اكمال الدراسة - يرجــى تقديم النصيحــة لوسمحتــوا . . .

[سلامي للكل]

الســلام عليكم ورحمــة الله وبركاته

تقبل الله اعمالكم جميعــاً

الموضوع اكمال الدراسة وعندي تخصصين حالياً وانا في مفترق الطريق

بغيت منكم النصحية

1. الماجستير التنفيذي في الموارد والطاقة, احدى جامعات المدينة التعليمة, المكان قطــر, شهادة معترف فيها, المدة 18 شهر,
دوام جزئى, الدراسة مدفوعة التكاليف من قبل المجلس الاعلى للتعليم.

2. الماجستير التنفيذي في ادارة الاعمال, احدى جامعات بريطانيا, المكان بريطانيا, شهادة معترف فيها, المدة 18 شهر تقريباً,
دوام جزئى, تكاليف الدراسة علي انا شخصياً (رسوم الجامعة والسكن والمصاريف والخ).

يرجى تقديم النصح والمشورة مع ذكر الأسباب إن وجدت

بعض التفاصيل لسهولة تقديم النصيحة:

متزوج, واب ولله الحمد, تخصصي هندسة ميكانيكية, واعمل في قطاع البترول والغاز

وبخصوص سالفة التمويل: المجلس الاعلى للتعليم يمول التعليم العالي للدوام الجزئي في قطر فقط وللاسف الدوام لايقوم بالابتعاث.

مشكــورين مقــدماً

وفاااااااااااالكم التوفيــق


ملاحظــة: تم وضع الموضوع بالحوار العام وذلك لكثرة رواده, فلذلك اقدم اعتذاري للإدارة الكريمة

[H H]

ياليت تكتب تفاصيل اكثر , وش تخصصك فالبكلريوس؟ ومجال عملك الحالي , ورغبتك فالمستقبل.
الخيار الثاني , تقصد فيه السفر والتغرب؟ واذا سافرت , ليه تدفع عن نفسك ليه مايكون بعثه عن طريق دوامك او اي مكان آخر؟
ياكثر القطاعات الي مستعده تطلعك بعثه اذا كان عندك قبول غير مشروط!

شي أخير , انت متزوج وعندك عيال , والا عزوبي وامورك سهالات؟

[غريب الدّار]

والله بصراحة اخوي انا اشوف الخيار الأول افضل لعدة أسباب :

1- الشهادة معترف فيها مثل ماذكرت
2-اتوقع التخصص مطلوب ومرغوب
3-في الدولة وعلى حساب المجلس الأعلى يعني مايحتاج تسافر وتتغرب ولا تدفع شي
4- الدراسة بالانجليزي اذا تبي تدعم اللغة عندك

وطبعا هذا مايعين ان الخيار الثاني سئ

بالعكس


لكن بالمفاضلة (من وجهة نظري) الخيار الأول افضل


والله يوفقك اخوي

وان شاء الله الاخوان والاخوات بيفيدونك اكثر

[سلامي للكل]

الاخ/الاخت h h

تم اضافة بعض التفاصيل في الموضوع اعلاه

شاكر لك/لج هذا الرد

[غايه الطواش]

اذا جامعه HEC في هي من اقوي جامعات العالم فالماستر اما كليه الدراسات الاسلاميه لحد الان ماحلصت على الاعتراف الاكاديمي برا قطر يعني في حاله انك تبي تكمل phd عقب ماتساعدك الشهاده

[شيخ الديرة]

الخيار الأول, ماجستير بتخصص الطاقة وأنت مشتغل بالطاقة, والكلفة مدفوعة, وبدون غربة ..
لا أرى أي أفضلية في الخيار الثاني

أدعو ان يوفقك الله مهما أخترت

[H H]

اول شي ادرس موضوع الاعتماد , وش وضع الكلية البريطانيه ؟ هل هي قويه وبتستفيد منها؟
اذا اعتمدت هالخيار بيكون له فوائد كثيره , دراسه قويه ولغه قويه والتطبيق عندهم كثير وهالشي بتكتسب منه خبره وتقدر تستفيد من روحتك
وتاخذ كورسات في مجالك من المعاهد القويه الي هناك اذا قدرت , خصوصا ان الماستر صعوبته اقل من المتوسط , سهل , موب مثل الجامعه.

وايضاً عيالك الله يحفظهم بيستفيدون اذا كانوا في عمر دراسه , سواءاً من اللغه او من المناهج والشي الاكثر تاثير على شخصيتهم, الحياه المنضبطه لسنتين قدام.

الابتعاث تجربه جميله وصعبه , بتزرع فيكم شغلات تستمر معكم طول العمر , انصحك تجربها, الله يوفقك.

[شويهينــه]

انا اشوف الخيار الاول افضل كونك اولا رب اسره وثانيا الجامعه قويه وشهادتها معتمده

والصراحه ماشوف له داعي ابدا ان العالم تتغرب عشان الدراسه الدوله ولله الحمد موفره الجامعات وبالتخصصات المطلوبه في سوق العمل .

وموفق ان شاء الله

[khalid Qtr]

بما أن الدراسة متوفرة في قطر، وفي نطاق تخصصك، ومدفوعة التكاليف، توكل على الله وادرس في ديرتك، أقل شي يوم ترجع من الدوام تشوف عيالك، وهالشي يعطيك دافع معنوي قوي بخلاف وضعك في الغربة، وكلامي هذا من واقع تجربة شخصية كوني طالب ماستر في جامعة قطر، ومتزوج وأب ولله الحمد.

[رهج السنابك]

اعتقد التخصص الاول انفتح بقطر بطلب من قطاع الطاقه وقطر للبترول احدهم بلا شك

نصيحتي دامك في البترول ومب ناوي تغير ومرتاح بعملك خذ الخيار الاول بدون تردد وناس وايد درسوا بهالكليه وتخرجوا منها كنت بكون اول خريجينها بس ماواصلت المشوار

غير انه تخصص نادر وبيكونون معدودين ع الاصابع

التخصص الثاني السوق متشبع لحد التخمة من ادارة الاعمال وهو ينفع لاي حد وعام
حلو اذا كنت مب ناوي تكمل في البترول او حابب تغير


بالحالتين انا احيي فيك طموحك وليت كل الشباب يفكرون مثلك

[QtrGate]

اذا خلصت الماجستير من الدوحة
هل هناك جامعات تقبلك لل phd

[معماري قطري]

الله يعينك في كل اختيار .. المشكلة شغلك في البترول مرهق والدوام طويل ولو بتحصل تجاوب من مسؤولينك أَو تفرغ خلك في قطر وفي قطاع الطاقة أَفضل.

[حرف]

خلك على البكالريوس
وش بيضيف لك الماستر ؟
الا اذا ناوي تاخذ الدكتوراه

[الجـــوديّ]

الله يوفقك ويسهل أمورك ..
المجالين زينين .. لكن ماستر في مجالك الرئيسي يزيدك علم وامكانية في تترقى وتاخذ خبرة ودراية أكثر
ومجال الطاقة اولية اولى في البلاد ..
لكن اللي يبي يتخصص في مجاله الماجستير ما يسوي شي .. لازم دكتوراة ويستمر طول عمره يقرا ويسوي ابحاث ويشارك ..
طبعاً هذا يعتمد على اختيار الشخص اشكثر يبي يتخصص.

الادارة جيدة واذا في طموحك انك تمسك مناصب قيادية .. راح تكون لك قرين كارد حتى لو كان في مجال ثاني غير البترول
وهالشي يعتمد على طموحك الوظيفي انت شنو حاب تصير في المستقبل ..
مع ان فيه ماجستير ادارة هنيه بجامعة قطر وبجامعة حمد بن خليفة... بلا هم الغربة.

[لبيبة]

السلام عليكم ورحمة الله وبركاته،

الاختيار الأول بلا تردد، لأنه في مجال دراستك وعملك، ومدفوع التكلفة، وفوق هذا كله بين أهلك وديرتك وناسك، والله يوفقك.

[السيف5]

الاختيار الاول بدون تردد

طالما الدراسة متوفره هنا وقويه وبجانب العائلة توكل على الله

[Q-tr]

الله يوفقك
انا كنت بنفس حالتك كنت ادرس ف المدينه التعليميه ماجستير ف كلية الدراسات الإسلامية تخصص سياسة عامة ماقدرت أكمل للأسف الدوام مرهق جدا ويومك بيكون طويل جدا دوام الصبح والمسا محاظرات وغير الامتحانات غير مسؤولية البيت انسحبت من الكورس.

بعد فتره قررت اسافر يو كي أكمل هناك ولله الحمد خلصت الماجستير من هناك وللعلم ع حسابي ومن اجازتي الخاصة والله واستفدت وايد...
هناك بتكون متفرغ الدراسه ومش مرتبط بالدوام....
رأي الخاص خلك ع الخيار الثاني وحاول تخلص ف 12 شهر مش 18 شهر

والخيار لك والله يوفقك...