تصميم خرايط الفيلا وشروط البلديه واتمام البناء [الأرشيف]

BUHASSEN

27-05-2015, 12:27 PM

السلام عليكم ورحمه الله وبركاته

عندي استفسار عن ثلاث نقاط اتمني تفيدوني فيها
اولا: انا سويت الخرائط بحيث تناسب احتياجاتي انا والاسره وطلعت عندي بعض الاشياء الي هي تعتبر مخالفه لشروط التخطيط العمراني فانعفس التصميم عندي
مساحة التغطيه عندي فوق ال68% والمسموح 60 % فاضطريت اكنسل المقلط الخارجي للمجلس عشان تتعدل النسبه والاستفسار عندي:
1. هل اقدر اطلب استثناء. البلديه قالو اذا التخطيط العمراني وافقوا احنا ماعندنا مانع. او
2. انطر اخذ اتمام البناء وبعدها اضيف الي ابيه
3. اتمام البناء ايش شروطه عشان اخذه.

ويعطيكم العافيه

شموخ دائم

27-05-2015, 01:11 PM

,

,

مرحبا

اخوي الكريم

اول نصيحه دائما نقولها ...

حط احتياجاتك عند المهندس الاستشاري وهو يعمل لك التصميم
لانه يعرف كل القوانين والمساحات المطلوبه ومن خلاله هو يقدر يحط لك اكثر من تصور وتختار الانسب لك والاقل ضرر عليك
ماتقدر تحصل كل الي تبيه في الخريطه خاصه اذا ( الارض صغيره )

اذا المساحه صغيره افضل حل هو عمل ( بيسمنت ) مازال الناس بقطر مو عارفه اهميه البيسمنت للاسف
والاخوان بالكويت ما شاء الله مستقلينه استغلال صحيح

وعندك البنتهاوس بالسطح تقدر تستغله استغلال جيد مميكن استوديو او سويت او غرفه بخدماتها

نصيحتي لك ( لا تخالف ) لانه بيترتب عليه امور كثيره
الان القانون صارم فيها ( غرامه + ازاله المخالفه ) والمخالفه سعرها بالامتار

والموضوع ما يستاهل ساعتها ( تترجى هذا وتكلم هذا وتدور واسطه على فاضي بلاش )

حتى مستقبلا لو احتجت أي شي من البلديه بيعرفون المخالفه وبيوقف كل امورك هناك

الحلول كثيره روح للحل الانسب بدون مخالفه
حتى لو صغرت بعض المساحات الي مالها داعي وهي كثيره بالبيت مساحات ما نستفيد منها بشي للاسف

اتمام البناء لازم تنتهي من كل شي

العوازل
التبليط
صبغ البيت
تركيب الشبابيك
الابواب
السور والباب الخارجي
تنظيف البيت كامل من كل المخلفات

موفق يارب

,

,

BUHASSEN

27-05-2015, 01:53 PM

يعطيك العافيه اخوي شموخ عالرد القيم

انا فعلا مستغل كل المساحات البيت مربع ومافيه دزاينات مضيعه المساحات ابدا ومحتاج الي فيه لان نفس ماقلت الارض صغيره والاسره كبيره

الواحد ماوده يخالف بالعكس نبي نمشي عالقانون بس المفروض يقدرون احتياجات الاسره وهني تكون في مرونه لان نوع المخالفه مايضر حد ابداا

مكاتب التصميم يعطيك علي كيفه يحط امور جماليه في البيت ويصغر البنيان بس عشان يخلص

بالنسبه للبيسمنت مشكلته الوحيده التكلفه تكون عاليه جدا سويت دراسه وحسبه بسيطه كنت اقارن بيت واحد من الشباب مسوي

فيطلع لوقلنا البيت العظم +البلاستر 1000 ريال للمتر البيسمنت بيكون 1800 للمتر تقريبي

والله يسسير ان شاء الله

مشكور عالمرور

معماري قطري

27-05-2015, 03:33 PM

ما قصر اخوي شموخ أَوجز كل شيء كالعادة

انا من خلال تعاملي لاحظت إِن الاستشاريين عندنا بعضهم ضعاف ويطبقون بدون نقاش .. وتتفاجأَ جارك بنى بعدك وسوى اللي انت ما سويته وأَكثر .. صحيح خلك قانوني بس لا تنسى تفاوض الجهة المرخصة .. الاستشاري أَوقات يكون مثل المراسل يقدم الرسومات عن طريق الايميل الحين ويردون عليه بالتعديلات وهو ينقل لك الصورة إِن الوضع صعب ومستحيل يوافقون.

في البداية يبي لك تفهم شالقصة وليش ما وافقوا على المخطط .. وتحاول تعدله وبعدها لو ما فيه حل ثاني تبدأَ تفاوض .. صج أَوقات تصطدم بعقليات متحجرة ما تغير شيء .. حاول تروح للمسؤول الأَعلى وتتدرج لين توصل لحل وسط.

مره في تصميم بيت سكرت السقف اللي بين البيت والملحق بأَلمنيوم وبلاستيك يدخل النور ووقفوا الموافقة ورخصة البناء الا لازم ازيله .. رحت البلدية وكلمت المسؤول وقال هذي شروط الدفاع المدني .. حاججته بأَني مع هذي الشروط وحتى ما ركبت حديد حماية على الدرايش لأَن هذا يكون عائق وقت الحريق ووقت الحريق حتى تكسير النوافذ مسموح وحتى هدم الحائط .. فطلبوا مني توقيع تعهد بالازالة ووقعت وطبعاً تغيرت القوانين الآن لكن ما زلنا نرى كثير من ما نعتبرها تجاوزات يوافق عليها على انها استثناءات

باراكودا

27-05-2015, 07:11 PM

معماري قطري

27-05-2015, 08:56 PM

لابد من تطوير القوانين لتواكب العصر حرام اراضي أسعارها بالملايين لايسمح باستغلال أكثر من 60 في المئة من المساحة للملاحق والمجالس ولازالت مواصفات التمديدات الكهربائية الخاصة بالتلفزيون المصندق هى السارية .

بالنسبة لشهادة اتمام البناء لازم تنتهي من كل شي ماعدا بلاط الحوش .

تعقيدات التخطيط ما لها معنى .. يفترض في بعض المناطق والأَراضي الصغيرة البنيان على مساحة كبيرة وعمل مواقف خل نقول شبه تحت الأَرض .. بحيث تكون نازلة شوي والبنيان مرتفع شوي .. ومجلس البيت مثل مجالس قبل مفتوح على الشارع وفي نفس الوقت له باب حتى لو حديد مشغول أَو كما يحب المالك .. الإِرتفاع نخليه لغاية 5 أَدوار وبحرية صاحب المنزل يبغيه دورين مفتوحين على بعض وخاصين به وفوق نظام شقق لعياله أَو يبي يؤجر جزء ويستفيد من مردوده .. هذا بيكون له مردود كبير على استغلال الأَرض وتوفير في الخدمات واستغلال مناسب للدور الأَرضي في مواقف كافية وخدمات كمخزن كبير وملحق قريب من المواقف .. والارتداد من الواجهة الرئيسية لكل منطقة لازم يدرس صح ولكل نوعية بناء .. يفترض فيه نوعيات عمارات لها بروز وتظليل للمشاة تحت .. هذي انقرضت عندنا بسبب عقليات التخطيط.

معماري قطري

27-05-2015, 09:05 PM

بالنسبة لصاحب الموضوع وللبيسمنت لو فيه ضرورة واحتياج كبير له يسويه ولنفترض مسطح مساحة البناء 300 متر مربع ممكن نصغر البيسمنت لنصف المساحة ونخلي فيه صالة جلوس عائلية .. أَو مجلس له درج خارجي ونزول من الحوش وله مدخل من جهة البيت .. 150 متر مربع بتكفي لمجلس وملحقاته وممكن نسوي جزء من الحائط محفور حوله .. يعني حديقة نازلة بمستوى البيسمنت ومفتوح بدرايش كبار فيكون بيسمنت عملي ومنور وشبه معزول عن البيت.

عزله يبقى مهم جداً عن الرطوبة عدل ولو ما فيه حاجة ضرورية له انا ضد البيسمنت في كل أَراضي قطر بسبب الرطوبة القوية والتربة الملحية وصلاحية وضمان أَي عازل حده 15 سنة.

فيه طرق عزل تكلمت عنها كم مرة بس مكلفة وقليل يسونها في قطر.

BUHASSEN

31-05-2015, 08:23 AM

(عبدالله)

31-05-2015, 08:43 AM

السلام عليكم

أحيي أخوي شموخ دائم على نصايحه وإرشاداته ونظرته الواقعية دائماً جزاه الله خير

أنا أنصح وبقوة إن الواحد يبني له بيسمنت حتى لو مب محتاجه الحين، ولما يبنيه يبنيه على أسس قوية بحيث يكون معزول صح من جميع الجهات ما في ولا احتمال يوم من الأيام تتسرب رطوبة بسيطة

لأن الآن الأراضي غالية، فإذا قلنا سعر أرض 1200 متر ب 4 ملايين معناته سعر المتر 3300 ريال وبالتالي جدير انك تستثمر فيه بسعر 1800 ريال للمتر

أنا ولله الحمد بنيت بيسمنت على مساحة طابق كامل سويت فيه مجلس شعبي مع مجلس صغير لليهال ومغاسل وحمام+ مجلس كبير مودرن+ صالة كبيرة متعددة الأغراض (تصلح للجيم وجمعة الأعياد والمناسبات وحفلات لليهال مثلاً ومكان يلعبون فيه تنس..إلخ) + مخزن كبير لاغراض البيت الموسمية والمدى البعيد + بانتري صغير)

مالي ذيك الحاجة لهالأمور كلها الآن لكن فرصة مادام الله ميسر على الواحد الحين بالصحة والمادة والوقت في شبابه.. وما في مانع يعيش فترة تقشف كم سنة مقابل انه ينعم براحة عقب في الكبر ويسكن عياله معاه بعد...

والله ييسر لنا ولكم جميع

(عبدالله)

,
اذا المساحه صغيره افضل حل هو عمل ( بيسمنت ) مازال الناس بقطر مو عارفه اهميه البيسمنت للاسف
والاخوان بالكويت ما شاء الله مستقلينه استغلال صحيح

,

بالنسبه للبيسمنت مشكلته الوحيده التكلفه تكون عاليه جدا سويت دراسه وحسبه بسيطه كنت اقارن بيت واحد من الشباب مسوي
فيطلع لوقلنا البيت العظم +البلاستر 1000 ريال للمتر البيسمنت بيكون 1800 للمتر تقريبي

معماري قطري

31-05-2015, 02:03 PM

معماري قطر مشكوور علي النصايح القيمه

حاليا بشتغل علي موضوع النص بيسمنت بحيث يكون المجلس الخارجي في البيسمنت وبالنسبه للرطوبه هي الارض في ام عبيريه واحد الاخوان قالي انا سوا تحليل للاراضي وقالوا انها مناسبه لانها صخريه والرطوبه فيها قليله والله اعلم

ومثل ماتفضلت لو يخفوف من الشروط هذي وتكون في مرونه في استغلال مساحات الاراضي بيكون له تاثير كبير بدال المساحات الضايعه الي الواحد مايقدر يستفيد منها

اذا في امكانيه تنصحني بمكتب للخرايط يكون جيد واسعاره مقبوله

وجزاكم الله خير

يا اخوي المكاتب الزينة غالية وأَغلب اللي نصحت بها الكثيرين زعلوا مني وقالوا لي نبي زباين تدفع .. ووالله انحرجت من الطرفين لدرجة إِن مكتب طلب 50000 شهري اشراف بس .. المكاتب الرخيصة كلها تشتغل رخيص وتطبق قوانين النسخ بدون تفكير .. وبدون حسابات للخرسانات والحديد كلها ستاندرد ويزيدون في الكميات بدون قياس .. والمشكلة أَثناء البناء حسب توافقهم مع المقاول يقللون ويتقاسمون الغنيمة .. والعيب في كل هذا يرجع للرقابة الحكومية من خلال التخطيط والبلديات .. والواجب يكون تدقيق الخرائط وتوثيقها كامل منهم والمرور على المشاريع وتدقيق القائم مع الخرائط حتى يعرفون ويمنعون التلاعب.

حتى نظام اطفاء الحريق يبالغون فيه ووقت التنفيذ يتساهلون مع المقاول ويسون شيء مقبول للموافقات الحكومية والمالك يكون دافع القيمة كاملة.

نجي للتصاميم كلها تقريباً بقيود وتعقيدات التخطيط تستوي نماذج معينة ما تتغير .. أَحدهم قال لازم نلزم الكل بمخطط واحد .. الله يهداه هو عياله ما يقدر يلزمهم بمخطط واحد شلون كل كبار الموظفين؟

بالنسبة للبيسمنت لو حبيت تسويه سوه خرسانة حتى لو 10 سم لتقليل التكلفة وحط حماية ووتر بروف سميك مثل اللي ينحط للسقف من تحت على صبية نظافة .. src - sulphate resistant concrete وعليها الرول العازل وبعدين تعمل فوقه الصبية الخرسانية وتكون محمية من دخول الرطوبة .. في دول ثانية يحطون حجارة بينها فجوات وتحتها بايبات تصريف لو ينزل الماي من الجوانب يدخل هذي البايبات وينشفط بمضخة ويتصرف .. المضخة تكون ستاند باي بعوامة تشتغل توماتيك .. الجوانب كذلك مع تسكير فتحات الحديد المستخدم في التركيب عدل بماستك وعازل .. بعضهم يخلي الفتحات هذي الصغيرة مفتوحة ويغطيها بالعازل ويتقطع العازل مكانها ويصب الماي منها صب في البيسمنت .. وبعد عمل العازل صح نحميه بطابوق حتى لو 10 سم ويستحسن نحط بين الطابوق والعازل المائي عازل حراري ( فوم الأَبيض أَو الأَزرق ) ونردم بعدين على الطابوق .. وفي بعض المناطق نلغي العزل الجانبي والحائط ونسوي أَرضية نازلة .. سواءً لو نحب لمستوى تحت قاعدة النوافذ بشوي مع عزل الجزء السفلي من الطابوق أَو نسوي بلكونة نازلة بمستوى البيسمنت وبباب زجاج كامل .. منها يجي النور الطبيعي ومنها تكون عندنا تهوئة طبيعية .. وكذلك نقدر نستخدم هذا الجزء كمدخل ومخرج خارجي بباب ودرج ينزل لهذا التجويف.

انا حاضر لك ولكل من يرغب في مراجعة رسوماته وعمل اقتراحات أَفضل في موضوع خاص سأَستحدثه لهذا الخصوص .. مع النصائح بخصوص كل ما يتعلق بالبناء والشركات حسب ما يصلني وما أَعرف من جودة بعض الشركات وتخصصاتها.

BUHASSEN

31-05-2015, 02:36 PM

معماري قطري

31-05-2015, 09:53 PM

مشكور اخوي معماري قطر

بالنسبه لي ماحب اسلم موضوع البيت للمهندس او الاستشاري يسوون الي يبون وانا اجي ادفع بس عشان ارتاح من عوار الراس اشوف الواحد لازم يقرا ويتعلم ويطبق ومع البنيان بياخذ الخبره ومافي شي بيكون كامل

جربت كذا محل ومشهوررين ووصوني ناس يوم تجي تتناقش معاه مايعطيك مجال تاخذ وتعطي معاه بحيث ان التصميم يناسبك ويناسب احتياجاتك يحاول يخلص منك عشان الي بعدك

بالنسبه لي سويت رسمه مبدئيه فيها الترتيب الداخلي للبيت بحيث اني اكون مستغل كل المساحات وماقول ياريتني زدت ولا كبرت خاصه الفيلا نفسها الملاحق ممكن اطورها بعدين

الخرسانه والحديد هي المعضله احاول اعرف كيف تنحسب عشان اقدر اقدر السعر وهل هي مناسبه لحجم البيت..

والله ييسر الامور

مشكلتنا مع الاستشاريين حاولت أَوجزها لك وهي متشعبة وكبيرة واحنا كجهة حكومية اضطرينا نسحب مشاريع تتصمم لها 3 سنين وأَكثر وهي مكانك سر، والسبب اننا نسوي مناقصة تصميم ونختار مكتب رخيص مقارنة بالباقيين اللي في المناقصة وهو في الحقيقة مكتب قوي .. ونتورط .. تعجبت من لستة المكاتب فيها مكاتب تعيسة مسجلة درجة أُولى أَو فئة ( أ ).

بالنسبة لك ولبقية الاخوان ما انصحك تحاول تعرف كل شيء .. انا مثلاً درست تصميم المنشآءات الخرسانية والحديدية ودرست الكهرباء والخدمات ودرست مباديء الهندسة البيئية .. بس صدقني تركيزي على شيء واحد نساني كل الباقي .. يمكن ملم بجزئيات بسيطة لكن بالنسبة للتصميم الانشائي صعب افكر اخوضه وشيء مب سهل المختص يلم به فما بالك بالشخص العادي .. انت حدد متطلباتك الرئيسية باللغة العادية المفهومة والمهندس يترجمها بلغة الرسومات والتصميم وراجعها واستشير وعدل وواصل لين تطلع بتصميم جيد.

أَول خطوة لك صحيحة بنقاشك مع مدراء مكاتب أَو مصممين .. بس كثير من المكاتب يحولونك على فورمان عادي وحتى ما وصل لدرجة مساعد مهندس أَو رسام .. وهذا صعب يتفاهم معاك تفاهم مهني وياخذ طلباتك ويكتبها بتركيز وتحصل كل تفكيره أَي نسخة موجودة بتكون قريبة من طلباتك .. ولا يعطيك اياها واضحة يقول لك تعال لي بعد اسبوع ويسوي لك نسخة بعد ما يجرد الرسم اللي عنده من التفاصيل ويعطيك اياها .. وتبغي الصج معذورين بعضهم على هذا التعامل لأَن لو قال لك عندي عدة نماذج شوفها واختار وباعدل لك بحدود معقولة انت بتستكثر التكلفة عليه .. والمكاتب تخسر كثير على رواتب واقامات وسكن وحتى سيارات.

BUHASSEN

09-06-2015, 02:47 PM

والله ياخوي حبيت فكرة البيسمنت وقلت بسويها وانصدم بالقانون ان مساحة البنيان ماتتعدي 1.30 من مساحه الارض مثال

الارض 1000 اكثر مساحه للبنيان 1300

العرّاف

09-06-2015, 02:54 PM

معماري قطري

09-06-2015, 04:21 PM

والله ياخوي حبيت فكرة البيسمنت وقلت بسويها وانصدم بالقانون ان مساحة البنيان ماتتعدي 1.30 من مساحه الارض مثال

الارض 1000 اكثر مساحه للبنيان 1300

.. اتوقع المقصود مساحة البنيان فوق الارض يعني البيسمنت خارج الحسبة ... لان
انا ارضي حكومية في روضة الحمامة مساحتها 1324 م2

بنيت فيلا ومجلس خارجي وتحت الاثنين بيسمنت كبير بمساحه 650 م2 ... وكامل مساحة البنيان 1850 م2 وعلى القانون الي ذكرته انت لازم ماتعدى 1720 م2

كل يوم عندهم قانون ولكل واحد صلاحيات في بعض التسهيلات والتغييرات .. يفترض تتطور القوانين صح وبما يلائم التطور العمراني وزيادة عدد السكان واستغلال الأَرض أَفضل استغلال .. عندي لو يسون قانون بناء رئيسي على نص مساحة الأَرض بس يسمحون بخمس أَدوار ودور مع الأَرض للمواقف بيكون أَفضل .. يعني ل 1000 متر ممكن نصفي على مساحة بناء 2500 متر مربع .. بالإِضافة بتكون عندنا مساحة 500 متر مسطح باقية تكفي لشروط الدفاع المدني من مدخل سهل لآلياتهم ولتجهيزات اطفاء .. وتكفي المجلس خارجي وملحق خدم وطبخ وغرفة سائقين تكفي العائلة الكبيرة .. كذلك الخدمات لازم ما تشمل خزانات صرف صحي تاخذ جزء مهم من المساحة وتخرب المياه الجوفية.

أَتمنى قرار صريح من سمو الأَمير أَو مجلس الوزراء لتعديل هذه القوانين البائدة ولإستغلال الأَراضي استغلال أَمثل يتماشى مع سعرها الغالي ومع الاحتياجات المتزايدة .. فأَرض في هذه الحدود تكفي لأَب وأَبنائه ( 4 من أَبنائه ) على أَربع أَدوار ممكن أَن تبنى لاحقاً لكن يصمم المبنى على أَساسها.

BUHASSEN

10-06-2015, 08:00 AM

.. اتوقع المقصود مساحة البنيان فوق الارض يعني البيسمنت خارج الحسبة ... لان
انا ارضي حكومية في روضة الحمامة مساحتها 1324 م2

بنيت فيلا ومجلس خارجي وتحت الاثنين بيسمنت كبير بمساحه 650 م2 ... وكامل مساحة البنيان 1850 م2 وعلى القانون الي ذكرته انت لازم ماتعدى 1720 م2

والله ياخوي الي فهمته من الاستشاري ان هذا القانون جديد توهم مطبقينه والبلديات تختلف كل بلديه لها كيف ومزاج

BUHASSEN

10-06-2015, 08:03 AM

كل يوم عندهم قانون ولكل واحد صلاحيات في بعض التسهيلات والتغييرات .. يفترض تتطور القوانين صح وبما يلائم التطور العمراني وزيادة عدد السكان واستغلال الأَرض أَفضل استغلال .. عندي لو يسون قانون بناء رئيسي على نص مساحة الأَرض بس يسمحون بخمس أَدوار ودور مع الأَرض للمواقف بيكون أَفضل .. يعني ل 1000 متر ممكن نصفي على مساحة بناء 2500 متر مربع .. بالإِضافة بتكون عندنا مساحة 500 متر مسطح باقية تكفي لشروط الدفاع المدني من مدخل سهل لآلياتهم ولتجهيزات اطفاء .. وتكفي المجلس خارجي وملحق خدم وطبخ وغرفة سائقين تكفي العائلة الكبيرة .. كذلك الخدمات لازم ما تشمل خزانات صرف صحي تاخذ جزء مهم من المساحة وتخرب المياه الجوفية.

أَتمنى قرار صريح من سمو الأَمير أَو مجلس الوزراء لتعديل هذه القوانين البائدة ولإستغلال الأَراضي استغلال أَمثل يتماشى مع سعرها الغالي ومع الاحتياجات المتزايدة .. فأَرض في هذه الحدود تكفي لأَب وأَبنائه ( 4 من أَبنائه ) على أَربع أَدوار ممكن أَن تبنى لاحقاً لكن يصمم المبنى على أَساسها.

والله هالكلام الصحيح هم قوانينهم مادري ايش اساسها ارض ملك لي ماقدر ابنيها بحيث تناسب احتياجاتي والله مصيبه الحين طلع عندي اقل من نص بيسمنت بسبة هالقانون

khaldoon

10-06-2015, 08:47 AM

مشكلتنا مع الاستشاريين حاولت أَوجزها لك وهي متشعبة وكبيرة واحنا كجهة حكومية اضطرينا نسحب مشاريع تتصمم لها 3 سنين وأَكثر وهي مكانك سر، والسبب اننا نسوي مناقصة تصميم ونختار مكتب رخيص مقارنة بالباقيين اللي في المناقصة وهو في الحقيقة مكتب قوي .. ونتورط .. تعجبت من لستة المكاتب فيها مكاتب تعيسة مسجلة درجة أُولى أَو فئة ( أ ).

.

فعلا كلامك صحيح ميه بالميه..... المشكله المناقصات دائما هي اللي تحكم ...كيف تحط مقاول ابو خشبه مع مقاول محترم و كبير و عنده امكانيات ضخمه و يقدر يتحمل تأخر الدفعات اكيد بيكون سعره عالي و تبيهم الاثنين يتنافسون على السعر.... وكيف تحط دكاكين مع مكاتب استشاريه عالميه و تطلب منهم الاثنين يتنافسون على مناقصه ...سواء بالتصميم او الاشراف.....

في خلل في اليه عمل المناقاصات و كيفية ترسيتها على المقاولين و الاستشاريين .... حتى لو كانت لحنه من اجل النزاهة و الشفافيه

معماري قطري

10-06-2015, 12:31 PM

فعلا كلامك صحيح ميه بالميه..... المشكله المناقصات دائما هي اللي تحكم ...كيف تحط مقاول ابو خشبه مع مقاول محترم و كبير و عنده امكانيات ضخمه و يقدر يتحمل تأخر الدفعات اكيد بيكون سعره عالي و تبيهم الاثنين يتنافسون على السعر.... وكيف تحط دكاكين مع مكاتب استشاريه عالميه و تطلب منهم الاثنين يتنافسون على مناقصه ...سواء بالتصميم او الاشراف.....

في خلل في اليه عمل المناقاصات و كيفية ترسيتها على المقاولين و الاستشاريين .... حتى لو كانت لحنه من اجل النزاهة و الشفافيه

منور إِخوي خلدون ولنا زمان ما شفنا لك مشاركات .. عندنا يا اخوي الموضوع متشعب وكبير .. حتى المكاتب العالمية تعودوا يسون اقامات لمهندسيهم وياخذون مشاريع كبيرة ويرسلون مهندسيهم لعمل مشاريع في دول أُخرى .. دول يكون فيها ضبط وربط أَكثر ويحولون مشاريع مهمة لدكاكين التصميم تسأَل وين المحاسبة؟ يقولون لك القانون ما يمنعهم .. يستوي الأَداء بسيط ويطول التصميم وتكون كله أَخطاء ومدير المشروع يجن جنونه.

مثال بسيط تصميم شارع طوله 10 كلم يدخلون فيه 3 مكاتب استشارية يصممونه كل مكتب جزء أَو تقاطع وتحصل المشروع تحول من بسيط لمعقد وصعب بسبب هذي الادارة السيئة .. وبسبب المكاتب اللي تشتغل بالمراسلة أَغلبها.

معماري قطري

10-06-2015, 12:45 PM

والله هالكلام الصحيح هم قوانينهم مادري ايش اساسها ارض ملك لي ماقدر ابنيها بحيث تناسب احتياجاتي والله مصيبه الحين طلع عندي اقل من نص بيسمنت بسبة هالقانون

انا ضد البيسمنت في أَرض قطر الا في حالات صعبة ومحتاجه الشخص ومستعد لتكلفته وبيسويه صح .. بدل البيسمنت نخليه مواقف مفتوحة ومدخل وسطي للبيت وأَدوار متكررة أَفضل بكثير .. والمواقف تكون في مستوى الأَرض بسبب ضعف أَرض قطر ومشاكل التربة الملحية والمياه.

ربعنا في التخطيط تفكيرهم بدائي وما يناسب الحاجة الحالية والمستقبلية .. حتى الشوارع سووها مثل النفق حتى الناس ما يتضايقون حول هالنفق من رؤية السيارات وهي تمر على جسور ويطل من فيها على بيوتهم .. استوى طريق مثل طريق سلوى عبارة عن بؤرة تلوث كبيرة بسبب عوادم السيارات وعدم تجدد الهواء بسهولة لوجود أَغلبه في حفرة .. واستويت تبي تشوف لافتة محل تطلع له تحس المحلات في وادي والشارع في وادي .. غير عن التكلفة الباهضة والوقت الطويل لإنهاء الشارع .. ونفس الحال في تخطيط البيوت والشوارع التجارية .. أَول مرة أَشوف دولة شارع سكني فيها فجأَة يتحول لتجاري ويتم ترقيع الشارع بكم دكان وكم بيت بارزين .. يفترض الشارع التجاري يخطط ليكون تجاري من الأَساس وتتخذ اجراءات بخصوص عزل المنطقة السكنية عنه ما يكون خلف المحلات وأَبواب خدماتها مقابلة للبيوت.

المأَساة الكبرى شفنا مولات تنزرع وسط البيوت والأَرض بلوك كامل كبير بشوارع سكنية ضيقة فجأَة انبنى فيه مول.

والتخطيط الدائري مستمرين عليه حتى في الفرجان والمناطق الحديثة .. تواير السيارات تهتريء بسرعة بسبب الدوران هذا.

لبيبة

11-06-2015, 08:33 PM

السلام عليكم ورحمة الله وبركاته،

تسجيل متابعة للاستزادة والتعلم. وشكرا لطرح الموضوع وجميع المشاركات المفيدة.

BUHASSEN

14-06-2015, 08:43 AM

انا ضد البيسمنت في أَرض قطر الا في حالات صعبة ومحتاجه الشخص ومستعد لتكلفته وبيسويه صح .. بدل البيسمنت نخليه مواقف مفتوحة ومدخل وسطي للبيت وأَدوار متكررة أَفضل بكثير .. والمواقف تكون في مستوى الأَرض بسبب ضعف أَرض قطر ومشاكل التربة الملحية والمياه.

.

والله اخوي معماري قطر سمعت ان في دراسه يسونها للارض ومن خلالها يقولون لك اذا تصلح تسوي فيها بيسمنت او لا والي عرفته ان المناطق مثل ام صلال وام عبيريه وام العمد ارضها تصلح للبيسمنت... والله اعلم انا عن نفسي افضل طابق ثالث تكلفته اقل ومافيه تعب بس شنسوي الناس يطلعون فوق واحنا ننزل تحت.

اتمني يتم مراجعه قوانين البناء بحيث تتناسب مع احتياجات الاسر والتفريق بين الاراضي الكبيره والاراضي المتوسطه والصغيره..

BUHASSEN

14-06-2015, 08:44 AM

السلام عليكم ورحمة الله وبركاته،

تسجيل متابعة للاستزادة والتعلم. وشكرا لطرح الموضوع وجميع المشاركات المفيدة.

وعليكم السلام ورحمه الله وبركاته

العفو ونتشرف بالمتابعه

معماري قطري

15-06-2015, 12:49 AM

والله اخوي معماري قطر سمعت ان في دراسه يسونها للارض ومن خلالها يقولون لك اذا تصلح تسوي فيها بيسمنت او لا والي عرفته ان المناطق مثل ام صلال وام عبيريه وام العمد ارضها تصلح للبيسمنت... والله اعلم انا عن نفسي افضل طابق ثالث تكلفته اقل ومافيه تعب بس شنسوي الناس يطلعون فوق واحنا ننزل تحت.

اتمني يتم مراجعه قوانين البناء بحيث تتناسب مع احتياجات الاسر والتفريق بين الاراضي الكبيره والاراضي المتوسطه والصغيره..

واحد حب يبني في معيذر وفوق حزم مرتفع وسألني رايي قلت له سو بيسمنت ( سجلوا بيرو هدف على البرازيل ) المهم سوى بيسمنت وتفاجأَ بدخول الماي في الدور اللي تحت الأَرض بعد البناء .. الماي كلش ما له أمان وأَرض قطر كلها منبسطة وتحتها طبقات مياه جوفية وسمعت إٍن حتى البحر يمر تحت أَرض قطر وهالكلام من دكتور مهندس والدكتوراه في المياه الجوفية .. اللي سئلني نصيحتي باني مجمع من 6 مباني و 7 شقق لكل مبنى وتعب وايد لين قدر يحل المشكلة حل جزئي .. والماي حسب الفحوصات يوم فوق ويوم ثاني تحت ويوم ما تبين مياه ويوم ثاني تطلع تقول نبع.

فيه حلول لمياه البيسمنت مكلفة .. أَي شخص بيسوي بيسمنت نصيحة يركب بايبات تصريف للمياه الجوفية تحت وفي الجوانب قرب الجدران .. وهذي البايبات تكون فيها فتحات وتجمع الماي في منهول مجهز بمكينة سحب تشتغل لو ارتفع الماي وتسحبه للخارج وللتصريف .. وحتى الحكومة تمنع تصريف مياه المطر في شبكة الصرف الصحي ما ادري ليش يمكن من كثر أمطارنا.

دوم اضرب مثال لأَرض قطر في انبساطها وضعفها بفلوريدا .. وفلوريدا ممنوع فيها البيسمنت حتى المواقف متعددة أدوار كنها عمارة جنب عمارة ثانية والأَنفاق كلش ما يسونها كله جسور ومرتفعة .. متى مخططينا العظام يفكرون صح في قطر الله أعلم.

BUHASSEN

13-07-2015, 08:25 AM

معماري قطري

13-07-2015, 10:14 AM

ومازال الموضوع مع البلديه

سويت نص بيسمنت وتم رفض المقترح لاني عملت حفره حول البسمنت للتهويه ودرج من الخارج للبيسمنت لان بخليه مجلس

وقانون جديد نازل لازم مساحة البنيان ماتتعدي 130% من مساحة الارض

الله المستعان

الله يعينك العقول مصدية .. لو تبي ارسل لي مخططك المبدئي باقول لك رايي

دوم فيه حلول للشروط البالية .. تحرك بالتدريج وروح للشخص الأعلى يمكن يتفهم رايك ويستثنيك .. واحد مرسل لي من أَيام مخطط فيه بيسمنت جزئي ومحدود لمجلس ومدخله من باب صغير في السور وممر بدرج نص مغطى للمرور من فوق ونص مفتوح للتهؤئة والانارة وأَشوفه حل مثالي والله يوفقه في بنيانه لأَن مثل ما عرفت التخطيط خالص.

بو راشد 1

13-07-2015, 11:09 AM

ومازال الموضوع مع البلديه

سويت نص بيسمنت وتم رفض المقترح لاني عملت حفره حول البسمنت للتهويه ودرج من الخارج للبيسمنت لان بخليه مجلس

وقانون جديد نازل لازم مساحة البنيان ماتتعدي 130% من مساحة الارض

الله المستعان

اخوي،

دشيت الموضوع عشانك، نصيحة، لا تسوي نص بيسمنت، يا تسوي بيسمنت كامل يا لا تسوي كلش. عن تجربة لما البيت يريح، بيصير عندك كراك، لان نص البيت تحتة صبية و حديد (صوب البيسمنت) و النص الثاني تحتة الارض العادية (ما في بيسمنت). هبوط البيت على مستوين مختلفين (مليميتر) بيسبب شروخ.
اخوي سوى بيسمنت كامل، ما صار له كراك
انا سويت نص بيسمت، صار عندي كراك
علما بان البيتين متجاورين.
هذا و العلم عند الله.

معماري قطري

13-07-2015, 04:29 PM

اخوي،

دشيت الموضوع عشانك، نصيحة، لا تسوي نص بيسمنت، يا تسوي بيسمنت كامل يا لا تسوي كلش. عن تجربة لما البيت يريح، بيصير عندك كراك، لان نص البيت تحتة صبية و حديد (صوب البيسمنت) و النص الثاني تحتة الارض العادية (ما في بيسمنت). هبوط البيت على مستوين مختلفين (مليميتر) بيسبب شروخ.
اخوي سوى بيسمنت كامل، ما صار له كراك
انا سويت نص بيسمت، صار عندي كراك
علما بان البيتين متجاورين.
هذا و العلم عند الله.

سامحني يا بو راشد اتدخل وأقول هذي أعذار استشاريينا ولكل وضع هندسي طريقة بناء صحيحة .. ممكن نص وربع حتى وممكن البناء فوق الماء وتحت الماء وتحت الأَرض أَدوار متعددة .. لكل نوعية يبي لها دراسة وتصميم مناسب ويفي بكل الغرض وتاخذ فيه كل احتياجاتك.

البيت لو كبير يحتاج ما يسمى فاصل بناء .. وهذا يكون كعمل البناء مقطوع لعدة أجزاء وكل فاصل يتحرك بروحه .. لو بنياننا العادي ممكن نسوي جزء بيسمنت ومتصل مع جزء عادي وبأَساسات عادية بس المهندس الانشائي يكون على قدر الحدث ما يبرر ويبربر بأَن الأَرض ريحت.

زرت في السابق بيت دور أرضي فيه هذي المشاكل من شلوخ في الجدران تبين كل قطعة طابوق مفصلة يعني شلخ متدرج يبين مثل الدرج والبيت راعيه يستعد ليسكنه وسئلني عن الشلوخ وقلت له رايي بصراحة .. سوء شغل وسوء اشراف .. قال المهندس يقول الأرض ريحت وحتتاعالق الشلوخ دي ومش حتزيد .. وهذا كلام ماخوذ خيره وشره سوء الشغل واضح والحقوق يبي لها قوانين وآلية تنفيذ سريعة .. طلعنا في الخارج نشوف حول البنيان الا عمود زاوية في أسفله شلخ كبير وبروز رفسته بحنية الا الترقيع الاسمنتي طايح ومنكشف الشغل الغش .. حديد تربيط العمود مب مشبوك مع حديد رقبة العمود اللي طالع من القاعدة .. وحديد الرقبة قصير ما ينشبك صح مع باقي العمود .. يعني العمود بدال ما يشيل نفسه ويشيل غيره يدور حد يشيله من الطابوق اللي حوله.

آبي في قطر اشوف مهندسين انشائين يبنون بدون عمدان وقواعد والتحميل يكون على الطابوق .. هذي الطريقة قبل كانت تستوي ولبيوت طابقين وأَكثر لكن العقليات الحين تغيرت وايد واستوت المبالغة هي سيد الموقف وهي مب في مكانها وتسبب مشاكل اذا ما صممت صح.

BUHASSEN

14-07-2015, 08:49 AM

الله يعينك العقول مصدية .. لو تبي ارسل لي مخططك المبدئي باقول لك رايي

دوم فيه حلول للشروط البالية .. تحرك بالتدريج وروح للشخص الأعلى يمكن يتفهم رايك ويستثنيك .. واحد مرسل لي من أَيام مخطط فيه بيسمنت جزئي ومحدود لمجلس ومدخله من باب صغير في السور وممر بدرج نص مغطى للمرور من فوق ونص مفتوح للتهؤئة والانارة وأَشوفه حل مثالي والله يوفقه في بنيانه لأَن مثل ما عرفت التخطيط خالص.

انا مسوي حفره عرضها متر وعمقها متر تنزلك عالبيسمنت من خارج البيت وحاط درايش كبار عشان التهويه
سبب الرفض ممكن تسكر الدرج الداخلي ويصير البيسمنت معزول وتقدر تاجره.... الله المستعان ياخي تعبت معاهم لازم يكون عندك واسطه ولا مابتمشي اموورك

BUHASSEN

14-07-2015, 08:51 AM

BUHASSEN

14-07-2015, 08:53 AM

الله يعينك العقول مصدية .. لو تبي ارسل لي مخططك المبدئي باقول لك رايي

دوم فيه حلول للشروط البالية .. تحرك بالتدريج وروح للشخص الأعلى يمكن يتفهم رايك ويستثنيك .. واحد مرسل لي من أَيام مخطط فيه بيسمنت جزئي ومحدود لمجلس ومدخله من باب صغير في السور وممر بدرج نص مغطى للمرور من فوق ونص مفتوح للتهؤئة والانارة وأَشوفه حل مثالي والله يوفقه في بنيانه لأَن مثل ما عرفت التخطيط خالص.

ممكن ترسل لي ايميلك وبرسلك المخطط والله من شهر 12 وانا معاهم
والي فوق معقد وقد وصلتله وردني

معماري قطري

14-07-2015, 01:56 PM

ممكن ترسل لي ايميلك وبرسلك المخطط والله من شهر 12 وانا معاهم
والي فوق معقد وقد وصلتله وردني

الله يعين أَحياناً توصل لطريق مسدود وتحتد تغير كل شيء .. انا أرسلت لك الايميل والله يوفقني لإبداء رأَي معقول ووسط .. ولا ننسى إِن القوانين عند التخطيط تتغير حسب الأَوضاع القائمة .. هم كشفوا البعض يؤجرون البيسمنت بطريقة بنائك وقرروا منع هذي الطريقة .. والمفروض فيه حلول قانونية كثيرة.

لو تبي حل سريع وسهل تقدر تسكر المدخل الخارجي .. تسوي باب صغير .. وتسوي اللي يبون ووقت الصج بعد الرخصة الحفار سهل وفتح باب ما فيه أسهل منه وعمل درج بسيط .. بس جهز له من الأَساس كعمل حائط عادي مكان الباب.. المفروض تُسن قوانين قوية تمنع حد يؤجر جزء من بيته ولو سواها تكون عليه جنحة ومحاكمة وازالة جبرية وغرامات تتناسب مع الفعل الممنوع.

معماري قطري

14-07-2015, 02:01 PM

شكلي على هالنصائح اشجع على المخالفات مع اني اتمنى الوصول لحل وسط أفضل للجميع.

مثال نشوفه واضح من التجاوزات الواضحة واللي ما شفنا لها حلول تخطيطية ولا قانونية للحين .. هو بنيان دور علوي بنوافذ تطل على شارع بدون ارتداد من حدود الملكية .. وهذا شفته واضح في عدة مناطق ومنظر شاذ .. بس ما سواه راعي العقار الا لحاجته الضرورية.

معماري قطري

15-07-2015, 03:50 PM

BUHASSEN

28-07-2015, 11:27 AM

إخوي بو حسن أرسلت لك فكرة مبدئية بتقليل 29 متر مربع تقريباً وشفت مخططاتك الا توزيع الأرض كامل .. وأرسلت لك اقتراحات مبدئية والله يوفقك ويتوافق على التصميم اللي اشوفه جيد بكل المقاييس واتمنى تسمح بعرضه للكل في تطوير المخططات وتمنياتي لك بالتوفيق.

تسلم اخوي بس للاسف تم رفض المقترح من اللجنه والاسباب مجهوله حاولت اتناقش معاهم مافي فايده الرد هاي قرار اللجنه لازم تتلتزم فيه الله المستعان

والي يضحك اللجنه تبي تعطي الاستشاري انذار ليش ايش السبب الله اعلم حاولت استفسر مافي فايده والله اعرف اشخاص سو نفس التصميم وتمت الموافقه عليه بس الي اعرفه تم اكثر من سنه جاب تعهد من المقاول والاستشاري والجيران
الله المستعان
هم ذاكرين ان البديل يكون حفره انجليزيه اذا عندك خلفيه عنها تقدر تفيدني اكون شاكر لك

معماري قطري

28-07-2015, 04:16 PM

تسلم اخوي بس للاسف تم رفض المقترح من اللجنه والاسباب مجهوله حاولت اتناقش معاهم مافي فايده الرد هاي قرار اللجنه لازم تتلتزم فيه الله المستعان

والي يضحك اللجنه تبي تعطي الاستشاري انذار ليش ايش السبب الله اعلم حاولت استفسر مافي فايده والله اعرف اشخاص سو نفس التصميم وتمت الموافقه عليه بس الي اعرفه تم اكثر من سنه جاب تعهد من المقاول والاستشاري والجيران
الله المستعان
هم ذاكرين ان البديل يكون حفره انجليزيه اذا عندك خلفيه عنها تقدر تفيدني اكون شاكر لك

حفرة انجليزية نفس تصميمك اللي ناوي تسويه بس بدون درج .. الدرج الداخلي يعني .. اسمها حديقة انجليزية مب حفرة .. قلت لك من البداية استشاريك ضعيف وما قدر يتفاهم معاهم واللجنة تدرس مشاريع كثيرة ويالله يالله يلحقون وخربوا الوضع اللي يسون التجاوزات ويأجرون جزء من بيوتهم.

هم تقريباً يعطونك الحل وانا طلبتك رسومات الاوتوكاد حتى اقدر اعطيك الحل اللي مثل ما يقولون المصريين ما يخرش الميه.

انت لو سويت اللي هم يبون حديقة انجليزية وبس بدون درج وأسست للدرج وحتى تقدر تسويه وتدفنه وبعد ما تستلم الرخصة تقدر تزيل الدفان وتفتح على الحوش بتقدر تسوي اللي تبيه.

آقدر اركز لك على جزئية الحل هذا بدون رسومات لكن يهمني توزيع الحوش وتهمني الصورة كاملة حتى نربط كل جزء بالثاني مثل ما سوينا لباقي التصاميم في موضوع مراجعة التصاميم.

BUHASSEN

29-07-2015, 10:12 AM

باذن الله تسلم وماتقصر
المهندس مسافر واول مايجي بخليه يرسل لي ملفات الاوتو كاد وبرسلك اياها ان شاء الله

معماري قطري

31-07-2015, 06:45 PM

باذن الله تسلم وماتقصر
المهندس مسافر واول مايجي بخليه يرسل لي ملفات الاوتو كاد وبرسلك اياها ان شاء الله

سويت انا فكرة المقترح للبيسمنت وشرحتها في التعديل على التصميمات

الدرج للحديقة الانجليزية تقدر تسويه بعدين ويكون المجلس وغرفة الطعام مستقلين تحت ويكون البيت بارتفاع معقول للدخول والخروج .. وعندك منور كافي وما تحتاج لتعقيد وموافقات صعبة هذا المقترح بيتوافق عليه ان شاء الله .. بس قول للاستشاري ليرسم الدرج اللي في الحديقة الانجليزية خله انت ترتبه بعدين .. حتى من حديد ممكن وتحط على الحديد العشب الصناعي.

BUHASSEN

04-08-2015, 09:33 AM

ارسلتلك ملفات الكاد من ايميل ثاني

معماري قطري

05-08-2015, 01:00 AM

ارسلتلك ملفات الكاد من ايميل ثاني

وصلني واشتغلت عليه شوي .. المشكلة فيه تغييرات ما ادري انت متفق عليها مع الاستشاري أو لا .. ولو سلمه الاستشاري بيتوافق عليه بهالصورة .. قبل كانت الحديقة الانجليزية تعتبر منور وكنت ممكن تنزل مستوى أرضية الدور الأرضي وما فيه داعي لعمل درايش جانبية.

شكل الاستشاري يشتغل على حسب املاآت التخطيط

BUHASSEN

06-08-2015, 08:47 AM

وصلني واشتغلت عليه شوي .. المشكلة فيه تغييرات ما ادري انت متفق عليها مع الاستشاري أو لا .. ولو سلمه الاستشاري بيتوافق عليه بهالصورة .. قبل كانت الحديقة الانجليزية تعتبر منور وكنت ممكن تنزل مستوى أرضية الدور الأرضي وما فيه داعي لعمل درايش جانبية.

شكل الاستشاري يشتغل على حسب املاآت التخطيط
هاي التعديل بعد الملاحظات الي حطوها البلديه بالنسبه للمساحه وافقو عليها بس الحفره ماوافقوا
اي والله شيسوي عطوه انذار ويبون يحاكمونه كان مرتكب جريمه مب مسوي خرايط
انا بسوي الي يبون وبعد اتمام البناء بعدل وفي نفس الوقت بحاول اتواصل مع التخطيط الرئيسي لان اعرف ناس مسوين نفس المقترح بس تابعين بلديات ثانيه وامورهم طيبه

مشكور اخوي ماتقصر الصراحه تعبناك معانا

جزاك الله الف خير والصراحه استفدت من تجاربكم والمواضيع الي انعرضت

معماري قطري

06-08-2015, 02:04 PM

هاي التعديل بعد الملاحظات الي حطوها البلديه بالنسبه للمساحه وافقو عليها بس الحفره ماوافقوا
اي والله شيسوي عطوه انذار ويبون يحاكمونه كان مرتكب جريمه مب مسوي خرايط
انا بسوي الي يبون وبعد اتمام البناء بعدل وفي نفس الوقت بحاول اتواصل مع التخطيط الرئيسي لان اعرف ناس مسوين نفس المقترح بس تابعين بلديات ثانيه وامورهم طيبه

مشكور اخوي ماتقصر الصراحه تعبناك معانا

جزاك الله الف خير والصراحه استفدت من تجاربكم والمواضيع الي انعرضت

الله يجزيك الجنة .. انا سويت لك مقترح وتبي الصج استشاريك يبي له شدة شوي .. التصميم هو مصعبه وايد خصوصاً في الارتفاعات المبالغ فيها

الله يعينك لو طبقت التصميم كما هو لدخول البيت والخروج منه وللنزول للملحق والركوب مرة ثانية للبيت .. انا لبيتي عتبة وحدة فقط وباقي الارتفاع رامب بانسياب بسيط .. ولنقل الأغراض يستعملون عربية بتواير حتى لنقل تكرم ويكرم القاريء الفضلات .. المطبخ الخارجي والستور بدون عتبات كلش بس رامب بسيط جداً.

مثل ما شرحت في ردي وتعديلاتي في موضوع التعديل على المخططات كل شيء واضح ووضحت كل شيء .. ومثل ما قلت لي في السابق التخطيط موافق على الحديقة الانجليزية لكن مب موافق على الدرج وقلت لك الحل وهم يسهلون لك ويعطونك الحلول .. بس خذ المخططات اللي سويتها وخل استشاريك يقرأ ردي ويطبقه مثل ما هو وابشر بالموافقة بسرعة .. أما يسوي نفسه مفتي ويقول لك كلام غير اللي اعرفه صدقني يبي يمشي نفسه ويخلص ولا تهمه السلبيات هذي.

BUHASSEN

23-11-2015, 11:34 AM

معماري قطري

23-11-2015, 02:03 PM

تمت الموافقه ولله الحمد الصراحه صعبين هالبلديه وصارو مايعطونك مجال تتناقش معاهم يبغون يطلعونك من الصوره باي طريقه هاي يدل علي انه ماعندهم حجه ولافهم للي يسوونه

الحفره الانجليزيه مامنها فايده بالنسبه لي وبينتلهم هالشي ان البيسمنت بيكون مجلس للرجال ماقدر اخلي مدخله داخلي بس لاحياة لمن تنادي

الله يهديهم انا بس لو اعرف الجهة الي ممكن اشتكي عليهم فيها برفع شكوي ولا بتردد

تسلم اخوي معماري وباقي الاخوان عالردود الطيبه والحين بنبدا ان شاء الله

ودعواتكم

الله يوفقك إن شاء الله .. صحيح لك ضروري كمدخل للمجلس واتذكر تصميمك .. إذا حاب اتابع أكثر مع الرسومات النهائية أرسل لي صورة أو فايل الأوتوكاد آخذ منه صورة واراجعه مراجعة نهائية ثرى عادي الاستشاري يغفل شيء ولا أشياء تكتشفها وقت التنفيذ .. ووقت التنفيذ أهم شيء تطابق الإنشائي مع المعماري.

BUHASSEN

23-11-2015, 02:32 PM

ان شاء الله باذن الله ماتقصر الصراحه جزاك الله خير

الحين المقاول بدا الحفر وان قاعد اراجع الخريطه من اول وجديد بهدوء عشان بعض التغبيرات والاخطاء الي ممكن انها يتم عليها التعديل

مشكلتي في الحفره بعد ما اسويها شلون بسكرها عشان اتمام البناء والحفره لازم يكون فيها منهولات عشان المطر والغبار او حتي غسيل الحفره الي هي بتكون مدخل للبيسمنت

وانا افكر اكنسل فكره الدرج اخليه سلوب ينزلك لي البيسمنت وحتي الباب الي يودي للملاحق الخلفيه

وبالنسبه لمدخل البيت بخليه جزء منه سلوب وجزء درج

معماري قطري

23-11-2015, 08:17 PM

تحتاج لمنهول بسيط أو تسويه بطريقة الصرف الصحي الأمريكي وتمدد مع تكرم حمام البيسمنت للتصريف البسيط هذا .. وسو درج مثل الترتيب الأخير أفضل لك سوه من الخرسانة بدون تشطيب وادفن فوقه لا من شاف ولا درى بس لتعلم حد .. مكان الدريشة اللي مقابلة الحفرة والدرج ركب طابوق حتى لو 10 سم وبعدين غطه بلوح بلايوود وحط بلاستر بيبين كأنه جدار حقيقي وتقدر تهدمه بعد اتمام البناء وتفتح على الدرج .. مكان الدرج ادفن برمل لسهولة إزالته وفوق حط حصى .. المشكلة اللي بتصادفك هي تنزيل اللقن لغرفة الطعام النوع الكبير صعب بيكون والصينية 90 سم ما عندك مشكلة.

BUHASSEN

24-11-2015, 11:10 AM

نفس الفكره الي في بالي تقريبا بس الحفره عندي في جهه والحمام تكرم في الجهه الثانيه معناتها البيب لازم يكون طويل ويمر من تحت البيسمنت كامل وهاي يخليه اكبر عرضه للضرر ويمكن مع الوقت تتجمع الاوساخ فيه وينسد فلازم متابعه دقيقه وقت التركيب والتست والدفان وحتي بعد لانتهاء من البنيان.....

وبالنسبه لغرفة الطعام الحفره عندي علي حرف l من الواجهه تنزل علي الميلس وتقدر تنزل من علي جنب لين مدخل المطعم وفيه درج بعد المطعم يطلعك لي ورا البيت باتجاه المطبخ

معماري قطري

24-11-2015, 12:37 PM

انت مصمم على التصميم القديم وهذا من حقك .. شكلك مقتنع به انا سويت التعديل وحسب اللي اذكره من التعديل ارد عليك .. وتنسيق كل هذي الشغلات أكيد يتطلب مخططات هندسية متكاملة ويتطلب اشراف ومتابعة .. البيب لازم يتمدد حسب ميلان معين وحسب مستوى حفر مناسب وصحيح لمنهول صرف الحمام ولازم ينحمي بخرسانة حوله ويكون مسدود من الطرفين .. الاحتياطات لازمة لكل الحلول.

تقدر ترجع لموضوع مراجعة المخططات المعمارية وهناك التعديل الأخير واضح .. معمارياً لكن خطوات التنفيذ والتمديدات هذي لازم يعملها الإستشاري وحسب تنسيق كل اختصاص مع وضع شروط التركيب والمتابعة من جانب الإستشاري المشرف.

معماري قطري

24-11-2015, 01:00 PM

هذي متابعة لتصميم بيتك .. وحتى ذكرت ما دام انك بتسوي البيسمنت وبتحفر بعد وسع شوي لمخزن تحت .. ما ادري إذا انت متابع أو لا بس عمل ترتيب حسب الوضع السابق بيخليك تصفى على مجلس مخشوش بدون واجهة زجاجية ومنور .. وبتخلي مدخل البيت مرتفع مثل ما وضحت في الرسومات وحتى المساحات ما كانت مرتبة صح.

http://www.qatarshares.com/vb/showthread.php?608441-مراجعة-التصاميم-المعمارية-وابداء-الملاحظات-عليها-(محدث)/page7

وهذي صورة ترتيب البيسمنت المفضل عندي انا حسب النقاش كله وتطوير التصميم مع إضافة غرفة المخزن

http://i.imgur.com/QTjIoMM.png

لو تلاحظ طوعت المعماري ليكون متناسب مع الإنشائي ودرست الوضع دراسة كاملة .. كان باقي الاستشاري يرتب لك باقي التخصصات مثل الكهرباء والصرف الصحي وتصريف المطر وباقي التشطيبات والعقد كامل حسب رغبتك .. انا كل اللي سويته النظرة العامة واللي لازم ينبني عليها .. ولو بترجع للتصميم القديم كذلك لازم الاستشاري يوضح الحلول لمشاكل التصميم اللي وضحتها خلال نقاشي المطول والمتواصل

معماري قطري

24-11-2015, 01:10 PM

بالنسبة لبداية الدرج ممكن نحولها حتى تبدأ من منتصف الحفرة النازلة وتنتهي مقابل باب غرفة الطعام .. حتى وقت تنزيل الطعام يكون مباشرة لغرفة الطعام بدون المرور على المجلس .. وهذي اللوحة الأخيرة ذكرت في السابق ممكن نعتبرها حفرة منور أو حديقة انجليزية بدون درج وبدون دفان وناخذ عليها الموافقة حسب ما هي بس نمسح الدرج وبعدين نضيفه براحتنا

BUHASSEN

24-11-2015, 02:27 PM

بالنسبه للاستور اخوي معماري مابيوافقون البلديه لان المساحه عندي فوق المسموح حاولت معاهم بس مافي فايده وبالنسبه للتصميم الحفره الي علي جنب قللت مساحتها بحيث تنتهي مع بيت الدرج

الطريقه الي اقترحتها حلوه بس ماتناسبني انا ابغي المطعم دخوله معزول عن المجلس الريئيسي عشان ترتيب الصحون والامور يكون بعيد عن الضيوف وفي نفس الوقت المطعم يكون قعده استهلاكيه للقريبين والمجلس ينفتح في المناسبات او العزايم الكبيره

جزاك الله خير عالملاحظات بالعكس انا مسجلها عندي لان يوم ارسلت للك الاوتو كاد كان المقترح في التقديم فقلت خله يمشي وتطلع الموافقه وبقدم علي طلب تعديل عشان ما يتاخر البنيان لان التعديلات بسيطه الي اقدر اسويها وممكن تتضبط وقت الشغل...
بالنسبه للدرج الي يودي عالبيسمنت انا بلغيه بعد اتمام البناء لانه من متطلبات التخطيط للاسف....

وايضا الحديقه الانجليزيه لها مساحه محدده ماتقدر تمدها علي اي عرض او طول يناسبك خلها علي الله ...

والله انا تعبت من بعض هالقوانين الي مالها اي تبرير الصراحه والحين ضيقوا عالمكاتب فصاروا مايقدرون يخالفون لانهم ياخذون انذارات وغرامات وينحطون في البلاك لست وحتي انت كمالك مالك حق تراجع وتتناقش معاهم

وصحيح المكتب الي سوالي الخرايط مب قوي لازم انا اقوله واقترح عليه كل شي وهو عقب يقدم ومب ملم بالقوانين ......

والله يسر الامور

وجزاك الله خير

BUHASSEN

24-11-2015, 02:30 PM

تصكير الحفره والطابوق هاي اتفقت مع المقاول الي يبني وان شاء الله انه ينفذ وبكون معاه خطوه خطوه حتي اني افكر اخلي البيسمنت كامل عشان حرام دام حفرت اكمل الحفر مع اني ما احتاجه كامل بس للمستقبل تقدر تخليه استور او اي شي ثاني بس ماوافقوا البلديه للاسف

معماري قطري

24-11-2015, 03:22 PM

الله يعينك غريبين والله .. شغال حالياً على تعديل تصميم بس ما يرضى راعيه ينعرض الأرض 2000 والبيسمنت فيه مواقف حق 7 سيارات ومطبخ وغرفة خادمة وغرفة غسيل واستورين .. بمساحة 511 متر مربع .. عزلنا الدرج واللفت عن منطقة المطبخ وسوينا مناور محفورة للمطبخ ولغرفة الخدم بحيث تكون الدريشة كاملة .. ومناور نص محفورة يعني بعمق أقل لمنطقة السيارات .. والخطة نسوي نظام تصريف لو فيه مياه جوفية أو مياه مطر.

المشكلة التصميم مكلف وما يعطون المالك رسمة الا دافع قيمتها وانا اشوف حتى المقاسات مغلطين فيها ولاعبين لعبتهم والله يتعلمون فينا.

واعرف شخص مسوي تصميم مقارب وتوافق على تصميمه بس تعب معاهم وهو رايح جاي.

إن شاء الله لو توافق على التصميم باعلمكم وأكيد هم عندهم لكل منطقة قواعد تصميمية معينة وهذا هو الصحيح بس يفترض تطوير القوانين لصالح الجميع