أبي حل مع المؤجر

[أم وضاحي]

السلام عليكم و رحمة الله
مش عارفه أكتب موضوعي في أي قسم
بس أتمنى أنه يكون المكان المناسب له
شريت لي بيت
مؤجر و جاهز
و كان مؤجر قبل ما أشتريه بحوالي شهرين
المهم بعد ما شريته و خلصت جاني المؤجر و هو مصري و يفاجأني أنه مأجره بالباطن
و بموافقة المالك السابق
و حق أربع عوايل
أنا أنصدمت
قلت له التقسيمات اللي بالبيت عليها ترخيص أو لا
طبعا قال لي لا
و أنه راح يتصرف مع البلديه و هو راح يوثق العقد و يتحمل أي غرامات
قلت تتصرف و توثق العقد أو تطلع أنت مؤجرينك
لأني أصلا ما أحب التأجير بالباطن خير شر
المهم أنه الحين صار له أسبوعين مش قادر يوثق العقد
و انا أبي أطلعه من البيت مع مؤجرينه
فهل علي أي غرامات
و أيش التصرف القانوني تجاهه

[.. الكاش ..]

اخوي القانون واضح ادا عوايل محد بيكلمك القانون الي صدر من سموالامير يمنع سكن العزاب وسط الاحياء السكنيه ادا سكنت عوايل بدون تقسيم مستحيل حد يقولك شي وادا تقسيم بسيط بيتعاونون وياك لانه عوايل وهدا من تجربه شخصيه والقرار راجعلك

[بومحمد55]

ممنوع ومن حقك تطلعهم لأنهم مخالفين حتى لو عوائل

روحي البلدية اللي تابع لمنطقتك وسأليهم

وبالنسبة للمالك القديم خلاص راح الله يستر عليه وأنتي الحين المالك الجديد للبيت

من حقج تسوين اللي تبينه في البيت والعقد اللي معاج بينج وبين المصري

يعني بالعربي يا المصري يسكن فيه أو ينهي العقد ويطلعهم .

[((ولدالدوحة))]

إدخلي على موقع البلدية وقدمي شكوى وخلال ايام بينحل كلشي انشاء الله بس وضحي انه هذا صار بدون علمج عشان مايخالفونج
وشكرا

[كازانوفا]

إدخلي على موقع البلدية وقدمي شكوى وخلال ايام بينحل كلشي انشاء الله بس وضحي انه هذا صار بدون علمج عشان مايخالفونج
وشكرا


تكتب ان شاءالله

[دايموند]

وجهه نظري ويحتمل الصواب والخطأ
دام انه المصري مب ضارج بشي والاجار يوصلج شهريا مثل ماتبين لا تقطعين ارزاق 4 عوايل

بس فالنهايه القرار لج

[شموخ دائم]

,

,


مرحبا


ام وضاحي

ناخذ الموضوع خطوه خطوه ان شاء الله مافيه أي مشكله لك اذا اتبعتوا الخطوات

الان الوضع ( مخالف ) وانتوا تتحملون الموضوع بالكامل امام القانون

لما نشتري بيت اهم شي نطلب العقد بحضور البائع والمستاجر ونبدل العقد باسم المشتري الجديد
وتترتب عمليه دفع الايجارات الى الشاري الجديد بيشكات جديده
وعقد جديد واذا في أي مشكله تتصلح وبيكون حلها سهل لان الاطراف الثلاثه موجودين
البائع
المشتري
المستاجر

عموما احنا الان في مرحله مختلفه مابعد البيع
طبعا العقد يصبح ساري ومن حقه يكمل المده ال 10 شهور القادمه اذا العقد سنوي

الحل الان نشوف وين ( الثغرات بالعقد ) ونشتغل عليها

اولا : ما ناخذ الامور شفهي الان انتوا شريتوا البيت اطلبوا ( العقد القديم ) اخذوا صوره منه
بحجه انك المالك الجديد للبيت وهذا من حقك
اذا مافيه ( فقره ) مكتوب فيها يسمح للمستأجر بالتاجير من الباطن
فهذا بيكون مخالف للعقد
واخل بشروط العقد ويترتب عليه امور قانونيه


ثانيا : اذا يوجد فقره اعاده المنزل على حالته السابقه في نهايه العقد ( فهو ملزم بتعديل التقسيم ) وارجاع البيت على وضعه الطبيعي قبل التقسيم

الان نبتدي نصلح الوضع


اكتبوا كتاب بالكمبيوتر موجه لهذا الشخص انكم شريتوا البيت وتطلبون منه ( عدم التجديد ) للعقد وعليه الاخلاء
لانه ارتكب مخالفه التقسيم وهذا مخالف للقانون في قطر ورتكب مخالفه التاجير من الباطن ..
( اذا كان غير مكتوب بالعقد القديم )
الكلام الشفوي لايوخذ فيه

في كل الحالات اذا انتوا غير مرتاحين له اطلبوا منه الاخلاء وعدم رغبتكم في التجديد بكتاب رسمي منكم
ويوقع استلام الكتاب


اذا مرتاحين للايجار وتبون ( تبعدون ) الشخص لانه مؤجر من الباطن ومخالف انتظرو انتهاء العقد
بامكانكم التعامل مباشره مع ( الساكنين ) ويدفعون لكم مباشره
بشيكات شهريه
وهذا من حقكم


اهم مافي الموضوع هو ( شروط العقد القديم ) هل مكتوب فيها التاجير من الباطن
هل مكتوب فيها ( تقسيم العقار )

وبعدها نتصرف لان فقرات العقد هو اهم مافي الموضوع

اذا عاجبكم الوضع والامور طيبه ولكن تبون تبعدون المسئوليه القانونيه عنكم
اطلبوا الشخص ويوقع ورقه تعهد مكتوب فيها اسمه ورقم البطاقه الشخصيه
( بتحمله الغرامات ) اذا قام بالتقسيم او التاجير من الباطن
ويوقع على الورقه وتاخذون صوره من بطاقته الشخصيه وصوره من جواز السفر

انتوا اجرتوا عليه وهو يتحمل النتيجه في حال مخالفته للقانون مثل ماهو حاصل الان بالبيت وضعه مخالف للقانون
بس نوثق التعهد الشفوي منه الى تعهد كتابي
وتحمون انفسكم



بالتوفيق لك


,

,

[أم وضاحي]

عزيزي شموخ دائم و لا هانو الباقيين
أولا احنا ما كنا ندري أصلا أن البيت مؤجر بالباطن
لكن كان مكتوب في العقد القديم أنه يسمح له بالإيجار بالباطن
وبعد ما قعد زوجي مع المؤجر المصري فاجأه أن المالك السابق أضاف كلمة ( عائلة واحدة) جنب كلمة الإيجار بالباطن
و وهقه
قال له زوجب انا إللي توهقت ألحين بالسالفه كامله
و لازم تعدل الموضوع كله
سألنا محامي
قال أن المستأجر هو إللي يتحمل السالفه كامله
و خاصة أنه موقع على ورقه أنه هو بيتحمل كل الغرامات إللي راح تنفرض على العقار
و الورقه فيها صورة بطاقته الشخصيه

[كود نمبر]

السلام عليكم

اختي التقسيم الان ممنوع وفيه قرار وزاري صادر
ومخالفته تعتبر 200 ريال لكل متر طولي ويتحملها المستاجر صاحب العقد
تقدرين تقدمين عليه شكوى عبر تطبيق البلديه خلال أسبوع يطلع بالقوه الجبريه + تحمله للغرامه

[Bomohd]

1)تلرفعين قضية عند اشارة المنتزه وبعدين قضية فى المحكمة بالدفنة حوالى 6-9 أشهر لفسخ العقد وتحصيل الايجارات
بعدين تحطين محامي علشان تصليح البيت

2)اتفقي مباشرة مع العوائل وبتكسبين ضعف اللى تستلمينه من المصري

[رحال الدوحه]

السلام عليكم ورحمة الله وبركاته ،،

كل الشكر والتقدير موصول للجميع على جهودكم وإبدأ الراي السديد
وأتمنى تنحل مشكلتج إختي أم وضاحي والكل يستفيد من الطرح ربي يوفقكم جميعاً .

حبيت اشارك معاكم وأتمنى الكل يستفيد وما يطيح بنفس الغلط ويكون واعي للأنظمه
واللوائح المعمول بها في الدوله.

1 - القوانين واللوائح العقاريه .. لطفاً إضغط هنا (http://www.barwabank.com/mobile/ar/personal-banking/home-finance/laws-and-regulations/)
2 - تجديد عقود الإيجار .. لطفاً إضغط هنا (http://www.al-sharq.com/news/details/182026)
3 - طلب تسجيل عقد الايجار .. لطفاً اضغط هنا (http://www.baladiya.gov.qa/pdocs/cview?siteID=1&docID=617&year=2011)
ربي يوفقكم دوم

[H H]

قريت كلامك مرتين , مالقيت جزئية يقولك فيها المستاجر لا او يتحدى او يماطل.
كلميه وقوليله رغبتك الي ماكتبتيها فالموضوع , انتي ودك انه يطلع ؟ يشيل العوائل ؟يلغي التقسيم ؟
قوليله وشوفي وش يقول واذا رفض وقتها تتصرفين مثل ماقالولك الاخوان

[أم وضاحي]

قريت كلامك مرتين , مالقيت جزئية يقولك فيها المستاجر لا او يتحدى او يماطل.
كلميه وقوليله رغبتك الي ماكتبتيها فالموضوع , انتي ودك انه يطلع ؟ يشيل العوائل ؟يلغي التقسيم ؟
قوليله وشوفي وش يقول واذا رفض وقتها تتصرفين مثل ماقالولك الاخوان

كلمناه
قال أنه مخسر في البيت فوق 200 ألف ريال
و ما يقدر يطلع
و لا يطلع الناس إللي سكنهم لأن مالهم ذنب
و انه بيحاول يوثق العقد
و الحين بنكمل شهر و زياده
و لا قدر يسوي شي

[monatee]

كلمناه
قال أنه مخسر في البيت فوق 200 ألف ريال
و ما يقدر يطلع
و لا يطلع الناس إللي سكنهم لأن مالهم ذنب
و انه بيحاول يوثق العقد
و الحين بنكمل شهر و زياده
و لا قدر يسوي شي

يعني يماطل ،، مايقدر يوثقه اصلاً لانه ممنوع

[جوال 11]

الله يعين المؤجرين لا محكمة بتنصفك واذا بتنصفك المحكمة يجب ان تنتظر عدة سنوات ولا تسجيلك للعقار بينصفك والله يعينك تنتظرين لين ينتهي عقده اذا ما كان تجديد عقده يحتوي على التجديد التلقائي .
نحتاج اجراءات سريعة لحل مشاكل الايجار، المؤجر يخسر امواله وصيانة ولا يوجد قانون صارم لمثل هذه الحالات

[نجم سهيل]

السلام عليكم

نصيحتي اذا انتي مستلمة ايجارج اللي حددتيه وقدرتي تضمنين حقج من ناحية أي مساءلات قانونية

خليهم دامهم عوايل ولج اجرهم ان شالله

الايجارات شابة ضو وفي عوايل بسيطة يالله تشيل نفسها والله يعلم بحال هذول

والله يبارك لج في بيتج ومالج ويزيدج من فضله

[مخطط قطري]

الحل جدا بسيط وسهل شوفي العقود متى تنتهي اذا قريب استفيدي من الايجارات ولاتجددين معاهم واذا عقود باقي عليها 3 و5 سنوات حاولي وديا انهاء العقد معاهم واذا هالطريقتين مافادو الطريقه الثالثه شكوى في البلديه لانها تمنع التقسيم راح يصكونه بغرامه 50 الف وبيطلعون غصب في فتره زمنيه بسيطه واذا كل هالحلول مانجحت بيعو البيت بربح ودورو غيره