تركيب أجهزة رادار جديدة على طريق سلوى

[R 7 A L]

بدأت إحدى الشركات الخاصة بتركيب عدد من أجهزة الرادار الحديثة على طريق سلوى في المسافة من جسر مدماك وحتى جسر الصناعية، ويأتي تركيب تلك الرادارات في إطار الجهود التي تقوم بها الجهات المعنية في الدولة في سبيل رفع مستوى السلامة على الطرق والحد من مخالفات السرعة التي تعتبر السبب الرئيسي لمعظم الحوادث المرورية.

وقالت مصادر مطلعة لـالراية إن تركيب تلك الرادارات كان من المفترض أن يتم قبل تشغيل الطريق، مشيرة إلى أن هذه الردارات التي تم تركيبها هي رادارات عادية وهي على غرار باقي الرادارات الأخرى المخصصة لضبط مخالفات السرعة وليس لها علاقة بضبط مخالفات حزام الأمان أو استخدام الهاتف

وأن الكاميرات الموجودة على التقاطعات هي المخصّصة لضبط مثل هذا النوع من المخالفات.

يشار إلى أن وزارة الداخلية كانت قد أبرمت في شهر أكتوبر الماضي صفقة مع إحدى الشركات المتخصصة على هامش معرض ميليبول قطر لتوريد 11 جهاز رادار مرورياً.



http://www.raya.com/news/pages/342ec43e-3ac5-413b-a6d7-6e4b97f83208

[كازانوفا]

كم السرعه على هذا الشارع ؟؟؟

[R 7 A L]

أعتقد 100

[Dana’1]

شفتها وصورتها سناب ابشر الي عندي هههههه
بس بصراحه لاحظت امس زحمه على بعض الاماكن الي ماكان فيها زحمه واظن السبب ضرب البريكات هههههه

[R 7 A L]

شفتها وصورتها سناب ابشر الي عندي هههههه
بس بصراحه لاحظت امس زحمه على بعض الاماكن الي ماكان فيها زحمه واظن السبب ضرب البريكات هههههه


المفروض الحين يجي دور المرور
ويسون دراسة ومقارنه بعدد الحوادث قبل ووبعد الرادار
لاني استغرب اشوف ناس تمشي 80 في شارع الرعة المحدد عليه 100 واذا قربوا من الرادار ضربوا بريك لين ينزلون السرعة 60

[monatee]

المفروض الحين يجي دور المرور
ويسون دراسة ومقارنه بعدد الحوادث قبل ووبعد الرادار
لاني استغرب اشوف ناس تمشي 80 في شارع الرعة المحدد عليه 100 واذا قربوا من الرادار ضربوا بريك لين ينزلون السرعة 60

هاي اللي صاير هاليومين من ركبوا الرادارات ،، معنها للحين ماشغلوها انواع البريكات
بعضهم شوي ويبركن في وسط الشارع

للاسف انه طريق دوامي كل يوم ،، زهقتنا هالمرور ، متبرمجه عقولهم ان كل اسباب الحوادث هي السرعه وان الرادار بيحد من السرعه والحوادث !!!
شوفوا الحين اشلون بتزيد الحوادث على هالطريق من بعد تركيب الرادارات

فبراير وسلوى كل يوم هذا طريقي ،، نادرا مايمر يوم بدون حادث على فبراير ،
والعكس على سلوى نادر مايصير حادث فيه كل يوم

[رجل الجزيرة]

هي موجودة بس لين الحين ما شغلوها لين يخصلون تركيب باقي الكيمرات وبعدين العداد بيشتغل.

[حسن]

يالله ذكررنها قبل كم يوم هني وعن الانسيابيه بدون رادارات
ماصدقو شافوني كاتب راحو ركبو الرادارات
اخذو الحوادث الحين

!!!

[المخفي]

الشارع 100 و العالم تمشي 60

[مرتبش]

اذا العالم بتمشي 60 والسرعة 100 فالرادار ليس سبب المشكلة ولكنها سذاجة السائقين.. الحل نفض المرور وتفكيره القديم والنظر لحقيقة الشارع الديمغرافية.. الاعداد والارقام تتحدث بلغة غير اللي يعرفونها المرور. ناس وصلت القمر وناس عندها 20 شارع مو قادرة تضبطها

[S S]

كالعاده البعض عنده فوبيا من اي شي واقف بين الشارع فى النص من كثر خوفه على البيزه لو بني ادم واقف بين الشارعين بيحسبه رادار وبيشتغل الأكشن عنده والعالم الي وراة في ستين داهيه الله المستعان

[بريق الحق]

اتمنى ينزلون سيارات سرعتها ثمانين

[مابدل العادات]

الشارع كان سالك و اموره طيبه حرااااااااااااااااااااااااااااااااااام

وبدون رادارات والعالم تمشي 80 و 60 ولا اذا جيته تمشي 120 يوسع لك وهو زعلان ومعصب بعد هههههههه
شلون الحين مع الرادارات الله يستر لا يتحول ل 22 فبراير ثاني ويعطل العالم

[aloosh]

دام اخذ ليسن فيه حب خشوم
بتزيد الحوادث وغيرها

الامور اللي مثل هذي تمنع الواسطه فيها من اكبر واحد لاصغر واحد
يتساهلون فيها وقد ها السايق اللي طلع ليسنه بواسطه يتسبب في قتل ناس ابرياء

[معماري قطري]

في أَلمانيا شاشات كبيرة معلقة على الشارع تعرض معلومات كافية عن حالة الطريق والسرعة بدأً من ورا الشاشة .. والكيمرات وراها معلقة فوق ما تبين ولا مواجهة السائق بطريقة مرعبة .. لو كانت السرعة أَكثر بعشرين من السرعة المحددة ما تتخالف .. والزين إِن الطريق مدروس صح وقرب المدن السرعات تنزل بالتدريج وكذلك عند الخطر والمطر .. وهناك طبعاً لا حدود للسرعة في بعض المقاطع .. لكن الكل محترم نفسه ولا حد يلصق في اللي جدامه ولا حد يولع ليتات حتى يطوف أَو يهرن.

السيارات كلها قانونية ما شفت سيارة بتلحس الأَرض من جدام وطايرة في السما من ورا .. صراحة عجبني نظامهم وسهل يتطبق عندنا.

[شيخ الديرة]

كان الاجدر عدم الأعلان عن هذا الموضوع, وأنما تنصيب الرادارات بشكل سري جدا ومخفي بحيث ما يعرف مكانها الا اللي تجيه رسالة مطراش, واللي ما يدري عنها يمشي بالسرعة المريحة للشارع.

[شيخ الديرة]

.
. في أَلمانيا
.
. .. صراحة عجبني نظامهم وسهل يتطبق عندنا.
.
.
.


لو تاخذ نفس السواق اللي عندنا وتوديهم ألمانيا تخرب خلال شهر. البشر هم الحلقة الأصعب في السلسلة

[اليحصبي]

خط سلوى صاير 22 فبراير 2

[غريب الدّار]

كان الاجدر عدم الأعلان عن هذا الموضوع, وأنما تنصيب الرادارات بشكل سري جدا ومخفي بحيث ما يعرف مكانها الا اللي تجيه رسالة مطراش, واللي ما يدري عنها يمشي بالسرعة المريحة للشارع.
مع هالاقتراح بشرط :
ان يتم وضع لوحة واضحة وكبيرة في بداية كل شارع للتنبيه بوجود الرادار

[H H]

المفروض الحين يجي دور المرور
ويسون دراسة ومقارنه بعدد الحوادث قبل ووبعد الرادار
لاني استغرب اشوف ناس تمشي 80 في شارع الرعة المحدد عليه 100 واذا قربوا من الرادار ضربوا بريك لين ينزلون السرعة 60


هالحركه تقتلني!!! مدري من لعب عليهم وقالهم ان الرادار يمكن يخبص ويصيدك وانت ماشي بنفس سرعة الشارع!
دايم يمشون من عند الرادار وهم نازلين عن السرعه المحدده بعشرين كيلو , تحسباً لأي خطأ من الرادار!

[يوسف0]

هالحركه تقتلني!!! مدري من لعب عليهم وقالهم ان الرادار يمكن يخبص ويصيدك وانت ماشي بنفس سرعة الشارع!
دايم يمشون من عند الرادار وهم نازلين عن السرعه المحدده بعشرين كيلو , تحسباً لأي خطأ من الرادار!

ترا بعض الرادارات تخطأ وصوروني أكثر من مره لاكن ماتنزل المخالفه :)