أي أحسن محل يركب عازل حراري؟؟

[RJ83]

السلام عليكم ..

بغيت اركب عازل حراري ممكن اعرف احسن محل يركبه ؟؟ وشلون الاسعار ؟؟ وهل عليه ضمان ؟؟

اي معلومات اضافية ؟؟

وشكرا

[ولد المعاضيد]

اخوي عندك تيتانيوم وايد زين
1500 السياره كلها وضمان 5 سنوات

يمدحون جونسون و في كول بس ما عندي فكره عدله عنهم

[RJ83]

مشكور اخوي ولد المعاضيد ..
وياليت اشوف اراء اخرى بعد

[BURBERRY]

عندك الفلم الشفاف (جونسون) تقريبا ب 2000 ريال

[الأختصاصي]

اخوي ابحث عن المنتج الاصلي وبس
اما السعر بالاقتناع يعني شاور نفسك
بالتوفيق اخوي

[RJ83]

شكرا على الردود
اخوي محلل شجاع ,, وين احصل الاصلي برايك؟؟

[الأختصاصي]

شكرا على الردود
اخوي محلل شجاع ,, وين احصل الاصلي برايك؟؟
صدقني اخوي لو اعرف ماتاخرت عليك
ولاكن كل محل بتروحله راح يقولك احنى عندنا الاصلي
عاد الله يعينك وكيف راح تعرف بصراحه ما ادري

[RJ83]

عند من احصل الاصلي

[RJ83]

شكرا اخوي محلل شجاع

[لمت داون111]

اخوي مب شرط تركب عازل حراري بالفين ولا ثلاث الاف حرام علي الفاضي

انا ركبت من سنتين عازل حراري زيرو زيرو والله مادق سلف معاي واشوفه عادي جدا مايحفظ الحراره نفس مايقولون وتحسفت اني خسرت عليه وشلته بنفسي والله

يعني لو تركب مخفي عادي 30% بيحمي الحراره احسن من العازل بالف مره بس المشكله انه ممنوع !!

سو مثلي اخوي واي حد من ربعك بيروح الحسا خله يشتري لك كم رول مخفي امريكي وهو احسن انواع المخفي وبتحصله ب100 ريال وتقدر تنزله لين 80 ريال وخذ زيرو زيرو اسود بيطلع منظره حلو ونفس العازل الحراري

واهم شي لاتركب اي نوع ثاني مثل تايواني ولا صيني لانه لون المخفي بيطير بسرعه وبتحس انه المخفي مشموخ من داخل عكس الامريكي الي ماتحصله الا بغالي ويعيش معاك سنين ولا لايتغير لونه

وللعلم رول الصيني والتايواني بالاحسا بتحصله ب 10 ريال للرول ( مثل سعره بالدوحه ) بس الامريكي تحصله ب 80 ريال مثل ماقلت لك ,, شوف الفرق !! ومحد يركب هناك الا امريكي وترا الدوحه مايبيعون امريكي كلش لانهم عارفين انه لما تركب الامريكي ماراح ترجع له بعد شهرين ولا ثلاثه نفس التايواني

الا اذا بتركب المخفي كم شهر وبتشيله عادي ركب اي نوع مابتفرق اخوي

بس نصيحه لو بخاطرك تركب مخفي لاتركب الا زيرو زيرو شفاف لانه مثل مانت عارف المرور عليهم تصانيف وبيردون يخالفون الناس بأي وقت

وبالنسبه لرول المخفي اشتر علي قدك يعني طاقتين ( رولين ) يكفون كروزر كامل

والله يوفقك اخوي واهم شي لاتسمع كلام حد وتحثلها وتركب مخفي ثقيل ولا شي لين احجزو موترك محد بينفعك والله :)

[RJ83]

مشكور اخوي لمت داون111 على التفسير ،، بس حبيت اعرف المخفي الاسود زيرو زيرو مب ممنوع لو حطيته على السياره كلها من جدام ومن ورى ؟؟

[لمت داون111]

هو ممنوع بس الاغلبيه يمشونك عكس الي مركب 30% ولا العاكس رقمه مسجل بالمرور ولا يوقفونه بالاماكن العامه ويلتهون عيشته وشوفت عيني !!

انا حثلتها هاليومين وتوني مركب زيرو زيرو عاكس خخخخخخخخ عن خاطري وبشيله عقب شهر

وطبعا اذا بتركب زيرو زيرو لاتركب علي الجامه الكبيره بس خل الجنبين و الشنطه

وان صارت ووقفتك دوريه ( الله لايقول ) ولا كان فيه تفتيش قوله انه هالمخفي زيرو زيرو شفاف وهو بنفسه بيقولك شيله وخلاص

بس ان شفت المرور ردو يشددون علي المخفي نفس ماصار من شهرين شيله بنفسك علي طول ولاتحرج عمرك وياهم

وعلي فكره ميزه العازل الحراري الشفاف شي واحد بس عن المخفي العادي .. انه تقدر تاخذ تصريح من المرور ويسجلون لك بالملكيه عازل حراري شفاف !!

اي استفسار انا حاضر .. والله يوفقك اخوي :)

[BURBERRY]

وايد شباب ركبو فالصيف مخفي 30% و انا منهم ركبت كامل على الموتر ما عدى الجامه الكبيره و من ايام شلته .. بس عيبه انه بعد فتره تظهر شمووخ على المخفي من داخل

:)

[Mercedes]

اخي الكريم

عليك بجونسون طريق سلوى-العزيزية

وعليك بال 7% .. لأن 30% يعتبر مخفي كامل في نظري

خل الناس تشوفك وانت راكب :) وموفق خير بأذن الله

[Mercedes]

وايد شباب ركبو فالصيف مخفي 30% و انا منهم ركبت كامل على الموتر ما عدى الجامه الكبيره و من ايام شلته .. بس عيبه انه بعد فتره تظهر شمووخ على المخفي من داخل

:)

الضمان 5 سنوات .. ارجع لهم وراح يسونه لك من غير مقابل

اسأل عن خالد واهو ما راح يقصر معاك

يعطيك العافيه

[RJ83]

مشكورين اخواني على الردود ..

[RJ83]

أخوي Mercedes
وين بالضبط مكان جونسون بالعزيزية ،، وضح لي اكثر لو سمحت ،، يعني شنو بجنبه محل معروف او اي شي.. ومشكور مقدما