كراسي مجلس الرجال

[qatar 86]

السلام عليكم

أبي أفصل كراسي لمجلس الرجال ( خشب الزان المصري - كرسي مفرد )

رحت فرساي أسعاره غاليه

في محل ف خميس وجمعه اسمه خان الخليلي سعره زين بس جودته مب لين هناك

والحين افكر اطلب من مصر سيده او من السعودية

( ابغي اسماء محلات مجربينها ؛ وهل ممكن هم يشحنون لي البظاعه لين الدوحة )

أنا مابي أسافر ابي اخلص معاهم عن طريق التليفون او مندوب

[QtrGate]

اخشب الزان المصري غالي
انا طلبت حق الميلس
طلع علي 60الف مع التوصيل
من مصر الى الدوحة

[شمس المغيب]

حالياً في معرض الربيع الخيري
خيمة مقابل سباير في العزيزية
في كذا محل مصري عارضين هذا النوع من الكراسي

[qatar 86]

حالياً في معرض الربيع الخيري
خيمة مقابل سباير في العزيزية
في كذا محل مصري عارضين هذا النوع من الكراسي

شفتهم محلاتهم بعد على طريق سلوى بس غلاية

[qatar 86]

اخشب الزان المصري غالي
انا طلبت حق الميلس
طلع علي 60الف مع التوصيل
من مصر الى الدوحة

ممكن رقم المصنع والاسم

[Azizuk]

اذا تقدر تروح مصر في مدينة دمياط هم المشهورين عندهم افضل كراسي

بس لازم تشرف عليهم حتى وقت التحميل لان كثير سمعت عنهم انهم يغشون

ومن اكبر الشركات اللي تصنع حق أوروبا شركة عسل وتصنعه لك خام وانت في الدوحة تنجده وتصبغه

وفي شركة ثانية بعد تعتبر من الشركات المحترمة بس ناسي الاسم

عندك مصنع الاثاث المصري والقطري اللي كان عند دوار المجنون الحين انتقلو عند مدماك بعد تدمر وجنب حلويات العكر ومخزونهم في شارع 38 او 36 في الصناعية القديمة اخر الشارع

واسم المحل تغير من الاثاث المصري الى اسم مب متذكر شنو بالضبط يمكن اكسبشن

عنده شغل راقي بس غالي

اهم شي في خشب الزان لازم الكرسي يجيك منحوت وصله كامله مب مقطع و وزنه خفيف

في أطقم توصل اسعارها 150 الف في طريق سلوى جنب البتيل على شنو مادري

مع العلم ايام المعارض القديمة كان في واحد مندوب من شركة عسل يبيع الطقم ثلاث كراسي مفرده مع كرسي ثلاث أشخاص وثلاث طاولات صغار وحده كبيرة خشب صافي من غير صبغ وتنجيد ب 3000 دولارا

نابكو عنده أطقم صناعة ماليزية بس بعد سعره غالي

معرض الجميل عنده صناعه تركية وصناعة كويتية

الكويتي على 50 الف الطقم بس يجيك طوالي يشيل اكثر من اربع أشخاص ماجيك مفرد وحلو شكله

مجلس 6 في 9 يحتاج اربع أطقم يعني ممكن تقول مع الطاولات وفتحات البيبان 16 كرسي مفرد

وإذا المجلس كامل ومن غير فواصل لطاولات وعندك فتحت الباب صغيرة تحتاج 36 كرسي مفرد

[شموخ دائم]

,

,


مرحبا


اخوي الكريم


حاسب يخطفونك في مصر
:)
تذاكرك وسكنك والشحن والسائق والبخاشيش بيوصل فوق ال 20 الف
من غير سعر البضاعه ومن غير الي بيوصلك ناقص ومكسر


خلك على فرساي شغلهم نظيف واختار ديكور عادي ( كلاسيك ) مافيه نحت على الاطراف بيطلع السعر مناسب جدا ومعقول

الاماكن الثانيه المشابهه له شغلهم لك عليه لا من ناحيه مواد ولا من ناحيه تشطيب وصبغ

ولا من ناحيه الوقت بياخرونك كثير

,

’

[qatar 86]

Azizuk / شموخ دائم

جزاكم الله خير ؛ عشان جي كنت رافض فكرة السفر وقاعد ادور شي فالدوحة

[hamadazoz]

فيه محل ع طريق سلوى بعد الدولي الاسلامي اسمة القاضي بضاعتة حلوة و السعر على حسب الطلب عندة انواع كثيرة وحلوة



لو ماعجبك فيه محل في الامارات صاحبة رجل محترم شغل دمياط روعة وامين يعني لو بتروح مصر هو بيسوي الشغل لك من الامارات المهم المحل في ام القيوين على دوار الاتحاد

[QtrGate]

ممكن رقم المصنع والاسم

عندي واحد مصري يطلب من المصنع لين الدوحة

الي يبي يطرش رقمه خاص
http://i.imgur.com/nxtYTBn.jpg

[ولد المنصور]

والله قبل ماشوف كلام اخوي شموخ , , كنت بقولك خلك على فرساي احسن وارخص الموجودين واظمن . . .