المطبات قدام البيوت

[الحياة الخالدة]

السلام عليكم و رحمة الله

المطبات في الشارع قدام البيت ( عشان تخفيف السرعة )
وين نقدم عليها بالضبط عشان يسوونهــــــا ؟؟

و جزاكم الله خير مقدماً

[حمد 2002]

http://raya.com/news/pages/3d361b16-a26a-495a-be08-33fe1d149b8c

تنتقل لها اختصاصات لجنة السلامة المرورية .. عبد العزيز السادة لـ الراية:لجنة خاصة للمطبات الصناعية في أشغالاللجنة تتلقى طلبات إنشاء المطبات وفقا للمواصفات
كتب - محمد حافظ:

كشف المهندس عبد العزيز السادة رئيس قسم عمليات السلامة والتحكم المروري بإدارة تشغيل وصيانة الطرق في هيئة الأشغال العامة "أشغال" عن تشكيل لجنة خاصة للمطبات الصناعية للطرق لأول مرة، لتنتقل لها كافة اختصاصات لجنة السلامة المرورية بالإدارة العامة للمرور والتي كانت معنية في السابق بالترخيص والموافقة على إنشاء المطبات الصناعية في الطرق الرئيسية والشوارع الداخلية.

وقال السادة، في تصريحات لـ الراية: إن تشكيل لجنة المطبات الصناعية للطرق يهدف للقضاء على ظاهرة انتشار المطبات الصناعية غير المطابقة للمواصفات والتي يتم إنشاؤها بصورة عشوائية خاصة في الطرق الداخلية من قبل أفراد وهيئات، ما يسبب خللا في السلامة المرورية على الطرق وأضرارا للأفراد والمركبات بصورة عامة، علاوة على ما يمثله من تعد سافر على أملاك الدولة والمنفعة العامة وتشويهها بتلك المطبات العشوائية.

وأوضح أن اللجنة ضمت في تشكيلها ممثلين عن إدارات التصاميم والإنشاءات وإدارة تشغيل وصيانة الطرق بأشغال، علاوة على ممثلين من إدارة السلامة المرورية بوزارة الداخلية .. وتعمل اللجنة وفق آلية عمل محددة تقوم بتلقي طلبات إنشاء المطبات الصناعية من الأفراد والهيئات عبر وسائل الاتصال بخدمة العملاء ودراستها والعمل على إنشائها طبقا للمواصفات والمعايير الخاصة بإنشاء المطبات الصناعية، بالإضافة إلى عمل مراجعة شاملة لكافة المطبات الصناعية الموجودة في الدولة وإزالة المخالف منها وإعادة إنشائه - إذا تطلب الأمر - علاوة على تلقي شكاوى المواطنين عن المطبات المخالفة في الشوارع الرئيسية والداخلية والعمل على تقنين أوضاعها بصورة تضمن تحقيق أعلى درجات الأمن والسلامة المرورية للأفراد والمركبات إضافة إلى ذلك تفعيل القرارات الخاصة بمخالفة المعتدين على الطرق ممن يقومون بإنشاء مطبات بدون ترخيص.

•200 طلب من أفراد وهيئات لإنشاء مطبات
قال المهندس عبد العزيز السادة إن اللجنة تلقت حتى الآن نحو 200 طلب لإنشاء مطبات صناعية من أفراد ومدارس وهيئات حكومية وخاصة، وهذا لا يعني أن مجموع المطبات التي ستعمل اللجنة على إنشائها 200 مطب، بل الرقم يفوق ذلك بكثير حيث إن كل طلب قد يحتوي على أكثر من مطب وهو رقم كبير من الناحية العملية خاصة وأن اللجنة تم تشكيلها منذ فترة وجيزة.

وأشار إلى أن السنوات الماضية شهدت تشويها متعمدا لكافة الشوارع بسبب عشوائية إنشاء المطبات بالمخالفة للقانون والمواصفات الفنية الخاصة بها، حيث كان كل شخص يقوم بإنشاء مطب أمام منزله أو شركته دون الحصول على موافقة الجهة المسؤولة أو الالتزام بالمواصفات الفنية للمطب بما يحقق السلامة المرورية على الطريق، وبالتالي دعت الحاجة لإنشاء هذه اللجنة للتصدي لكافة المخالفات المتعلقة بهذا الأمر خاصة ما يتعلق بالتوعية الجماهيرية.

وأكد أن الغرض من إنشاء المطبات ليس توقيف السيارة وإنما كسر سرعتها وتخفيفها بما يسمح بتحقيق الأمان للمشاة في تلك المنطقة أو تلافي التقاطعات وتسهيل المرور، وبالتالي هناك مواصفات فنية خاصة بنوع المطب والغرض منه ومساحته وارتفاعه وغيرها من الأمور الفنية الأخرى. وأضاف: هناك نوعان من المواصفات الفنية المعتمدة لدى أشغال والخاصة بالمطبات وفقا للغرض من إنشائه النوع الأول هو المطب الأسفلتي ويستخدم في تخفيف السرعة والثاني هو مطب الانترلوك الخاص بتسهيل مرور المشاة على الطرق.

•مواصفات متعددة للمطبات الصناعية
أكد المهندس عبد العزيز السادة أن أهم مواصفات المطبات الأسفلتية أن تكون المسافة بين المطب والآخر لا تقل عن 200 متر بالإضافة إلى صبغه بالألوان الأصفر والأسود بشكل عرضي بالإضافة إلى وضع طحين الزجاج اللامع لعكس الإضاءة على المطب لإرشاد قائد المركبة بوجود مطب، فضلا عن وضع علامات مرورية في أماكن رؤية واضحة قبل 10 أمتار أو 15 متراً من المطب ويتم تكرارها حتى مترين من المطب بالإضافة إلى وضع مصدات عيون القط قبل المطب.

أما مطبات الانترلوك أو Speed table فلها أكثر من نوع حسب كثافة المرور في الشارع وعرضه والسرعة المقررة عليه، وهناك عدة أشكال من مطبات الانترلوك منها 2 - 4 - 4 و3 - 4 - 3 وهو ما يحدد ارتفاع المطب واستقامته ومنحدره بما يسمح بكسر سرعة السيارة أو تهدئتها على المطب بما يسمح بمرور المشاة بشكل آمن، إضافة إلى طلاء المطب باللون الأبيض على شكل أسهم ووضع عيون القط التحذيرية بشكل طولي قبل المطب بمساحة كافية وفقا لمساحة الشارع والسرعة المقررة عليه لا تقل عن متر واحد ووضع علامات مرور تحذيرية في أماكن رؤية واضحة على الجانب الأيمن للطريق لتنبيه قائدي المركبات بوجود مطب صناعي قبله بمسافة 10 أمتار على الأقل تتكرر في حال المنحنيات.

وأشار إلى أن اللجنة عليها جهد كبير في إعادة الانضباط للشارع وتحقيق أعلى معدلات السلامة المرورية عليه من خلال عمل مسح شامل للمطبات المخالفة وإزالتها ومراجعة الطلبات التي تتلقاها الهيئة أو التي تحال إليها من المرور والبلديات والعمل على تنفيذها إذا ما دعت الضرورة لذلك كون اللجنة هي الجهة الوحيدة المنوط بها الآن البت في كافة طلبات المطبات.

[الحياة الخالدة]

حمد .. جزاك الله خير
بس كمل جميلك و عطني الزبدة
وين لي خلق أقرا هالمعلقة

[Rider]

قسم على ماظن الجودة والسلامة في إدارة المرور

[الحياة الخالدة]

قسم على ماظن الجودة والسلامة في إدارة المرور

آهاااا
تعتقد هل في إمكانية للتقديم أون لاين عن طريق موقعهم ؟؟

و جزاك الله خير

[Miss]

اشغال او المرور

[R 7 A L]

ممكن تشرحين لنا الاسباب

[حمد 2002]

حمد .. جزاك الله خير
بس كمل جميلك و عطني الزبدة
وين لي خلق أقرا هالمعلقة

ويجزاج بمثله ..


الزبده بالمقاله انه اشغال جهه الاختصاص ..

[الحياة الخالدة]

اشغال او المرور

تسلمين يا مس
ممكن إجابة وحدة :nice:

[الحياة الخالدة]

ممكن تشرحين لنا الاسباب

هههههههه رحال ما تخلي سوالفك
ترا الموضوع استفسار مب موضوع للنقاش في العام

بس ما يمنع إني أجاوبك

يعني الأسباب هي نفس الأسباب اللي تنحط لها المطبات قدام بيوت الناس :

لأن السيارات مسرعة في الفريج تقول عبالهم في حلبة سباق
واحنا خايفين على بيوتنا و عيالنا ونفوسنا
والا هم قلعتهــــــم :anger1:

حتى القطاوة قاموا يخافون يعبرون الشارع :weeping:

[الحياة الخالدة]

ويجزاج بمثله ..


الزبده بالمقاله انه اشغال جهه الاختصاص ..

أيواااااااا
شكراً لك أخي الكريم

[R 7 A L]

هههههههه رحال ما تخلي سوالفك
ترا الموضوع استفسار مب موضوع للنقاش في العام

بس ما يمنع إني أجاوبك

يعني الأسباب هي نفس الأسباب اللي تنحط لها المطبات قدام بيوت الناس :

لأن السيارات مسرعة في الفريج تقول عبالهم في حلبة سباق
واحنا خايفين على بيوتنا و عيالنا ونفوسنا
والا هم قلعتهــــــم :anger1:

حتى القطاوة قاموا يخافون يعبرون الشارع :weeping:



معليش سامحيني على السؤال
سألت بس على شأن الكل يعرف أن الناس غصب موب طيب تبي تركب مطبات للاسباب المذكورة اعلاه
تصدقين الكل قام يسرع كبير وصغير رجال ومره مواطن واحنبي
لذا لاحد يستغرب اذا الناس طالبت بمطبات قدام بيوتها
اتمنى من اشغال مع كل شارع جديد في الاحياء السكنية يركبون مطبات من غير لاحد يطلب .

[الحياة الخالدة]

معليش سامحيني على السؤال
سألت بس على شأن الكل يعرف أن الناس غصب موب طيب تبي تركب مطبات للاسباب المذكورة اعلاه
تصدقين الكل قام يسرع كبير وصغير رجال ومره مواطن واحنبي
لذا لاحد يستغرب اذا الناس طالبت بمطبات قدام بيوتها
اتمنى من اشغال مع كل شارع جديد في الاحياء السكنية يركبون مطبات من غير لاحد يطلب .

مسموح أخوي .. أتغشمر معاك
و كلامك كله صحيح
بس لازم يطلع لك واحد يتفلسف .. و هاذي هي الدنيا

اللي يده في النار .. مب مثل اللي يده في الماي

[بو راشد 1]

لو احد يتكرم و يوضح بالتفصيل كيفية تقديم طلب المطبات (شامل المستندات المطاوبه و وصف مكان التقديم) بنكون شاكرين له.

[توشيبا]

http://www.qatarshares.com/vb/showthread.php?249435-%C7%E1%E3%D8%C8%C7%CA-%C7%E1%D5%E4%C7%DA%ED%C9


ارسلي له خاص يمكن يفيدج اكثر



بس انا اخبر اول نجيب هندي من الشارع نقوله صديق معلوم جبل سوي واحد منيه

[الحياة الخالدة]

لو احد يتكرم و يوضح بالتفصيل كيفية تقديم طلب المطبات (شامل المستندات المطاوبه و وصف مكان التقديم) بنكون شاكرين له.

إن شاء الله تحصل الإجابة من خلال الموضوع

[الحياة الخالدة]

http://www.qatarshares.com/vb/showthread.php?249435-%C7%E1%E3%D8%C8%C7%CA-%C7%E1%D5%E4%C7%DA%ED%C9


ارسلي له خاص يمكن يفيدج اكثر



بس انا اخبر اول نجيب هندي من الشارع نقوله صديق معلوم جبل سوي واحد منيه

الأخ جاجاسم ما يقصر جزاه الله خير .. راح أدز له خاص بإذن الله

أما عاد سوي واحد جبل منيه
أنا بطبق اقتراحك .. بس لو جاتني مخالفة بحولها عليك .. و بتكون مشاركتك دليل موثق ضدك :nice:

جزاك الله خير .. و جاري تنفيذ اقتراحاتك

[حليتان*]

راسلو عضو المجلس البلدي !

[الحياة الخالدة]

راسلو عضو المجلس البلدي !

واللي ما يعرفه ولا درا عنه

[حليتان*]

الي يسال ما يضيع يييه


دشي تويتر المجلس البلدي وله موقعهم وبتعرفينه خخخخ

وراسليه اكيد بتحصلينه فتويتر

[العقل المدمر]

http://www.qatarshares.com/vb/showthread.php?249435-%C7%E1%E3%D8%C8%C7%CA-%C7%E1%D5%E4%C7%DA%ED%C9


ارسلي له خاص يمكن يفيدج اكثر



بس انا اخبر اول نجيب هندي من الشارع نقوله صديق معلوم جبل سوي واحد منيه

وانا اقول ليش مطباتنا تنافس قمة افرست :eek5:

[العلياا]

وعليكم السلام

تأمرين أمر اطرش لج دريولة الفريج مسوين مطبتين بس من النوع الفاخر
تكسر الظهر :)

اعتقد اشغال والله اعلم

[ولد العرب]

حمد .. جزاك الله خير
بس كمل جميلك و عطني الزبدة
وين لي خلق أقرا هالمعلقة

هههههههههههههههههههههههههههههههههه الله الله

تذكرت بوحارب اللي يرده لنا

[الحياة الخالدة]

الي يسال ما يضيع يييه


دشي تويتر المجلس البلدي وله موقعهم وبتعرفينه خخخخ

وراسليه اكيد بتحصلينه فتويتر

و تهقى إذا عرف أن احنا ما انتخبناه .. بيمشي لنا في الموضوع :nice:

و بعدين احنا ليش نطولها و هي قصيرة
يعني وين إذنك يا حبشـــــي

[الحياة الخالدة]

وعليكم السلام

تأمرين أمر اطرش لج دريولة الفريج مسوين مطبتين بس من النوع الفاخر
تكسر الظهر :)

اعتقد اشغال والله اعلم

هههههههههه ما يامر عليج ظالم
لا فديتج مشكورة .. سياراتنا و ظهورنا مب ناقصة تكســـــر :anger1:

في نهاية الموضوع بشوف كم واحد يقول اشغال و كم واحد المرور :rolleyes2:

[توشيبا]

الأخ جاجاسم ما يقصر جزاه الله خير .. راح أدز له خاص بإذن الله

أما عاد سوي واحد جبل منيه
أنا بطبق اقتراحك .. بس لو جاتني مخالفة بحولها عليك .. و بتكون مشاركتك دليل موثق ضدك :nice:

جزاك الله خير .. و جاري تنفيذ اقتراحاتك

اذا خايفه من المخالفه مافي الا الخطه b

اول اسبوع حد بيشتكي عليكم هذا اذا حد اشتكى بالاساس

بعد ثلاث سنوات توصلكم ان عليكم شكوى ومخالفه

روحو قولو لهم مب احنا سويناها مانعرف لي ان من كثر مطباتهم مايعرفون من يسوي ومن مايسوي

طلبو برد اعتبار

اربع مطبات زياده وبشكل رسمي بعد

واذا جاكم البتاني علي عراوي قولو له سوي جبل وسط قدام جبل حفره عشان اليهال يسبحون فيها اذا نزل المطر

يطلعون فوق المطبه وقفز في الحفره

[توشيبا]

وانا اقول ليش مطباتنا تنافس قمة افرست :eek5:

اول كنت ساكن في شعبيات خليفه

جبت هندي قلت صديق معلوم جبل سوي واحد منيه

سوا لي مطبه

بعد صلاه العشى حصلت ابوي متعلق فوقها بسيارته

رحت شليتها وسوينا وحده xl

[العلياا]

ههههههههههههههههههههه

اسم الله على ظهوركم وعلى سيايركم
موفقه يالغالية

[حمد 2002]

اختي الحياه اذا سويتوا مطبه .. هالله هالله بالعزيمه الدسمة ههه ههههه

[حمد 2002]

ههههههههههههههههههههه

اسم الله على ظهوركم وعلى سيايركم
موفقه يالغالية

لاتطنزين قولي الحمد لله والشكر هههههه ترى الدنيا دواره

[العلياا]

لاتطنزين قولي الحمد لله والشكر هههههه ترى الدنيا دواره

متى تطنزت انا ضحكت ع رد من الردود :rolleyes2:

يستاهل الحمد والشكر :)

[ANONYMOUS]

راسلي اشغال ب استفسارج في توتر .. متعاونين عن تجربه

[الحياة الخالدة]

راسلي اشغال ب استفسارج في توتر .. متعاونين عن تجربه

تسلم يا أنونيموس
ما عندي تويتر :nice:
بس بشوف طريقــــة ثانية أراسلهـــــم

[شمعة الدوحه]

انا عانيت نفس مشكلتج وكنت ابي اعرف وين اقدم .. كان فيه تقاطع من 4 اتجاهات ورى بيتنا وصارت فيه حوادث خشنه وطرشت ايميل لموقع الداخليه اثباتات بالصور
كلمت السلامه المروريه وطرشوا شخص يعاين المنطقه بعدها خذوا لي الموافقه
تحول الموضوع بعدها للبلديه والوالد خذ الاوراق وداها اشغال
خلصو الموضوع بسرعه وماقصروا حتى ابوي خلاهم يزيدون عدد المطبات
يمكن الموضوع خذ سنه

[وطن]

انا عانيت نفس مشكلتج وكنت ابي اعرف وين اقدم .. كان فيه تقاطع من 4 اتجاهات ورى بيتنا وصارت فيه حوادث خشنه وطرشت ايميل لموقع الداخليه اثباتات بالصور
كلمت السلامه المروريه وطرشوا شخص يعاين المنطقه بعدها خذوا لي الموافقه
تحول الموضوع بعدها للبلديه والوالد خذ الاوراق وداها اشغال
خلصو الموضوع بسرعه وماقصروا حتى ابوي خلاهم يزيدون عدد المطبات
يمكن الموضوع خذ سنه

أنا عيزت اتصل السلامة المرورية
ابي ابلغ عن مطب مخالف وخطر جدا
على مدخل الشارع
يعني من شارع عام سرعته 100 الى شارع خدمات ..
تدخلين في وجهج المطب

ولا حياة لمن تنادي

[وطن]

الحياة الخالدة
أشغال جهة تنفيذية

لازم موافقة من المرور أول

[حليتان*]

بل ليحن حطو لكم مطبات وين فريجكم

[شمعة الدوحه]

أنا عيزت اتصل السلامة المرورية
ابي ابلغ عن مطب مخالف وخطر جدا
على مدخل الشارع
يعني من شارع عام سرعته 100 الى شارع خدمات ..
تدخلين في وجهج المطب

ولا حياة لمن تنادي

حيا الله وطن :victory:

شوفي انا موضوعي طول وشكثر اتصلت لهم
كلمي مرور خليفه يحولونج عالسلامه المروريه المشكله نسيت الرقم
المهم قلت لهم المشكله وتميت وراهم وراهم
وحتى ان حطوني مواطن نشط :tease:
يستانسون لين تبلغين عن اشياء خطره
بس تعالي شوفي التنفيذ متى تتنقعين ولازم تسندرينهم :rolleyes2:
المهم واحد هناك كان يتابع معاي اسمه غانم وماقصر صراحه طلع لي الموافقه من الخرجي .. واوصلتني بالفاكس
وبس والله ابوي خذ الورقه ووداها اشغال
ماشاء الله ماتأخروا اشغال والحق يقال
اللي نقعني موافقة المرور

[وطن]

كلمتهم
و كلمت مدير السلامة المرورية يا شمعة
ولا في فايدة


ما غير ادعي ربي كل ما مريت على هالمطب

و اقول حسبي الله ونعم الوكيل
في اللي حط هالمطب


بيدمر لنا الهيدروليك
و اذا ضربت بريك ع الأخير اخاف حد داش من الشارع العام يطيرني انا و سيارتي

لان الدخول يكون تقريبا بسرعة الشارع

[بريق الحق]

كلمت واحد شغال فالمرور يقولي الموضوع عند اشغال
وكلمت الي في اشغال يقولي عند المرور

[الحياة الخالدة]

يعني الطاسة ضايعة ؟؟!!

[معماري قطري]

إحنا كلمنا عضو المجلس البلدي وهو قال صعبة بس حاولوا مع الشرطة .. فيه لجنة خاصة في المرور وجاوا عاينوا وحددوا مطبين بدال 4 مطبات .. بعضهم يجون مسرعين حتى على المطبات ويحبون المناقز في السيارات .. يبي لهم كيمرات مرورية تضبط اللي يخالف بعدين الكل بيتأَدب .. باص كروة يسرع مثلاً سرعة جنونية وهو داخل فريج ومنطقة سكنية.

[بريق الحق]

يعني الطاسة ضايعة ؟؟!!
ضايعه ولا راح تحصلينها

[شمعة الدوحه]

كلمتهم
و كلمت مدير السلامة المرورية يا شمعة
ولا في فايدة


ما غير ادعي ربي كل ما مريت على هالمطب

و اقول حسبي الله ونعم الوكيل
في اللي حط هالمطب


بيدمر لنا الهيدروليك
و اذا ضربت بريك ع الأخير اخاف حد داش من الشارع العام يطيرني انا و سيارتي

لان الدخول يكون تقريبا بسرعة الشارع

انزين انا اقولج شالحل صوري الشارع والمطب
واكتبي فيه تقرير وبعدها طرشيه على موقع الداخليه وحطي رقم تلفونج
وراح يتصلون فيج
واذا تبيني اتدخل فالموضوع انا حاضره نعين ونعاون :telephone:
رقمه للحين مسيف عندي اللي طلع لي موافقة المرور اقدر اعطيج اياه تكلمينه او تخلين حد من هلج يكلمه
تخيلي اهما كانوا موافقين على مطبتين بس
بس ابوي لما راح اشغال طلب 4 عشان كلهم يضربون بريك ومحد فيهم يكون مسرع .. ووافقوا

[بومحمد المطاوعه]

تصدقين
انا مقدم ف اشغال من شهر 8
2014

ولليوم ماحطو المطبه

شكلي بصلخهم اليوم العصر ف تويتر

لاني زهقت من الناس الغير محترمه ف الفريج
يسرعون كأن حد لاحقهم بنعال الله يعزكم

صج صج بعض الناس قلة حيا فيهم ولا يحشمون بيوت الناس

للأسف بس

[شمعة الدوحه]

تصدقين
انا مقدم ف اشغال من شهر 8
2014

ولليوم ماحطو المطبه

شكلي بصلخهم اليوم العصر ف تويتر

لاني زهقت من الناس الغير محترمه ف الفريج
يسرعون كأن حد لاحقهم بنعال الله يعزكم

صج صج بعض الناس قلة حيا فيهم ولا يحشمون بيوت الناس

للأسف بس

لازم يكون عندك موافقه من المرور اول

[بومحمد المطاوعه]

لازم يكون عندك موافقه من المرور اول

ابشرج الموافقه عندي من سنتين
بس الموضوع تحول على اشغال
الحين التقديم ف اشغال

بس ماعندي واسطه علشان يحطون لي
بتكلم اليوم ف تويتر وبسوي لهم منشن

[وطن]

انزين انا اقولج شالحل صوري الشارع والمطب
واكتبي فيه تقرير وبعدها طرشيه على موقع الداخليه وحطي رقم تلفونج
وراح يتصلون فيج
واذا تبيني اتدخل فالموضوع انا حاضره نعين ونعاون :telephone:
رقمه للحين مسيف عندي اللي طلع لي موافقة المرور اقدر اعطيج اياه تكلمينه او تخلين حد من هلج يكلمه
تخيلي اهما كانوا موافقين على مطبتين بس
بس ابوي لما راح اشغال طلب 4 عشان كلهم يضربون بريك ومحد فيهم يكون مسرع .. ووافقوا

طرشي لي رقمه اختي

أرسلت للمرور ايميل وفيه الصور
وقالوا بنتابع الموضوع
و لا شفت شي

[شمعة الدوحه]

طرشي لي رقمه اختي

أرسلت للمرور ايميل وفيه الصور
وقالوا بنتابع الموضوع
و لا شفت شي

بدزه لج .. ابشري

[بو خليفه 123]

اتصلت في صعيدي جزاه الله خير اسمه حسنين

ب 800 ريال سوالي مطبتين عند بيتي مع رسم الوان التحذير الصفراء والبيضا (الفسفوريه)

اشغال مشغوله بأغلاق الشوارع العامه والمرور مشغولين بالمخالفات والرادارات .. جايين انتوا تبون يحطون لكم مطبات , الله يهديكم .