استفسار

[علي بن جاسم]

السلام عليكم ورحمة الله
حبيت اسأل اهل الخبرة فالاراضي، انا عندي راس مال صغير وودي اخذ ارض ف اي مكان في قطر، وين ممكن احصل ارض قيمتها من 600 الى 900 الف ؟ وكم راح تكون المساحة تقريبا ؟

يعطيكم العافية

[علي بن جاسم]

للرفع

[الدبلوماسي]

ممكن تلاقي ف الرويس مساحه 400 قيمتها حول 860 الف لين 900 الف

[سليمان احمد]

ليش ماتفكر تاخذ ارض خارج الدوحه في بريطانيا او امريكا بسعر اقل بكثير من سعر الدوحه

عالاقل سعر بسيط واستثمار مستقبلي

[captin]

مرحبا أخوي مبارك عليك الشهر

حاليا أرخص منطقة في قطر في الشمال الرويس وباظلوف
وسعر الفوت فيها من 200 الى 220 ريال .

أرض بمساحة 400 متر مربع وهي اصغر مساحة للاستثمار
سعرها راح يوصل حوالي 900 الف ريال .

واذا بتبني فيلا صغيرة بمساحة 450 متر مربع تحتاج أقل شي 800 الف
يعني مجموع استثمارك مليون وسبعمية الف ريال .
وشناوي تسوي بالفيلا هل تأجير او بيع لازم تعرف كم سعر الايجارات في الشمال
وكم سعر بيع الفلل.

وحدة من الحلول اللي تقدر تسويها اذا حاب انك ما تطلع من قطر في الاستثمار
انك تشارك لك شخصين تسوون راس مال يوصل مليونين ريال تشترون ارض
صغيرة في ام صلال او ام عبيرية والسعر هناك من 320 الى 350 يعنى ارض
بمساحة 400 متر راح تكلف حوالي 1.400 مليون وبنيان حوالي 700 الف
تقدرون تبيعونها 2.6 مليون وتكررون الاستثمار على ارض ثانية او ارضين .

السوال الصعب هالايام وين تلقى شركاء معاك وعلى دينك للأسف الكل قاعد يشتغل بروحه
وراح الكل يبقى صغير ماراح يكبرون بالعمل الفردي.

ملاحظ في الفترة الاخيرة هجرة كثير من رؤس الاموال من قطر الى الخارج خصوصا
لدى صغار المستثمرين بو مليون ريال اللي المليون ريال ما تجيب له شي في قطر
حسب احصائية دائرة الاملاك والاراضي في دبي القطريين هم ثاني اكثر مستثمرين خليجيين في العقار في دبي .

مثلا في الشارقة في الامارات فيه بنايات كثيرة وشقق تنباع باسعار تترواح من 500 الى 800 الف درهم
والعائد السنوي لها من 60 الى 80 الف درهم . وعليها طلب كبير لان الشارقة وعجمان تعتبر ارخص
من دبي في السكن وكثير من العاملين في دبي يسكنون في الشارقة وعجمان.

في استثمارات في بريطانيا وتركيا وكثير من الدول عليك تنتقي المكان الأكثر امان وتطلع على القوانين
وخصوصا الضرائب .

بالتوفيق اخوي

[راعي الاصفر]

ممكن تشتري عمارة صغيرة بلسعودية وتكون ماجرة