لو حد طلب منكم مثل هالمساعدة..

[مفكر قطري]

السلام عليكم ..

اعرف شاب قطري من أم عربية.. توفى ابوه و عمره 3 سنوات..
أمه غادرت البلاد بعد وفاة ابوه .. و الشاب يزورها من فترة لفترة .. . و هو عايش عند زوجة ابوه و اخوانه من الأب هنا في الدوحة.
الان هو في المرحلة الثانوية العامة و يعاني من قسوة اخوانه بحكم انه ابن الزوجة الثانية.
صار عمره 18 و انقطع الراتب اللي يستلمه من وظيفة ابوه-الله يرحمه- و الحين ما عنده مصدر دخل و مثل ما قلت محد يعتني فيه. و انا اعتبره يتيم الأبوين ..

طلب مني المساعدة و ما اعرف شلون أساعده .. فأبي رأيكم ؟
وين ممكن يروح علشان ما يضيع الولد؟
و هو يتمنى ان أمه تجي الدوحة لكن مثل ما قلت.. هو شخص واحد و ما يقدر يسوي شي..
و حتى لو جات هو في سن صغير و طالب في مدرسة وين بيسكنها؟
برأيكم ما هي النصيحة التي ممكن ان تقدم لهذا الشاب؟

[المحاميه]

عليكم السلام

الله يهدي الجميع ويفرج كربته

ممكن الولد يتجه للاستشارات العائليه

ممكن امه ترجع وهي اللي تاجر فيلا في احد المجمعات السكنيه

الله يفرج همه ويرزقه من اوسع ابوابه

[Dana’1]

أنصحه يستعين بالله بالدعاء والصبر
ثم يفكر بمستقبله ولا يفكر كثيير بقسوة اخوانه وإذا تقدر تعينه ماديا بما يسد حاجته على الأقل فترة الأختبارات على الأقل كدين لان الاغلب ماراح يرضى وخل يشد حيله ويجيب مجموع عالي يمكنه من دخول الجامعه او يقدم على وظيفه تعطيه تفرغ او تتكفل وتدعم دراسته مثل شركات البترول وغيرها يكون كون نفسه و يفرضها واذا زانت ظروفه يجيب امه ويضبط الأمور
والله يعينه ويفرج عليه

[qr95]

الله يفرج كربته ويسهل أمره ولكن السؤال ليش أمه مش موجوده معه
وحتى لوتوفى زوجها اعتقد اصبحت قطريه ولها حق السكن وراتب الزوج
لأن القانون القطري يسمح لزوجه القطري بالحصول على الجنسيه القطريه
بعد مرور 5 سنوات من تاريخ تقديم الطلب للحصول على الجنسيه ولهذا
كان المفروض من الأم عدم ترك الإبن في هذا السن وأنا انصح هذا الإبن
بالبقاء مع أخوته ومحاوله التقرب منهم بالموده والضمان الاجتماعي يصرف له مرتب
شهري
ولكن في عمر ال18 سنه اتوقع يكون جامعي فلذلك الأولى أن يعمل في إحدى الوظائف
الحكوميه ويقوم بإكمال دراسته الجامعيه فيما بعد وأسأل الله له التوفيق

[R 7 A L]

مثل ماقالت الاخت ديورر
خله حالياً يفكر بمستقبله ولا يفكر بأي شي ثاني

الان في هذا العمر وهذة الظروف ( عنق الزجاجة )
بس يكبر شوي ويخلص دراستة بيسوي كل الي يبي

[بشائر]

وعليكم السلام

جزاك الله خير أخوي على تعاطفك مع هالشاب المسكين ..

أكبر خدمة تقدمها له بما إنه حاليا في الثانوية العامة وحنا حاليا وقت امتحانات ..
أنك تعطيه مايعينه لين يتوظف كم شهر ومجرد ماتطلع شهادته يقدم على أي وظيفة أو ينظم لخدمة الجيش أو الشرطة ..
صدقني ماراح ينسى لك هالفضل طول عمره لأنك أعنته وهو بأضعف حالاته .. واعتبرها من تفريج كربة أو صدقة جارية ..
والله لو أنا مكانك ماخليته .. كن أنت الأب له والأخ والصديق علشان مايضيع .. ورب أخ لك لم تلده أمك ..واحتسب الأجر.

[A-Alansari]

اذا تقدر تعينه ماديا

لين مايخلص الاختبارات ويتخرج

وبعدها يقدم بأي مكان يشتغل بالشهاده الثنويه لين الله يفرجها عليه ويقدر يكمل دراسته الجامعيه لو يبي في المستقبل

لانه من الصعب انه يكمل دراسته الجامعيه في هالظروف وهو ماعنده دخل مادي

[JN000N]

امه مب مطلقه؟ ارمله
يعني لها حق تكون مع ولدها هني ف الدوحه
مادري هل يمشي لها من راتب ريلها والا يعطونها بيت هي وولدها

[حسن]

اعتقد يراجع الشؤن يمكن يفيدونه ويحلون له ازمته بحكم حاله خاصه ونادره الحدوث
والى هذه الدرجه وصل فيهم الاخوه من اب وقطريين !!!!

[مستوى الدعم]

إذا كان يحمل الشهادة الثانوية.. أو على وشك الحصول عليها..

يقدم على وظيفة في جهة ترعى دراسته الجامعية sponser

وهكذا يضمن الراتب الجيد الذي يمكنه من إحضار والدته.. لتعيش معه
وبما أنه في عمر 18 فمن حقه المطالبة بنصيبه من الإرث كي يستطيع السكن في مكان لائق...

الله يجمع شمله مع والدته ويعينه على مصاعب الحياة التي فتح عيونه مبكراً عليها..

[الماريّة]

الله يفك عوقه ويفرجها عليه يارب ياقادر

ومن جهه اخرى ابكي اخوااااااااانه:secret:

[ms-qtr]

نصيحة خل يقدم على جامعة برع البلد وياخذ سبونسر من الداخلية وياخذ البكلوريا
وبعدها اول ما يرجع يتزوج ويأجر بيت عن طريق الحكومة
وان شاء الله الله بيسر اموره
ويقدر بعدها يجيب امه

[سان سيمون]

السلام عليكم ورحمة الله وبركاته ،،،، وكل عام وانتم بخير

بالنسبة لموضوع الولد مثل ما اقترحوا الاعضاء لكن فيه نقطة مهمه

الولد حاليا في سن مراهقة و امتحانات ثانوية عامة و في هذا السن وهذه الظروف دائما يكون تصادم بين الاسرة و المراهق ممكن شدتهم مش كره من باب الحرص فقط و ممكن يكون صحيح فانت صبرة راح الكثير وبقى القليل ، اقل من اسبوعين ويودع هالمرحلة وبيكون هو سيد نفسه و ما شاء الله الشرطة متوفرة والجيش كذلك يقدر يبدا الطريق الصح باذن واحد احد

[بنت شرق]

السلام عليكم ..

اعرف شاب قطري من أم عربية.. توفى ابوه و عمره 3 سنوات..
أمه غادرت البلاد بعد وفاة ابوه .. و الشاب يزورها من فترة لفترة .. . و هو عايش عند زوجة ابوه و اخوانه من الأب هنا في الدوحة.
الان هو في المرحلة الثانوية العامة و يعاني من قسوة اخوانه بحكم انه ابن الزوجة الثانية.
صار عمره 18 و انقطع الراتب اللي يستلمه من وظيفة ابوه-الله يرحمه- و الحين ما عنده مصدر دخل و مثل ما قلت محد يعتني فيه. و انا اعتبره يتيم الأبوين ..

طلب مني المساعدة و ما اعرف شلون أساعده .. فأبي رأيكم ؟
وين ممكن يروح علشان ما يضيع الولد؟
و هو يتمنى ان أمه تجي الدوحة لكن مثل ما قلت.. هو شخص واحد و ما يقدر يسوي شي..
و حتى لو جات هو في سن صغير و طالب في مدرسة وين بيسكنها؟
برأيكم ما هي النصيحة التي ممكن ان تقدم لهذا الشاب؟

ليش انقطع راتبه ،،يحق له الراتب حتى يعمل ،،،،راجع وزارة العمل كان عندنا يتيم تم يستلم راتب ابوه لين حصل شغل وبموافقة وزارة العمل

[محب قطر 64]

ناقشنا موضوع جرأة الرجل بالزواج بالثانية باإستراحة وأيد كثير من الشباب الراي
يكون زعل وحقد وغل بين الاولاد في بعض الحالات
يكمل الثانوية ويدخل العسكرية او الشرطة
المشكلة انه عاوز سكن لين يتخرج

[دااانة قطر]

السلام عليكم ..

اعرف شاب قطري من أم عربية.. توفى ابوه و عمره 3 سنوات..
أمه غادرت البلاد بعد وفاة ابوه .. و الشاب يزورها من فترة لفترة .. . و هو عايش عند زوجة ابوه و اخوانه من الأب هنا في الدوحة.
الان هو في المرحلة الثانوية العامة و يعاني من قسوة اخوانه بحكم انه ابن الزوجة الثانية.
صار عمره 18 و انقطع الراتب اللي يستلمه من وظيفة ابوه-الله يرحمه- و الحين ما عنده مصدر دخل و مثل ما قلت محد يعتني فيه. و انا اعتبره يتيم الأبوين ..

طلب مني المساعدة و ما اعرف شلون أساعده .. فأبي رأيكم ؟
وين ممكن يروح علشان ما يضيع الولد؟
و هو يتمنى ان أمه تجي الدوحة لكن مثل ما قلت.. هو شخص واحد و ما يقدر يسوي شي..
و حتى لو جات هو في سن صغير و طالب في مدرسة وين بيسكنها؟
برأيكم ما هي النصيحة التي ممكن ان تقدم لهذا الشاب؟

وعليكم السلام ورحمة الله وبركاته



الله يفرج همه ويهدي أمه وإخوانه


بس ليش انقطع الراتب وهو لازال طالب؟؟؟
يحق له يطالب بسهمه من الراتب
إلا إذا الوصي واكيد هو أحد إخوانه الأكبر مكوش على كل شي
والمسكين مب قادر يطلب حقه

له حق يجيب أمه ويقدم لها عال جنسيه بحكم أنها أرمله وبالتالي لها نصيب من الراتب



الله العالم ايش ظروف الأم وايش ظروفه مع اخوانه

[المحاميه]

الراتب بس حق القاصر وبتمام سن الثامنة عشر يكون مش قاصر وماله حق

ماله الا رب العالمين
الدعاء
وصحيح كلام الاعضاء لازم يركز ف دراسته ويترك هالامور على جنب عشان جذي اقترحت يروح الاستشارات عشان الدعم المعنوي بعد بما انه في سن المراهقه

الله يفرجها عليه

[Al-Kuwari]

الله يفرج همه

الشيخ ممكن تخبرني كم نسبته ؟ وهل عنده ايلتز

كذلك هل هو بيتخرج الصيف هذا ؟؟

[بنت شرق]

الراتب بس حق القاصر وبتمام سن الثامنة عشر يكون مش قاصر وماله حق

ماله الا رب العالمين
الدعاء
وصحيح كلام الاعضاء لازم يركز ف دراسته ويترك هالامور على جنب عشان جذي اقترحت يروح الاستشارات عشان الدعم المعنوي بعد بما انه في سن المراهقه

الله يفرجها عليه

ممكن يطلب استثناء ويعطونه الراتب لين يشتغل ،،،وماراح يقصرون معاه

[koketa]

ممكن تساعده انه يكمل دراسته الجامعيه على مؤسسه مثلا كبعثه

هاي من الناحيه الماديه

وامه ممكن تيجي ويأجر شقه براتب البعثه

[الكفــــــو]

يارب كن مع هذا الشاب حتى الفرج

لماذا لم يبدأ بالقنوات الرسمية في البلد ( الشؤون الإجتماعية ، مركز الإستشارات العائلية ، مؤسسة الشيخ عيد ، راف ، ... ألخ )

لماذا لم يتم الإستعانة با أهل الحل والعقد في البلد للإصلاح مع الإخوان ( الدُعاة و المشايخ القطريين )



نحن معك ومعه حتى بر الأمان ماديا و معنوياً ( بما تجود به الأنفس ) فلا تحرمنا الأجر

[بشائر]

نحن معك ومعه حتى بر الأمان ماديا و معنوياً ( بما تجود به الأنفس ) فلا تحرمنا الأجر

أخوي الله يبارك لك في رزقك ويجزيك خير على نواياك الطيبة .. ويفتح لك من أوسع أبواب رحمته
لكن مانبي نفتح باب لمثل هالمواضيع في المنتدى .. لأسباب لا تخفى على الجميع ..

صاحب الموضوع يعرف الشاب شخصيا ويقدر يتعامل مع الموضوع بشكل مباشر إما بمساعدته بنفسه أو بشرح وضعه لمن حوله
من اللي يعرفونه عن قرب وطلب المساعدة له .. أو عن طريق الجهات الحكومية والدولة ماتقصر لله الحمد هو قطري وبإذن الله ماعليه خوف ..
أضمن للمساعدة أن تكون في محلها .. والا شيفكنا بعدين ؟!

[مفكر قطري]

السلام عليكم،

اعتذر عن عدم متابعتي للموضوع نظرا لأنشغالي..

اشكر كل الأعضاء على النصايح و أقول حق اللي اعرضوا
مساعدتهم للشاب يعطيكم العافية و ما تقصرون بس انا ان شاء الله
بكون معاه و بساعده لين يعدي من هالمرحلة ..

على كلامه ان مسوي زين في الامتحانات و قاعد اقدم له حاليا
على اكثر من جامعة برع .. و ان شاء الله بساعده علشان يحصل سبونسر..

شكرًا لكم كلكم

[مهرة]

..

الله يوفقه ان شاءالله وييسر له من عباده الصالحين ويجزاك خير اخونا مفكر وان شاءالله تنال ثمار هالخير في الدنيا والآخره..

موفقين يارب*

[بشائر]

السلام عليكم،

اعتذر عن عدم متابعتي للموضوع نظرا لأنشغالي..

اشكر كل الأعضاء على النصايح و أقول حق اللي اعرضوا
مساعدتهم للشاب يعطيكم العافية و ما تقصرون بس انا ان شاء الله
بكون معاه و بساعده لين يعدي من هالمرحلة ..

على كلامه ان مسوي زين في الامتحانات و قاعد اقدم له حاليا
على اكثر من جامعة برع .. و ان شاء الله بساعده علشان يحصل سبونسر..

شكرًا لكم كلكم

الله يجزيك خير على مانويت ويجعله في موازينك ..

[نفسي عزيزه]

اسال الله لك وله وللجميع التوفيق والسداد