خبراء فينا وميونخ وسويسرا، ارجوا المساعدة

[بوعبدالله11]

السلام عليكم ورحمة الله

كما هو واضح من العنوان، ارجوا المساعدة حق رحلة لفينا وميونخ وسويسر حق عائلة مع 3 اطفال اعمارهم تحت العشرة، بصراحة ما اعرف من وين ابتدي وشنو اللي اخليه للاخير. ياريت خط رحلة مميز واكون شاكر فضلكم.

مافي شي مقيد، اذا التنقل بالسيارة افضل من القطار اوكي واذا العكس بعد اوكي :looking:

[ضوى]

نصيحة من اخت زارت هالاماكن

لا تعتمد عالقطارات معاك ثلاث أطفال ، اجر سيارة فورويل تكفيكم ولف اوروبا كلها

النمسا رحنا فيها زيلامسي وسالزبورغ ، سويسرا رحنا انترلاكن وهايدي لاند وزيرمات ولوزيرون ولوقانو ومن لوقانو طلعنا على ميلانو ، وعقب طلعنا من انترلاكن على رست في المانيا لمدينة الالعاب عجيبة بينبسطون اليهال ، ومن رست طلعنا على كولمار وفرايبورغ في فرنسا ومن رست نزلنا على ميونخ وطلعنا للاماكن القريبة لها ورحنا ليقولاند تصلح لسن عيالك ، روح وانبسط واعمل حسابك بتصرف صرف اوروبا مب رخيصة كلش

[حفيد الأنصار]

مبدئيا اذا تبي نفس الدول اللي ذكرتها راح يكون خط رحلتك كالتالي

فيينا ~ سالزبورغ ~ سويسرا ~ ميونخ

طبعا الوصول تخليه فيينا والعودة من ميونخ

تنقلك من فيينا الى سالزبورغ راح يكون بالقطار ومن هناك تنزل على قرية المانية مجاورة لسالزبورغ تستأجر السيارة منها وتروح ع سويسرا وترجع بأخر أيام رحلتك الى ميونخ
طبعا هذا اللي أشوفه مناسب
تأجير السيارة من القرية الالمانية علشان مايأخذون عليك ضريبة تسليم السيارة في بلد آخر خلاف ان الايجار من ألمانيا أرخص وأفضل

[ذكي جدااا]

مرحبا اخوي بوعبدالله. يعتمد على المدة اذا طويلة ممكن تروح الثلاث بلدان. بالنسبة لي افضل بلدين وخاصة بعد المسافة والتنقل. عندك ألمانيا والنمسا او ألمانيا وسويسرا. اقترح ألمانيا والنمسا اولا فإذا بتروح هالبلدين فعندك طريقين يا اما تنزل ميونخ وترجع من فيينا. او تنزل فيينا وترجع الدوحة من مطار ميونخ. خلنا نقول بتنزل ميونخ بالاول ممكن تقعد فيها يومين او ثلاثه وتزور فيها جنوب ميونخ قارمش المسافه قريبه تقريبا ساعه ونص ويفضل انك تستأجر سيارة ولا سالفه القطارات مع لعيال تعب وماراح تستانسون. المحطة الثانيه بعد ميونخ هي منطقة الكابرون وزيلامسي بالنمسا وتبعد بعد حول ساعتين بالسياره من ميونخ يعني قريبه ومنها تتمشون بالمناطق القريبة ومنها سالزبورج ايضا. المحطة الاخيرة بتكون فيينا وتباتون فيها كم ليلة حسب البرنامج وتسلم سيارتك مكتب التأجير بمطار فيينا. وممكن تسوي نفس البرنامج بس بالعكس تبدأ من فيينا وترجع من ميونخ

[غير البشر]

مرحبا اخوي بوعبدالله
ماقصرو الاخوان والاخوات بالرد

اتوقع انت الغيت سويسرا على ما اعتقد !!

يعني بتخليها بين فيينا وسالزبورغ وكابرون وميونخ
هذا الجدول بكون مناسب جدا

وبخصوص التنقل اكيد افضل تستأجر سياره نفس ماقالت لك الاخت ضوى
بالقطار متعب وحمل شنط وتغيير قطارات ومعاكم اطفال
وماعندهم حامل حقائب وبعض محطات القطارات مافيها ترولي للشنط

اذا اعتمدت المخطط ان شاء الله بروح معاك للفنادق والاماكن السياحيه
وهل تفضل السكن بالسنتر او بمنطقه ريفيه وبحيرات !!

بالتوفيق بوعبدالله