شركات تنسيق و تنفيذ المساحات الخارجية landscaping

[Hamad_qa]

السلام عليكم
ممكن أفضل شركة في قطر تقوم بتصميم و تنفيذ المساحات الخارجية من ممرات و حدائق
شاكر لكم مقدما

[معماري قطري]

اعرف شركة الثلاثي .. ومتخصصة في الزراعة العمودية وعندها تجهيزات خاصة

وشركة عمانية تشتغل في قطر للمشاريع الكبيرة

[Hamad_qa]

يعطيك العافية اخوي معماري
دخلت موقع شركة الثلاثي www.althulathi.com و احس شغلهم في اللمسات الاخيرة finishing يعني متوسط

[معماري قطري]

ما جربت شغلهم كلش بس كنت في معرض وعجبتني طريقة الزراعة الرأَسية على واجهات المباني وشفت القوالب اللي تنتجها الشركة للزراعة وطريقة سقيها وتواصلت معاهم حولوني على الوكيل لهم اللي هو شركة الثلاثي .. تواصلت معاهم فترة ودلوني مكانهم من حول 5 سنين ولا رحت لهم .. عندهم طريقة تصريف للماي الزايد وحفظه في خزانات تحت الأَرض ثم استعماله للزراعة .. وعندهم قوالب الزراعة اللي للعشب تدوسها السيارة ويبقى العشب والأَرضية ما تتأَثر.

[شموخ دائم]

,

,


مرحبا


روت قطر

جربناها في مشروع كبير وما جربناها للبيوت للاسف

www.rootsqatar.com

عندهم واحد اسمه
biju abraham
اسعارهم مو بسيطه لكن فيها سستم ممتاز

وماخذين مشاريع كثيره وحدائق للدوله

تقدر تاخذ منهم عرض سعر وتخطيط للحديقه
مع لسته للنباتات بكل انواعها وطريقه توزيعها ونظام ( الري )
واسم المكينات الي راح تتركب

واذا ماعجبك السعر تقدر تنفذها بالطريقه الي تناسبك مع افراد وليس شركات
وتكون عارف وملم بالتفاصيل وتطلب هذه الانواع الممتازه

المهم بحديقه البيت هو نظام وسستم الري يكون عالي الكفائه

وليس مجرد هوزات السود وبعد اسبوع تتفكك كلها



,

,

[معماري قطري]

شكراً لك اخوي شموخ هذي الشركات الكبيرة والمتعددة التخصصات تنفع كثير

نبي نسوي جدول أَو موضوع خاص بالشركات ويكون مفتوح للمجربين بتوضيح تجربتهم مع الشركة .. وأَتمنى نركز على الشركات الايجابية والتجارب الايجابية حتى الكل يستفيد

[Hamad_qa]

انا كل ما اشوف مشاركة تبدأ بـ

,
,

اتفائل خير :)


أشكرك اخوي شموخ دائم و لا تحرمنا آرائك دائما
والشكر موصول لخوي الكبير معماري قطر ايضا

المساحة اللي عندي مساحتها متوسطة .. تقريبا 10 في 20 متر
ومحتار كيف بيكون توزيع ممرات المشي ، حديقة و جلسة
عندي تصور بس ابي رأي أهل اختصاص ممكن يكون أفضل من التصور اللي عندي
بشوف rootqatar

[معماري قطري]

انا من المغرمين بالدوارات ههههههه حاس اننا بنفتقدها في المستقبل

سويت دوار بقطر 7 أَمتار تدور عليه السيارة .. الجي ممكن يلف بالكامل ويطلع من باب البيت بدون ريوس اللكزس احتد اريوس شوي عند لفة الباب وزرعت فيه 6 أَشجار واشنطونيا كانوا صغار والحين كبروا وفي سن زواج.

هذي صورة للدوار وبحط صور أَكثر إِن شاء الله في موضوع عن اللاندسكيبنغ.

http://i.imgur.com/e5ipq3j.jpg

هذا حفرت مكانه مع البيت وخليته محفور لين خلص البنيان وركبت له طابوق على الأَطراف وعازل ودفنت داخل بطين ورمل وتكرمون سماد .. وسويت عدة أَحواض معاه عددها 7 داخل البيت وقرب الحوائط والأَساسات والحمد لله طريقة العزل نفعتني والعمق كافي للجذور فهي تدور الطريق السهل ولا تخترق الطابوق طول ما الرطوبة تحتها.

بالنسبة لصاحب الموضوع المساحة الصغيرة يستحسن نسوي فيها شلال وزراعة عشب وأَشجار عالية في الأَطراف ويكون الفارغ الوسطي اللي بالعشب لجلسة أَو خيمة وقت الجو زين.

[لبيبة]

وعليكم السلام ورحمة الله وبركاته

موضوع مفيد جدا، أسجل متابعة

وشكرا لكم

[ROMANTIC-]

طرش رقمك ع الخاص

[Hamad_qa]

مدري وش سالفة الخاص وكان الموضوع سري للغاية
فضلا وليس أمرا اذا الجهة لها اسم قولنا اسمها عشان الكل يستفيد
وشكرا

[معماري قطري]

مدري وش سالفة الخاص وكان الموضوع سري للغاية
فضلا وليس أمرا اذا الجهة لها اسم قولنا اسمها عشان الكل يستفيد
وشكرا

طال عمرك شركات الرجل الواحد منتشرة في قطر والمفروض الواحد ما يروح الا لشركة معروفة وعندها معدات .. جاني مره مصري يسوي شلالات والعجيبة حاط اعلان واسم شركة .. بس يوم جاء لاحظت عليه ما يقيس ويراويني كتلوج وبس شغله كله كلام وتم يفكر فترة وعطاني سعر كبير حول 25 الف على ما اذكر .. الشغلة بسيطة جداً والمعدات وكل شيء مستحيل توصل 4000 لو كانت من أَجود الأَنواع وعندي بلكونة بدرابزين جاهزة والشلال بيكون نازل من فوق .. بس حسيت إِنه يستغفلني وتركته وكلمت اندونيسي متعامل معاه صديق لي وسوى جزء شغل ثاني ب 4000 وشفت شغله زين والمصري يجيب هالنوعية من العمال وياخذ عمولة كبيرة كبيرة.

بس غيرت رايي عن الشلال لكن عطوني تسعير زين وسووا حسابات وقال المكينة بتكون غراندفورس والتمديدات كلها مخفية وكل هذا بسعر 6000 ريال، يعني قريب من 25% من سعر السمسار.

انا أَحيانا احس باحراج وحرج اني ارشح شركة خوف مني انهم ما يقومون بالواجب صح .. لكن أَذكر تجاربي وأَذكر بطريقة العقد والضمانات واركز على الشركات الجيدة والسيئة ما اقول لحد عنها .. الزينة سمعتها فيها ودعايتها جودتها وتستحق الكل يتعامل معاها .. والشركة السيئة ما وراها الا المضرة والشغل الغلط.

[فريج النجادة]

نصيحة ابعد عن الشركات وتفضل الخطوات

1- زور قطر خضراء سابقأ والاسم الجديد ادارة التوعية والتثقيف البيئي
وجيب معاك خريطة البيت على سيدي حتى يسون لك خريطة
للحديقة التي تناسبك
2- مر على وزارة البيئة ادارة الشؤون الزراعية برج المنصور مقابل فندق الموفنبيك
ويعطونك كوبنات للسماد للزراعة
3- حفر من متر الى مترين للمنطة المختارة للزراعة
4- تركيب وتوصيل التمديدات المائية للزراعة
5- تركيب الاشجار مع الورد

[Stars]

يعطيكم العافية على نصايحكم
وين مكانهم إدارة التوعية والتثقيف البيئي ؟

[معماري قطري]

نصيحة ابعد عن الشركات وتفضل الخطوات

1- زور قطر خضراء سابقأ والاسم الجديد ادارة التوعية والتثقيف البيئي
وجيب معاك خريطة البيت على سيدي حتى يسون لك خريطة
للحديقة التي تناسبك
2- مر على وزارة البيئة ادارة الشؤون الزراعية برج المنصور مقابل فندق الموفنبيك
ويعطونك كوبنات للسماد للزراعة
3- حفر من متر الى مترين للمنطة المختارة للزراعة
4- تركيب وتوصيل التمديدات المائية للزراعة
5- تركيب الاشجار مع الورد

انا مؤيد لهذا الكلام والطريقة سهلة وذكرتها كم مره .. هذا انا اللي اسويه وبعمال عاديين بس اكون مشرف على شغلهم.

مره جبت بلاط أَبيض وأَزرق وبنقوشات حلوة وجبت بتان حتى ما يعرفون عربي وشرحت لهم شلون يركبونه وطلعت أَحواض زراعة مرتفعة بطابوق وتبليط وايد حلوة وعملية ومحمية بالبلاط صوب الحائط ولا يتسرب الماي.

أَلحين السائق استوت عنده خبرة في الزراعة وصيانة بايبات الري وما يقصر في شيء.

[معماري قطري]

بالنسبة للديكورات الخشبية في الحوش صورت مره طريقة سويتها مع عمال أَلمنيوم لتركيب برغولا خشب وكنت مشتري الخشب وموديه منجرة وقايل للنجار كيف يقصه وطلع علي السعر حول 10% من سعر نجار يسوي كل شيء.

حطيت صور قبل في هذا الموضوع بس الحين الظاهر انتهت صلاحية التحميل وما تطلع .. إِن شاء الله بكتب موضوع عن أَثاث وديكور الحوش وبحط صور فيه.

http://www.qatarshares.com/vb/showthread.php?510591-عمل-حوض-سباحة-مغلق

[captin]

قطر خضراء

حاليا اسمها إدارة التثقيف البيئي تتبع وزارة البيئة
اذا تقدر تعامل مع مصمم حدائق land scape designer فلبيني شاطر عندهم

[مارون كلاسيه]

الله يعطيكم العافية الصراحة استفدت منكم كثير خصوصا اننا بادين في التعديلات في البيت بعد الخراب الي سواة المقاول
صارت عندي مدونه من الاصلاحات والتعديلات كنا ناوين انسويها وعدلت عنها بجد الله يعطيكم العافية خصوصا الاخ معماري قطر شرحة وافي تبارك الرحمن

[اشراقة الشمس]

السلام عليكم
ممكن أفضل شركة في قطر تقوم بتصميم و تنفيذ المساحات الخارجية من ممرات و حدائق
شاكر لكم مقدما

تم ارسال الرقم علي الخاص

[معماري قطري]

قطر خضراء

حاليا اسمها إدارة التثقيف البيئي تتبع وزارة البيئة
اذا تقدر تعامل مع مصمم حدائق land scape designer فلبيني شاطر عندهم


ما ادري ليش اسم ادارة ينتشر وتنعرف واجباتها فجأَة يتغير لمجرد التغيير وحتى رقمها في الدليل يستوي صعب الحصول عليه

[حسن الاحمد]

الأخ صاحب الموضوع اذا تبغي اعطيك كوتيشن للاند سكيب انا حاضر .. ما اقول لك ان احنا الأفضل لكن المواد اللي عندنا ممتازة جدا واشكال وافكار جديدة .. وتشطيب ممتاز اتصل بي وأبشر 55546048 ابو علي

[معماري قطري]

الله يوفقك يا بو علي .. إِنت ما شاء الله من الأَشخاص المتميزين في ادارة شركتك وفي النقاش مع العميل نقاش موضوعي واضح

الشيء المهم عندكم فن في شغل الحجر بطريقة جميلة ومرتبة وبدون دفاشة

أَكيد النافورات والقطع الحجرية الخاصة تجمل الحديقة وتكملها وحتى الأَرضيات البازلتية

تخصصكم راقي وفن جميل الله يوفقكم