المساعد الشخصي الرقمي

مشاهدة النسخة كاملة : من تجاربكم في نوافذ الواجهه


سعود.
21-05-2015, 08:30 PM
السلام عليكم ورحمه الله وبركاته

حاليا ابني بيت العمر ولطالما استفدت من تجاربكم ونصائحكم ......
وعندي كذا سؤال :

1– نوافذ الواجهه كم الارتفاع المناسب من الطابوق علما باني مسويها ثلاث طابوقات برتفاع 60 سم !!

2- اعزكم الله منهول القبو ( دينمو الغطاس ) افضل شركة !!! وكم عدد الاحصنه المناسب للمكينه !!

3- الكهرباء عمومآ ابي تجاربكم ونصائحكم !!!

وجزاكم الله خيرآ ......
معماري قطري
21-05-2015, 11:18 PM
عليكم السلام ورحمة الله وبركاته

نوافذ الواجهة أَو النوافذ عموماً تعتمد على تصميم البيت المعماري الأَساسي ولازم للمصمم راي ولازم هو منفذ مقاسات الواجهة وموازنها مع باقي البيت .. ولو سويتها بارتفاع 60 سم ممكن قطعة أَثاث تسد الجزء المفتوح التحتي .. 80 مناسب والبعض يسويها 90.

لو عندك مجلس يطل على حديقة وفي ديكوره الداخلي ما لك نية تحط شيء جدام الدريشة ممكن تنزلها أَقرب شيء للأَرضية بس الفريم بيغطي جزء بسيط وتقدر تخلي الجزء التحتي ثابت وفوق ينفتح .. بعض المجالس اللي حق قعدة أَرضية يسون ارتفاع الدريشة 30 سم وتكون ظهر للمسند .. المهم من فوق يكونون نفس الارتفاع بحدود 2.1 متر لو حبينا نسويها بخط واحد مع الباب أَو تكون مقوسة وفيه عدة اتجاهات تكسر هذي القواعد حسب التصميم.

لدينمو الغطاس وقوته ونوعه شوف مهندس ميكانيكي أَفضل .. وغراندفوس هي تقريباً أَفضل المضخات.

الكهرباء موضوع طويل ومتغير دوم ويبي له مهندس بعد متابع يعد لك مواصفات مفصلة ومتماشية مع تصميم شبكة البيت عندك .. ناس بيقولون لك خذ ام كي وخذ بايبات من النوع الفلاني ووايرات من النوع الفلاني .. المهندس بيحدد لك المواصفات صح وكل بريكر وتحمله وكل واير وسمكه ونوعه وهذا يفترض يكون موجود عندك في خرايط الكهرباء.

وسامحني على القصور
سعود.
21-05-2015, 11:56 PM
مابه قصور وجزاك الله خير على المجهود الرائع منك في المنتدى . وعساه اجر لك في الدنيا والأخره ......
معماري قطري
22-05-2015, 12:10 AM
مابه قصور وجزاك الله خير على المجهود الرائع منك في المنتدى . وعساه اجر لك في الدنيا والأخره ......

تسلم يالشيخ .. شوف موضوع العقود اللي في توقيعي حطيت فيه مواصفات وحساب كميات بس من سنة 2004 أُمور كثيرة تغيرت