الشباب القطري , و التجارة !

[Al-Kuwari]

السلام عليكم

في موضوع في بالي من فترة و حبيت اتكلم فيه اليوم

ليش التجار في قطر معدودين عالأصابع ؟ وغالبية السوق مملوك للأجانب

ليش لما القطري يفكر يفتح مشروع فالغالب يفكر في بقالة او مغسلة ملابس ويستلم مبلغ شهري ثابت من مدير المحل اللي ياخذ كل الأرباح له برضى القطري

ليش ما عندنا شاب قطري يحب يتابع تجارته بنفسه ودايما يوكل شخص اجنبي لادارة المشروع وما يحب يتعلم او يمسك المشروع لحاله

كذلك ليش ما عندنا مساحة للأبداع ؟ دائماً اغلب المشاريع تكون وكالة لمشروع قائم بالخارج بدون اي اضافة من مالك المشروع نفسه

واذا ما كان المشروع عبارة عن وكالة اجنبية فنجد المشروع جداً عادي ومافيه اي شي مميز او فكرة تعكس طريقة تفكير او شخصية صاحب البزنس

كمثال بسيط اغلب المطاعم عندنا فرانشايز من بره , ولو المطعم ماكان جاي من بره فتجد المطعم عادي جداً مافيه شي مميز حاله حال اي مطعم ثاني

بالمقابل نجد في دول الخليج واخص بالذات اهل الكويت , ما شاء الله عليهم دائماً يطلعون ببراند جديد وتشوف تنوع وتجدد في الأفكار ,

كمثال فقط

مطعم برغرايزر في السعودية

92449

افتتح في سنة 2009 والحين بعد خمس سنوات عنده اربع وعشرين فرع ما شاء الله , الله يزيده ويبارك له

مشروع نادي الشاي في البحرين

92450

محل فيه ما يقارب من المئة نوع من انواع الشاي وبعض الحلويات

مشروع سلايدر ستيشن في الكويت

92451

مشروع بدأ فيه شاب كويتي , والحين عنده فروع في عمان والامارات والكويت ما شاء الله

مشروع ايكاروس في الكويت

92452

مشروع براند كويتي للحقائب النسائية , مشروع ناجح بأذن الله

موقع طلبات اللي الحين صار في كل دول الخليج بدأ من الكويت قبل 11 سنة

قبل فتره بسيطه باع الموقع صاحبه الكويتي لشركة المانية بمبلغ مئة وخمسين مليون يورو !


بالمقابل ما نشوف هالاشياء عندنا بقطر , وان وجدناها تكون عبر الانستقرام , ولا تتطور الى محل كامل الا بعد ما يضمن صاحبها نجاحها بالانستقرام


ما هي الأسباب ؟؟

هل هو الخوف من الفشل ؟

هل هي العقلية القطرية ؟

هل عدم تقبل المجتمع للمشاريع هذي ؟

ليش الشاب القطري ماعنده افكار خلاقة , او يخاف انه يبدأ بمشروع يعكس فيه افكاره ويحب المضمون ؟؟

لكم النقاش ..

[Locale]

مع اني صرت اشوف ان في توجه للتجاره من الشباب
لكن بعد مب ذاك العدد الكبير

والتجاره يبيلها وقــت وجهــد كبير واغلب شبابنا يحبون الراحه
البعض اتوقع يشوف ان راتبه حلو ويمشي كل شهر ليش يتعب نفسه

والبعض يبي يفتح تجاره لكن ماله خبره ولا يعرف شيفتح ولا شيقرر
هذا احسن لايفتح تجاره لان التجاره يبيلها فنان ومخ نظيف وتطوير
الحين اغلب اللي يفتحون لو مايطورون كل عقب فتره محد بيقرب صوبهم

انا اشوف الكويتيين ماشاء الله عليهم شطار شطااار في كل شي تجاره ، دورات وايد اشياء
وملاحظه عليهم شي حلو كل واحد يسوق للثاني حتى لو كان ينافسه في نفس مجال شغله
واحد يعطي دوره اتشوف الكل يعلن له
يشجعون بعض وشايلين بعض ماشاء الله عليهم

[H H]

اسباب العزوف:

1 - تغطية الراتب لمتطلبات الحياة
2 - عدم الحاجه لبذل مجهود مسائي لمتابعة العمل الخاص لان مافي حاجه ماسه له.
3 - ارتفاع تكلفة المشاريع في قطر , وهالشي يحتاج تفصيل.

الوضع فالدوحه , الغني يزداد غنى والله يزيده من فضله
والي حالته متوسطه يقل وضعه المالي واستقراره بسبب القروض وغيرها.


اعتقد اننا نحتاج لموضوع كامل يناقش مسالة ارتفاع تكلفة المشاريع

[الجـــوديّ]

وعليكم السلام ورحمة الله


موضوع رااااايق في طرحه .. وأتمنى أنه يسلط الضوء على الأسباب الجوهرية على ظاهرة

الخمول التنافسي في التجارة إذا صح التعبير !

الكويت بحكم إنها سبقتنا في التطور وكان بها أول سوق أسهم في الخليج

فتكونت لديهم الثقافة والعقلية المالية التجارية اللي أثّرت على أطياف المجتمع عندهم

بالاضافة إلى أنهم شعب متطلع ومنفتح على العالم وسباق في كل شي .. والأسبقية ميزة يتميزون بها!


نجي لأهل قطر ...

على أننا في خير ونعمة واقتصاد الدولة من أسرع اقتصادات العالم نمواً

إلا أن مازال ناك فجوة كبيرة بين تطلع الدولة الاقتصادي

وتطلع التجار أصحاب المشاريع المتوسطة والصغيرة!

مازال التاجر من هؤلاء "يرقل" ويخاف من المخاطرة والتنافس ..

فيدخل السوق وهو هزيل ويطلع وهو خسران !

لأنه لم يكون هناك طموح ورؤية واضحة في خلق منتج جديد أو خدمة جديدة

ينافس فيها أو يتنافس عليها مع اقرانه التجار !

للأسف الهدف لدى أغلب التجار الصغار أو المستثمرين هو الربح المادي بدون التفكير في الاستمرارية

في السوق ورسم خطة واضحة لكيفية الاستمرارية ونوعية الاستمرارية وماهي السباب التي تدعو للاستمرارية ..

لذلك يكون اقصى الطموح ... مغسلة .. دوبي .. معصرة ..

ومثل هالمحلات الخدمية لأن عليها دوس و ما فيها مخاطرة كبيرة!

بالإضافة إلى أن القطري .. يعشق الراحة .. ويفضلها ...

ويدهن سيره العامل الأجنبي اللي يتميز بأن أحد مكتسباته في البلاد

وجود شبكة اتصالات قوية بين أخوياه في السوق ..

وصعب أي قطري يخترق هذي الشبكة مما يجعل العامل هو عنصر الجذب والقوة

والقطري مجرد آلة تدفع النقود وتسحب نقود آخر الشر وكان الله غفوراً رحيماً ..!


... ومازال الوضع قائماً ................. مع بعض الجرأة من مبادرات فردية


أحدها مصمم قطري بدأ بتصميم المجوهرات وأطلق اسم "شغاب" كعلامة تجارية ..

الله يوفقه ويوفق الجميع.

[بنت شرق]

1 - تغطية الراتب لمتطلبات الحياة
2 - عدم الحاجه لبذل مجهود مسائي لمتابعة العمل الخاص
3 - ارتفاع تكلفة المشاريع في قطر , وهالشي يحتاج تفصيل.

الوضع فالدوحه , الغني يزداد غنى والله يزيده من فضله
والي حالته متوسطه يقل وضعه المالي واستقراره بسبب القروض وغيرها.


اعتقد اننا نحتاج لموضوع كامل يناقش مسالة ارتفاع تكلفة المشاريع
عن تجربتين فاشلتين .. ما يمديك تمسك التجارة .. الا ساعه او ساعتين .. والتجارة تبي تقرغ او شراكه اهل او امين .. وهاي ساعات صعب يتوفر .. الاغنياء يستطيعون دفع الايجار مع قلة الارباح .. المتوسط ينقطع ظهره وبخاصة الايجار يرتفع كل سنتين .. تدفع رواتب الموظفين من راتبك الخاص لحين وقوف العمل على رجله .. مخطط المصروفات يتجاوز دائما الايرادات .. ويكون الشغل الجيد هو مايغطي المصاريف الشهرية .. الموظفين معظمهم دون المستوى بقطر .. جايين لنقل تاشيرة الزيارة لعمل .. يعني وضع بائس .. وعوار راس .. وهذا غير مصاريف سكن العمال والمواصلات.. غير التحصيلات الغير ممكن استرجاعها .. الهنود ماسكين السوق بقطر وطريقة طلبهم للبضاعة عبر الاجل .. والتسديدبعد شهرين .. والمماطله والتسويف بعد الشهرين .. والاغلبية ما يدفعون .. وهاي يضرب مجهودك وتكلفة البضاعة الي جبتها .. غير صداع الشراء والشحن والتسليم ..

[بنت شرق]

بس باضيف العمال صايرين قوايا ويشتكونك عند النيابه وحقوق الانسان عادي .. وتعال شوف منظرك وعندك استدعاء للنيابه.. لذا لا تعور راسك وتذل نفسك راتب الحكومه الله يعزها يكفيك ..البزنس فكره حلوه .. فلوس وايد لمصاريف سنتين جدام .. او ثلاثه.. واهم مصروفات الايجار خمس عشر الف شهريا رواتب الموظفين والعمال وسكنهم عشرين الى ثلاثين الف شهريا وبضاعة اقل شي ميتين * الف كل ثلاثة اشهر .. وعلاقات عامه .. لتخليص امورك .. ماعندك لا توهق نفسك الا اذا بتجابل الشغل 24ساعه او بتشتري بضاعه وتحطها بمحلك ..هاي يمشي سوقه.. او عندك موهبه وبتسوقها كبزنس ..او الي اكتشفته متاخره عقود مع القطاع الحكوميوالخاص تربح .. الي ذكرته من صعوبات هو الاعتماد على السوق المحلي ببضاعة بالاعتماد على الشراء والبيع للتجار الصغار ..ترى امكانياتهم المالية داقه كلش وفاشله

[H H]

عن تجربتين فاشلتين .. ما يمديك تمسك التجارة .. الا ساعه او ساعتين .. والتجارة تبي تقرغ او شراكه اهل او امين .. وهاي ساعات صعب يتوفر .. الاغنياء يستطيعون دفع الايجار مع قلة الارباح .. المتوسط ينقطع ظهره وبخاصة الايجار يرتفع كل سنتين .. تدفع رواتب الموظفين من راتبك الخاص لحين وقوف العمل على رجله .. مخطط المصروفات يتجاوز دائما الايرادات .. ويكون الشغل الجيد هو مايغطي المصاريف الشهرية .. الموظفين معظمهم دون المستوى بقطر .. جايين لنقل تاشيرة الزيارة لعمل .. يعني وضع بائس .. وعوار راس .. وهذا غير مصاريف سكن العمال والمواصلات.. غير التحصيلات الغير ممكن استرجاعها .. الهنود ماسكين السوق بقطر وطريقة طلبهم للبضاعة عبر الاجل .. والتسديدبعد شهرين .. والمماطله والتسويف بعد الشهرين .. والاغلبية ما يدفعون .. وهاي يضرب مجهودك وتكلفة البضاعة الي جبتها .. غير صداع الشراء والشحن والتسليم ..


بس باضيف العمال صايرين قوايا ويشتكونك عند النيابه وحقوق الانسان عادي .. وتعال شوف منظرك وعندك استدعاء للنيابه.. لذا لا تعور راسك وتذل نفسك راتب الحكومه الله يعزها يكفيك ..البزنس فكره حلوه .. فلوس وايد لمصاريف سنتين جدام .. او ثلاثه.. واهم مصروفات الايجار خمس عش الف شهريا رواتب الموظفين والعمال وسكنهم عشرين الى ثلاثين الف شهريا وبضاعة اقل شي ميتين * الف كل ثلاثة اشهر .. وعلاقات عامه .. لتخليص امورك .. ماعندك لا توهق نفسك الا اذا بتجابل الشغل 24ساعه او بتشتري بضاعه وتحطها بمحلك ..هاي يمشي سوقه.. او عندك موهبه وبتسوقها كبزنس ..



ممكن تعطينا حل لهالمشاكل , بحيث ان ردك يكون مّحفّز للغير بدال مايكون مثبط للعزيمه بهالشكل.

[superzooz]

من تجربه شخصيه اكبر مشكله بالنسبه لي غلاء الايجارات
بقيمه محل باب واحد فالدوحه تقدر تاخذ اربع بيبان فالامارات
تقريبا صار المحل من 11 الف الى 15 الف شهريا + معاشات العمال +سكنهم +مواصلاتهم + الكهربا والماي + مصاريف المحل
يعني تتكلم عن اكثر من 25 الف تقريبا مصاريف شهريه
والمكاتب نفس الحال من 7000 وطالع

[H H]

ليه حنا كاعضاء في هالمنتدى مانسوي جلسات اسبوعيه (مواضيع) مثل ال brainstorming.
نطرح فيها اقتراح ونتناقش في امكانية تطبيق هالاقتراح , او مشكله , وحلول لها او فكره.

صدقوني بنكتشف مواهب كثيييره فالمنتدى, اذا كانت فكره اقتصاديه يفيدونا الاقتصاديين بامكانية تطبيق هالحلول الي طرحناها.
واذا الاقتراح يتضمن امور هندسيه مثل هندسة الطرقات او مباني اقتصاديه او غيرها بنستفيد من المهندسين الي معنا فالمنتدى.
وبنستشيرهم عن امكانية تطبيق هالشي او هالحل ,واذا مالقينا في احد المجالات مختص فالمنتدى ندور على واحد من خارج المنتدى
ونوجهله دعوه رسميه من المنتدى وبيجي يفيدنا اكيد.

خلونا نطلع من بوتقة ال (لُك لُك لُك لُك) شوي وندخل في مرحلة الانتاج سواءا على مستوى الافكار او على مستوى التطبيق.

عندنا هنا مواهب كثيره وعقول جبّاره ممكن تكون هذي فرصتها للتميز.


نسخه من الاقتراح لـ: ادارة المنتدى


تحديث: مثل الموضوع الي كان كتبه العضور اضرب واشرد من فتره بخصوص الخضروات والفواكه.
نحتاج مثل هالمبادرات + دعم بالافكار من الاعضاء + دعم من المختصين بجدوى او تصحيح هالافكار لتكون قابله للتنفيذ.

[بنت شرق]

ممكن تعطينا حل لهالمشاكل , بحيث ان ردك يكون مّحفّز للغير بدال مايكون مثبط للعزيمه بهالشكل.

الحل عندك موهبه وافكار بتسوقها .. ممكن تنجح ... عندك امكانية تسوي عقود مع القطاع الحكومي والخاص .. بتربح .. عندك بضاعه في محلك الخاص .. ممكن تربح .. عندك مطعم جودة طعامه ونكهته مميزة .. بتنجح ..بس عموما الوضع عندنا ما يصلح للتاسيس ..

[بنت شرق]

ليه حنا كاعضاء في هالمنتدى مانسوي جلسات اسبوعيه (مواضيع) مثل ال brainstorming.
نطرح فيها اقتراح ونتناقش في امكانية تطبيق هالاقتراح , او مشكله , وحلول لها او فكره.

صدقوني بنكتشف مواهب كثيييره فالمنتدى, اذا كانت فكره اقتصاديه يفيدونا الاقتصاديين بامكانية تطبيق هالحلول الي طرحناها.
واذا الاقتراح يتضمن امور هندسيه مثل هندسة الطرقات او مباني اقتصاديه او غيرها بنستفيد من المهندسين الي معنا فالمنتدى.
وبنستشيرهم عن امكانية تطبيق هالشي او هالحل ,واذا مالقينا في احد المجالات مختص فالمنتدى ندور على واحد من خارج المنتدى
ونوجهله دعوه رسميه من المنتدى وبيجي يفيدنا اكيد.

خلونا نطلع من بوتقة ال (لُك لُك لُك لُك) شوي وندخل في مرحلة الانتاج سواءا على مستوى الافكار او على مستوى التطبيق.

عندنا هنا مواهب كثيره وعقول جبّاره ممكن تكون هذي فرصتها للتميز.


نسخه من الاقتراح لـ: ادارة المنتدى


تحديث: مثل الموضوع الي كان كتبه العضور اضرب واشرد من فتره بخصوص الخضروات والفواكه.
نحتاج مثل هالمبادرات + دعم بالافكار من الاعضاء + دعم من المختصين بجدوى او تصحيح هالافكار لتكون قابله للتنفيذ.
فكره حلوه .. بس بيعيقها الانانية من البعض .. الافكار الزراعية من اضرب واشرد كانت ممتازة .. بس المشكله الزراعة تبي ارض .. المزارع بقطر اسعارها خيالية .. افكار الزراعة المنزلية على الاسطح والمائية جيدة .. جدا .. مشكلتها ليس لها مجال للتسويق والربح .. فمثلا بالدوحة ماتتوفر امكانية استجأر مساحة لعرض المنتجات .. وهاي ممكن يساعد الي يهون زراعة المنتجات محليا ما اقصد اصحاب المزارع فالحكومه وفرت لهم المساحة .. اتكلم عن منتجات فردية زراعية ..لانه اي شغل ما يرتبط بالمكسب صعب يستمر

[H H]

فكره حلوه .. بس بيعيقها الانانية من البعض .. الافكار الزراعية من اضرب واشرد كانت ممتازة .. بس المشكله الزراعة تبي ارض .. المزارع بقطر اسعارها خيالية .. افكار الزراعة المنزلية على الاسطح والمائية جيدة .. جدا .. مشكلتها ليس لها مجال للتسويق والربح .. فمثلا بالدوحة ماتتوفر امكانية استجأر مساحة لعرض المنتجات .. وهاي ممكن يساعد الي يهون زراعة المنتجات محليا ما اقصد اصحاب المزارع فالحكومه وفرت لهم المساحة .. اتكلم عن منتجات فردية زراعية ..

يعطيك العافيه بس اعذريني , مازلتي تكتبين ردود فيها معوقات بدون حلول لها.
لو اني مشرف منعت اي شخص يدلي بدلوه ويقول عن مشكله بدون مايعطي حل لها < ديكتاتوري.

بخصوص مبادرة اضرب واشرد فاعتقد انها انتهت بمعرفتنا ان في مبادره حكوميه في بعض المناطق للمزارع الوطنية المحلية.
نبي افكار جديده , حلول لمشاكل , مبادرات , وغيرها , وتكون بشكل منظم واسبوعي بحيث اننا نعطي كل فكره او مشكله او مبادرها حقها الكامل.
وكل فكره يكون لها راعي بحيث انه يتابعها ويتابع تطوراتها ,, بحيث انها ماتنّسي بعد اسابيع لين نوصل لآخرها.

[الجـــوديّ]

بنت شرق .. هوني عليج شوي

لو كلن بيركز على المشاكل بس .... وبيشوف هالجانب عمره ماراح ينجح .. ولاهو بفالح في التجارة

ولايدشها يسوي خير في نفسه

لأن فيه تجار كبار ناجحين بدوا من الصفر .... ما طلعنا منهم بخلاصة تجربتهم مثل ما قلتوها الحين

مع احترامي .... اذا كان التخطيط فاشل ومحدود من البداية

وماعطى كل شي حقه في المشروع كامل . راح نطلع .. بمحصلة .. لو .. ولو ... ولو !!!

[بنت شرق]

يعطيك العافيه بس اعذريني , مازلتي تكتبين ردود فيها معوقات بدون حلول لها.
لو اني مشرف منعت اي شخص يدلي بدلوه ويقول عن مشكله بدون مايعطي حل لها < ديكتاتوري.

بخصوص مبادرة اضرب واشرد فاعتقد انها انتهت بمعرفتنا ان في مبادره حكوميه في بعض المناطق للمزارع الوطنية المحلية.
نبي افكار جديده , حلول لمشاكل , مبادرات , وغيرها , وتكون بشكل منظم واسبوعي بحيث اننا نعطي كل فكره او مشكله او مبادرها حقها الكامل.
وكل فكره يكون لها راعي بحيث انه يتابعها ويتابع تطوراتها ,, بحيث انها ماتنّسي بعد اسابيع لين نوصل لآخرها.
احد اهم المشاكل الي ماوجدت لها حل .. انه صغار الملاك .. مالهم سما ولا ارض .. والاعتماد لازال على عقلية واسلوب فرش الارض لكبار الملاك .. والمنتفعين

[بنت شرق]

بنت شرق .. هوني عليج شوي

لو كلن بيركز على المشاكل بس .... وبيشوف هالجانب عمره ماراح ينجح .. ولاهو بفالح في التجارة

ولايدشها يسوي خير في نفسه

لأن فيه تجار كبار ناجحين بدوا من الصفر .... ما طلعنا منهم بخلاصة تجربتهم مثل ما قلتوها الحين

مع احترامي .... اذا كان التخطيط فاشل ومحدود من البداية

وماعطى كل شي حقه في المشروع كامل . راح نطلع .. بمحصلة .. لو .. ولو ... ولو !!!
تركت هاي الامور صار لي سنه .. البزنس يبي فهم عبر العلم او التجربه .. الي يخوضون التجربه بدون علم يتعلمون على المدى الطويل .. احكام التخطيط لايعني نجاح التجربة .. ما ادري اذا شفتي برنامج صندًوق خليفه .. الاعمال ما ازدهرت الا بربط الفكرة بالتسويق .. والبيع ..وايجاد عقود للمبتدئين .. مش تركهم للسوق وتقلباته

[راعي ال VXR]

قبل سنتين شفت مغسلة سيارات معروضه للبيع محل من 3 ابواب سعرها كانت 350 الف مع العمال والعده وشغاله
جيت كلمت صاحب المغسله وقعدت معه قلت له انا شراي بس بشرط تقول تقريبا دخل المغسله شهريا وبغيت تفاصيل اكثر
والله يجزاه خير كان صادق معي قال لي الدخل حروة 40 الف ريال شهريا وقلت له الاجار والرواتب والكهربا والماء كم
قال الاجار 22 الف والرواتب مع السكن العمال 11000 والكهربا والماي 1500 الى 2000 ويصفى لك فى الشهر حروة 4000 ريال
وغير هذا تجديد الاقامات للعمال كل سنه عدد العمال 8 في السنه 9200 غير هذا تجديد الرخصة والسجل
قلت له اشكرك على صراحتك والله يوفقك وبعدها ما شاف الا الغبار شردت ذيك الشرده اللي ما عقبها شرده

الاجارااات نار ودخل المغسله كله رايح في الاجار واقاماتهم وسكنهم ما كان يصفى لي منها غير الصداع وعوووار الراس

[R 7 A L]

فيه مواهب وفيه طموح شابه
لكن
في المقابل
في هوامير ( فراعنه ) تجار قدماء
يبقون حجرعثرة في وجيه هؤلا الشباب من جميع الامور أقلها عدم دعمهم بأي شكل من الاشكال

[رهج السنابك]

دخلت وبكتب نفس التعليقاات

مشكلتنا ياخوي الغلاء والدوله ماتشجع
السيطره بيد لوبي واحد مكوش على كل شي ومتحكم بسعر العقار والمواد
الاستيراد عليه شروط معقده
بيئتنا صعبه بعطيك مثال
كنت افكر بمشروع مشابه للي في السعوديه عباره عن كوفي شوب قهوه صغير للسيارات نفس الي نشوفهم بالسعوديه على شكل مجسم كوب قهوه
اهني ممنوع
تبي تسوي مطعم على شكل بنايه غريبه والوان قالوا ممنوع
حتى الاسامي الي تختارها يتحكمون فيك
عندنا رخص ماتطلع
الاجارات نار
ممنوع فتح اكشاك لا بكورنيش ولا كتارا ولا بأي مكان كله احتكار
تتمشى بأماكن عامه في كل دول العالم تلقى اكشاك وبضايع من كل شكل اهني تطلع تتمشى ماتحصل شي تهلك بالكورنيش وسباير والحدايق مافيه شي
عندنا قوانين وشروط مب بالكويت ولا دبي ولا السعوديه
وهذا يبي له وقفه مراجعه من وزارة الاقتصاد والدوله لازم تشجع على التجاره وتيسرها لكن المتحكرين مبسوطين ومتحكمين بالقوانين

[رهج السنابك]

h.H


حبيت اقتراحك واذا بتأخذ زمام المبادره بدعمك بالعدة والعتاد

[monatee]

لان مافي شي حادنا ...

اذا الشخص مرتاح نادر مايبدع او يتعب نفسه

و الحاجه ام الاختراع ، واحنا الحمدالله كشعب مرتاح وغير محتاج

شلي يحدنا نهد اشغالنا المرتاحين فيها من الناحيه النفسيه والماديه ، وندخل نفسنا بمتاهات التجاره ؟!

[دايموند]

السبب الرئيسي هو غلاء الايجارات فقط
خل الدوله تساعدنا بخفض الاجارات وخل يشوفون ابداعاتنا

[الاعرابي]

الصراحة استفدت من النقاش .. اتمنى الاستمرار
من فترة بعد ما تخرجت من الجامعة كنت افكر بالتجارة وجمعت لي راس مال لا بأس به
لكن ماعندي فكرة عن طريقة البداية ..

يبدو من خلال الردود ان الايجارات فعلا عائق كبير

[الزعفراني]

لان الشباب يحبون يقيلون لين صلاة المغرب :)

وعقب عندهم دوام في كتارا واللؤلؤة .. وشفتات في وقت الشاي :)


تحياتي واشواقي

[عثرة جواد]

السلام عليكم

انا من وجهة نظري اشوف ""

1-الشاب القطري سواء بنت او والد ماترباء ع فن الاعتماد ع النفس .

2-ماتعلم اشلون يكون لة كيان مستقل .

3-ماتعلم اشلون يدير مصروفة .

4-التربية تلعب دوور اساسي ف اخراج مواهب الطفل .

موضوع يستحق المتابعة

[الزعفراني]

السبب الرئيسي هو غلاء الايجارات فقط
خل الدوله تساعدنا بخفض الاجارات وخل يشوفون ابداعاتنا

غير صحيح .. الدولة تعطي مكاتب بسعر رمزي اظن ريال في اليوم :)

شيكوا مع دار الانماء الاجتماعي وبنك التنمية عندهم مشاريع ودعم للشباب الطموحيين اللي ناوين يبلشون في التجاره

يأهلون الشخص ويوجهونه ويدربونه ويعطونه مكتب يدير شغله فيه ويعطونه فلووووس مبدئيا 100 الف بدون فوايد ويكون تحت التجربة

اذا نجح واثبت وجوده .. راح يرتفع الدعم ويوصل الى مليون ريال وبدون فوائد ولكن يدخلون معاك شريك في الارباح بنسبة اظن 20%

الافكار والمشاريع مش شرط محل تجاري طول بعرض ولكن الواحد يقدر يبلش عن طريق الانترنت

ووسائل التواصل الاجتماعي

[رجل مثالي]

السلام عليكم

في موضوع في بالي من فترة و حبيت اتكلم فيه اليوم

ليش التجار في قطر معدودين عالأصابع ؟ وغالبية السوق مملوك للأجانب

ليش لما القطري يفكر يفتح مشروع فالغالب يفكر في بقالة او مغسلة ملابس ويستلم مبلغ شهري ثابت من مدير المحل اللي ياخذ كل الأرباح له برضى القطري

ليش ما عندنا شاب قطري يحب يتابع تجارته بنفسه ودايما يوكل شخص اجنبي لادارة المشروع وما يحب يتعلم او يمسك المشروع لحاله

كذلك ليش ما عندنا مساحة للأبداع ؟ دائماً اغلب المشاريع تكون وكالة لمشروع قائم بالخارج بدون اي اضافة من مالك المشروع نفسه

واذا ما كان المشروع عبارة عن وكالة اجنبية فنجد المشروع جداً عادي ومافيه اي شي مميز او فكرة تعكس طريقة تفكير او شخصية صاحب البزنس

كمثال بسيط اغلب المطاعم عندنا فرانشايز من بره , ولو المطعم ماكان جاي من بره فتجد المطعم عادي جداً مافيه شي مميز حاله حال اي مطعم ثاني

بالمقابل نجد في دول الخليج واخص بالذات اهل الكويت , ما شاء الله عليهم دائماً يطلعون ببراند جديد وتشوف تنوع وتجدد في الأفكار ,

كمثال فقط

مطعم برغرايزر في السعودية

92449

افتتح في سنة 2009 والحين بعد خمس سنوات عنده اربع وعشرين فرع ما شاء الله , الله يزيده ويبارك له

مشروع نادي الشاي في البحرين

92450

محل فيه ما يقارب من المئة نوع من انواع الشاي وبعض الحلويات

مشروع سلايدر ستيشن في الكويت

92451

مشروع بدأ فيه شاب كويتي , والحين عنده فروع في عمان والامارات والكويت ما شاء الله

مشروع ايكاروس في الكويت

92452

مشروع براند كويتي للحقائب النسائية , مشروع ناجح بأذن الله

موقع طلبات اللي الحين صار في كل دول الخليج بدأ من الكويت قبل 11 سنة

قبل فتره بسيطه باع الموقع صاحبه الكويتي لشركة المانية بمبلغ مئة وخمسين مليون يورو !


بالمقابل ما نشوف هالاشياء عندنا بقطر , وان وجدناها تكون عبر الانستقرام , ولا تتطور الى محل كامل الا بعد ما يضمن صاحبها نجاحها بالانستقرام


ما هي الأسباب ؟؟

هل هو الخوف من الفشل ؟

هل هي العقلية القطرية ؟

هل عدم تقبل المجتمع للمشاريع هذي ؟

ليش الشاب القطري ماعنده افكار خلاقة , او يخاف انه يبدأ بمشروع يعكس فيه افكاره ويحب المضمون ؟؟

لكم النقاش ..


أولآ اخوي شكرآ على موضوعك وبعدين عندنا الواحد يستحي من ان يمسك او يدير بعض المشاريع مثل الى ذكرته لحاله من كلام الناس انه ليش يدير لحاله ووووو وهذا هو المشكلة وانا بعد المشكلة البعض نجح لانه ما يفكر في كلام الناس ووووو وشكرآ

[العلياا]

وعليكم السلام

اتفق مع الأخوان أن العائق الرئيسي هي التراخيص والموقع والاجراءات
بس حالياً مشكلتنا مش في قلة المشاريع ( مقارنة مع آخر سنتين ) مشكلتنا الأساسية صارت في تنويع المشاريع
أغلب الشباب أتجهوا الى المطاعم وكان تركيزهم على برزنتيشن الاكل او ديكور المطعم ..!

ليش ما نشوف مشاريع جديدة مبتكرة وحتى لو كان جزء من الفكرة موجود اصلاً في دولة مجاورة ..!
واللي يفكر يفتح مشروع هذا وقته بوجود اسرع طريقة للانتشار وهي وسائل التواصل الاجتماعي

والله يوفق الجميع

[يمامـة]

الكويتيين والسعوديين فيهم نقطة جدا ايجابية وهم انهم ما يستحون من اي عمل يسوونه
وما يسوون حساب اذا كانوا لابسين ثياب او ملابس خليجية رسمية..

فمن جذيه ممكن الكويتي تلقاه يوقف في مطعم ويشرف بنفسه على الطبخ
او سعودي يبيع في المطعم نفسه..

عندنا لو الواحد عنده محل يضطر ينخش من الزباين لانه لابس ثوب وغترة وعقال
بينما عندنا ناس من جنسيات ثانية رغم انهم يلبسون ثياب الا انهم حزة جلوسهم في المحلات
يلبسون ما يناسب المكان اللي هم واقفين فيه حسب مراعاة لطبيعة الزباين..

فمن جذيه شبابنا يتفقرون الى الحس التجاري المنفتح وما يطلعون على الجوانب المهمة
في كسب الزباين و اذواقهم..

وهالشي ممكن ما نلاقيه عند تجار وتاجرات الانستغرام..
تواصلهم جدا سهل وسلسل مع الزباين .. وكل يوم يتعلمون وكل يوم يطلعون على
بضائع جديدة و جودات افضل او اقل حسب متطلبات السوق..

لكن هل ممكن نشوف لهم محلات تجارية؟

اقول صعب .. لان المحلات التجارية اسعارها غالية وايد..
و غلاء اسعار الايجارات عائق كبير في وجه تطور التاجر القطري..

وخاصة لو حطينا في الحساب سيطرة هوامير معينة على امور كثيرة في البلاد
حتى المعاصر ناشبوا فيها الناس.. فعادي عندهم يدفعون اي ايجار يبون وفوقه
عادي عندهم ما يطالبون بخفض الايجارات..

ومع هذا هناك مكافحات من البعض في عمل مشاريع جديدة والاشراف عليها..

وايد صوالين نلقى راعية الصالون القطرية هي اللي تشرف على العاملات..
رحنا فيلا عبارة عن كافيه صغير و محلات فوق لاكثر من مصممة عبايات
مخصص للنساء فقط.. كديكور وكفكرة المشروع حلوو.. لكن يبقى ذوق المرتاد
في اختيار المعروض + الاسعار ..

[شموخ دائم]

,

,


مرحبا


شكرا على الموضوع

وشكرا للاخوه والاخوات بصراحه ما قصروا بالردود تم ذكر اكثر السلبيات ومن واقع تجارب

بس حبيت اضيف كم نقطه لتوضيح بعض الامور

1- قبل 20 سنه القطري عيب ومنقود يشتغل او يجلس في محل ( دكان ) ( للاسف ) هذا حرم اكثر من جيل من متعه التجاره
وما زال هناك بعض الاثار من هذا الموضوع البعض تحرر منه والبعض الاخر ( يخجل ) منه

2- الوضع في قطر مختلف عن باقي دول الخليج ( الرواتب ) والجميع يعمل بالحكومه ولايوجد هناك ( حاجه ) للعمل بالتجاره
بينما باقي دول الخليج هناك ( بطاله ) وضعف الرواتب وضيق الحال ( يجبر ) الناس على التجاره بتلك الدوله لذلك هو حاجه

3- كان القطري يعمل سائق تاكسي او بالبحر او في تربيه الحلال او عامل بالبترول ولكن لا يفتح ( محل ) نهائيا
بينما المحلات بسوق واقف تلك الفتره يعمل فيها فئات بالمجتمع اقتحمت هذا المجال ونجحت فيه نجاح كبير لان الساحه كانت كامله لهم بدون منافس
وهم كبار التجار الان بهذا الوقت سيطرتهم كامله على كل النواحي الاقتصاديه والتجاريه والوكالات
والتدفقات النقديه اداروها بحكمه في شراء
( العقار ) خاصه الاراضي
ابنائهم هم الان صورهم بالصحف وهم خبراء التجاره
:)
الله يبارك لهم في حلالهم ومالهم

مثل ما يقول المثل الشعبي

( طارت الطيور برزاقها )

بينما هناك من ( يفكر بالدخول الان ) بالتجاره وعليكم قياس الفارق بين هذا وهذا



لذلك عدد القطريين العاملين بالتجاره قليل جدا جدا للاسباب سابقه الذكر

هذه المقدمه ضروريه لحصر الاسباب عزوف الشاب اليوم لانها امتداد لتلك الفتره


معوقات التجاره بقطر


1- نقص الخبره والخوف من الخساره والاحباط وعدم التشجيع من الاهل والاصدقاء
2- ارتفاع اسعار الايجارات
3- صعوبه الحصول على ارض تجاريه او صناعيه
4- احتكار الرخص المربحه مثل ( صالات الافراح \ الصرافه\الوكالات )
5- عدم وجود الشريك المناسب صاحب الخبره
6- غرفه التجاره لاتقوم بالدور الصحيح لمساعده التجار( وتوجيهم ) والاعضاء هم المستفيدون من التعرف على التجار القادمون من الدول الاجنبيه
7- سيطره بعض الجنسيات على كثير من النشاطات بالسوق وهم يشكلون ( لوبي )

كل تلك المعوقات موجوده بقطر وموجوده ايضا بكل دول الخليج والعالم

تربينا في قطر على ان العقار هو الابن البار ولانه قطاع كبير يصعب السيطره عليه من التجاراو من الحكومه لذلك هو متاح للجميع ومربح مع الوقت
لذلك ( اهل قطر ) لاكثريه منهم يمتلك ( عقار مؤجر ))


التجاره فيها بركه وفيها ايضا الكثير من المخاطر وفيها الكثير من الصعوبات

حبيت اذكركم بقصه الصحابي الجليل عبدالرحمن ابن عوف
حين قال ( دلوني على السوق ) وهو لايمتلك شي الا ثيابه وعقله ونشاطه والحس التجاري

لم يقل
اعطوني محل !! او الايجارات غاليه
او اعطوني راس مال !!
او اعطوني ارض !!
ولم يقل ان يهود المدينه مسيطرين على السوق !!

حبيت اذكركم بالراجحي من عصرنا هذا

المعوقات موجوده بكل بلد وبكل زمن وبكل مكان ولكن ( من يمتلك الحس التجاري ) يستطيع البدايه تحت أي ظروف
الاصرار والمعرفه والحصول على المعلومه والعمل بالمجال المناسب لشخصيتك والمشروع المناسب والتدرج بالدخول
هو سر النجاح

من يتهيب طلوع الجبال يعيش ابد الدهر بين الحفر
:)

شكرا للجميع

,

,

[Charisma]

مرحبا اخوي الكواري ..

ماشاءالله موضوعك وبدون مجامله .. من افضل المواضيع هالأسبوع ..

سجلني متابع .. ويمكن مشارك مع تطور النقاش :nice:

[JN000N]

السلام عليكم

انا من وجهة نظري اشوف ""

1-الشاب القطري سواء بنت او والد ماترباء ع فن الاعتماد ع النفس .

2-ماتعلم اشلون يكون لة كيان مستقل .

3-ماتعلم اشلون يدير مصروفة .

4-التربية تلعب دوور اساسي ف اخراج مواهب الطفل .

موضوع يستحق المتابعة

هههههههههههههههههههههههههههههههههههههههههههههههههه ههههههههههههههههههههههههههههههههههههههههههههه
هههههههههههههههههههههههههههههههههههههههههههههههههه ههههههههههههههههههههههههههه

ده اي ده يا مرسي
ده مخدرات يا مرسي والا ايه

سوري برد عالموضوع الحين :funny:

[JN000N]

خلني اقول وجهة نظري بما اني فاتحة مشروع يديد وفي مرحلة التطوير

بالنسبة للشباب عندنا هني وفكرة الربح الثابت كل شهر (وهالشي غلط) يسوونها عشان مثل ماتقول يبون الفكه من العباله ف المراكض ورا المشروع وهو بحد ذاته فعلا مسؤوليه مع العمال والمعدات والخ الخ
ف يقول انا اجيبهم واشغلهم وهو يستلم كل شي وانا علي التوقيعات بس وكل شهر يجيب لي مثلا عشر الاف ريال وهو كيفه يتصرف
هني مانقول عن هالشي انه 100% غلط لان مرات مايكون عنده وقت او شغله يتحكم فيه اكثر ويمكن مايقدر يفهم ف امور تخص البزنز نفسه اللهم يتاكد ان كل شي صح ماشي بالقانون
ولو ان كذا قطري انكبو من هالسالفه وانباقو من العمال

بالنسبة للابتكار
هو مب شرط الواحد يخترع محل لا صار ولا ستوى
بالعكس يفتح فكره موجوده عادي ولكن يميزها بشي معين مع التجديد المستمر وعدم الاهمال > هالكلام تعلمته من ندوة للمشاريع الصغيره كان الريال الللي يحاضر اسمه محمد مساعد الربيعان

وهذي صورته

http://archive.aawsat.com/2014/07/08/images/Arabwaajam1.778576.jpg

والصراحة انا جدا جدا استفدت منه ويوم بديت مشروعي قررت اني اميزه بعدة اشيا يديده ماصارت من قبل
يعني اللي ابي اوصله ان انت لما تفتح مشروع مب لازم تتعب نفسك تدور مشروع ماعندك خلفيه عنه
سو اللي انت تفهم فيه ولكن اسعى ان يكون بصوره حديثه ومميزه وجذابه

[H H]

,

,


مرحبا


شكرا على الموضوع

وشكرا للاخوه والاخوات بصراحه ما قصروا بالردود تم ذكر اكثر السلبيات ومن واقع تجارب

بس حبيت اضيف كم نقطه لتوضيح بعض الامور

1- قبل 20 سنه القطري عيب ومنقود يشتغل او يجلس في محل ( دكان ) ( للاسف ) هذا حرم اكثر من جيل من متعه التجاره
وما زال هناك بعض الاثار من هذا الموضوع البعض تحرر منه والبعض الاخر ( يخجل ) منه

2- الوضع في قطر مختلف عن باقي دول الخليج ( الرواتب ) والجميع يعمل بالحكومه ولايوجد هناك ( حاجه ) للعمل بالتجاره
بينما باقي دول الخليج هناك ( بطاله ) وضعف الرواتب وضيق الحال ( يجبر ) الناس على التجاره بتلك الدوله لذلك هو حاجه

3- كان القطري يعمل سائق تاكسي او بالبحر او في تربيه الحلال او عامل بالبترول ولكن لا يفتح ( محل ) نهائيا
بينما المحلات بسوق واقف تلك الفتره يعمل فيها فئات بالمجتمع اقتحمت هذا المجال ونجحت فيه نجاح كبير لان الساحه كانت كامله لهم بدون منافس
وهم كبار التجار الان بهذا الوقت سيطرتهم كامله على كل النواحي الاقتصاديه والتجاريه والوكالات
والتدفقات النقديه اداروها بحكمه في شراء
( العقار ) خاصه الاراضي
ابنائهم هم الان صورهم بالصحف وهم خبراء التجاره
:)
الله يبارك لهم في حلالهم ومالهم

مثل ما يقول المثل الشعبي

( طارت الطيور برزاقها )

بينما هناك من ( يفكر بالدخول الان ) بالتجاره وعليكم قياس الفارق بين هذا وهذا



لذلك عدد القطريين العاملين بالتجاره قليل جدا جدا للاسباب سابقه الذكر

هذه المقدمه ضروريه لحصر الاسباب عزوف الشاب اليوم لانها امتداد لتلك الفتره


معوقات التجاره بقطر


1- نقص الخبره والخوف من الخساره والاحباط وعدم التشجيع من الاهل والاصدقاء
2- ارتفاع اسعار الايجارات
3- صعوبه الحصول على ارض تجاريه او صناعيه
4- احتكار الرخص المربحه مثل ( صالات الافراح \ الصرافه\الوكالات )
5- عدم وجود الشريك المناسب صاحب الخبره
6- غرفه التجاره لاتقوم بالدور الصحيح لمساعده التجار( وتوجيهم ) والاعضاء هم المستفيدون من التعرف على التجار القادمون من الدول الاجنبيه
7- سيطره بعض الجنسيات على كثير من النشاطات بالسوق وهم يشكلون ( لوبي )

كل تلك المعوقات موجوده بقطر وموجوده ايضا بكل دول الخليج والعالم

تربينا في قطر على ان العقار هو الابن البار ولانه قطاع كبير يصعب السيطره عليه من التجاراو من الحكومه لذلك هو متاح للجميع ومربح مع الوقت
لذلك ( اهل قطر ) لاكثريه منهم يمتلك ( عقار مؤجر ))


التجاره فيها بركه وفيها ايضا الكثير من المخاطر وفيها الكثير من الصعوبات

حبيت اذكركم بقصه الصحابي الجليل عبدالرحمن ابن عوف
حين قال ( دلوني على السوق ) وهو لايمتلك شي الا ثيابه وعقله ونشاطه والحس التجاري

لم يقل
اعطوني محل !! او الايجارات غاليه
او اعطوني راس مال !!
او اعطوني ارض !!
ولم يقل ان يهود المدينه مسيطرين على السوق !!

حبيت اذكركم بالراجحي من عصرنا هذا

المعوقات موجوده بكل بلد وبكل زمن وبكل مكان ولكن ( من يمتلك الحس التجاري ) يستطيع البدايه تحت أي ظروف
الاصرار والمعرفه والحصول على المعلومه والعمل بالمجال المناسب لشخصيتك والمشروع المناسب والتدرج بالدخول
هو سر النجاح

من يتهيب طلوع الجبال يعيش ابد الدهر بين الحفر
:)

شكرا للجميع

,

,



مشاركه خمس نجوم , الله يعطيك العافيه

[الجـــوديّ]

خلني اقول وجهة نظري بما اني فاتحة مشروع يديد وفي مرحلة التطوير

بالنسبة للشباب عندنا هني وفكرة الربح الثابت كل شهر (وهالشي غلط) يسوونها عشان مثل ماتقول يبون الفكه من العباله ف المراكض ورا المشروع وهو بحد ذاته فعلا مسؤوليه مع العمال والمعدات والخ الخ
ف يقول انا اجيبهم واشغلهم وهو يستلم كل شي وانا علي التوقيعات بس وكل شهر يجيب لي مثلا عشر الاف ريال وهو كيفه يتصرف
هني مانقول عن هالشي انه 100% غلط لان مرات مايكون عنده وقت او شغله يتحكم فيه اكثر ويمكن مايقدر يفهم ف امور تخص البزنز نفسه اللهم يتاكد ان كل شي صح ماشي بالقانون
ولو ان كذا قطري انكبو من هالسالفه وانباقو من العمال

بالنسبة للابتكار
هو مب شرط الواحد يخترع محل لا صار ولا ستوى
بالعكس يفتح فكره موجوده عادي ولكن يميزها بشي معين مع التجديد المستمر وعدم الاهمال > هالكلام تعلمته من ندوة للمشاريع الصغيره كان الريال الللي يحاضر اسمه محمد مساعد الربيعان

وهذي صورته

http://archive.aawsat.com/2014/07/08/images/Arabwaajam1.778576.jpg

والصراحة انا جدا جدا استفدت منه ويوم بديت مشروعي قررت اني اميزه بعدة اشيا يديده ماصارت من قبل
يعني اللي ابي اوصله ان انت لما تفتح مشروع مب لازم تتعب نفسك تدور مشروع ماعندك خلفيه عنه
سو اللي انت تفهم فيه ولكن اسعى ان يكون بصوره حديثه ومميزه وجذابه





بالضبط .. وفرتي علي رد .. كمثال على المغسلة اللي صافي ربحها قليل
ممكن الواحد ياخذ الشغل ويطوره ويضيف عليه من رؤيته الخاصه
لأن في الأخير هي أرزاق من الله
يمكن راعيها لاولي كان رزقه المبلغ اللي قاله .. وبس .... هذا اللي الله كاتبه له
لكن اللي بعده .. يمكن الله يفتح عليه الالهام شلون يطوره ويمكن يحقق أرباح مضاعفة
ويستمر ويتوفق في فتح افرع جديدة



الشاهد ..

الواحد لازم يجرب في شي يحبه ويفهم فيه
وضروري جداً يكون له متابعات اقتصادية وتجارية مع اشخاص ومواقع وخبراء وتجارب الكبار والصغار
ويكون له شبكات علاقات .. ودايماً يقرا ويتعلم ويسأل علشان الحس التجاري عنده يتقد...

وفي الآخير ..

نتفاءل خير .. نجتهد .. نتوكل على الله و نناطح الجبال

" وَفِي السَّمَاءِ رِزْقُكُمْ وَمَا تُوعَدُونَ"

[قطــ86ــر]

ايجارات خرافية
اراضي اسعارها بدون سقف
احتكار
اسعار البناء غالية


وكأن التجارة محتكرة لفئة معينة فقط
الاسماء مكررة في كل مجمع تجاري و في كل شارع

[العربية نت]

اغلب الردود تكلمت عن الايجارات وارتفاع اسعارها انا اقول هذا الشي ليس بالمشكله لوجود قوة شرائية في السوق فالايجار مرتفع بيرفع على الزبون فهذا ليس بسبب... اشوف ان الواحد الي يبغي تجارة يدرس الموضوع من جميع جوانبه اي جدوى اقتصادية ولا يفكر في مشاربع اكبر من قدراته الفكرية والمادية... لكن بالمقابل ايضا لا ننكر ان التجارة المهمه والبارزة تكاد تكون محتكره وليست متاحه للعامه ولكن اغلب التجارات المتوسطه والصغيرة متاحة وهي جيده كمدخول اضافي مثل مغسله ملابس خياط رجالي ولا نسائي واهم شي في هالتجارة الموقع المناسب والتجاره اولاً واخيره هي ارزاق مع حسن تدبير من الشخص

[Al-Kuwari]

مع اني صرت اشوف ان في توجه للتجاره من الشباب
لكن بعد مب ذاك العدد الكبير

والتجاره يبيلها وقــت وجهــد كبير واغلب شبابنا يحبون الراحه
البعض اتوقع يشوف ان راتبه حلو ويمشي كل شهر ليش يتعب نفسه

والبعض يبي يفتح تجاره لكن ماله خبره ولا يعرف شيفتح ولا شيقرر
هذا احسن لايفتح تجاره لان التجاره يبيلها فنان ومخ نظيف وتطوير
الحين اغلب اللي يفتحون لو مايطورون كل عقب فتره محد بيقرب صوبهم

انا اشوف الكويتيين ماشاء الله عليهم شطار شطااار في كل شي تجاره ، دورات وايد اشياء
وملاحظه عليهم شي حلو كل واحد يسوق للثاني حتى لو كان ينافسه في نفس مجال شغله
واحد يعطي دوره اتشوف الكل يعلن له
يشجعون بعض وشايلين بعض ماشاء الله عليهم

رد جميل يا لوكال

طيب حتى لو الراتب مكفي وزيادة , ليش ما يكون في طموح ؟ مجالات التجارة مفتوحه عندنا في قطر , لكن الغالبية المستفيده منها هم الاجانب , طبعاً الارزاق من رب العالمين وعليهم بالعافية

بس ليش الواحد ما يسعى؟ ليش دايماً نربط التجارة بالربح المادي فقط ؟؟؟؟

[Al-Kuwari]

اسباب العزوف:

1 - تغطية الراتب لمتطلبات الحياة
2 - عدم الحاجه لبذل مجهود مسائي لمتابعة العمل الخاص لان مافي حاجه ماسه له.
3 - ارتفاع تكلفة المشاريع في قطر , وهالشي يحتاج تفصيل.

الوضع فالدوحه , الغني يزداد غنى والله يزيده من فضله
والي حالته متوسطه يقل وضعه المالي واستقراره بسبب القروض وغيرها.


اعتقد اننا نحتاج لموضوع كامل يناقش مسالة ارتفاع تكلفة المشاريع

صحيح الرواتب كافية تقريباً لجزء كبير من المواطنين
لكن ليش دايماً نربط التجارة بالاحتياج المادي ؟؟

ليش مايكون الهدف من التجارة اثبات شي للنفس او تطبيق فكرة

وصحيح ان المشاريع تكاليفها مرتفعه في قطر

لكن هالشي موجود في دول كثيره كذلك وهنا يأتي دور التخطيط الصحيح

مهب شرط اني انفذ مشروعي او فكرتي في اليوم او بعد شهر

ليش ما يكون عندنا عقلية سليمة للتخطيط , كمثال توضيحي

المشروع محتاج ما يقارب نص مليون الى 600 الف ريال

ابدا اجمع واحط لي خطة اني خلال ثلاث سنوات مثلاً ابدأ المشروع

او ابحث عن شريك من الاهل او الاقارب وبكذا ينزل المبلغ للنص

او ابحث عن طريقة لتنفيذ المشروع بشكل جزئي او بشكل يتضمن الاساسيات فقط ومع الوقت من المدخول اتوسع وانفذ فكرتي بشكل كامل كما تصورتها فالبداية

الحلول قد تكون معقدة ولكنها موجودة وتحتاج فقط للتخطيط

شكراً على ردك اخوي

[Al-Kuwari]

وعليكم السلام ورحمة الله


موضوع رااااايق في طرحه .. وأتمنى أنه يسلط الضوء على الأسباب الجوهرية على ظاهرة

الخمول التنافسي في التجارة إذا صح التعبير !

الكويت بحكم إنها سبقتنا في التطور وكان بها أول سوق أسهم في الخليج

فتكونت لديهم الثقافة والعقلية المالية التجارية اللي أثّرت على أطياف المجتمع عندهم

بالاضافة إلى أنهم شعب متطلع ومنفتح على العالم وسباق في كل شي .. والأسبقية ميزة يتميزون بها!


نجي لأهل قطر ...

على أننا في خير ونعمة واقتصاد الدولة من أسرع اقتصادات العالم نمواً

إلا أن مازال ناك فجوة كبيرة بين تطلع الدولة الاقتصادي

وتطلع التجار أصحاب المشاريع المتوسطة والصغيرة!

مازال التاجر من هؤلاء "يرقل" ويخاف من المخاطرة والتنافس ..

فيدخل السوق وهو هزيل ويطلع وهو خسران !

لأنه لم يكون هناك طموح ورؤية واضحة في خلق منتج جديد أو خدمة جديدة

ينافس فيها أو يتنافس عليها مع اقرانه التجار !

للأسف الهدف لدى أغلب التجار الصغار أو المستثمرين هو الربح المادي بدون التفكير في الاستمرارية

في السوق ورسم خطة واضحة لكيفية الاستمرارية ونوعية الاستمرارية وماهي السباب التي تدعو للاستمرارية ..

لذلك يكون اقصى الطموح ... مغسلة .. دوبي .. معصرة ..

ومثل هالمحلات الخدمية لأن عليها دوس و ما فيها مخاطرة كبيرة!

بالإضافة إلى أن القطري .. يعشق الراحة .. ويفضلها ...

ويدهن سيره العامل الأجنبي اللي يتميز بأن أحد مكتسباته في البلاد

وجود شبكة اتصالات قوية بين أخوياه في السوق ..

وصعب أي قطري يخترق هذي الشبكة مما يجعل العامل هو عنصر الجذب والقوة

والقطري مجرد آلة تدفع النقود وتسحب نقود آخر الشر وكان الله غفوراً رحيماً ..!


... ومازال الوضع قائماً ................. مع بعض الجرأة من مبادرات فردية


أحدها مصمم قطري بدأ بتصميم المجوهرات وأطلق اسم "شغاب" كعلامة تجارية ..

الله يوفقه ويوفق الجميع.



رد جميل اختي الجودي واتفق معاج في ما طرحتيه

ونرجع للسؤال , ليش ما تتغير هالعقلية ؟؟

[Al-Kuwari]

عن تجربتين فاشلتين .. ما يمديك تمسك التجارة .. الا ساعه او ساعتين .. والتجارة تبي تقرغ او شراكه اهل او امين .. وهاي ساعات صعب يتوفر .. الاغنياء يستطيعون دفع الايجار مع قلة الارباح .. المتوسط ينقطع ظهره وبخاصة الايجار يرتفع كل سنتين .. تدفع رواتب الموظفين من راتبك الخاص لحين وقوف العمل على رجله .. مخطط المصروفات يتجاوز دائما الايرادات .. ويكون الشغل الجيد هو مايغطي المصاريف الشهرية .. الموظفين معظمهم دون المستوى بقطر .. جايين لنقل تاشيرة الزيارة لعمل .. يعني وضع بائس .. وعوار راس .. وهذا غير مصاريف سكن العمال والمواصلات.. غير التحصيلات الغير ممكن استرجاعها .. الهنود ماسكين السوق بقطر وطريقة طلبهم للبضاعة عبر الاجل .. والتسديدبعد شهرين .. والمماطله والتسويف بعد الشهرين .. والاغلبية ما يدفعون .. وهاي يضرب مجهودك وتكلفة البضاعة الي جبتها .. غير صداع الشراء والشحن والتسليم ..


بس باضيف العمال صايرين قوايا ويشتكونك عند النيابه وحقوق الانسان عادي .. وتعال شوف منظرك وعندك استدعاء للنيابه.. لذا لا تعور راسك وتذل نفسك راتب الحكومه الله يعزها يكفيك ..البزنس فكره حلوه .. فلوس وايد لمصاريف سنتين جدام .. او ثلاثه.. واهم مصروفات الايجار خمس عشر الف شهريا رواتب الموظفين والعمال وسكنهم عشرين الى ثلاثين الف شهريا وبضاعة اقل شي ميتين * الف كل ثلاثة اشهر .. وعلاقات عامه .. لتخليص امورك .. ماعندك لا توهق نفسك الا اذا بتجابل الشغل 24ساعه او بتشتري بضاعه وتحطها بمحلك ..هاي يمشي سوقه.. او عندك موهبه وبتسوقها كبزنس ..او الي اكتشفته متاخره عقود مع القطاع الحكوميوالخاص تربح .. الي ذكرته من صعوبات هو الاعتماد على السوق المحلي ببضاعة بالاعتماد على الشراء والبيع للتجار الصغار ..ترى امكانياتهم المالية داقه كلش وفاشله


كل مشكلة ولها حل اختي بنت شرق

لكن اول الحلول ان العقلية ما تكون سلبية بالطريقة هذي

يجي الشخص يحط فكرته ويحط اسباب نجاح لها واسباب فشل
ويحاول يزيد من اسباب النجاح كتميز المنتج او طريقة التقديم
ويحاول يقلل من اسباب الفشل كذلك

وطبعاً مافي شي ببلاش , لازم الواحد يفرغ نفسه لو حب يدخل هالمجال

لكن لو كان مب فاضي او مشغول فشي طبيعي ان هالمجال ما يناسبه والأفضل يبتعد عنه

[Al-Kuwari]

من تجربه شخصيه اكبر مشكله بالنسبه لي غلاء الايجارات
بقيمه محل باب واحد فالدوحه تقدر تاخذ اربع بيبان فالامارات
تقريبا صار المحل من 11 الف الى 15 الف شهريا + معاشات العمال +سكنهم +مواصلاتهم + الكهربا والماي + مصاريف المحل
يعني تتكلم عن اكثر من 25 الف تقريبا مصاريف شهريه
والمكاتب نفس الحال من 7000 وطالع

صح اخوي لكن في حلول الا وهي التوفير لتغطية مصاريف اول ست شهور من بداية المشروع
او الدخول مع شريك يقلل من هالمصاريف

او البداية بطريقة غير مباشرة كانستغرام مثلا ومن الانستغرام يكسب السمعة وبعد ذلك محله بيدخل ارباح من اليوم الاول للافتتاح

السوق كبير وفي افكار كثيرة جديدة ممكن تتطبق
وفي افكار كثيرة كذلك مطبقه لكن مهب بالشكل المناسب وممكن النجاح فيها بتميز المشروع وصاحبه باشياء مهب موجوده عند غيره

[دايموند]

غير صحيح .. الدولة تعطي مكاتب بسعر رمزي اظن ريال في اليوم :)

شيكوا مع دار الانماء الاجتماعي وبنك التنمية عندهم مشاريع ودعم للشباب الطموحيين اللي ناوين يبلشون في التجاره

يأهلون الشخص ويوجهونه ويدربونه ويعطونه مكتب يدير شغله فيه ويعطونه فلووووس مبدئيا 100 الف بدون فوايد ويكون تحت التجربة

اذا نجح واثبت وجوده .. راح يرتفع الدعم ويوصل الى مليون ريال وبدون فوائد ولكن يدخلون معاك شريك في الارباح بنسبة اظن 20%

الافكار والمشاريع مش شرط محل تجاري طول بعرض ولكن الواحد يقدر يبلش عن طريق الانترنت

ووسائل التواصل الاجتماعي

اسمح لي اخوي لا اتفق معاك

مب ملزومه اتعامل مع دار الإنماء الاجتماعي
عندي افكاري الخاصه وعندي خطه للمشروع وكل شي بس باقي التطبيق والمعوق الاساسي لي ارتفاع الايجارات وعدم الحصول ع اماكن مناسبه للمشروع
والانستغرام لا يناسب مشروعي

حاولنا نقدم ع اسواق الفرجان وللاسف ماكان لنا نصيب
حاولنا نقدم بسوق واقف للاسف مافي محلات فاضيه
حاولنا نستأجر مساحه في كتارا للاسف محد عطانا ويه
حاولنا نقدم في اسواق الوكره التراثيه للاسف تم توزيعه ومالنا نصيب فيه
حاولنا في الكورنيش ممنوع!!
حاولت وحاولت ومازلت احاول ولعلى وعسى

[الدوحه1]

ياخوي وين التشجيع؟؟

انا عندي فكرة مشروع "اعلامي + تسويق" تقدمت بطلب للموافقه على فكرة المشروع.
جهه وافقت على منحي اللازم والمطلوب من هالجهه ولكن اشترطت موافقت جهه ثانيه مع ان هالجهه الثانيه مالها علاقه بالمشروع.
للاسف الجهه الثانيه ماعطتني الموافقه؟؟؟

على فكره المشروع هو الاول من نوعه في قطر!!

كالعاده المشروع محتاج "واسطه قويه" واللي عنده واسطه قويه ويحب يدش معاي في المشروع يراسلني على الخاص..

[Al-Kuwari]

ليه حنا كاعضاء في هالمنتدى مانسوي جلسات اسبوعيه (مواضيع) مثل ال brainstorming.
نطرح فيها اقتراح ونتناقش في امكانية تطبيق هالاقتراح , او مشكله , وحلول لها او فكره.

صدقوني بنكتشف مواهب كثيييره فالمنتدى, اذا كانت فكره اقتصاديه يفيدونا الاقتصاديين بامكانية تطبيق هالحلول الي طرحناها.
واذا الاقتراح يتضمن امور هندسيه مثل هندسة الطرقات او مباني اقتصاديه او غيرها بنستفيد من المهندسين الي معنا فالمنتدى.
وبنستشيرهم عن امكانية تطبيق هالشي او هالحل ,واذا مالقينا في احد المجالات مختص فالمنتدى ندور على واحد من خارج المنتدى
ونوجهله دعوه رسميه من المنتدى وبيجي يفيدنا اكيد.

خلونا نطلع من بوتقة ال (لُك لُك لُك لُك) شوي وندخل في مرحلة الانتاج سواءا على مستوى الافكار او على مستوى التطبيق.

عندنا هنا مواهب كثيره وعقول جبّاره ممكن تكون هذي فرصتها للتميز.


نسخه من الاقتراح لـ: ادارة المنتدى


تحديث: مثل الموضوع الي كان كتبه العضور اضرب واشرد من فتره بخصوص الخضروات والفواكه.
نحتاج مثل هالمبادرات + دعم بالافكار من الاعضاء + دعم من المختصين بجدوى او تصحيح هالافكار لتكون قابله للتنفيذ.

اؤيد اقتراحك اخوي , شي جميل ونستفيد من خبرات بعض

انا اتعلم منك فن التسويق مثلا, وانت تتعلم مني اساسيات المحاسبة , الى اخره

ويستفيد الجميع

[Al-Kuwari]

بنت شرق .. هوني عليج شوي

لو كلن بيركز على المشاكل بس .... وبيشوف هالجانب عمره ماراح ينجح .. ولاهو بفالح في التجارة

ولايدشها يسوي خير في نفسه

لأن فيه تجار كبار ناجحين بدوا من الصفر .... ما طلعنا منهم بخلاصة تجربتهم مثل ما قلتوها الحين

مع احترامي .... اذا كان التخطيط فاشل ومحدود من البداية

وماعطى كل شي حقه في المشروع كامل . راح نطلع .. بمحصلة .. لو .. ولو ... ولو !!!

+10 ....

[Al-Kuwari]

قبل سنتين شفت مغسلة سيارات معروضه للبيع محل من 3 ابواب سعرها كانت 350 الف مع العمال والعده وشغاله
جيت كلمت صاحب المغسله وقعدت معه قلت له انا شراي بس بشرط تقول تقريبا دخل المغسله شهريا وبغيت تفاصيل اكثر
والله يجزاه خير كان صادق معي قال لي الدخل حروة 40 الف ريال شهريا وقلت له الاجار والرواتب والكهربا والماء كم
قال الاجار 22 الف والرواتب مع السكن العمال 11000 والكهربا والماي 1500 الى 2000 ويصفى لك فى الشهر حروة 4000 ريال
وغير هذا تجديد الاقامات للعمال كل سنه عدد العمال 8 في السنه 9200 غير هذا تجديد الرخصة والسجل
قلت له اشكرك على صراحتك والله يوفقك وبعدها ما شاف الا الغبار شردت ذيك الشرده اللي ما عقبها شرده

الاجارااات نار ودخل المغسله كله رايح في الاجار واقاماتهم وسكنهم ما كان يصفى لي منها غير الصداع وعوووار الراس

شكراً لطرح تجربتك يا راعي الفكس ار

شوف ياخوي ما مرت عليك شركات كانت ناجحه جداً وبعد فتره تغير رئيس الشركة وفشلت فشل ذريع واعلنت افلاسها ؟

ما مرت عليك شركات كانت تعاني , وجا رئيس جديد وخلاها من اقوى الشركات ؟؟

الادارة لها نصيب كبير في مسألة ربح او خسارة اي مشروع

مهب لان الرجال كان مايصفى له الا اربع الاف معناها انك بتخسر او ما تقدر تزيد ارباحك

تقدر لكن تحتاج انك تغير من سياسة المغسلة وتتميز عن باقي المغاسل بشي مميز مثلا يجذب لك الزباين

[Al-Kuwari]

فيه مواهب وفيه طموح شابه
لكن
في المقابل
في هوامير ( فراعنه ) تجار قدماء
يبقون حجرعثرة في وجيه هؤلا الشباب من جميع الامور أقلها عدم دعمهم بأي شكل من الاشكال

مهب شرط الواحد يبدا بشكل قوي يا رحال
ممكن الواحد يبدا بشكل بسيط وشوي شوي ينمي مشاريعه ويكون عنده القدرة على منافسة هالهوامير

التخطيط يحل كل المشاكل بأذن الله

[QtrGate]

كانت عندي فكره جديدة ومميزة
لأكن لما شفت المبلغ الي راح ادفعه للإيجار والخلو
غيرت رايي

عيل 300 الف خلو محل

[عثرة جواد]

كانت عندي فكره جديدة ومميزة
لأكن لما شفت المبلغ الي راح ادفعه للإيجار والخلو
غيرت رايي

عيل 300 الف خلو محل

الخلو يكون حق المحل الي فية اغراض بس

اما الي جديد او فاضي مايكون فية خلو انتبهو من السماسرة الجشعين

[JN000N]

كانت عندي فكره جديدة ومميزة
لأكن لما شفت المبلغ الي راح ادفعه للإيجار والخلو
غيرت رايي

عيل 300 الف خلو محل

هه وينه بو 300. هاته انا ابيه
انا دافعه 500 وشي خلو حق المحل
ماعندك راس مال روح لدار الانماء يساعدونك ف المشروع

[الزعفراني]

اسمح لي اخوي لا اتفق معاك

مب ملزومه اتعامل مع دار الإنماء الاجتماعي
عندي افكاري الخاصه وعندي خطه للمشروع وكل شي بس باقي التطبيق والمعوق الاساسي لي ارتفاع الايجارات وعدم الحصول ع اماكن مناسبه للمشروع
والانستغرام لا يناسب مشروعي

حاولنا نقدم ع اسواق الفرجان وللاسف ماكان لنا نصيب
حاولنا نقدم بسوق واقف للاسف مافي محلات فاضيه
حاولنا نستأجر مساحه في كتارا للاسف محد عطانا ويه
حاولنا نقدم في اسواق الوكره التراثيه للاسف تم توزيعه ومالنا نصيب فيه
حاولنا في الكورنيش ممنوع!!
حاولت وحاولت ومازلت احاول ولعلى وعسى

اذا تشتكين من ارتفاع الايجارات عيل اشلج بالتجارة :)

في فريجنا افتحوا محلات جديدة ايجار المحل 14 الف ريال .. وهذا الهنود شغالين .. اللي سوبرماركت واللي معصره وماشيه امورهم :)

واحد من اللي اعرفه اشتغل مع بنك التنمية يكلمني عن وحده اسبقتهم في هالبرنامج .. بدت مشروعها مع بنك التنمية والان عندها محل في اللؤلؤة وعندها ماركة ملابس باسمها .. وبدت وياهم بمكتب صغير وبدعم منهم

ويوم واحد سألها في وحده من ورش العمل اللي تكلمت فيها عن تجربتها .. كم رصيدج ؟

قالت من كثر الفلوس اللي تجيني من المشروع ما عدت افتكر ولا احسب لان ماعاد هدف عندي كثر انه مشروعي ينتشر ويكون له صيت وتكون له افرع في أوروبا

واحقق النجاح لذاتي :)

اللي يبي الشيء وصامل وعنده الاراده وواثق من نفسه ومن مشروعه وقدرته على انجاح المشروع مافي شي يوقف في طريقه ..

شماعة ارتفاع الايجارات هذي الكل يعلق عليها خوفه ويتعذر فيها

اللي عنده مشروع وفكرة مشروعه مميزه وواثق من المنتج اللي عنده او الخدمة اللي يقدمها تأكدي ما يفتكر بسالفة الايجارات

وهذي تجارة يبيلها صبر واذا مش محرزه مع التاجر بلاها .. واذا محرزه لا والله يتوكل على الله لو الايجار يوصل 100 الف ريال :)


تحياتي واشواقي

[Al-Kuwari]

دخلت وبكتب نفس التعليقاات

مشكلتنا ياخوي الغلاء والدوله ماتشجع
السيطره بيد لوبي واحد مكوش على كل شي ومتحكم بسعر العقار والمواد
الاستيراد عليه شروط معقده
بيئتنا صعبه بعطيك مثال
كنت افكر بمشروع مشابه للي في السعوديه عباره عن كوفي شوب قهوه صغير للسيارات نفس الي نشوفهم بالسعوديه على شكل مجسم كوب قهوه
اهني ممنوع
تبي تسوي مطعم على شكل بنايه غريبه والوان قالوا ممنوع
حتى الاسامي الي تختارها يتحكمون فيك
عندنا رخص ماتطلع
الاجارات نار
ممنوع فتح اكشاك لا بكورنيش ولا كتارا ولا بأي مكان كله احتكار
تتمشى بأماكن عامه في كل دول العالم تلقى اكشاك وبضايع من كل شكل اهني تطلع تتمشى ماتحصل شي تهلك بالكورنيش وسباير والحدايق مافيه شي
عندنا قوانين وشروط مب بالكويت ولا دبي ولا السعوديه
وهذا يبي له وقفه مراجعه من وزارة الاقتصاد والدوله لازم تشجع على التجاره وتيسرها لكن المتحكرين مبسوطين ومتحكمين بالقوانين


معاج يا ارسطو ان وزارة التجارة مقصرة جداً في هذا الجانب وما تشجع الناس بكثرة القيود والعراقيل

بس ليش ما الواحد يشوف حلول للمشاكل هذي ؟

ما نفعت فكرة الكشك في افكار ثانية

شوفي شنو الموجود وبناء عليه ابني فكرة وابدي فيها

انا ما اقول ان مافي عراقيل في كل مكان فالعالم راح تكون في عراقيل , لكن الشاطر والمبدع اللي يجد طريقة للتكيف مع هالعراقيل ولو اضطر انه يبدا مثلا بجزء من مشروعه وبعدين يتوسع ويكمل مشروعة بشكل كامل بالفكرة الاولية اللي بدا فيها

[Al-Kuwari]

لان مافي شي حادنا ...

اذا الشخص مرتاح نادر مايبدع او يتعب نفسه

و الحاجه ام الاختراع ، واحنا الحمدالله كشعب مرتاح وغير محتاج

شلي يحدنا نهد اشغالنا المرتاحين فيها من الناحيه النفسيه والماديه ، وندخل نفسنا بمتاهات التجاره ؟!

ليش دايماً نربط التجارة بالمقابل المادي ؟

ليش ما تكون التجارة لتحقيق طموح شخصي او ملأ وقت الفراغ او تكون طريقة لطرح فكرة او مشروع يمثلج كشخصية , قبل ما تكون التجارة لتحقيق ارباح او عوائد مادية


بأختصار ليش طموحنا يكون محدود براتب نستلمه اخر الشهر وخلاص , او يوم روتيني يبدأ بدوام ثم مضيعه وقت ثم نوم ونكرر الجدول بشكل يومي ؟؟

[Al-Kuwari]

السبب الرئيسي هو غلاء الايجارات فقط
خل الدوله تساعدنا بخفض الاجارات وخل يشوفون ابداعاتنا

معاج يا دايموند ان الاجارات غالية

لكن ليش ما نتكيف مع الوضع

مثلا لو المشروع عباره عن كوفي او محل حلويات نبدا بالانستغرام وشوي شوي نتوسع

ليش مانجمع مبلغ يكفي اجار ست شهور قدام وبعدها المحل يبدا يشل نفسه ان شاء الله

ليش ما نبدا بالبحث عن الحلول بدل وضع العراقيل امامنا ؟؟

[Al-Kuwari]

الصراحة استفدت من النقاش .. اتمنى الاستمرار
من فترة بعد ما تخرجت من الجامعة كنت افكر بالتجارة وجمعت لي راس مال لا بأس به
لكن ماعندي فكرة عن طريقة البداية ..

يبدو من خلال الردود ان الايجارات فعلا عائق كبير

نصيحة من اخوك , لا تبدا مشروع بدون ما تكون ملم فيه وفاهمه عدل

خذ وقتك وافهم الفكرة اللي تبي تسويها وادرس هل هي متوفره او لا ولو متوفره كيف تتميز بمشروعك والله يوفقك ان شاء الله

[Al-Kuwari]

لان الشباب يحبون يقيلون لين صلاة المغرب :)

وعقب عندهم دوام في كتارا واللؤلؤة .. وشفتات في وقت الشاي :)


تحياتي واشواقي

وصلنا خير يالزعفراني

كيف ممكن نغير عقلية الشباب من عقلية تافهة مبنيه على اضاعه الوقت الى عقلية منتجه طموحه ؟

شنو الحلول من وجهة نظرك ؟؟

[دايموند]

اذا تشتكين من ارتفاع الايجارات عيل اشلج بالتجارة
تحياتي واشواقي


تسأل وتجاوب
عرفت ليش سبب عزوف اكثر شباب قطر عن التجاره!!
لان مثل ما قلت اشلنا بالتجاره دام مانقدر ع الايجارات!!

[دايموند]

معاج يا دايموند ان الاجارات غالية

لكن ليش ما نتكيف مع الوضع

مثلا لو المشروع عباره عن كوفي او محل حلويات نبدا بالانستغرام وشوي شوي نتوسع

ليش مانجمع مبلغ يكفي اجار ست شهور قدام وبعدها المحل يبدا يشل نفسه ان شاء الله

ليش ما نبدا بالبحث عن الحلول بدل وضع العراقيل امامنا ؟؟

المشكله اخوي مابي ابدا بانستغرام علشان ماتنباق افكاري من محلات ثانيه
ابي اسوي لي اسم وسمعه وبعدين احط لي انستغرام


ع العموم انا ماعندي مشكله مع التكيف بالايجار بس المشكله بضطر ارقع اسعار منتجاتي علشان اغطي الايجار
وبصراحه انا احط نفسي مكان الزبون تن شفت شي غالي ومتوفر بمكان ثاني بسعر ارخص اكيد بروح للمكان الثاني
وثانيا مابي ابتدي باسعار عاليه من اولها خل اكون لي مكانه بسوق بعدين ممكن ارفع الاسعار شوي

فمشكلتي حاليا بالايجار
ايجار مرتفع =اسعار منتجاتي مرتفعه وبالتالي هل راح اضمن ان في زباين بيشترون!!

[Al-Kuwari]

المشكله اخوي مابي ابدا بانستغرام علشان ماتنباق افكاري من محلات ثانيه
ابي اسوي لي اسم وسمعه وبعدين احط لي انستغرام


ع العموم انا ماعندي مشكله مع التكيف بالايجار بس المشكله بضطر ارقع اسعار منتجاتي علشان اغطي الايجار
وبصراحه انا احط نفسي مكان الزبون تن شفت شي غالي ومتوفر بمكان ثاني بسعر ارخص اكيد بروح للمكان الثاني
وثانيا مابي ابتدي باسعار عاليه من اولها خل اكون لي مكانه بسوق بعدين ممكن ارفع الاسعار شوي

فمشكلتي حاليا بالايجار
ايجار مرتفع =اسعار منتجاتي مرتفعه وبالتالي هل راح اضمن ان في زباين بيشترون!!

اختي ممكن تبدين بالانستغرام ومب لازم تعرضين كل افكارج ابدي بشكل بسيط كوني لج اسم وسوق وجمعي الارباح عشان تعينج عالاجار ست شهور عالاقل

ثاني شي تأكدي ان الفكرة المميزة جداً والفريدة من نوعها صعب تقليدها , حاولي تخلين فكرتج صعب تفسيرها او مثل مايقولون بالانجليزي hard to breakdown

بحيث ان اللي بيحاول يقلدج مايعرف يقلدج لان مايدري انتي شلون سويتي هالمنتج

طبعاً انا ما اعرف شنو مشروعج ولكن اكيد في طرق لجعل محاكاة المنتج صعبة


وبعدين ياختي الكريمة , هل لو انتظرنا بتنزل الاجارات مثلا؟ انتي تعرفين ان سوقنا مزاجي ولا يخضع للحقائق العلمية للتجارة لو يصير سعر برميل البترول دولار واحد , ربعنا ماراح ينزلون الاجارات

فانتي الحين عندج حلين الله يسلمج

يا انج تبدين بشكل بسيط وتتوسعين مع الايرادات

او انج تحطين خطة انج مثلا خلال سنتين تجمعين المبلغ الفلاني , وهالمبلغ يغطي تكاليف افتتاح المشروع + اجار اول ست شهور مثلا

فالنهاية اتمنى تقومين بخطوة ايجابية واضعف الايمان التخطيط و وضع خطه

الله يوفقج ان شاء الله

[Al-Kuwari]

السلام عليكم

انا من وجهة نظري اشوف ""

1-الشاب القطري سواء بنت او والد ماترباء ع فن الاعتماد ع النفس .

2-ماتعلم اشلون يكون لة كيان مستقل .

3-ماتعلم اشلون يدير مصروفة .

4-التربية تلعب دوور اساسي ف اخراج مواهب الطفل .

موضوع يستحق المتابعة

يعني اختي عثرة جواد

هل تعتقدين الحل لتغيير العقلية الاتكالية هذي يبدا من البيت والمدرسة ؟؟ هل الجيل الحالي صعب تغييره ؟ ولازم نبدا مع الاجيال الجديده ؟ او في طرق ممكن نزيد من وعي الجيل الحالي ونغير من طريقة تفكيرة وتصرفاته ؟؟

[Al-Kuwari]

غير صحيح .. الدولة تعطي مكاتب بسعر رمزي اظن ريال في اليوم :)

شيكوا مع دار الانماء الاجتماعي وبنك التنمية عندهم مشاريع ودعم للشباب الطموحيين اللي ناوين يبلشون في التجاره

يأهلون الشخص ويوجهونه ويدربونه ويعطونه مكتب يدير شغله فيه ويعطونه فلووووس مبدئيا 100 الف بدون فوايد ويكون تحت التجربة

اذا نجح واثبت وجوده .. راح يرتفع الدعم ويوصل الى مليون ريال وبدون فوائد ولكن يدخلون معاك شريك في الارباح بنسبة اظن 20%

الافكار والمشاريع مش شرط محل تجاري طول بعرض ولكن الواحد يقدر يبلش عن طريق الانترنت

ووسائل التواصل الاجتماعي

الزعفراني , جزاك الله خير مشاركة ومعلومات قيمة

عندك رابط فيه معلومات اكثر ؟

هالموضوع يهمني وايد خصوصا اني في مرحلة التخطيط لمشروع خاص فيني حالياً

[ابن سينا]

عندنا في قطر كرك لنعيمي وقت الشاي وكرك المقانيص

[عزووز قطر]

اخوي الكواري

في البداية أحب أشكرك على طرحك الموضوع ...
أتوقع فكرة التجارة راودت أغلب الشباب القطري بس ارتفاع أسعار الايجارات وقلة الشوارع التجارية والأسواق وكثرة العراقيل وقفت عائق أمام طموحهم ..
وعلشان نكون واقعيين .. اغلب الشباب يتأثرون بكلام المجالس مثل : تقدر على ايجار المحل ؟؟ وشلون بتغطي ايجار سكن العمال ؟؟ ووين بتحصل المحل ؟؟ يارجال شتبي في عوار الراس ..؟؟

تحصل الشاب يتحطم نفسياً عقب هالكلام ويقول ليش أعور راسي .. ويشيل الفكرة من راسه بسبب الاحباط ..
البداية تكون بالتخطيط مثل ماذكرت ثم الدعم النفسي والمعنوي للشاب من أهله وربعه .. وصدقني بيكون مشروع ناجح ومثل مايقولون لكل مجتهد نصيب..

[الجووري]

بتوجيهات حضرة صاحب السمو الشيخ تميم بن حمد آل ثاني أمير البلاد المفدى بدعم القطاع الخاص القطري بإعداد تشريعات وإجراءات تمكنه من زيادة مساهمته الإيجابية بوصفه شريكا لا منافسا للحكومة في التنمية الشاملة وبتأكيد معالي الشيخ عبدالله بن ناصر بن خليفة آل ثاني رئيس مجلس الوزراء ووزير الداخلية على التزام الحكومة بتنفيذ توجيهات وتكليف سموه، لتحقيق نتائج يشعر بها المواطن والتاجر والمستثمر القطري في أقرب وقت، والالتزام بتحقيق رؤية سموه التي تعبر عن آمال وطموح الشعب القطري.

[مستر بن]

تبيي الصصج ؟؟
اييجارات الدوححه سايرهه نفس مهر البنت ..
ككل شووي الاسعار تطيرر :rolleyes2:

[QtrGate]

هه وينه بو 300. هاته انا ابيه
انا دافعه 500 وشي خلو حق المحل
ماعندك راس مال روح لدار الانماء يساعدونك ف المشروع

دار الإنماء الاجتماعي
لازم تحضر دوره تبدأ من الساعة 4 لين 8 يومين لمدة أسبوع
وتمويلهم يكون على المعدات

[الجـــوديّ]

رد جميل اختي الجودي واتفق معاج في ما طرحتيه

ونرجع للسؤال , ليش ما تتغير هالعقلية ؟؟

أعتقد إن هالعقلية محتاجة تحتك بناس اصحاب تجارب ناجحة ويشوفون أمثلة واضحة قدامهم
يونون قدوة في التجارة اذا صح التعبير أو يمشون على خطاهم .ز لين يثبتون نفسهم في المجال وبعدها ينطلقون
يعني حد مقارب لهم .. موب من الهوامير الكبار ولا من التجار العاديين .. ناس لهم تجربة البداية من الصفر..
وينقلون لهم الصعوبات والتحديات اللي واجهتهم.


لأن شبابانا وايد يتاثرون بربع المجلس .. وآرائهم .. وبعضهم يمشي عمياني وراه حتى في الغلط الا من رحم الله
وهذا الواضح من تكرار التجارب المتواضعة والخسرانة بدون تفكير ذاتي خلاق!

هذا غير .. إن في مفهوم لازم يتغير بأن التجارة=مدخول آخر الشهر

صحيح أن الهدف العام .. هو الربح ... وتكوين مصدر دخل اضافي
لكن يحتاج لمتطلبات كثيرة لضمان الاستمرارية ... واني احقق ارباح عالية مب بس ارباح او اني ما اكون خسران
ويحتاج لمهارات شخصية وعملية وتخطيط وشغفففف بالمجال علشان التاجر يتميز بتجارته ويكوّن له براند خاص فيه.

يحتاج ان الواحد دايماً يقرا .. ويكون له علاقات كبيرة ويسمع التجارب الناجحة والفاشلة ..
يحتاج شجاعة وروح التحدي والمغامرة وتوقع كل الاحتمالات مو بس الحلم بالارباح الوفيرة والتخطيط ماش والحسابات مو ماسكها صح !
حتى لو ما عندنا مثل هالتجارب .. الحين العالم صار صغير والنت ممكن توصلني لأي شخص صاحب أعمال في العالم.

للحين .. فيه شباب يرفضون مبدا حضور دورة وكأنها إهانة له
في حين أن مثل هالورات اذا ماعنك من يقدم لك الخبرة تقدر تحصل على مفاتيح النجاح بعد توفيق
تغنيك عن الوقوع في أخطاء جسيمة .. ومنها الطقة اللي اتجيك من ورا الخسارة!

[Al-Kuwari]

أولآ اخوي شكرآ على موضوعك وبعدين عندنا الواحد يستحي من ان يمسك او يدير بعض المشاريع مثل الى ذكرته لحاله من كلام الناس انه ليش يدير لحاله ووووو وهذا هو المشكلة وانا بعد المشكلة البعض نجح لانه ما يفكر في كلام الناس ووووو وشكرآ

شكراُ على ردك يا رجل مثالي والسموحه عالتأخير انشغلت شوي مع مشروع التخرج بالجامعة

طيب مهب شرط ان مثلا لو القطري فتح مطعم برغر انه يطبخ بالداخل

لا لا

بس ممكن يكون توجه المحل , نوعية الوجبات , تصميم المحل والمنيو كلهم من وحي خياله

يعني براند جديد فيه نظرة التاجر لكن مب بالضرورة انه هو اللي ياخذ طلبات الزباين او يطبخ لهم

[Al-Kuwari]

وعليكم السلام

اتفق مع الأخوان أن العائق الرئيسي هي التراخيص والموقع والاجراءات
بس حالياً مشكلتنا مش في قلة المشاريع ( مقارنة مع آخر سنتين ) مشكلتنا الأساسية صارت في تنويع المشاريع
أغلب الشباب أتجهوا الى المطاعم وكان تركيزهم على برزنتيشن الاكل او ديكور المطعم ..!

ليش ما نشوف مشاريع جديدة مبتكرة وحتى لو كان جزء من الفكرة موجود اصلاً في دولة مجاورة ..!
واللي يفكر يفتح مشروع هذا وقته بوجود اسرع طريقة للانتشار وهي وسائل التواصل الاجتماعي

والله يوفق الجميع

صحيح اتفق معاج بكل ما ذكرتيه ,

انا مثلا عندي فكرة كوفي شوب وبشكل جديد ومنيو جديد , لكن المشكلة هي الموقع

المواقع الممتازة مهب موجودة حالياً ومشغولة بالكامل

واتفق معاج تمللنا من ان نروح مطعم ونشوف المنيو وثاني يوم نروح مطعم ثاني ونفس المنيو

نبي شي جديد نبي ابتكار نبي اشياء مهب متوفرة فالسوق حالياً

[Al-Kuwari]

الكويتيين والسعوديين فيهم نقطة جدا ايجابية وهم انهم ما يستحون من اي عمل يسوونه
وما يسوون حساب اذا كانوا لابسين ثياب او ملابس خليجية رسمية..

فمن جذيه ممكن الكويتي تلقاه يوقف في مطعم ويشرف بنفسه على الطبخ
او سعودي يبيع في المطعم نفسه..

عندنا لو الواحد عنده محل يضطر ينخش من الزباين لانه لابس ثوب وغترة وعقال
بينما عندنا ناس من جنسيات ثانية رغم انهم يلبسون ثياب الا انهم حزة جلوسهم في المحلات
يلبسون ما يناسب المكان اللي هم واقفين فيه حسب مراعاة لطبيعة الزباين..

فمن جذيه شبابنا يتفقرون الى الحس التجاري المنفتح وما يطلعون على الجوانب المهمة
في كسب الزباين و اذواقهم..

وهالشي ممكن ما نلاقيه عند تجار وتاجرات الانستغرام..
تواصلهم جدا سهل وسلسل مع الزباين .. وكل يوم يتعلمون وكل يوم يطلعون على
بضائع جديدة و جودات افضل او اقل حسب متطلبات السوق..

لكن هل ممكن نشوف لهم محلات تجارية؟

اقول صعب .. لان المحلات التجارية اسعارها غالية وايد..
و غلاء اسعار الايجارات عائق كبير في وجه تطور التاجر القطري..

وخاصة لو حطينا في الحساب سيطرة هوامير معينة على امور كثيرة في البلاد
حتى المعاصر ناشبوا فيها الناس.. فعادي عندهم يدفعون اي ايجار يبون وفوقه
عادي عندهم ما يطالبون بخفض الايجارات..

ومع هذا هناك مكافحات من البعض في عمل مشاريع جديدة والاشراف عليها..

وايد صوالين نلقى راعية الصالون القطرية هي اللي تشرف على العاملات..
رحنا فيلا عبارة عن كافيه صغير و محلات فوق لاكثر من مصممة عبايات
مخصص للنساء فقط.. كديكور وكفكرة المشروع حلوو.. لكن يبقى ذوق المرتاد
في اختيار المعروض + الاسعار ..

اشكرج على ردج يالحمامة ,

اتفق معاج لكن مهب شرط اني اوقف بالمطعم عشان يكون البراند خاص فيني , ممكن اني اكون مشرف لا اكثر من بعيد لكن فكرة المنتج طريقة تقديمه الديكور الاسم تكون اشياء انا اكون مخترعها وصاحب الفكرة , مهب فقط اخذ الدارج بالسوق او افتح فرانشايز لوكالة معروفة وخلاص , في طرق كثيرة لخلق فكرة جديدة وبراند جديد بدون ما اكون انا فالمطبخ مثلا او اكون واقف فالمحل ابيع واتعامل مع العملاء

بخصوص الاجارات نعم كبداية ومستثمر جديد صعب

لكن ليش مانشوف تجار الانستغرام المشهورين يفتحون محل بعد فتره ؟

خلال سنه او سنتين ممكن التاجر يفتح محله الخاص بارباح السنتين اللي فاتوا فالانستغرام ؟ صح ؟؟

[الحياة الخالدة]

موضوع رائع
لكن ليس عندي شيء لأضيفــــــه
لذلك سأكتفي بالمتابعة والاستفادة
قواكم اللــــــــه

[Al-Kuwari]

,

,


مرحبا


شكرا على الموضوع

وشكرا للاخوه والاخوات بصراحه ما قصروا بالردود تم ذكر اكثر السلبيات ومن واقع تجارب

بس حبيت اضيف كم نقطه لتوضيح بعض الامور

1- قبل 20 سنه القطري عيب ومنقود يشتغل او يجلس في محل ( دكان ) ( للاسف ) هذا حرم اكثر من جيل من متعه التجاره
وما زال هناك بعض الاثار من هذا الموضوع البعض تحرر منه والبعض الاخر ( يخجل ) منه

2- الوضع في قطر مختلف عن باقي دول الخليج ( الرواتب ) والجميع يعمل بالحكومه ولايوجد هناك ( حاجه ) للعمل بالتجاره
بينما باقي دول الخليج هناك ( بطاله ) وضعف الرواتب وضيق الحال ( يجبر ) الناس على التجاره بتلك الدوله لذلك هو حاجه

3- كان القطري يعمل سائق تاكسي او بالبحر او في تربيه الحلال او عامل بالبترول ولكن لا يفتح ( محل ) نهائيا
بينما المحلات بسوق واقف تلك الفتره يعمل فيها فئات بالمجتمع اقتحمت هذا المجال ونجحت فيه نجاح كبير لان الساحه كانت كامله لهم بدون منافس
وهم كبار التجار الان بهذا الوقت سيطرتهم كامله على كل النواحي الاقتصاديه والتجاريه والوكالات
والتدفقات النقديه اداروها بحكمه في شراء
( العقار ) خاصه الاراضي
ابنائهم هم الان صورهم بالصحف وهم خبراء التجاره
:)
الله يبارك لهم في حلالهم ومالهم

مثل ما يقول المثل الشعبي

( طارت الطيور برزاقها )

بينما هناك من ( يفكر بالدخول الان ) بالتجاره وعليكم قياس الفارق بين هذا وهذا



لذلك عدد القطريين العاملين بالتجاره قليل جدا جدا للاسباب سابقه الذكر

هذه المقدمه ضروريه لحصر الاسباب عزوف الشاب اليوم لانها امتداد لتلك الفتره


معوقات التجاره بقطر


1- نقص الخبره والخوف من الخساره والاحباط وعدم التشجيع من الاهل والاصدقاء
2- ارتفاع اسعار الايجارات
3- صعوبه الحصول على ارض تجاريه او صناعيه
4- احتكار الرخص المربحه مثل ( صالات الافراح \ الصرافه\الوكالات )
5- عدم وجود الشريك المناسب صاحب الخبره
6- غرفه التجاره لاتقوم بالدور الصحيح لمساعده التجار( وتوجيهم ) والاعضاء هم المستفيدون من التعرف على التجار القادمون من الدول الاجنبيه
7- سيطره بعض الجنسيات على كثير من النشاطات بالسوق وهم يشكلون ( لوبي )

كل تلك المعوقات موجوده بقطر وموجوده ايضا بكل دول الخليج والعالم

تربينا في قطر على ان العقار هو الابن البار ولانه قطاع كبير يصعب السيطره عليه من التجاراو من الحكومه لذلك هو متاح للجميع ومربح مع الوقت
لذلك ( اهل قطر ) لاكثريه منهم يمتلك ( عقار مؤجر ))


التجاره فيها بركه وفيها ايضا الكثير من المخاطر وفيها الكثير من الصعوبات

حبيت اذكركم بقصه الصحابي الجليل عبدالرحمن ابن عوف
حين قال ( دلوني على السوق ) وهو لايمتلك شي الا ثيابه وعقله ونشاطه والحس التجاري

لم يقل
اعطوني محل !! او الايجارات غاليه
او اعطوني راس مال !!
او اعطوني ارض !!
ولم يقل ان يهود المدينه مسيطرين على السوق !!

حبيت اذكركم بالراجحي من عصرنا هذا

المعوقات موجوده بكل بلد وبكل زمن وبكل مكان ولكن ( من يمتلك الحس التجاري ) يستطيع البدايه تحت أي ظروف
الاصرار والمعرفه والحصول على المعلومه والعمل بالمجال المناسب لشخصيتك والمشروع المناسب والتدرج بالدخول
هو سر النجاح

من يتهيب طلوع الجبال يعيش ابد الدهر بين الحفر
:)

شكرا للجميع

,

,

ما شاء الله رد متكامل يا اخوي شموخ كعادتك

اتفق معاك الا في نقطة ان الدخول الان صعب ,

مثل ما كبار التجار بدوا قبل خمسين سنة والحين وصلوا , شي طبيعي اني ببدا الحين بشكل بسيط وصغير وبعد عشرين الى ثلاثين سنة ممكن اني اوصل لمستوى جيد , الكل لازم يبدا من الصفر محد بيبدا من خط النهاية الا لو كان ابوه تاجر وهو كمل من بعده

كذلك قبل خمسين سنه ماكان عندهم الا المحلات لعرض بضايعهم , اما الحين فهناك المواقع الالكترونية و وسائل التواصل الاجتماعي وكلها وسائل سهلت للناس الدخول كبداية خصوصا عند عدم توافر راس المال

بخصوص الحاجة , نعم اتفق معاك اغلب اهل قطر عايشين بخير والحمدلله , لكن ليش يكون ارتباط التجارة بالمادة فقط ؟ ليش مايكون لطرح فكرة

كمثال انا واحد من الشعب مهب عاجبني حال المطاعم والكوفيهات , ليش ما ابدا بالتغيير بنفسي , وافتح محل جديد بالفكرة اللي انا ابيها او الكثير يتكلمون عنها بالمجالس والدوامات وكل مكان , ليش ما ابدا فيها كسبيل للتغيير او طرح فكرة في بالي , تحقيق طموح مثلا , ليش دائماً وابداً نربط التجارة بالمادة لا اكثر ؟؟

[Al-Kuwari]

مرحبا اخوي الكواري ..

ماشاءالله موضوعك وبدون مجامله .. من افضل المواضيع هالأسبوع ..

سجلني متابع .. ويمكن مشارك مع تطور النقاش :nice:

اشكرك عالاطراء يا طيارنا العزيز

انزين نبي مشاركتك لاتحرمنا من تميز مشاركاتك اللي تعودنا عليها :)

[Al-Kuwari]

خلني اقول وجهة نظري بما اني فاتحة مشروع يديد وفي مرحلة التطوير

بالنسبة للشباب عندنا هني وفكرة الربح الثابت كل شهر (وهالشي غلط) يسوونها عشان مثل ماتقول يبون الفكه من العباله ف المراكض ورا المشروع وهو بحد ذاته فعلا مسؤوليه مع العمال والمعدات والخ الخ
ف يقول انا اجيبهم واشغلهم وهو يستلم كل شي وانا علي التوقيعات بس وكل شهر يجيب لي مثلا عشر الاف ريال وهو كيفه يتصرف
هني مانقول عن هالشي انه 100% غلط لان مرات مايكون عنده وقت او شغله يتحكم فيه اكثر ويمكن مايقدر يفهم ف امور تخص البزنز نفسه اللهم يتاكد ان كل شي صح ماشي بالقانون
ولو ان كذا قطري انكبو من هالسالفه وانباقو من العمال

بالنسبة للابتكار
هو مب شرط الواحد يخترع محل لا صار ولا ستوى
بالعكس يفتح فكره موجوده عادي ولكن يميزها بشي معين مع التجديد المستمر وعدم الاهمال > هالكلام تعلمته من ندوة للمشاريع الصغيره كان الريال الللي يحاضر اسمه محمد مساعد الربيعان

وهذي صورته

http://archive.aawsat.com/2014/07/08/images/Arabwaajam1.778576.jpg

والصراحة انا جدا جدا استفدت منه ويوم بديت مشروعي قررت اني اميزه بعدة اشيا يديده ماصارت من قبل
يعني اللي ابي اوصله ان انت لما تفتح مشروع مب لازم تتعب نفسك تدور مشروع ماعندك خلفيه عنه
سو اللي انت تفهم فيه ولكن اسعى ان يكون بصوره حديثه ومميزه وجذابه

شكرا عالرد جنون , والسموحه عالتاخير بالرد بسبب انشغالي بمشروع التخرج هالايام

شي حلو وجميل انج فتحتي مشروعج , اذا تسمحين شنو فكرة مشروعج او نوع المشروع ؟

بخصوص الرد نعم اتفق معاج غلط ان الواحد يرضى بمبلغ تافه نظيراً بما يطلعه المحل

فمثلا اجيب واحد يفتح المحل ويعطيني عشره وهو يطلع خمسين , هذا تصرف خاطئ من وجهة نظري

ممكن الواحد يفضي نفسه شوي ويرتب اموره

خصوصا ان الواحد بيتعب فالبداية عند الديكور والمعدات والعمال لكن بعد كم شهر لما يبدا المشروع يمشي ممكن يكلف كل موظف بمهام خاصة وهو يكون مدير عليهم ويتابع من بعيد لبعيد يمر عليهم مثلا كل يومين ويشوف الشغل شلون ماشي لكن مشكلة شبابنا الكسل وسوء استغلال الوقت

ماعنده مشكله يقعد فكوفي مع ربعه ثلاث ساعات لكن عنده مشكله انه يتابع محله ساعه فاليوم !

ونعم اتفق معاج مهب شرط ان الواحد يجيب شي جديد كلياً

كمثال كوفي شوغر اند سبايس , كوفي والدوحة مليانه كوفيهات لكن صالح تميز فمحله بالديكور وخدمة العملاء والمنيو وتميز بكل شي بصراحة والنتيجة ان حالياً الكوفي هو الاشهر والاقوى في قطر , ووصل لمرحلة ان محمد بن راشد جا الكوفي والشيخ الوالد كذلك كان متواجد فالكوفي قبل فتره حسب ما سمعت

لذلك السوق مازال فيه فرص كثيره لان كمية المشاريع كبيرة لكن التنوع قليل جداً وكل المحلات كوبي بيست من بعض اللهم اختلاف الاسم لا اكثر

[Al-Kuwari]

مشاركه خمس نجوم , الله يعطيك العافيه

اتفق معاك مشاركات شموخ دايماً ما تكون مشاركات مفيدة ومميزه

لكن نطمع بمشاركتك الشخصية اخوي دبل اتش :nice:

[Al-Kuwari]

بالضبط .. وفرتي علي رد .. كمثال على المغسلة اللي صافي ربحها قليل
ممكن الواحد ياخذ الشغل ويطوره ويضيف عليه من رؤيته الخاصه
لأن في الأخير هي أرزاق من الله
يمكن راعيها لاولي كان رزقه المبلغ اللي قاله .. وبس .... هذا اللي الله كاتبه له
لكن اللي بعده .. يمكن الله يفتح عليه الالهام شلون يطوره ويمكن يحقق أرباح مضاعفة
ويستمر ويتوفق في فتح افرع جديدة



الشاهد ..

الواحد لازم يجرب في شي يحبه ويفهم فيه
وضروري جداً يكون له متابعات اقتصادية وتجارية مع اشخاص ومواقع وخبراء وتجارب الكبار والصغار
ويكون له شبكات علاقات .. ودايماً يقرا ويتعلم ويسأل علشان الحس التجاري عنده يتقد...

وفي الآخير ..

نتفاءل خير .. نجتهد .. نتوكل على الله و نناطح الجبال

" وَفِي السَّمَاءِ رِزْقُكُمْ وَمَا تُوعَدُونَ"



كلام سليم الجودي

طريقة الادارة تلعب دور كبير وكذلك شغف التاجر بتجارته يلعب دور

صعب انك تشتغل في شي انت ماتحبه او مايستهويك

اشكرج عالمشاركة المميزة

[Al-Kuwari]

ايجارات خرافية
اراضي اسعارها بدون سقف
احتكار
اسعار البناء غالية


وكأن التجارة محتكرة لفئة معينة فقط
الاسماء مكررة في كل مجمع تجاري و في كل شارع

اشكرك عالرد اخوي قطر

لكن ليش دايماً نشوف الجوانب السلبية ونهمل الايجابية ؟

وليش ما ندور حلول او طرق لتجاوز هالعوامل السلبية بدل الاحباط ؟؟

[Al-Kuwari]

اغلب الردود تكلمت عن الايجارات وارتفاع اسعارها انا اقول هذا الشي ليس بالمشكله لوجود قوة شرائية في السوق فالايجار مرتفع بيرفع على الزبون فهذا ليس بسبب... اشوف ان الواحد الي يبغي تجارة يدرس الموضوع من جميع جوانبه اي جدوى اقتصادية ولا يفكر في مشاربع اكبر من قدراته الفكرية والمادية... لكن بالمقابل ايضا لا ننكر ان التجارة المهمه والبارزة تكاد تكون محتكره وليست متاحه للعامه ولكن اغلب التجارات المتوسطه والصغيرة متاحة وهي جيده كمدخول اضافي مثل مغسله ملابس خياط رجالي ولا نسائي واهم شي في هالتجارة الموقع المناسب والتجاره اولاً واخيره هي ارزاق مع حسن تدبير من الشخص

كلام حلو ومنسق

اتفق معاك

اشكرك عالاضافة يالعربية