عقد تشطيب (ارجو الاطلاع للضرورة)

[حلاوة سكر]

السلام عليكم ورحمه الله وبركاته

اسعد الله جميع اوقاتكم بالخير احبتي ، متابعه بصمت من زمان
واستفدت منكم كثير قواكم الله نفر نفر .~

عفوا حابه اخذ رايكم في عقد تشطيب يطيب لفيلا بمساحه 430
وعطانا السعر ب 468 الف .. مايشمل اعمال جبس ولاابواب ولا تمديد ماء
اغلب الامور علينا نوفرها وهو عليه التركيب

الاشياء اللي راح يتكفل فيها كامله اعمال الصبغ خارج الفيلا وداخل
والعوازل والزخرفه الخارجيه نسيت اسمها خخخخ ..

اما الارضيات والدرايش والحمامات تكرومون احنا نوفرها وهو يركبها
وكذلك الادوات الصحيه ..~

شرايكم في العرض ، للحين ماوقعنا على شي حبيت ادرس العقد قبل
اتمنى القى عندكم المشوره اللي تساعدني
وشكرا مقدما :o

[بويوسف]

صعبة نعرف بالظبط كمية الأعمال الموجودة ولكن بشكل عام السعر عالي جدا خصوصا إذا كان بدون مواد ، إنتي تتكلمين على سعر تركيب فقط + صبغ كامل + ديكور grc لازم تشوفون شركات ثانية والله يوفقكم :)

[حلاوة سكر]

نسيت اذكر الملاحق ، راح يتكفلون بها ايضا يشملها الصبغ وامور التركيب .
شكرا لك استاذي الفاضل بو يوسف ، انا حسيت انه غالي صراحه عشان جذي قلت اتمهل
واخذ براي الاغلبيه.
وفعلا اكثر بنود العقد بدون مواد :(
الميزه في هالمقاول ان هو اللي بنا لي الفيلا وماشاء الله عليه امين وحريص
وقلنا بنشوف عنده التشطيب وكان هذا عرضه

[Hamad_qa]

السعر مبالغ فيه ..
نصيحتي اخذوا تسعيرة من جهتين او اكثر (يكونون ثقة و سبق لكم او معارفكم الشغل معهم)

[شموخ دائم]

,

,


مرحبا


منزل مبارك ان شاء الله

بالنسبه للتشطيب افضل طريقه لمعرفه السعر وتفاصيله

مثل ما تفضل اخوي بويوسف

ارسلي لثلاث شركات يكونون بمستوى الشركه الي عندك

واطلبي منهم التفاصيل كل شي مع قيمته

على سبيل المثال تكلفه الصبغ داخل وخارج ( ونوع الصبغ الداخلي والخارجي ) ... الخ

وبعدها راح تعرفين الفرق بين ال 3 شركات وبتعرفين التفاصيل

اذا كان سعرهم قريب من شركتك الموجوده توكلي على الله وكملي معاهم لانك مجربتهم

واذا السعر الفرق كبير قولي لهم محصله اسعار افضل وارخص

ممكن تجيبين غيرهم او تحاولين تاخذين سعر افضل وفرصه ( للمساومه )

ويكون بيدك اسعار واضحه ومفصله تقدرين تساومين عليها

وتقدرين تقولين ليه هذا كذا سعره غالي وانا محصلته بسعر ارخص بكذا مبلغ

بالنسبه للمطابخ مافيها تركيب على المقاول الشركه الي بتشترون منها المطبخ هو بيركبه
ا

النصيحه الاخيره


حطي استشاري يراقب اعمال التشطيب ( او شخص من طرفك ولو فورمن )

بدون استشاري بيكون التركيب لك عليه وفيه مشاكل وفنش مو اوكي وشغل سرعه سرعه
التشطيب هو اهم مرحله بالبيت حتى يطلع مرتب
من الضروري مهندس يراقب ويشرف ومتواجد بالبيت من طرفك
يراعي الامور الفنيه واصول الصنعه الي ما يعرفها الانسان العادي

التشطيب يعني ( دفع فلوس ) مقابل ( جوده )

بالتوفيق لكم

,

,

[حلاوة سكر]

اخوي حمد

كل الشكر لك لابداء رأيك فعلا سديد
راح يتم عرض رأيك على اصحاب القرار عندي

بارك الله فيك ,.~

[حلاوة سكر]

شموخ دائم

الرد ماشاء الله وافي وواضح
حسيت قصدك ان السعر عالي يفضل المقارنه مع شركات اخرى
ان شاء الله هذا اللي راح يصير ، هو شافنا ملحين عليه ان نبي نكمل
شغل التشطيب عنده كبر راسه الظاهر خخخخ

فكرة الاستشاري جدا مفيده كانت غايبه عني شكرا لذكرها

جزاك الله كل خير ووفقك ايضا .ْ~

[Azizuk]

السعر جدا غالي مقارنة بمساحة البناء

والشرح ومواصفات التشطيب غير واضحة للأعضاء

جاري مسوي تشطيب راقي من شركة عربي لديكور مدير المحل لبناني والعماله آسيوية وشغلهم نظيف ومرتب

فيلا كبار الموظفين تتكون من دورين وملاحق

صبغ وجبس وتركيب أرضيات واعزكم الله تركيب بلاط الحمامات مع الدفان والاسمنت والرمل وغراء تلزيق بلاط الحمامات والمواد الاساسية في عملية التركيب ب 300 الف ريال

وعلى المالك توفير الأرضيات وبلاط الحمامات والاكسسوارات والمواد الصحية

[معماري قطري]

بقت هالجملة من اخوي شموخ دائم

التشطيب يعني ( دفع فلوس ) مقابل ( جوده )

وهذي الحقيقة .. بس لازم نعرف شندفع فيه بحيث يكون العقد مفصل طريقة التركيب .. وفي حال بنوفر إِحنا المواد من بلاط وأَدوات صحية وكهربية يفترض ينعمل لها جرد كميات مبدئي ويوضح طريقة تركيبها.

ناخذ مثال بعض المقاولين متعودين وعندهم قناعة بتركيب البلاط الشعبي وبالطريقة الرخيصة البدائية .. اللي هي دك الأَرضية وتعبئتها بالبودرة وشرحنا ضرر البودرة مرات ومرات وثم الاجتهاد في عمل المستوى بالخيط وبتركيب أَي نوع من البلاط بالاسمنت الأَبيض فوق صبية خفيفة من الاسمنت .. غير مستوية وفي بعض الأَماكن السمك يكون 2 سم وبعضها 5 سم .. المهم يوفر المقاول قد ما يقدر .. ويكسر في البلاط ولو كان غالي وكمياته قليلة عند المورد أَحياناً تنقص .. والمفروض العقد وجرد الكميات يحدد مسؤولية المقاول في المحافظة على المواد وفي استلامها من المورد .. وبعض الموردين يسلمون في المخازن والنقل على المالك أَو المقاول .. فهذي النقطة تحدد ويتفق عليها مبدئياً وكتابياً قبل العمل.

نرجع لطريقة التركيب .. يجب أَن تتضمن رسومات وشرح وافي بالمواد وإِن أَمكن بتسمية المواد التجارية ويُذكر إِذا المواد على المقاول أَو المالك وتحديد كمياتها سواءً بواسطة حاسب كميات مختص من الاستشاري أَو بالاتفاق المسبق مع المقاول بحيث هو يكون مسؤول عن أَي نقص.

طبعاً بيكون علينا توريد الأَبواب وتركيبها والنوافذ كذلك ومسؤولية المقاول لازم تحدد بالتنسيق مع هذي الجهات وتسهيل عملها وعمل اللازم لها .. فالأَبواب والنوافذ يجب صب خرسانات في الطابوق حولها حتى يمسك فيها مسمار التثبيت .. وكذلك على المقاول تحديد الفتحات حسب المواصفات والتصميم .. بعض الأَبواب يركب لها فريم أَساسي يركب عليه الفريم الرئيسي والبارز وبعضها تجي يو بي في سي أو أَلمنيوم ولها طريقة تركيب تحتاج اجراءات ثانية.

شفت طريقة تثبيت ممكن تكون غريبة علينا في أَمريكا .. يركبون قطعة خشب بعرض فريم الدريشة اليو بي في سي وبسمك نص انش وهذي يتثبت عليها الفريم ببراغي توصل للطابوق ويتم بعدها سد أَطرافها بعازل خاص بلون الفريم .. وفي بعض الدول يتم التركيب على قطعة رخام تكون محددة الفتحة.

حتى لتركيب الجبس ونوعياته مواصفات وطرق مختلفة ولكل طريقة ومواصفات سعر غير.

[حلاوة سكر]

Azizuk

اخوي الفاضل شكرا لحضورك وردك
اللي وضح لي عالاقل سعر مقاول اخر وفيه فرق كبير
اممم مشكله اهلي مايبون يتعبون ويدورون واايد بين المقاولين
وفي نفس الوقت حاسين ان فعلا هالمقاول مستغلنا

ممكن لو سمحت تفاصيل المقاول اللي قلت عنه
وشكرا جزيلا لحضورك ومساعدتك .~

[حلاوة سكر]

معماري قطر
ماشاء الله شرح وافي
في امور فعلا غايبه عنا
وتوني ادري ان ممكن نناقشها بهالطريقه
وماشاء الله عليك لانك خبير فعندك تصور عن امور كثيره
خلاص راح اطبع ردك واسلمه لاصحاب القرار عندي
ان شاء الله يسهل علينا

شكرا جزيلا على شرحك الوافي المفصل
ربي يسعدك

[Bozizoo]

اختي هذا المقاول سعره مبااالغ فيه جدا بدون ماااشوف المواااصفات
لان اكثر الموااد انتي توفرينها له يعني هو عليه تركيب فقط

[معماري قطري]

معماري قطر
ماشاء الله شرح وافي
في امور فعلا غايبه عنا
وتوني ادري ان ممكن نناقشها بهالطريقه
وماشاء الله عليك لانك خبير فعندك تصور عن امور كثيره
خلاص راح اطبع ردك واسلمه لاصحاب القرار عندي
ان شاء الله يسهل علينا

شكرا جزيلا على شرحك الوافي المفصل
ربي يسعدك

الله يوفقكم .. المقاولين كثير منهم كلامهم غير عن فعلهم وأَوقات الشغل يوفرون على نفسهم قد ما يقدرون فلازم نختار مقاول جيد وقوي ونكتب معاه عقد واضح ومحدد كل شيء ونتابعه باستشاري فاهم الشغلة من البداية وقبل توقيع العقد .. يعني الاستشاري يكون مراجع العقد وموضح كل شيء بالرسومات والتوصيف الهندسي الصحيح.

[معماري قطري]

اختي هذا المقاول سعره مبااالغ فيه جدا بدون ماااشوف المواااصفات
لان اكثر الموااد انتي توفرينها له يعني هو عليه تركيب فقط

صحيح كلامك غالي ولا ندري شبيسوي في طريقة التركيب

[$الملياردير$]

هلا اختي الله يبارك لكم بالمنزل ..... دائماً في حال تواجد اخواني معماري و شموخ دائم ... اي معلومة مني تكون ناقصة وانا دائماً أتعلم منهم ماشاء الله عليهم و الله يوفقهم . احب أزيد ان لو تسوين جدول كميات عن طريق مكتب استشاري يكون فيه كل شي واضح من ناحية المساحات و المواد والكميات فتتم على اساسة وضع عرض السعر .... ودائما يكون جدول الكميات معاكم في عملية الشراء و الاتفاق وعن طريق جدول الكميات تتم السيطرة على الأسعار ..... مثال بسيط كل واحد يجي يأخذ القياس يقول عندك مساحة كذا و كذا فتلاقين يضربون في المساحة بحيث يقولك انا المتر بسوية أرخص من فلان بكذا ..... بس هو زايد في عدد الأمتار ومدخل الخصم من جهة اخرى ..وهذي لاحظتها في مسألة الحجر ... وجزاكم الله خير

[Azizuk]

Azizuk

اخوي الفاضل شكرا لحضورك وردك
اللي وضح لي عالاقل سعر مقاول اخر وفيه فرق كبير
اممم مشكله اهلي مايبون يتعبون ويدورون واايد بين المقاولين
وفي نفس الوقت حاسين ان فعلا هالمقاول مستغلنا

ممكن لو سمحت تفاصيل المقاول اللي قلت عنه
وشكرا جزيلا لحضورك ومساعدتك .~


المركز العربي للديكور والمقاولات

المدير العام

داني مسعود

66861894 / 55671672

رقم المكتب

44162364

فاكس

44688105


موقعهم في طريق سلوى في عمارة تجارية مدخلهم من الخلف

بجانب معرض المفتاح للإطارات تويو

[Azizuk]

على طاري البلاط والتبليط

جاني مصري ويبين عليه شاطر وسألته عن تركيب بلاط الحمامات وأنتو بكرامه

قالي التركيب يختلف من 25 للمتر الى 30 و 35 ريال للمتر والمواد عليك

وقلت له ممكن تشرح لي الفروقات الأسعار

رد على وقال يختلف في طريقة التركيب

يعني ممكن يشتغل في مطبخ كبير في الحجم ويخلصة في يومين

وممكن يشتغل في حمام صغير بس التركيب راح يأخذ فيه سبوع

لان التركيب يحتاج إتقان والديكور وإذا تبي خط الحائط يكون متلامسَ ومتوازي مع خط الأرضية

عشان جذي تختلف الأسعار

[Azizuk]

على فكرة طلبت من شركة المركز العربي لديكور وتعذر لان راح بس يأخذ شغل تبليط الحمامات والمطابخ وهو اظاهر يبي شغل البيت كامل

او اذا راح يوافق على التركيب بس أكيد راح يأخذ سعر أغلى من السعر المعتاد

واليوم اسولف مع مقاول وأقول له تقوى الله في الناس يقولي انا لما اشتغل في مجمع وإلا عماره اكسب أزيد

بس لو اشتغل في بيت الفايده متغطي تكاليف البناء

يعني لو بيبني عمارة او مجمع الربح الصافي فوق المليون ريال والمليون ونص

اما البيت ربحه فيه 150 الف بالنسبة له ماتسوى

ربحه في العمارة حتى لو يخسر نص المبلغ بعد يعتبر ربحان

المشكلة في السوق القطري والتجار كله يبون شغل مشاريع والناس الثانية يخلونهم يولون

اي محل اروح له على جميع المستويات من يعرف ان عندك فيلا يحاول يرفع السعر ويتصدد عنك

المفروض وزارة التجارة والاقتصاد تدخل في هذا الشأن وأي واحد يرفض او يتعذر عن أخذ متطلباتك يوجه له إنذار

لان مب معقوله التجار كله يعتذرون لا انا مشغول وماأقدر أوفر لك الكمية لأني ماخذ مشاريع ولازم تنتظر ست شهور

وخاصة ان الدولة موفرة له أراضي في الصناعية وتسهيلات وقروض من البنوك المفروض يساهم في نشاط الأفراد والمشاريع

[معماري قطري]

على طاري البلاط والتبليط

جاني مصري ويبين عليه شاطر وسألته عن تركيب بلاط الحمامات وأنتو بكرامه

قالي التركيب يختلف من 25 للمتر الى 30 و 35 ريال للمتر والمواد عليك

وقلت له ممكن تشرح لي الفروقات الأسعار

رد على وقال يختلف في طريقة التركيب

يعني ممكن يشتغل في مطبخ كبير في الحجم ويخلصة في يومين

وممكن يشتغل في حمام صغير بس التركيب راح يأخذ فيه سبوع

لان التركيب يحتاج إتقان والديكور وإذا تبي خط الحائط يكون متلامسَ ومتوازي مع خط الأرضية

عشان جذي تختلف الأسعار

إِجابته فيها لف ودوران وهذي طبيعة هالجنسية .. ووقت الصج تحصل شغله لك عليه .. لو انا مكانه كنت وضحت طريقة التركيب والمواد اللي باستخدمها وشنصح به لكل نوعية .. إِشتغل لي مره عربي في صبغ البيت وكنت اشوف طريقته غلط واجادله فيها بالطيب لأَنه ينقز من مكان لمكان وشتتني مستحيل اقدر اتابعه .. المهم قال هذا شغلي وخبرتي فيه فوق العشرين سنة وفي النهاية بعد سنتين يمكن بينت العيوب وبين الصبغ مرقع.

كذلك مصريين ركبوا بلاط لبيت اخوي وكل ما حاولت افهمهم شيء خذوني بالكلام .. النهاية رجع شال البلاط وركبه مره ثانية وهو ساكن واللي راضي به بعد فيه اهتزاز وبعضه مرتفع شوي من الأَطراف .. والطامة الكبرى أَرضية الحوش مستوية مثل شوارع قطر اللي عليها دوس شاحنات من الهبوط المزعج

[معماري قطري]

على فكرة طلبت من شركة المركز العربي لديكور وتعذر لان راح بس يأخذ شغل تبليط الحمامات والمطابخ وهو اظاهر يبي شغل البيت كامل

او اذا راح يوافق على التركيب بس أكيد راح يأخذ سعر أغلى من السعر المعتاد

واليوم اسولف مع مقاول وأقول له تقوى الله في الناس يقولي انا لما اشتغل في مجمع وإلا عماره اكسب أزيد

بس لو اشتغل في بيت الفايده متغطي تكاليف البناء

يعني لو بيبني عمارة او مجمع الربح الصافي فوق المليون ريال والمليون ونص

اما البيت ربحه فيه 150 الف بالنسبة له ماتسوى

ربحه في العمارة حتى لو يخسر نص المبلغ بعد يعتبر ربحان

المشكلة في السوق القطري والتجار كله يبون شغل مشاريع والناس الثانية يخلونهم يولون

اي محل اروح له على جميع المستويات من يعرف ان عندك فيلا يحاول يرفع السعر ويتصدد عنك

المفروض وزارة التجارة والاقتصاد تدخل في هذا الشأن وأي واحد يرفض او يتعذر عن أخذ متطلباتك يوجه له إنذار

لان مب معقوله التجار كله يعتذرون لا انا مشغول وماأقدر أوفر لك الكمية لأني ماخذ مشاريع ولازم تنتظر ست شهور

وخاصة ان الدولة موفرة له أراضي في الصناعية وتسهيلات وقروض من البنوك المفروض يساهم في نشاط الأفراد والمشاريع

اسحب عليه وانا اخوك 150000 مايحلم بها في سنة في بلاده ويحسبها قليلة هنيه

لطريقة تركيب البلاط والبلاط الشعبي والبورسلان سواءً لأَرضيات ولا حوائط مهم البلاستر ينعمل صح وسيده ويكون مخشن شوي .. وفي بعض الروبات ما فيه داعي للتخشين لأَنها قوية وممكن تركب حتى بلاط ناعم على بلاط ناعم بها .. بالنسبة للأَرضيات تحتاج صبية تحتها حتى تدعم الوزن وتدعم أَي انتفاخ في التربة تحت ويستحسن تقويتها بالفايبر لأَن الفايبر يقوي في كل الاتجاهات .. الحديد لو كان تحت يقوي الخرسانة في الوزن العمودي من فوق لتحت .. لكن عندنا احنا ضغط التربة من تحت لفوق في حالة الانتفاخ وعندنا الضغوط الحرارية من تمدد وانكماش.

بالنسبة للروبة بين البلاطات والفراغات كثيرين حتى ما يشجعونك على الزيرو جوينت لصعوبة التركيب أَو إِذا من المورد لعدم ثقته في بضاعته.

بالنسبة للفني اللي ذكر إِن البلاط اللي للحايط لازم يجي مع بلاطة الأَرضية هذي العملية مزعجة ومغامرة بسبب بقاء فراغ بسيط بين الحائط والأَرضية وهذا الفراغ يتسبب في تسريب الرطوبة للحائط وللأَرضية .. والمفروض آخر بلاطة حائط تكون نصها مطمور تحت بلاطة الأَرضية والفاصل بينها وبين بلاطة الأَرضية يكون معبأَ مونة صح ومونة نوعية مقاومة للماء مب اسمنت أَبيض .. تكون هذي حباتها صغيرة وايد مثل البودرة وتنخلط بعضها بخفاق كهربي .

إِخواني انا قلت نصايح عامة وخصوصاً التبليط مشاكله كثيرة وأَكثرها بسبب العمالة اللي تغش ما فيه تفسير الا الغش ولا الجهل بعيد عنهم لأَن سهل تعلم هذي الأُمور ويعرفونها بس ما يقرون بها .. يدخلك البحر ويطلعك ناشف يعني.

[Azizuk]

مشكور اخوي معماري قطري ماقصرت ودوم ماتقصر مع الأعضاء والرد على استفساراتهم

وطبعا انت البحر الطامي وانت المحيط الهادي

[ana_ana]

بس استفسار وتوضيح من كاتب الموضوع

تقصد يبني لك البيت عظم مع التشطيب وانت تجيب النوافذ والارضيات والابواب والحمامات وهو عليه التركيب
اذا كلامي صحيح فمعناه السعر الي عطاك اياه جداً مناسب

[معماري قطري]

مشكور اخوي معماري قطري ماقصرت ودوم ماتقصر مع الأعضاء والرد على استفساراتهم

وطبعا انت البحر الطامي وانت المحيط الهادي

والله يا اخوي عبدالعزيز هذي أَشياء ما ودي اذكرها لكن غصب من ملاحظات مرت علي على فترة 22 سنة من الشغل في هذا المجال والمتابعة والمشاهدات وحتى القراءَة .. يقول واحد من طرق الدجل في البناء في مصر وكلنا نسمع عن حوادث سقوط البنايات الغير مرخصة .. يقول يجيبون المشرف على ترخيص البنيان ويودونه عمارة غير عن اللي تنبني ويوقع لهم ويمشي شغلهم .. وأَكيد ما ننكر ما لهم ولغيرهم من العرب من اسهامات في البناء .. لكن البناء بالفهلوة والفطرة وليس البناء بعقد واضح وطريقة صحيحة.

شكثر طالبت وتمنيت لو الدولة تشرف اشراف عام على العقود وعلى الاستشاريين وبضوابط قوية وتنصف أَي مشتكي بسرعة ويكون فيه اثبات حالة .. ويتحاسب المقاول والاستشاري اللي قصر لو أُثبت تقصيره .. التنظيم لازم يطال معامل الطابوق اللي بعضها تنتج طابوق ما أَكمل قوته وتعرضه للشمس والترطيب ويتكسر بسهولة .. التنظيم لازم يطال معامل الردي مكس ولازم خلط الردي مكس يكون بماي بدون كلور وبدون أَملاح .. الأَملاح ضرورية للانسان صح بس للحديد تاكله وتخليه يصدي وخصوصاً الكلور والكبريتات تاكل الخرسانة .. عشت عمري كله ما سمعت حد ينادي بهالشيء يقولون بس تنمية مستدامة ولا هي مستدامة من ناحية التخطيط فجأَة المستدام استوى مستملك وسيهدم .. ولا هي مستدامة من ناحية المواد .. حتى شوارعنا ركبوا فيها الحديد المصدي في حواجز الحماية .. ومن تندعم تتكسر ويطلع حديدهم .. وين التماسك اللي يقولون عنه؟

خلها على الله يا اخوي أَي بحر الا غدير صغير وبيجف ومباني تنبني بملايين ومشاريع بمليارات بتنتهي بأَسرع وقت وبيطلع لنا حد يصارخ قطر تستحق الأَفضل وحد يقول تنمية مستدامة

[حلاوة سكر]

Bozizoo

مرحبا اخوي
كلامك يؤكد رأي باقي الاخوان
وفعلا للحين مترددين بخصوص هذا المقاول وتم عرض
الموضوع على مقاول اخر وبنشوف الفرق
ان شاء الله نتوفق مع مقاول زين والله نحاتي ~

كل الشكر لحضرتك لتشريف الموضوع
وابداء رأيك المهم ^^

[حلاوة سكر]

معماري قطر


الله يوفقكم .. المقاولين كثير منهم كلامهم غير عن فعلهم وأَوقات الشغل يوفرون على نفسهم قد ما يقدرون فلازم نختار مقاول جيد وقوي ونكتب معاه عقد واضح ومحدد كل شيء ونتابعه باستشاري فاهم الشغلة من البداية وقبل توقيع العقد .. يعني الاستشاري يكون مراجع العقد وموضح كل شيء بالرسومات والتوصيف الهندسي الصحيح.

تم تدوين تفاصيل نقطه الاستشاري ، زين انك حددت لنا مهمته بالضبط
وقت بناء العظم احس ماكنت فاهمه دوره عدل ،لكن الحين بنتشرط من بعد مشورتك
جزاك الله عنا خير الجزاء وربي يوفقك اخوي الفاضل

[حلاوة سكر]

$الملياردير$

مرحبا اخوي
نقطه جديده اضفتها لمعلوماتي
ان شاء الله راح يتم اخذ الاعتبار في هذا الشأن ، ولو تسمح لي
راح اكتب بند من العقد ، ووضح لي لو هذا اللي قصدته او غير

(( اعمال سيراميك الارضيات توريد المالك وتركيب المقاول على ان يقوم المالك بتوريد مادة ملء اللحام بين السيراميك للحوائط والارضيات مع الزوايا البلاستيكيه حسب طلب العمل وان لا يزيد مقاس سيراميك الارضيات عن 60*60 والا يتم اضافة 10 ريال /م2 تركيب))

[حلاوة سكر]

Azizuk

شكرااا لك اخوي وجزاك الله كل خير
ان شاء الله بيتم التواصل معاه وبنشوف
يارب عاد يتفرغ لنا ومايتهرب
لان والله اللي قلته نفس احساسي ، المقاول اللي سوا لنا العقد
عنده مشاريع اكبر وقال هالشي بنفسه ، فحسيت يبي يطفشنا
عطانا هالسعر المبالغ فيه ربما .

الله يجبر بخاطرك ويسعدك

[حلاوة سكر]

ana_ana

مرحبا اخوي

فعلا هو المقاول نفسه اللي سوا لنا العظم بس بعقد منفصل
ولما خلصنا البلاستر حبينا نكمل وياه التشطيب , وكل مره يقول باسوي لكم
الدراسه والعقد ويطول علينا .. واخرتها عطانا هالعقد اللي انا متشككه فيه شوي

والله يسهل يارب

[حلاوة سكر]

Azizuk
ومعماري قطر

فعلا كلاك اخوي عزيز اضافات اخونا معماري قيمه جدا
وفتح عيونا على امور كثيرة ,,
والمواقف اللي ذكرتوها تحزن ، المفروض يخافون الله فينا بعض
هالمقاولين اللي مثل ماقال الفاضل معماري في بلاده مايحصل نفس هالمبالغ
وهنا يتشرط علينا ويقص ظهرنا :( .. ليش الدوله ماتخلي مع كل مشروع بناء فله للمواطن
استشاري يتعين عن طريقهم عشان الكل يضمن حقه وماتصير بوقات

[معماري قطري]

المقاول اختي يحسب الف حساب للتوقيع على العقد ويحاول يخليه في صالحه .. في وجود استشاري مشرف واجتماع رسمي بالمالك لازم يوصل لصيغة تخدم الطرفين .. والاستشاريين مقصرين في نصيحة المالك وما يبون وجع الراس وبعضهم مكانهم غير مهيأَ لإِجتماعات .. ومن رايي لازم المالك يشترط على الاستشاري شرط مكتوب في عقد الاستشارات بأَنه يكون مشرف على كل العقود وتتم المفاوضة والاجتماع الرسمي في قاعة الاجتماعات لديه .. والمراسلات تكون بفاكس والاجتماعات بمحضر رسمي.