وين اشتكي على جاري بخصوص ازعاج عمال البنيان

[المحقق كونان]

السلام عليكم ،،،

جاري يبني فيلا والبوكلين والورور يحفرون من الساعة 4:30 الصبح وأحيانا 5 الصبح ويستمر لين الساعة 6 المغرب وأحيانا لين 12 الليل

ومسببين لي ازعاج وصداع وحتى يوم الجمعة والسبت يحفرون

الي اعرفه بان مواعيد العمل في المناطق السكنية يكون من 6:30 الصبح وحتى 6 المساء والسبت من 8 وحتى 12 والجمعه المفروض مايشتغل

كلمت المقاول وسكت مره واشتغل الساعة 6 وكلمت صاحب البيت وقال كلم المقاول

وين اشتكي عليهم ؟؟

[ضوى]

اشلون تبي تبدي جيرتك معاه بشكوى وتخلي النفوس تشيل ، نصيحتي بهالايام الفضيله تصبر والله بياجرك خير يبي يخلص بيته اكيد عشان جذي يشتغلون ليل نهار ، عانينا كثيييير ولا زلنا ونصدع بس شنسوي بيكونون جيران كيف نبدا حياتنا معاهم بمشاكل

[JN000N]

الله يهديك تشتكي عليه عشان المقاول يبني ف اوقات غلط
زين خذ رقمه واتصله انت وقوله انهم يبدون يحفرون ف اوقات غلط وان المقاول ماسمع شورك
اما الريال لحين ماسكن توه يبني تعالو وين اشتكي عليه خوش استقبال في ذمتي
اللي بيساعدك اصلا عالشكوى غلطان
كلمه هو والمقاول مب مره اكثر من مره
وبين لهم انك مستاذي من الصوت ف اوقات غلط واذا كلش كلش ماكان في تجاوب قول لصاحب البيت انك مضطر تشتكي < وهذي عاد تكون اضعف الايمان

[SeniorTrader]

والله اني مريت بحالتك كان ودي اسدد البوكلن ببزوكه

الله يعينك الموضوع مش هين التلوث الضوضائي يعفس النفسيه

[khaldoon]

يوم 15/06/2015 راح يبتدي المنع للعمل من الساعه 11 للساعه 3:30 في الأماكن المكشوفه و انت لسه جارك ببتدي يعني مكان مكشوف و حتى تاريخ 31/058/2015 و كمان جاي رمضان فاكيد راح يضطر يشتغل بالليل للصبح....للعلم فقط

[khaldoon]

على العموم عمال البوكلين و الحفريات بيشتغلوا بس من الفجر لل 11 بالكثير بس العمال بالليل بيجهزوا القواعد يعني نجاره و حداده و ازعاج

[حمد 2002]

أول شيء اعرف متى المواعيد المسموح بها بالعمل واذا كان مخالف !!


اتصل بالشرطة أو الفزعة وايجون وايتفاهمون معاهم ..


لاتسكت عن حقك ياخوك ..


أهم شيء راحتك النفسيه ..

[QtrGate]

خذ رقم صاحب العقار من المقاول

وكلمة بالطيب وعطه الأوقات الي تبي تنام فيها

[المحاميه]

دامك كلمتهم وماستجابوا فماقدر اقولك لاتشتكي
والله يعينك

شكلهم مستعيلين :)

[الدبلوماسي]

ياخوي استحمل مب حلوه تشتكي على جارك بسبه كم يوم ازعاج
وعلى فكره الحفر مايطول وايد أسبوع الى 9 أيام

[الكفــــــو]

من الأولى بالراحة وحق الجيره ( الساكن القديم أو اللي يبني )

إذا كلمته اللي يبني ( مقاول أو مالك ) فأنت ماقصرت و رأيتك بيضاء

و الواجب في الإحترام و مراعاة حق الجار ( اللي يبني ) والجماعة هنا دخلوا في نيتك وكلوك بقشورك .

من واقع خبرتي و عملي فالك الحق بالشكوى لدى ( البلدية ) ولا احد يلومك لأنهم لم يلتزموا بوقت العمل ولم يلتزموا معك ولم يتفهموا حق الجيرة

[بصمة قطرية]

من حقك تشتكي بالذات إنك كلمتهم و ما فاد ..
في أوقات محددة للبناء مب طول اليوم ..
يعني الشخص ما يرتاح في بيته ما ينام ..!!
من ست سنين البيت اللي جنبنا يبنون
و يومياً نخم الحوش ننظفه لأن كل شي يطيح في حوشنا
مرة مرتين ثلاث مصخت السالفة ..
آخر شي انكت سميت على الطوفة و الأرض و دريشة من درايش البيت ..
بوالعيال راح وجاب العمال قال لهم كل يوم هاي حالتنا معاكم
نظفوا كل شي و الا شفت شي ببلغ عليكم
تسنعوا بعدها ..