استشاري

[ملك المشاعر]

السلام عليكم ورحمه الله


من تجاربكم اي مهندس تنصحوني كاستشاري للاشراف لبناء فيلا

[معماري قطري]

تعامل مع مكتب لا تتعامل مع مهندس .. المهندس حتى لو عنده تصنيف ما يحق له قانونياً يشرف الا بطريقة ودية واشراف بالطيب ولو المقاول رفض قراره ما يقدر يلزمه والمحكمة ما تعتد بآراء أَي مهندس الا منتمي لمكتب مرخص .. المكتب المرخص لازم يكون عنده فايل خاص بالمشروع شامل التواقيع والتعليمات مكتوبة ومستلمها المقاول بتوقيع وبطريقة رسمية.

نقطة مهمة دوم أَصر عليها اللي هي بنود العقد المبرم مع الاستشاري .. لازم توضح حدود الاشراف وفيه فورمة معينة معتمدها التخطيط كواجبات المكتب المشرف .. هذي ممكن نضيف عليها تقارير اسبوعية مصورة عن طريق المهندس وترسل للمالك بالواتس أَب أَو الايميل حتى يكون متابع لعملية البناء ولأَي أَوامر تغييرية أَو وضع فيه خيار ثاني .. الاستشاري الشاطر ما يخسر شيء لو كان مسيطر على عملية البناء والعقود الثانوية مع مقاولي الباطن والتنسيق مع كل هؤلاء المقاولين .. هذا جزء كبير من شغله وواجباته ولازم يسهل على المالك ولا يصعب .. من دخلوا على هذي الشغلة عندنا والحلقة المفقودة من سلطة الجهات الحكومية يترك لهم مجال كبير للتلاعب ويترك المالك ضايع وكله الاستشاري يقول له ما انته طلبت كدا أَو انت اللي اولت .. ولا سجلات ولا خطة صحيحة والمشروع يستوي معرض للارتجال ولطلبات مبالغ اضافية من المقاول ولا يكتمل صح.

نصحت قبل بمكاتب لكن للأَسف غالبيتهم قالوا لي اسمح لنا فلل ما ناخذ ورأَيي الموضوع يرجع للمالك .. هو لازم ياخذ لستة المكاتب المرخصة لهذي السنة من التخطيط العمراني وفيها محددين تخصصات كل مكتب ويزورهم ويشوف استعدادهم .. ياخذ صيغة عقدهم ويضيف عليها بنود معينة تضمن حقه .. وهنا يفترض في جهات الدولة المختصة تدقيق هذي العقود وتوثيقها والزام الاستشاري بحد معين من الاشراف وببنود خاصة حتى ما يتركون المالك ضايع والمكاتب ماخذه حقها بالكامل .. حتى بعض المكاتب ما تسوي عقد نهائياً وتعطي المالك بس فاتورة بالدفعة الشهرية.

[Bozizoo]

صبااااحكم خميس

اخوي من واقع تجربه و خبرة مع الاستشاريين
افضل استشاري في الاشراف هو النهظه للاستشارات الهندسيه
وهذا التفضيل ليس من فراغ وانما من عددة اسباب

اولا عدد الزيارات مرتين اسبوعيا لكل المواقع
ثانيا التصوير في جميع الزيارات للموقع (( يعني بتحصل جميع مراحل البناء مثبته بالتصوير))
ثالثا ارسال مسجات للمالك عن اية ملاحظات للموقع
رابعا راعي المكتب مهندس شاب قطري يشهد له بالنزاهه وبحكم تواجده اليومي في المكتب اذا شفت اي تقصير من اي جانب في الاشراف توضح له و بتشوف ردة فعله على المهندسين الي عنده

على اغلب الاستشاريين يشيك على الشغل مره بالشهر او اذا عندك انت ملاحظه بيروح يشيك

[معماري قطري]

الله يوفق كل شخص يشتغل بمهنية وذمة ويتابع الشغل صح

إِخوي بو زيزو أَهم نقطة هي عدد التخصصات الموجودة .. ممكن فورمان أَو ما يسمى مفتش هندسي أَو مساعد مهندس يتابع جزئيات معينة في البناء بس لازم يرجع لمهندسين مختصين ويفضل يكونون أَصحاب خبرة كبيرة في تخصصاتهم .. ما يسمى ب senior engineers ويفترض يكون مدير مشروع معماري أَما هو المهندس المصمم أَو شخص ملم بكافة حيثيات التصميم.