجانب او ناس هم خدم المنازل اللي مسببين صداع للجميع وضغظ من قبل منضمات حقوق الانسان


شكرااا ياودي اكون

ولي عوده

[monatee]

على اللي يصير بالدنيا و للحين في ناس هامله عيالها مع السواقين بروحهم ؟!!!

ولو ان الاشهار في البنت بهالطريقه مش عاجبتني والبنت صغيره مالها ذنب كلام الناس فيها

لكن يمكن الاهالي يحسوون من بعد هالصوره ويتعضون

[همر]

انا مع التشهير بالاهل ..

ليش تدافعون عنهم ؟!

ناس ضيعوا الامانه في اطهر خلق الله


ومحد يتأذى من التصوير ونشر الصور

الا اللي على روسهم بطحه .. اما الياهل

تكبر وتنسى .. هذا اذا ما نهشها الضيب اللي

مولينه اياها وضيع شرفها ومستقبلها وترك

لها بصمه ماتنساها طول حياتها ..


اي والله .. راعوا مشاعر الاهل ..


لو عندهم مشاعر ما ضيعوا الامانه ؟

لو عندهم احساس ماتركوا عيالهم للخدم

وركضه ورى الفلوس ..


اسلوب التصوير ماعاد يعتبر تنبيه او تحذير

واللي يشوفها بهالطريقه لي الحين نايم بالعسل ..


اسلوب التصوير هذا قرصه في اذون كل من ترك

عياله مع الخدم مش بس راعي الصوره عشان

ينتبه ويلا يا ماما روحي مع راجو .. بنتي غير ..

وراجو غير ..

[مختلفة عقليا]

السلام عليكم .,

احس من قله الذوق اصور وانشر وغيري ينشر (( عشان النصيحه او الموعضه ))

خيييير ., ما اتعرف زوايا الصوره ., !! تقدر اتصور كل شي من غير ما اتبين الاشكال والارقام .,

واذا ما يعرف يروح دوره ., واذا مستقصدها الله يهديه .,

ويسلموو

[القبطان اكس]

انا مع التشهير بالاهل ..

ليش تدافعون عنهم ؟!

ناس ضيعوا الامانه في اطهر خلق الله


ومحد يتأذى من التصوير ونشر الصور

الا اللي على روسهم بطحه .. اما الياهل

تكبر وتنسى .. هذا اذا ما نهشها الضيب اللي

مولينه اياها وضيع شرفها ومستقبلها وترك

لها بصمه ماتنساها طول حياتها ..


اي والله .. راعوا مشاعر الاهل ..


لو عندهم مشاعر ما ضيعوا الامانه ؟

لو عندهم احساس ماتركوا عيالهم للخدم

وركضه ورى الفلوس ..


اسلوب التصوير ماعاد يعتبر تنبيه او تحذير

واللي يشوفها بهالطريقه لي الحين نايم بالعسل ..


اسلوب التصوير هذا قرصه في اذون كل من ترك

عياله مع الخدم مش بس راعي الصوره عشان

ينتبه ويلا يا ماما روحي مع راجو .. بنتي غير ..

وراجو غير ..







ينصر ديييييينك يا افندم همر

[النظامي]

انا مع همر ..... خل الناس تنتبه لعيالها ...

تعبنا وحنا نقول وننصح وما فيه فايده

الله يحفظ عيالنا وجميع عيال المسلمين

[العلياا]

وعليكم السلام

امس كنت اتكلم مع خواتي عن نفس الموضوع وفعلا استنكرت الفعل الغريب
يعني لو بغت تسوي خير تنزل تكلم الدريول تاخذ رقم ولي الامر وتبلغهم بدون لا يحس
اما اني اصور لوحة السيارة وانشرها !!!!!

اما بخصوص الخدم والدريولية في ذمة اهليهم والله يستر على الجميع

[طبيب قطري]

وصلني البرودكاست ولاحظت ان البنت كانت قاعده ورا مب احذى كرسي الدريول وكانت واقفه بالنص بين الكرسيين وماشفتها ارفعت قميصها ولاش والسياره بها مخفي يعني مايندرى يمكن خدامتها قاعده ورا.. ماعلينا الله اعلم بنية اللي صورت بس انا اتفق معاكم المفروض اذا هالحادثه فعلا صارت مااسوي تشهير ولكن اروح اطلب من اداره المدرسه رقم الاهل واكلمهم اما التشهير بهذي الطريقه ماله داعي.

[المهاجر]

مع الراي اللي قول المفروض تاخذ رقم السياره وتروح لإدارة المدرسه تطلب الاتصال بأهل الطفله وتبلغهم باللي شافته وتنبهم

وممكن ترسل رساله عامه بعد ما تبلغ اهل الطفله فيها تحذير وتنبيه للناس من هالامور عشان يفوقون من هالغفله اللي هم فيها

وينتبهون لعيالهم وما يضيعون الأمانه

[ضوى]

عيارة وتشهير ويقدر صاحب السيارة يلاحقها قانونيا اللي صورت ، اللي يبي يسوي خير يسويه بالخفاء مب يفوشر به عشان الناس تعظمه وتمجده ، هاي كلام فارغ ، اقل شي اسويه ابلغ ادارة المدرسه واعطيها رقم السيارةوهي تتصرف على اساسه بطرق قانونيه ، وبالنسبه للصورة احتمال السيارة فيها شغاله واحتمال الام واحتمال اي شخص غير الشغاله ليش اشتغل سوء الظن جذي ؟

[بو خليفه 123]

ودي اكون - اتفق معك مليون بالميه !

و الله اعلم و حتى لا ندخل بالظنون لكن احس ان الموضوع الهدف منه التشهير

[مرتبش]

التصوير في هذي الحالة مايثبت اي شي.. غير واضح انها تطل في التلفون وهي قاعدة تلعب يمكن.. فاللي صور ما اثبت شي.. وادعى انها رفعت ملابسها.. واحنا شدرانا انه صادق او يتلاعب لاتاخذنا العاطفة بدون تبين.. ثانيا لليهال مع الدريول شبعنا مواضيع في المنتدى عن هالشي.. والكل يستنكر بس في الواقع اللي نعيشه السالفة في ازدياد .. قد تكون فكرة الباص الالزامي حل .. صج نتحول لدولة اشتراكية بس شكلنا مانمشي الا هالشكل مافي فايدة نتعلم الصح ونسوي الغلط

[يمامـة]

ما يحق لها تصور الناس بغير إذن هذا ابسط حق من حقوق الناس..
قانونيا راح تتعاقب..

ومن ثم هي صورت ليش تنشر الفيديو؟
عندها طرق افضل لتنبيه والدين البنت.. انها تمشي وراى السايق لين توصل بيتهم
وبكل ذوق اتطالب زيارة الام في الوقت المناسب وتنبيهها ان هالأمر صار وصار..

اما لو مافيها شجاعة انها تسوي هالشي ما اشوف يحق لها تصور وتشهر في الناس
وياليت نشوف رأي الشرع في مثل هالمواقف..

اليوم صارت توصلنا صور وفيديوهات عن ناس غافلين مصورينهم
علشان يعلقون على أمور غريبة او غير مقبولة وهات توزيع للمواد هذي
وشوف كم التعليقات والتندر والضحك عليهم..

[qatara]

التصوير لا يقضح الخدم بل يفضح بالدرجه الاولى
من تترك امانتها وبيتها الذي سيسئلها الله عنه
لوظيفه ليست مكلفه بها لا دنيا ولا اخره
وتركت وضيعت نصف طاقة المجتمع هدرا وهو طاقتها لبيتها
ولاماناتها التي كلفها وسيسئلها الله عنها
بعذر الحاجه والغلاء والبحث عن الذات والكشخه ووووو

طيب واين وظيفه الام وربة البيت والزوجه
من سيشغلها ؟!!!!!!!!!!!!!!!!

[وليف الشوق]

هذا تشهير ومايجوز هالشي خاصه في مجتمعنا
وانا اتمنى من ولي الامر تقديم بلاغ رسمي( عاجل ) بمحتوى الصور الشخصيه وخل الجهات الرسميه تاخذ مجراها القانوني في المتسبب ولربما يتم التعرف على الفاعل بذكاء ودهاء القانون في ظل التطور التكنلوجي الحالي ولما وصل اليه العلم في التعرف على الفاعل وكل امل بالله ثم في القانون انهم راح يتعرفون على الفاعل بشتى الطرق لكي يكون عبره للاشكال هذي اللي قاعد تصور بناتنا وعيالنا وارقام سياراتنا وتنشرها واعتقد ان فيه قانون معمول به بمثل هذه النوعيه من المنشورات او التصوير او الفيديو وهذي امور دخيله علينا كمجتمع محافظ على عاداته وتقاليده ولا نسمح لاي شخص كان ، العبث بأمن واستقرار البلد او استغلال الاجهزة المتطورة في انهيار وتفكك اسره بكاملها

[um.7moody]

استغربت من أغلب الردود الحين كلكم ضد التصوير والتشهير ونسيتوا الأهم اللي هي الأمانة حتى لوكان في شغاله بالسيارة
اسمها البنت لحالها بالسيارة مع سايق وشغاله المفروض ماتتواجد لحالها حتى لوعند باب البيت تركب مع الأم وتنزل معاها
اللي يترك اعياله بهالطريقة إنسان ماعنده ضمير حسبي الله عليهم وبعدين يقولون اعيالنا والسياق عمل والشغاله اعملت وانتوا وين كنتوا ؟

أصحاب هالصور يستاهلون وأكثر وأكثر وأكثر من ضيع الأمانه يتحمل مايجيه وأنا مع رد الأخ همر أروع رد بصراحه

[عثرة جواد]

السلام عليكم

موضوع مهم ياليت ننتبه له

انا مع التصوير ولو صار قدامي رح اصور ع شان اناس تبداء تستوعب المصيبة .

اعيال ضاعو بسبب الخدامة والدريويل ومازالو يضيعون غيرهم .

ليش انخاف من الحق دام الام هامله عيالها والاباء تخلو خل يشربون من الكاس

والله هااي قصة واقعية بنت عمرها 5 سنوات كانت تركب مع الدريويل اتروح اتجيب اخوانها

من المدرسة الدريول يقعدها ف حظنه وسوي لها حركات وعلمها ع هشي ويقول لها بعلمج لسواقة.

البنت تعودت ع هشي وركبت مع رفيج اخوها قالت ابي اسوق الريال قعدها ع ورجة قالت له لا ابي هنيه

يقول استغربت قعدتها وقامت اتسوي حركات خاف الولد ونزلها وقام وكلم اخوها راقبو لدريول ورقدوبه

بس بعد شنو لا حولا والا قوة الا بالله

حسبي الله ع كل من ضيع عيالة .

[qatara]

بالعكس ما اعتقد القصد التشهير بل التذكير بحجم الامانه الضائعه
واكبر سبب لضياعها خروج الام والاب عن دورهم واختلطت الادوار
كانت شوون العائله خارج البيت دور الاب وشوون البيت والاطفال دور الام
فطمرت الام على دور الرجل وطمر بعض الرجال على دور الام

وضاعت العائله بسبب الخلطي بلطي

[ودي أكون]

بالنسبه للمؤيدين لعمليات التصوير بهاذي الطريقه ..

سؤال .. هل انتو مؤيدين لان فيها تنبيه
او .. لان فيها تشهير وتأديب ع كلامكم للامهات والاباء اللي يتركون ابناءهم مع الخدم ..،؟

اغلب المخالفين .. ما اشوفهم خذوا الموضوع من ناحية ان فيه تنبيه..! .. وانما من ناحية ان اي اب او ام يترك اعياله فيستحق للتشهير..؟! .. معقوله هاي تفكير البعض!

نتفق ان الموضوع نعم فيه تشهير .. مو تنبيه

اولا.. لان التنبيه يكون بطريقه افضل واستر من هالطريقه الغير اخلاقيه.. اذا كان بالفعل الهدف التنبيه.. مع العلم ان كل ام واب فالدنيا ما يحتاجون تنبيه لانهم عارفين مخاطر الخدم من ذكر وانثى..!
واذا ع اساس التذكير .. فالتذكير ما يتم بطريقة التشهير.. هذا ثانياً

اما ثالثاً .. كان بامكان اللي قام/ قامت بالتصوير.. انها تاخذ رقم الكفيل وتكلمهم شخصيا.. او تلحق السايق لين باب البيت وتدخل اتكلم اهل الطفله.. او الرجوع الى ادارة المدرسه وتوصل لهم الرساله اذا كان المصور مو حاب ان يكشف عن نفسه.!،، والاداراه راح تتواصل مع ولي امر الطفله..!.. الخ


انا اعترف اني ما اعرف الطفله بس احس يمكن لو اعرفها مع الايام طبيعي ولا ارادي بشوف نفسي اسالها عن السايق هل كان يرويها شيء غلط او حاول يسوي شيء غلط او او او او .. فما بالكم المقربين من البنت..!
كم حد تتوقعون تم يستجوبها..!؟.. كم حد تم يخوفها..؟!.. شنهي الحاله النفسيه اللي في داخلها والخوف اللي صار فيها ..؟!؟..
وتتوقعون كم حد يتم يستجوب الاهل.،؟!.. وشنهي النظرة المجتمعيه اللي يشوفونها الغير نحو اهل الطفله الخ ..؟!

انتو مع احترامي همكم التشهير.. وهمكم ان الاب والام ياخذون عقاب الاهمال.. لكن الستر ابعد همكم.. والطفله ابعد همكم..
دينا وصانا بالنصح والتنبيه.. لكن مو بالتشهير .!؟!!!!


وفالاخير اشكر الجميع عالمداخلات .. وهدفي من الموضوع مو محاسبة اللي قام بالفعل لان هالشيء راجع لاهل الطفله.. انما الهدف عدم التعدي على حقوق الغير بالتشهير بهاذي الطريقه تحت مسمى ( تحذير الاباء على حساب الغير )

والله اعلم والله المستعان ولا حول ولا قوة الا بالله العلي العظيم

[R 7 A L]

المشكلة بعضهم بس يبي يبري ذمتة من غير تعب ومشاكل !

[أخت الكل]

يستاهلون الفضيحة وأكثر

والمفروض اللي صور ياخذ الصور ويروح لمؤسسة حماية المرأة والطفل يقدم شكوى رسمية على الوالدين ويروح للمركز الشرطة يقدم شكوى على السايق بعد

مجتمع متناقض يعني الام اللي تنشر افلام لخدامه تسوي شي غلط بأكل الاسرة عادي واللي يصور و يفضح اهمال وتقصير أم وأب مو عادي

وبعدين عزيزتي ودي أكون انتي تتوقعين لو اللي صور الصور وصلها للام تتوقعين الام بتتقبل الموضوع ولا بتهد عليه وتهاوش وتقول له انت تتبلى او انت وش دخلك بس لانها خايفه تنفضح

هالموقف بالضبط صار مع وحده شافت شي افضع من اللي صوره هالاخ و ما صورت لكن تبعت سيارة الهندي واول ما وصلت البيت كلمت الام وردت فعل الام كانت صدمة وزين ما تعرضت للضرب على يد الأم

[العقل المدمر]

التصوير لا يقضح الخدم بل يفضح بالدرجه الاولى
من تترك امانتها وبيتها الذي سيسئلها الله عنه
لوظيفه ليست مكلفه بها لا دنيا ولا اخره
وتركت وضيعت نصف طاقة المجتمع هدرا وهو طاقتها لبيتها
ولاماناتها التي كلفها وسيسئلها الله عنها
بعذر الحاجه والغلاء والبحث عن الذات والكشخه ووووو

طيب واين وظيفه الام وربة البيت والزوجه
من سيشغلها ؟!!!!!!!!!!!!!!!!



شدخل :eek5:
عيل وين وظيفة الأب والزوج بعد ؟! خلاص خلهم يقعدون فالبيت الأبو يساعد الأم في تربية العيال والزوج يجابل مرته ويأدبها !!

[basma222]

الغلط على الام شلون طفله في هالسن بروحها مع السائق
الاب والام هم المسؤولين عن عيالهم

عَنْ عَبْدِ اللَّهِ بْنِ عُمَرَ يَقُولُ: سَمِعْتُ رَسُولَ اللَّهِ صَلَّى اللَّه عَلَيْهِ وَسَلَّمَ يَقُولُ:

((كُلُّكُمْ رَاعٍ وَكُلُّكُمْ مَسْؤول عَنْ رَعِيَّتِهِ، الإِمَامُ رَاعٍ وَمَسْؤولٌ عَنْ رَعِيَّتِهِ، وَالرَّجُلُ رَاعٍ فِي أَهْلِهِ وَهُوَ مَسْؤولٌ عَنْ رَعِيَّتِهِ، وَالْمَرْأَةُ رَاعِيَةٌ فِي بَيْتِ زَوْجِهَا وَمَسْؤولَةٌ عَنْ رَعِيَّتِهَا، وَالْخَادِمُ رَاعٍ فِي مَالِ سَيِّدِهِ ومَسْؤولٌ عَنْ رَعِيَّتِهِ، -قَالَ: وَحَسِبْتُ أَنْ قَدْ قَالَ: وَالرَّجُلُ رَاعٍ فِي مَالِ أَبِيهِ وَمَسْؤولٌ عَنْ رَعِيَّتِهِ- وَكُلُّكُمْ رَاعٍ وَمَسْؤولٌ عَنْ رَعِيَّتِهِ))

[أخرجهما البخاري ومسلم في صحيحهما عن ابن عمر]

[المــزن*]

الصراحة الي صور هالصورة ماعنده سالفه
الله لايهينك انزل من سيارتك وكلم الدريول ولا من خلال رقم السيارة تقدرون تطلعون رقم الكفيل



انا شخصيا مريت بهالتجربة ولو دريت من الي سوا هالحركة ماسكت عنه!!

وصلني برودكاست في البلاك بيري

سيارة كذا ورقم سيارة ............ وقدام مدرسة............

انا بس يوم شفت رقم السيارة انصفق ويهي وانصدمت ومب مستوعبة!!



دريولي ياكل شي ماعرف شيسمونه مال الهنود

كاتبه فالبرودكاست دريول يتعاطي مخدرات !!!!!!!!!!!!!!!

استغفر الله شهالغباء زين ماشتكو فالشرطه بعد

زين ماعليج امر تعالي كلمي الي فالسيارة مب بهالطريقة وبدون ماتتاكدين تنشرين!! ( الي فهمته من البرودكاست ..بنت الي مصورة )


الله يحفظ عيالنا ويستر عليهم ... ويكفينا شر هالناس

[nono80]

والله انا اشوف ان الام هي المسؤوله عن اعيالها توديهم وتجيبه لانهم امانه في عنقها بس الحين شنو الحل مع الدوام وخاصه اللي تمنع التاخير في ظروووف الطرق الماساة والمصكرة والزحمه واذا بتطلع تجيبهم نفس القضيه لزم يكون في تعاون علشان نحارب هذي الظاهرة اللي انتشرت في الاوانه الاخيرة والاعيال امانه لزم تعاون مع الام العامله في الدوام حتي لويبون اثبات نجيب تقارير من المدرسه من تفتح الصبح ومتي ينتهي الدوام بس علشان نحافظ علي اعيالنا لانه اماااااااااااااااااااااااااااااااااااااااااانه كبيرة والله يعينا علي تربيتهم يارب ويستر علي اعيال الجميع