كلمتين في خاطري!!

[ريتويت]

السلام عليكم ورحمه الله وبركاته..

ماعرف ان كان هذا موضوع او راي ممكن اتشارك فيه وياكم بالحوار العام او لا بس شد انتباهي وحبيت اشارككم فيه..

تقول اختنا الكريمه: يمكن يكون منطق مو نصيحه عشان لاتقولون اتفلسف..لاتقللون من مستوي شخص او قيمته او تهينون احد..يمكن هالشخص يكون اقل منا مستوي حاليا ..بس يمكن تدور الدنيا وتحتاجه .. الدنيا مصلحه.. خذ وعط..تبين احترام ؟ عطي الناس احترام.. تبين حب؟ عطي الطرف الثاني حب..تبين اهتمام؟ لاااااازم تعطين اهتماااام..اي اي الدنيا جذي..بهالزمن محد يبي من احد شي..كلن عنده خير والحمدلله..بس الكلمه الحلوه هي مفتاح السعاااده..بتقولون نفاق؟ لاوالله مب نفاق ولا مجامله هذا هو الواقع..بس عشان اتمشي الدنيا لا دقق عالحبه ولازم اطوف..واحلي لساني مع خوات مع اخوان مع زوج مع اهل زوج رفيجات وزميلات حتي لو الي ترش عطر بالمجمع الكلمه الطيبه والنفس الشرحه الي تتغاضي سحررر..والله يابنات سحرررر وانصحيها وجامليها واكسبيها بالكلمه والنصيحه الي تحبب خلق الله فيج..زوجج تغاضي عن زلاته وحني عليه عشان تمشي المركب وتوصل لبر الامان مع بعض وبالمقابل يرق قلبه لج..ورفيجتج طوفيلها راح تلقين علاقتكم تستمر طووول العمر .. مديرتج حبيها قسما بالله بتحبج وبترضي عليج .. القلوب شواهد سبحان الله وحلي لسانج كل الناس خلانج .. بس بالاخير محتاجين عطف وحب وعلاقه قويه مع رب العالمين والناس ..

وسلامتكم

[حسن]

موضوع جميل ياريتويت

شكرا

على النصيحه لاخواتنا الفاضلات وصفو النيه بينكم
وترا الدنيا ماتسوى

:)

[ريتويت]

بالضبط يا اخوي حسن ..

جزاك الله خير عالنصيحه

[M99]

صح كلامج الكلمه طيبه مب فقط سحر
الكلمه الطيبه صدقه

لين تمدحين حد او حتى انج تجاملينه
مب يعني نفاق !!

بالعكس تحصلين اجر لين تفرحين قلب حد او تواسين حد

وبكلامج كانه الدنيا بخير وسهالات

لكن للاسف في ناس لو تعاملينها بالطيب والزين ماتملي عينها شي
لكن الله وفوق .. ويعرف بنفوس البشر

ناس ماتعرفينها ولا اذيتيها ولا تمدين لها باي صله تحقد عليج تكرهج !! ليش ؟!
الله العالم

مب كل الناس زينه .. في نفووس وصخه ورديه للاسف!!

والله يهدي ويصلح قلوب الجميع يارب ..
لان الانسان اذا تجرد من الذمه والضمير .. وشله يعيش!!؟

والله يجزاج خير ع الطرح الراائع

[بوحارب]

كلام جميل :)

[راجي الْعفو]

وعليكم السلام و رحمة الله و بركاته ..

موضوع مهم للجنسين اخت سويت ..

وتكرر الكلام حوله كثيرا ..

بس احب اقول :

فتح القلوب اهم و اعظم من فتح البلدان ..

بوركت ..

[مختلف جداََ]

منقول ...

ما أحوجنا إلى أدب التغافل في حياتنا
( منقول بتصرف )
ما هو التغافل ؟

التغافل معناه : هو تعمد الغفلة ، أي أنه يُرِيَ الآخر أنه غافل ، مع علمه التام وإحاطته بما هو مُتغافل عنه ترفعاً عن الدنايا وسفاسف الأمور .
والتغافل أدب عظيم وخلق شريف تأدب به الحكماء ونوَّهَ بفضله العلماء ، فيجب على صاحب المروءة أن يتغافل ويتجاوز عن أهله وأصحابه و موظفيه إن هم قصروا بشيء ما ، فلا يستقصي مكامن تقصيرهم فيبرزها لهم ليلومهم ويحاججهم عليها ، ولا يذكرهم بحقوقه الواجبة عليهم تجاهه عند كل زلة وإنما يتغافل عن اليسير وهو يعلمه
قال الحسن البصري : "ما استقصى كريم قط
قال الله تعالى عن نبيه صلى الله عليه وسلم لما أخطأت بعض أزواجه : { عرَّف بعضهُ وأعرض عن بعض } .

وقال الأعمش : التغافل يطفئ شراً كثيرا .

وقال سفيان : مازال التغافل من شِيَم الكرماء

وجاء في لامية ابن الوردي الشهيرة :
وتغافل عن أمورٍ إنهُ .. لم يفزْ بالحمدِ إلا مَن غفلْ

وقد ذكروا أنَّ الناصر صلاح الدين الأيوبي كان يتحلى كثيراً بأدب التغافل ،
وكذلك قتيبة ابن مسلم الباهلي وغيرهم الكثير

فما أحوجنا إلى هذا الأدب والتحلي به في مواقف حياتنا ، فإن استقصاء كل صغيرة وكبيرة يقدح شرارة الغضب والشحناء بين القلوب ....

[.قطر.]

كلام حلو :nice:
واتفق مع الاخت اللي نقلتي منها الكلام
صج الكلمه الطيبه والابتسامه لهم سحرهم الواحد يفرح اذا سواهم يحس انه محترم والناس تحترمه
:)

[الجـــوديّ]

دعوة طيبة للتحاب والتواد مع المقربين ومع من حولنا
القبول من الآخرين والتقدير حاجة فطرية بحته ..
وكل ما تركنا الأثر الطيب كل ما نادت الملائكة بحب الناس لهذا الشخص بعد حب الله تعالى له.

.. لا أحد يريد من أحد شيئاً سوى الكلمة الحلوة والذكر الطيب...


جُزيتي الخير ،،

[مختلفة عقليا]

السلام عليكم

حبيييت الكلام ., جنه انا اللي كتبته ., :nice:

والله الدنيا م تسوي جناح باعوضه .,

شيصير لو تعاملت مع الكل باحسان وعطف وحب !! بغض النظر عن أي شي !!

والله الدنيا بتصيير حلوه ., وخفيفه علي كل الاطراف .,

ويسلموو

[بومحمد المطاوعه]

بارك الله فيج .. وجزاكي الله خير اختي ,,

اسأل الله ان يبعد الفتن عن الجميع ,,
وان يحبب قلوب البشر على بعض ,,

واسأل الله ان يبعد عنكم الحقد والحسد والشر ,,

[ريتويت]

شخصيا : انا اتفق مع كلام هالبنت لسبب واحد وهو صدمتي في بعض الاصدقاء والاقارب ..


بس ارد واقول الحمدلله حمدا طيبا كثيرا