طالب المساعدة..رجاء لاهل الخبرة

[فقط قطر]

صار لي فترة الاحظ تسريب ماء...من الدور الثاني على المطعم..بالدور الارضي

وتعبت مع هالناس اللي يجوني...اغلبهم مايعرفون شيء والله.
غيروا لي بلاط الحمامات وغيروا لي العازل...والبلاط...
ورجع مرة ثانية التسريب.
فعرضت الموضوع على كم واحد غيرهم...وقالوا لي من البانيو...وغيرت البانيو
ورجع التسريب مرة ثانية...

تكفون....يالربع..اذا احد مر في مثل هذي التجربة..او احد عنده خبرة...يفيدني..

[khaldoon]

اخوي المسأله بسيطه..... في تسريب و العازل اللي فوق مركب غلط او انه تعرض للتخريب ..... لازم تخلي مقاول يفهم يركبه و يعطيك عليه ضمان عشر سنين على الاقل

[$الملياردير$]

اخوي من وحي تجربة بسيطة اول شي لازم تفصل الماي عن الحمام كم يوم و اذا جفت منطقة التسريب بيكون بيبات الماي ال بي بي ار بايب تسرب في الطوفة و تنزل بين الطابوق في ارضية الحمام .... وفي رأي اخر انك تحول التمديدات من الداخلية الى خارجية بعمل التمديد فوق البلاط من المحبس في الداخل للحمام من الدكت فوق البلاط و بذلك تكون ألغيت الشبكة الداخلية المخفية الى شبكة خارجية ظاهرة بس في هذا الحمام و اذا توقف التسريب نهائيا سوف يكون السبب من بيبات الطوفة هذا و العلم عند الله حبيت أشارك بحل من خلال تجربة الله يوفقك

[qatar 86]

اعتقد من البيبات اللي فالطوفة

اقطع الماي كم يوم عن الحمام وشوف

[معماري قطري]

إِذا فوق حمام التسريب من الحمام .. أَما من الصرف الصحي أَو من تصريف التكييف أَو من تغذية المياه .. العازل يستوي مثل الصحن اللي يتجمع فيه الماي ويتسرب من الأَطراف ويدخل من الطوفة لأَرضية الحمام اللي هي سقف الغرفة تحت وينقط منها .. أَو حتى العازل غير فعال ويتسرب الماي من عدة نقاط منه.

العملية في غاية السهولة لو سوينا فحص ضغط لبايب المياه المغذية لهذا الحمام وجهاز الفحص موجود عند كل مقاول تمديدات وبسهولة يقدر يسويه .. ولو لاحظنا تسريب معناها فيه فتحة في أَحد بايبات التغذية نزيد الضغط وننتبه من وين يسرب الماي ونحل المشكلة في مكان التسريب .. لو ما فيه تسريب نتجه لفحص تصريف المكيفات بالهواء المضغوط .. هذي البايبات لاحظت مره يمددونها ويحفرون لها فتحة في بايب الصرف مكان ( الصفاية ) والحفر يكون بسكين وتقطيع بدائي يخلي الأَطراف تسرب ويسكرونها باسمنت .. تبقى فترة بدون تسريب بس من يزيد الماي يبدأَ التسريب وهذي حلها يتطلب تكسير حول الصفاية بس واصلاح الخلل وتسكير المنطقة باسمنت وبلاط نفس الموجود أَو حتى مشابه .. بتبقى عندنا مشكلة المياه الموجودة وهذي لازم تتنشف بالشفط أَو بطريقة ثانية.

ذكر لي أَحد الإِخوان المهندسين القديمين والمشرفين على بناء مشاريع كثيرة بأَن واجه المشكلة واضطر يكسر أَرضية الحمام بالكامل واكتشف إِن بايب الصرف الصحي مركب بدون وصلة خاصة اللي تجي أَعرض بشوي من 4 انش ويدخلون فيها البايبين وتتسكر بلزقة قوية خاصة .. يقول كان العامل حارق البايب ومدخله في الثاني وباقية فراغات تسرب مغطيها بشوية اسمنت وإِحنا نعرف إِن الاسمنت ما يمنع الماء ويتسرب لفترة لين ينترس ( الصحن ) ويفيض من الجوانب وينزل على الأَرضية ويشرف كنقاط ورطوبة وممكن رطوبة واضحة على السطح .. حتى لبايبات الصرف هناك فحوصات ممكن تعمل وبعضها تجي بفتحة صرف من الخارج تفتح ويدخل فيها قضيب حديد للتنظيف .. وممكن من هذي الفتحة تركيب مكينة ضغط لفحص البايب.

توقعي ما دام تم التكسير واعادة البناء بأَن لم يتم التركيز على بايبات الصرف ويوم وصلوا لها شافوها مجبرة بالاسمنت وخلوها مثل ما هي ورجعت تسرب ورجعت المشكلة.

[معماري قطري]

اخوي المسأله بسيطه..... في تسريب و العازل اللي فوق مركب غلط او انه تعرض للتخريب ..... لازم تخلي مقاول يفهم يركبه و يعطيك عليه ضمان عشر سنين على الاقل

العازل إِخوي خلدون هو خط الحماية الأَخير وبدونه ممكن لو البايبات موصلة صح ما يكون فيه تسريب .. ومن فوق البلاط يتركب بمونة ما تسرب الماي وتنعمل الأَطراف صح أَو يتركب سيلكون مثل الفنادق فلا يدخل الماء للجدار ومن ثم للأَرضية .. وكثير من مباني العالم معمولة بدون عازل مثل اللي نسويه .. وصدقني العازل ما يفيد لو فاض الماي منه بعد ما يتجمع فترات طويلة.

[خزامئ]

حن صادفتنا ذي المشكله
وطلع من وصله بيب الماء الي داخل الطوفه للخلاط

[khaldoon]

العازل إِخوي خلدون هو خط الحماية الأَخير وبدونه ممكن لو البايبات موصلة صح ما يكون فيه تسريب .. ومن فوق البلاط يتركب بمونة ما تسرب الماي وتنعمل الأَطراف صح أَو يتركب سيلكون مثل الفنادق فلا يدخل الماء للجدار ومن ثم للأَرضية .. وكثير من مباني العالم معمولة بدون عازل مثل اللي نسويه .. وصدقني العازل ما يفيد لو فاض الماي منه بعد ما يتجمع فترات طويلة.

متفق معاك مية بالميه

[فقط قطر]

اول شيء شاكر لجميع على التواصل...وبيض الله وجهيكم..

في احد عنده رقم شركة والا رقم واحد ممكن يكشف لي على هذا الموضوع....

واكرر شكري للجميع...

[مرتبش]

لو
لو الماي يتسرب من ارضية الحمام الى تحت البلاط بسبب غسيل الارضية.. شنو الحل بما ان العازل يجمع الماي والرطوبة ترتفع في الطوفة.. عندي البلاط تشلخ واعتقد هذا هو السبب

[معماري قطري]

لو
لو الماي يتسرب من ارضية الحمام الى تحت البلاط بسبب غسيل الارضية.. شنو الحل بما ان العازل يجمع الماي والرطوبة ترتفع في الطوفة.. عندي البلاط تشلخ واعتقد هذا هو السبب

أَهم نقطة هي عمل توصيل التمديدات بلاصق قوي وتثبيتها جيداً وفحصها من البداية حتى نضمن توصيل المياه وعدم التسرب من الصرف الصحي .. النقطة المهمة الثانية هي رفع العازل من الجوانب حتى يوصل لتحت بلاطة الحائط الأَخيرة السفلية وتركب بلاطة الحائط بحيث تكون نازلة عن مستوى خط بلاطة الأَرضية .. النقطة الثالثة هي التأَكد من تركيب بلاطة الأَرضية على صبية قوية بسمك حول 5 سم ويزيد كلما كبر الحمام في المساحة .. وهنا ينصح باستعمال اضافات مقوية للصبية كسائل خيوط الفايبر .. وطبعاً بعد عمل سلوبات مناسبة لتصريف المياه ناحية فتحة الصرف.

نقطة مهمة قبل تركيب بلاط الأَرضية وقبل الصبية هي فحص العازل وفحص البايبات بضغطها بالماء .. وبعد الصبية وقبل تبليط الأَرضية نسوي فحص سيلان الماء وتوجهه نحو فتحة الصرف وهذي بصب القليل من الماء وملاحظة مكان تجمعه فنزيد هذا المكان بمونة خاصة قوية .. ثُم يتم تركيب بلاط الأَرضية وفحصه أَما بجهاز الليزر أَو بأَجهزة القياس الأُخرى الخاصة برؤية الميلان ناحية الصرف الصحي .. بعد الفحص والتأَكد من أَن البلاط راكب بمونة لاصق قوية نحط القراوت الخاص اللي هو المونة اللي تدخل بين الفواصل .. هنا البعض يستعمل الاسمنت الأَبيض وهذا يسرب رطوبة لتحت والبعض يركب المونة بدون اهتمام وملأَ للفجوات كلها فتنفتح ويتسرب الماي لتحت.

طبعاً هناك مونة خاصة تكون كالصبغ تعزل الصبية حتى لو تسرب ماء بين البلاط فالصبية معزولة فلا يتسرب الماء تحتها .. لا ننسى أَن الصبية الآن غطت جزء من بلاطة الحائط الأَخيرة ووفرت حماية من هذه الزاوية ثم بلاط الأَرضية يوفر حماية مضاعفة ثم العازل المغمور تحت جزء من بلاطة الحائط الأَخيرة ثم تأَتي المونة العازلة لو ركبناها ولو لم نركبها يأَتي البلاط بتركيبه الجيد وبالمونة الخاصة بين البلاطات .. وهنا أُوجه انتباهكم لوجود مونة قوية بحبيبات صغيرة جداً وبأَلوان عدة حتى منها النفسجي والأَخضر الفاقع وهذه يمكن لها سد فراغات لحدود 2 سم وتعطي شكل معماري جميل بدون أَن تتغير وتسود أَو يصيبها العفن .. وهناك مونة الايبوكسي وهي قوية جداً وغالية وكل هذه الأَنواع لها طريقة خلط ومقادير خاصة ولازم الفورمان يشوف المورد حتى يتعلم منه هذه الطريقة .. ثم تخلط بخفاق كهربي خاص وليست باليد كما يفعل بعض المقاولين الربع كُم.

[قــلــق]

هالمعاناه من مقاول التسليح بالاصل
ولكن الله يعينك
اهم شي تعرف مكان التسريب وتوقفه وعقب الحل بسيط