حد عنده فكرة عن اسطنبول

[الخيالة]

سلام عليكم
بغيت اسافر تركيه مع الأهل تقريبا 4 ايام
ونبي نروح اقرب منطقة في اسطنبول حق الثلج بنسكن في منطقة تقسيم

بغيت استفسر عن شقق فندقين بسعر معقول بما ان مانقعد فيها الا وقت النوم و شلون نوصل حق جبل او مكان اللي فيه ثلج و كم يكلف ناخذ تكسي ولي باص ولي سفينه

اذا عندكم فكرة لاتبخلون علي السفره ان شاءالله ثالث أسبوع في فبراير

[حفيد الأنصار]

الثلج تجدوها ببورصة
تروحو لها بالعبارة من اسطنبول
45 دقيقة تستغرق الرحلة .. طبعا يتم شحن السيارة بالعبارة
ولما توصلو خلو السواق يوديكم للجبل .. اتذكر رحنا له بفصل الربيع وكان على قمة الجبل كان فيه ثلج
وبهالوقت أكيد تحصلون الثلوج بشكل اكبر .. وطبعا بأمكانكم ترجعون لـ اسطنبول بالمساء أو تسكنون ببورصة وترجعون لـ اسطنبول بأي يوم آخر
سبق وجربت الرحلة بالعبارة بصراحة متعععععه .. خاصة العبارة مرره جميلة وماتحسون بالوقت كأنها 10 دقايق
طبعا انا من وجهة نظري وخاصة بما انكم عوائل فالأفضل تاخذون لكم سواق وهوا يوديكم ويعرف الطريق بالتأكيد


الفنادق أنصحك تدخلي بوكنق بنفسك علشان تشوفي المناسب
سوي بحث لـ اسطنبول ( تقسيم ) .. وبتحصلين بأسعار مختلفة ومناسبة جدا
الله يوفقكم وتروحون وترجعون بالسلامة ان شاء الله

[الخيالة]

مشكور اخ الحربي

بس العبارة بتكون في وين ؟ بنسكن في تقسيم من اهناك شلون نوصل حق مكان اللي فيه العبارة و بكم للشخص اذا مع العبارة؟ لان ابي أخذ فكرة عشان محد يقص علينا اهناك

[H H]

الثلوج بتلقونها في بورصه , اذا بتسكنين في تقسيم بتلقين مكاتب كثيره للرحلات السياحية احجزي عند اي واحد فيهم رحلة لبورصه
ويختلف سعرها اذا بتاخذون سياره لحالكم والا بتطلعون رحله مع الناس الثانيين , كانو ياخذون تقريبا 55 الى 65 دولار على الشخص شامل الغدا
رحلة من اسطنبول للعباره لبورصة وللغدا ولمحلات الحلويات المشهوره و للجبل لمكان الجليد والتزلج وغيره ومسجد شلبي , محل الاقمشه الشهير(السوق المغطى)
ويرجعونك لاسطنبول.

بالتوفيق

[حفيد الأنصار]

اختي بالنسبة للعبارة اعتقد يأخذون المبلغ ع السيارة
أهم شي اتفقو مع السواق من بدري بكم يوديكم بورصة للثلوج وتكون شاملة النقل بالعبارة
وعاد اذا بتطلعون مع مكاتب رحلات مع ناس كثيرين هذا شي ثاني .. يعطونكم عرض مثل ماقال الأخ h h
وبتحصلون مكاتبهم بتقسيم عند الدوار ( ميدان تقسيم )
وكمان هناك تحصلون باصات سياحية يلف فيكم بأهم المواقع السياحية باسطنبول مع الشرح لكل مكان طبعا وسعرها معقول
أهم شي اذا رحتو بورصة لاتنسون تمرون على محل حلويات الحلقوم .. أشكال وأنواع وأسعارها حلواآ وتنفع هدايا


يعني من الآخر أمامك خيارين .. اما تأخذون سواق وتتفقون على كامل المبلغ معاه مع سعر النقل بالعبارة طبعا
أو بتحصلون مكاتب سياحية بميدان تقسيم وتشوفون عروضهم بكم الشخص طبعا شاملة النقل بالعبارة
مع المكاتب والقروبات السياحية بتكون أرخص .. لكن اذا انتو كثيرين وعائلة برايئ تأخذون سواق أريح لكم وتكونون مو مقيدين بوقت معين



وبداخل اسطنبول اذا انتو بس كبار وما معاكم اطفال أنا برايئ ماتحتاج تأخذون سواق
المواصلات العامة من باصات ومترو والترام تكفي وتوصل لكل مكان وأسرع وأسهل

[الخيالة]

شكرًا لكم

[فــلان]

مشكور اخ الحربي

بس العبارة بتكون في وين ؟ بنسكن في تقسيم من اهناك شلون نوصل حق مكان اللي فيه العبارة و بكم للشخص اذا مع العبارة؟ لان ابي أخذ فكرة عشان محد يقص علينا اهناك

أختي العباره بتاخذينها من ميناء كاباتاش و المسافه له من تقسيم أتوقع ما تتجاوز ال30 دقيقه و سعر التذكره لبورصه سعر بسيط جدا ً وممكن ما يتجاوز 20 ليره تركيه بمعدل 40 ريال للشخص

[فــلان]

أنا في رحلتي لتركيا برفقة زوجتي إعتمدت على نفسي و دخلت بين الأتراك

والنتيجه كانت طيبه و وفرنا بشكل كبير أو بالأصح صرفنا كل ليره في محلها وتفادينا الإستغلال.

جاني واحد في ساحة آيا صوفيا يوزع عروض لجولة كامله على البسفور بالعباره و أشوف الأسعار 45 ليره و 35 ليره بعد الخصم.

طبعا ً أشكالنا على المنطقه المتواجدين فيها سياح 100% , المهم قلت لها خليه يولي إمشي,

خذناها ثاني يوم من على باب العباره و إحنا داخلين ب 10 ليرات للشخص :)

[رهج السنابك]

تركيا لاحظت اسعار الفنادق سعر تراب والله عكس الخليج فندق اربع نجوم مايسوى بتسع الالاف لخمس ايام
بتركيا اسبوع كامل وتحصل بالف وسبعميه والفين ريال فنادق خمس نجوم وفخمه جدا

يعني لا تحاتي الفنادق

[ولـ قطر ـد]

السلام عليكم ورحمة الله وبركاته

بالبدايه أتمنى للجميع التوفيق

اذا أي احد أراد ان يذهب الى أي بلاد يجب عليه ان يرى أشياء اساسيه في السفر
كمثال يعني تقدرون تقولون
السكن
العمله المستخدمه
المواصلات
الاكل
أماكن الترفيه

.. فا لو جينا و اخصينا تركيا ( إسطنبول ) بالأساس
راح اشوف من وجهه نظري مكان السكن المناسب هو تقسيم وذلك لانها تعتبر يعني هي قلب
إسطنبول
وفيها تبتدي الأسعار من بوكينج من 240 ليرة الى ....... فلوس جيبك .. ونصيحتي .. انت رايح تتفسسح يعني لا تأخذ لك شي غالي

وبالنسبه الى العمله المستخدمه في تركيا .. نصيحه اخووو .. لحد يستخدم غير عملتهم الي هي الليره .. على أساس ما يكون مجرج عليك زياده
والعملة التركيه تساوي بالتقريب .. 1.6 ريال = 1 ليرة

يعني أي شي تشوفه .. اضربه في 1.6 راح يطلع لك سعره


...
انجي الى المواصلات وهذي النقطه المهمه يعني في إسطنبول ..
انا اشوف ان التكسي هذا ما تركبه الا وانت جاي الفندق من المطار او انك يعني راح المطار ... او كلش كلش في الشديد القوي لو كنت ضايع

وسائل المواصلات في إسطنبول متعدده

عندك المترو .. سعره لو بتاخذ كرت إسطنبول ب 2 ليره لكل مره دخول مترو
وعندك بعد الباصات ونفس الشي 2 ليره
وعندك أيضا الترام وهو يبتدي من منطقه ( كبتاش ) قريبه من ( تقسيم )
بشكل عام يعني ترى مشكله المواصلات جدا محلوله اذا كنت تريد التوفير في الرحله لان التكاسي وايد وايد غاليه بنسبه الى انه يوصلك مشوار وبعد بيكون مدخلك في
زحمه مالها والي .. الحلو في المترو انه مرتبط بالمحطات الي تقدر تنتقل فيها من خط سير الى اخر يعني لو مثال ترى تروح من منطقه ( تقسيم ) الى ( السلطان احمد )
تقدر تركب المترو الى كبتاش ومن ثم الترام الى السلطان احمد


بالنسبه الى الاكل ..

انا اشوف انك رايح بلاد فيها اكل خاص لها فا دور الشي العجيب في كل يوم وهذا الشي أيضا يعتمد على جيبك

بالنسبه الى أماكن الترفيه في إسطنبول فا هي لو تقعد أسبوعين يالله يالله بتخلصها .. من المعروف منها هم ( جزر الاميرات - تله العرائس - توبي كابي + أيا صوفيا - المولات وهم كثيره - الأسواق مثل كادي كندي انصح فيه رخيص وما يتكلمون لا عربي ولا انجليزي فاهذا يدل على انه رخيص .. بايزيد بازار وهذا نفس سوق واقف لأول بس فيه أشياء شفتها غاليه بنسبه الى سوق كادي كوي )
ولو تسووون سيرج على الانتر نت للاماكن الترفيهيه في إسطنبول ترى مب خالصين لانها ما شاء الله عليها مكان ما يخلى من الجمال

.. ملاحظه .. بورصه : تقدر تروح لها من منطقه ياني كابي الي الطريق لها من تقسيم بالمترو ( تقسيم >> شيشايني >> هينيك ( فوق الجسر ) >> فزيونير >> ياني كابي ) بعدها بالعباره 45 دقيقه الى بورصه
وترى بورصه يبي لها يووووم كامل يعني نصيحه احجز لك فندق ثاني وخل اغراضك في الفندق الي با إسطنبول وفك عمرك من الروحه والرده وانت شايل شلايلك


وبالتوفيق للجميع
..

[ولـ قطر ـد]

http://www.istanbul-ulasim.com.tr/media/24900/ag_2200px_1546px-01.jpg

خريطة
مترو إسطنبول

ملاحظة : الخط الأبيض قيد الانشاء .. يعني للحين ما سوواه .. وبأمكانك تأخذ الخريطة في أي محطة من محطات مترو إسطنبول .. فقط اسأل عنها

وقيمة كرت إسطنبول 7 ليرة ويكفي تعبيه 20 ليرة ونصيحة .. كل شخص يكون معاه كرت .. لان في كل مره تستخدمه يجرج 2 ليره وفي استخدامه لنفس الجهاز يتضاعف السعر فا
على أساس اتكون موفر على نفسك .. خذ لكل شخص كرت وخله يكون بالجيب .. يكون كل ما دخل المحطه يستخدمه

[ولـ قطر ـد]

http://www.m5zn.com/newuploads/2013/05/14/jpg//m5zn_6c8d5b8e535effd.jpg

خريطة توضح بعض الأماكن الترفيهه في إسطنبول أيضا تساعد بنسبه كبيره للوصول الى بعض الأماكن المتواجدة في إسطنبول
من مطاعم و متاحف و حدائق ...

ونصيحة ,, اذا كنت من مستخدمي الايفون او الاندرويد .. استخدم الماب ( map ) على أساس ما اتضيع و وحاول تعرف وين مكانك و وين اقرب محطة له ...
راح تختصر الوقت وتتفادى الضياع بنفس الوقت

[الخيالة]

شكرًا لكم
بس احنا مانبي نطول في بورصه بس اليهال يبون الثلج نروح كم ساعه و نرجع في ناس يقولون وايد بعيد من التقسيم ظ¨ ساعات في ناس يقولون قريب ماعرفت الحين شلون ؟؟؟؟

[حفيد الأنصار]

بورصة الثلج بيكون على قمة الجبل وفيه تلفريك
وكلها ساعات تجلسون بالجبل .. لكن يبغالكم وقت بالعبارة ووقت بزيارة محل حلويات الحلقوم
يعني من الآخر بورصة احسبو لها يووم كآمل ..؛ تطلعون الصباح وترجعون بالليل

[بوNasser]

شكرًا لكم
بس احنا مانبي نطول في بورصه بس اليهال يبون الثلج نروح كم ساعه و نرجع في ناس يقولون وايد بعيد من التقسيم ظ¨ ساعات في ناس يقولون قريب ماعرفت الحين شلون ؟؟؟؟

السلام عليكم ورحمة الله

احنا خذنا سيارة فان مع سايق بسعر (400$ دولار) خذنا من الفندق بتقسيم وعبرنا الجسر لين وصلنا ميناء "يالاوا" تقريبا خذنا ساعتين مع زحمة الجسر، المهم ركبنا العبارة مع سيارتنا وخذنا تقريبا نص ساعة لين وصلنا الضفة الثانية ومنها كملنا الى بورصة حوالي ساعة او زيادة شوي لين وصلنا التلفريك. ومن التلفريك الى اعلى الجبل خذنا بعد حوالي نص ساعة وزيادة شوي بسبب زحمة الناس.

الوقت من تقسيم لين لمسنا ثلج بورصة بأيدينا (ساعتين+نص ساعة+ساعة+نص ساعة= 4 ساعات تقريبا)


ومن الجبل تاخذون ميني باص او تكسى فوق الى المطاعم والتزلج وغيرها (( انا احسب ما فيه الا ثلج بس فوق، طلعت بلاد كاملة، محلات، كافيهات، مطاعم، سكن، سيارات ... وكل شي)).

ونصيحة اعملوا حسابكم في الملابس المتينة والقفازات، ولاتنسون ((الله يعزكم)) الأحذية اللي تدفي ولا تطيّح ولا تزلّق، بناتي قاموا يشتكون من اطراف اصابع ريولهم من البرد..ويتحسفون على شمس الدوحة.

ومسافة العودة طبعا بتكون اطول شوي لأنكم بتتمشون في المدينة عقب ما تنزلون من التلفريك، وبتتسوقون شوي.

[الخيالة]

شكرًا لكم
ملابس عندنا كله حق الثلج واتربروف هاي لازم اصلا*

جزاكم الله خير

[qatarman8008]

مكن حد يعطينا فكرة اكثر عن الاماكن السياحية المذكورة ..
شنو الفعليات او الاشياء اللي ممكن نسويها او نشوفها..
عشان يكون واضح حق اللي يقرون الموضوع ويعرفون يختارون الاماكن اللي تناسبهم..
يعني في ناس تحب الاماكن الطبيعية.. ناس تحب الاثار.. ناس تحب التسوق وكذا..

[الخيالة]

الحمدالله رجعت من السفر و قضينا احلي ظ¥ أيام في اسطنبول و رحنا كذا مكان

[jassas]

الحمد لله على السلامه يالخياله وننتظر التقرير

[ام امااني]

بالتوقيق ورحلة موفقة واجازة سعيدة