مراجعة التصاميم المعمارية وابداء الملاحظات عليها (محدث) [الأرشيف]

معماري قطري

10-06-2015, 12:51 AM

هذا موضوع جديد أَرجوا أَن يكون متواصل لمراجعة تصاميم الإِخوة الأَعضاء وتطويرها للأَفضل .. الكثيرون لا يقتنعون بهذه الخطوة لكن سبق وأَن وضعت تصميم خاص بي وتلقيت ملاحظات الكثيرون وفكرت فيها وطورت التصميم للأَفضل وسأُوافيكم بالتطورات حال رجوعي للدوحة بإِذن الله، لأَن الرسومات في كمبيوتر مكتبي هناك، وأَنا أَشتغل على المحمول.

أَسعد بتواصل الكثيرين ومساعدتهم والحمد لله أَكملت مراجعة ما يقارب الثلاثين مبنى خلال فترة الثلاث سنين الماضية، وطبعاً غالبيتهم بصفة خاصة .. حالياً أَشتغل على مسكن لأَحد الأَعضاء المحترمين وطلبت منه عرض التصميم وتطوراته ووافق مشكوراً .. سعيي اخواني لتطوير التصميم ولسماع آرائكم حوله وكثقافة عامة للجميع.

ولي عودة بإِذن الله بصور التصميم الأَولية كما استلمتها والتعديلات والمقترحات والمجال مفتوح لمشاركة الجميع فإِلى تصميم رقم 1

معماري قطري

10-06-2015, 01:33 PM

بسم الله الرحمن الرحيم أَبتديء

هذا مخطط للأَرض مع الدور الأَرضي والمباني موزعة كما ترون .. الأَرض محاطة بالجيران من 3 اتجاهات ومفتوحة من جهة .. والمالك جزاه الله خير تواصل معي بخصوص ابداء الرأَي وهو ما يزال في حيرة .. واقترحت وضع المخطط على العام للنقاش واستفادة الجميع ووافق مشكوراً.

هذه صورة للمخطط المبدئي أَتمنى تكون واضحة.

http://i.imgur.com/402YGrf.png

بدايةً كانت رؤيتي بأَن استغلال المساحات المتاحة لم يكن موفق .. كما أَن ارتفاع المنزل بسبع درجات من الخلف ( 1.05 متر ) يعتبر متعب ومرهق للدخول يومياً والسبب لوجود بيسمنت جزئي في الخلف .. وهذه صورة للبيسمنت.

http://i.imgur.com/m9impcX.png

كما نرى البيسمنت عبارة عن خدمات .. استورين وغرفة غسيل وغرفة كي ملابس وأَعتقد تخزين ملابس لأَنها كبيرة.

هناك دور أَول وللأَسف لم أُحافظ على التصميم الأَصلي لكن حاولت إرجاعه لما كان عليه.

http://i.imgur.com/l2oWUyF.png

ودور بنتهاوس

http://i.imgur.com/f2NEJSV.png

مثل ما الكل بيلاحظ التصميم مبدئي ومثل ما ذكر لي المالك هو يبي الحوش أَكثره ورا ونشوف آرائكم قبل لاحط التعديل لاحقاً ومقترحي اللي اشوفه مناسب

معماري قطري

10-06-2015, 09:24 PM

نجي للحلول المقترحة .. واللي أَهمها عندي استغلال الأَرض صح .. وبيت بمساحة 1160 كبناء يحتاج توسيع مدخل شوي واستيعاب عدد سيارات مناسب، وتم الوصول لعدد 9 سيارات ممكن كلهم تحت مظلات وممكن 6 و 3 في موقف مفتوح .. الإِهتمام بهذا الموضوع يحمي السيارات خصوصاً هالوقت قطر غير عن قبل .. كذلك برستيج خاص للبيت خصوصاً وقت الزيارات العائلية أَو زيارة نساء.

مسك العصا من النص لازم في هذي الحالة وتوفير مساحة معقولة ورا البيت مفيد لحديقة أَو بناء مستقبلي شرط ناخذ عليه موافقة مبدئية ونعمل حساب الكهربة والمياه وتمديداتها وحتى الصرف الصحي نكون مجهزين لشبكه.

http://i.imgur.com/DSUDASI.png

ولي عودة بعد قليل لشرح التوزيع هذا.

معماري قطري

10-06-2015, 10:30 PM

تم تصميم منطقة الحوض محفورة لين عمق 2.3 متر وهو عمق بعشرة سم أَعمق من أَرضية البيسمنت اللي تغير استعماله عن السابق ( كمقترح ) والمنطقة بمساحة 16.4 في 9.4 في طرفها حوض السباحة بأَبعاد 8 في 6 متر .. وبنوصل للبيسمنت إِن شاء الله .. بس هذي المنطقة مظللة ومرتفعة بحيث سقف حوض السباحة يغطي نافذة صالة الدور الأَرضي .. وفيه اضافات للحوض شورات وتبديل ملابس وسونا وغرفة بخار بالاضافة لغرفة المضخات.

المجلس تغير مكانه ليكون في واجهة البيت وجدامه ليوان بسيط بحيث يكون شبه مفتوح .. والملحق صار في جهة المواقف ليمثل مدخل ثانوي وسهل تنزيل الأَغراض على عربة ودفعها من خلال الرامب الموضح بين المطبخين .. وهذي المنطقة ممكن نغطيها بقزاز بعد الموافقة وبباب حتى تنفصل عن الحوش .. وغرفة السايق لها باب يفتح على الخارج لكن يعتبر داخلي لأَنه عمل في كسرة خاصة داخل حدود الأَرض .. وممكن نعمل بروز للحائط بحيث يغطي الباب أَو نسوي مدخل مقوس بجانب باب السايق وباب ثانوي صغير يدخل على البيت.

الأَهم أَنه تم تعديل ارتفاع العتبات ل 12 سم لكل عتبة للمدخل وتم تنزيل أَرضية الدور الأَرضي 45 سم لإرتفاع 60 سم متدرج 36 للمدخل وصالة التوزيع الوسطية والتي تتوسطها نافورة بنجمة مثمنة ثم يزيد الارتفاع 24 سم على عتبتين سهلتين بارتفاع 12 سم لكل عتبة.

تم عمل مدخل المجلس العائلي مفتوح على الباب وبطريقة الباب المزدوج وحاجز البرودة .. وذلك لعزل أَكثر لداخل البيت.

قد تكون هناك صعوبة للموافقات خصوصاً لو الاستشاري ضعيف وذلك من ناحية سقف حوض السباحة .. ومن الممكن الغاء السقف نهائياً والمحافظة على التصميم كما هو .. كما أَنه من الممكن عمل حديقة مزروعة بدون حوض السباحة وتخطيط المنطقة لتوسعة مستقبلية كما سنرى لاحقاً.

معماري قطري

10-06-2015, 10:47 PM

وهذه صورة لتوزيعة البيسمنت وتم تقليص المساحة قليلاً وترتيبها بحيث تكون عندنا جلسة وصالة رياضة وكلها تنفتح بباب زجاجي كبير على فضاء حوض السباحة مزدوج الارتفاع .. وأَنا أَجزم أَن لا حاجة لتكييف هذه المنطقة بل تدفئة الماء وشفط الرطوبة وذلك من خلال تجربة شخصية لي .. قد يذكر البعض موضوع حوض السباحة المغلق وذلك مساحته 10 في 6 وهي أَقل من نصف مساحة هذا الحوض ومحيطه.

http://i.imgur.com/F4Sq2J2.png

هناك درج خارجي ممكن الدخول له من ناحية الملحق للصيانة والتنظيف ولإستخدام بعض الزوار الشباب مثلاً .. وصالة الرياضة تم استغلال المساحة المرتفعة تحت الدرج لتضاف لمساحة الصالة .. كذلك المغاسل والحمام الداخلي لو تم عمل بوفيه حول حوض السباحة جاهزة للاستعمال.

معماري قطري

10-06-2015, 11:20 PM

بالنسبة للدور الأَول كانت التعديلات قليلة أَهمها في التوزيع الداخلي وتعديل بعض الفتحات وعمل غرفة ملابس واسعة للغرفة العلوية اليمنى في الرسم .. تم استغلال المساحة المفتوحة فوق المدخل لتوسعة صالة الجلوس فوق بحيث تطل على البيت من ثلاث جهات وتكون صالة تلفزيون حيث أَقترح عمل باب زجاج لانفتاح أَكثر على البيت ولمنع صوت التلفزيون من ازعاج النائمين .. الصالة الوسطية عبارة عن مساحة توزيع واقترح عمل فتحة مثمنة كما هو موضح تطل على الدور الأَرضي وتحتها النافورة المثمنة بحجم يقارب النصف.

مكانين مقترحين لعمل بوفيه للشاي وثلاجة للاستعمال القريب

http://i.imgur.com/PceYGh1.png

معماري قطري

11-06-2015, 01:21 PM

الظاهر أَما الكل زعلان علي ولا أَبدى أَحد رايه .. أَو الكل مشغول .. أَقل شيء واحد من الربع الأَولين يعلق ويبدي ملاحظاته

معماري قطري

11-06-2015, 02:02 PM

eXpert*

11-06-2015, 02:48 PM

يعطيك العافية أخوي معماري قطر ،، موضوع يلف بورق من ذهب ..

أنا متابع بصمت للإستفادة ..

همسة : إذا تقدر توجهنيّ لمواقع مجانية تختص بتصاميم خارجية جاهزة للفلل والقصور ؟ أغلب اللي لقيته نظام أوروبي أو أمريكي ..

معماري قطري

11-06-2015, 08:14 PM

مشكور اخوي اكسبرت على المرور وعلى التعليق الطيب

التصميم الخارجي لازم يعكس الداخل ويعكس متطلباتك الأولية .. خطا نهتم بالخارج قبل والبيوت الأوروبية لها استخدام خاص وثقافة شعوب غير كذلك الامريكية .. احنا محدداتنا الخاصة من قيود التخطيط ومواد البناء حتمت علينا شكل محدود ممكن نعدل فيه بحدود.

من فترة كم شهر طلبت تصاميم من شركة مختصة بالبناء الجاهز .. وأرسلوا لي أشكال خارجية غريبة عن النماذج الدارجة .. الشركة سعودية لها مصنع وكفيل في قطر .. الحمد لله الاسم موجود في دهاليز الذاكرة للحين قمبر دويداغ اما وكيلهم في قطر فهو المسند بس اسم الشركة نسيته.

هم يبنون النماذج جاهزة او يصممون الهيكل حسب رغبتك واسعارهم مثل ما سمعت اقل من البناء التقليدي واسرع

لبيبة

11-06-2015, 08:54 PM

السلام عليكم ورحمة الله وبركاته،

موضوع مفيد جدا يا معماري قطري، جزاك الله كل خير.

تسجيل متابعة.

معماري قطري

11-06-2015, 10:18 PM

عليكم السلام ورحمة الله وبركاته

آتمنى الكل يستفيد منه والله يوفق الجميع ويجزيج الجنة

متابعة بملاحظات لازم .. سلبية أَو ايجابية مقبولة منج ومن الجميع

السلام عليكم ورحمة الله وبركاته،

موضوع مفيد جدا يا معماري قطري، جزاك الله كل خير.

تسجيل متابعة.

Hamad_qa

11-06-2015, 11:14 PM

يعطيك العافية اخوي معماري

سوْال بخصوص خزان الماي .. الأفضل يكون فوق البنتهاوس ولا نفس مستوى البنتهاوس ؟
واجهزة السخان المركزي و الفلاتر والبمبات تكون نفس مستوى خزان الماي ؟

معماري قطري

12-06-2015, 12:13 AM

يعطيك العافية اخوي معماري

سوْال بخصوص خزان الماي .. الأفضل يكون فوق البنتهاوس ولا نفس مستوى البنتهاوس ؟
واجهزة السخان المركزي و الفلاتر والبمبات تكون نفس مستوى خزان الماي ؟

حي الله سميي .. يا الشيخ العالم كله يحط الخزانات تحت ويستعمل برشر .. وبعض الدول ما فيها خزانات كلش والماي يجيك مضغوط .. واحد من الربع شرى أَرض زراعية في فرنسا وسوى له كوخ خشبي ويقول الماي واصل والكهرباء .. ويوم فتحنا الماي الا من قوة الضغط يطير .. عليهم التمديد بس والاستهلاك وطبعاً فيه عدادات ما ادري شلون طريقتها.

عندنا للمنظر خله في مستوى البنتهاوس وخله مبني ومغطى بخرسانة وله باب ألمنيوم يكفي لدخول التانكي واستبداله وقت الحاجة .. ومن خلال تجربتي اشوف وضع لوحة الكهرباء معزولة بحائط أَفضل حتى تكون بعيدة عن الماي لو تسرب .. والوايرات كلها لازم تكون معزولة ومحمية.

الكواري 1972

12-06-2015, 12:32 AM

يعطيك العافيه

في ميزان حسناتك ان شاءالله

جزاك الله خير

معماري قطري

12-06-2015, 01:35 AM

يعطيك العافيه

في ميزان حسناتك ان شاءالله

جزاك الله خير

الله يعافيك وتسلم على الكلام الطيب ولازم تبدي رايك في التوزيع هذا .. وان شاء الله بسوي مقترح ثاني للبنيان بفكرة بناء ملحق مستقبلي مكان حوض السباحة لأَحد الأَبناء حسب رغبة المالك.

الجـــوديّ

12-06-2015, 02:56 AM

الله يصبحكم بالخير ..

سجلت خروج ... ورجعت لأن الموضوع قيم جداً

وجيت اشكر راعي المخططات انه عرضها عليك ..
لان كان التوزيع فيه سوء تخطيط وفقدان كبير للمساحات .. مع ان البيت كبير تبارك الرحمن
والتوزيع ما يقدم استخدام وحياة مريحة.

أخوي معماري .. الله يعطيك العافية وفي ميزان حسناتك
اعتبر هالموضوع ورشة عمل مشتركة .. كلنا فيها فايدين ومستفيدين ان شاءالله.

على أي المخططات اقول ملاحظاتي .. قبل التعديل والا بعد التعديل؟

معماري قطري

12-06-2015, 12:03 PM

صباح النور والسرور

والله الكل إِختي حتى لو شيء سويته انا غلط وعندج فكرة لتطويره

الجـــوديّ

12-06-2015, 03:09 PM

انا اللي عندي مجرد ملاحظات وافكار .. اقترحها بناءً على الحركة الطبيعية في استخدام الاماكن بالاضافة الى الخدمة اللي تقدمها لي ومدى حاجتها وطبعاً اقتصادية تواجدها..وبعد بناءً على حجم البيت ومستوى الفخامة والرفاهية المطلوب.

أولاً: المجلس الخارجي:

لاحظت انه يتكون من مجلس وحمام ومغاسل بس.
المجالس اليوم تطورت وصارت هي واجهة البيت .. لذلك اقترح ان يكون مدخل صغير hall يودي على المجلس . وضروري جدا يكون فيه مطبخ تحضيري علشان تحضير القهوة والشاي وحفظ الادوات.. حتى لو اعتمد الاسلوب التراثي في الديكور و سوى وجار بعد من الافضل يكون فيه مطبخ.
ويعتمد على راعي البيت اذا هو من نوع يسوي عزايم وايد بيحتاج المطبخ تكون مساحته تستوعب لقانه وباقي الضيافة عقب ما يخلصون الضيوف... خاصة ان مطبخ البيت بعييييد عن المجلس.

الهول يحافظ على نظافة المجلس ويعطيه فخامة اذا تلبس بالرخام والاضاءة بعدين بشكل جيد.

Hamad_qa

12-06-2015, 09:11 PM

حي الله سميي .. يا الشيخ العالم كله يحط الخزانات تحت ويستعمل برشر .. وبعض الدول ما فيها خزانات كلش والماي يجيك مضغوط .. واحد من الربع شرى أَرض زراعية في فرنسا وسوى له كوخ خشبي ويقول الماي واصل والكهرباء .. ويوم فتحنا الماي الا من قوة الضغط يطير .. عليهم التمديد بس والاستهلاك وطبعاً فيه عدادات ما ادري شلون طريقتها.

عندنا للمنظر خله في مستوى البنتهاوس وخله مبني ومغطى بخرسانة وله باب ألمنيوم يكفي لدخول التانكي واستبداله وقت الحاجة .. ومن خلال تجربتي اشوف وضع لوحة الكهرباء معزولة بحائط أَفضل حتى تكون بعيدة عن الماي لو تسرب .. والوايرات كلها لازم تكون معزولة ومحمية.

تبقى يالسمي
شورك وهداية الله

معماري قطري

12-06-2015, 09:21 PM

معماري قطري

12-06-2015, 09:24 PM

تبقى يالسمي
شورك وهداية الله

الله يوفقك ويبقيك

معماري قطري

12-06-2015, 10:26 PM

حل للجزء الخلفي بعمله حديقة وعمل جلسة خارجية فيه مثمنة تكفي لعدد 14 شخص .. مع دوة وسطية دائرية بقطر متر يطلع منها عمود خرسانة يحمل تظليل وتتخلله مدخنة ملاصقة للعمود.

سامحوني على عدم الوضوح وقلة المعلومات على الرسم والبرزنتيشن المبسط.

http://i.imgur.com/MxmPBm3.png

معماري قطري

13-06-2015, 01:27 AM

الحديقة هذي لو فكرنا نستغل أرضها في المستقبل لملحق ممكن نبني في حدود 292 تقريباً 300 متر مربع حتى دور يكون مدخله مقابل المخزن وممكن يكون مستقل ودور من تحت .. وممكن الممر البسيط 2.5 متر بين البيت والملحق يتغطى ببلاستيك أَو زجاج ويستوي شبه جزء داخل بين البيتين.

http://i.imgur.com/MMjHrqk.png

الجـــوديّ

13-06-2015, 01:58 AM

انتي تخصصج المجالس .. عدلت شوي على المجلس بس لو القصد انترير دزاين ومثل التصوير هذا شيء ثاني .. انا حدي مساحات وتوزيع حتى برنامج ثري دي ماكس ما عندي ويحتاج وقت لين اتعلم اشتغل عليه مع اني خذت دورات فيه وما مارست نسيت.

هشكل اختي الجودي بنخسر المالك باضافاتنا هذي .. واحتمال كبير التخطيط ما يوافقون .. زدت المساحة شوي جهة السور واستوى استيعاب المجلس 20 شخص وممكن أَكثر لو الكراسي كلاسيك .. أَضفت الدايننغ بمساحة مناسبة لجلسة أَرضية أَو أَرضية مرتفعة شوي تكفي لذبيحتين على لقنين .. المطبخ قرب المجلس ما اشوف له داعي وفيه مساحة بسيطة لغرفة عمل شاي وقهوة.

http://i.imgur.com/6uqO7YJ.png

لو انا مكان المالك باسوي سكايلايت هرمي في وسط المجلس.

هلا أخوي معماري ..

يعطيك العافية على الاستجابة السريعة ..

بالنسبة للمجلس .. بصراحة حطيت خلاصة تجربة مجلس بيت الوالد ..
عندنا مجلسين .. الصغير مجلس كل يوم ... والكبير مجلس المناسبات .. تقريباً بنفس الرسم اللي رسمته مع بعض الاختلاف.
أكبر خطأ انهم ماسووا مطبخ أو غرفة صغيرة لتحضير الشاي والقهوة .. ومكتفين بزاوية في المجلس الصغير .. وخاصة ان مطبخ البيت بعيد..
وانا مب عاجبني .. لكن في الاخير هم الرياييل ابخص بمجلسهم.

وعلى كل حال .. أنا أذكر بس أفكار ومقترحات .. حتى لو ما خذتوا بها
هي مجرد نقاش وأنتو ادرى واعرف مني بالبنيان وميزانيته وبحاجة أهل البيت الفعلية.

:

أشوف التصميم الأخير افضل من الاول وخاصة الدايننغ .. وغرفة تحضير الشاي والقهوة :victory:

معماري قطري

13-06-2015, 02:13 AM

والله اتجاه انتي فكرتي فيه وهذي ميزة الاستشارة وانا اشوفه أَفضل .. واشوف الحديقة عملية أَكثر ورا وخصوصاً انها نازلة وبمستوى أَرضية البيسمنت وفيها تلة صناعية يستانسون عليها للصغار للعب والكبار لتمارين الصعود.

شكلنا غطينا كل شيء باقي توزيعة بعض الحمامات لو مهمة باسويها في دقايق.

بالنسبة للملاحظات لازم احنا نذكرها والقرار الأَخير للمالك .. وانا خذت حول اسبوع في هالتعديل وأَكيد يحتاج تفاصيل أَكثر وشغل هندسي متكامل .. بس دوم الأَساس هو أَهم شيء وأَساس أَي مبنى هو تقسيماته وعلاقة الغرف ببعض والحوش واللاندسكيبنغ لازم ندمجه مع المداخل .. مواقف السيارات مهمة للغاية.

الدكان مفتوح لأَي استشارة ثانية وحتى لو تطوير على تصميم جاهز.

Stars

14-06-2015, 05:24 AM

الله يجزاك الخير اخوي معماري
صراحة جهد طيب وان دل فإنما
يدل على كرم أخلاقك وطيبتك

BUHASSEN

14-06-2015, 09:17 AM

سعود.

14-06-2015, 12:33 PM

bo7md

14-06-2015, 01:09 PM

معماري قطري

14-06-2015, 01:37 PM

الله يجزاك الخير اخوي معماري
صراحة جهد طيب وان دل فإنما
يدل على كرم أخلاقك وطيبتك

الله يجزاك الجنة يا اخوي .. هو بالنسبة لي تمرين ومتابعة للمهنة الأَساسية لي ووالله استمتع بهالشغلة .. وإِن شاء الله الملاك يستفيدون وهذا الأَهم

معماري قطري

14-06-2015, 01:48 PM

السلام عليكم ورحمة الله
أولا اشكرك اخوي على الموضوع المفيد والله يجزاك خير

بالنسبة للتصميم بالنسبه لي ممكن الاستفادة أكثر من المساحات بشكل أكبر مع المحافظة على النقاط الجمالية. على سبيل المثال لا الحصر المصعد ممكن يوضع في المنتصف مكان النافورة ويكون بانوراما بحيث يعطي شكل حلو وممكن نحط نافورة على الاجناب ونستغل المساحة اللي فوق في تكبير عرض الغرف اللي فوق.

طبعا هذا كله رأي شخصي والنظرة تختلف من شخص لشخص. ويعطيكم العافية

عليكم السلام ورحمة الله وبركاته

انا لتصميم بيتي الجديد متبع تقريباً نفس المبدأَ للمصعد .. وهو الأَرخص وما تحتاج لدرابزين للدرج ولو حبيت تركب بتركب بسيط مثبت في حائط المصعد والحائط الجانبي .. ومجال نوعية المصعد مفتوح لنوعيات اقتصادية والواجهة ممكن تخليها زجاج .. نص بانوراما .. بانوراما كامل يجي غالي وايد وعلى فكرتك كل دور يلزمه تعديل وتحوير حتى البنتهاوس والبيسمنت.

الغرف كبار كفاية وأَزيد والبنيان تقريباً كل حائط فوق الثاني حتى الانشائي يكون خفيف والأَبيام مخفية .. فكرة النافورة هي قطعة أَثاث ثابت ومن النوع المبني وحتى تشغل المكان المفتوح وتسوي جو في البيت .. والدور العلوي مفتوح عليها بتشكيلة مثلها بس أَوسع حتى يكون لها صوت يوصل فوق خفيف
وممكن استبدالها بطاولة دائرية عليها زهور أَو نبات ظل .. حتى فكرت في عمل سكايلايت من فوق عليها بس صعبة العملية لوجود جلسة في البنتهاوس.

معماري قطري

14-06-2015, 02:02 PM

السلام عليكم ورحمة الله وبركاته

والله ياخوي معماري منكم نستفيد وموضوعك هذا جداا ممتاز نتعلم ونعلم .

انا والله اشوف المخطط جدا ممتاز .
بي عندي ملاحظة في بيبات الصرف الصحي ( الدكت ) اشوف لو انها خارجية وتتغطى في grc اشوفه افضل .
وفية غرفة في الدور الاول ماشوف لها نافذة !!!!

وسلامتك ....

عليكم السلام ورحمة الله وبركاته

التصميم فيه نواقص كثيرة ولازم تتوازن الدرايش مع الواجهات .. وانا ركزت على الأَهم كفكرة عامة وفي تطوير التصميم أَكثر لازم تترتب هذي الأُمور

بالنسبة للبايبات والدكتات انا نقلتها مثل ما هي ورايي ذكرته قبل بالنسبة للجي ار سي ما ادري ليش نسوي جزء بارز وشكل مضاف على البيت ما له علاقة بالباقي .. هل نحن في حاجة لحماية هذه البايبات لهذه الدرجة؟ وهل وقت الصيانة بنقدر نفك الجي ار سي بسهولة ونستبدل العاطل من البايبات؟

حق بيتي سويت الحوايط دبل والبايبات كلها مخفية حتى اللي للمطر وسرب بايب ماي شوي ولاحظنا مكان التسريب .. وشوية تكسير وقطع الجزء المخترب وعمل وصلة وشوية بلاستر وصبغ واستوى مثل قبل .. ولو دعت الحاجة لعمل تمديدات جديدة ممكن تكون خارجية .. دكت مثل الموجودة في التصميم جيدة ومخفية وممكن تعديل أَي خراب بالتكسير .. ولو نحب نسوي فتحات بمارين بلايوود داخل ونركب عليه البلاط ويتثبت ببراغي ستانلس .. لكن لداخل الحمام نحتاج نسوي نفس النظام لسهولة صيانة واستبدال البايبات اللي في الحائط .. وهذا النظام موجود ومكلف .. أَلحين لو سويت البايبات صح وعزلتها صح تكون نسبة الفشل ضئيلة .. بالنسبة للبايب اللي سوينا له وصلة كان مضروب بمسمار وفيه فتحات بسيطة تسرب ماي بالتدريج وكان بفعل عامل حاقد الله يجزيه على قد نيته .. والحمد لله تعدل بمبلغ تافه ما يوصل 300 ريال.

ما شاء الله هذي مشاركتك العاشرة والله يوفقك وتكون عضو فعال معانا.

معماري قطري

14-06-2015, 02:21 PM

يعطيك العافيه اخوي عندي ملاحظه بسيطه

لو تكبر المقلط شوي صغير من ناحية العرض 3.4 لو تاخذ متر من المجلس ويصير 4.4بيكون واايد افضل وفي النهايه هو مجرد وجهة نظر

ونقطه ثانيه احس غرف النوم الي عرضها اقل من 5 م تكون صعبه في الترتيب من ناحية الاثاث

ويعطيك العافيه عالموضوع

الله يعافيك ويبقيك اخوي بو حسين

الفكرة من هذا العرض كانت للقن على الأرض أو على قاعدة بسيطة واللقن عرضه في العادة سواءً النوع الطويل ولا الدائري ما يزيد عن متر أو 110 سم وتبقى مسافة كبيرة حوله للجلوس للمرور من ورا الجالسين .. لو حب المالك يزيد العرض يقدر يكبر جهة الحوش في حدود 50 سم بس اشوف ما لها داعي وحتى لو حب يركب باب ممكن يكون سلايدنغ.

غرف النوم الأَهم ترتيبها وغرفة الملابس تكون بباب كمخزن مفتوح وسهل الوصول للملابس وللأغراض الخاصة .. تهويتها ممكن من خلال مروحة شفط بسيطة تسحب الهواء البارد من الغرفة من خلال فتحة تهوئة في الباب .. ويستحسن المروحة والانارة تنعمل تشتغل توماتيك مع فتح الباب .. وللي يحبون السيفتي ويخزنون مقتنيات ثمينة يستحسن الباب يكون خاص وقوي وبمفتاح بصمة أَو رقم سري.

السرير معروف مقاسه وفي الغالب الكبير يجي مترين في مترين مع كوميدينو بعرض مختلف بعضها توصل 90 سم .. ولو خلينا مجال للمرور جدام السرير متر بنوصل لثلاث أَمتار ونقدر نركب تلفزيون معلق على الحائط مقابل السرير .. يعني ممكن ننزل لعرض 3 متر .. لو زدنا شوي حسب المتوفر زين .. بس رايي لغرف النوم الأَهم توزيعها وهدوئها وديكورها الداخلي .. وبالنسبة لقطع الأَثاث في الرسم كلها بمقاس رسم وبعض الغرف تبين كبيرة وايد لذلك فكرت في اقتطاع جزء لغرفة الملابس وممكن التعديل أَكثر على كل الغرف

معماري قطري

14-06-2015, 04:41 PM

كملت على توزيع بعض الغرف والحمامات تكرمون .. وأضفت سكاي لايت هرمي بمقاس 2 في 4 متر بحيث ينور الصالة الوسطية وصالة الجلوس أكثر .. بالنسبة لبيت الدرج يفترض ترتيب درايش كبار للنور الطبيعي أو طوب زجاجي .. كذلك للحمامات بما أن مساحتهم كبيرة .. ممكن نسوي صفين أو 3 طوب زجاجي بكامل عرض الحايط فوق قرب السقف تحت الجسر.

http://i.imgur.com/jWGzloy.png

وهذا مقترح ثاني بدون توفير مساحة جلوس اضافية في الصالة.

http://i.imgur.com/PpwkoHY.png

أشوف الغرفة السفلية مترتبة أَكثر والكسرة استوت مخفية واستغلال المساحات أفضل

وهذا موقع المنور فوق

http://i.imgur.com/3aDhe5u.png

Hamad_qa

14-06-2015, 11:47 PM

اخوي معماري
الدور الاول .. الغرفة اللي فوق ع اليمين .. توزيعها تعبان جدا
غرفة الملابس بتكون كأنها سجن بسبب ضيقها

من رايي تخلي مدخل الغرفة مجاور للغرفة اللي تحتها .. عقب ال walk in closet و الحمام يكونون في جهة وحدة (فوق في الرسمة ) مادري اذا وصفي واضح

معماري قطري

15-06-2015, 12:32 AM

غرفة الملابس صج طويلة لكن عرضها 1.8 متر .. لو بنسوي فيها كبتات كاملة عرض 60 سم + 60 سم بتطلع 120 وعندك 60 سم كممر لشخص واحد وفيه بيوت ممرها بهذا العرض .. بعدين لغرف الملابس لو تشوف الصور اللي انعرضت في موضوع غرف النوم هذي كبتاتها بدون أَبواب .. يعني هذي الفكرة والكبت يجيك بعرض 35 سم وهو عبارة عن رف في أَعلاه علاق جاي متطرف بحيث يكون حول ثلث العلاق طالع لسهولة الاختيار .. يعني عندك الممر الوسطي يكون أَعرض .. شوف انت مقاس علاق الملابس وايد صغير .. بعدين تسوي قواطع حسب رغبتك بخشب بلايوود رخيص وحتى الحائط مسويه 10 سم لتوفير المساحة .. وممكن تسويه أَقل لو بتسويه بارتشن بخشب مغطى بجبس.

الخزائن الأَمريكية اللي تكون في الحائط ثابتة وبباب منزلق تحتاج لعرض 70 - 75 سم وهذا لو تلاحظ سويته في الغرفة اللي تحتها في الرسمة الوسطى ومسوي نفس الشيء في بيتي .. المساحات والأَرقام لا تهتم حافظها عن غيب .. صحيح فيه ستاندرد لكن بعد فيه فكر هندسي يزيد شوي أَو يقلل من هذا الستاندرد.

معماري قطري

15-06-2015, 01:34 AM

هذا حل ثاني للغرفة اللي فوق في الزاوية .. بس بهالحل كبرنا الحمام وصغرنا الغرفة 40 سم وهي كافية للحين ممكن نخليها أَصغر 20 سم يعني غرفة الملابس تكون بعرض 2 متر .. الحلو في هذا الحل إِننا خلينا البابين متقابلين.

http://i.imgur.com/VRP3l9m.png

Stars

15-06-2015, 06:24 AM

أقترح ان غرف الملابس ما يكون لها باب أصلا
نفس نظام الفنادق والكبتات تكون بباب جرار
من خشب او زجاج كامل نفس نظام الخزائن الأوروبية
بيكون فيه نوع من الانشراح والوسع

Stars

15-06-2015, 06:33 AM

معماري قطري

15-06-2015, 02:27 PM

أقترح ان غرف الملابس ما يكون لها باب أصلا
نفس نظام الفنادق والكبتات تكون بباب جرار
من خشب او زجاج كامل نفس نظام الخزائن الأوروبية
بيكون فيه نوع من الانشراح والوسع

هذا نظام وذاك نظام يا اخوي .. الميزة تكون عندك غرفة تخزين وفيها رف يغطي تعليق الملابس المفتوح وتقدر تحط كراتين أو صناديق أو شناط فوق .. تقدر تسوي واجهة أَرفف مربعات اللي يسمونها بيوت الحمام ( pegion holes ) وهذي تتوزع فيها الأَغراض بسهولة وتوصلها بسهولة وتشوفها بسهولة لأَنها مفتوحة ومنارة جيداً يفترض .. خصوصيتها أكثر ومحمية بباب خاص ينقفل وتبقى الغرفة فاضية للخدم ينظفونها براحتهم وراحتك .. التخزين يكون على الجهتين .. وأَي نجار بسيط ممكن يسوي لك القواطع وفي بعض الغرف تستخدم سلال معدنية ولا يستخدم الخشب .. ممكن تسويها برخيص وجزء من سعر خزائن الحائط .. اللي عنده مساحة مثل الغرفة الرئيسية في النتهاوس في وسطها طاولة كبيرة بأدراج ممكن ينحط فوقها أَي شيء ويكون جزء بسيط للجلوس ولبس الأحذية مثلاً للي ركبهم تعبانة مثلي.

معماري قطري

15-06-2015, 02:42 PM

استشارة أخوي المعماري وباقي الأعضاء :
أغلب الفلل عندنا تقريبا نفس هالنظام صالة وسطية
وحولها الغرف إيش رايكم في مقترح
ان الدور الاول يكون بنظام سويتات ( أجنحة ) جناحين او ثلاث وبينهم ممر او موزع
مثلا جناح لصاحب الفلة والثاني للبنات والثالث للأولاد
وفي المستقبل ممكن حد من العيال اللي بيتزوج ياخذ له جناح ويكون فيه نوع من الخصوصية نوعا ما
الجناح عبارة عن غرفتين بحماماتهم وبار صغير

(يزيد او ينقص حسب المساحات )

فيه فلل تختلف مثلاً بيت بو جمال اذا تذكره صالته في زاوية وقرب المدخل وشكله مستطيل يناسب كل الأراضي .. وراجعته معاه في بداية التصميم وكانت التعديلات بسيطة جداً وهو ما شاء الله عليه فاهم شيسوي والله يوفقه له فترة ما يبين.

فيه تصاميم كثيرة تختلف وأوقات تحصل الدارج اللي يناسب مساحات معينة وشروط تخطيطية معينة .. اتجهوا غصب مكاتبنا الاستشارية للنسخ وعدم الابتكار .. وصدقني مكاتب كثيرة ما فيها الا مهندس واحد والباقي رسامين ويسمون الرسام مهندس .. لا والطامة الكبرى تحصل المهندس دكتور أوقات بس عمره ما مارس التصميم المعماري .. تحصله دكتور مهندس كهرباء أو مدني وما مارس الانشاءات وتحصل المصمم الانشائي رسام يبالغ في الخرسانات وكلما زاد كلما كان أحسن حسب وجهة نظره ونظر من يدير شغله .. وهو يسوي تصميم ثقيل وايد ومكلف وايد .. ثقيل لدرجة ما يقدر يشيل نفسه وتبين عليه آثار الشيخوخة سريعاً.

واللي يتكلمون عن تنمية مستدامة يعرفون عدل ان غالبية مبانينا حدها 10 سنين وتحتاج صيانة مكلفة وتكون مشاكلها كثيرة .. مباني اوروبا تعيش مئات السنين وبعضها وصل 500 سنة ويفتخرون به .. والكثيرون يقولون جوهم يختلف .. اللي يقول هالكلام يبني مبنى من مبانينا وحسب مواصفات بلادنا هناك ويشوف شكثر يبقى .. حتى مستحيل يتوافق عليه .. كثير يعرفون قصة حي شيلسي في لندن وكيف تعبت الديار وهي تحاول تصمم حسب معاييرهم ولا ادري شصار كأَنهم ييئسوا من المشروع.

معماري قطري

15-06-2015, 02:54 PM

أقترح ان غرف الملابس ما يكون لها باب أصلا
نفس نظام الفنادق والكبتات تكون بباب جرار
من خشب او زجاج كامل نفس نظام الخزائن الأوروبية
بيكون فيه نوع من الانشراح والوسع

فهمت وجهة نظرك .. ممكن مثل الرسمة الأَخيرة نلغي الباب ونخلي فتحة ونسوي كبتات كاملة نظام الخزائن الاوروبية أو الأمريكية بباب جرار 2.2 متر كافية لهذا النوع و1.8 متر هي عرض مناسب للنظام المفتوح .. بس الكبتات هذي حلاتها في نظام مفتوح وممكن ندمجها مع تصميم الغرفة الداخلي .. غرفة الملابس المفتوحة مثل ما ذكرت أَرخص وايد واستخدامها سهل وخصوصية .. وتتفرغ لترتيب حيز سرير النوم ترتيب خاص بك وتصغر الغرفة شوي تكون أَبرد ومريحة وهادية للنوم .. وبخصوص الهدوء .. بنشوف ان شاء الله نماذج نسوي فيها غرفة الملابس في مدخل الغرفة .. أو هو نموذج موجود تقدر تشوفه فوق وتقدر تسوي باب ثاني للغرفة ولو سكرت البابين تضمن هدوء أَكثر

معماري قطري

17-06-2015, 05:26 PM

تواصل معاي صاحب التصميم بخصوص ما هي النقاط المهمة .. ومثل ما شرحت قبل كلها اقتراحات ووجهات نظر .. انا تركيزي على الممكن والأَفضل لو حبينا التصميم .. بالنسبة للتكلفة مستحيل حد يحددها الا بعد مناقصة مفصلة صح وبنحصل فرق في الأَسعار كبير جداً .. حتى أَحياناً نحصل مقاول مختص وقوي يسعر تسعير جيد ومناسب ونص أو ربع مقاول يسعر ضعف السعر المتوقع .. وهذا من واقع تجارب كثيرة مريت بها آخرها من أَيام بسيطة لمساحة في حدود 1800 متر مربع وبسعر 5.1 مليون الى 2.7 أو 2.3 نسيت الصراحة والسعرين تسليم مفتاح وسعر ثالث حول 4 مليون .. وأَقل سعر لشركة قوية والسعر 4 مليون لقوية ومجربة كذلك .. وال 5.1 لشركة حديثة.

بالنسبة للتسعير ممكن نشوف حتى 10 شركات أَو أَكثر والمناقصة هي أَهم شيء وتكون عن طريق استشاري وبشروط واضحة للكل حتى نقدر نحلل ونفرق بينهم.

بالنسبة لموضوعنا لو حاول المالك يسوي حوض سباحة صغير ويستغلة فيما بعد ليكون بين التوسعة الحديثة والبنيان القديم ممكن وهذا مقترح لذلك.

http://i.imgur.com/oouBQza.png

وهذي المنطقة بعد إِزالة الجلسة الخارجية والبناء .. ممكن حتى الحوض يكون كمجرى مائي ومنظر وممكن يبقى كما هو ويتغطى من فوق كلش بسقف زجاجي .. والمسافة بين البيت والملحق زدتها ل 3.2 متر .. وحتى ممكن نسوي ممر مغلق من فوق من الدور الأَرضي للدور الأَرضي في الملحق.

http://i.imgur.com/kPGrLgF.png

ومبارك عليكم الشهر الكريم

معماري قطري

17-06-2015, 05:29 PM

نسيت اذكر لأن مب واضح مقاس الحوض .. مقاسه 2 في 8 وعمقه 1.4 ويكون صافي في حدود 1.25

معماري قطري

18-06-2015, 05:15 PM

شيصير لو ما تمت الموافقة على الحديقة النازلة في الخلف وعلى الملحق المستقبلي من التخطيط .. ممكن يقولون المساحة أَكثر من المسموحة وممكن يحطون أسباب لعدم الموافقة على الحديقة النازلة .. مع العلم إِن البعض سووها وتقريباً نفس الطريقة بس تعب مع التخطيط صاحب المخطط .. وما شاء الله عليه وهو طيار لكن ملم بأَساسيات التفاوض .. بعد راجعت معاه بس بيته وايد مبالغ في مساحاته وتصميمه ويعتبر قصر الله يهنيه ويوفقه في بنيانه .. هو من الكثيرين اللي ما يحبون يعرضون مخططاتهم وله أَسبابه واحترمها بس حبيت اذكر ان المخطط ممكن وموجود قريب منه .. هو يمكن ميزة أرضه منحدرة فرق في ارتفاعها حول 3 متر .. دور كامل يعني.

بالنسبة للمجلس مؤكد بيسوون تعقيدات واحتمال ارتداد واحتمال يسمحون بليوان من جدام .. ولو حصل التخطيط الموافقات المبدئية بدون تعقيدات بيكون توفيق من الله ما بعده توفيق.

معماري قطري

21-06-2015, 04:25 PM

طلعت لنا فكرة .. نقل الخدمات اللي هي غرفة الخدم والمطبخ الخارجي والستور للبيسمنت وترك المساحة الخارجية لتوسعة مستقبلية لملحق سكني ومقترحها صاحب التصميم.

الفكرة ممكنة والمساحات متقاربة .. مساحة الملحق حول 100 متر مربع ومساحة البيسمنت 120 شاملة بيت الدرج وتحتاج تعديل شوي لتوزيع 3 مساحات رئيسية هي المطبخ ( اللي بيكون صعب الحصول على موافقة عليه من الدفاع المدني ) وغرفة الخادمات والستور .. وفي هذي الحالة رايي نرجع للتصميم التقليدي في البيسمنت مع تنزيل الحديقة شوي .. يعني ما تكون واجهة البيسمنت مفتوحة على الحديقة بالكامل مثل السابق .. وبيتم الغاء حوض السباحة وتصميم مكانه ملحق سكن مستقبلي يغطي مساحته ومساحة ملحق المطبخ الخارجي .. وتوقعي بتكون فيه تحديدات معينة للمساحة المبنية على الأَرض من التخطيط.

للحين ما ادري شوضع المجلس الخارجي .. مع إِني لو مكان المالك كنت صممته مثل ما هو في مكانه وخذت عليه الرخصة وجهزت لبنائه في المستقبل لو اني مب في حاجته حالياً.

إِن شاء الله احصل وقت للتركيز في هذا المقترح الجديد .. مستغرب ليش الدفاع المدني يمنع المطبخ في البيسمنت وكأَن قطر الدولة الوحيدة اللي تسوي مطبخ في البيسمنت في العالم.

معماري قطري

21-06-2015, 05:08 PM

تمت مناقشة تطوير توزيع دورة مياه في السابق في موضوع آخر على صفحتين لمن يرغب في القراءَة وفي متابعة فلسفة التصميم وحتى مناقشة الحيثيات.

http://www.qatarshares.com/vb/showthread.php?512951-الجديد-في-عالم-المطابخ-والحمامات-وتصميماتها/page55

سعود.

21-06-2015, 07:14 PM

سعود.

21-06-2015, 07:22 PM

سعود.

21-06-2015, 07:32 PM

وهذي صورة المخطط في الخرايط الرسمية ...

الي بيشوف المخطط بيلاحظ اماكن المكيفات فيها تعديل . هذا مقترح لمكان المكيفات وتم تعديله مع الاستشاري لان المخطط الرئيسي كان بيطلع لي بعض بيبات المكيفات في نص الصالات العلوية وتم تعديلها قبل الصبيه ....

93580

معماري قطري

22-06-2015, 01:39 AM

ناقشت موضوع المطبخ مع بعض الشباب الي سبقوني في البنيان وكلهم حذروني من سالفة رائحه الطبخ ....

وانا مسوي مدخنه خارجيه وبركب المروحة الي تجي فوق الباب الي كنها مكيف سبيلت نفس الي في المجمعات التجاريه تجنبآ لرائحه الطبخ . في الكويت يعرفون صح كيف يستفيدون من مساحة الارض وحنا ( الله يعين بس )

وسلامتكم

الله يسلمك اخوي سعود .. للأَسف الصور ما تطلع لأَنك منزلها من التلفون وباشوفها في التلفون إِن شاء الله .. بخصوص المطبخ في البيسمنت خطورته كبيرة بسبب اهمال الخدم واحتمال أوقات تعمدهم .. الاحتياطات للرائحة وللحريق ممكن نظام اطفاء ذاتي ونظام انذار ونظام كشف تسرب الغاز .. ولمنع انتشار الحريق والرائحة نظام بابين ورا بعض مقاومين للحريق لساعتين لكل باب.

بالنسبة للمقترح الحالي .. صاحب التصميم يحب يستفيد من الأَرض استفادة قصوى لكن اقتنع بعمل المطبخ خارجي .. وانا سويت المقترحين وبداية هذا الأَول بالمطبخ في البيسمنت وبتبقى عندنا مساحة 288 متر مربع لبنيان مستقبلي لملحق يكفي ل 2 من الأَبناء .. مع المحافظة على عدد سيارات مناسب لشاغلي المنزل ككل .. ولازم يتم تصميم الملحق المستقبلي حتى تجي الرخصة كاملة وتنعمل التمديدات أَو دكتات فاضية للملحق ويتم بناؤه وقت الحاجة بسهولة وتجديد الرخصة.

http://i.imgur.com/64AvRad.png

وهذا المقترح الثاني بالمطبخ خارجي .. وممكن استخدامه بواسطة طباخ وله باب ثاني ممكن يقفل الباب اللي جهة البيت للخصوصية.

مساحة الملحق السكني قلت ل 234 متر مربع وممكن تزيد شوي لو اعتبرنا المساحة البسيطة اللي بين المطبخ الخارجي والملحق المستقبلي داخلة في البناء.

بس هل يوافق التخطيط على كل هذي المساحة للبناء؟

http://i.imgur.com/7NEPOQZ.png

معماري قطري

22-06-2015, 01:46 AM

الصور ما طلعت واضحة باضيفها بي دي اف للي يبي ينزلها ويكبرها

http://i.imgur.com/DRYi9Nn.png

http://i.imgur.com/DXbnPYG.png

سعود.

22-06-2015, 02:23 AM

معماري قطري

22-06-2015, 04:05 AM

بالضبط كلامك ياخوي ....
افران الغاز مانعها من زمان في البيت وفي البيت الجديد بتكون ايضا كلها كهربائيه ....
عشان كذا كتبت لك اني مسوى جميع شروط السلامه الي انت ذكرتها ..... واضيف عليها طفاية حريق احتياط

والمطبخ وغرفة الخادمات نوافذها كبار وتفتح ع البلكونه الخارجية ( الحفرة الانجليزية ) حق الشردة :app::app::app::app::app: لاسمح الله في حال الحريق ....
هذا والله الحافظ ....

الله يوفقك شغلك زين .. بديت البنيان ولا للحين؟ انا شفت من التلفون بس الصور شوي مب واضحة .. لو تحب اراجع لك الرسومات حاضر وحسب مرحلة التصميم أَو البناء بتكون الاقتراحات .. يعني لو بادي تبني بتكون أَقل ما يمكن.

بالنسبة للأَفران الكهرباء صحيح وايد أأمن وفيه منها أنواع حتى فرن كهربائي بالبخار.

اللي يسوي بيسمنت ياخذ احتياطاته ويركز على العزل المائي عدل .. بعضهم يحط العازل ويخلي الفتحات اللي تركب فيها حدايد تثبيت الخشب قبل صب الخرسانة .. قي فتحات صغيرة عبارة عن بايبات بلاستيك بيض .. يغطيها العازل ولا تبين لكن تبقى نقطة ضعيفة وتنجرح وتبدأَ تسرب ماي ويصب منها صب لو جات رطوبة في الخارج.

من ضمن الاحتياطات اللي المفروض تستوي بعد تركيب عازل الماي لازم نركب بورد خشب عليه وقبله بلاستيك سميك والبورد حتى وقت الدفان ما يجرح الحصى البلاستيك والعازل .. البعض يركب طابوق حتى لو 10 سم وفي حال تركيب طابوق أَو غيره يستحسن نركب عازل حراري معاه.

في الدول كثيرة المطر والثلج يسوون العزل غير للبيسمنت .. يحطون تحت الأَرضية الخرسانية حجارة كبيرة شخالة ممكن يمر الماي منها بدون دفان رمل وفي الجوانب كذلك وتحت هذي الحجارة يحطون بايبات فيها فتحات لشفط الماي قبل ليتجمع قرب الحوائط والأَساسات تحت .. ينشفط الماي مثل نظام الصرف الصحي بمضخة تشتغل بعوامة وتدفعه باتجاه الصرف العام.

سعود.

22-06-2015, 04:53 AM

البيسمنت خلص ابشرك ....

حاليآ شغال في عمدان الدور الارضي ...

بخصوص العزل سويت رش بوتومين سائل و العزل المائي كامل للبيسمنت من القواعد والجدران الخارجية وفوق نهاية الدفان بشوي حسب ماقال الاستشاري ....
واذا عندي ملاحظات اكيد اكيد بشاورك .... وسبق لي اخذت برايك في امور كثيرة في المنتدى .....
الله يجزاك خير ....

معماري قطري

22-06-2015, 06:07 AM

الله يجزاك الجنة ويوفقك في بنيانك

معماري قطري

22-06-2015, 03:00 PM

هذي صورة مقربة أَكثر لمدخل البيت وموقع تانكي المياه .. اللي المفروض نوصل له بايب من برا يكون مدمج مع بنيان الحائط الخارجي لصب الماي بالدنكر وقت الحاجة .. وخزان الصرف الصحي اللي يفترض يوصلونه خطين صرف واحد من المطبخ الخارجي قريب للبيت وواحد من ورا البيت ويمر بين المجلس والبيت للخزان .. ولو كانت الشبكة واصلة يكون للمنهول الرئيسي اللي قريب من الباب حسب قوانين أَشغال.

بتبقى عندنا احتمالية طلب كهرماء لغرفة للكهرب وهذي في رايي تكون ممكن ورا غرفة السايق أَو في زاوية ليوان المجلس بس بشرط ان المجلس ينبني مع البيت وهذا ما يجب أَن يكون .. خط كيوتل سهل ومن أَي مكان ممكن.

http://i.imgur.com/UfvFCJq.png

معماري قطري

23-06-2015, 04:20 PM

إخواني وأخواتي القراء .. دوم لكل تصميم مراحل ( يفترض ) لكن دكاكين التصميم المنتشرة عندنا ما تسوي الشغل كامل.

بعد ما يتفق المالك على الإِطار العام يدخل لخصوصيات أَكثر ويركز على الصورة الجزئية والأقسام والفارغات واحد ورا الثاني ويربط علاقتهم ببعض .. والمفروض هذا شغل المهندس المعماري وينسق شغله مع الفريق الهندسي ومع المالك .. في البداية مقترح نظام التكييف وتأَثيره في المنظر العام ودراسة لكل الأُمور المتعلقة من التكلفة والجدوى والبدائل والجودة .. وهذا النقاش مهم من البداية وكذلك مهم نعرف خطتنا للأَعمال الخشبية والأَعمال المعدنية .. وإِن كان فيه داعي لتنفيذ تصميم داخلي متكامل يتم التنسيق في ذلك من البداية.

الهدف من كل هذا إِن كل شيء يكون متناسق والمخططات تكون متناسبة ومحسوب فيها كل شيء أَول بأَول .. وقرارنا السليم من البداية وحتى لو يكون مكتوب في عقد التصميم يسهل عملية التصميم بسرعة ويخلي الأُمور سلسة .. لذلك مهم جداً أن نتعامل مع مكتب شامل كل التخصصات التي نرغب في الاستفادة من خبراتها.

بالنسبة لموضوعنا هناك تطويرات أساسية أو بدائل للتصميم لكل حيز .. بعد اتفاقنا ( المفترض ) على التوزيع الداخلي وتوزيع الحوش .. هنا أَرى وجود شلال يصب على حائط حجري في المدخل سيكون حركة معمارية مبهجة .. مع جدول حيث يتحرك الماء بعد نزوله من الشلال لتحت الأَرض في بايبات ويمر في جدول حول الزراعة ويمر في بايب ثاني ناحية المدخل وثم في جدول ثاني وثم تسحبه المضخة المخفية تحت أَرضية المدخل ليصب في الشلال مرة ثانية .. هذا مع ضبط الفاقد من الماء بخزان تحت الأَرض ( صغير ) يمتليء تلقائياً بعوامة.

http://i.imgur.com/ftswT7V.png

الصالة الداخلية .. صالة المدخل .. كذلك واسعة للمرور وتعتبر موزع وسطي ويمكن اضافة قطاع بسيط كما هو موضح بالمخزن ذو الشكل المثلث وهو يهدف لعزل باب الغرفة .. والتي ممكن عملها غرفة ضيوف وعزلها بباب من الممر لو أَحببنا .. ويفيدنا في تخزين عدة التنظيف وبعض الحاجيات البسيطة.

معماري قطري

23-06-2015, 05:58 PM

لو حبينا حل بديل لحديقة مدخل أحلى وأَكبر شوي ممكن نصغر شوي درج المدخل ونسوي ممر .. الممر ممكن يكون قطع حجر وحولها عشب منبسطة للمشي .. أو نقدر نسوي ممر مثل الموضح مستقيم ومبلط .. الزراعة ست أشجار واشنطونيا أو قريبة منها بتكون مناسبة لأَنها ترتفع فوق وما تاخذ مساحة وتضايق المارين .. الباقي عشب وفي الطرف القريب نزرع نباتات متسلقة ممكن تطلع على العمدان للصالة فوق .. وممكن ورود أو أشجار مزهرة وممكن خليط .. وبالنسبة للمجرى المائي ممكن نسويه بسيط بحيث يكون بدون شلال وممكن نخلي الشلال نازل من فوق نافذة الصالة .. أَو ببساطة قربة محمولة على خشب يصب منها الماء ويتحرك بواسطة المضخة المخفية.

http://i.imgur.com/jH7nVln.png

معماري قطري

25-06-2015, 01:55 PM

تطوير التصميم هو ملاحظة البدائل الأَفضل والمهمة لإستخدام مريح ووضع تصور للأَثاث ولشكل المبنى ككل .. كذلك يتيح لنا أقصى استفادة من الأرض حسب احتياجنا الحالي والمستقبلي.

في الدوحة عندنا مباني وبيوت يزيد عمرها عن 50 سنة .. وهذي بنيت بمواد بسيطة لكن بعناية وبحرفية عالية ذاك الوقت .. منها وانا آذكر هنا المنازل والمباني ذات الطابع العمراني المميز والجميل .. مثل عمارة كليوباترا اللي تم تجديدها مع إِن شكلها القديم كان مميز جداً .. بيوت كثيرة بعضها قائم للآن كبيت الوالد علي بن حمد العطية .. رحمه الله .. وبيت الوالد خليفة بن عبدالله العطية في السد .. رحمه الله .. وهذه البيوت مع البيوت التجارية المبنية جنوب مستشفى رميلة بنتها شركة العطية المسماة اختصاراً الكات.

بيت الدرويش قرب مستشفى رميلة .. لا أَذكر إِذا هُدم أَم لا .. من 3 أَدوار وقديم جداً .. قصور رميلة من قصر الضيافة والقصر الخاص بسمو الأَمير المفدى .. هذا القصر سقفه منحني وبه فتحات صغيرة على ما أعتقد دائرية من الزجاج .. وعمره تعدى الخمسين سنة.

بيت الوالد عبدالعزيز بن خالد الغانم .. رحمه الله في الغانم القديم .. كان جاي منحني انحناء بسيط مع الشارع بوارش مصنوع يدوياً من الجص وكان قائم لفترة بسيطة ولا أَدري إِذا هدم أَو لا.

بيت للنعمة على ما اعتقد في المنصورة كان لفترة بسيطة موجود .. وبيت قديم كذلك شمال - غرب تقاطع حفصة .. مجمع مطاعم المفتاح قرب تقاطع رمادا .. كان في الأَساس بيت قديم للوالد جبر بن أحمد آل ثاني .. رحمه الله .. وتم تطويره ليكون هذه المطاعم واضافة مباني عليه .. والأَمثلة كثيرة ولا تقف عند هذا الحد والسبب يعود لجودة البناء مع ضعف المواد والتكنولوجيا ذاك الوقت.

في هذه الأَيام نرى الدورة تتكرر ونرى بيوت ومباني متميزة تبنى لتكون رمز .. بعضها تبنى بدقة وبجودة تجعل عمرها الافتراضي طويل جداً وبعضها تبنى بكثير من الغش والأَخطاء الهندسية فنرى آثار الشيخوخة تبدأَ عليها سريعاً ولا نتوقع لها عمر افتراضي طويل.

ما أَرمي اليه هنا أَنه من يبني ويتعب في التخطيط والبناء عليه أَن يبذل جهد أَكثر ووقت أَكثر ليحصل على منتج جيد يضاهي هذه المباني القديمة والحديثة المميزة في بنائها ودقة تصميمها .. مهما يكن مبناك فهو استثمار خاص بك فلا ترضى بالقليل ولا تبالغ في البهرجة الزائدة وأَسمع واقبل نصيحة المختصين في هذا المجال .. خصوصاً اللمسات التجميلية البسيطة والتي تجعل المبنى وقور وجميل بدون تكلف طول العمر .. الجمال هذا يقف وراه من المفترض بنية انشائية ليست كتل خرسانية وانما كتل خرسانية مدروسة لتعيش عمر طويل بدون تدهور وصيانات عضمى.

معماري قطري

27-06-2015, 01:51 AM

نرجع لموضوع تصميم البيت .. تمت مناقشات وتغييرات بسيطة ومقترحات وهذا تقريباً المقترح المفضل عندي.

باقي لتفصيله أَكثر بعض الدرايش للحمامات وبيت الدرج وهذي يفترض تنوزن مع الواجهات وبالنسبة لبيوتنا الواجهات يبين نصها الفوقي بسبب الأسوار العالية .. بس ما يمنع إِن واجهة مدخل البيت تكون أَقل شيء متوازنة .. والقصد يمتوازنة مب كل شيء تحت بعض واللي في اليمين نفس اليسار .. ما يسمى بالتناظر أو SYMMETRY

وهذا الدور الأرضي وتوزيع الحوش .. بما أَن الحديقة بتكون ورا لين يتقرر بناء ملحق .. وانا مقترح إِن الملحق يتصمم الحين وتؤخذ الموافقة على أساسه حتى ينحسب حساب الكهرب والماء .. شفت لو نفتح باب قزاز من المطبخ جهة الحوش أحسن وتكون الدريشة بعرض الحائط .. كذلك باب المدخل تغير شوي واقترحت يكون باب يفصل غرفة الطعام والغرفة في الدور الأَرضي .. والمخزن المثلث لعدة التنظيف وبعض الأَغراض.

http://i.imgur.com/YAdeFIV.png

معماري قطري

27-06-2015, 02:12 AM

هذي صورة مقربة لتغييرات المدخل .. حيث تم تصغير الممر الموصل للمدخل المظلل بصالة الدور العلوي .. وتمت زيادة عدد أشجار الواشنطونيا وممكن استخدام نخل عالي حتى لا يضايق السعف المارين .. أقترح تنفيذ شلال فوق نافذة الصالة وعمل هذه النافذة بعرض الحائط .. وجدول يمر ببايبات تحت أرضية المدخل ويصب من أعلى النافذة.

http://i.imgur.com/IjaQEF1.png

النصف الخلفي من البيت.

http://i.imgur.com/3YHl0Bb.png

معماري قطري

27-06-2015, 02:23 AM

وهنا الدور الأول والسقف .. والباقي هو الرخصة المبدئية بعد وضع هذه الرسومات بإسم المكتب الهندسي وترتيبها حسب شروط التخطيط والى ذلك الوقت على استعداد لإستقبال أَي مخطط ثاني.

وإِن شاء الله نتابع التصميم للنهاية مع التفاصيل الدقيقة ومع البنيان إِن الله مد لنا في العمر .. وانا أشكر الأخ اللي وافق على القيام بهذه الفكرة وعرض المخططات وإِن شاء الله يواصل معانا للأخير.

http://i.imgur.com/hpUmICL.png

معماري قطري

01-07-2015, 02:59 AM

السلام عليكم ورحمة الله وبركاته

أحد الاخوان تواصل معي في السابق لعمل مقترح يناسب احتياجه وأرضه .. وأرسلت له مخطط حسب وجهة نظري مناسب .. الآن أرسل لي مخطط غير كلياً.

المشكلة إِن المخطط اللي أرسلته في كمبيوتري في الدوحة ومجال التغيير معدوم هنا لأَن الفايل بي دي اف .. سأَضعه هنا للنقاش ولإِبداء الرأي من الجميع حسب رغبته.

طبعاً المخططين أَوليين ويحتاجون تطوير كامل .. مع ملاحظة إِن المخطط اللي سويته مقتبس منه نفس الفكرة بشكل أَصغر لولدي وإِن شاء الله بعد باحطه لو رجعت الدوحة.

هذا نسميه مقترح رقم 2 ومؤكد بإذن الله بنرجع لرقم 1 لو صار فيه تطور يذكر.

نبدأ بالدور الأَرضي وتوزيع وموقع المساحات من الأَرض

http://i.imgur.com/Is9WnTH.png

ملاحظاتي السريعة هي كالآتي: 1) توزيع المساحات من الممكن أن يكون أفضل .. المواقف مثلاً بعيدة عن الملحق وعن المطبخ الداخلي
2) نبدأ من جهة الملحق فوق .. فنجد باب غرفة الخدامات يفضل أَن يكون في الجهة القريبة للمطبخ والحمام يكون الجهة الأُخرى.
3) غرفة اليوتيليتي هل هي للكهرباء أو مخزن؟
4) في رأَيي متر ونص بين الملحق والبيت كفاية ولازم نطالب بها التخطيط وأوقات يعطون موافقة لاستغلال الأَرض جيداً .. لكن الاستشاريين ما يتعبون شوي وينفذون شروط التخطيط بحذافيرها.
5) بداية درج الممر يجب أَن تكون خلف باب غرفة الخدم حتى تكون حركتهم سهلة للمطبخ والبيت .. حتى غرفة المخزن اللي في الزاوية المسماة يوتيليتي روم المفروض الممر يغطيها وبابها يكون الجهة الثانية لسهولة الاستخدام.
6) كثير من المقاسات مسجلة خطأَ والعرض يفترض بأرقام وبدون مقاسات غير واضحة وبأَلوان فاتحة كالأَصفر.
7) وكثير من المساحات صغيرة وممرات ممكن نتخلص منها تطلع المساحة أَكبر مثل المحلس الخارجي وممر مطل على الدرج الدائري وسط البيت.

التصميم ككل ممكن يتطور أَكثر وأَكثر وبنشوف التصميم الثاني ان شاء الله مع إنه مب واضح وكان المفروض ارتبه من الأَساس وما كنت اعرف الطريقة قبل من الاوتوكاد والحمد لله عرفت شلون تصوير مقطع واضح وبحجم كبير.

ونكمل الباقي معاكم وقت آخر ان شاء الله.

معماري قطري

01-07-2015, 03:19 PM

بعض الملاحظات المهمة الأُخرى .. ما ادري ليش وايد يسوون درج مدخل البيت كبير وعريض .. وهذا مضايق الحوش والسيارات .. مع إن بيت كبير مثل هذا يتطلب مواقف سيارات لا تقل عن 6 مواقف الا ان العدد 3 ودخولها وخروجها صعب .. كان ممكن ارجاع الباب داخل شوي وعمل الدرج مع حافة البيت شبه داخلي.

إحساسي إن المالك حاب التصميم الجديد وباحط الدور الأول منه لإطلاعكم وملاحظاتكم وكذلك البنتهاوس.

في الوقت الحالي شغال على ترقية أفضل للموجود مع توزيعة الأرض وترتيب الوضع أكثر والاستفادة من المساحات.

هذا الدور الأول.

http://i.imgur.com/v0MKtvJ.png

وهذا البنتهاوس.

http://i.imgur.com/NLPhYCd.png

البنتهاوس مثل ما هو واضح غرفة وصالة دخول يشغلها الدرج الدائري واللي بيكون من أَرضية البيت للبنتهاوس متواصل .. وبيكون يخوف من فوق خصوصاً الصالة كلها مفتوحة على هذا الارتفاع .. لو حاولنا نشيل الدرج ونسوي درج بسيط ثانوي .. ونزيل الصالة ونخليها بارتفاع سقف الدور الأَول بنكون وفرنا كثير من مساحة البناء وتكلفة الدرج .. الدرج الدائري بس من الأَرضي للأول فرضاً ودرج انتقالي بسيط من الأَول للبنتهاوس ومعاه المصعد بيكون مثل ما هو .. ونقدر نسوي غرفتين بدل الغرفة.

لتحت انا مب مقتنع بأَشياء كثيرة وبديت اربط كل تعديل بالتالي وان شاء الله اخلص مقترح أولي للتعديل.

بالنسبة للمقترح اللي عملته قبل عندي النسخة بي دي اف وما طلعت واضحة وما اعتقد مناسب احطها باركز على التصميم ذيه .. وهذا أكيد بيطلع مكلف أكثر من الأول.

وبانتظار الملاحظات ان وجدت.

Bo3essa

01-07-2015, 10:02 PM

Bo3essa

01-07-2015, 10:27 PM

معماري قطري

01-07-2015, 11:36 PM

اخوي معماري
المطبخ الخارجي صغير لو تخليه 6*4 افضل
اعتقد في عمدان ثلاثه في الصاله لو ينشالون ويكون بس واحد طبعا افضل
مافي غرفه غسيل لو اصافتها مع الملحق الخارجي
مجلس حريم غير موجود لو نشيل غرفه ونخلي مكانها غرفه طعام بعد غرفه الضيوف
المطبخ الداخلي لو ينفتح على غرفه الجلوس ويكون بنظام اامطبخ المفتوح احلى
اللفت احس مكانه غلط
انا معاك في فكرة الدرج الثانوي احسن وافضل

معاك ان المطبخ الخارجي صغير .. مساحات وايد ضايعة والتوزيع مب مدروس صح .. ألحين انا شوي شوي ارتب الوضع وبيستوي المكان كله أرتب .. مشكلتي مشغول هاليومين مع مواعيد طبية بكرة وبعد بكرة ودوم لازم اروح مناطق بعيدة .. القبة المالك بنفسه نبهني لها وانا من محبين القبب.

معماري قطري

01-07-2015, 11:40 PM

لو تضيف قبه فيها درايش في النص بين الدرج الدائري بيطلع احلى
بالنسبه لي لو نغير الماستر الي فوق ونخليها صاله كبيره احلى
والغرفه الي الي معموله صاله فوق نخليها ماستر مع تكبيرها من الغرفه الي في الزاويه على اليمين
بعد الغرفه الي في الزاويه على اليمين الباب مالها لو نحركه يمين شوي عشان نخلي فيها غرفه ملابس
غرفه الرياضه لو نخليها في البنت هاوس افضل
ونخلي مكانها بانتري او مطبخ صغير
اتمنى ملاحظاتي تخدمكم

في هذي صدقت .. الصالة تكون مطلة على مدخل البيت أحلى .. وكذلك الغرفة الرئيسية .. موقع الزاوية ذي مميز .. انا صغرت متر وضغطت غرفة الرياضة وشوي من الصالة الوسطى والمكتب بدل 4.4 استوى 3.4 عرضه .. ما ابي استبق الحدث بتشوف فرق كبير في التصميم والنقاش اتمنى يستمر.

Bo3essa

02-07-2015, 12:23 AM

معاك ان المطبخ الخارجي صغير .. مساحات وايد ضايعة والتوزيع مب مدروس صح .. ألحين انا شوي شوي ارتب الوضع وبيستوي المكان كله أرتب .. مشكلتي مشغول هاليومين مع مواعيد طبية بكرة وبعد بكرة ودوم لازم اروح مناطق بعيدة .. القبة المالك بنفسه نبهني لها وانا من محبين القبب.

الله يشفي الوالده ويردكم سالمين يارب
والله يجزاك خير على ماتقدمه للاعضاء

Bo3essa

02-07-2015, 12:25 AM

في هذي صدقت .. الصالة تكون مطلة على مدخل البيت أحلى .. وكذلك الغرفة الرئيسية .. موقع الزاوية ذي مميز .. انا صغرت متر وضغطت غرفة الرياضة وشوي من الصالة الوسطى والمكتب بدل 4.4 استوى 3.4 عرضه .. ما ابي استبق الحدث بتشوف فرق كبير في التصميم والنقاش اتمنى يستمر.

باذن الله النقاش بيتواصل
رفي انتظار ابداعاتك كالعاده

معماري قطري

02-07-2015, 01:50 AM

الله يشفي الوالده ويردكم سالمين يارب
والله يجزاك خير على ماتقدمه للاعضاء

اللهم آمين والله يرحم والديك اخوي بو عيسى

معماري قطري

03-07-2015, 10:08 PM

تقريباً التعديل تم على كل الأَدوار وتمت دراسة التوزيع بشكل أفضل وتعديل بعض المساحات .. خلوني ابدأ بالبنتهاوس وانزل لتحت.

غرفة الرياضة استوت غرفة درج من الأَول للبنتهاوس .. وغرفة الرياضة ممكن ننقلها للبنتهاوس لو حبينا حتى لو بصورة مؤقتة ونغير استخدامها لغرفة عادية مثل ما هو موضح بالغرفة متعددة الاستخدامات.

تغييرات أساسية اضافة غرفة وازالة الصالة والدرج المتواصل لفوق + اضافة قبة فوق الدرج + غرفة مقسمة للتانكي والسخان المركزي وعدته وكذلك قسم للوحة التوزيع الكهربية بحيث تكون معزولة عن أي تسريب ماء.

http://i.imgur.com/YFNkKu8.png

والباقي إِن شاء الله متى ما خلصت التعديلات البسيطة باضيفها.

معماري قطري

03-07-2015, 10:10 PM

كذلك تمت إِضافة منور بين الغرفة والحمام للتهوئة والانارة الطبيعية.

معماري قطري

04-07-2015, 12:25 AM

هذا الدور الأَول فيه بعض التحسينات شغال عليها خصوصاً الدرج .. حسبت عتباته طلعوا ناقصين ونحتاج نضيف أقل شيء عتبتين .. حتى يوفر لنا ارتفاع مريح للعتبات .. انا احب 14 سم أَقل من الستاندرد ب 1 سم وبعض المصممين ما يهتمون ويوصلون ارتفاع العتبة ل 18 سم ويكون مزعج ومتعب .. والدرج الوسطي والتجميلي لازم يكون مريح .. درج جانبي أو خدمات مب مشكلة يكون مرتفع وتكون حتى العتبات بعرض أقل.

المشكلة اللي واجهتني لو ازيد بيستوي قريب من الباب ولو خليته لاف بيكون مب مواجه طريق الدخول من تحت .. هنا يبين لاف مثل ما سواه الرسام وفي رسومات ثانية يبين سيدة من بدايته .. حتى العتبات كل عتبة عرضها يختلف شيء بسيط والمفروض الرسام أو المهندس يقسمهم صح قد ما يقدر.

http://i.imgur.com/WIgRjqP.png

Bo3essa

04-07-2015, 02:31 AM

يعطيك العافيه اخوي
ماشاء الله عليك ترتبت الخريطه
بس بخصوص الغرفه الي في الزاويه يمين اخر شي لو تغير الباب وتخليه مقابل باب الغرفه الي مقابلتها عشان يستغل مكان الدخول حاليا ليصبح غرفه ملابس صغيره
القبه مكانها وايد حلو وشكله بعد حلو ( انا عندي نفسها تقريبا )
بصراحه انا للحين عند رايي بخصوص تبادل غرفه الماستر مع الصاله
واذا المالك عاجبه الحالي ياليت نضيف بانتري صغير فيه مغسله وثلاجه ومكرويف مثلا في زاويه الماستر الحالي مقابل الدرج
البنتهاوس ماعليه كلام ممتاز توزيعه
قواك الله

معماري قطري

04-07-2015, 04:24 AM

الله يعافيك اخوي بو عيسى

بالنسبة للغرفة اليمنى فوق حركت بابها ذيك الجهة حتى اسوي مكان للبوفيه .. مع ان المفروض يكون البوفيه في الصالة وقريب من قعدة الكل .. والبوفيه أو البانتري ممكن يكون صغير مثل اللي في الفنادق .. بس أَحياناً لو العائلة كبيرة يحتاجون ثلاجة كبيرة للمشروبات والاسكريم والفواكه ومغسلة صغيرة .. وكبت بسيط حق الصحون .. اللي في بيتي سويته مفتوح على الصالة بعرض 3.3 متر وعمق 1.6 متر وهي مساحة استقطعتها من الحمام الرئيسي - يكرم القاريء .. وبالغت حطيت فرن وشفاط دخان وله مدخنة فوق السطح .. بس كلش ما استخدمنا الفرن وكله عمل شاي وتصخين شيء بالميكروويف.

استغلال مساحة الدخول ينفع لكرسي وطاولة جدامه .. تسريحة بس لأَن المساحة ضيقة .. سويتها بفكرة الأَرفف المربعة اللي يسمونها بيوت الحمام .. بعمق بسيط تكون لتوزيع الأَغراض الصغيرة وحفظها .. وللفواتير مثلاً بعدين عندنا القوس محدد مكان الكبت ويعتبر فاصل ثاني .. ولو تلاحظ كتف القوس الأَيمن فيه تفريق وروشنه طويلة بأَرفف قزاز وانارة من فوق أو جانبية داخلية.

انا حاولت احافظ على الزاوية المقوسة ولا المفروض تكون زاوية مستقيمة وتكون هذي الصالة صحيح .. بس لو نقلناها نحتد نغير الترتيب كامل والحمام هذا توزيعته جيدة والصالة الحالية كافية لأَفراد البيت خصوصاً اللي يكونون فوق .. تقوس الزاوية يخلي الحركة للملحق سهلة .. وممكن يكون فيه جهة الصالة من تحت طوب زجاجي يعطي نور ويخفي الموجودين من عيون السايق مثلاً في الحوش .. وفوق ممكن نركب قطع درايش عادية ثابتة أو تنفتح وضروري نحط ستارة .. الشكل من الخارج بيتوازن .. وتبقى الصالة العلوية صالة تلفزيون وبباب قزاز عن قوة الصوت وفي نفس الوقت ما تبين الصالة معزولة.

بالنسبة للبانتري صدقني فكرت فيه في هذا المكان .. خصوصاً اني غيرت الحائط من مقوس لمستقيم .. المكان الأَفضل له يكون مدمج مع كبت التلفزيون في داخل الصالة .. وممكن نسوي بانتريين واحد في الممر اللي صوب اللفت وواحد في الصالة.

إن شاء الله بكرة احط باقي التعديلات ونشوف راي المالك .. الصالة التحتية صج افكر فيها أما تكون غرفة لو فيه لها حاجة أو صالة رياضية وتنفتح على الحديقة ورا .. أو مكتب كبير للعيال وممكن نستقطع منها مخزن.

بتلاحظ التصميم ان شاء الله شلون بيكون .. من تحت بنظام مفتوح أكثر ومن فوق أقل ومن البنتهاوس شبه مسكر وخاص .. مع وجود الحوايط فوق بعض.

البنيان هذا بيكون مكلف أَكثر من التصميم البسيط السابق وباحط التصميم السابق للاطلاع أيضاً.

Bo3essa

04-07-2015, 01:10 PM

ماشاء الله عليك رد واضح ومفصل واقنعتني بوجهة نظرك خاصه وانت كنت حاسب حساب كل شي
وبانتظار الدور الارضي
يعطيك العافيه

معماري قطري

04-07-2015, 03:54 PM

ياليت يا بو عيسى الكل يركز في هذي التفاصيل البسيطة .. هو دوم التصميم تغليب الأَهم على المهم وترك الغير مهم بعيد .. ولازم نضحي بجزئية بسيطة .. لذلك يقال ان التصميم فلسفة .. وفي رايي فلسفة صامتة يدخل فيها النور واتجاه النظر ومعوقاته والتهوئة والتكييف والدفء وقت الشتاء وجودة المواد ونظافتها وعزل المبنى عن عوامل الجو ودرجات الحرارة المتغيرة والصوت وعندنا الغبار .. درجات الخصوصية للأدوار ولكل غرفة في كل دور مهمة .. وعندنا بعض الممرات الضيقة في بداية الغرفة تعطينا هذا الهدوء .. إضافة لإفتراض وجود السجاد في الغرف فهو يعطي دفء وهدوء .. واغلاق صالة التلفزيون العلوية بباب زجاجي مثل ما ذكرت يفيد في عزل صوت التلفزيون ويخدم انفتاح الصالة على البيت.

هذي صورة لمقترح توزيع الدور الأَول محسنة عن التوزيع السابق .. توسعت الفتحة اللي تطل على الدرج واستوت عندنا عتبات الدرج 26 ولو خلينا كل عتبة بارتفاع 14 سم بنوصل لإِرتفاع 364 سم وصافي بيقل شوي بسبب سمك أرضية الدور الأَول وممكن نزيد عتبة في آخر الدرج ويستوي عندنا الارتفاع 378 .. نشيل منها فرضاً ارتفاع الجبس 10 سم وسمك صبية الدور الأَرضي فرضاً 25 سم بيطلع لنا صافي 343 سم ولو ركبنا دكت سبلت بننزل شوي تحت الثلاثة متر .. وممكن نركب الدكت على الحواف ونسوي الجبس طبقتين ونستفيد من الارتفاع.

باقي في الدرج الاستراحة اللي اشوف تكون وسط الدرج ملاصقة للحائط والمفروض الرسام يسويها مع ترتيب العتبات بشكل أَكثر دقة .. الدرابزين يفترض تصميمه يكون بسيط وبقوائم مستقيمة وبدزاين بسيط جداً لتوفير التكلفة ولا بندخل في ال 200000 وفوق .. كذلك لازم الدرابزين يكون مثبت من الجوانب حتى يبين الدرج بعرض صافي 120 سم .. بالطريقة المرسومة الدرابزين ياخذ شوي من العرض.

عتبات الدرج البسطة ممكن نخليها رخام نوع وسط لتوفير التكلفة والواجهة بلاط مزخرف ونعمل حساب للإضاءَة الخاصة بالدرج وتكون ال اي دي.

والباقي تحسينات بسيطة على الرسم السابق.

http://i.imgur.com/FL8lAdR.png

معماري قطري

04-07-2015, 04:07 PM

الممر فوق الدرج شبه مفتوح على منطقة الدرج للاستفادة من النور اللي جاي من القبة فوق .. والغرفة اليسرى فوق صغرت شوي في الحمام ووسعت المدخل وكبر عندي شاور الغرفة الرئيسية 20 سم .. وممكن يكبر أكثر لو حبينا لأَن سعة الحمام كبيرة والمجال مفتوح.

بالنسبة لعمل بانتري شاي صغير في صالة التلفزيون ممكن بسهولة مثل هذا الشكل ونترك البانتري الثاني مكانه .. والبانتري شكله مفتوح وبواجهات زجاج وأَسطح غرانيت يطلع حلو ولو حبينا نخفيه بتشكيل خشبي ممكن.

http://i.imgur.com/6pYI9eb.png

معماري قطري

04-07-2015, 04:45 PM

نروح للدور الأَرضي مؤقتاً واحتمال فيه تغييرات بسيطة.

أَكثر التعديل تم في الدور الأَرضي وتم تصغير عرض المنزل ككل بمقدار متر حتى يكون ممكن يترتب في الموقع مثل الشكل ذيه.

الارتداد الجانبي والخلفي 2 متر وممكن يقل حسب النقاش مع التخطيط .. والممر بين الملحق والبيت 1.5 متر والتخطيط اتوقع يطلبون مترين وممكن يوافقون على متر ونص .. ولدخول السيارات وخروجهم الوضع واضح والمسافة للمناورة متوفرة .. والمظلة ممكن تغطي الأَربع سيارات وتكون بدون أَعمدة في الواجهة سوى عمود واحد قرب زاوية البيت المقوسة وباقي المظلة تكون مثبتة في الحائط وفي غرفة السائق.

مكان السيارتين موقف مؤقت وممكن يكون فيه خزان الصرف الصحي لو دعت الحاجة اليه .. ممكن شوية زراعة وقربها الموقف وباركز ان شاء الله على المساحات بتكبير وشرح أكثر.

http://i.imgur.com/0GAAXE4.png

معماري قطري

04-07-2015, 04:50 PM

صحيح نقطة مهمة وسؤال مهم أَشار اليه أحد الأعضاء وهو الغرفة اللي جانب المجلس الداخلي هل هي ضرورية أو ممكن نستغني عنها بغرفة طعام؟ وكذلك صالة العائلة في الزاوية اليمنى فوق ممكن تكون هي الغرفة ونكتفي بصالة واحدة.

ننتظر رد المالك ورأَي الأعضاء الكرام.

سعود.

04-07-2015, 07:17 PM

معماري قطري

04-07-2015, 09:13 PM

اخوي معماري

كنت بتكلم من فترة عن تكبير مساحة مغاسل مجلس
( الرجال ) الخارجي
واشوفك عدلتها .
توقعت ماتمر عليك .
بس السؤال الارتداد بين الشارع والمجلس 1.9 مااعتقد يمشونها البلدية لان الارتداد القانوني 3 متر !!!!!!
وغرفة الحارس قانونيا !!!!!

هم لازم بيطلعون بملاحظات وكل واحد يطبق قانون ما نعرف أَساسه .. والحلول موجودة بس هذا الأَفضل وأي استشاري شاطر ممكن يحاججهم وفي حالة رفضوا فتح باب غرفة الحارس على حدود الأرض من داخل ممكن نحرك الباب الخارجي للخارج ونحركه شوي نوسع لمدخل غرفة السايق .. المجلس هم شرطهم ما ينفتح على برا مباشرة وجاري له حول سنة مكمل بنيانه ومسوي مجلس يفتح النفس بابه على الشارع وكذلك الدرايش .. وواحد ثاني يبني من الأَساس مثل الجار الأَول.

التخبيط يضيق على العالم وتخبيطهم مب في محله .. المفروض مجالس أهل قطر مثل قبل مفتوحة على الطريق ومرحبة بالصديق .. أَحد شيبانا مر على مجلس محاط بسياج حديد وضحك على اللي جالسين فيه قال لهم كأَنكم .... في قفص .. وكلامه واقعي المجالس لا بد تكون بواجهات زجاجية ومفتوحة تعكس التراث القطري .. والحماية واجب الجهات المختصة بكاميرات ورقابة وعقاب رادع.

Bo3essa

04-07-2015, 09:54 PM

Bo3essa

04-07-2015, 10:00 PM

تانكي الماي اعتقد مكانه بعيد لو نقطع الماي ممكن نخليه خلف غرفه الدريول

Bo3essa

04-07-2015, 10:08 PM

بعد مالقيت باب الحوش الصغير الي ندخل الضيوف منه ممكن نفتح باب مكان السيارتين

معماري قطري

04-07-2015, 10:36 PM

بارجع لملاحظاتك بو عيسى قبل هذا تطوير للمجلس الخارجي اشتغلت عليه لإستغلال المساحة أكثر والغاء غرفة الطعام .. خصوصاً للرجال وقت العزايم لقن ينحط على الأرض ويبدأ الهجوم والقصف السريع.

السجادة الموضحة في الوسط تكون بمستوى واحد وشوي مرتفعة لكن مثبتة من الأطراف في حفرة وسطية وتحتها حشوة .. وحولها رخام أو غرانيت أو بورسلان .. السجادة ينحط عليها اللقن وهنا المساحة تكفي ل 2 أو واحد عريض للحاشي .. مثل نظام أول وشحلو نظام أول يجوعون الضيوف وهم ينطرون وفجأة يدخل اللقن وسريع سريع يبدأ الأَكشن.

فيه رواشن 5 ورا الكراسي في الحائط المزدوج بسبب قوانين التخطيط .. وممكن نكررها في الحائط المقابل بعمق 10 سم والسكاي لايت فوق ينور المكان بمساحة 1.4 في 3.8 والواجهة قزاز متصل الباب.

http://i.imgur.com/DlDuhei.png

معماري قطري

05-07-2015, 12:29 AM

اخوي معماري
العمدان الثلاثه الي في الصاله احس كثيره اذا صارت واحد اعتقد احلى
المطبخ الخارجي لو نزيده على الاقل 60 سنتي حتى يصير 5*3.5 معقول ونقلل من اللاندري مثلا 60 سنتي او نكبر الملحق بشكل اكبر
غرفه العائله اعتقد يحتاجون حمام ممكن نحطه بدل المخزن الي عند اللفت طبعا حسب احتياج المالك

بخصوص اللوحة الرئيسيه حق الطابق الارضي وين بتكون هل بتكون مخفيه من جنب اللفت ?
المطبخ الداخلي لو نقلل البيبان اعتقد ثلاثه وايد

معاك في الغاء العمدان وترك واحد بس يحمل العارضة فوقه .. وتم تحريك تانكي الماي .. فكرت قبل في تمديد البايب اللي يصب فيه الدنكر في الحائط وهذا ممكن بس الأَعمدة بتسبب مشكلة .. بالنسبة لباب الدخول الصغير نحتاجه للسائق واللي بيجي البيت وبيدخل في الغالب مقرب أو من الزوار الحريم تنزلهم السيارة داخل وتوقف في الموقف المفتوح أو يطلع السواق برا.

تم تصغير غرفة الغسيل واشوف المطبخ الخارجي كافي للطبخ وممكن حتى نضيف له تنور لو حبينا.

http://i.imgur.com/7Qq3OVx.png

معماري قطري

05-07-2015, 12:52 AM

الدور الأرضي أصبح مفتوح من جهة المطبخ الى الممر المؤدي للغرفة والمجلس إلى غرفة الطعام والجلوس .. جانب المطبخ فيه بابين والحائط أغلبه قزاز حتى يطل على المطبخ الخارجي ويدخله النور الطبيعي من الممر اللي بين المطبخين .. وهذا الممر ممكن تغطيته ببلاستيك أو قزاز لدخول النور والتخلص من الغبار .. ونحط باب في زاوية المطبخ وباب ثاني ورا غرفة الخادمات فيكونون شبه داخل البيت .. وفي الطرف قرب المخزن مغسلة أرضية كبيرة تنفع حتى للذباح ولغسيل الأشياء الكبيرة.

ممكن تكون المنطقة ما فيها صرف صحي ونضطر لعمل خزان صرف مكان سيارة في الموقف المؤقت .. وممكن نحتاج غرفة كهرباء حسب احتياجات وشروط كهرماء وهذي لو لها داعي الله يحل مشكلتها في وقتها أو التخطيط يقترحون مكان لها .. ممكن يمين الباب وبابها من داخل قرب مدخل البيت .. بس بتكون قريبة من خزان الصرف لو وجد.

Bo3essa

05-07-2015, 01:35 AM

معماري قطري

05-07-2015, 01:57 AM

ماشاء الله
شلون تغير المخطط السابق الي كنت اشوفه مب مناسب لا في التوزيع ولا المساحه
الصراحه ابدعت والله ماقصرت ترتب مضبوط
خاصه بعد ما فتحت غرفه الضيوف مع الغرفه الي فوقها
صار في صاله مفتوحه
ومجلس مغلق نوعا ما
انا بالنسبه لي معتمد ولا لي اي ملاحظه
والله يبارك حق المالك ويتوفق في مقاول ممتاز
يعطيك الف عافيه اخوي معماري

الله يعافيك ويخليك اخوي بو عيسى

خلاص ما دام انت اعتمدت وانا تقريباً معتمد باقي سعود يعتمد وبس الباقي على المالك

ومنه ان شاء الله ننتقل للتصميم رقم 3 ونشوف من بيكون صاحب رقم 3

معماري قطري

05-07-2015, 03:58 AM

حسبت مساحة البناء وطلعت 946 لكل الأدوار والمباني .. والتصميم السابق كانت 870 بس هذا التصميم وايد أحلى من السابق وبالتوفيق للمالك بس يهتم بالتصميم الانشائي يكون اقتصادي ويتوكل على الله.

Qatar.N

05-07-2015, 04:51 AM

معماري قطري (بوعبدالله) وبو عيسى وبو سعود اثريتم الموضوع بالمشاركه في ابداء ارائكم في هذا التصميم انا كنت متابع بصمت لما تخطه اناملكم الذهبيه بقياده مهندسنا العزيز المبدع بوعبدالله الله يرجعه مع الوالده بالسلامه ان شاء الله.
التصميم بعد التعديل لا يعلى عليه ومدروس فيه المساحات بدقه .
بس عندي ملاحظات بسيطه وياليت تسمحون لي فيها وهي كالتالي:
1- الملاحق الخارجيه هل من الافضل نخليها خلف المبنى كما في السابق حتى نقدر نعرض في المبنى اكثر على الاخذ بالاعتبار سهوله نقل مستلزمات الضيافه والطعام من والى المجلس.
2- انا افضل المجلس والمقلط او المطعم مع بعض بشكل عرضي والمغاسل تكون مفصوله وملحقه مع المطعم بمدخل مستقل( طبعا استفيد من ارائكم حول هذا
الموضوع). ودفع المجالس على الشارع مباشره انا شوف بيوت كثيره مجالسها على الشارع مباشره يمكن ارتداد من مدخل المجالس حول النص متر.
3-لو حبينا نستفيد من الارض ببناء نصف بيسمت ماهي ارائكم لتصميمه بالشكل المناسب.
4-في النهايه نريد تقيمكم للتصميم من حيث المساحه وعمليه توزيعه بعد التعديل وهل ترونه مناسب (كل المتطلبات فيه).
اسمحو لي على الاطاله.. وبنتظار ارائكم.

معماري قطري

05-07-2015, 10:42 AM

إخوي قطر.ن شكراً على الكلام الطيب وعلى ابداء الملاحظات

ورداً على ملاحظاتك بالنسبة لموقع الملحق في الجنب سهل ترتيب الأَرض ووسع عندنا وترك حديقة صغيرة ورا .. وتقدر تقول الملحق شبه مخفي وقريب للمواقف ويعتبر مدخل ثاني للبيت .. بعدين استوى أقرب للمجلس من كونه ورا وأقرب لنقل الأغراض للمخزنين الداخلي والخارجي عن طريق رامب سهل.

الملاحظة الثانية .. المجلس في التعديل الأخير يستوعب عدد 21 شخص وممكن يزيد لو حطينا كراسي كلاسيك أو سوينا جلسة أرضية .. ووجود سجادة كبيرة في الوسط يفترض تكون مع حشوة ومريحة للجلوس لتناول الطعام .. وهذي عادة مجالس قطر قبل فصل قاعة الطعام وتصغير المجلس ما جانا الا مع الحداثة .. وطبعاً اللي عندهم مساحة كبيرة ممكن يسوون قاعة طعام كبيرة ومجلس يكفي احتياجهم.

وضعية المجلس بهذي الطريقة جات لحساب مساحة فاضية لحركة السيارات .. ولو فيه داعي لعمل فصل لغرفة الطعام ولو إِن المالك مستعد للتكلفة العالية انا انصحه بعمل بيسمنت تحت المجلس لغرفة الطعام + رفع المجلس والله يعينه على التخطيط .. حتى وضع المجلس على حافة السور ممكن بس جرب حظك مع التخطيط .. بالعكس تقدر تسويه كمخطط أولي وتحاول.

نقطة 3 انا رايي ونصيحتي للكل البيسمنت شيء نحاول نبتعد عنه قد ما نقدر ولو حبينا نسويه نسويه بطريقة العزل القوية وبتصريف للماء عن طريق مضخة حتى تنسحب الرطوبة أول بأول .. وأَرض قطر هشة وفي نفس الوقت كبريتية تاكل الخرسانة والرطوبة موجودة صيف وشتاء.

بعدين البيت ما شاء الله كبير واحتمال عدم الموافقة على مساحات اضافية.

تقييمي للتصميم والمتطلبات اللي تم اقتباسها من التصميم السابق إن الفرق واضح وقبل كان استغلال الأرض سيء للغاية والمجلس صغير والمواقف محدودة وصعب دخولها .. حتى جزء تقوس الحايط داخل على داخل وبيكون مزعج في وضعية الأثاث ومزعج في البناء .. مع الملاحظات اللي ذكرتها من بداية التصميم .. حتى الملحق توزيع الأبواب غلط واختار الرسام المسافة البعيدة .. ألحين الأبواب قريبة للبيت.

ونشوف للذكرى.

http://i.imgur.com/Is9WnTH.png

الكفــــــو

06-07-2015, 10:40 AM

معماري قطري

06-07-2015, 12:24 PM

عليكم السلام ورحمة الله وبركاته اخوي الكفو

هذا التصميم منتشر وتقدر تقول ستاندرد عند تقريباً كل الاستشاريين .. يكون التعديل عليه حسب الموقع وحسب رغبة المالك بتغيير بسيط .. والاخوان اللي يعرضون تجربتهم ينشرون في البداية ثقافة تطوير التصميم للأَفضل ومنها يفيدون ويستفيدون.

بالنسبة لإِستعمال التصميم مثل ما هو هذا تطلبه من المالك .. واتوقع الملاك جميعهم ما يقصرون وما عرضوا تصاميمهم الا للفائدة العامة .. وفي حال وافق نرتبه لك حسب أرضك وحسب متطلباتك ولازم لك طريقة ثانية.

تبقى بعد الواجهات ونوعية التشطيب النهائي هذي يدخل فيها الذوق الشخصي مع إن المفروض يتدخل المهندس المصمم بس مهندسينا في قطر تعودوا يسوون اللي يقوله لهم المالك بدون طول نقاش ويريحون راسهم .. واللي ياخذ لفة بسيطة يلاحظ بعض المباني يقول من هذا اللي مصممها ويحس بحركات قبيحة ما كان لها داعي مخربة منظر المنزل .. هذي السلبيات مفقودة ومقضي عليها في الدول اللي مجالسهم التخطيطية تشتغل صح وما توافق على تصاميم ضارة بالذوق العام.

اللي بيبني ياخذ لفة في الدفنة ويشوف تصاميم البيوت كيف هناك .. منطقة كبار الموظفين القديمة .. أَيام المعماري حمد مبارك بوجسوم السليطي ومن معاه ذاك الوقت وأيام التصميم اليدوي الصعب وهم يراجعونه نقطة نقطة .. ويمر يشوف مثلاً معيذر أو عين خالد ويركز على البيوت الحديثة بيعرف كيف تردى عندنا التصميم والذوق العام.

إِن شاء الله بستعرض طريقة تصغير بعض التصاميم وكيف نختار البدائل اللي تخلي المنزل أرخص وأَفضل وقوي .. القوة تعني الحماية ولا تعني زيادة الحديد والخرسانة .. حماية الهيكل والطابوق والأساسات + حماية البيت حماية حرارية.

على المخطط الأرضي نشوف توزيع الأَثاث ونتخيل طريق الحركة ونعرف وين بتكون الدرايش والأَبواب ونقاط الكهرباء والمفاتيح .. ومثل ما توزيع الحيز الصغير صعب أَحياناً توزيع الحيز الكبير أصعب وبعض الأوقات تنتج عندنا مساحات فاضية كثيرة .. وهي خسارة كبيرة على المالك خصوصاً لو أرضه صغيرة وميزانيته محدودة.

أعرف واحد تم يبني 15 سنة وواحد 10 سنين والاثنين مناصب كبيرة والله فاتح عليهم .. لكن ركزوا على بنيان معقد ومزخرف من الخارج.

شمس المغيب

07-07-2015, 01:30 PM

السلام عليكم
ماشاء الله عليك افكارك حلوه استفدت منها وايد في تصميم بيتي

عندي ملاحظة بسيطة
بالنسبة للغرفة الرئيسية لو يتغير مكان المدخل ويكون في الزاوية المكسورة
ونستغل المدخل بحيث تكبر غرفة الملابس اذا انلغت الطوفة وتستوي وك ان كلوزت
بنفس مدخلها المواجه لباب الحمام على شكل حرف u
وممكن ينفتح شباك مواجه غرفة الملابس للتهوية والاضائة الطبيعية

الملاحظة الثانية غرفة الشغالات وغرفة الغسيل بحاجة لشباك تهوية

ولك تحياتي

معماري قطري

07-07-2015, 01:54 PM

عليكم السلام ورحمة الله وبركاته

ملاحظتك فكرت فيها بس اهتميت بهدوء مكان النوم بما إِن الباب بعيد عنه .. وصحيح الووك ان كلوزت بتكون وايد أفضل .. ولا يهمك اسويها كمقترح ثاني .. وبالنسبة للباب وأبواب الغرف كلها رايي تكون بربلات ومن تحت تسكر مع السجادة بحيث ما تكون مرتفعة ويدخل النور خصوصاً القبة بتدخل نور مباشر من بعض الفتحات وحلو بيكون في الصالة لكن مزعج لو تسلل من تحت باب غرف النوم.

بالنسبة لنوافذ البيت كلها يبي لها ترتيب وتغيير وتندرس مع الواجهات مثل ما ذكرت قبل وانا يمكن اهتميت ببعضها اللي بالأزرق الفاتح كحاجة مثلاً لادخال أكبر قدر من النور أو لعمل جدار مفتوح مثل بين المطبخين .. والمدخل الرئيسي والباقي خليته للاستشاري يحلل راتبه .. حتى غرفة غسيل الملابس تحتاج تكون الدريشة متصلة مع الباب والاثنين قزاز.

معماري قطري

07-07-2015, 04:54 PM

شمس المغيب ما شاء الله عليه اقتراحه كان في محله واشتغلت عليه .. وللأَمانة وضعية غرفة الملابس والحمام والغرفة مقاربة نوعاً ما لغرفتي الحالية .. ممكن يكون فيه باب يفصل التسريحة عن غرفة النوم وممكن نخلي مدخل غرفة الملابس من صوب التسريحة بس بنخسر جزء من الكبت.

http://i.imgur.com/hsZie6f.png

معماري قطري

15-07-2015, 05:55 PM

معماري قطري

15-07-2015, 11:17 PM

معماري قطري

15-07-2015, 11:22 PM

بالنسبة للمصعد أول مرة اشوف مصعد بيته طالع هشكل لفوق وبعرض المصعد بس .. العادة أَما غرفة مفتوحة فوق فيها مكيف لتبريد معدات المصعد أَو النوع اللي ببستن وما يحتاج غرفة نهائياً فوق.

لو المصعد 2 في 2 نحتاج فوق لغرفة في حدود 2.5 في 2.5 ويمكن أَكبر والمفروض التنسيق مع شركة المصعد لمعرفة متطلباتهم

سعود.

16-07-2015, 12:46 AM

يعطيك العافيه اخوي معماري ...

بخصوص ارتفاع الفيلا 14 متر اعتقد البلدية ماتوافق عليها .
الغرفة الماستر الي في الدور الاول فيها 2 درس لو تنفتح على بعض يطلع لك درس 4*2 اشوفها احسن .
اللوبي الي في الدور الارضي لو يصير ممر اشوفه افضل ..
المصعد لو يرجع الا اخر الفيلا بيحل مشاكل التوزيع ...
توزيع المكيفات بدور الاول بتطلع بعضها بنص البنت هاوس يحتاج تغير للمكان او عمل باند لها في النهاية ...
الصاله العلوية لها باب اعتقد لو ينشال الباب وتكون صاله مفتوحه يكون افضل

وسلامتك .....

معماري قطري

16-07-2015, 02:20 AM

ما شاء الله عليك يا سعود بديت اشك انك مهندس .. صج ملاحظاتك جديرة بالدراسة

انا تهمني رسومات الاوتوكاد لأن بسهولة اقدر اقيس عليها واحط الأدوار كلها جنب بعض واشوف تأَثير كل جزء على الثاني

حسب كلام المالك اختلفوا معاه على 30 سم لازم ينزلها من ارتفاع البيت وهذي سهلة وفي صالحه .. انا اقترحت حتى 45 سم من البيسمنت حتى ينزل مستوى أرضية الدور الأرضي .. وعندي تعديلات بسيطة جداً ممكن تتوضح على رسم الاوتوكاد.

وتنزيل بيت المصعد ممكن يتم بسهولة لو تم التنسيق مع الشركات الخاصة بالمصاعد .. وعن موقعه لو تحرك ورا اشوف الوضع صعب خصوصاً المساحة صغيرة وبيكبر عندنا البيسمنت والمالك بروحه متجاوز المساحة المسموحة للبناء.

سعود.

16-07-2015, 02:44 AM

ومنكم نستفيد ....
انت المرجع لنا في هذا المنتدى الله يجزاك خير .

معماري قطري

16-07-2015, 03:59 AM

والله يا اخوي ما اجاملك انت وبعض الاخوان هذي حقيقة .. نقاشنا في التصاميم السابقة نبهني لأُمور كثيرة

أَحياناً نضطر نضحي بشيء لأَسباب قوية وصعب نسوي كل اللي نبيه ولازم نكون عقلانيين .. خصوصاً بالنسبة للارتفاعات وللتكييف ونعرف كيف نوزع التكاليف صح .. مثل التكييف وهو مهم وموضوعه مزعج من التركيب لين الصيانة لين الاستبدال .. كل جزئية لها عمر افتراضي وطال الزمن أو قصر لازم تتبدل .. البعض يركب دكت سبلت للمجلس أو مركزي .. ويمكن يشغله في المناسبات وفي أَيام تنعد على الأَصابع أو يشغله طول الصيف وما يكون فيه حد في المجلس .. والبديل الأرخص موجود .. دكت سبلت ولا سبلت ونوعياته كثيرة وصيانته سهلة واستبدالة سهل.

هذا مثال وغيره كثير ممكن نقيس عليه والحمد لله متابعة الكثيرين لمواضيع البناء وثقافتهم في هذا المجال كبيرة وهذا يفيد الجميع .. حتى المختصين لو ما يتابعون ويقرون ويطلعون ويتدربون على بعض الامور ينسون ولا تكون عندهم حلول صحيحة.

مستعد اجزم من تجربتي مع التصاميم ودراستها إن كثير من المشاريع يسويها رسام غير مؤهل وبدون تفكير معماري وهندسي صحيح .. يطبق بس اللي يبيه المالك وهذا خطأَ كبير ولازم يكون فيه اهتمام من المهندسين ونقاش مع المالك .. وأتوقع اللي نسويه في هذا الموضوع بالذات متابعة ونقاش مفيد للكل للوصول لتصميم مريح وغير ممل وعصري.

ما شاء الله هاللحظة اسمع صب الخرسانة في عمارة قريبة .. بهدوء وبدون مصارخ وحشرة .. بس اسمع الخرسانة تتحرك لفوق .. حتى معداتهم هادية .. بس بسبب زحمة المرور وسهولة العمل في الليل والجو مناسب يشتغلون هالوقت .. عندنا حتى قانون درجة الحرارة يتجاوزونه ويصبون في عز الظهر.

معماري قطري

22-07-2015, 10:42 AM

البارحة اشتغلت على سكتش لمقطع طولي لبيتي الحالي .. وهذا صممته من بداية ال 2000 ويمكن قبل وانتهى بناؤه في 2005 حيث بداية البناء كانت في 2003 تقريباً.

كنت مواعد متابعين موضوع الأخ q-1 مشاكل بعد البناء ورتبت هذا السكتش لتوضيح الارتفاعات والدرج كمعلومة عامة للكل .. وسبق عرضت التصميم للي يبيه بدون مقابل بس ياخذه من الاستشاري ويغير فيه حسب رغبته والله يعينه على تكاليف الاستشاري .. المعماري انا اشتغلته بالكامل وتدخلت في الانشائي وباقي الخدمات .. والتصميم خذ حول سنة لين اكتمل .. والمناقصة سنة ثانية .. والبناء حول 3 سنين.

حطيت صور كثيرة وباحط بإِذن الله لو دعت الحاجة للتوضيح.

إعتمدت في التصميم نظام التدرج في المساحات المعمارية من لحظة الدخول للحوش ومن ثم النزول من الموقف المظلل وعندي موقفين يشيلون 7 سيارات وموقف تحت المدخل لسيارة .. ومواقف مفتوحة ممكن توصل لحتى 5 سيارات زيادة بس بيكون صعب الطلوع .. ال 8 مواقف المظللة سهل الطلوع لكل السيارات تقريباً.

المدخل جدامه دوار مزروع بست أشجار واشنطونيا وكانوا صغار والحين كبروا مثل اللي في الرسم .. وبابه زجاج يدخل على صالة توزيع صغيرة 3 في 4 تقريباً وفيها باب للمجلس وبعدين باب خشب للصالة وباب لغرفة طعام أرضية أو مجلس صغير .. عندي المجلس مقسم واحد معاه غرفة طعام مفتوحة عليه بكراسي وطاولة وواحد أصغر مقابله ويعتبر غرفة طعام بجلسة أرضية .. وهو بحمام تكرمون كامل وممكن نحوله غرفة لو حبينا.

حسب الرسم انا اشرح من بداية الدخول من يسار الرسم.

الدرج مقابل باب صالة المدخل وهو روح البيت وكلفني تشطيبه بس درابزين ورخام حول 125 ألف بعدين فكرت فيها لو سويته أبسط وسويت معاه مصعد كانت التكلفة وحدة .. بس سويت عتبات الدرج 14 سم وطلع مريح جداً .. وكان التصميم مغامرة مع هذا الدرج .. وحظي كنت مصمم انشائي عند مكتب قوي وكبير وأَثناء الاشراف تفاجأت بحضور كم من مهندس ومعاهم أوراق وسكتشات .. شصاير يا أصدقاء المهنة؟ قالوا خايفين من بروز الدرج الكبير بدون عمود .. حيث إن الدرج معلق من تحت ومن فوق وفيه حائط استنادي بين عمودين زينة غير حاملين لوزن مثل اللي يبين في الرسم .. الجزء المعلق فوق 3.5 متر وهو خطر جداً .. الحد الآمن 2 متر .. واللي صار إِن المهندس الانشائي طلب من فورمان المقاول تمديد حديد قطر 20 ملم ما ادري أَكبر بطريقة دائرية بحيث يربط الدرج من تحت لفوق بكم قطعة حديد .. وفوق مثل ما هو واضح فيه فتحة شبه دائرية هذي يدور حولها الحديد وينغرس في خرسانة الأَرضية ويتوازن الدرج.

صراحة مهندسين كثيرين يوم ذكرت لهم الطريقة تخوفوا وقالوا لي مغامر بس للحين الدرج ثابت ولا صار أَي كراك والحمد لله .. وعندي خطة لعمل الصالة المفتوحة بارتفاع دورين مع بسطة الدرج أرضية حديد لجلسة تطل على الحديقة .. الحديقة ورا بيتي مباشرة وبيسونها مفتوحة وشغالين فيها وبتكون الجلسة مطلة على الحديقة.

http://i.imgur.com/mSH5sYq.png

للأسف الصورة ما طلعت ملونة وباكبر بعض المناطق حتى يكون شرحها أسهل وأوضح .. طبعاً مدخل السيارة رامب بسيط بارتفاع مريح وبعده عتبة وحدة بارتفاع 12 سم.

معماري قطري

22-07-2015, 11:00 AM

سامحوني على عدم الوضوح شغل ليلة وشوي الصبح بس ومن الذاكرة .. قريب للواقع لكن الواقع شوي يختلف يمكن في بعض القياسات .. وفيه كورنيشات وتفاصيل ثانية ما حطيتها ركزت على المهم

Bo3essa

22-07-2015, 11:40 AM

يعطيك العافيه اخوي معماري

معماري قطري

22-07-2015, 12:27 PM

يعطيك العافيه اخوي معماري

الله يعافيك اخوي بو عيسى

شغال حالياً على تعديل الصور وباحط توضيحات أكثر وباركز على مقاطع لصور كبيرة

الصالة العلوية مفتوحة بالكامل بحيث ان اللي جالس في المكتب في أقصى اليسار لو خلى الباب مفتوح يقدر يشوف لآخر البيت .. حول 20 متر بدون عوائق .. ويبين النور وهو يدخل من فوق من القبة ومن السكايلايت الهرمي ومن صف طوب زجاجي باركز على مكانه وين.

معماري قطري

22-07-2015, 12:55 PM

الحمد لله عرفت احل المشكلة .. وهذي صورة أوضح والزجاج باللون الأزرق وتفاصيله أكيد تختلف في الواقع من ناحية الفريم والحجم تقريبي.

مكتبي فوق مكان السيارة ومطل على حوش البيت من 3 جهات بنوافذ كبيرة وجهة البلكونة باب قزاز كامل .. وقبل مدخل المكتب اللي يتكون من باب وحيز صغير بسقف نازل وعلى الجنبين كبتات للكتب خشب وقزاز .. بعدين تجينا عتبة وحدة مع جدار بفتحة كبيرة سيدة بدون قوس بس ملبسة حوافها بالخشب ( آش وود )

قبل المكتب عندنا موزع صغير بمساحة 2.8 أو 2.9 بس أحد هالرقمين في 4.2 وفيه سكايلايت هرمي بقزاز شفاف 100% حتى القمر يبين ويدخل نوره في الليل لو الليتات مبندة والقمر بدر .. المطر يسوي صوت على القزاز .. وركبته بعد تركيب عازل السقف المائي وتم حني جزء من العازل على الخرسانة القائمة المركب عليها المنور وثم تم تركيب المنور فهو يثبت طرف العازل ويكون متماسك ولا يسرب ماء.

هذي المنطقة والمنطقة اللي تحتها من غير تكييف بس تكون باردة من انتقال الهواء من داخل .. ومقاول التكييف نصحني بتكييفها وحسيت انه يبالغ وطلع احساسي صحيح.

http://i.imgur.com/KeZfYOS.png

ولازم اكبر مكان الصالة العلوية واشرح الوضع .. الصالة العلوية عن اللوبي اللي صوب المكتب والغرفة الرئيسية وغرفة ثانية مفصولة بفاصل بسيط شبه مفتوح .. وفيه أرفف زجاج وتكون منورة بسبب دخول النور من المنور الهرمي ومن باقي المناور الثانية وباركز عليها في الصورة القادمة.

معماري قطري

22-07-2015, 05:38 PM

هذي صورة مكبرة للصالة العلوية .. وهي أول ما يطلع الواحد الدرج يوصل لباب غرفة وفي الجهة الثانية كذلك غرفة وحدة كبيرة فوق المطبخ ووحدة أَصغر وفوق غرفة تحتها بالضبط بنفس المساحة .. بعد باب الغرفة تجينا فتحة في الحائط داخلة بعمق 1.6 متر وجدامها كاونتر غرانيت مرتفع وجاي بطريقة لافة وداخل في مساحة الصالة شوي .. داخل فيه ثلاجة كبيرة وكاونتر وفرن مع مدخنة تطلع للسقف وصدقوني هالفرن يمكن اشتغل مرة أو مرتين وكل اللي يستوي هو الشاي أو القهوة بصخان الماي .. أو تصخين شيء بالمايكروويف.

القصد لحد يتكلف ويركب فرن .. هذا البانتري فتحته محاطة بكورنيش خشب بلون خشب الآش الطبيعي ومتواصل هذا الخشب لكل نعلات وفتحات البيت والبانتري داخل جاي بلون أَزرق سماوي خشب .. ومستوي الحركة دوم عليه حتى فيه مغسلة صغيرة دائرية وأوقات العيال يغسلون يدهم فيها .. بعد فترة ضفنا طاولة طعام فوق مقابلة البانتري وقرب الفتحة المطلة على الدرج وفيه طاولة تحت في المطبخ الداخلي.

التلفزيون مكانه واضح ومخطط له من البداية والجلسة مقابلته .. وواجهتني مشكلة بسيطة في انفتاح المكان وهي صوت التلفزيون لازم يكون مقصر عليه .. ولو اشتغل تلفزيون في الصالة التحتية تتداخل الأصوات .. لكن انفتاح المكان عطانا رؤية الكل ولو حد يبغي ينادي الخدم من تحت بسهولة يوصل صوته.

آتمنى شرحي واضح والصورة تكمل الشرح وبحاول حتى لو أسوي سكتش مبسط لتوزيع الغرف.

http://i.imgur.com/YL0bmlb.png

معماري قطري

22-07-2015, 05:46 PM

في الصورة السابقة يبين جزؤ أزرق على اليمين هذا صف طوب زجاجي وتمنيت لو سويت صفين فوق بعض بارتفاع 60 سم .. لأني اخترت طوب زجاجي فيه فقاعات فضية بارتفاع 30 سم وهذا اللي صفيت عليه بس تقريباً بعرض 4.5 متر .. ويُدخل أشعة الشمس الساعة 9 تقريباً بانتشار ويبين كخط لامع على أرضية البورسلان الرخامي اللي بمقاس 120 في 60 سم.

ومن هذا الحيز ننتقل لحيز الصالة مزدوجة الارتفاع الليلة ان شاء الله وأشرح طريقة القبة وفتحاتها.

معماري قطري

23-07-2015, 12:27 AM

هذي صورة توضح القبة .. والقبة فيها 8 درايش ثابتة ببلاستيك محبب ينشر النور بس ما تبين الشمس وراه .. البلاستيك تم اختياره لأَنه رخيص وينحني مع الفريم وعملي ويجي قطعة وحدة فما يسرب ماي .. أَثناء تخطيط القبة تم عمل الفتحات بالرسم على الخشب .. تم تحديد نقطة وسطية عليا بالخيط والقلم .. بعدها بالخيط ومسمار مثبت في الوسط تم تحديد حد الدرايش العلوي مثل الفرجار .. والسفلي كذلك بنفس الطريقة .. ثم تم تحديد الأَطراف .. وقبل الصب وقبل تركيب الحديد تم قص أجزاء من العازل الحراري ولصقها كفراغ على خشب القبة .. وتم عمل الجزء العلوي من الفوم أعرض شوي حتى تستوي كسرة في الخرسانة يركب عليها الفريم وما يبين من داخل .. يكون مخفي في هذي الكسرة .. الفريم معلم بحرف اكس في الصورة.

http://i.imgur.com/p3RxfT6.png

أرضية الدرج جاية نص دائرية وكانعكاس للقبة .. وفوق تم تركيب مروحة تتحرك بطيء وتحرك الهواء بهدوء.

معماري قطري

23-07-2015, 12:33 AM

سقف الصالة مزدوجة الارتفاع شوي أنزل من سقف الدور الأول بحدود متر تقريباً .. وكان لازم عمل درج نازل ودرج طالع لإكمال المرور لغرفة التانكي والفلتر والبرشر والصخانات

معماري قطري

26-07-2015, 08:57 PM

الصالة السفلية بمساحة 6.5 في 6.1 كانت في الأساس مصممة لتكون غرفة طعام مفتوحة وتغيرت لتكون جلسة تلفزيون والآن تقريباً غير مستعملة .. هي بارتفاع 5.6 متر ولي نية عمل دور وسطي فيها لتكون صالة تلفزيون بواجهة زجاجية حتى يكون هناك تحكم في صوت التلفزيون ولا يصل للغرف أو للتلفزيون الثاني في الصالة العلوية .. بتكون بسطة الدرج امتداد للصالة وبتكون تطل على الجزء اللي يجري تطويره وزراعته من حديقة الحيوان.

http://i.imgur.com/pudqbTZ.png

نشوف ورا الدرج قوس عريض مفتوح يوصل لباب المطبخ الداخلي اللي له فتحة في الحايط تطل على الصالة ولها كاونتر لتقديم الأكل .. مقابل باب المطبخ يوجد باب غرفة الطعام التابعة للمجلس .. وفيه درايش للصالة تطل على ثلاث جهات والجهة اللي وراها باقي الصالة فيها دريشة أعرض متصلة بباب يوصل لحوض سباحة مغلق بسقف بارتفاع حول 7 متر وجزء كبير منه شفاف للشمس .. كتبت موضوع كامل عنه مغلق حالياً هو عمل حوض سباحة مغلق.

معماري قطري

30-07-2015, 04:20 PM

هذا الدور الأرضي .. ألاحظ بتكون فيه مشكلة الخصوصية المحدودة بسبب انفتاح الدرج على المجلس في البيسمنت وفوق عندنا صالة عائلية .. لازم يعاد الترتيب قليلاً حتى لو اضطرينا لتصغير الدرج قليلاً وعمله من النوع المغلق وبنوفر الدرابزين بهذي الطريقة .. والدرج درج خدمات والبديل عندنا اللي هو المصعد.

http://i.imgur.com/WiKij0c.png

الدور الأول ممكن نسوي منور سقفي في منطقة الصالة الصغيرة مقابل الدرج ونخلي جدار الصالة زجاج يعطينا سعة ونور أَكثر .. كذلك لازم نشوف مكان صغير لبانتري ونرتب توزيع الأثاث .. وتوزيعته عملية وجيدة.

http://i.imgur.com/DXBTvc2.png

وهذا دور السقف ( النتهاوس )

http://i.imgur.com/eJwiaIY.png

الواجهة

والواجهة اتخيل بدون خطوط أُفقية بتطلع أحلى .. هي فيها تفاصيل كفاية لو خلينا هذي التفاصيل حجر أو جي ار سي بلون معين على خلفية عادية بيضاء بتكون وايد أحلى .. يبقى الارتفاع لازم يتعدل وهذا شرط التخطيط وشرطهم في محله.

http://i.imgur.com/JbAswRr.png

هذا التصميم صاحبه الله يعينه لا قدر يخلصه من ناحية التخطيط ومعاهم حق الصراحة ولا قدر ياخذ الفايل من الاستشاري بسبب سفر المهندس ويفترض فيه ادارة ومهندسين ثانيين.

انا اشتغلت على سكتش سريع لتوضيح الحل .. إرتفاع الدرج العالي ما اشوف له داعي .. 45 سم أو 60 سم كفاية 3 أو 4 عتبات هذا للمدخل وبالنسبة للحديقة الانجليزية نسويها بدون درج كحفرة مفتوحة للسماء وبدرابزين حماية حولها .. ونفتح عليها واجهات زجاجية كبيرة وباب للتهوئة .. بعد ما يخلص البناء وتدخل الكهربة نسوي درج بسيط من الطابوق أو الحديد أو أي مادة ينزل للحفرة ونستخدم المجلس حسب التوزيع هذا .. ونتخلص من الدرج اللي في جنب البيت.

تعديلاتي هي تغيير مكان المجلس ليكون صوب المكان الأوسع وجهة الواجهة الزجاجية .. وعمل باب بين الدرج والمصعد الخاص بالبيت لعزل الصوت والخصوصية أكثر .. المقاسات تقريبية لأَني خذتها من الرسم العادي.

كنت اتمنى الحصول على رسومات الاوتوكاد حتى اوضح كل شيء مثل ما ذكرت في الملاحظات حتى مدخل الحوش ومواقف السيارات ما ادري به والله يوفق المالك للأفضل.

http://i.imgur.com/VezuBHb.png

معماري قطري

30-07-2015, 09:37 PM

تصميم رقم 3

تصميم حبيته والملاحظات فيه بسيطة بس التعقيد من التخطيط وأَشوف معاهم حق في بعض الملاحظات

نبدأَ بمخطط البيسمنت وهو عبارة عن مجلس وصالة طعام .. صراحة الممر النازل بعتبات كثيرة والموصل للملحق ورا مزعج وخصوصاً بتكون فيه منهولات والترتيب ممكن يكون شوي غير .. بتقليل العتبات والغاء جزء كبير منها وبتعديل الباب اللي لغرفة الطعام وعندي مقترح إن شاء الله بيكون عملي ومدروس وباعرضه بعد الحصول على رسومات الاوتوكاد

http://i.imgur.com/hxtmbV9.png

هذا مخطط البيسمنت الأساسي وحسب المخطط الجديد اللي سابق لذيه ،، الدرج يسار البيت والباب انلغى وبقى الممر فاضي بس للخدمات .. ومستوى أرضية الدور الأرضي المفروض يكون بحدود 60 سم أو 45 سم بما اننا عندنا منور كامل ولا نحتاج نرفع هالكثر حتى نسوي درايش جانبية.

معماري قطري

06-08-2015, 01:43 AM

بحمد الله تم الانتهاء تقريباً من 80% من التعديلات الضرورية بعد الحصول على رسومات الاوتوكاد

أبدأها بالتوزيع الأساسي لمكونات المنزل ( الحوش )

الاستشاري الله يهداه شكله ما يهتم بالتعديلات البسيطة .. المسافة بين الملحق والبيت 3 أمتار ومصر عليها وفي مقدوره يسويها حتى 1.5 لكن 2 متر كفاية .. في الصورة ذي حركت البيت ورا متر واستوت المسافة 2 متر .. بعدين ورا للنزول للملحق نحتاج 9 عتبات وهذا شيء مزعج .. لو قللنا ارتفاع البيت ل 60 سم وسوينا 5 عتبات كل وحدة 12 سم بتكون مريحة .. وممكن نقللها صوب الملحق برفع أرضية الملحق شوي ورفع الحوش بين الملحق والبيت ممكن نصفي على 3 عتبات كل وحدة 12 سم آخر تدليع وراحة.

السيارات حسب مقاس الاستشاري طولها 3.7 متر .. مصغرها على كيفه وعرضها 1.5 .. هذي ميني ويمكن أصغر .. انا كبرتها شوي وسويت المظلة بعرض 9 متر وعمق 6 متر .. وهذي المظلة ممكن تجميلها وعملها بعمدان طابوق وفوقها حديد خفيف مخفي بأبيام ممكن خرسانة أو اسمنت على شبك خفيف ( مثل ما سويت انا في موضوع سابق) .. الباب لو سواه بعرض 4 متر أفضل وممكن من النوع اللي ينفتح سلايدنغ لدخول السيارات وخروجها بسهولة.

انا حافظت على الحديقة النازلة مع مستوى أرضية البيسمنت بعرض 2 متر وطول 11.5 متر وممكن بعد اكتمال البناء نسوي فيها درج من الحديد وعلى أرضيته ترتان أو عشب صناعي والدرابزين بحديد خفيف ملفوف عليه حبل يعطيه شكل حلو وعملي ورخيص .. أو لو حبينا نسويه من الطابوق وبأي تشطيب نبغي فوق .. العملية سهلة وسريعة ونسويها آخر شيء بعد دخول الكهرباء.

مدخل البيت مثل ما هو واضح قللت الدرجات وفيه 5 عتبات كل وحدة 12 سم ونقدر نسوي 4 كل وحدة 15 سم لكن ال 12 سم مريحة جداً.

http://i.imgur.com/SAezGVe.png

لو جاء باب مدخل السيارات مع الحائط مب داخل لداخل بيكون شوي أوسع وأسهل لدخول وخروج السيارات.

استوى مدخل البيت الباب الصغير للحوش مقابل تقريباً لمدخل البيت اللي جنبه مدخل البيسمنت وينفع مزدوج الاستخدام للزيارات .. للرجال مجلسهم تحت وللنساء مدخلهم فوق.

غرفة السايق كنت اتمنى تكون يسار قريب للسيارات بس ركزت على التعديلات الأدنى لتوقعي ان الاستشاري مخلص شغله ونقاشنا هنا للاستفادة العامة فقط.

معماري قطري

06-08-2015, 03:22 AM

دور البيسمنت تم تغيير المجلس ليكون مكان غرفة الطعام قبل وفتح الواجهة جهة الحديقة الانجليزية بزجاج .. وبما اننا نزلنا أرضية الدور الأرضي بنصفي على ارتفاع 3.1 شامل الأرضية على هذا الوضع .. حتى نزيد الارتفاع نعمق أرضية البيسمنت بس في رأيي ارتفاع صافي حول 2.7 كفاية لو شلنا 10 سم للجبس و30 سم للأرضية اللي هي سقف البيسمنت.

عزل منطقة المصعد والدرج ضروري وكان في السابق مفتوح على غرفة الطعام .. يعني الصوت ينسمع من فوق لتحت ومن تحت لفوق .. ألحين فيه باب يحجز الصوت ويعطي المجلس خصوصية .. وممكن المجلس هذا يكون مزدوج الاستخدام نسائي ولعزايم النساء ورجالي .. وللذبائح تنزل من الدرج الخارجي ولباب غرفة الطعام اللي هو زجاج وينفتح على الحديقة اللي عبارة عن منور مفتوح.

بهذي الحلول نسقنا المعماري والجدران مع العمدان الانشائية ووفرنا ارتفاع غير مزعج لأَرضية البيت ووفرنا انارة طبيعية وتهوئة للمجلس .. ولو زدنا في عرض الحفرة لمترين ونص بتكون عندنا مساحة لزراعة اصيصات تعطي جمال اضافي للحديقة والمجلس .. طبعاً ارتفاع الحائط الخرساني 40 سم من أرضية الحوش يعطينا تأسيس جيد للدرابزين وأَيضاً حماية لو السيارة بالغلط ضربت فيه.

http://i.imgur.com/nR6io1i.png

أعتقد المخطط مفهوم للرسام الهندسي وممكن يطبقه بسهولة للرخصة .. بس لازم ما يحط الدرج النازل صوب الحديقة ويوضح فيها بس زراعة والدرج يكون بعدين بعد دخول الكهرب.

معماري قطري

06-08-2015, 03:40 AM

الدور الأرضي كان مستوى أرضيته 1.2 متر وارتفاع السور الخارجي 2.5 متر يعني اللي طوله أكثر من 130 سم يشوف من داخل البيت لخارج السور .. وأَي شخص يوقف على المدخل ممكن يبين من الخارجي .. وارتفاع الدرج مزعج لأَن تقريباً يومياً بنستخدمه .. نسيت انا اعدل الرقم من 1.2 الى 0.6 .. ومثل ما ذكرت أعلاه درج الملحق ممكن نقلله ل 3 عتبات كل عتبة 12 سم برفع الأرضية في الحوش من ورا وبرفع أرضية الملحق قليلاً.

كان الدور الأرضي فيه مقابل المطبخ بعد جلسة وانا اقترح تكون صالة طعام عائلية مفتوحة وواجهتها زجاج جهة الملحق.

بالنسبة للصالات أشوف انفتاحهم على بعض بأقواس أحلى وقبل فيه باب ما له معنى .. وبالنسبة للغرف ممكن نعتمد توزيع الغرف اللي فوق للي تحت أيضاً.

http://i.imgur.com/tNsSdsl.png

معماري قطري

06-08-2015, 03:42 AM

بالنسبة لباب المدخل في الصورة السابقة لو كان زجاج والحوائط جنبه زجاج أحلى بعرض أرضية المدخل بس.

معماري قطري

06-08-2015, 04:48 AM

أهم دور هو الدور الأول وسويت فيه تعديلات بسيطة لكن عملية ولها علاقة بالاستخدام وتوزيع الأثاث .. غرفة التلفزيون يستحسن تكون واجهتها زجاج لإعطاء مزيد من السعة .. وتم اضافة بانتري صغير للشاي .. كذلك اضافة سكايلايت يعطينا نور طبيعي من فوق وسعة أكثر للحيز الصغير .. السكايلايت مستخدم نفس الأبيام لجدرانه وممكن تنعمل بطابوق بس لازم تنغرس أصياخ حديد في الخرسانة مكان الأبيام حتى يثبت فيها الطابوق أو نسوي الجدران بارتفاع 20 سم من الخرسانة وفوقها السكايلايت هرمي.

اعتقد الباقي كله واضح ودوم لو حبينا نحط تلفزيون في غرفة النوم بعد التلفزيون من السرير يكون بين 3 و 3.5 متر للتلفزيونات الحديثة وهذا البعد المثالي .. فنسوي له تمديدات في الارض ونحط له طاولة دائرية أفضل حتى ما تنضرب زواياها وتجرح أو توجع.

http://i.imgur.com/JU5wnP9.png

معماري قطري

06-08-2015, 04:59 AM

بناء حائط 20 سم في الفراغ بين جهتي الدرج وتوسيع الدرج قليلاً سيجعل الدرابزين أقل ما يمكن ومثبت على الحائط .. كما سيكون الحائط عازل لإنتقال الصوت بين الأدوار المتعددة .. عرضت في السابق صورة لهذا الدرج وكان الحائط فيه فراغات بانارة مخفية وفيه فراغات لإصيصات وتحف.

أتمنى التوفيق لصاحب المنزل وقد أحببت التصميم على وضعه المعدل وإن شاء الله تكون المنازل المراجعة مواضيع متواصلة ويواصلون أصحابها يفيدونا بكل تطور والله يوفقهم جميع.

سعود.

06-08-2015, 05:04 AM

ما شاء الله عليك .

صدقت صار تغير جميل

معماري قطري

06-08-2015, 03:02 PM

ما شاء الله عليك .

صدقت صار تغير جميل

مشكور اخوي سعود على هالشهادة الطيبة .. شكلك دورت نواقص وتعبت صح؟ هذا في رأيي أفضل ما يمكن

خل نشوف الوضع مثل ما كان مسويه الاستشاري لمدخل الحوش والبيت .. درج البيت المرتفع كان قريب جداً من غرفة السايق .. انا على الوضع المعدل أبعدت الدرج مسافة 2.2 متر .. 1 متر تحريك البيت للخلف و 1.2 متر تقليل العتبات .. على الوضع السابق اللي واقف على المدخل المظلل بيشوف فوق سطح غرفة السايق .. ولو ما تم رفع سور البيت 1.5 متر ليكون 4 متر وهو يعد مخالفة عند التخطيط .. بيكون الواقف على أرضية المدخل يشوف الجيران حوله .. وباسوي سكتش بسيط بعد بناءً على معطيات التصميم الأساسية اوضح هذي النقطة.

http://i.imgur.com/33LCBJ5.png

من الصورة نشوف عرض الدرج 3.5 متر وهو كبير على لا شيء وقريب من غرفة السائق 1.72 متر .. إحنا لو سوينا عرض الدرج مترين بيكون أَكثر من كفاية وبنقدر نخلي المساحة جدام الباب مثل ما هي بعرض 3.5 متر .. وبنقدر نضيف عمودين للمظلة فوق المدخل بتستوي أحلى بوايد .. ولاحظت بعد ارتفاع كل عتبة 18 سم وهذا يحتاج لياقة .. انا اللي مقترحه 12 سم وحتى الدرابزين ما له داعي الا فوق من العمود لين الحائط لو سوينا الحفرة ولو ما سويناها ما فيه داعي للحماية كلها الا 60 سم .. وممكن نسوي مشربية جي ار سي تطلع أحلى.

معماري قطري

06-08-2015, 04:04 PM

هذا مقترح أفضل لمدخل البيت .. حلو نسوي الباب ومحيطه زجاج لدخول النور الطبيعي .. تصغر الدرج لعرض 2.2 متر وانعكس هذا التصغير على زيادة الزراعة حول المدخل.

http://i.imgur.com/6SPL1Qz.png

بالنسبة لمدخل السيارات عرضته ل 4 متر صافي بدل 3.5 وحركت خط الباب 30 سم لجهة الحائط .. وعرضت شوي المظلة لتغطي الرولنغ شتر مع إني آفضل الباب المنزلق لأنه يكون أقوى وأَثقل.

http://i.imgur.com/umYcjkv.png

وهذي صورة توضح وضعية الحوش كيف بعد التغييرات البسيطة ذي

http://i.imgur.com/5X8TLS9.png

السلايدنغ ميزته صلابته وقوته وثاني شيء لو اختربت المكينة ممكن فتحه يدوياً بسهولة الرولنغ شوي صعب وخفيف.

سعود.

06-08-2015, 05:57 PM

معماري قطري

06-08-2015, 06:34 PM

لا والله الي مثلك ياخوي مايحتاج شهادة مني انا احد تلاميذك .....
لايسعني القول الا ( أتعلم واجيك )
ههههههههههه

واي حد بيدقق عدل في المخطط القديم والجديد بيعرف قيمة التغير في المخطط ( فعلا مبدع )
حفظكم الرحمن وترجعون بسلامه . معافين يارب

الله يعافيك شيخنا

الحمد لله وصلوا الأهل وبنتحرك بعد شوي صوب المصحة

مثل ما قلت لك قبل الاستشاريين يشتغلون بدون اهتمام وأَغلب اللي عندهم نسخة ويحاولون جاهدين ما يغيرونها .. لأَن أَي تغيير على المعماري يعني تغيير على الباقي وتنسيق رسومات وشغلة ما يقدر عليها الرسام .. لأَن أَغلب الاستشاريين مهندس واحد بتخصص معين ورسامين يطبقون رسومات قديمة وتفاصيل قديمة .. حتى الطابوق حاطين الضعيف اللي العازل فيه وهو ما ينفع لا للتمديد ولا عزله صح لأن الخرسانات وايد مفتوحة بدون عازل ولأن مونة الاسمنت تدخل الحرارة .. يعني خسارة على الفاضي وباحط صورة الطابوقة في موضوع العزل الحراري.

معماري قطري

07-08-2015, 02:10 AM

نرجع شوي للتخطيط السابق والمالك تواصل معاي وهو حاب يوسع الجهة الخلفية للبيت ويعدل موقع المطبخ الخارجي .. هو اقترح المطبخ يكون في الزاوية .. وبهالطريقة بيخرب الحديقة الخلفية اللي المفروض تكون خاصة خصوصاً الطباخ بيكون رجال.

انا سويت هذا المقترح.

http://i.imgur.com/0sU3iDd.png

تم تصغير الممر بين البيت والمجلس ل 1.4 متر وهذا مؤكد يتطلب استثناء للموافقة وبهذا وسعنا المساحة بمتر وعندنا مساحة لبناء مستقبلي في الخلف = 265.4 متر وهي كافية لشقتين ارضيتين للأبناء واحتمال ممكن بالمحافظة على الارتدادات بحدود مترين من كل جهة بناء دور علوي للملحق فنحصل على مساحة تزيد على 400 متر .. 442 متر بالضبط .. الدور السفلي يكون قليلاً أعلى من البيسمنت وأوطى من الأرضي والعلوي يكون أقل من الأول وأعلى قليلاً من الأرضي .. وممكن ربط المبنيين بممرات قصيرة 2 متر فقط .. علوي وسفلي لسهولة التواصل مع البيتين.

هذه صورة مكبرة للمطبخ والجهة الخلفية

http://i.imgur.com/lpJTIlk.png

معماري قطري

07-08-2015, 02:51 PM

بالنسبة للتوزيع اللي فوق المساحة الخلفية لو ركزناها بس على المستطيل الأسود بارتداد مترين حولها بنقدر نسوي دور نص بيسمنت ودور أرضي ودور أول وبنصفي على مساحة 176.6 لكل دور بمساحة اجمالية = 530 متر مربع .. نقسمها حتى ل 3 شقق واسعة للأبناء

معماري قطري

07-08-2015, 03:30 PM

نرجع للتصميم السابق ونشوف باقي الرسومات مثل الملحق

هذا المخطط الأرضي للملحق .. وأول ما لفت نظري وجود الفرن قرب الباب .. وباقي المساحات معقولة .. مشكلة زاوية الجدار الخلفي المائل ممكن حلها بسهولة وباسوي تعديل بسيط على المطبخ أكثر شيء وفي البداية باحط توزيعة الدور الأرضي للبيت مع الملحق حتى نشوف طريقة الدخول والخروج والتواصل بين المبنيين.

http://i.imgur.com/EvfxUnc.png

معماري قطري

07-08-2015, 04:57 PM

هذا التعديل المبسط وتوضيح لتقارب المداخل باب غرفة الطعام العائلية وباب المطبخ الخارجي .. وبرقع الأرضية حول 10 سم وعمل عتبة بسيطة جداً لمنع ماء المطر من دخول المطبخ وغرفة الخدم ( 5 سم فقط أو مصد مياه من الرخام ) مع عمل سلوب بسيط لتحويل المياه خلف البيت لجهة الزراعة .. وتضبيط باقي المستويات خارج البيت لتصريف المياه جهة الباب.

المطبخ توزيعه روعي فيه وضع كبت بكامل ارتفاع الحائط كما في أعلى الصورة ليغطي الانحناء .. وهذا ممكن بعمل ارفف داخلية وواجهة أبواب منزلقة من خزائن الحائط .. وتوجد نوعيات ألمنيوم راقية وخفيفة.

http://i.imgur.com/vPoBA19.png

الصورة قد تكون غير واضحة لكن فايل الاوتوكاد ممكن يوضحه الرسام ويعمل نسخة بالأبعاد الهندسية كاملة .. أنا ركزت على التأثيث بأبعاد ومقاسات الأوتوكاد الواقعية لكن لم أضعها لتتضح صورة المهم.

معماري قطري

08-08-2015, 04:46 PM

آضيف الصورة الكاملة لتوضيح توزيع الحوش مع التوزيع الداخلي للبيت والمداخل ونقاط التواصل بين البيت والملحق .. وطريقة نقل الأغراض من الموقف للمخزن .. تبقى مسئلة الخدمات من كهرباء وتلفون وانترنت وصرف صحي خطوطها وين وشلون تنسيقها على المالك يستفسر عنها من الاستشاري .. اللي متوقع يحتاج خزان صرف صحي وبيحطه جدام الباب الكبير للحوش .. وفي هذا المكان مشكلة بسبب دوس السيارات وبسبب وجود ماي الغسيل والسلوب كله صوب الباب .. يعني منطقة رطبة وبتتعب خرسانات الخزان واحتمال يحتاج تغيير في المستقبل أو ينكسر.

أفضل مكان بيكون يمين الباب الصغير ويسار غرفة السائق بس نحاول نحافظ على الزراعة قد ما نقدر ونحدد مكانها ببعد مناسب عن الخزان.

http://i.imgur.com/BjjdaIb.png

فوائد هذه التغييرات

أولاً تم توسيع حوش مدخل البيت اللذي نحن في حاجة إليه أكثر من الجهة الخلفية .. وزادت المواقف عندنا موقف وهي على هذا الوضع كافية للسيارات الطويلة والعريضة كالسوبربان واللاندكروزر وغيرها .. على تخطيط قبل ميني وسيارتين.

ثانياً تم تعديل ارتفاع البيت وهو شيء مهم جداً باضافة الحديقة الانجليزية والاستفادة منها كمنور للبيسمنت .. وهذا ما نراه في الحدائق التي مثلها في لندن لكن نرى هناك مستوى الحديقة والدور الأرضي نازل ومستفيدين من هذا المنور .. الاستشاري كان مسوي حديقة نازلة وكان مخلي البيت مرتفع وايد وهذا يدل على عدم اهتمام وسوء تصميم .. كذلك نرى الحدائق الانجليزية بدرج خارجي حديد فهي كحوش للبيسمنت وكمخرج طواريء وقت الحريق لا قدر الله .. وأَتمنى لو مسؤول التخطيط يقرأ هالجملة المهمة ويتمعن فيها.

ثالثاً تم رفع أرضية الحوش بين الملحق والبيت ب 10 سم ويفترض سلوب من هناك بسيط لجهة الباب ولجهة الزراعة ورا لتصريف مياه المطر، وطبعاً البعد بين السور والبيت من الجوانب لا يسمح بالزراعة .. ممكن اصيصات فقط صغيرة لنباتات متسلقة ونعمل مشربية خشب فوق لهذه النباتات لتظلل الممر اليسار اللذي سيكون مستعملاً للتنقل من موقف السيارات لجهة الملحق ولجهة المدخل الخلفي في حال وجود زوار في الصالة أو لتنزيل بعض الأغراض .. والسلوب الخفيف بينفعنا في نقل الأغراض على عربة ونقدر نخلي أغطية المنهولات ببلاط من فوقها.

برفع هذي الارضية ألغينا عتبة بين الملحق والبيت واستوى التنقل سهل جداً خصوصاً العتبات بارتفاع 12 سم وحاجز مياه المطر بارتفاع 5 سم للملحق.

رابعاً عمل واجهة المطبخ أغلبها زجاج وواجهة غرفة الطعام العائلية كذلك يجعل اتصال مرئي بين المنطقتين وتحريك الباب ليكون قريباً من مدخل غرفة الطعام يؤدي لسهولة التواصل ونقل الطعام .. هذه المنطقتين أنصح بعمل زجاجهما شفاف لإنفتاح الرؤية.

خامساً لو كان هناك احتياج لعمل مغسلة كبيرة تستعمل للذبح أيضاً .. ذبح الذبائح قصدي لحد يفكر تفكير اجرامي .. ممكن عملها خلف غرف الخدم وقرب الزراعة.

سادساً الزاوية تحت الستور الخارجي ممكن تستعمل كمكان تخزين وحفظ للغازل بحيث تكون مظللة وتعمل تمديدات خاصة بالغاز تحت البلاط أثناء البناء.

أَعتقد كل شيء واضح ومثل ما ذكرت قبل الغرفتين في الدور الارضي ممكن نكرر توزيع أثاث الغرف فوق مع القواطع .. يعني كوبي بيست للي فوق تحت.

معماري قطري

08-08-2015, 06:14 PM

بيزعل علي صاحب التصميم .. تعديل بسيط بالنسبة للبيسمنت وهو التوسيع قليلاً حق مخزن ومعاه بنكون رتبنا الوضع أكثر .. تم زيادة عدد كراسي المجلس ل 16 كرسي ومتناسبين مع كراسي غرفة الطعام .. وتوسع الممر صوب المصعد.

http://i.imgur.com/Aqge20Z.png

تقريباً تم تحريك الجدار بنفس الطول وما اتوقع التكلفة تكون أكبر بوايد.

معماري قطري

10-08-2015, 07:52 PM

تم وضع صورة أخيرة لمقطع طولي في حوش البيت يبين البيت وارتفاعه مقارنة بالسور الخارجي للحوش وللأسف راح وأعيده مع رسم غرفة السائق والملحق .. بالإضافة لرسم الوضع المعدل.

http://i.imgur.com/nMrqx5N.png

هذا الوضع السابق ونلاحظ كيف ارتفاع درج المدخل وقربه من غرفة السائق وارتفاع درج الملحق .. وكيف عندنا مساحة ورا.

وهذا الوضع المعدل وفيه حركنا البيت متر ورا وسوينا الحديقة الانجليزية .. وعدلنا ارتفاع البيت فقط بتنزيل أرضية الدور الأرضي 60 سم.

http://i.imgur.com/Wp4woe1.png

تمت ازالة الخطوط في البلاستر لأن عيبها تمسك الغبار وينزل مع المطر ويلطخ الحائط .. وتم عمل مربعات مفتوحة في مظلة المدخل وتوضع داخلها مشربية بتشكيلة معينة أو تشكيلة جي آر سي .. أو تكون تجويف بسيط داخل الخرسانة بلون غير.

المسافة بين الملحق والبيت مترين الآن وتم تصغير الدرج ل 1.2 متر ورفع الارضية بين الملحق والبيت وتخلصنا من عتبة درج.

http://i.imgur.com/Wp4woe1.png

معماري قطري

10-08-2015, 07:59 PM

من رأيي عدم تركيب جي آر سي لتجويف بايبات التصريف أفضل .. أما شبك حديد ونسوي عليه بلاستر أو نخلي البايبات مكشوفة ومصبوغة بصبغة البيت .. أو نسويها داخل حائط دبل .. لأن شكل الجي آر سي بالطول مب متناسق مع الواجهة وكأنه اضافة ما لها معنى .. كذلك يتكسر وتعشش داخله الطيور .. ولو احتجنا لصيانة البايب الخارجي ما يكلف شيء نقدر نبدله.

معماري قطري

10-08-2015, 08:34 PM

نسيت السيارة والشجر

http://i.imgur.com/FrFM4d6.png

معماري قطري

13-08-2015, 03:00 PM

سويت سكتش مبسط لفكرة التصميم الأول ونزول الأرض في الخلف .. للتوضيح أكثر وهي ممكن تستعمل كحديقة نازلة تنفتح عليها درايش البيسمنت وبعد بناء الملحق السكني ورا بيكون الجزء الوسطي منور مفتوح بأرضية نازلة للبيسمنت ولباقي الأدوار بعرض مترين فقط ولتمرير الخدمات.

المفروض الاستشاري يطور على التصميم حتى ياخذ موافقة على كل المباني حتى تنحسب قوة الكهرباء وسعة الكيبل وباقي الخدمات تخطط وتصمم على هذا الأساس .. وممكن نبني اللي نبغي على مراحل حسب الحاجة أو نسوي البنيان كله مرة وحدة.

السكتش بدائي وفيه نواقص بس يوضح الكتل وتدرجات الأرض.

http://i.imgur.com/Z9d0J5S.png

معماري قطري

15-08-2015, 05:28 PM

من خلال مراجعة المالك للتخطيط تم الطلب منه زيادة الإرتداد ناحية الجار ل 3 أمتار .. وهو كان حاب يكبر المطبخ الخارجي والستور وما كان مقتنع بالحديقة النازلة في الخلف .. ممكن نسوي الحفرة أو الحديقة الانجليزية لتكون منور للبيسمنت وللبيسمنت للتوسعة المستقبلية .. وصفينا على مساحة معقولة للتوسعة المستقبلية .. وبتكون حديقة بارتفاع أرضية الحوش العادية مثل ما يحب المالك وممكن يحفر للبيسمنت وقت تنفيذ التوسعة المستقبلية .. وهي فكرة حلوة وبتكفي لثلاث أبناء كل واحد في دور ويقدر يسوي الدرج مقابل الدرج ويخلي لنك للمبنى .. أو يفتح درج المنزل ويكون هو درج ومدخل للتوسعة المستقبلية لو حب.

نقصت المواقف أو بتكون وايد ضيقة لو خلينا السيارات مثل ما كانت

http://i.imgur.com/YJJUkjP.png

معماري قطري

15-08-2015, 05:43 PM

وهذا مقترح آتمنى يكون أخير بتعديل بسيط بعمل باب الحوش سلايدنغ واضافة موقفين .. ممكن الاثنين اللي تحت يكون مظللين واللي قرب البيت يكونون مفتوحين لعدم تغطية مدخل البيت.

http://i.imgur.com/gNcgPzK.png

Azizuk

15-08-2015, 10:19 PM

ماشالله اخوي معماري

المخطط روعة الله يبارك

ماعليه كلام

معماري قطري

16-08-2015, 12:17 AM

الله يسلمك اخوي عبدالعزيز

حاولت قد ما اقدر اوفر مواقف كفاية خصوصاً البيت كبير وفيه مساحة في الخلف للتوسعة في المستقبل .. ووقت تنفيذ هذي التوسعة بتكون الحاجة للمواقف ملحة

معماري قطري

16-08-2015, 12:27 AM

معماري قطري

17-08-2015, 11:55 PM

هذا مقطع يوضح الحفرة الخلفية بعمق متر و 40 سم وهي وسطية بين التصميم السابق وبين الأرض مستوية بدون هبوط .. الهبوط يعطينا أرض مزروعة بتشكيلة تلال انسيابية في أعلاها مستوى أرضية عادي وشجر كبار.

http://i.imgur.com/EexRsTB.png

معماري قطري

18-08-2015, 05:33 PM

هذا دور البنتهاوس .. وتمت فيه بعض التعديلات كإِزالة الحمام الصغير وتوسعة الجلسة وتضمينها مكتب منزلي .. وعمل تظليل لتانكي المياه والسخانات مع فصل لوحة الكهرباء بحائط ليصد أَي تسرب للماء من الوصول للوحة الكهرباء .. وتم استغلال المساحة المرتفعة فوق العتبات النازلة لعمل جزء خاص بكاونتر البوفيه .. كان الحمام كبير بدون استغلال جيد وبعرض 2.9 وتم تضمين 70 سم لغرفة الملابس وعملها غرفة مغلقة بباب وبكبتات بنصف عمق مفتوحة بدون أَبواب وبطاولة كبيرة وسطية بأَدراج.

الحمام تم عمل منور خاص له وممكن فتح طوب زجاجي جهة غرفة الملابس للنور .. وفتح نافذة كبيرة تفتح للخارج على هذا المنور .. ممكن عمل مشربية على الحائط المقابل فهي تعزل الرؤية وتسمح للنور والهواء بالمرور وممكن زراعة اصيصات وسقيها بسهولة من خلال النافذة.

http://i.imgur.com/35aAFgA.png

أُرحب بمراجعة مخططاتكم وحتى لو لجزئية بسيطة من المنزل وابداء الرأَي سواءً في التصميم أَو في الصيانة والتغيير

مثل ما ذكرت إن التصميم عملية مستمرة والتحسين عليه والاضافات قد يكون مستمر لما قبل السكن بقليل وحتى كاضافات وتجديد بعد السكن.

انا فكرت في الغاء المكتب فوق وعمل منور فوق فتحة الأرضية المثمنة في الدور الأول ومنها ينزل النور للدور الأرضي .. غرفة المكتب ممكن تكون في الدور الأرضي بدل غرفة النوم هناك .. وحتى الحمام ممكن يصغر ليكون حمام مكتبي صغير بدون شاور.

بهذا يكون عندنا دور البنتهاوس جناح خاص بصاحب المنزل وزوجته والدور الأول خاص بالأبناء بخمس غرف وصالة تلفزيون وبانتري شاي مناسب وصالة منورة بسبب وجود السكاي لايت أو المنور السقفي .. والدور الأرضي بمساحات مفتوحة أَكثر وصالات جلوس جميعها باطلالة خارجية على مساحات مزروعة في الحوش .. حتى فتحة السقف المثمنة تدخل نور من أَعلى في بعض الأوقات .. ثم النافورة على تشكيلة الفتحة تكمل الصورة الجمالية للبيت.

المكتب في الدور الأرضي حسب اختيار صاحب البيت أما يكون معزول ومتصل بغرفة الطعام والمجلس الداخلي ومنه ممكن يدخل أَي شخص يرغب بسهولة للمكتب لمناقشة موضوع معين بخصوصية .. أَو يجعل واجهة المكتب زجاج تطل على باقي الصالة .. مع تصغير المخزن المثلث أَو ازالته نهائياً .. وممكن الحل الوسط واجهة زجاج بستارة ومدخل مرتبط بالمطعم والمجلس.

http://i.imgur.com/2KuXogr.png

وسآتي لتعديلات الدور الأرضي لاحقاً.

طبعاً من ضمن التعديلات الأساسية هي عمل عزل للحائط كما يبدو بزيادة سمك الحائط الخارجي ل 40 سم .. والحلول المقترحة للعزل كثيرة وقد يكون السمك أَقل قليلاً أَو أَكثر قليلاً من 40 سم حسب النظام المستخدم .. أُرجح استخدام سلابات السيبوريكس بسمك 5 سم أَو 7 سم وهذي لازم لها دراسة وتحديد للسمك المناسب حسب التكلفة وحسب طريقة التركيب ببراغي خاصة وحسب فريم التركيب .. وبترك فراغ تهوئة خلفها وبوضع عازل بوليسترين 5 أو 4 سم وبصبغ الطابوق ببتومين وطبعاً غشاء عاكس خلف البولستيرين جهة فراغ التهوئة .. هذا مقترحي المفضل للعزل ولحماية هيكل المنزل من التأَثيرات الحرارية.

معماري قطري

19-08-2015, 02:28 PM

واحد من الاخوان أرسل لي رسومات بيته .. وبديت اراجعها وفيها بعض النواقص اللي تحتاج تحسين .. المشكلة التصميم منتهي ومخلص تفاصيل كثيرة .. وصراحة البيت ما شاء الله مدروس وكبير بس استغربت من المواقف.

المواقف لسيارتين وانا بانتظار اذن صاحب التصميم لعرضه وتحليله .. لكن المواقف باحطها للتوضيح .. واحنا نعرف إن السيارات لها مقاسات معروفة .. وذكرت قبل مقاس 3 في 6 كموقف للسيارة سواءً مغطى أو مفتوح موقف مناسب جداً .. ممكن نصغره شوي في المواقف المفتوحة التجارية .. أَما للبيوت ولموقف مغلق مثلاً ناخذ الكروزر وهي سيارة أهل قطر الشعبية طولها من صدام لصدام 495 سم ( 5 متر الا 5 سم ) ولو بندخلها في موقف مغلق بطول 482 ولنفترض صدامها ضارب في الحائط بتبقى عندنا 13 سم برا ولا نقدر نسكر الباب.

زيادة طول الموقف متر بيناسب لهذا النوع من السيارات .. وزيادة العرض متر بيسمح لنا نفتح الباب براحتنا

http://i.imgur.com/wa56q8C.png

فرضاً المالك خذ بنتلي مولسان .. وحب يوقفه في الطبيلة ويسكر عليه زين .. البنتلي طوله 557 سم وبيوقفه على الأقل بعيد عن الطوفة نص متر يعني بيبقى متر خارج حدود المظلة .. وللعلم البيت ما تدخله السيارة كلش.

sweet qatar

20-08-2015, 10:24 AM

هذا اللي وصلنا له في الأخير والله يوفق المالك إن شاء الله

الجهة الخلفية بتكون نازلة بميلان بسيط مثل التل وبتكون مزروعة عشب وفي الأطراف أشجار عالية .. وممكن بنيان الحدود اللي بالأحمر بيسمنت وأرضي وأول وحتى بنتهاوس وربط البيتين مع بعض بالدرج الأساسي الموجود.

http://i.imgur.com/DksTPGC.png

وان شاء الله باسوي توزيعة الملحق المستقبلي

حبيت الحديقة النازلة عن مستوي الأرض .. لكن بدون تلال
بيتنا القديم كانت فيه حديقة نازلة ورا البيت تنزل لها بدرج بجنبه بعد مدرجات مزروعة

و يطل علي الحديقة تراس له مخرج من الصالة .

عندي كذا ملاحظة و السموحة مشاركتي متأخرة بس ان شالله انها بسيطة وتفيد

المدخل روعة .. فكرة النافورة جميلة لكن ما تناسب وجود المطبخ الأمريكي المفتوح "مادري إذا قريت المخطط بشكل صحيح :o "

ممكن عمل بارتشن يفصل بين المساحتين ويضيف قيمة جمالية للمكان

الستور علي اليمين مسبب ثقل بصري غير مستحب
اقترح تغيير أبعاده بحيث يكون مستطيل .. يخدم التخزين بشكل أفضل

الدور الأول .. ممكن ناخذ الواك ان كلوزت من الغرفة الي فيها درسنج روم ثانية
و نحولها لستور أو لنن "لحفظ أدوات التنظيف والمفارش وما الي ذلك"

بالنسبة لي هالغرفة ضرورية جدآ ولا يمكن الاستغناء عنها

أعتذر مرة ثانية إذا تكلمت عن تصميم انتهيتوا منه

و الله يعطيك العافية أخوي معماري ونفع بعلمك :)

معماري قطري

20-08-2015, 02:34 PM

حبيت الحديقة النازلة عن مستوي الأرض .. لكن بدون تلال
بيتنا القديم كانت فيه حديقة نازلة ورا البيت تنزل لها بدرج بجنبه بعد مدرجات مزروعة

و يطل علي الحديقة تراس له مخرج من الصالة .

مرحبتين إِخت سويت وملاحظاتج ما شاء الله قيمة وهذا وقتها ان شاء الله .. وزين نسمع رأَي شخص عاش في مكان قريب من هذا المكان وجرب الحديقة النازلة .. التلال هي تجاوزاً نطلق عليها تلال وهي تعتبر أَرضية الصفر المحيطة بالمكان النازل .. والنزول مثل ما يبين في المقطع بانسياب بحيث ممكن النزول والركوب من أي جهة .. وهو يعتبر كتغيير من الحدائق المنبسطة العادية .. واحنا هنا دمجنا اللاندسكيبنغ بالتصميم الداخلي والأَماكن المفتوحة كثيرة على هذي الحديقة .. مثل المطبخ والصالة الرئيسية ومثل جلسة التلفزيون والألعاب المغلقة بواجهة زجاجية وعندنا الدرج كذلك لم تصمم واجهاته الزجاجية بس الفكرة انه يكون مطل على الحديقة .. والشيء المهم إِن الارتفاع 60 سم بالنسبة لأَرضية البيت وحديقة البيت الوسطى نازلة لعمق 1.4 من الصفر وعمق 2 متر من أرضية البيت والواقف داخل يشوف انسياب الحديقة بتدرج الارتفاعات وغطاء الشجر في الأطراف .. حتى الستور قرب المطبخ الداخلي صغرته قدر الإمكان لتوفير هذا الانفتاح على الحديقة .. ولازم نسوي باب للحديقة من بيت الدرج أَيضاً.

عندي كذا ملاحظة و السموحة مشاركتي متأخرة بس ان شالله انها بسيطة وتفيد

المدخل روعة .. فكرة النافورة جميلة لكن ما تناسب وجود المطبخ الأمريكي المفتوح "مادري إذا قريت المخطط بشكل صحيح :o "

ممكن عمل بارتشن يفصل بين المساحتين ويضيف قيمة جمالية للمكان

انا اشتغلت على تطوير المقترح من وجهة نظري الشخصية وبعيد عن ما يبغيه المالك وباضيف هذي التحسينات كفكرة ثانوية للنقاش مع اقتناعي بما تم عمله للمالك وبانتظار اضافة باقي الخدمات ومتابعة التصميم .. بالنسبة للنافورة فهي في صالة مرور وتوزيع وتطل عليها الصالة العلوية بانفتاح شوي أَكبر والصالة ذي نازلة 24 سم عن المطبخ وباقي الصالات ... واتصالها مع المدخل الخارجي بباب زجاج شفاف بيخلينا نشوف النافورة داخل ونشوف الأَرضية بنفس الشكل متصلة للداخل .. One line of focus direction .. وبنفس الوقت هي خلفية لما بعد التلفزيون في الصالة .. خط اتجاه بصري ثاني .. وكذلك هي خط اتجاه بصري مفتوح من المطبخ العصري بالنظام المفتوح لجهة الصالة ولجهة النافورة ولجهة المدخل.

الستور علي اليمين مسبب ثقل بصري غير مستحب
اقترح تغيير أبعاده بحيث يكون مستطيل .. يخدم التخزين بشكل أفضل

هذا الستور اختي جاء مثل ما يقولون تحصيل حاصل وكانت مساحة متناظرة مع تشكيل الصالة وحبيت كسر التناظر وفي رأَيي مكانه جيد لإخفاء الجزء الخاص في الدور الأَرضي اللي يتكون من المجلس وغرفة الطعام وغرفة النوم .. في التصميم الثاني غيرت هذي المنطقة قليلاً بفتح ممر الغرفة تحت وقطع المخزن وهو مثل ما قلتي أَكثر يعتبر lenin store وما ادري ان كتبتها صح أو لا هي كانت ضايعة عني وانتي ذكرتيني بها .. هو ستور لمواد التنظيف والمكنسة الكهربية ويكفي لبعض الأغراض الثانية.

انا حولت الغرفة لمكتب منزلي بواجهة زجاجية وغيرت شوي في المدخل بحيث بدل الإنفتاح الكامل بين باب المجلس والصالة سويت حائط زجاجي ملون من الجهتين وباضاءَة وسطية .. بحيث يعيق النظر ويسوي خصوصية بين المجلس والصالة.

الدور الأول .. ممكن ناخذ الواك ان كلوزت من الغرفة الي فيها درسنج روم ثانية
و نحولها لستور أو لنن "لحفظ أدوات التنظيف والمفارش وما الي ذلك"

بالنسبة لي هالغرفة ضرورية جدآ ولا يمكن الاستغناء عنها

هذي نقطة غلبتيني فيها واستخدام نسائي وباضمنها للدور الأول وأَتمنى المالك يسويها كذلك

أعتذر مرة ثانية إذا تكلمت عن تصميم انتهيتوا منه

و الله يعطيك العافية أخوي معماري ونفع بعلمك :)

الله يعافيج ومثل ما ذكرت قبل أَي ملاحظة من أَي شخص مهمة ولازم يبديها وما يغفلها .. وانتي ذكرتي نقاط مهمة تكمل التصميم ما تنقصه وهذا المقترح اللي حبيته أَكثر مع توضيح فكرة الاتجاه البصري وانفتاح الرؤية تحت.

http://i.imgur.com/ic0C7Be.png

معماري قطري

20-08-2015, 02:40 PM

حتى المصعد ممكن يكون بابه زجاج ويعطينا انفتاح واتجاه بصري في عدة جهات .. ممكن يكون بابه دائري بارز زجاج .. بانوراما والمساحة تسمح بس التكلفة بتكون الضعف أَقل شيء.

المكتب من جهة أُخرى ممكن نحط ستارة لواجهته الزجاجية ويكون خاص لمدرس مثلاً يدخل له من جهة المجلس أو لمناقشة موضوع مع شخص خارجي ونفس الوقت يكون فيه حد في الصالة .. وممكن تنفتح الستارة لإنفتاح كامل للرؤية .. الستارة ممكن تكون الكترونية وزجاج الكتروني يتعتم ويفتح الكتروني بضغطة زر .. ممكن معدنية أو خشبية .. الخيارات متعددة

معماري قطري

20-08-2015, 03:17 PM

وهذا المقترح المحسن للدور الأول .. تم أيضاً تصغير منور السقف ليكون مع حد واجهة غرفة التلفزيون الزجاج لأن فوقها جسر خرسانة سيكون حامل للمنور والواجهة زجاج سينفذ منها النور لباقي صالة الدور الأول.

مع الشكر الجزيل للأُخت سويت قطر لإبداء هذه الملاحظة السوبر جيدة.

http://i.imgur.com/cJbC8ff.png

sweet qatar

20-08-2015, 04:21 PM

مرحبا أستاذي

العفو هذا شي ما ينذكر جدام جهودك وابداعك .. ماشالله عليك

اعتمادك لأكثر من فوكال بوينت يعطي المكان طاقة و حيوية متجددة

خصوصاً النافورة الماي ينظف طاقة البيت و وجوده في المنتصف و تحت الإضاءة الطبيعية سبب في تجديد السعادة في البيت

الامتداد البصري حلو لكنه يقيد وايد ..

معماري قطري

20-08-2015, 05:26 PM

انا طالب علم في هالمنتدى وانتي استاذتي

يقيد من أي ناحية يعني؟

عندنا مكان مفتوح وعائلي .. وعندنا مجلس فيه خصوصية ومكتب خاص وممكن نفتحه على الصالة وعندنا جزء خلفي يطل على الحديقة الخلفية وكذلك عندنا صالة تلفزيون وألعاب مغلقة بواجهة زجاجية لمتابعة الأطفال .. فيه شوية خصوصية وانفتاح أكثر في الدور الأرضي والدور الأول فيه غرف النوم هادية وحتى بعضها مداخلها فيها كسرة تخفف الصوت.

يفترض أرضيات الغرف سجاد والصالات بورسلان وعندي مقترح للأرضيات وللأسقف وبنوصل له بالتدريج.

الوضع الثاني عندي اللي سويته بالعازل وبديت احط مكان الأعمدة وحجمها .. الاستشاري له وجهة نظر والمالك كذلك له خياراته وانا تطويري للتصميم غير باضافات اشوفها ضرورية .. ممكن حد يلتزم بها وممكن مجال التغيير حسب الحاجة.

حتى التصميم الداخلي والغرف ممكن تكون مشتركة لشخصين وممكن تنعمل لشخص بس هذا حسب اختيار كل مالك.

sweet qatar

22-08-2015, 06:44 AM

انا طالب علم في هالمنتدى وانتي استاذتي

يقيد من أي ناحية يعني؟
.

الله يزيدك علم و تواضع :o

التقييد الي قصدته في التصميم الداخلي للمساحة

أنا أول ماشفت التصميم حاولت أتخيل الستايل الي بيتاثث فيه
واجهتني مشكلة فخامة المدخل vs المطبخ الأمريكي

لأن السمات المعمارية أحيانا تتحكم في الستايل الي ممكن تعمله للمكان

ممكن تقول نيوكلاسيك أو مودرن أو عصري بسبب المطبخ المفتوح..

لكن الي حبيته أكثر للنافورة تكون كلاسيك فخم جدآ مع خلفية الدرج والمصعد

عندنا مكان مفتوح وعائلي .. وعندنا مجلس فيه خصوصية ومكتب خاص وممكن نفتحه على الصالة وعندنا جزء خلفي يطل على الحديقة الخلفية وكذلك عندنا صالة تلفزيون وألعاب مغلقة بواجهة زجاجية لمتابعة الأطفال .. فيه شوية خصوصية وانفتاح أكثر في الدور الأرضي والدور الأول فيه غرف النوم هادية وحتى بعضها مداخلها فيها كسرة تخفف الصوت.

يفترض أرضيات الغرف سجاد والصالات بورسلان وعندي مقترح للأرضيات وللأسقف وبنوصل له بالتدريج.

الوضع الثاني عندي اللي سويته بالعازل وبديت احط مكان الأعمدة وحجمها .. الاستشاري له وجهة نظر والمالك كذلك له خياراته وانا تطويري للتصميم غير باضافات اشوفها ضرورية .. ممكن حد يلتزم بها وممكن مجال التغيير حسب الحاجة.

حتى التصميم الداخلي والغرف ممكن تكون مشتركة لشخصين وممكن تنعمل لشخص بس هذا حسب اختيار كل مالك.

في الجراوند لازلت أشوف إزالة الستور الموجود عند النافورة
واستغلال المكان بوضع كونسول أو كرسيين و طاولة

بالإضافة ان في ستور موجود عند المطبخ

وبالنسبة للمطبخ لو يكون بجزيرة في النص أفضل و عملي أكثر

فكرة البارتشنات الي اقترحتها قبل أخوي معماري تعزز التوزيع الي انت حاطه .. ما راح يكون فصل كامل

بس لما يكون عندنا المنت جميل مثل النافورة ودك تسلط الأضواء عليه و تقوي حضوره

و طبعاً ملاحظاتي سطحية جدآ لأني ماعرف شي عن سكان المنزل ولا اللايف ستايل لهم

بالعربي اعذرني علي التفلسف :)

معماري قطري

22-08-2015, 04:14 PM

الله يزيدك علم و تواضع :o

التقييد الي قصدته في التصميم الداخلي للمساحة

أنا أول ماشفت التصميم حاولت أتخيل الستايل الي بيتاثث فيه
واجهتني مشكلة فخامة المدخل vs المطبخ الأمريكي

لأن السمات المعمارية أحيانا تتحكم في الستايل الي ممكن تعمله للمكان

ممكن تقول نيوكلاسيك أو مودرن أو عصري بسبب المطبخ المفتوح..

لكن الي حبيته أكثر للنافورة تكون كلاسيك فخم جدآ مع خلفية الدرج والمصعد

في الجراوند لازلت أشوف إزالة الستور الموجود عند النافورة
واستغلال المكان بوضع كونسول أو كرسيين و طاولة

بالإضافة ان في ستور موجود عند المطبخ

وبالنسبة للمطبخ لو يكون بجزيرة في النص أفضل و عملي أكثر

فكرة البارتشنات الي اقترحتها قبل أخوي معماري تعزز التوزيع الي انت حاطه .. ما راح يكون فصل كامل

بس لما يكون عندنا المنت جميل مثل النافورة ودك تسلط الأضواء عليه و تقوي حضوره

و طبعاً ملاحظاتي سطحية جدآ لأني ماعرف شي عن سكان المنزل ولا اللايف ستايل لهم

بالعربي اعذرني علي التفلسف :)

والله بالعكس اختي الكريمة ادقق في أَفكارج واقتراحاتج ومجال تنفيذها سهل الحين

توزيع الصالة التحتية اللي تعتبر موزع ما يؤثر فيه الستور الصغير وبالعكس بيفيدنا في عدة التنظيف .. وركزي في الصورة فوق بتحصلين المكان ما شاء الله غابة كراسي نضيف بعد كرسيين كديكور بتكون زيادة مب في مكانها .. حول النافورة لو كانت متدرجة بشكل صغير من فوق وكبير من تحت ممكن نحط زهور ونباتات.

حتى حائط المخزن ممكن نعلق عليه لوحة .. حتى الشكل السابق اللي كان فيه الممر مسكر والمخزن واحد وأَكبر بعد مناسب لو كانت الحاجة لغرفة نوم بدل المكتب .. والمالك طبعاً يوزن خياراته وحاجاته ويختار الأَنسب واحنا نحاول نحط حلول واقعية وممكنة وجميلة ولازم نغلب جزئية على أُخرى.

المطبخ ممكن تطوير تصميمه أَكثر وممكن نسوي جزيرة نتحرك حولها وهذي عرضها مناسب وممكن نسوي الجزء اللي صوبه الكراسي مرتفع والجزء اللي فيه الفرن نازل .. ممكن نلغي المخزن الداخلي اللي جنب المطبخ ونسوي كبت كامل بارتفاع الحائط وفيه فرن الشواء مرتفع شوي لسهولة العمل .. وفيه ثلاجات مخفية وفيه مناطق تخزين بأَبواب كبيرة ونكبر النافذة المطلة على الحديقة.

كنت حاب انفتاح المطبخ الداخلي على الخارجي بس المالك يبغي يحط طباخ ويخليه شبه معزول ووصلنا لهذا الحل .. حتى العازل الحراري اللي يعين المالك وضحت له الطريقة بس الاستشاري ما يستوعب وحقيقة ملموسة استشاريينا موضوع العزل الحراري فوق مستواهم من واقع ملاحظات لمستها في الواقع وفي كافة التصاميم .. انا حتى سويت المطبخ الخارجي قبل ببابين وممكن قفل الباب أو تسكيره ببساطة وقت يكون فيه طباخ في المطبخ الخارجي .. وسهولة التواصل بين المطبخين عن طريق الخادمة ضرورية .. وكانت فكرة المالك يخلي المطبخ الخارجي في الزاوية فوق .. فكان بيخرب خصوصية الحديقة وبيصغر مساحتها.

العملية ممكنة بس ما تسوى وممكن نسوي ممر خاص مغلق لكن بنعقد التصميم وبنعاني من بعد المسافة وصعوبة التواصل .. حل البابين في رأَيي هو أَنسب حل وقرب المطبخ الخارجي مثل ما هو هو الأَنسب.

لو تتابعين البداية وتقرين كل شيء بتعرفين خلفيات التصميم كاملة إن شاء الله.

معماري قطري

22-08-2015, 04:56 PM

بإِذن الله بارجع بمقترح فيه تضمين لأَفكارج خصوصاً للمطبخ وتعديل على حجم النافورة وتوضيح لطريقتها .. تقريباً خلصت بس لازم اطلع وفي الليل اواصل ان شاء الله

sweet qatar

22-08-2015, 05:26 PM

الله يعطيك العافية أخوي

انا قريت الموضوع من البداية .. و استوعبت الي علي قدي :)

في انتظار عودتك مع المخطط ... و شاكرة لك سعة صدرك

معماري قطري

22-08-2015, 11:00 PM

sweet qatar

23-08-2015, 05:12 AM

الله يعافيج إختي سويت والنقاش دوم مفيد وانا ما كنت مقتنع بدكت البايبات اللي داخله داخل الصالة .. ممكن نزيلها بالكامل ونخلي البايبات خارجية أو في الحائط وسويت هذا التغيير البسيط على المطبخ وتم الغاء المخزن وتكبير الواجهة الزجاجية وعمل كبت كبير بكامل الحائط.

النافورة تصغرت وتغير شكلها لشكل أنعم.

http://i.imgur.com/CGvS5l7.png

صبحك الله بالخير

التغيير جميل بإضافة الجزيرة وسط المطبخ

بهالطريقة بيكون "مثلث العمل" بين المغسلة و الفرن والثلاجة مريح و مناسب

ولو إن المسافات مش واضحة عندي أعتقد الجزيرة المفروض تكون أقرب للكاونتر

ستور المطبخ كان بيرفكت من ناحية الحجم و المكان ... الكبت أبدا مايسد مكانه
اشوفه يرجع مثل ما كان أفضل

والواجهة الزجاجية بتكون غير مريحة للي بيعمل علي الكاونتر

سالفة البايبات للأسف ما فهمتها :(

بالنسبة للنافورة الناعمه :o

ماعرف الستايل الي في بالك بس وقت ما نخطط للتصميم الداخلي لازم نحدد عشان نحقق التناغم بين كل العناصر وندرسها صح

صح كلامك بالنسبة لعدد الكراسي .. لكن ما يتعارض مع توفير جلسة خصوصية إضافية
عادة تكون من كرسي أو كرسيين ماكسيمم

و عند أي مدخل نحتاج كونسول مع مراية

الضيوف يحتاجون مساحة يرتبون نفسهم قبل ليدخلون المجلس

معماري قطري

23-08-2015, 01:11 PM

صباح النور اختي سويت

التصميم فيه أشياء كثير مهمة تحتاج لترتيب وللبناء عليها وتحتاج مؤكد اختيار المالك .. اللي سويناه يعتبر تأَسيس للباقي اللي هو اختيار نوعية العزل لو فيه وسمك الحائط .. طريقة تركيب البايبات داخلية أو خارجية أو في دكت أو من ضمن الحائط .. باقي الخدمات ونرتبها في التصميم وهذي تحتاج مهندسين مختصين كهربائي وميكانيكي وانشائي لترتيب الوضع الانشائي النهائي.

الفضاءات جاهزة للتصميم الداخلي وصحيح المخزن وهو قريب من المطبخ ضروري وممكن لو حبينا نصغر المخزن شوي ونسوي الكبت الكبير اللي يعتبر مساحة تخزين كبيرة .. وبالنسبة للكراسي عندنا مكان واسع نقدر نحط فيه كرسيين لو حبينا وطاولة وكذلك المراية .. قطع أثاث وديكور لازم تصمم أو تختار بعناية لتناسب المكان.

اللي يهمني الحين تضبيط مكان الدرايش وسعتها للدورين وتأثيرها على الواجهة الرئيسية .. وهنا عندي نظرة مهمة حيث نشوف بعض المهندسين يصممون النوافذ على أساس تكون بحجم واحد لسهولة الرسم ولسهولة تحديدها وتنفيذها .. انا احب تصميم النوافذ بطريقة تختلف ومهم عندي تأَثيرها في الفضاء الداخلي أكثر من شكلها في الخارج .. يعني ممكن تكون الدرايش السفلية غير وأكبر والعلوية شوي أصغر وللصالات أكبر ولغرف النوم أصغر شوي .. وعندنا بعض الواجهات النص التحتي مغطيه سور الحوش وأحياناً جهة مطلة على حديقة تحتاج انفتاح أكبر وتحتاج زجاج شفاف بدون تعتيم .. حتى بعض الواجهات الزجاجية ما تحتاج ستارة وممكن نجمل الفريم من داخل بتشكيل خشبي أو غيره ليبقى دوم مكشوف.

sweet qatar

23-08-2015, 01:49 PM

معماري قطري

23-08-2015, 03:45 PM

هلا بك أخوي

التصميم الداخلي هو الي يخلق الفضاءات :o

أعتقد تقصد لاحقين علي الديكور والتأثيث .. و هذي ماختلف معاك فيها

للأسف مافي إبداع عند الغالبية هني .. استسهال و كوبي بيست

تقدر تبدأ من السهل مثل دريشة المطبخ الي بتكون ورا المغسلة فقط بحيث ما يتعرض باقي الكاونتر لأشعة الشمس

و درايش الواجهة الي يحددها الشكل الخارجي

الدرايش تتركب لها ستائر ممكن خشب وممكن معدن وممكن عادية .. وفيه الحين التعتيم الالكتروني من 0 شفاف ل 100% معتم وأسود.

بالنسبة لي ما اسوي تصميم داخلي دقيق برسومات دقيقة ومواصفات دقيقة وبحيث كل شيء يكون مصمم للبيت .. اعتمد على توزيع الأثاث وعلى اختيار المناسب .. التصميم الداخلي يبغي له متابعة حثيثة مع المصمم ومع المالك وأوقات يطلع سعر التأَثيث أغلى من سعر البناء .. مقتنع بأن التأَثيث من الموجود في السوق أوفر بكثير وللأَماكن المغلقة لكل مكان خصوصيته واختيار ساكنه لكن الأماكن المفتوحة ممكن نسويها بنمط واحد أو متقارب .. دخلت بيوت خالطين عدة أنماط ومساحات مفتوحة وكان لكل حيز شخصيته وجماله.

عندنا أرضية المدخل وصالة النافورة والليوان الخارجي هذي بمستوى نازل شوي وممكن تكون بلون آخر بورسلان أو غيره وممكن تكون زيرو جوينت أو حسب الرغبة حتى بفواصل كبيرة وبقراوت من لون ثاني معاكس .. في الحالتين صف البلاط في اتجاه الطول بيعطينا احساس بالطول ويكون بنفس الزاوية .. للأرضيات المرتفعة الخيارات ممكن تكون غير ويكون البلاط مربع وحتى حدود 60 في 60 ما عندنا مشكلة .. للمدخل نقدر نركب 60 في 120 أو 45 في 90 .

بالنسبة للمطبخ ممكن نركب سيراميك بحجم 20 في 20 بحيث يرجع بزاوية 45 ويكون بقطع ديكور وقطع بوردر في الأطراف .. حتى للجلسة نقدر نسوي أرضية وسط البلاط ووسط الكراسي بنزول بسيط وببلاستر ونركب عليها سجاد مع حشوة بحيث يكون متساوي في المستوى أو شوي مرتفع عن أرضية الرخام أو البورسلان.

وان شاء الله باجي لمقترح الأرضيات بالرسم.

للدرج بما انه ملموم ومغلق من رأيي البورسلان مناسب للبلاطات والبلاط المزخرف مناسب للواجهات خصوصاً الواجهات مفتوحة .. ودرابزين بسيط بس المسكة ومثبت في الجدار بيكون ناعم وحلو ومناسب للمكان .. فيه بلاطات كبار وبسمك عريض بورسلان 60 في 120 مناسبين جداً للدرج بحيث تنقص كل بلاطة من النص وتكفي لعتبتين .. بس بنحتاج لقطعتين صغار في الأطراف لأن العرض 1.6 متر أو نشوف بلاطات بنفس هذا العرض .. حتى لو سويناها 120 سم في الوسط بورسلان من نوع معين بشطف الزاوية قليلاً حتى ما تنكسر ولا تكسر حد وقت السقوط وركبنا حولها قطعتين بوردر بعرض 20 سم بعد بتطلع حلوة.

حل آخر للدرج هو السجاد الخاص يتركب على صبية خرسانية أو بلاط شعبي ويكون البوردر غرانيت .. ودوم التكلفة تكون أقل من الرخام بالكامل ويبقى الرخام بالكامل حل مناسب بعد.

معماري قطري

23-08-2015, 05:26 PM

هذي فكرة لأرضية المطبخ .. البلاط 20 في 20 وممكن نشوف غير بقطع خاصة في الزوايا أو ببوردر غير .. هذا البوردر بعرض 25 سم وممكن نصغره لغاية 10 سم وممكن يجي مدمج مع نعلة سيراميك من نفس النوع ولا بلون مختلف مثلاً النعلة زرقا والبوردر أزرق أو مزخرف وباقي البلاط أبيض .. وممكن نمزج كم نوع وكم لون .. حتى مزج قطع رخام مع سيراميك أو بورسلان أو حتى بسمك مختلف.

http://i.imgur.com/bcrjboI.png

معماري قطري

25-08-2015, 03:24 AM

ما عجبني التصميم السابق لتوزيع البلاط وسويت تعديل بسيط مع توزيع لغالبية أرضيات الدور الأرضي .. حسب قناعتي واختياري ولازم لكل واحد اختيار يختلف .. بداية درج المدخل والبلاطة المحددة لليوان واللي تمر تحت الأعمدة هذي يستحسن تكون غرانيت أَو رخام مناسب والداخل هذي بلاطات 120 في 60 وبزوايا مقطوعة وقطع ممكن تكون منقوشة وجاية خاصة لنوعية البلاط هذي وممكن تكون بلون قاتم أو لون معاكس للون البلاط الموجود حولها .. فيه نوع تجي فيه قطع من ورق ذهبي وهذي غالية ولو حصلناها بمقاس 15 سم في 15 مثل الموجودة باللون الأسود هنا ولو حول هذا المقاس أو نضطر ناخذ قطعة 30 في 30 ونقصها لأربع قطع 15 في 15 وبالعدد الواضح في الرسم.

قطع البلاطات سهل عن طريق معامل الرخام المختصة بالوتر جت أو بالليزر.

http://i.imgur.com/oLOvoqx.png

بالنسبة للنافورة تم توضيحها أكثر وحولها قواعد لإصيصات الزراعة وبتكون من الوسط مرتفعة وأدق بحيث ينزل الماي من فوق متدرج .. باب المجلس فيه نعلة رخام تكون كفاصل بين أرضية البورسلان وأرضية المجلس اللي ممكن تكون باركيه أو سجاد أو بورسلان .. انا احب تكون سجاد مع حشوة سفلية.

هذي صورة مقربة لمنطقة المطبخ .. تم تغيير البلاط لحجم 40 في 40 وتم تصغير البوردر لحجم 10 في 40 .. والبوردر ممكن يكون جاي كنعلة وبوردر منحني وشبه متصل وممكن نسويه بقطع خاصة ولون معاكس للون البلاط .. طبعاً البوردر مكان الجزيرة ممكن يكون ما يبين صوب الكراسي لأَن بيكون الكاونتر معلق ومغطي البوردر .. وبروز الحواف اللي جايه مقوسة كذلك ممكن يغطي البوردر أو أَغلبه .. حسب تفاصيل تصميم الجزيرة لازم التفصيل النهائي بيختلف شوي لكن في الأساس تقريباً نفس الشيء.

http://i.imgur.com/Ts3S6nR.png

طبعاً تم عمل كسرة خاصة تخفي الثلاجات وهذي سهل نفصلها بالجبس أو بورد خشبي فوقه جبس .. تم تحريك الباب للمخزن قليلاً ليكون في خط واحد مع فراغ الثلاجات واللي المفروض له أرضية شوي مرتفعة لوقت الغسيل ما يروح الماي تحت الثلاجات .. واستوى عندنا البوردر متواصل لداخل المحزن .. وفكرة حلوة يكون باب المخزن زجاج محبب يبين النور من وراه.

دوم لتركيب البلاط نختار زاوية معينة لبلاطة البداية وبالنسبة لأَرضية الصالة والممر فالبلاطة اليسرى العلوية هي الأولى ويقاس عليها وهي بمقاس 80 في 80 .. وما شاء الله عرض الصالة مناسب لعدد من البلاطات بدون قص .. طبعاً لتجويف المصعد والواجهة للمصعد يستحسن نركب غرانيت مصقول بلون داكن متصل مع جزء الأرضية البسيط أمام الدرج .. هذا الغرانيت نستطيع تركيب عناصر اضاءَة صغيرة من نوعية ال اي دي باضاءَة خافتة وقد تكون متعددة أو متغيرة اللون .. وممكن يكون متواصل لعتبات الدرج فقط وواجهة العتبات تكون من بلاط مزخرف.

كذلك عتبات الدرج بين الممر الموصل من المدخل للصالة ولباقي البيت هذه يفترض تكون من نفس لون ونوع واجهة المصعد وممكن نركب تحت بداية العتبة .. ما يسمى أنف العتبة اضاءَة ال اي دي وهذه تفصيلها سهل وتكون شبه مخفية.

تبقى عندنا منطقة مغسلة اليد وحمام الصالة وهذه يفترض تكون امتداد لبلاطات الصالة .. أما منطقة صالة الألعاب الكترونية فهي يفضل تكون سجادة مريحة مع حشوة سفلية.

هذه منطقة النافورة وتشكيلة البلاط حولها والعتبات وباقي البورسلان 80 في 80

http://i.imgur.com/Y2MbfmG.png

بالنسبة لصالة الجلوس تكون من البورسلان 80 في 80 وممكن يكون زيرو جوينت وبتشكيلة رخامية .. ومتروكة مساحة هابطة بسمك البورسلان ومثبتة فيها سجادة مع حشوة سميكة.

http://i.imgur.com/UZUlFH4.png

سارة99

29-08-2015, 03:22 AM

السلام عليكم ورحمة الله.
انا عندي مخطط لبيتي "ليس نهائي" وأحتاج ملاحظات عليه
ممكن أطرحه هني ؟

معماري قطري

29-08-2015, 01:04 PM

السلام عليكم ورحمة الله.
انا عندي مخطط لبيتي "ليس نهائي" وأحتاج ملاحظات عليه
ممكن أطرحه هني ؟

عليكم السلام ورحمة الله وبركاته

أكيد ممكن الموضوع لهذا الغرض

شفت الموضوع السابق بس الصور ما تبين لأن منزلة من تلفون .. ولو تحبين مراجعة شاملة وتوضيح مثل باقي المنازل أرسلي لي رسومات الاوتوكاد وباوضح عليها وباحولها صور هنا

معماري قطري

29-08-2015, 01:35 PM

http://i.imgur.com/oLOvoqx.png

http://i.imgur.com/UZUlFH4.png

بالنسبة لتوزيع البلاط الكبار المربع ال 80 في 80 هنا والأثاث تقريباً مكانه ثابت .. وهذا ممكن نكمله للمكتب وعلى وضعية الأثاث نفسها .. نقدر نحط زوايا صغيرة بعضها تجي على شكل وردة نحاسية أو ذهبية أو كريستال وتكون غالية .. ممكن نخلي بس الأجزاء الظاهرة وهي تبين واضحة على المخطط ونترك زاوية سادة بدون ديكور وزاوية بديكور .. بتطلع أحلى ومتناغمة مع اللي جاي بزاوية 45 درجة في المدخل .. وحتى لو اخترنا بورسلان رخيص ووضعنا هذي القطع بتعطي الشكل النهائي جمال وغنى أكثر

sweet qatar

01-09-2015, 03:24 AM

معماري قطري

01-09-2015, 03:26 PM

السلام عليكم

يعطيك العافية أخوي

أعتقد لو السجادة في الجلسة الي علي اليسار تتكبر و تغطي حدود الجلسة كاملة بيكون أفضل

لأنها تعتبر منطقة راحة كونها بجنب المطبخ وفيها تلفزيون أكثر من إنها جلسة رسمية

عليكم السلام ورحمة الله وبركاته

الله يعافيج اختي وفيما طرحتي انتي صح 100% وما شاء الله عليج دقيقة .. صج المفروض تكون واصلة لتحت الكراسي بشوي الرجل ترتاح عليها وخصوصاً يكون تحتها حشوة مريحة وتعطي الجلسة راحة وتغيير .. مهم نحدد نوعية الكراسي تقريباً قبل ونترك مسافة بسيطة من الحائط ونحدد مكان قطعة السجاد صح .. وشركات السجاد المختصة عندهم نحاس للأطراف أو خشب يثبت الأطراف ويبقى الوسط شوي منتفخ.

أمس شفت معمل سجاد ايراني ومحل للبيع في ميونخ ويسونه حسب طلب العميل وصراحة النقوش تعتبر لوحات فنية .. وعندنا حتى السجاد الحديث اللي البعض يدلعونه بالموكيت ممكن يجي مداخل في بعض أو بورود وتشجيرات محفرة وممكن قصها بسهولة لهذي المساحة.

معماري قطري

01-09-2015, 04:29 PM

سويت تعديل بسيط للسجادة ومع مقترح لتكميل نفس الأرضية في المكتب ووضحت بوردر الرخام بالأسود للمجلس والمطعم ولمدخل المصعد .. مع وضع وردات في زوايا البلاط .. البلاط الكبير ممكن يكون بورسلان أو رخام والبوردر غير حتى ممكن يكون باركيه .. والخلط بين المواد ممكن بسهولة لكن يتطلب تجانس وتركيب جيد.

http://i.imgur.com/kFpKABz.png

معماري قطري

01-09-2015, 04:42 PM

هذي صورة مقربة لتشكيلة الوردة وفيه تشكيلات كثيرة بعضها نحاسية على شكل نجمة أو ذهبية أو فضية أو كريستالية .. وفيه اللي تحتها ليت ال اي دي يعطي أضاءَة بلون معين وبكهربة خفيفة ويعمر لفترة عشرين سنة وهو يشتغل على طول بشرط يتركب صح.

http://i.imgur.com/QtvAs1V.png

معماري قطري

01-09-2015, 04:51 PM

المجلس والمطعم والمغسلة التابعة لهم يكونون نفس الأرضية والخيار متروك للمالك ومتعدد .. المهم البوردر والنعلة يكونون نفس المادة والوسط نقدر نغير .. البوردر والنعلة ممكن يكونون رخام لامع ومصقول ويستحسن داكن اللون والداخل فاتح وزيرو جوينت

معماري قطري

01-09-2015, 06:05 PM

ترك البلاط 60 في 120 لصالة المدخل حلو ويعطي طول للصالة ممكن نزيد بلاطات الزاوية ونخليها مقصوصة كمعين بعد طولها ضعف عرضها بشكل متناسب مع طول البلاط ويعطينا اتجاه طولي .. مثل هذا الشكل المقرب.

http://i.imgur.com/1xgfV5I.png

بالنسبة لحواف النافورة لازم تنقطع كل قطعة مع الحافة وما وضحتها هنا .. نقدر نستخدم حتى بورسلان رخيص ونقصه في ورشة رخام وكل قطعة معروفة قصتها أو ينقص في الموقع بمنشار كهربي زين

معماري قطري

09-09-2015, 01:33 AM

وصلتني اليوم الرسومات الخاصة بالموضوع الأول واللي آخر لوحة عدلتها فوق هذي المشاركة .. التعديلات هذي بسيطة وممكن تضمينها في التعديلات النهائية مع تجهيز باقي التخصصات مثل اللوحات الانشائية والكهربية والميكانيكية والخدمات الخارجية.

الله يوفق صاحب التصميم في الموافقات وفي البنيان وباحط الواجهات ومقترحات تحسينها لمواصلة النقاش والمالك أكيد حر يختار اللي يعجبه عني انا احب الواجهة البسيطة.

ولي متابعة عن قريب.

معماري قطري

30-10-2015, 01:21 AM

إحدى الأخوات الفاضلات تواصلت معاي بخصوص تصميم مناسب لأَرض صغيرة .. وشفت تصميم مبدئي أرسلته لي لكن كان مالي الحوش .. وفكرت في عمل تصميم جديد ومناسب وصغير واشتغلت عليه والحمد لله الفكرة المبدئية شبه منتهي منها.

مساحة الأرض 475 وعلى زاوية ومشطورة .. الفكرة تتلخص في ترك ارتدادات ناحية الجار مترين وطلعت عندي مساحة الدور الأرضي 185 مع مساحة كافية لغرفة سائق ومخزن أو مطبخ خارجي صغير .. مع موقف لسيارتين وممكن يستوعب 4 سيارات ورا بعض.

ممكن عمل بيسمنت لمخزن ولغرفة معدات وغرفة خدم مفصولة كلها عن مجلس وغرفة طعام أو صالة رياضة لو حبينا بمدخل خارجي وممر داخلي.

البيسمنت فكرته يكون مدفون تحت الأرض وأرضية البيت تكون بارتفاع مريح وعادي .. ونستخدم مناور مغطاة بحديد مشبوك ممكن نمشي عليه وفيه درايش عادية وتدخل نور وتهوية للبيسمنت وممكن نزرع جدامها زراعة بسيطة لو حبينا كمنظر

http://i.imgur.com/LvixTZa.png

معماري قطري

30-10-2015, 01:24 AM

الصورة شوي طلعت مب واضحة .. بس بيكون عندنا أو ممكن تكون عندنا سبع غرف نوم وصالة ومجلس رجال شبه خارجي وبمدخل خاص ومجلس نساء والله يعين على موافقة التخطيط

معماري قطري

31-10-2015, 06:50 PM

هذي صورة للبيسمنت أتمنى تكون واضحة .. مبدأ عمل النوافذ موضح بحيث تكون محفور لها حتى يدخل النور ومغطاة من فوق بحديد مشبوك وفيه فتحات للهواء وللنور الطبيعي .. وبعدها تجي خطوط الصرف الصحي.

http://i.imgur.com/4fylD7P.png

البيسمنت مقسوم لقسمين ومساحة مسطح البناء 185 .. قسم مجلس ومكتب ومطعم ومغاسل يمكن الدخول لهم من داخل البيت وفيه باب يحفظ الخصوصية وممكن الدخول لهم من درج في الحوش وبابهم تحت الممر اللي يوصل لمدخل البيت الرئيسي .. وجزء ثاني خاص بغرفة خدم ومخزن كبير .. الدرايش هذي ممكن نتحكم في عمقها وعمق الحفرة معاها وتشطيبها من داخل حسب ما نحب وممكن نزرعها بشجر زينة ورود.

http://i.imgur.com/4fylD7P.png

معماري قطري

31-10-2015, 07:18 PM

وهذي صورة للدور الأول

http://i.imgur.com/z3QogHV.png

معماري قطري

31-10-2015, 07:20 PM

الدرايش تحتاج ترتيب مع الواجهات وممكن مشكلة الجار على ارتداد مترين تواجهنا مشكلة في الدريشة فوق على اليمين ولازم نصغر الغرفة متر حتى يستوي الارتداد 3 متر

معماري قطري

01-11-2015, 01:53 PM

وهذي صورة لدور البنتهاوس ويتكون من غرفة ماستر وتظليل لغرفة التانكي ومساحة البيت كاملة توصل 640 متر وبدون البيسمنت بتكون 455 والمساحة اللي للملحق صغيرة تكفي لغرفة سايق مع مخزن أومطبخ صغير خارجي بمساحة اجمالية ما تزيد عن 50 متر مربع

http://i.imgur.com/UPht4zR.png

معماري قطري

01-11-2015, 02:13 PM

بالنسبة لجهة الجار التخطيط يشترط للنوافذ العادية في الأدوار اللي ظاهرة ومطلة على الجار ارتداد 3 متر .. وارتداد البيت من تحت 2 متر حتى نستفيد من مساحة الأرض الصغيرة ونخلي الارتداد جدام .. هذا حل لعمل دريشة داخلة متر وجزء السقف تحتها قرميد حتى ما تكون مثل البلكونة .. مثل ما هو واضح فوق يمين

http://i.imgur.com/02TsOBo.png

أَتمنى أَكون حليت مشاكل التصميم للإخت الفاضلة ومن عنده ملاحظة يتفضل مشكوراً

معماري قطري

01-11-2015, 03:38 PM

نسيت شيء مهم اللي هو البانتري في الدور الأول لعمل شاي أو قهوة وللثلاجة .. المشكلة ما فيه مكان للجلوس الا تحت لكن ضروري نجهز مكان أقل شيء للثلاجة للماي والمشروبات .. ولو بنتخلص من غرفة ونخلي مكانها صالة تلفزيون ممكن عمل البانتري هناك.

طبعاً الفرن ما فيه داعي له والمغسلة ممكن تكون أصغر بس هذا للتوضيح .. نحتاج كهرب للميكروويف ولإبريق الشاي.

http://i.imgur.com/BNNp2x4.png

بشائر

06-11-2015, 10:17 AM

الله يجزيك خير اخوي معماري قطري

رووعة الموضوع وانا شخصيا استفدت من خبرتك الكثييير ربي يعطيك العافية ..

سجلني متابعة ..

معماري قطري

06-11-2015, 03:05 PM

الله يحفظج إختي بشاير .. فيه كثير حلول هندسية سهلة بس استشاريينا الله يهداهم تعودوا نظام معين ما يقدرون يغيرونه ولا يحاولون يناقشون المختصين في التخطيط .. واخواننا في التخطيط ما يطورون القوانين التخطيطية ويستخدمون حلول واشتراطات بديلة .. بدرايش ارتداد 3 أمتار وكأن هذا غير قابل للتغيير ... وغير وغير من القوانين اللي نشوفها تنكسر قدام اللي يناقش صح والا عنده واسطة ومعرفة.

هذا ماستر بلان لتوزيع بيت المستقبل بإذن الله إن الله كتب لنا عمر .. قسمت الأرض وهي قطعة لي وقطعة لولدي وعلى شارع يمين وشارع يسار وسكة تحت كما في الرسم .. قسمتها الى جزء للمجلس وراه جزء لحوض السباحة وملحقاته اللي بيكون مغطى بسقف زجاجي + خرسانة وبعدين البيت الرئيسي وبعدين الملحق وبعدين تنتهي حدود أرضي وتنفتح جزئياً على أرض ولدي.

فكرة المجلس يكون مثمن الأضلاع والجلسة داخل دائرية .. وحافظت على ارتداد مناسب حتى أقدر أخلي إرتفاع المجلس 4.5 متر والدرايش تكون ضيقة ومرتفعة ومقسمة بحيث فوق تكون جزء ملون وتحت شفاف عادي للي لونها أزرق كما في الرسم .. وللدرايش السوداء لأَنها تطل على المسبح بتكون بإنارة داخلية بين الزجاج وبألوان ولا يرى من خلفها وثابتة لا تنفتح .. سقف منطقة الحوض بيكون نازل والدرايش الجزء العلوي بيكون يدخل الضوء الطبيعي.

http://i.imgur.com/ImUq9LW.png

باركز إن شاء الله على التصميم منطقة منطقة واللي يحتاج أي جزء حلاله وانا اعين واعاون

معماري قطري

06-11-2015, 04:16 PM

هذي منطقة المدخل وتبين فيها غرفة السائق اللي تعتبر خارجية ومتصلة مع مظلة المدخل اللي بتكمل تصميم واجهة الحايط الخارجي مع مدخل المجلس والتركيز عندي على تصميم المنطقة ككل في تجانس واحد وتناسب كتل .. غرفة السائق تكفي اثنين بمطبخ صغير وحمام يكرم القاريء .. والدريشة اللي على الشارع ممكن تكون ضيقة وعالية كمنور للشمس لمقابلتها اتجاه الشرق.

مع مبنى البوابة متصل ككتلة واحدة غرفة مخزن صغيرة لمواد وأدوات الزراعة .. وداخل غرفة الكهرباء .. طبيلات السيارات بتكون طابوق وبواجهة تغطي الهيكل الحديدي اللي للسقف وبعضها بتكون بأبواب .. وبعضها بتكون بمساحات تخزين برفوف حديد.

الدوار يحتاج شوية تعديل لكن المبدأ اتوقع هو الأنسب وفوق منتصف الدوار بيكون فيه امتداد للمكتب اللي لي يظلل المدخل .. ومقابل مكان للزراعة ولشلال وانا متردد ما بين عمل هذا الجزء الطويل مزروع عشب بشكل مائل مثل التل اللي مرتفع صوب الحائط ونازل صوب طريق السيارات وجهة المرتفع تكون زراعة عالية والباقي عشب مع زهور ونباتات صغيرة .. وبدون عمل الشلال فقط جدول ماء متحرك .. أو مع الشلال بهيكل حجري كبير يغطي مكان تانكي الماي .. تانكي الماي ممكن يكون في منطقة قرب الباب قرب الشجر الأربع وتغطيه طبيلة السيارتين .. الرجاء ابداء الرأي.

http://i.imgur.com/3eIPBGJ.png

العفراء

07-11-2015, 03:09 PM

معماري قطري

07-11-2015, 09:05 PM

ماشاءالله هالموضوع عمي المعماري يدل على ان لك خبره كبيرة ربي يحفظك

و بيكون مرجعيه كبيره لكل انسان حاب يدخل ويستفيد وبصراحة المفروض اتحط ايميلك بالموضوع علشان الزوار يستفيدون من خبرتك لو حبوا يتواصلون معاااك

انا بتم اتابع الموضوع وعقبال ما ابني لي بيت ابي يكون طراز جديم احس البيوت الجديمه اشرررح : )

البيت الأخير إختي العفرا مخططه وتصميمه بيكون حديث ببعض العناصر القديمة المحدثة .. فيه الليوان الوسطي اللي بيكون خاص لأهل البيت وفيه الواجهات الزجاجية الكبيرة المطلة على هذا الليوان .. كنت حاط حوض السباحة في الوسط بس نصحوني الأعضاء قبل بفقدان الخصوصية فسويته في فراغ ثاني شوي أكبر وبيكون بجزء كبير من السقف زجاج يدخل نور الشمس وبتكون معاه ملحقات مثل الجكوزي المفتوح والسونا وحمام البخار ومطبخ صغير وتبديل ملابس وتكرمين حمامات.

هنا يبين وطريقة الوصول له من المجلس أو من الحوش أو من داخل البيت .. محدد بالبنفسجي

http://i.imgur.com/p87AJ6n.png

معماري قطري

07-11-2015, 09:14 PM

هذي صورة مكبرة حق قسم حوض السباحة وارتباطه بالبيت وقربه من المجلس بحيث ممكن الخروج من باب والدخول في باب الى المنطقة .. الدرايش اللي باللون الأسود هي وسطية بين المجلس ومنطقة حوض السباحة وبتكون من طبقتين وفي الوسط بينها انارة صناعية .. يعني تجميلية وما ينشاف من وراها.

http://i.imgur.com/13DzeP0.png

معماري قطري

21-11-2015, 02:58 PM

هذا البيت بيكون موقوف التخطيط له مؤقتاً بس هذي الخطة العامة

فيه بيت اشتغلت على بعض التعديلات عليه وذكرني صاحبه به ولحسن الحظ حصلت رسوماته للحين عندي .. البيت ينبني واعتقد مقارب يخلص وصاحب البيت رحب بفكرة أي حد يستخدم التصميم وماقصر .. واتوقع أي حد يبي يبني ممكن ياخذ فكرة أو ياخذ التصميم كما هو ويضيف عليه حسب احتياجه.

التحدي كان في صغر الأرض والمالك بعدها انتبه لضرورة عمل بيسمنت وكان خلاص بدأ البنيان وفيه صعوبة لعمل التعديلات والا تناقشنا في هذا قبل .. والمشكلة ضيق موقف السيارات والتخطيط وافقوا على ارتداد مترين أو متر ونص من ورا مما صغر الموقف أكثر واتمنى يكون كافي لسيارات الصالون العادية.

http://i.imgur.com/Yk7JwGE.png

مرينا بتعديلات كثيرة وهذا من ضمنهم .. البيت بتسكنه عجوز على كرسي متحرك وضروري يكون فيه مجال للحركة والدخول بسهولة.

أعجبني في المالك إِنه عارف شيبغي لا مساحات ضايعة وغرف قليلة وكبيرة .. البيت كله 4 غرف موزعة على 3 أدوار بس مرتبة صح للمعيشة براحة

http://i.imgur.com/BkyyRAM.png

والصورة السابقة للدور الأول بغرفتين رئيسيتين وصالة وطبعاً المدخل تغير للي في الدور الأرضي هذا عامله الاستشاري وسلوب الرامب كان حاد وصعب دفع الكرسي المتحرك عليه .. لسلوب الرامب نحتاج من 7 سم إلى 10 سم إرتفاع لكل 100 سم مسافة وهذي نقطة توهم منتبهين لها في قطر وسانين قوانين لها

وهذا دور السقف ما كان فيه أي تعديل

http://i.imgur.com/o7rJgZz.png

معماري قطري

21-11-2015, 03:01 PM

بالنسبة حق الدرج فيه في الحائط المنحنى درايش طولية ولو خلينا الدرج نفس مقاس اللي في الجنب وسوينا سطح من البورسلان أو الرخام مرتفع شوي ولا متدرج بطريقة أرفع شوي من عتبات الدرج وتكون هذي حق نباتات ظل بتكون أحلى

المهندس عبدالعزيز

22-11-2015, 09:39 AM

بالنسبة لاخر خريطة موجودة عندي ملاحظة بأن الاشكال الدائرية تضيع جزء من الحيز وتكلفة تصميمها وانشائها كبيرة

معماري قطري

22-11-2015, 03:32 PM

بالنسبة لاخر خريطة موجودة عندي ملاحظة بأن الاشكال الدائرية تضيع جزء من الحيز وتكلفة تصميمها وانشائها كبيرة

معاك ولا تنفع للأثاث ولا تنضبط بسهولة .. انا حاولت قدر المستطاع حتى المدخل الرئيسي كان مقوس وخليته سيدة لكن الباقي ما بغيت ادخل في جماليات التصميم من الخارج خصوصاً المهندس كان باذل جهد كبير فيه .. اللي صفينا عليه مقوس بس الدرج.

يسعدني تواجد مهندسين معانا ومشاركتهم .. شتخصصك إخوي عبدالعزيز؟

المهندس عبدالعزيز

22-11-2015, 11:25 PM

معاك ولا تنفع للأثاث ولا تنضبط بسهولة .. انا حاولت قدر المستطاع حتى المدخل الرئيسي كان مقوس وخليته سيدة لكن الباقي ما بغيت ادخل في جماليات التصميم من الخارج خصوصاً المهندس كان باذل جهد كبير فيه .. اللي صفينا عليه مقوس بس الدرج.

يسعدني تواجد مهندسين معانا ومشاركتهم .. شتخصصك إخوي عبدالعزيز؟

تسلم جزاك الله خير، يمكن التكلفة في التصميم شي بسيط بس في التنفيذ بيكون التكلفة اكبر، فاقترح يغير في مرحلة التصميم لأن التنفيذ بيكون اقل تكلفة

وفي نقطة ثانية بخصوص أن المبنى مب متناظر Symmetric فالشكل مبين غريب

وبالنسبة لنقطة القرميد، مالها داعي مثل بيوت الانجليز وبيجمع المطر في بعض مناطق السقف

معماري قطري

23-11-2015, 01:07 AM

تسلم جزاك الله خير، يمكن التكلفة في التصميم شي بسيط بس في التنفيذ بيكون التكلفة اكبر، فاقترح يغير في مرحلة التصميم لأن التنفيذ بيكون اقل تكلفة

وفي نقطة ثانية بخصوص أن المبنى مب متناظر Symmetric فالشكل مبين غريب

وبالنسبة لنقطة القرميد، مالها داعي مثل بيوت الانجليز وبيجمع المطر في بعض مناطق السقف

ذكرتني بالتناظر ما شاء الله في قطر تقريباً الكل يسويه انا مبتعد عنه واحاول اغيره بأي شيء .. حتى مدخل البيت ما اخليه وسطي أوقات .. في أمريكا طلعت نظرية قديمة مفادها كسر التناظر ولو تشوف بيوتهم تقريباً كلها ما فيها تناظر .. العمارات الطويلة القديمة لازم متناظرة الحديثة لا وجميلة تطلع والقرميد في أماكن معينة ومحدود يعطي حماية وجمال .. وهنا صح اللي صوب بيت الدرج لازم له حماية بعازل قوي ولا بيتسرب الماي من خلال الطابوق أو بيضعف الطابوق بالتدريج .. لازم تنعمل قناة تجمع الماي وتنزله بعيد وزين صاحب البيت يشوف التعليق وينتبه ويرتبه واتوقع وصل لهذي المرحلة.

عن التنفيذ هو نفذ واتوقع الحائط المنحني خلص منه .. أحد الإخوان شغال على تصميم له فيه واجهات كبيرة منحنية وناقشته فيها وهو مصر على هذا الشكل واللي بيركب حجر تنضبط معاه العملية ولا تبين عيوب الانحناء اللي بلاستر وصبغ إذا ما انضبط بتبين العيوب.

معماري قطري

23-11-2015, 01:14 AM

عندي 3 تصاميم حلوين يرتقون لمرتبة قصور بس أصحابهم قالوا لي توب سكرت ولا اتمنى ينعرضون في هذا الموضوع

أحدهم جاي بحوش متدرج في حدود 3 أمتار نزول ومسوي البيسمنت واجهة مدفونة وواجهة مفتوحة على الحوش والحين في المناقصة الله يوفقه .. وواحد مسوي بيته على الطراز الأندلسي وبعد إن شاء الله يطلع روعة هو يبنيه الحين .. والأخير هذا اللي تكلمت عنه تصميم غريب وبيكلفه أكيد والله يعينه على التخطيط والموافقات

sweet qatar

23-11-2015, 04:42 PM

معماري قطري

23-11-2015, 07:36 PM

مرحبا أستاذي

قبل لا اعلق علي أي تصميم

ياليتك تضيف nassir535
علي السناب شات .. الحيييييييين

ولا تقول ماعندك سناب خل اي حد حولك يضيفه و شوف تغطيته لمعرض دبي

صدقني لو تسوي لك حساب تتكلم فيه

فوق الأجر الي بتحصله ان شالله من زكاة العلم بتساعد ناس وايد

وانت بتستفيد الكثيررررر :)

هلا شيختنا انا بديت اصور بعض الملاحظات وسويت أفلام قصيرة وكنت ناوي انزلها في اليوتيوب .. مقاطع حول الدقيقة والله يعين اللي يتابع على لغتي وكلامي كله اضرب بريكات واحرق كيابل مب فيوزات.

السناب شات نزله لي ولدي ولا اقتنعت به للحين يبي لي حد يعطيني نبذة عنه.

ذكرتيني بمعرض ال big 5 في دبي كنت اقاتل علشان اروح له وهالسنتين الأخيرتين كله اكون مسافر .. كنت اودي معاي شنطة اسحبها واجمع من الكتلوجات والعينات وتناقش كثير مع العارضين وإن شاء الله تنكتب لي فرصة زيارته مرة ثانية .. ولو عندج خبر عن أي معرض في أي مكان قولي باحاول اروح

sweet qatar

23-11-2015, 09:27 PM

هلا شيختنا انا بديت اصور بعض الملاحظات وسويت أفلام قصيرة وكنت ناوي انزلها في اليوتيوب .. مقاطع حول الدقيقة والله يعين اللي يتابع على لغتي وكلامي كله اضرب بريكات واحرق كيابل مب فيوزات.

السناب شات نزله لي ولدي ولا اقتنعت به للحين يبي لي حد يعطيني نبذة عنه.

ذكرتيني بمعرض ال big 5 في دبي كنت اقاتل علشان اروح له وهالسنتين الأخيرتين كله اكون مسافر .. كنت اودي معاي شنطة اسحبها واجمع من الكتلوجات والعينات وتناقش كثير مع العارضين وإن شاء الله تنكتب لي فرصة زيارته مرة ثانية .. ولو عندج خبر عن أي معرض في أي مكان قولي باحاول اروح

الشيخ من جابك ... اتمني تجرب السناب لأنك تحب تشارك المعلومات وتفيد الناس

حلو إذا عندك قناة في اليوتيوب

بس السناب وايد أسهل يعني أي شي تشوفه تفتح تلفونك تصور وتعلق وترسل وخلاص

البرنامج عجييييب

وأغلب الي اتابعهم ينزلون سناباتهم في اليوتيوب .. لأن المعلومات تكون وايد مهمة ممكن ترجع لها في اي وقت

علي طاري الbig 5

سناب about_electric
هناك و مسوي تغطية علي المعرض :)

قبل فترة بسيطة كان في معرض عمارة في السعودية .. بس للمختصين أعتقد

روعه روعه شي عجيب .. تخيل انت مرتاح في البيت و الناس تروح المعرض وتاخذك بجولة عن الجديد و معلومات المحلات

للأسف ماعندي وقت ولا كنت نزلت لكم آخر موضة في الاضاءة و هالسوالف

معماري قطري

23-11-2015, 11:40 PM

معماري قطري

24-11-2015, 03:59 PM

كنت ادور في التصاميم القديمة وحصلت هذا التعديل على تصميم كان غريب ومبالغ فيه من الناحية الإنشائية .. راعيه انصدم بعمدان وسط الصالة وتم وضع حلول لها .. الله أعلم يفترض ألحين سكن البيت

العمود الوسطي تم حل مشكلته بعمل طاولة دائرية ينحط عليها التلفزيون وعمله دائري يخليه أقل تأثير للرؤية وأنعم .. كان الاستشاري مسوي البانتري مغلق ومتصل مع العمود في الزاوية السفلية وانا فكرت في استغلالها للجلسة وفتحها مع استغلال العمود للتلفزيون ونقلت البانتري بشكل مفتوح وحضاري لجهة الحائط البعيدة .. وسويت تعديلات كثيرة ما اقدر احطها وإن شاء الله يسامحني صاحب التصميم عن هذي الجزئية اللي باعرضها لإِستفادة الجميع.

http://i.imgur.com/aPV923S.png

sweet qatar

28-11-2015, 10:47 PM

لازم بتحصلين هنيهه أو هنيهات منيه ولا مناك ونزلي لنا المعلومات

بس زيارة المعرض وطول فترته يومياً متعة حقيقية ونتلاقى بربعنا حتى اللي من دول الخليج من سنوات طويلة ما شفناهم ومدراء الشركات ونحضر سمنارز حق مواد جديدة

ان شالله بحاول :)

التصميم الأخير .. ما قدر أحكم عليه لأنه جزء بس وأعتقد إنه الدور الأول مب الجراوند ..و لا ؟؟

شدني ماشالله حجم الدريسنج روم و المساحات

بالنسبة لتوزيع الصالة .. أكيد هذي حل للوضع الي ذكرته

بس لو بغير شوي في التوزيع

بخلي البانتري مكان الجلسة معاه ستول وكراسي

الجلسة الرئيسية يكون ظهرها للدرج

ومكان البانتري في الأخير كرسيين و طاولة

شرايك في توزيعي ؟ :o

معماري قطري

29-11-2015, 09:27 AM

الحمد لله تواصل معاي صاحب التصميم وقال إنه تمت ازالة العمودين اللي فوق أثناء البناء بس كانوا بانيينهم تحت وخذت منه الموافقة على عرض التصميم كامل .. بالنسبة لفتحة الدرج المقوس هذا كانت غير ومقطوع له بشكل غريب وتعدل .. عن موقع الجلسة انا فكرت في قرب الدرج بس دوم الخوف من الكراسي يركبون عليها العيال ويسون مغامرات .. مثلاً انا عيالي كبار مره صدفة طالع من الغرفة الا اشوف ولدي ينط من الدور الأول على كرسي في الدور الأرضي .. الكرسي ما سلم منه والله سلمه من البورسلان الصلب تحت.

لسلامة الدرج حلو المسكر بالكامل وأرخص من المفتوح بدرابزين واللي عليه سجاد أأمن للوقوع .. ثاني شيء الجلوس قرب النوافذ يخلينا نطل شوي على الحوش ونحس بسعة أكثر .. حتى لو عندنا صالة تطل على حوش خاص ما فيه داعي للستارة ولا نركب شتر خارجي نفتحه وقت ما نبي .. ونركب زجاج شفاف وبدون عاكس حتى رؤيتنا للحديقة كل وقت ليل أو نهار تكون مفتوحة .. الشتر لوقت حد يشتغل في الحوش أو الشمس قوية .. والدريشة من داخل تجمل بتلبيس خشب أو بلاصق بلون خشبي.

إن شاء الله باحط الصور كاملة واحتمال اليوم اروح زيارة لموقع البنيان مع صاحب البيت وأشوف لو ممكن نحط صور للشغل هناك.

sweet qatar

29-11-2015, 09:14 PM

الله يحفظ اليهال .. صج متعتهم الدرج

بس الحلول الديكورية موجودة

بشر عسي شفت الموقع وطلع احلي عقب التعديلات ؟

معماري قطري

29-11-2015, 10:08 PM

الله يحفظ اليهال .. صج متعتهم الدرج

بس الحلول الديكورية موجودة

بشر عسي شفت الموقع وطلع احلي عقب التعديلات ؟

الحمد لله مريت اليوم مع صاحب البنيان .. وصراحة أول مرة ألتقيه وهو مهتم واحس بدأ يستوي مهندس .. هو أَكيد رتبه أحسن سوى بعض اللمسات البسيطة بس كنت اتمنى استغلال النور الطبيعي أكثر .. مسوي قبة مثمنة بس درايشها صغيرة وكان يقدر يكبرها .. إلغاء الأعمدة فوق خلى عنده حرية أكثر للتوزيع .. حرك باب المصعد لجهة الدرج وسوى كسرة بسيطة للبانتري وباتابع بالصور وبالتعديلات للحوش وما نستغني عن آرائكم.

معماري قطري

29-11-2015, 11:25 PM

هذي صورة الدور الأرضي بدون توزيع الحوش .. توزيع الحوش شغال على ترتيب الحديقة والمواقف وإن شاء الله بكرة احطه

تم تغيير بعض الفتحات ولف المصعد 90 درجة ضد عقارب الساعة بحيث الباب يكون مقابل باب المطبخ

http://i.imgur.com/5qPFHsO.png

وهذا الدور الأول والمالك قدر يلغي العمدان فوق واستوت المساحة مفتوحة أكثر وباتابع مع التعديلات اللي هو سواها وبنشوف الصور إن شاء الله والله يوفقه وتكون النتيجة مرضية ومريحة له

http://i.imgur.com/F8QSaKI.png

معماري قطري

30-11-2015, 02:34 PM

خلصت مقترح الحديقة والحوش طبعاً على الواقع وبتعديل يعتبر أقل ما يمكن .. أَول تعديل اللي هو فتحة الباب كانت بعرض 5 متر وكانت حق توقف سيارتين جدامها .. يعني لكل سيارة عرض 2.5 متر وهو ضيق نوعاً ما ولعدد سيارتين قليل لبيت بهالمساحة .. مكان الوقوف جهة اليسار بين غرفة السائق والبيت مناسب وعرضه 7 ونص متر بيناسب حتى لعمل أرفف تخزين لو حبينا لبعض المواد من عدة الزراعة وألعاب العيال وغيرها .. ويستحسن نسوي نظام الكي سبان مثبته على حايط البيت وحايط غرفة السائق بدون أعمدة .. بس مشكلة حايط البيت تم عمله بالحجر واحتمال تكون الحاجة لبراغي طويلة للتثبيت أَو عمل دعامات تثبيت مخفية بقص جزء من الحجر والتثبيت في الحائط .. هشكل بنتخلص من الأعمدة والشكل بيكون حلو.

الحل الثاني نسويها حديد سيدة بميلان بسيط للخلف وبواجهة تنعمل فوق الحديد بالاسمنت وبتشكيلة حجر أو جذوع شجر وتكون معلقة على غرفة السايق وجانب البيت بدون أعمدة بعد أو بعمود بتشكيلة جذع شجرة مع إن المعلقة بتكون كثير أحلى وأوسع.

http://i.imgur.com/xU4e6Nr.png

القسم الثاني اللي في اليمين لسيارتين يستحسن نسويها بارتفاع 2 متر من الأطراف بواجهات لو نحب خشبية أو اسمنتية بتشكيلة خشبية ونطعمها بخشب طبيعي قاسي مثل الدنجل .. ونزرع حولها بيطلع شكلها الوسطي مقبول .. سويتها بأربع أعمدة 2 في الزوايا و2 داخلين داخل مترين حتى تكون لفة السيارة سهلة وهذا تقريب موضح لهذه المنطقة

http://i.imgur.com/OXEQHay.png

يستحسن نحرك الباب قليل ناحية اليمين بحيث يفتح مع ميلان الرصيف ويكون الجدار جهة باب السائق عازل للرؤية لداخل البيت .. وبعمل الباب بعرض 3.8 متر مثل ما هو موجود على الخارطة قللنا الثقل على مكينة فتح الباب وسوينا الفتحة كافية وزيادة وبدون مبالغة .. لأَن عرض السيارة العادية ما يزيد عن مترين .. والأهم باب غرفة السائق بيكون خارجي لو سكرنا باب الحوش وبيكون شبه داخلي لو فتحنا الباب وهذا يوافق عليه التخطيط .. وهذا يعتبر شوية تعديل وللأفضل لو وافقني عليه صاحب البنيان.

معماري قطري

30-11-2015, 02:47 PM

المنطقة المربعة فوق عبارة عن حفرة نازلة أرضيتها عشب صناعي وترتيبها كما في الرسم .. بعض المقاسات ممكن ما تبين واضحة بس تنعمل بالخرسانة أو الطابوق والبلاستر مع تقوية الطابوق بشبك الحديد والصب داخله أو الدفان .. بعد الخرسانة عندنا مجال نلبس بلاط أو رخام وفوقه نحط قطع فرش اسفنج ولمسند الظهر كذلك .. مسند الظهر أعلاه بعرض 15 سم وجاي مايل وقاعدته 25 سم .. قاعدة الجلوس سيدة جاية 40 سم وزيادة منحنى 5 سم وارتفاعها من الأرضية 35 سم ونزيد عليه ارتفاع حشوة الإسفنج وقت الجلوس تكون في حدود 7 سم تعطينا ارتفاع للجلسة حول 42 سم وهو مناسب جداً .. نحتاج نقطة كهرباء لطاولة الباربيكيو ولو حبينا نسوي تنور فخار صغير ممكن للخبز والشواء .. كذلك ممكن نركب عمدان خشب في الزاوايا ونسوي تظليل بالخشب أو حسب ما نحب .. وصلة ماء للغسيل والتصريف مهمة ولو صعبة نكتفي بالباربيكيو والكهرباء .. عمق الحفرة 1 متر وارتفاع الأرضية 15 سم ونحتاج لعتبات لنزول مريح لهذي الجلسة والزراعة حواليها بحيث يكون الجالس يشوف حوله الزراعة من قريب.

http://i.imgur.com/5nJefiJ.png

معماري قطري

30-11-2015, 02:53 PM

الزوايا ممكن نسويها شوي مرتفعة كطاولات .. وعملها بإسمنت وطابوق وتبليطها يخليها بسهولة نشيل الفرش عنها ونحطه وقت الجلوس والباربيكيو نقدر نغطيه .. وممكن عمل الكراسي من الخشب لو نحب بس نجهز الحفرة بطابوق دايرها أو خرسانة وممكن نلبس أرضيتها وجدرانها عشب صناعي أو حتى نزرع عشب في قوالب البلاستيك حائط وأرضية ونخليه متواصل مع عشب الحديقة

معماري قطري

30-11-2015, 02:56 PM

الزاوية الخلفية مكان مناسب لحوض سباحة مفتوح أو مغلق لو نحب .. وحتى نبتعد عن المنهولات نسوي نظام الصرف الأمريكي وهو سهل وفعال وأرخص من النظام العادي

معماري قطري

30-11-2015, 03:10 PM

هذا قصدي بمدخل السيارات وتعديل الباب لجهة اليمين وباب السايق بيكون في جهة اليسار في فتحة ال 1.4 متر الموضحة

http://i.imgur.com/JOXwLCr.png

معماري قطري

30-11-2015, 03:19 PM

بالنسبة لحفر الزراعة نبعدها 60 سم عن الأساسات بعمل طابوق ونعزله من الجهتين بنايلون سميك وندفن جهة الحايط عليه ونتكون عندنا حفرة للزراعة نحط فيها تربة زراعية مخلوطة ومعاها سماد .. حول مترين عمق مناسب ونكون ممددين بايبات الماي على الفراغ المبلط جهة السور ونقدر نسوي نظام رش أو تنقيط.

جهة يسار البيت عندنا 2 متر هذي نحط فيها اصيصات زراعة ونخلي فراغ حق عربة نقل الأغراض للستور والمطبخ ورا .. انا افضل زراعة شجر متسلق وتظليل الممر بشوية خشب يركب عليه الشجر المتسلق

معماري قطري

30-11-2015, 05:01 PM

مثال للمظلة اللي عملتها عندي في البيت واللي أساسها حديد ومشطبها بالاسمنت المقوى بشبك أسلاك حديد ولها للحين حول 4 سنين مبنية ومثبتة من الخلف ببراغي على الحائط ومن جدام عمودين بس .. عندي العرض 10 متر والعمق 6 وعند صاحب التصميم هذا أقل بكثير وإمكانية عملها مثبتة على الحائط سهلة والثانية بأربع أعمدة بعد سهلة بنفس المبدأ وحتى جلسة الباربيكيو ممكن تنعمل بنفس المبدأ

هذي الصورة قبل لتنصبغ

http://i.imgur.com/YFz7d3I.jpg

وهذي صورة الهيكل الحديدي

http://i.imgur.com/IL0dxLs.jpg

وهذي صورة لها بعد ما تشطبت وقت المغرب

http://i.imgur.com/PTl15ut.jpg

معماري قطري

30-11-2015, 10:15 PM

الواجهة الأمامية اتوقع تم تغييرها وتصغيير الكورنيشات مع تلبيس الواجهة حجر .. بس حبيت الرسم الهندسي والرسام كان باذل مجهود كبير ورسمه دقيق الا في نقطة توضيح الأعمدة الداخلية ما وضحها في المقطع حسب ما بنشوف بعدين بس وضحها في المخطط الأرضي للدور الأرضي والأول

http://i.imgur.com/BpWTgrF.png

وهذي الواجهة اليمنى

http://i.imgur.com/aaMRaei.png

هذا قطاع رأسي في المبنى وهذا من أهم الرسومات اللي تعطينا معلومات مهمة عن المبنى .. لاحظت هنا استخدام صبية تأسيس بعد الدفان والدك حسب الرسومات الإنشائية وفوقها صبية ثانية وهذي تكون بعد التمديدات بسمك 7.5 سم .. واللي شفته في البنيان خليط من الرمل والبودرة وبدون صبيات ونصحت المالك إن هذا النظام مب مضمون مثل الصبية لا للحوش ولا لداخل البيت.

http://i.imgur.com/fGq5q5s.png

باكمل إن شاء الله مع صور التنفيذ

qtr432

02-12-2015, 12:09 PM

معماري قطري

02-12-2015, 07:12 PM

الله يعطيك العافيه يا معماري قطر وجهد مشكور عليه وانا والجميع استفدنا من توجيهاتك وتعديلاتك القيمه.
وبالنسبه للمخطط اعلاه لو يترحل تانكي الماي للخلف افضل. واعجبتني فكرة الجلسه الخضره وفرن الشواي ونزولها ايضا عن مستوى الارض.

الله يعافيك اخوي قطر 432 والعفو ما سويت الا القليل وهذا الإرتباط البسيط الباقي بيني وبين مهنتي وهوايتي في نفس الوقت

بالنسبة للجلسة هذي مسوية لي أزمة .. انا شايفها وهي فكرة منفذة مب جديدة لكن بنتي الله يحفظها ما ادري من وين تتذكر انها هي اللي معلمتني عنها وانا مسوي نفسي صج سامعها منها واني باسويها في بيتي المستقبلي .. عاد راويتها اني حطيتها هنيه وعصبت وقالت ليش تنشر أفكاري .. البنت طلعت أنانية وعندها حقوق طبع

البيت هذا شوي وضعه صعب لتنفيذ كل المقترحات وبيحتد يرتب غير عند البوابة لأنه مسوي عمدان وشبه جاهز ومحدد مكان الباب وين ويكون سلايدنغ أو اللي ينفتح على فوق .. بس 5 متر بيكون وايد .. كافي لسيارتين يدخلون جنب بعض و 3.8 لحد حتى 3 مدخل واسع ومريح 3.8 تدليع في سهولة الدخول والخروج

هذي صورة للتخطيط الأساسي من المكتب الاستشاري .. وعلقت عليها من زمان ونصحت المالك واذكر سويت تقريباً نفس اللي سويته ألحين .. نشوف الباب عرضه 5 متر وسيارتين صافين جنب بعض النملة لو مرت بينهم بتقول ليش ملصقينهم في بعض .. مبالغة بس مستحيل حد يقدر يدخل السيارة بسهولة والا يطلع منها .. للسيارات الصغيرة الميني وخواتها مناسبة المساحة للوقوف لكن السيارات العادية لا .. وليش ما نوسع على نفسنا شوي ما دام احنا في البيت وعندنا مجال

http://i.imgur.com/Hf5TX4S.png

تم تغيير مكان الوقوف لكن التصميم للسور بقى على ما هو عليه والباب الواسع بقى كما هو

هذي صورة بانورامية زودني بها صاحب البيت لمدخل البيت والحوش من جدام .. نشوف في أقصى اليمين مكان طبيلة السيارات اللي 7.5 متر كما في الرسم .. وهنا ممكن نسويه مثل الصور اللي حطيتها أو كي سبان ومثل الصور اللي حطيتها ممكن يعملونها بتشطيب مقارب للحايط خصوصاً للأعمدة ولا تتثبت بدون أعمدة بتطلع وايد أحلى

http://i.imgur.com/AWnROGI.jpg

نلاحظ الباب الصغير كان في الرسم الأساسي مترين تصغر هنا شوي وهو أفضل .. وبقت مساحة مناسبة لزراعة مبعودة شوي عن السور وممكن نركب باب حديد سحاب بين العمودين .. بس بتبقى عندنا مشكلة غرفة السائق المطلة على الحوش وهذي لحلها نظطر للترتيب اللي في الرسم وبباب عرضه 3.8 متر وينفتح لاف

هذي صورة توضح واجهة البيت وعلى اليسار بتكون السيارات وفي طرف التريب الأبيض بتكون الزراعة اللي قرب موقف السيارات الثاني والأصغر من اللي قرب الطوفة .. وبين التريبين بيكون ممر المشي اللي داخل من الباب الصغير للبيت أو للمجلس ومكان التريب البني تقريباً الزراعة الطولية مستمرة لين الزاوية وفي كسرة البيت والزاوية الوسيعة هذي الجلسة

http://i.imgur.com/D9zna5X.jpg

صورة توضح من اليسار موقع تانكي الماي والعداد وهو أفضل مكان والشجر بيغطيه ومنظره مب قبيح لذيك الدرجة .. بالنسبة للمنطقة اللي ورا أما تكون مكان مناسب لحوض سباحة أو لتوسعة الملحق بمخزن أو غرفة حسب الحاجة .. وبندخل إن شاء الله على الصور الداخلية عن قريب

http://i.imgur.com/SF33JTo.jpg

العفراء

02-12-2015, 07:15 PM

قواااك الله يالغالي ويااك عفره حبيت امسي عليك عمي المعماااري موضوعك حلو و ممتع و جهودك جباره و متاكده الموضوع له زوااار حتى من خارج المنتدى ربي يحفظك

معماري قطري

02-12-2015, 09:44 PM

قواااك الله يالغالي ويااك عفره حبيت امسي عليك عمي المعماااري موضوعك حلو و ممتع و جهودك جباره و متاكده الموضوع له زوااار حتى من خارج المنتدى ربي يحفظك

الله يقويج إختي عفره إنتي معروفة .. بس والله ودي احط التصاميم اللي أصحابها يقولون سري للغاية لكن لازم التزم لسالفة حقوق الطبع

عندي ملاحظة بسيطة ومهمة للكل .. ألحين غالبية البيوت يسونها مرتفعة للتكييف وكنوع من الفخامة .. البعض يسوي تكرمون الحمام سقفه في حدود 3 متر مرتفع من الأرض والبعض يسويه أكثر ويسوي الدكتات للتهوئة مخفية ولا تكون عنده مشكلة وعنده مجال كبير يسوي نوافذ عرضية تحت السقف وبعرض حائط الحمام والمطبخ والصالة كذلك للنور الطبيعي .. ذي ممكن تكون طوب زجاجي بأشكال وألوان جميلة وممكن تكون ببساطة قطعة زجاج ثابته بفريم مخفي ولا فريم يبين .. والهدف منها دخول الضوء الطبيعي ومناسبه لكل مكان عدا غرف النوم.

هذا تصميم اشتغلت عليه لأحد الإخوان ومقترح فيه يركب طوب زجاجي صفين 30 في 30 .. وهنا جزء الحمام اللي مقترح فيه عمل هذا المنور واللي كله يبقى غير مغطى ومكشوف لدخول النور ويحافظ على الخصوصية لإرتفاعه .. وحتى فوق مراية المغسلة يجي حلو بعد

http://i.imgur.com/Hj5kWvp.png

هذا مقاس الفتحة يطلع لنا 3 متر في ارتفاع 60 سم وعشرين قطعة طوب زجاجي 30 في 30

معماري قطري

03-12-2015, 11:24 PM

باواصل معاكم ناحية الداخل .. وهذي صورة للغرفة الرئيسية وهي أكبر غرفة في البيت وان شاء الله بتطلع أفضل غرفة .. أذكر حسب الرسومات السابقة كنت مخطط لخزانة أمريكية اللي تنفتح سلايدنغ إضافية في الغرفة غير عن غرفة الملابس المغلقة اللي بباب

نلاحظ كسرة الحائط اللي بيركب فيها السرير .. وهنا يفترض يتم ترك وايرات الكهرباء طويلة شوي لحين تركيبها مع ظهر السرير ويفترض ظهر السرير يجي مفصل أو منجد ليغطي هذي الفتحة مع خشب كإطارات وترتيب خاص للكوميدينو والإضاءَة يستحسن تكون خاصة شبه مخفية وهادية ما تزعج العين يعني إضاءَة سرير

http://i.imgur.com/fkqO7Ra.jpg

خزانة الحائط الأمريكية تاخذ عرض 70 سم جنب السرير كما في الرسم هذا الموضح أكثر .. أضفت عليها مدخل ينعمل بالجبس ليكون قوس مزدوج التقويس فوق والجوانب بأَرفف زجاجية وممكن كبتات خشب صغيرة تحت .. وفي نفس الوقت يكون هذا المدخل والقوس كتف لخزانة الحائط .. بس للأسف تم عمل جبس السقف .. ممكن عمل المدخل المقوس بدون خزانة الحائط وممكن عمل خزانة الحائط مستقلة عن جبس السقف وبارتفاع أقل والإنارة نرتبها بحيث تكون أعلى الخزانة وجدامها مب تنور فوقها تنور جدامها وأشوف عرض الجبس النازل حول متر وشوي وهو كافي .. يعني بتكون عندنا الإنارة أقل شيء 3 أنواع المخفية داخل الجبس وانارة السرير وانارة السبوت لايتس وبعد نضيف الرابعة اللي هي انارة القوس وأرففه

هذا توزيع الغرفة ومكان القوس واضح ومكان السرير .. الخزانة ضرورية لأَن عن تجربة الأَغراض والثياب تزيد نحتاج نسوي غير ولو تحدد مكانها من البداية أفضل .. بعدين المدخل عرضه مترين والقوس هذا بيجمل المدخل والفتحة بتكون 1.2 متر والأرفف 40 سم واضاءَتها بتكون حلوة وهادئة

http://i.imgur.com/fwcg4Te.png

ممكن نسوي القوس ونلغي الكبت وممكن نلغي الإثنين .. أكتاف الأقواس واللي هي مكونة كتف القوس نقدر نسويها شوي أعرض ومشطوفة بزاوية 45 درجة .. حتى ما تنكسر لو ظربها شيء .. نفس الشيء ينطبق على الزاوية الطابوقية الحالية لو بنخليها كما هي بدون قوس وبدون كبت

معماري قطري

06-12-2015, 02:29 AM

باتطرق إِن شاء الله لتصميم مثالي لأَرض صغيرة كتوزيع أرضي واستفادة قصوى وشغال حالياً على نموذج كمثال على ضوء الحديث الدائر حول تطوير قوانين التخطيط العمراني لتواكب المتطلبات الحالية .. وأَتمنى مشاركة النقاش في هذا الموضوع المهم

معماري قطري

14-12-2015, 02:44 PM

مرت 8 أيام من الوعد الأخير وللحين ما تفرغت اسوي التوضيحات بالرسم

بس ما يحتاجه السوق العقاري تطوير شامل لأنظمة وقوانين التخطيط القديمة .. الزيادة السكانية استدعت قيام مدن عمالية 5 نجوم ومستشفيات وليست عيادات لخدمتهم وهذا شيء جيد لتخفيف الضغط على باقي المنشآءات .. لكن يبقى منزل العائلة القطرية كما هو ولو تكلموا عن بوادر الموافقة على دور ثالث كامل

المطلوب أُعيد تكراره هو تطوير يكفل الإستفادة القصوى من أرض البناء بحيث يستطيع المواطن يؤمن منزل مناسب وقابل للتوسعة له ولأبناؤه في بداية تكوين العائلة .. ولبناء مجلس خاص به وبأبناءه كذلك .. مجلس مفتوح على الشارع لجلوس الرجال وليس مغلق بحوائط وأبواب حديد خارجية كبيت

مواقف السيارات مهمة خصوصاً لو العائلة كبيرة لذلك أرى أن تكون حسب الحاجة في دور نص بيسمنت بحيث يضمن لنا عدم ارتفاع الدور الأرضي بطريقة مبالغ فيها ومزعجة .. وباقي الأدوار ممكن تكون بنظام الشقق السكنية مع فتح دورين على بعض حسب الحاجة .. وارتفاع 4 أدوار والنص اللذي للبيسمنت سيكون مناسب .. وفي حدود 18 متر مع عمل النوافذ المطلة على الجيران على شكل منور أو مقابلة للواجهة والجانبية تكون تطل على حيز داخلي

معماري قطري

23-12-2015, 12:32 AM

أحد الإخوان راسلني بخصوص مقترح تصميم لأرضه .. وكان يبي يوازن بين الحوش وبين البيت بحيث يكون كافي لأَربع غرف فوق مع صالة ومجلس تحت وملحقاتهم ومع ملحق خارجي

سويت هذا المقترح وهو أَقل بشوي من 370 متر مربع للدورين للبيت ونضيف لها مساحة الملحق وغرفة السائق

هذا البيت اقتصادي وموفر مساحة كبيرة في الحوش وممكن يترتب أكثر وممكن نسوي بيسمنت بمساحة 180 متر وبنتهاوس بمساحة 80 متر

http://i.imgur.com/IrWUZB1.png

الحل الثاني عندنا هذا وبيكون شوي أكبر وبياخذ مساحة من الحوش .. والرسم يحتاج تضبيط انا نقلته بدون تعديل بس كل همي اشوف شلون بيكون في الأرض .. حق نقدر نسوي بيسمنت عندنا جنب المطبخ 6.7 متر بس القوس شوي مضيق وأحسن نحرك البيت شوي جدام ويكون البيسمنت ورا وصج بيترس الأرض لكن هذا توزيعته وايد أحلى وشكله شرح والبنيان تقريباً مخلص عند صاحب النموذج ذيه واللي يبي يشوفه على الطبيعة اقدر ادليه طبعاً بعد اذن راعيه وراعيه ما قصر وهو موصيني قبل

http://i.imgur.com/bM9mYvO.png

مثير للجدل

23-12-2015, 12:14 PM

مرحبا اخوي العزيز معماري قطر ارحم الله والديك واشكرك على طولة بالك

ليش مايكون البيت على شكل حرف http://www3.0zz0.com/2015/12/23/12/339959790.jpeg (https://www.0zz0.com)

اتوقع افضل هالشكل لنوع الاراضي هذي

معماري قطري

23-12-2015, 02:25 PM

إخوي مثير للجدل ممكن هذا بس ما عندي نموذج .. شوف المخططات السابقة في نفس الموضوع

انا اشوف حسب متطلبات صاحب البناء هذي مقترحات مبدئية ممكن التطوير عليها .. ممكن إضافة حديقة كبيرة وممكن التخطيط لمجلس خارجي حتى لو ما بنسويه بس نجهز له وناخذ الرخصة له .. عندنا 6 غرف بتوزيع مناسب للمخطط الأول ومساحة البناء 370 + 80 للبنتهاوس + ممكن 180 للبيسمنت وباقي الأرض عندنا فيها سعة لدخول السيارات .. ممكن نفتح باب ثاني من فوق .. أو نخلي المنطقة كاملة لمجلس ونضيف موقفين للسيارات مقابل باب الحوش الحالي

حتى الدوار الكبير مع مواقف مفتوحة للزوار ممكن وغرفة السائق ممكن ندمجها مع الملحق .. كل هذي الأُمور تعتبر ذوق شخصي واحتياج شخصي

يبقى تنسيق الاستشاري مع التخطيط والحصول على الموافقات مثل ما نبغي

مثير للجدل

23-12-2015, 07:48 PM

بيض الله وجهك اخوي العزيز معماري قطر ماقصرت واستفدت من كلامك .. الله ينفع بك وينفعك يالغالي

معماري قطري

23-12-2015, 09:02 PM

بيض الله وجهك اخوي العزيز معماري قطر ماقصرت واستفدت من كلامك .. الله ينفع بك وينفعك يالغالي

اللهم آمين .. حدود الشغل هنا هو استعراض للي ممكن نسويه وتصحيح لبعض أخطاء الاستشاريين الواضحة وتطوير للتصميم من الناحية المعمارية ويبقى شغل تصميم متكامل عند فريق مهندسين وبتخصصات صراحة ما اقدر افتي فيها مثل الكهرباء والانشائي تصميم الصرف الصحي وتغذية المياه

sweet qatar

31-12-2015, 08:01 PM

قواك الله اخوي معماري

البيت الأخير بدون ملاحق ؟

معماري قطري

31-12-2015, 11:55 PM

قواك الله اخوي معماري

البيت الأخير بدون ملاحق ؟

الله يقويج اختي

صحيح عن الملحق ذكرت ممكن نسويه صغير وممكن نقص شوي من قوس الدرج وانا بديت اسويه بالأحمر .. انا بس حطيت هذي المخططات كأفكار وما ادري تناسب صاحب البيت أو لا .. هو قال يبي مساحة كبيرة فاضية للحديقة واعتقد المقترح الأول بيناسبه

معماري قطري

01-01-2016, 06:54 AM

من خلال تصفحي للنت دخلت موقع فيه الكثير من المخططات الأرضية مع الواجهات .. هو منتدى المهندس .. وفيه تصاميم كثيرة ومتنوعة بس بدون توزيع الأثاث صعب نحكم على نجاح المخطط وملائمته لإحتياجاتنا

الموقع لمن يحب الإطلاع http://www.almuhands.org/forum/showthread.php?t=121259&page=3

وانا اقتبست منه هذا المخطط

http://i.imgur.com/E93xvE1.jpg

صراحة ما عجبتني فيه الكسرات الكثيرة لصعوبة تنفيذها ولصعوبة ترتيب الأثاث وكذلك ارتفاع الدرج وتعدد عتبات الدرجات في كم مكان مما سيجعل المنزل غير مريح ومزعج ويتسبب في سقوط الأطفال وكبار السن .. نلاحظ الغرفة المسماة صالون بابها كبير وينفتح منزلق لكن واسع بشكل كبير لا يناسب الصالة ولا يمكن وضع قطعة أثاث أمامه .. أما لو كان باب عادي بعرض متر وأقل ويفتح جانبياً ناحية شجرة الزينة سيكون تارك مجال لكرسي جنبه

كذلك صالة المعيشة الدرج داخلها لا أرى له داعي والباب الاوكورديون سيكون مزعج في فتحه وإغلاقه ولا يوجد له داعي باب مفرد يكفي لأن المنزل صغير والزراعة في الجانب العلوي في لفة الدرج مكانها يفترض كراسي واللي تحت مكانها معقول

مكان غرفة الضيوف قريب المطبخ صعب جداً الا للأهل اللذين لا يعتبرون ضيوف

لو نطابق الدور الأرضي على الأول نرى بأن الأول شوي أكبر وممتد من الأمام ومن فوق المطبخ وهذا التوفير فقط 40 متر مربع بين الدورين ولو زدنا الأرضي هذي ال 40 متر بنوصل لتطابق تام وكبرنا شوي في مساحات تحت إحنا في حاجة لتكبيرها ونفس الوقت نكون ضبطنا الهيكل الإنشائي بدون جزء بارز بدون داعي والمنظر يكون أحلى بدون هذا البروز

http://i.imgur.com/g7kg80d.jpg

كذلك من الرسمة السابقة نشوف الغرفتين اللي في الطرف العلوي كل وحدة بحمامها ودرج يدخل على الممر الموصل لهم صراحة مبالغة كبيرة في عدد العتبات .. بعدين كان ممكن يكون باب الحمام داخل الغرفة الثانية ونقدر نستغل الممر لكبت كبير بكامل العرض لو حبينا .. وتوزيع الحمامات ممكن يكون أفضل وبسهولة .. اللي استغربت منه البانتري أو خلونا نقول المطبخ الصغير في كل رسوماته مسميه اوفيس .. واكتشفت هذا الموضوع شفت مخطط فيه اوفيس اللي هو مطبخ ومكتب دققت الا اشوف الاوفيس فيه مغسلة عرفت ان الاوفيس مطبخ

نفس الشيء الصالة استوت عندنا عبارة عن ممر كبير وتوزيع الكراسي فيها صعب ومكان التلفزيون صعب كذلك .. الغرفة اللي على اليمين حمامها يفترض داخلها ونقدر نعدل بابها لياخذ جزء من الممر ويكون مواجه الاوفيس ونخلي الفتحة على الاوفيس والاوفيس بدون باب جزء مفتوح بالكامل

وهذي الواجهة ما عجبتني الأعمدة المعلقة في جوانب الدرايش .. العمود يمثل شيء ثابت طالع من الأرض مب طاير في السماء وهذا خطأ كثير من المصممين يقعون فيه

http://i.imgur.com/3DMBMk4.jpg

ونشوف عدد العتبات الكبير كيف مزعج في المدخل لكن عمدان المدخل ومظلته نقطة ايجابية في التصميم

معماري قطري

03-01-2016, 02:35 PM

من فترة أفكر في عرض بعض نماذج البناء الأمريكية وهي لها مميزات كبيرة من أهمها إنها مدروسة صح واقتصادية وبدون تكلف في الإنشاء .. حتى الطابوقية والخرسانية منها مصممة بأقل كمية حديد وخرسانة وبحوائط حاملة للوزن بدون أعمدة أو بأقل عدد حتى تربط البناء.

التشطيب الخارجي قد يكون بألواح خشبية أو نوعيات من الحجر أو مواد صناعية أو طوب أو طابوق مصبوغ بدون بلاستر أو ببلاستر متموج بطريقة فنية وصبغ .. لكن الداخلي في غالبه ألواح جبس أو خشب مصبوغة أو خليط من الإثنين.

من المميزات المعمارية الواضحة وجود مواقف مغطاة وبباب للسيارات ومتصلة بالبيت بممر وقريب منها غرفة غسيل ملابس أو الغسالة مخبأة في الممر والدرج في الغالب بسيط وشديد الارتفاع ومن الخشب وبنشوف باقي المميزات خلا استعراضي لعدد من النماذج.

هي تنفع عندنا واذكر أحد الإخوان أطلعني على مجسم خاص لبيته كلفه التصميم المعماري فقط 50000 ريال قبل 10 سنوات وعليه اكمال التصميم مع استشاري آخر .. إن شاء الله الليلة ابدأ ببعض الصور.

معماري قطري

04-01-2016, 12:41 AM

هذا بيت بمساحة تقريباً 290 متر مربع .. 3139 قدم مربع + مساحة إضافية = 25 متر مربع أسطحها نازلة ومايلة وتنفع لفعاليات بسيطة

الواجهة موزونة ومرسومة بفن ومصممة بعناية والسقف له عدة خيارات كلها تدور حول القرميد وأنواعه وفيه كذلك ما يسمى بالشنغل وهو قطع خشبية مثل لحاء الأشجار الخارجي وعندنا القطع المعدنية والبلاستيكية وغيرها وللأسقف مقاولين متخصصين ويضمنون شغلها وفي الغالب تركب على ألواح خشبية مثبتة على فريم خشبي

http://i.imgur.com/90nu4mb.jpg

المقاسات الموجودة كعرض المنزل وطوله محددة بالفوت وللتحويل من الفوت للمتر نضرب في 0.3048 وأكيد بيطلع لنا رقم غير كامل ونقربه لأقرب متر وننسق المقاسات حتى تصبح لدينا صحيحة ولا نتعرض لمشاكل في قص بعض البلاطات وفي تأسيس القواعد والحوائط

مثلاً الكراج اللي على اليسار يعتبر غرفة خاصة للسيارة بباب ينفتح برموت على فوق وبدون تشطيب راقي وبدون تكييف أو تدفئة في الغالب .. هذا يوصل طوله وعرضه ل 7.3 متر وهو واسع كفاية للسيارات وللتخزين جدام السيارات على أرفف لبعض الحاجيات والسياكل وغيرها .. وهذا موقف لسيارتين فقط وبسعة كافية جداً لأكبر السيارات المنزلية

بعد الكراج مدخل خاص يدخلنا للغرفة العائلية مرتفعة السقف وعلى اليسار أول ما ندخل فيه غرفة غسيل ملابس حيث أفراد العائلة يرمون ملابسهم داخل الغسالة ويشغلونها وهم رايحين ( مقاسها 3 متر طول في 1.8 عرض وهو كفاية)

الباقي مهم نركز على سهولة الرؤية والانفتاح بين غرفة الاستقبال الرسمية اللي تعادل عندنا المجلس وهي داخلية ووسط البيت ومفتوحة على المطبخ .. وسقفها مزدوج الارتفاع ومنحني .. حول 5.5 متر وارتفاع سقف المطبخ 2.15 تقريباً

البيت فيه درجين واحد عند المدخل الرئيسي والثاني قرب مدخل الكراج

جناح الغرفة الرئيسية فيه حمام كامل كبير وغرفتين ملابس له ولها

http://i.imgur.com/QOtWi6S.png

الدور الأول فيه 3 غرف وحدة بحمامها وثنتين بحمام مشترك وغرفة اضافية مثل ما قلت لأي فعالية .. ممكن صالة رياضة أو مخزن أو مرسم أو مكتب منزلي أو حتى مسرح منزلي

http://i.imgur.com/5Jx6igV.png

معماري قطري

04-01-2016, 12:46 AM

الزين عندهم هو مكاتبهم والمطورين مشتركين في مواقع هندسية تعطيك المقترح كامل بسعر بسيط والمطور ينفذه كما هو ولو تحب تعديلات بسيطة يسونها بصيغة هندسية قابلة للتنفيذ .. وقانونهم القضائي متطور ويحاسب المخطيء حتى لو بعد فترة طويلة من الزمن

تتوقعون كم تكلفة هذا التصميم بوثائقه الهندسية الكاملة وبعدة نسخ؟

معماري قطري

04-01-2016, 05:42 PM

محد مهتم رد بتقديره لسعر وثائق التصميم .. هي تكلف 1075 دولار لثمان نسخ للمقاولين ولو بغاها الواحد بي دي اف 1430 ومنها ينسخ قد ما يبغي وفي أمريكا وكندا تجي النسخة بمتطلبات المنطقة للزلازل أو الأعاصير وبأساسات مناسبة ومختومة

عندنا لو الواحد حب يبني بنيان مشابه بالضبط كل المواد متوفرة أو ممكن ياخذ الفكرة الأساسية ويعدل عليها بحدود معقولة

sweet qatar

05-01-2016, 09:29 AM

يعطيك العافية أخوي معماري

فاتني تخمين التسعير :o

مادري ليش هالايام يلح علي موضوع اخونا Aziz

عن الكراج ... والحين شفت لك أكثر من تعليق علي هالموضوع

طلعت فكرة حلوة

انزين شرايك في كشف الواجهة الأمامية .. مثل البيوت الكويتية

ونخلي الحوش ورا الفيلا ..؟؟

امس شفت بيت واجهته مكشوفة وجمييييلة جدا ماشالله

معماري قطري

05-01-2016, 02:53 PM

الله يعافيج اختي سويت

البيوت الكويتية اتوقع بعضها مسوين حل وسط بين المساحة المفتوحة بالكامل بحيث البيت يكون حوله ثلاث حوائط نازلة أو حتى شبك وواجهته على الشارع وجدامها ممر للمشاة والسياكل .. تقدرين تقولين مثل المجمعات السكنية اللي عندنا .. وبين المساحة المغلقة بالكامل وتخطيطهم للمدن متطور أكثر من حيث استغلال المساحة الخارجية في المواقف واستغلال الأرض في ارتفاعات عالية .. تعبنا واحنا نقول ويك أب تخطيط وويك أب أشغال ما يسمعون شنسوي

معماري قطري

05-01-2016, 02:57 PM

وعن السعر يعتبر تافه على أسعارنا وعلى التصميم المقدم والعقد المتكامل المدروس صح .. يعني اللي يبني في ولاية في أقصى الجنوب واللي يبني في اقصى الشمال لو ما يغيرون شيء تطلع بيوتهم نسخة طبق الأصل ومواصفات البناء وطريقته وحدة الا فيما يتعلق بشروط الولاية الخاصة هذي يحسبون حسابها أيضاً

معماري قطري

01-03-2016, 08:48 PM

أحد الإخوان أرسل تصميم مبدئي

أرضه شوي فيها كسرات وزواياها غير مستقيمة وهذي التوزيعة المبدئية اللي سواها الاستشاري وحسب إختياره مثل ما قال لي

http://i.imgur.com/8ZwGajR.png

البيت قريب من التصميم الأول اللي عرضته هنا وعدلت عليه الله يحفظ راعيه ويرده سالم ويشفي ولده .. وانا رأيي بما إن تصميم البيت مدروس ومناسب ما يبقى لنا الا نحطه في الحوش صح .. ووضعيته بهذي الطريقة وهذا التوجيه صح بس لازم يتحرك شوي .. المشكلة اللي تبين لي مكان المجلس وطريقته والملحق وطريقته

البيت فيه بيسمنت ومساحة البناء الإجمالية 1250 وبيكلف صاحبه كثير مؤكد .. هو خلى البيسمنت للسيارات ومخزن وممكن نسويه مثل ما يبغي لكن بطريقة ثانية وباجي للطريقة اللي في بالي بالتوضيح قريب بإذن الله ولا تنسونا من الآراء

sweet qatar

01-03-2016, 09:55 PM

بديت اشك

ان كل بيوت قطر نفس التصميم بس يعدلون عليه

ليش ما تتغير القصه هذي ؟؟

والله يشافي المريض و جميع مرضى المسلمين

معماري قطري

01-03-2016, 11:25 PM

بديت اشك

ان كل بيوت قطر نفس التصميم بس يعدلون عليه

ليش ما تتغير القصه هذي ؟؟

والله يشافي المريض و جميع مرضى المسلمين

اللهم آمين

انتي تشكين وانا على يقين .. تصميمين يمكن أو ثلاثة المنتشرين ومنهم يعدلون شوي ويغيرون وشايف لهم نماذج كثيرة

وأي تصميم ناجح لازم يستفيد منه الاستشاري لو ما استفاد صعب يسوي شغل جديد لكل حد وبيخسر وقت ومجهود خيالي

هذا المبدئي افكر فيه ومستغرب كثير مساويء ونواقص ومساحات ضيقة ما تنفع وبعضها ضايعة وباحاول توضيحها بالرسم المدروس والسابق والمالك حر يختار اللي يبيه

Bo3essa

02-03-2016, 09:21 AM

السلام عليكم

اشوف لو نحرك المجلس الخارجي ونوديه فوق مقابل مجلس الحريم.
في غرفة الطعام لمجلس الحريم في طوفه مخربه شكل المجلس لو نلغيها افضل ( الي بالخط الاسود )
الملحق الخارجي الي في المطبخ لو كان كله على خط واحد افضل.

يعطيك العافيه

معماري قطري

02-03-2016, 03:42 PM

عليكم السلام ورحمة الله وبركاته اخوي بو عيسى

انا رأيي من رأيك حتى المطبخ الكسرة اللي قرب الباب ما منها فايدة

بوخالد911

02-03-2016, 05:35 PM

1000 شكر للكل

معماري قطري

02-03-2016, 08:57 PM

1000 شكر للكل

العفو إخوي بو خالد

مقصر والله وكسول مستوي

شوف هذا مقترح اشوفه بيكون حلو وملموم والبيت يبي له تعديلات كثيرة .. مثل المطبخ يجي مجابل الملحق والملحق يتعدل يكون مثل حرف ال أو يكون عريض شوي لأن على الوضع هذا بينه وبين البيت 4.5 متر .. ممكن غرفة للسايق تجي قرب المجلس وبابها جهة الباب الكبير من برا .. يعني الباب نسويه داخل شوي وفوقه تظليل وفي زاويته باب غرفة السايق

النموذج الأول حلو بس طلع كبير شوي وهذا بدون بيسمنت بيساويه تقريباً

http://i.imgur.com/lIyNyAC.png

الأرض فيها ولا زاوية 90 درجة ومتوقع الرسام اللي اشتغل عليها غلطان .. لو المالك عنده صورة سند الملكية يطرش لي صورة الأرض باقدر اتأكد

معماري قطري

02-03-2016, 09:06 PM

وهذي صورة الأرض مع البيت اللي عدلت في تصميمه قبل واشوفه أنسب بوايد وممكن يصغر لو يبي بدون بيسمنت وحتى بدون بنتهاوس

http://i.imgur.com/7yhRCfA.png

خالد 505

02-03-2016, 11:17 PM

بوخالد911

03-03-2016, 12:31 AM

ومنكم نستفيد.

معماري قطري

03-03-2016, 01:46 AM

السلام عليكم
يعطيك العافيه ياخوي معماري مجهود تشكر عليه من خلال اقترحاتك وافكارك الي الكل قاعد يستفيد منها والاعضاء الي متفاعلين من خلال خبراتهم وتجاربهم..

انا اشوف لو حركنا الملاحق وحطينها وراء البيت بتكون أفضل يمكن ونستفيد أكثر من المساحه إلي بتكون مكان الملاحق حاليآ .
وممكن بعد ماتحط الملاحق وراء البيت تستفيد من العشره مترا الباقيه ، وتفتح باب غير الباب الرئيسي الي في واجهة البيت ويكون عندك مدخلين للسيارات

طبعا مجرد فكره

عليكم السلام ورحمة الله وبركاته

الله يعافيك يا اخوي وتبي الصراحة المجهود بسيط كلش وأستغرب من الاستشاريين اللي ما يحطون أكثر ما عندهم للعملاء

ممكن وكنت مفكر اسويه كمقترح ثاني .. فكرة بابين حلوة لأرض كبيرة وأكبر من ذي لكن مع ذي لو قدرنا نسويها بباب مرتب وقربه غرفة السائق أو كافية لسائقين لو كبرت العائلة واحتاجت لإثنين أو واحد ومزارع

وهذا البيت ممكن تصغيره شوي مثل ما حاول يسويه المهندس في الرسمة الأُولى بس هو خربه .. باحاول اصغره وباسوي فكرة ثانية بحيث يكون اللفت بانوراما في وسط الصالة مكان النافورة والدرج مكانه أو الدرج دائري حول اللفت ( المصعد ) .. بس لو كان الدرج دائري بنكون محدودين بإرتفاع بسيط أو الدرج بيكون ارتفاعه مزعج .. أو نظطر نسوي الدرج مقسوم قسمين قسم للأول وقسم آخر للسطح والبنتهاوس

معماري قطري

03-03-2016, 01:47 AM

ومنكم نستفيد.

انت معروف خلاص بهذي الجملة واحنا منك نستفيد وبمرورك نستانس

معماري قطري

03-03-2016, 05:05 PM

صغرت شوي التصميم اللي عندي الأول وغيرت عليه بمصعد دائري يكون نص بانوراما أو أقل شيء بابه زجاج ( بانوراما جزئي ) وصغرت الدرج وممكن يتصغر أكثر صغرت البيت من جهة متر ومن جهة نص متر مع المحافظة على الشكل الأساسي

http://i.imgur.com/TKiYiWJ.png

المجلس الخارجي فكرت فيه لو نخلي واجهته اللي على الشارع زجاج وما فيه داعي لدرايش ورا الكراسي مفتوحة على البيت ممكن نلصق فيه الملحق وغرفة السايق يستوي لها مكان شبه معزول عن الحوش .. ولو حب المالك يزيد الحوش ورا ممكن متر وتكون عندنا سعة بين الملحق والبيت 3 أمتار كافية لسيارة ولو حب يزيد ورا أكثر ويستغني عن موقف السيارة ويخلي مترين بين البيت والملحق ووكن كذلك وبتستوي عندنا سعة ورا بعرض 5 أمتار .. ألحين 3 أمتار ومغطية ميلان الحائط اللي مب سيدة حسب حدود الأرض

وفي الزاوية اليسرى تحت عندنا مساحة كافية لخيمة وممكن نكبر الزراعة ونسوي مكان عشب للخيمة أو نسوي مظلة ثابتة خشب أو خرسانة مع جلسة