رحلة البحث عن شقه

[mersal]

من واقع تجربة عن بحث عن شقه مناسبه غرفتين وصاله وحمام ومطبخ، والبحث طبعاً عن طريق برنامج مشهور بالتلفون وهذه نتائج البحث
١- الشخص الوسيط من هو؟ ما هي علاقته بالشقه ما عنده مكتب ولا شي حتى شغله مش بالعقار وبحل وبربط.. سؤال أين المالك الاساسي
٢- شامل الكهرباء والماء شو المقصود فيها يعني اصرف مي وكهربا حتى لو بتطلع الفاتوره الفين بالشهر عادي.. طيب كيف رح اوخذ افادة من كهرماء اذا ما عندي عداد لكي اسجل الاولاد بالمدارس..
٣- تقسيم نظامي ملاحق نظامية.. سؤال البلدية اصدرت قانون منع التقسيم.. بس كيف فيه تقسيم نظامي
٤- هل اجار خمسة الاف وسته الاف لغرفتين وصاله وحمام هذا المبلغ معقول أم طبيعي.. طبعاً الفيلا لا يمكن احلم فيها لانه اجارها قريب ١٨ الف هذا غير انه اول سنه الدفع مقدماً يعني قبل لا تسكن تدفع ١٢*١٨= ٢١٦٠٠٠ الف
٥- هل المالك يجد صعوبه بأن يقوم هو بنفسه بتوقيع العقود وتاجير العقار او عن طريق شركة وساطه او مكتب عقاري او محامي؟ ام هو يخجل من هذا العمل.. وهل الاستعانة بتاجير الباطن هل الحل الأمثل له..

باختصار شديد الاجارات رخيصه... اذا كانت عن طريق المالك مباشرة... اما جعل البيوت بايدي ناس جاية زيارة وناس شغاله بشغل ماله بالعقار وهو يجد هذه الشغله وسيلة للكسب على حساب الناس رح تظل الاجارات مرتفعة
والله المستعان

[qtr qtr]

الله يكون فعونكم .. وفعلا الاجارات ما ارتفعت الا بسبة بعض الجنسيات اللي تأجر بالباطن .

[mersal]

وازيد غرابه بالموضوع صديق لي يفتش محل اول مره اعرف انه المحل الان بتاجر بالمتر واذا المحل فيه سده او بصير الدبل..

والاطرف من كذا في اسيويين باجروا بالسرير،، يعني ما تملك بالغرفه الا السرير،، ما ظل الا نظام التاجير بالبلاطه يعني كم بلاطه تملك بالشقه بنوخذ منك اجارها،،
صارت التجارة بالعقار لكل من هب ودب

وهذا واقع موجود

[sweet qatar]

المؤجر متضرر و المستأجر متضرر

الله يعينا ويعينكم :(

[mersal]

المؤجر متضرر و المستأجر متضرر

الله يعينا ويعينكم :(

طبعاً هم متضررين لكن في طرف ثالث المفروض ما يكون موجود بينا هو المستفيد وهو الي بتحكم فينا،، شخص بتشغل بشركة او سايق او مندوب وبعد الدوام وسيط عقارات يتكلم بالملايين كيف هذه الحسبه بتصير

[حليتان*]

شوف صاحب العقار اذا عنده بيت واحد وعنده خبره فالتسويق مب مشكله هو بياجر مباشر
وايد ناس تلعوزو اجرو والمستاجر مايدفع الاجار وقاعد فالبيت وماخذه بالشيمه

حتى لو تلاحظ الحين اغلب الناس ماياجرون على قطرين ! ليش ؟


اما الي عنده اكثر من فله او عماره او مجمع سكني فضروري يشوف له مكتب يتولى الاجار وياخذ فايده مثلا 1000 للشقه والاجار الباقي يوصل للمالك لان هالمكتب بينظم عملية الاجارو الصيانه

والشي الاهم ان اغلب هالمكاتب تعطيني الاجار مقدم وهم مع المستاجر كيفهم

ولكن حاليا الي عنده عقارات قام هو يتولى الاجار والصيانه وهالسوالف من خلال مكتبه الخاص !

[شموخ دائم]

,

,


مرحبا


اخوي الكريم

الله يعطيك العافيه والله يسهل امورك

هناك امور ذكرتها تدل على ( نقص الخبره ) في العقار والسوق وربما انك اول مره تتعامل بالسوق

انا بتكلم عن واقع معين واخص فيه الشركات وموظفينهم ومن يعمل في الشركات
وليس ( المواطن )

الوسيط ( شر ) لابد منه وهو معمول فيه بكل دول العالم

في لندن حتى تستأجر شقه لازم تروح لمكتب عقاري
وايضا هناك من الاخوان العرب الي يشتغل بدون مكتب بدون ذكر الجنسيات
هم يستاجرون الشقق من المالك ويعيدون تأجيرها على ( الخليجي )
هذا مثال واحد في لندن وقيسها على باقي دول العالم

في مصر تروح حق ( سمسار )

وفي قطر تروح لمكتب عقاري معتمد

والخيار لك تروح مكان نظامي او غير نظامي فهذا اختيارك وانت تتحمل نتيجه اختيارك لو حصلت مشكله

تقدر تروح لمكاتب معروفه بالسوق مثل

ازدان
شركه الاصمخ
شركه بروه

الايجار بالمتر هذا شي طبيعي وبكل دول العالم لان السعر مقابل المساحه )
لو عندنا محلين محل اكبر من محل كيف يتم تأجيره ؟؟؟ وكيف نحط السعر على المحل الاكبر ؟؟؟
وماهو المقياس الي نحدد به السعر ؟؟؟
نحط سعر ( عشوائي ) او نحدد الامتار حتى تطلع الحسبه صحيحه ؟؟!!

احنا في سنه 2015 اخوي الكريم الايجار بالمتر
والبيع بالفوت

او تبينا نستخدم الطريقه القديمه نقول الصغير بكذا والكبير بكذا !!!!

على فكره حتى الغرف في الفنادق الايجار بالمتر
يعطيك سعر الغرفه ب 1200 ريال ويكتب جنبها المساحه 40 متر مثلا
وغرفه ثانيه السعر 1500 ويكتب جنبها المساحه 50 متر
ويحط لها مسميات غرفه عاديه وغرفه ديلوكس والمساحه اهم مميزات ( السعر )


ما تقدر تجبر ملاك العقار يتعامل مع الزبون مباشره

واحد عنده عماره فيها 40 شقه والله منعم عليه
تبيه يحتك بالزبون ويقعد يوقع معاهم واحد واحد ويقعد مع مشاكلهم هذا عنده ليت محترق
وهذا عنده حمام يبي صيانه !!

هل تشوف هذا منطق !! وهذا تصرف صحيح !! وتطالب فيه !!

من الطبيعي بيحط مكتب عقاري او ( شخص ) يتعامل مع الناس ويقوم بعمل العقود مع الزبائن ومتابعه الصيانه
ومشاكل المباني

انا اتفق معاك ان السوق في قطر ما يلبي حاجه فئه من الموظفين
خاصه الي راتبه 4 الاف ريال او 5 الاف ريال وشركته تعطيه بدل سكن 1500 ريال

وهو يجيب عائلته ويبي يسكن في شقه !!!

هناك خلل واضح ويحتاج تدخل الدوله

عشان كذا في قانون محد يجيب عائلته الا وعنده ما يثبت ان راتبه ( عشره الاف ريال )

ولان يوجد تلاعب بهذا الراتب الكفيل او الشركه تعطيه شهاده ان راتبه 10 الاف
وفي الحقيقه راتبه 5 الاف

ومن هنا ( تطلع ) مشاكل السكن للاسف من خلال هذا التلاعب


اما تمنع هذه الفئه من تجيب عائلتها وتحدد الراتب ب 10 الاف ريال وتحط عقوبه اذا ثبت ان هناك تلاعب بالراتب !!

او الدوله تعطي رخص بناء نظام ( ستوديو ) يكون ايجاره بحدود 2500 او 3000 ريال
عباره عن غرفه وحمام ومطبخ صغير

يلبي حاجه هذه الفئه وهو الخيار الافضل للجميع

للملاك وللمستاجر

حتى تختفي ظاهره ( التقسيم ) من البلد

نظام الاستوديو هو الحل الامثل في قطر





بالتوفيق لك

[H H]

,
انا اتفق معاك ان السوق في قطر ما يلبي حاجه فئه من الموظفين
خاصه الي راتبه 4 الاف ريال او 5 الاف ريال وشركته تعطيه بدل سكن 1500 ريال
وهو يجيب عائلته ويبي يسكن في شقه !!!
هناك خلل واضح ويحتاج تدخل الدوله
عشان كذا في قانون محد يجيب عائلته الا وعنده ما يثبت ان راتبه ( عشره الاف ريال )
ولان يوجد تلاعب بهذا الراتب الكفيل او الشركه تعطيه شهاده ان راتبه 10 الاف
وفي الحقيقه راتبه 5 الاف
ومن هنا ( تطلع ) مشاكل السكن للاسف من خلال هذا التلاعب
اما تمنع هذه الفئه من تجيب عائلتها وتحدد الراتب ب 10 الاف ريال وتحط عقوبه اذا ثبت ان هناك تلاعب بالراتب !!
بالتوفيق لك


المفترض يجبرونهم يجيبون Bank Statement لست شهور ويكون واضح فيه الايداع الشهري للراتب وبكذا تتنظّم العمليه اكثر ويقل النصب بشكل كبير.

[شموخ دائم]

,

,

مرحبا

والله معمول فيه نظام الاستاتمنت او الكشف الشهري والتحويل للبنك
الشركه تحول بحسابه 10 الاف وهو ياخذ راتبه ال 5 الاف ويرجع الباقي للشركه
التلاعب موجود
:)
وسهل كشفه لو الدوله تحب تشدد عليه يبان في الحسابات انه رجه ال 5000 الاف

لكن الدوله مو فاضيه تتابع كل خطوه وكل شخص
:)

وفي الاخير هو المتضرر ما بيلاقي سكن
وبيتعب في تكاليف المعيشه بقطر بهذا الراتب

الله يكون في عونهم

,

,

[eXpert*]

يا عزيزي نحتاج نتخلص من السماسرة الموسميين ،، إلى يطلع شهر سبتمبر و شهر أبريل ..

نحتاج جهة تقنن هذه العميلة ،، لازم يكون في بطاقة سمسار معتمد من جهة رسمية مثل ما فيه بطاقة مندوب ،،،، و يبيع ويأجر بأسعار السوق المعلنة مب على كيفة و يستغل حاجة الناس.

أعرف شخص أذا ماله خلق يشتغل يدخل فوق الـ 15 ألف ريال شهرياً من الوساطة وهو أساساً جاي فيزا زيارة !! ..

لدرجة قلت له ممازحاً : أفتح لك مكتب عقارات ..

قال : لاااااااااااااا ،،،،،،،،،،، جي مرتاح ،، لا مصاريف ولا أي شئ ،، ومتى ما ساءت الأمور غيرت رقم جوالي ولا من شاف ولا من درى !!

أقسم بالله لوبيات وعصابات والعقار ينعرض عند عدة سمسارة ويتم المضاربة عليها ،، ومن يدفع أكثر تروح لها ويتم تقاسم الكعكة ...

حالياً شركة إدارة الممتلكات / العقارات ،، يروح يتملك/يوقع عقد إنتفاع لعقارات بالجملة في منطقة معينة ويوحد الايجارات في المنطقة كلها بالسعر اللي يبيه .. عاجبك ولا مب عاجبك .. ((هذا اللي يسمونه الإحتكار))

الله المستعان

[بوحارب]

أشكرك على الطرح الجميل

والله يكون في عون الجميع

[mersal]

صح اخوي انا اتفق معك اني ما اعرف بالسوق بس لكن المحل الي مساحته صغيره وقديم وبمنطقه عاديه ويا دوب يشيل مكتب وكرسي وشويه اثاث واجاره عشرين يترا شو النشاط المقرح اذا رغب مواطن يفتح فيه مشروع صغير، واطبق عل المواطن نظام انجليزي

ثاني شي الي راتبه عشره وطالع برضوا بعاني، مني وعلي مستعد ادفع اجار سته راتبي يتحمل لكن ادفع سته لملحق او ادفعهم بشقه يادوب تشيل عيله من اربع اشخاص وطبعا الضيف صعب يجيك

وبعد ما ادفع السته اخر السنه انتظر الزياده عل الاجار عشره او عشرين بالميه ،

[fzaa_qatar]

مالك بيت او فيلا يبي ياجرها تاجرت من شخص بمبلغ معين قام هالشخص قسمها وخلاها كم شقه بالجمسبورد حتى السطح استغلوووه تخيل الغرفتين ب4000 ل 6000 ريال بدون مطبخ تخيل كم عايله راح تسكن تخيل كميه الضغط ع كهربه وماي وصرف صحي ومواقف وتسكير شوارع ع الدوله السالفه صارت تجاااااااره يجيك ياجر من المالك فله وفلتين وثلاث ويقسمهم ويدخل مئات الالاف مندوب البلديه كل اللي عليه يمرك فليل يحط استكر ع كل فله مخالفه يراجع المؤجر الاول او المالك ويدفع المخالفه واهو عارف انه راح يدفع وبيدفع عادي التجاره دخلوها جنسيات معينه واصبحت مسيطره عليها وبعضهم سيطر ع فرجان من المقيمين .. وين القانون وين الناس ليش السكوت ع تدمير البنيه التحتيه للدوله اعطوا العالم رخص كم دور عمارات شقق تفك ازمه هالمساكين .. الله المستعاااان

[رهج السنابك]

هههههه كأنك تقول كل الي بخاطري
عانيت مع الدلالين معاناة وفعلا كلهم لوبيات وجماعه وحده يتهاوشون ع العقار لدرجة يكسرون الباب ويرمون اللوحة بينهم شلل اذا شافو حد دخيل تناتفوه
طبعا المالك ممكن يأجر عادي مباشرة وبدون وسيط لكن هل تظن الوسطاء يخلونه بحاله؟؟ هيهات هاهاها اصلا حتى لو ماعرض الفيلا هم ينقزون ويعرضون العقار
وممكن تعرض عقار عند شخص واحد وبالاتفاق تلقاه عند عشره ويحرقونه بالسوق

التقسيم ممنوع وماسمعت فيه تقسيم نظامي هذا اختراع من الدلالين
ياخذ الفيلا واحد ويقولك موافق بعطيك 18الف شهريا ويقوم يقطعها ويأجرها من الباطن ويسكن هو ببلاش ويجمع الاجارات الي توصل احيانا خمس وعشرين وياخذ الفرقية بجيبه

بخصوص الي يطلب اجار مقدم لسنه ماسمعت بس بعض الملاك يطلب

وانا اشوف دام بتدفع ست الالاف تزيدها الف وتسكن بشقه في عماره بشكل نظامي احسن

وسالفه تجار الشنطه وايد في منهم تلقاه مدرس الصباح والعصريه يدور من فيلا لفيلا يسمسر ويجمع عمولات لا مكتب ولا رخصه

ومن تجاربي مروا علي حتى بنات قطريات تشتغل بالسمسره ومغربيات وسودانيات

الشغله مربحه بدون راس مال تطلع لك بعمولات محترمه :)

عن نفسي يدور راسي ماعرف شلون يفرقون ومايدوخون من كثرة الكلام بين الطرفين
شغله يبي لها قلب واعصاب

[حرف]

ياليت انشوف قانون صارم للدلالين الغير رسميين وتنفيذ اقصى العقوبات بهم

[Q A T A R I]

-



يقوليَ احد الاخوة المقيمينَ : " اعرف فلانَ يشتغلَ مرتينَ في الشهرَ ويحصلَ قرابةَ التسعين الفَ " .
استغربتَ .. قلتَ : " شلون " .
قال : " اول الشهرَ . يتابع البيوتَ , واخر الشهرَ , يقبض الاجارات ".

هكذا هم السماسرة المتحالفينَ ..

المشكلة , لو نظرنا للامور بنظرة طلب وعرض ,, راح نلقى حل التقسيم هو الانسبَ للمستأجرين
وراح نلقى عليه طلب بكثرةَ من قبل المستآجرينَ
وفي نفس الوقتَ .. هو استغلالَ لهمَ .. ورزق كاذبَ للسماسرةَ

اخويَ شموخ . ذكر الحل الانسب للحل وهو الاستديوَ ..

المصيبة العظمى , انك تلاقيَ فكرة "التقسيم" بعد فترة مصدر دخلَ للكثيرَ من هولاء المتلاعبين
خصوصاً وانها ستكونَ مصدر دخلَ جيد ..

اللهَ يعينكم اخوتيَ المقيمينَ , ويصعبَ علينا استغلالكم من قبل هؤلاء السماسرة
لكن توخوا الحذر , في التعامل معهم .. والله الموفق

[MAZEN37]

الحل فتح مناطق عمارات
مثل فريج المره وعين خالد
وراح يستوعب كل موظفين الصناعيه
البلديه والتخطيط العمراني بطيءيين جدا جدا باتخاذ القرارات

[حرف]

الحل فتح مناطق عمارات
مثل فريج المره وعين خالد
وراح يستوعب كل موظفين الصناعيه
البلديه والتخطيط العمراني بطيءيين جدا جدا باتخاذ القرارات

شلون يفتحون عمارات وكلها بيوت مافيه اماكن فاضية في هالمنطقتين كلها قسائم لقطريين

[أم هشام]

الحل لتخفييف حدة الايجارات. يتم بناء الابراج السكنية نفس الامارات

[معماري قطري]

الحل فتح مناطق عمارات
مثل فريج المره وعين خالد
وراح يستوعب كل موظفين الصناعيه
البلديه والتخطيط العمراني بطيءيين جدا جدا باتخاذ القرارات

الا بليدين .. عايشين في عصور التخطيط بالعصا على الأَرض

حتى بعض المنازل العادية لو طورنا القوانين لبناء أدوار متعددة مثل 5 أَدوار وبدور شبه تحت الأَرض كمواقف بنشوف استفادة كبيرة من الأَرض ومن الخدمات بس تبقى مشكلة زحمة المواصلات اللي حلها بيكون صعب حتى الريل بيساهم بجزء بسيط.

[لاجل QT]

الله المستعان