وين تباع غرشة الماء Voss

[الكواري 1972]

Voss غرشة الماء

اعتقد ذكر الموضوع سلفاً

في وين احصل

http://store1.up-00.com/2015-05/1432493082561.jpg (http://www.up-00.com/)

[الكواري 1972]

بشرو وين

[الجـــوديّ]

شفتها في ميغا مارت و سبينيز اللي في اللؤلؤة والمول

[حليتان*]

بتحصله فالفنادق الكبيره مثل دبليو والهلتون اظن

وعند كافي فاللاقونا بس مب ذاكره

[الكواري 1972]

يعطيكم العافيه

[الحياة الخالدة]

السلام عليكم ورحمة الله

السموحة ياخوي
بس ممكن أسأل شنهو المميز في هالماي ؟؟

[H H]

السلام عليكم ورحمة الله

السموحة ياخوي
بس ممكن أسأل شنهو المميز في هالماي ؟؟


ميزتها انها كشخه اذا حطيتيها فالانستقرام وكتبتي, رياضه تايم :shy:

[وطن]

السلام عليكم ورحمة الله

السموحة ياخوي
بس ممكن أسأل شنهو المميز في هالماي ؟؟

طعمه حلو الحياة

انا احبه و احب اكوابانا
و فيتال


يعني هو يعتمد انتي اي ماي تتقبلين

على سبيل المثال ما اتقبل ايفيان
اشربه بس مو وايد لاني ما احب طعمه

[العلياا]

موجود في ذا قيت مول
في الجمعية اللي داخل مطعم اتيوبيا

[راجي الْعفو]

ميزتها انها كشخه اذا حطيتيها فالانستقرام وكتبتي, رياضه تايم :shy:

هالتصوير لعب بالعالم لعب !

[لاجل QT]

أتوقع في سبينس اللؤلؤة

[ضوى]

اخبر الماي لا طعم له ولا رائحة ولا لون

كيف طعمه حلو ياوطن

جيل اخر زمن

ياحلو ماي اللولب

[(ام عبدالله)]

ماي طعمه حلوو ..

سبحان الله escape

[وطن]

اخبر الماي لا طعم له ولا رائحة ولا لون

كيف طعمه حلو ياوطن

جيل اخر زمن

ياحلو ماي اللولب

كل ماي له طعم مختلف يا ضوى

جربي إيفيان
مالح شوي
وفيتال بعد

دانه غير طعمه
اكوابانا غير

ماي زمزم غير

كل ماي له طعم غير

[ضوى]

طعم زمزم الوحيد اللي المفروض غير ولاسباب دينية

لكن باقي الماي ليش يتغير طعمه ؟

[وطن]

ضوى جربي وشوفي

تختلف درجة المكونات ومصدر الماي

يأثر ع الطعم

[H H]

الحين كلكم مثلي اذا شربتوا زمزم يجيكم صداع؟ والا انا الي متعود على الماي الي معالجينه بكلور وامراض

[بريق الحق]

طعم زمزم الوحيد اللي المفروض غير ولاسباب دينية

لكن باقي الماي ليش يتغير طعمه ؟
افيان مالح لانه مياه من نهر
وقريت مقال انه سبب لمرض السرطان

[ضوى]

ضوى جربي وشوفي

تختلف درجة المكونات ومصدر الماي

يأثر ع الطعم

طيب فسري لي اشلون علمونا الماء لا طعم له ولا لون ولا رائحة :shy:

شخصيا الماي اللي اشربه من الحنفية مافيه اي طعم ماي عادي جدا

ماي الحسا مالح
ماي زمزم فيه طعم غريب
ماي الهند مافيه طعم
ماي اوروبا زلال طعمه عادي

[وطن]

علمونا غلط يا ضوى

[JN000N]

طيب فسري لي اشلون علمونا الماء لا طعم له ولا لون ولا رائحة :shy:

شخصيا الماي اللي اشربه من الحنفية مافيه اي طعم ماي عادي جدا

ماي الحسا مالح
ماي زمزم فيه طعم غريب
ماي الهند مافيه طعم
ماي اوروبا زلال طعمه عادي


كثرة الصوديوم في الماي تغير طعمه وتثقله
افضل شي نختار الماي اللي قلييييييييييل الصوديوم فيه
ولا تقرون الغرشة الي مكتوب فيها قليل الصوديوم لانهم خراطين لو تجوفين نسبة الصوديوم تنصدمين شكثر هي عاليه

[الحياة الخالدة]

جنون عيل إذا ما نصدق اللي مكتوب عليه قليل الصوديوم شنسوي ؟؟ :rolleyes2:

الماي المذكور في الموضوع أنا جربته أكثر من مرة
بس يمكن لأني ما أحط في بالي ما انتبهت للفرق بينه وبين الماي العادي

و أكيد يتفاوت الطعم شوي بين أنواع المياه بحسب درجة تركيز الأملاح اللي فيه

طبعاً قليل الصوديوم مثل ما قالت جنون أحسن .. و خصوصاً للي يعانون من ارتفاع الضغط

[لبيبة]

افيان مليان كالسيوم، وهذا سبب طعمه الثقيل، لو تجربون تسوون به شاي تلاقون يصير تكلس على سطح الشاي وحواف الكوب، ويصير تكلس في الغوري لو تستخدمون الكهربائي.

كثرة الكالسيوم مضرة بمرضي الكلى، كذلك كثرة الصوديوم مضرة بهم، فيجب قراءة المعادن المكتوبة جيدا.

ماي الريان من افضل الانواع الموجودة عندنا في السوق من ناحية قلة الاملاح والمعادن فيه، فهو مناسب للمرضى وللي يهتم بنسب الصوديوم في طعامه، توصلت لهالشي بعد انقطاع ماء مسافي (اللي كان المفضل عندي) من السوق عندنا، اضطريت اشتري كل الانواع الموجودة للتجربة، وقريت كل المكونات ونسب الحموضة ولقيت ان ماي الريان افضل الموجود، بعده ماي قطرات اللي غلافه اخضر.

ما عليكم من الاسامي والماركات، اهتموا بالمكونات واقروها بتمعن.

اعرف ممكن تعلقون وتقولون طيب ماي الريان اذا ما تعرفين هو من اللولب يعني ماي الحكومة، احتمال صحيح هالشي، بس مر بعمليات تصفية وتنقية، ولا اعرف عن نسب المعادن في ماي الحكومة علشان اقارن، لكن عندي اعتقاد بانها نسب مختلفة ولاتحتوي كمية الكلور اللي نشم ريحته في ماي الحكومة.

اما ماي Voss ما اعرف اذا له موزع في الدوحة، لكنه موجود في
الامارات BinHendi +97143846797
والسعودية Gourmet Food +966504164030
والبحرين 97317369727+ Reload Fresh

تويتر https://twitter.com/vosswater
فيسبوك https://www.facebook.com/vossworld

[القبطان سلفر]

مياه دانه نسبة الصوديوم 3 اعتقد وهي اقل نسبة في الاسواق متوفره حاليا .

وكذلك مياه تنورين الصوديوم فيه 4 .

[الكواري 1972]

ما شاء الله عليكم

موضوع بسيط وعادي

ولكن حولتوه لموضوع مهم جدا ومفيد

بارك الله فيكم ونور الله دروبكم

[بريق الحق]

مياه دانه نسبة الصوديوم 3 اعتقد وهي اقل نسبة في الاسواق متوفره حاليا .

وكذلك مياه تنورين الصوديوم فيه 4 .
في ماي عند مطعم شاطر عباس بعد نسيته قليله نسيت اسمه الصراحه

واقل ماي شفت نسبة الصوديم فيه الي قرطاسه اخضر ينباع بريال بعد

[الكواري 1972]

كل ماي له طعم مختلف يا ضوى

جربي إيفيان
مالح شوي
وفيتال بعد

دانه غير طعمه
اكوابانا غير

ماي زمزم غير

كل ماي له طعم غير

صحيح كلامك

و انا معك

[JN000N]

جنون عيل إذا ما نصدق اللي مكتوب عليه قليل الصوديوم شنسوي ؟؟ :rolleyes2:

الماي المذكور في الموضوع أنا جربته أكثر من مرة
بس يمكن لأني ما أحط في بالي ما انتبهت للفرق بينه وبين الماي العادي

و أكيد يتفاوت الطعم شوي بين أنواع المياه بحسب درجة تركيز الأملاح اللي فيه

طبعاً قليل الصوديوم مثل ما قالت جنون أحسن .. و خصوصاً للي يعانون من ارتفاع الضغط

هم يكتبون جنب الاسم قليل الصوديوم
بس لو تجوفين الجدول ورا
تلاقين ان النسبه وايد عاليه 12 مثلا

[الجـــوديّ]

وترا الماي اللي في غراش قزاز غير عن البلاستك ... مثل اكوابنا خفيف وحلو


اخف نسبة املاح في ماي الخيّال (من الحسأ) 1,5 % .

[توشيبا]

جربو طعم براده المسجد

قسم بالله شي خيالي

[mE mYself & i]

ما في احسن من ماي اللولب

[(ام عبدالله)]

جربو طعم براده المسجد

قسم بالله شي خيالي

جزاك الله خير ..
جرب براده المسجد يلي ورى حديقه الرميله او يلي عند مسجد ابوبكر الصديق
ولا تنسانا بالدعاء ..

[Dana’1]

هالماء شربته في دبي في احد المقاهي
صحيح وطن الماء الي بالأسواق يختلف
اكوابانا الي معبأ بالزجاج زين
ويازيين ماء زمزم باااارد خصوصا بالحرم (قلب)
حتى ماء الحنفيه زين بشرط الفلتر يكون زين

[نوفا91]

هالماء شربته في دبي في احد المقاهي
صحيح وطن الماء الي بالأسواق يختلف
اكوابانا الي معبأ بالزجاج زين
ويازيين ماء زمزم باااارد خصوصا بالحرم (قلب)
حتى ماء الحنفيه زين بشرط الفلتر يكون زين

تدرين ياديور اني اكره اشرب ماي زمزم ، له طعم كلش ما اتقبله

والغرشه للي اسألت في مجمع ذا جيت

[(ام عبدالله)]

معليه بس عدلي كلمه اكره لانه ماء طاهر فلا تكرهه ان ما حبيتيه فهذا شي راجعلك

اقرائي عن ماء زمزم وراح تغير الفكره

[Dana’1]

تدرين ياديور اني اكره اشرب ماي زمزم ، له طعم كلش ما اتقبله

والغرشه للي اسألت في مجمع ذا جيت
بالحرم الماء المبرد شيييي يمكن اذا كان فاتر او حار او تخزيين يبان فيه الطعم

[H H]

تدرين ياديور اني اكره اشرب ماي زمزم ، له طعم كلش ما اتقبله

والغرشه للي اسألت في مجمع ذا جيت

سيم سيم , ماني قايل اكرهه, لكن مااتقبّله ويجيبلي صداع علطول

[وطن]

تدرين ياديور اني اكره اشرب ماي زمزم ، له طعم كلش ما اتقبله

والغرشه للي اسألت في مجمع ذا جيت

حبيبتي برديه قبل لا تشربينه
انا بعد ما اقدر اشربه فاتر
ما اتقبل الطعم

بس اذا بارد
عجيب





بالحرم الماء المبرد شيييي يمكن اذا كان فاتر او حار او تخزيين يبان فيه الطعم

اخر مره رحت مافي مبرد في الحرم
كله فاتر :(

[شيزكيك]

شريت من هالماي من محل اتيوبيا في ذ قيت مول

[بشائر]

بتلاقيه في ذا قيت مول داخل جمعية في المطعم الأثيوبي وبحجمين كبير وصغير .

[ضوى]

انت وين عايش

ترا حتى الماي الحين ممكن يكون ضار مع الوقت راحت ايام قبل الماي فالحب وفوق الحب قلاص ستيل

وبيني وبينك لو انك مكتفي ب لا تعليق او ماشركت من الاساس افضل

سكت دهرا ونطق عجبا

أنا للحين عندي حب وفوقه قلاص ستيل ونشرب منه أنا وعيالي ويازين مايه بارد يسرسح

[JN000N]

أنا للحين عندي حب وفوقه قلاص ستيل ونشرب منه أنا وعيالي ويازين مايه بارد يسرسح

ماي الحب صحي ومفيد
اظنه يقصد ذاك الوطر الي مافيه خيارات ثانيه خخخ

[المخفي]

الى كل من لا يستسيغ ماء زمزم ممكن تحتاج رقية شرعية

[الكواري 1972]

اللي يدور ماء مسافي

حصلته في فملي فود سنتر

بشارع المطار

[لبيبة]

اللي يدور ماء مسافي

حصلته في فملي فود سنتر

بشارع المطار

اي انا اللي كنت ادوره، مشكور اخوي ما قصرت وجزاك الله خير

[بو راشد 1]

من زمان كنت اسوي "ماي مدخن" اجيب لبان عربي، و اولعه و اقلب الحب عليه، لين انترس دخان اعدله و بسرعه اصب الماي فيه و اسكرة بالصحن. عقب اشرب الماي و شوف طعمه اشلون.
في هالزمن نفس الفكرة يسونها بس يحطون بلحين او ثلاثة لومي و نعناع في الغرشة و يشربونه.

[JN000N]

من زمان كنت اسوي "ماي مدخن" اجيب لبان عربي، و اولعه و اقلب الحب عليه، لين انترس دخان اعدله و بسرعه اصب الماي فيه و اسكرة بالصحن. عقب اشرب الماي و شوف طعمه اشلون.
في هالزمن نفس الفكرة يسونها بس يحطون بلحين او ثلاثة لومي و نعناع في الغرشة و يشربونه.

ايييييي ماي مبخر ذقته عند ناس من اهلنا
بس ماحبيته

[الكواري 1972]

اي انا اللي كنت ادوره، مشكور اخوي ما قصرت وجزاك الله خير


العفو يالغالي

جزاك الله بمثله

[دايموند]

خلصونا منو من الماركات الي اقل نسبه صوديوم؟
دانه والا الريان والا بوغرشه الخضرا ع قولتكم؟
ومنكم نستفيد

[توشيبا]

هذا الماي اليوم شربت منه

كل شي فيه صفر

http://upload.traidnt.net/upfiles/AQJ73747.jpg

http://upload.traidnt.net/upfiles/tCP73791.jpg

[الكواري 1972]

المصدر من ين
من أي محل

يعطيك العافيه

[دايموند]

توشيبا ع كم؟شكله غالي هههه

[وطن]

هذا الماي اليوم شربت منه

كل شي فيه صفر

http://upload.traidnt.net/upfiles/AQJ73747.jpg

http://upload.traidnt.net/upfiles/tCP73791.jpg

توشيبا

من متى الماي فيه دهون ونشويات
وسكر و الياف وبروتين !!

هذا الملصق يستغفل الشاري
:anger1:


مكونات الماي معادن

مب كربوهيدرات والياف ودهون !!

[العقل المدمر]

بما انكم سولفتوا وايد عندي سؤال
ليش وايد تدققون على نسبة الصوديوم ؟
يعني مثلا قلنا ان نسبة الصوديوم 7
واحنا نشرب 10 اكواب ماي يوميا
ايش المشكلة لو وصل الصوديوم 70 ؟
اخبر الحاجة اليومية قريب ال 2000
يعني ما ياثر هالرقم البسيط

[لبيبة]

بما انكم سولفتوا وايد عندي سؤال
ليش وايد تدققون على نسبة الصوديوم ؟
يعني مثلا قلنا ان نسبة الصوديوم 7
واحنا نشرب 10 اكواب ماي يوميا
ايش المشكلة لو وصل الصوديوم 70 ؟
اخبر الحاجة اليومية قريب ال 2000
يعني ما ياثر هالرقم البسيط

الصوديوم يضر اللي عنده ضغط او مشاكل في الكلى، ومشكلته يخزن ماي في الجسم، فاللي يبي يحافظ على وزنه، يقلل من الصوديوم اللي ياخذه في اليوم.

[العقل المدمر]

الصوديوم يضر اللي عنده ضغط او مشاكل في الكلى، ومشكلته يخزن ماي في الجسم، فاللي يبي يحافظ على وزنه، يقلل من الصوديوم اللي ياخذه في اليوم.

مقتبس من أحد المواقع الطبية :
الجرعه اليومية لم تحدد، لكن غالبية الاطباء يوصون على 1 -- 3 غرام باليوم. ملعقة واحدة من ملح الطعام تحتوي على 2 جرام صوديوم.
يعني 1000 لين 3000 مللي .. نفس المثال اللي ضربته .. بتظل نسبة الصوديوم حتى لو 7 شوية يعني 70 مللي من اصل 1000 رقم لا يُذكر
الناس وايد مكبرة موضوع الماي وناسية اكلها واغلب اللي اشوفهم يحاسبون من الصوديوم فالماي حزة الاكل ينسون الموضوع