.. يعطيهم العافية ماقصروا وحياهم الله بأي وقت ..!!

[مهرة]

..


يــآرب إن ضـآقــت قُـلــوب الـنـآسِ عـن مـآفـيِ مـن خـيــرَ فـعـفُـوكَ لآيـضـيـقُ .**

..


السلام عليكم ورحمة الله وبركاته ,,


بختصار ماهي الصفات والشروط اللازمه لظهور وجوه أعلامية قطرية متميزة ؟؟ للــ (( السوشال ميديا )) مع اني امقتها هذي الكلمة لترددها بدون وعي وبدون لزمة في بعض المجالات.!!

* كيف يقدر يقدم نفسه ويطورها ويثبت نقطة وجوده وثباته وخطه الخاص فيه مع بعض التوجيهات السليمة ومن نموها وابرازها بالشكل المطلوب يأتي منطلق خدمة الوطن ويمثل بلاده خير تمثيل ويكون فخور بنفسه وبلده وبما أنجز وراح يصير قدوة ومثال فعال لغيره ومنها أيضاً تشجيع وتحفيز للأجيال القادمة بإذنه تعالى .

*لا تنسى انك بتكون مفخرة أهلك وناسك وربعك والي يحبونك والي يبون لك الخير وبتصير شخصية مشهورة ولك مثل ماعليك,, إذا كــ (برزنتر) كــ (وجه) أعلامي قطري متميز ماهي المؤهلات اللازمة لملىء هذي الفجوات الهوائية العملاقة (ناقصنا كثير) طبعاً غير الشهادة؟؟

*الكاريزما ولباقة التحدث واللغة الشفافة المتعارف عليها والنطق الصحيح والثقافة بمجمل مختلف المجالات التي تخدم مواضيع التواصل الأجتماعي .! أما شكلياً
اممممممممممم (مايندرى والله) بنشوف لكم لجآن وهندام بهذا الخصوص وأكيد فيها سبونسر لازم :rolleyes2:

* ليش مافيه وجوه شابه نابضة بالحيوية والإيجابية قطرية .؟؟ مثال مهرجان الــ (QIFF) ضوى ممكن تجاوبين على الأختصار :telephone: ؟؟

أغلب الوجوه الي غطت المهرجان والي إدارة المهرجان طالبتهم بالأسم ومستضيفتهم لخدمة مشروعهم (Kravekw) و (Maxofarabia) ماكس أنصحكم تابعونه :victory: وبعد كونسبت وكذا طباخ كويتي وأغلبهم مشهورين ومعروفين ببلادهم وكان قبلهم أكثر شخصية محبوبة عندهم الشيخ ماجد الصباح .. وغيرهم طيب وين القطريين .!! (أقصد برنامج الأنستا )

* فهد الكبيسي كان له حضوره ويعطيه العافيه بس كضيف شرف احنا نبي نفس المؤثرين الإيجابيين الشبابيين والمثقفين الي ممكن يظهرون نفسهم وبلادهم بأجمل صورة؟ اش ناقصكم؟ وشنهي توجهاتكم؟ وليش مافيه ( قصة ود ) وارتباط روحاني بينكم وبين الكاميرا ؟؟

ولا بس فالحين تصورون الطعوس والحوادث وشاي الكرك الي ماينشرب والمجمر المحرووق الي ماينأكل وآخرتها يطلبون من ام نايف من الأنستغرام.!!

* طبعاً ماننسى بعض المتميزين بقناة قطر وقناة الريان من مذيعين او مراسلين او حتى معدين التقارير (سوو اي شي) وأعتقد بأن إدارة القنوات راح تساعدكم وتخدمكم لأنها محتاجه لوجيهكم الطيبه .!

حتى جوني ديب شارك بالمهرجان (ياهلا ورحب فيه والله) مسكنك مابين الخد والحاجب (بالمهلي مايولي) :cool:

نبي شي (صنع في قطر) شغله بسيطة ومفيدة وفيها مميزات وحفاوات ونقاط أخرى قد نغفلها ونود الوصول إليها وهذا هو مفتاحها ؟؟

اشريكم من الي يحس فيه هذه المواصفات ؟او يعرف شخص مؤهل لمثل ماتفضلت به أعلاه ,, بس من 18 إلى 35 والي من 40 وفوق خلهم على السيف بيجيهم الدور بتصوير أحد التقارير ..! او برنامج رمضانيات بسوق واقف او ألغاز البادية بعد مدفع الإفطار لا تحاتون إلا ما نلقى لكم برواز ونحطكم فيه .!!

..


مـا بال بعض الناس صاروا أبحرًا ,, يـخفون تحـت الحب حقد الحاقدين
يا لـيت بين يـدي مــرآة تــرى ,, مــا في قـلوب النـاس من أمـر دفـيـن

**

[sweet qatar]

ايوووووا ... جميل جدآ هذا الطرح المتمكن




أعتقد حاجز الخجل الاجتماعي يلعب دور كبير

بس في نماذج تستحق الاهتمام مثل محمد الكواري

شاب قطري مبدع وله قاعدة جماهيرية.. !!

[JN000N]

في قطريين وقطريات
ولكن الاسلوب الله بالخير
شلون يكون وجه مشرف؟
راجعتلج

[Rebilion]

المجتمع القطري جي يحارب أي ابداع واي شي جديد مثلاً فيه وايد بنات اماراتيات على انستقرام وسوشل ميديا وكذلك كويتيات بس مافيه قطريات ولا سعوديات ثقافه قطر والسعوديه جي كل شي عيب وكل شي حرام وكل شي لا

[الزعفراني]

والله فيه شباب عندهم مواهب لكن مع الاسف الخجل الاجتماعي يسيطر عليهم .. لان المجتمع ما يرحم .. شلة الاستلام ولطنازه تدمرهم .. مع ان الواحد اذا بدأ في هالمجال المفروض كلام الناس يحطه تحت ريوله ولا يفتكر اهم شي يكون مقتنع باللي يسويه :)

[الجـــوديّ]

فيه واحد مبدع .. على التويتر الانستغرام والسناب شات
كان عضو مميز هنيه في المنتدى ..
له جمهور عريض
وهو الله يجزاه خير تناوله .. متجه نحو الأمور المحلية والوطنية أحييه على هذا التوجه
وأن يكون قدوة للظهور الحسن لباقي الشباب

[مهرة]

ايوووووا ... جميل جدآ هذا الطرح المتمكن




أعتقد حاجز الخجل الاجتماعي يلعب دور كبير

بس في نماذج تستحق الاهتمام مثل محمد الكواري

شاب قطري مبدع وله قاعدة جماهيرية.. !!


الجميل تواجدج بالموضوع ,, بس فهميني بالله منهو الخجل؟؟ ومن الي يعرف الخجل؟؟ مافيه اي علاقه بينهم؟؟


واختيار موفق فعلاً أنصحكم بمتابعة اخونا mmkuwari




في قطريين وقطريات
ولكن الاسلوب الله بالخير
شلون يكون وجه مشرف؟
راجعتلج


قد يكون فيه بس مش فعالين ومش على حسب المواصفات المطلوبة ,, طبعاً البنات خارج الموضوع لكم مجالات وأماكن ثانيه ..!

عندج أمثلة طيبه ممكن تضيفينها ؟؟ بنتظارج

[بو خليفه 123]

أنا ..

يقولون وجهي اعلامي :shy:

[مهرة]

المجتمع القطري جي يحارب أي ابداع واي شي جديد مثلاً فيه وايد بنات اماراتيات على انستقرام وسوشل ميديا وكذلك كويتيات بس مافيه قطريات ولا سعوديات ثقافه قطر والسعوديه جي كل شي عيب وكل شي حرام وكل شي لا


لاء لاء الله يرضى عليك أو الله يرضى عليج (إلا أنا) ما أسووق لهذه الفئة ومانحتاجها أصلاً ,, مهمه شبابية أكثر وتحكمها ظروف وسفرات وتجمعات ايفنتات << ترجموها بالعربي!

تناسبهم أكثر من ( البنت) ,, بس يعجبني برنامج (في الضحى) لي ذكريات جميلة معاه,, مجهود طيب من الأعلامية حنان العمادي وخفيفة الظل وأمنا (أم طلال) وأيضاً برنامج نون النسوة راقي وفيه مبدعات ومنقبات بعد :) تحية لهم كلهم ..

ابداع ؟؟ كيف ومثل ايش؟؟ ممكن في مجالات مناسبة أكثر لمبدعاتنا ليش لاء ..!


موفقين ان شاءالله*

[sweet qatar]

فيه واحد مبدع .. على التويتر الانستغرام والسناب شات
كان عضو مميز هنيه في المنتدى ..
له جمهور عريض
وهو الله يجزاه خير تناوله .. متجه نحو الأمور المحلية والوطنية أحييه على هذا التوجه
وأن يكون قدوة للظهور الحسن لباقي الشباب

ممكن الاكاونت ؟

مهرة

الخجل من نظرة الناس .. ما يرحمون
مع ان قنوات مثل الكاس و الريان مثل ما قلتي يوم عن يوم تبرز لنا مواهب


مشكلتنا نبي نتقن كل شي من أول مرة

زين عادي ممكن في البداية تكون ثقيل علي الناس

عقب تألفهم ويالفونك

علي فكرة الي مساعد الكويتيين الجرأة


ودي أشوف قطري مثل ماجد الصباح

صحيح النماذج كثيرة علي ارض الواقع.. لكن في السوشال ميديا ما شفت :(

[Rebilion]

لاء لاء الله يرضى عليك أو الله يرضى عليج (إلا أنا) ما أسووق لهذه الفئة ومانحتاجها أصلاً ,, مهمه شبابية أكثر وتحكمها ظروف وسفرات وتجمعات ايفنتات << ترجموها بالعربي!

تناسبهم أكثر من ( البنت) ,, بس يعجبني برنامج (في الضحى) لي ذكريات جميلة معاه,, مجهود طيب من الأعلامية حنان العمادي وخفيفة الظل وأمنا (أم طلال) وأيضاً برنامج نون النسوة راقي وفيه مبدعات ومنقبات بعد :) تحية لهم كلهم ..

ابداع ؟؟ كيف ومثل ايش؟؟ ممكن في مجالات مناسبة أكثر لمبدعاتنا ليش لاء ..!


موفقين ان شاءالله*

الموضوع وجهات نظر عادة الشباب يسمعون للبنت اكثر من ما يسمعون من رجال ثاني. يعني اتعلم الرفق بالحيوان من مريم الخرافي على انستقرام بس لو رجال يقول كلامها !! لذلك وجود العنصر النسائي الجميل مطلوب بشرط تكون مرتبة

[مهرة]

فيه واحد مبدع .. على التويتر الانستغرام والسناب شات
كان عضو مميز هنيه في المنتدى ..
له جمهور عريض
وهو الله يجزاه خير تناوله .. متجه نحو الأمور المحلية والوطنية أحييه على هذا التوجه
وأن يكون قدوة للظهور الحسن لباقي الشباب

ممكن تفيدينا وتحطين اسمه وبيكون تشجيع لغيره وشي طيب فيه ناس مبدعين وكانت بدايتهم منتدانا .. الله يوفقه

حياج الله الجودي ولا تهونين اذا عندج أمثلة زاخرة وطيبة جودي علينا بها يالجودي ..!

[مهرة]

الموضوع وجهات نظر عادة الشباب يسمعون للبنت اكثر من ما يسمعون من رجال ثاني. يعني اتعلم الرفق بالحيوان من مريم الخرافي على انستقرام بس لو رجال يقول كلامها !! لذلك وجود العنصر النسائي الجميل مطلوب بشرط تكون مرتبة


السموحة المتحدث أعلاه ( أخ) ام ( أخت) عشان نعرف نتحاور

[القبطان سلفر]

الحضور والثقافه اهم السمات المطلوبه للوجوه الاعلاميه لتنجح .

بشكل عام البيئه لدينا غير حاضنه للابداع من ناحية اجتماعية بالرغم ان الدوله والجهات الرسميه تتمنى ان تتبنى المواهب القطريه الواعده وتشجعهم ولكن تجري الرياح بما لا تشتهي السفن .

الوجوه المشهور في السوشل ميديا غالبا كانوا نتاج مجتمعاتهم المشجعه التي ساعدتهم على النجاح والابداع ومن ثم الاستمرار في العطاء.

بالنسبه لمذيعين تلفزيون قطر فهم دون المستوى المطلوب ولا يرقون الى معنى المذيع المحترف ويستثنى من ذلك الرعيل الاول . وهذا لا يعني عدم وجود بعض الوجوه المميزه الجديده في قنوات اخرى مثل محمد سعدون الكواري الذي يملك حضور وثقافة واعده .

وهناك امر اخر قد يكون سبب رئيسي في كبح جماح الابداع الا وهو المستوى المعيشي المرتفع للقطريين . فمن الملاحظ ان جل الوجوه الاعلاميه التي يتم استدعائها في المهرجانات او المناسبات المختلفه هي برزت من خلال خلفية اجتماعية المعيشه فيها تتطلب المثابره والعزم للحصول على لقمة عيش مرضيه لهم . فمن ناحية اقتصاديه يعني النجاح لهم من خلال برامجهم المختلفه في السوشل ميديا هو مزيد من الدخل المادي والشهرة التي تعني في المحصله النهائية اعلانات ودعوات حضور مدفوعة الاجر .

المسألة لا تخلو من العامل الاقتصادي لانه المحرك الاول لها . وعندما ينتفي من خلال العيش في بحبونه لا يمكن الابداع الا في حالات نادره لا تعتبر مقياس او ظاهره يعول عليها .

[مهرة]

والله فيه شباب عندهم مواهب لكن مع الاسف الخجل الاجتماعي يسيطر عليهم .. لان المجتمع ما يرحم .. شلة الاستلام ولطنازه تدمرهم .. مع ان الواحد اذا بدأ في هالمجال المفروض كلام الناس يحطه تحت ريوله ولا يفتكر اهم شي يكون مقتنع باللي يسويه :)

..

اكيد فيه شباب فيهم الخير والبركة بس إلي الآن مستغربه من كلمة الخجل الاجتماعي !! وذكرتها قبل سويت كيف يعني ؟ الرجال عندهم خجل ؟؟ الوظيفة او المهمة هذي تناسبهم أكثر من بنات حواء ..

بالعكس الناس بترفعه وتقدره وبيكون له وزنه بالمجال ويشار له بالبنان ..

[مهرة]

أنا ..

يقولون وجهي اعلامي :shy:

..

من أسباب تخلفنا عن باقي الأمم ومكوثنا دائماً في الخلف هي كلمة ( يقولون ) ..!

اذا عندك هالمقومات والمواصفات اعقلها وتوكل ..!

[ضوى]

Qatar International Food Festival مهرجان الغذاء العالمي

اختي مهرة ، فعلا افتقد الوجوه الشابه ، لكن صراحة قمت اشوفهم حاليا وبكثرة ، يمكن ظهورهم الاعلامي بسيط لكن موجودين ومغيبين اعلامياً مدري عمدا والا قصد ، عموما فيه وايد قطريين يشرفنا نتابعهم في الانستا وتويتر والسناب ، دوري وبتحصلين ماقدر احط اخاف يقولون تسوي دعايه

عموما اتذكر ايام الاذاعة المدرسية ماكانوا يختارون القطريات كله جنسيات عربية على اساس انهم أجرأ ، مع اني كنت استميت عشان اطلع عالطابور في الاذاعة المدرسية واعتقد من هنا يكون بناء الشخصية الاعلامية

[الجـــوديّ]

ممكن تفيدينا وتحطين اسمه وبيكون تشجيع لغيره وشي طيب فيه ناس مبدعين وكانت بدايتهم منتدانا .. الله يوفقه

حياج الله الجودي ولا تهونين اذا عندج أمثلة زاخرة وطيبة جودي علينا بها يالجودي ..!

يحييج ويبقيج مهرة

Buzwair

في سناب وتويتر وانستغرام

يمكن يكون فيه غيره في تويتر وانستغرام لكن مالهم وجود في سناب

الظهور للجمهور مو بالأمر الهين وبنفس موب الزامي اكد من ورى ظهوري فلوس من الاعلانات

انا اللي يعجبني الظهور لهدف واضح ويكون لهذا الظهور فايدة للناس


وكل الاكاونتات الجيدة تحتاج منا دعم ومتابعة

[مهرة]

الحضور والثقافه اهم السمات المطلوبه للوجوه الاعلاميه لتنجح .

بشكل عام البيئه لدينا غير حاضنه للابداع من ناحية اجتماعية بالرغم ان الدوله والجهات الرسميه تتمنى ان تتبنى المواهب القطريه الواعده وتشجعهم ولكن تجري الرياح بما لا تشتهي السفن .

الوجوه المشهور في السوشل ميديا غالبا كانوا نتاج مجتمعاتهم المشجعه التي ساعدتهم على النجاح والابداع ومن ثم الاستمرار في العطاء.

بالنسبه لمذيعين تلفزيون قطر فهم دون المستوى المطلوب ولا يرقون الى معنى المذيع المحترف ويستثنى من ذلك الرعيل الاول . وهذا لا يعني عدم وجود بعض الوجوه المميزه الجديده في قنوات اخرى مثل محمد سعدون الكواري الذي يملك حضور وثقافة واعده .

وهناك امر اخر قد يكون سبب رئيسي في كبح جماح الابداع الا وهو المستوى المعيشي المرتفع للقطريين . فمن الملاحظ ان جل الوجوه الاعلاميه التي يتم استدعائها في المهرجانات او المناسبات المختلفه هي برزت من خلال خلفية اجتماعية المعيشه فيها تتطلب المثابره والعزم للحصول على لقمة عيش مرضيه لهم . فمن ناحية اقتصاديه يعني النجاح لهم من خلال برامجهم المختلفه في السوشل ميديا هو مزيد من الدخل المادي والشهرة التي تعني في المحصله النهائية اعلانات ودعوات حضور مدفوعة الاجر .

المسألة لا تخلو من العامل الاقتصادي لانه المحرك الاول لها . وعندما ينتفي من خلال العيش في بحبونه لا يمكن الابداع الا في حالات نادره لا تعتبر مقياس او ظاهره يعول عليها .

اخوي الكابتن سلفر قد اختلف معاك في بعض النقاط الي أثرتها وهي أن الجهات المختصه والمعنيه بهذه الأمور راح تكون مهتمه ومساندة وراعية لصقل مثل هذه المواهب ويحاولون يظهرونهم بأبهي صورة والمجتمع أكيد راح يتقبل ويشجع عالظهور الإعلامي المشرف .. احنا نشوفهم في مختلف برامج التواصل الاجتماعي كيف يحطون صورهم ويعلقون ويترززون وكلهم ثقة ويشوفونهم ناس أوسع من نطاق الخليج فمابالك بمعرفتهم في الدوحه يعني نستخدم بعض من إيجابيات هالبرامج ولو بشي بسيط مع اني أشوف سلبياتها أكثر وهذا من وجهة نظري.. شبابنا صاروا أكثر جرأة وأكثر قدرة علي إثبات نفسهم الحاصل الان في تلفزيون قطر والي ضربت فيه مثال للمستوي العام ممكن يكون بسيط ومقبول ولكن لايمنع وجودهم واجتهادهم والسالفه يبيلها صبر وبحث تطلع واكتشاف وكتجربة اولي الا ماتكون فيه عقبات وفجوات وأخطاء يمكن تعديها في المرحلة الجايه..

أما من ناحية العامل الاقتصادي المعيشي الحالي ليس بالسبب المقنع القوي وراء اعتزالهم الظهور الإعلامي بالعكس راح يسأل نفسه هل فعلاً شخصيتي مؤثرة هل يطلع مني بيتفاجأ من نفسه بيحس بالنشوة والفخر والتميز ويمكن يلقي طموحه وشغفه وابداعه بهذا المجال .. أليس بالشي المحزن الي تصير فيه عندنا مهرجانات واحتفالات عالمية أو حتي محليه ونستعين بأشخاص لهم التحية والتقدير من الخارج واحنا ماعندنا شي نطالع بعض ونتحسر وبإمكانا نكون الأفضل ..

مداخلتك جداً مثرية للموضوع يعطيكم العافية

موفقين ان شاءالله *

[مهرة]

Qatar International Food Festival مهرجان الغذاء العالمي

اختي مهرة ، فعلا افتقد الوجوه الشابه ، لكن صراحة قمت اشوفهم حاليا وبكثرة ، يمكن ظهورهم الاعلامي بسيط لكن موجودين ومغيبين اعلامياً مدري عمدا والا قصد ، عموما فيه وايد قطريين يشرفنا نتابعهم في الانستا وتويتر والسناب ، دوري وبتحصلين ماقدر احط اخاف يقولون تسوي دعايه

عموما اتذكر ايام الاذاعة المدرسية ماكانوا يختارون القطريات كله جنسيات عربية على اساس انهم أجرأ ، مع اني كنت استميت عشان اطلع عالطابور في الاذاعة المدرسية واعتقد من هنا يكون بناء الشخصية الاعلامية

..

أحلى مافي ردج كتابتج الإختصار مميزة كعادتج ..

صح فيه وجيييه طيبه تستاهل المتابعه ولكن ليش مايحبون الظهور للإعلام الرسمي ليش بس بالانستا والسناب وتويتر ترا مو كل الناس عندهم حسابات في هذه البرامج مثلاً عندج أنا قلم فذ ماعندي وقت يالله أتابع بعضكم وآخر الأخبار في منتدانا ومهما كان للتلفزيون هيبته وحضوره ابو شاشة فضية ..

بالنسبة لطرحج بعض الأسماء المميزة حطي ولا يهمج يستاهلون الدعاية مثل ماحطيت قبل ومثل الجودي بعد ..

موفقة عزيزتي*

[sweet qatar]

الجودي

أشكرج علي الاكاونت الرائع :o



مهرة

مهرة سوري بس السناب اليوم أهم بمليون مرة من التي في

[JN000N]

الجميل تواجدج بالموضوع ,, بس فهميني بالله منهو الخجل؟؟ ومن الي يعرف الخجل؟؟ مافيه اي علاقه بينهم؟؟


واختيار موفق فعلاً أنصحكم بمتابعة اخونا mmkuwari






قد يكون فيه بس مش فعالين ومش على حسب المواصفات المطلوبة ,, طبعاً البنات خارج الموضوع لكم مجالات وأماكن ثانيه ..!

عندج أمثلة طيبه ممكن تضيفينها ؟؟ بنتظارج

امثله قطريه شباب؟
Buzwair
هاي الي اعرفه واتابعه واتوقع انه هو نفسه عضو كان معانا
بس بالنسبه للبنات في ولكن ماحب اتابعهم لانهم مرات يفتقرون للاسلوب والاذب

انا مش ضد انها تكون صوره مشرفه تعكس بلادي وبناتنا ولكن تكون محتشمه ومؤدبه وتنتقي الفاظ تليق باللي حولها وماتستهزء بحد مهما كان لانها ف هالوضع والمكان محسوبه عليها الكلمه
ماعرف وايد شخصيات اعلاميه (فستاب مثلا) بس اعرف ف باقي السوشال ميديا شانل

[JN000N]

توني اشوف رد الجودي واحنا نتابع نفس الشخص

[sweet qatar]

^

بالإشارة لنفس الشخص :o

طلب من الفولورز يرشحون له اكاونتات قطرية علي السناب

تذكرت موضوعج مهرة ... لاني ما شفت مشاهير قطريين مفيدين في السوشال ميديا

اوكي في ناس يطرحون مواضيع خفيفة لكن مافي عمق ما في ذيج الفوايد

شوفي أكاونت ماجد الصباح .. معلومات في كل شي ماشالله عليه

بأسلوبه المميز يقرب لنا المعلومات الصعبة

يحببنا في التاريخ

تدرين في أكاونت قطري في الانستا مادري هو يدرس برا عايش برا

المهم ساعات يحط عن الديكور الأوروبي و تفاصيله ويبين انه مهتم

ودي لو يتعمق أكثر يشاركنا معلومات

مستحيل ادرعم و أقوله وفي نفس الوقت أحس كل شي متوفر عنده ويقدر يفيدنا ويكسب أجر

[مختلفة عقليا]

المجتمع القطري جي يحارب أي ابداع واي شي جديد مثلاً فيه وايد بنات اماراتيات على انستقرام وسوشل ميديا وكذلك كويتيات بس مافيه قطريات ولا سعوديات ثقافه قطر والسعوديه جي كل شي عيب وكل شي حرام وكل شي لا

هلا

مستسلمين للمجتمع قصدك ., !!

أي انا اجوف جيه .,

ويسلموو

[الجـــوديّ]

^

ليش اعتبرتوها استستلام وما اعتبرتوها مثلاً عدم وجود هذا النوع من الثقافة والانفتاح في قاموسه الخاص ..!
المجتمع القطري يحب يكون محافظ ومنغلق نوعاً ما..
وجات هذي البرامج والنوع الجديد من التواصل يحررهم من هذي النزعة .. البعض استجاب والبعض الآخر متابع ومستمتع ويستبعد على نفسه يكون ناقل للخبر .. وعضو فعال فيه يبث المعلومة المفيدة.
الموضوع يبي له جرأة وتبني موقف خاص
لو سواها واحد وشاف نتايجها الايجابية راح يتبعه الكثيرين
الحين صار سهل جدا بالسناب يكون شخصية اعلامية مستقلة ومشهورة جداً
بس يبي له يتعب على نفسه شوي وعقبها يتواجد في الفعاليات ويكون له تأثير ايجابي على المجتمع.

[sweet qatar]

في قطريات و سعوديات في السناب .. بس مب كل وحدة مشهورة امدحها لانها انشهرت

الكثير انشهروا بمجرد عرضهم لنفسهم وللمفوشر

احنا نبي شي مفيد و مميز

[مختلفة عقليا]

^

ليش اعتبرتوها استستلام وما اعتبرتوها مثلاً عدم وجود هذا النوع من الثقافة والانفتاح في قاموسه الخاص ..!
المجتمع القطري يحب يكون محافظ ومنغلق نوعاً ما..
وجات هذي البرامج والنوع الجديد من التواصل يحررهم من هذي النزعة .. البعض استجاب والبعض الآخر متابع ومستمتع ويستبعد على نفسه يكون ناقل للخبر .. وعضو فعال فيه يبث المعلومة المفيدة.
الموضوع يبي له جرأة وتبني موقف خاص
لو سواها واحد وشاف نتايجها الايجابية راح يتبعه الكثيرين
الحين صار سهل جدا بالسناب يكون شخصية اعلامية مستقلة ومشهورة جداً
بس يبي له يتعب على نفسه شوي وعقبها يتواجد في الفعاليات ويكون له تأثير ايجابي على المجتمع.

هلا

لان الشي اللي ما اتسويه وانت في خاطرك اتسويه اسمه استسلام .,

في شباب عندهم كل المؤهلات بس اللي كان يردعهم (( المجتمع )) وهاي اللي اتكلم عنهم ., مو اللي م عنده جراءه .,

علي فكره كل المجتمعات كانت منغلقه كلهاااا ., بس مع التغيير ومواكبه التغيير (( تغيرت )) واتفتحت .,

ويسلموو

[مهرة]

الجودي

أشكرج علي الاكاونت الرائع :o



مهرة

مهرة سوري بس السناب اليوم أهم بمليون مرة من التي في

هلا سويت ..

صح الكل هاب ومجنون بالسناب وكيفكم بس أنا غير ومالي بحاجة السناب (منين أجيب وكت)..!

اما التلفاز مو معناته إني اقعد واجابله وأنتظر آخر الأحداث والمستجدات العالمية والمحلية لكن أفضله مرات علي تلك البرامج مالتكم الجديدة ..

[مهرة]

امثله قطريه شباب؟
Buzwair
هاي الي اعرفه واتابعه واتوقع انه هو نفسه عضو كان معانا
بس بالنسبه للبنات في ولكن ماحب اتابعهم لانهم مرات يفتقرون للاسلوب والاذب

انا مش ضد انها تكون صوره مشرفه تعكس بلادي وبناتنا ولكن تكون محتشمه ومؤدبه وتنتقي الفاظ تليق باللي حولها وماتستهزء بحد مهما كان لانها ف هالوضع والمكان محسوبه عليها الكلمه
ماعرف وايد شخصيات اعلاميه (فستاب مثلا) بس اعرف ف باقي السوشال ميديا شانل

جنون عطينا أمثلة أكثر ..

اما بخصوص بنت قطرية تمثلنا اممممم ممكن بس لازم تمر 3ala لجنة موقرة وأكون أحد أعضائها غير كذا ماله داعي ..!

فيه مثال رائع جداً كبنت خليجية ويمكن في بلادها ومجتمعها لقت ضالتها وهي موهوبة بذكائها وحضورها وثقافتها هي شابة إماراتية ومذيعة متألقة ( ديالا علي ) أنصحكم بمتابعتها ..

[مهرة]

^

ليش اعتبرتوها استستلام وما اعتبرتوها مثلاً عدم وجود هذا النوع من الثقافة والانفتاح في قاموسه الخاص ..!
المجتمع القطري يحب يكون محافظ ومنغلق نوعاً ما..
وجات هذي البرامج والنوع الجديد من التواصل يحررهم من هذي النزعة .. البعض استجاب والبعض الآخر متابع ومستمتع ويستبعد على نفسه يكون ناقل للخبر .. وعضو فعال فيه يبث المعلومة المفيدة.
الموضوع يبي له جرأة وتبني موقف خاص
لو سواها واحد وشاف نتايجها الايجابية راح يتبعه الكثيرين
الحين صار سهل جدا بالسناب يكون شخصية اعلامية مستقلة ومشهورة جداً
بس يبي له يتعب على نفسه شوي وعقبها يتواجد في الفعاليات ويكون له تأثير ايجابي على المجتمع.

الجودي عزيزتي انا بعد ماحب ولا أثق ببعض القواميس الخاصه..!

وماراح أضيف أكثر من اضافاتج المميزة أسعدتني كثيراً مشاركاتج يعطيج العافية وموفقة حبوبة ..

[بوحارب]

مهره ليش اللي تعدى ال 40 ماله نصيب من السوشيال ميديا حقتكم !؟


المهم

موضوعكم هذا احس ماله داعي

لان يتكلم عن أشياء جديدة

وكل جديد مش مفيد بس مضيعة للوقت

[بوحارب]

شنو السوشيال ميديا يا جماعة علمونا شوي !؟

[sweet qatar]

هلا سويت ..

صح الكل هاب ومجنون بالسناب وكيفكم بس أنا غير ومالي بحاجة السناب (منين أجيب وكت)..!

اما التلفاز مو معناته إني اقعد واجابله وأنتظر آخر الأحداث والمستجدات العالمية والمحلية لكن أفضله مرات علي تلك البرامج مالتكم الجديدة ..

الناس استغنت من ورا السناب .. وانتي مب عاجبج !!

ما علينا

المهم انج تعترفين بأهمية هذا البرنامج الجميل :o

[sweet qatar]

مهره ليش اللي تعدى ال 40 ماله نصيب من السوشيال ميديا حقتكم !؟


المهم

موضوعكم هذا احس ماله داعي

لان يتكلم عن أشياء جديدة

وكل جديد مش مفيد بس مضيعة للوقت

يالله حسن الخاتمة :)


السناب مب جديد بس يظل جميل و مهم جدآ

[بوحارب]

يالله حسن الخاتمة :)


السناب مب جديد بس يظل جميل و مهم جدآ

اللهم امين

بالفعل جميل وممتع

[بشائر]

..



السلام عليكم ورحمة الله وبركاته ,,




*الكاريزما ولباقة التحدث واللغة الشفافة المتعارف عليها والنطق الصحيح والثقافة بمجمل مختلف المجالات التي تخدم مواضيع التواصل الأجتماعي .!

**

وعليكم السلام ورحمة الله وبركاته ،

حياج الله عزيزتي مهرة ..
اللي تفضلتي به واقتبسته هو بالفعل المطلوووب .. وعلى فكرة كون مجتمعنا صغير فالشخص المميز بيظهر بسرعة وبسهولة
لكن لا بد من الإعداد المسبق ( يشتغل على حاله ) بشكل جيد .. وأشوفه مناسب فقط للشباب دون البنات ..

وفقك الله ..

[يمامـة]

حاولت اشجع خوسيه انه يسوي فيديوهات مهمة بأسلوبه الطفولي ويسجل وينشر..
لكنه للاسف رفض.. لأن المجتمع بشكل عام مب متقبل هالشي..

فمن جذيه اعتقد علينا قطع اشواط اكثر حتى يتجرئون عيالنا في تقديم المفيد
بدل متابعة غير المفيد اكثر من المفيد في هالمواقع..

[مهرة]

وعليكم السلام ورحمة الله وبركاته ،

حياج الله عزيزتي مهرة ..
اللي تفضلتي به واقتبسته هو بالفعل المطلوووب .. وعلى فكرة كون مجتمعنا صغير فالشخص المميز بيظهر بسرعة وبسهولة
لكن لا بد من الإعداد المسبق ( يشتغل على حاله ) بشكل جيد .. وأشوفه مناسب فقط للشباب دون البنات ..

وفقك الله ..

..

هلا هلا بشاير أسفرت وانورت وعاد للموضوع رونقه .. مثل ماتفضلتي به هو انه لازم يشتغل علغŒ نفسه اذا فعلاً احب هالشغلة يعني لازم يكون فيه شغف واهتمام ووضع أهداف ومحاولات كثييييرة للنجاح المنشود وتميزه بيكون سريع وملحوظ وكما قلت مسبقا الدعم موجود وكلام الناس بينقط بينقط سواء بالزين ولا الشين ..

يعطيج العافية حبوبة *

[مهرة]

حاولت اشجع خوسيه انه يسوي فيديوهات مهمة بأسلوبه الطفولي ويسجل وينشر..
لكنه للاسف رفض.. لأن المجتمع بشكل عام مب متقبل هالشي..

فمن جذيه اعتقد علينا قطع اشواط اكثر حتى يتجرئون عيالنا في تقديم المفيد
بدل متابعة غير المفيد اكثر من المفيد في هالمواقع..

..

التشجيع والمكافآت المالية المجزية والتحفيز القومي كواجب ومفخرة وطنية من أهم المحركات لهذة الشخصية وكلها موجودة ومذللة لهم بس عقولهم مغيبة وخليج ورا خوسية يمكن يطلع منه ..!

يعطيج العافية اختي وعزيزتي يمامه *

[بصمة قطرية]

هالمجال أحسه ما ينفع للبنات
بس للشباب ..
يعني الشاب يكون جريء شي عادي
و الكل بيتقبله ..
لكن البنت جريئة صعبة شوي ..!!
هاي سبب من الأسباب ..