الحسى

[حسن]

حبيت اسئل عن المناطق السياحيه في الحسى والمجمعات التجاريه
وشنهو افضل فندق من حيث السكن وشنهو المطاعم الزينه

وسمعت عن عين نجم وجبل القاره حد زار هل الاماكن وهل هي جميله لقضاء
اجازه العيد فيها

وشكرا

[غايه الطواش]

ان شاء الله يفيدونك هل الاختصاص
بس لو تروح الخبر احسن :)

[وطن]

الاحسا !!
ما أخبر فيها شي

عموما
أحسن فندق

الاحسا انتركونتننتال

هو الوحيد خمس نجوم

[عاشق العديد]

الاحسا !!
ما أخبر فيها شي

عموما
أحسن فندق

الاحسا انتركونتننتال

هو الوحيد خمس نجوم

اتفق معاج فالفندق ..

ومجمع اخبر العثيم مول هو يمكن اكبر مول ..
اما أماكن ثاني ماعرف مادل فيها واجد ,,

[الصغيره]

الاحساء كسياحه يمكن تمل

الفندق الوحيد هو اللي ذكروه الشباب فيه شقق فندقيه انا افضل الماسه خاصه شقق الفي بي

لو تروح الخبر افضل بكثير من الاحساء

المولات بالاحساء فيه الاحساء مول حلوو وراقي هاديء جدا وفيه متطلبات الاسره
العثيم مول يضيق الخلق وينرفز
الفوارس مول سمعت به لكن ما زرته
المطاعم مافيه شي اعجبني كان توباز قديما بس الاداره الحاليه تعيسه

الاحساء حدك يومين بالكثير

اما التسوووووق عندك شارع الماجد وبس والقيصريه واذا تبي شيء تدورون فيه اثاث واواني منزليه وسجاج وتفصيل ستاير وكذا عندك القريه التراثيه

بالتوفيق

[qatarman8008]

الاحساء وما ادراك ما الاحساء..
تقريبا مثل ما اذكروا لك الاعضاء اللي قبلي..
الاماكن السياحية فيها تقريبا لاشيئ..
المولات هم عبارة عن مول الاحساء ومول العثيم..
كان زمان الاسعار فيها ارخص من قطر الى النصف تقريبا..
اما الان فالاسعار قل من اللي في قطر بشيئ بسيط.. تصلح حق اللي يحب التغيير..
فيها استراحات داخل المزارع وهذي راقية جدا وكبيرة ورخيصة..
المشكلة ان ما تضمن الاستراحة من ناحية الامان او السمعه او النظافة..
ف ما انصحك ان تاخذ استراحة الا من عند شخص مجرب ومضمون..
عين نجم وجبل قارة بتروح لهم في يوم.. لانهم جمب بعض..
عين نجم هي عين حارة حق اذا تبي تسبح لكن بتتفاجا وانت داخل ان الجميع عيال قرية وحدة وانت الوحيد الغريب..!!
انا بوم رحت لها حسيت من نظراتهم ان نفس اش تبي اش جايبك هنيه عندنا قوم اطلع برى..!!
جبل قارة هو عبارة عن شقوق كبيرة داخل الجبل.. وهواه بارد جدا في الداخل..

[المهاجر]

هههههههههه


من المانيا لين الاحساء مره وحده

شكل الطراد اخترب وما قمت تصيد قباقب:tease:

[بـارود]

مرحبتين بو علي ؛

مطاعمهم لك عليهم
ما يمشي معاك إلا المندي
ومندي السلامة بالذات

وأنصحك تسكن في شقق معروفة
على كلام واحد من الربع يقولي
نزلنا شقة واطلعت مسكونة :vampire:

أما إذا بغيت الحين تراهم مربطين :secret:

أنصحك بجولة بسوق الخضرة عندهم
أحسن ما عندهم التمور والبقصم والبوالين :nice:

كان عندهم سوق اسمه البستان اعتقد تسكر
تقط هلك فيه وتنساهم وينسونك لأنهم بيدوخون فيه هههه

رحلة سعيدة ، وحاسب من راداراتهم ( ساهر )

[ابوعلي]

يالحبيب الحسا اذا تمير البيت اوكي ولكن سياحة وخاصة اذا العيال معاك ما افضل

صحيح ان في اماكن للالعاب في المجمعات بس زحمة والجو هالايام ما يساعد

[موظف ((حكومي]

رووووووووووووووووووووح للدمام وامورك طيبه هناك


الخبر جنبك والظهران والبحرين والمجمعات كثيره بس عائليه

بس مجمع الراشد للكل

[موظف ((حكومي]

وللحسى

عندك سوق شارع الماجد والقيصريه

وفي مجمعات كثيره بس عائليه

[راجي الْعفو]

يرفع للفائدة

[ماجد البدر]

وسمعت عن عين نجم

عين نجم انسى موضوعها ضبطوا لها الجلسات و الحدايق ولكنها نشفت وهي قديمة جدا خربت مع عين عذاري بنفس الوقت
على قولت الاوليين مربوطين ببعض يقولون ان ان نعال طاحت ولوقوها بعين نجم طلعت مقوله صحيحه

خربت مع شق البحر للحوض الجاف في الحد بحسب معلوماتي




وجبل القاره حد زار هل الاماكن

نعم زرت المكان وموقعهم جميل جدا جبل قارة وواحة قاره من اكبر الواحات في الخليج العربي بغطاء النخيل تركب الجبل تشوف على مد البصر مزارع النخيل والبعض يؤجر استراحات هنام مع مسابحهم بحسب ماسمعت لاني زرت الجبل وفي عز الصيف فيه غرف بارده مثل مغارات داخله في بعض يستاهل الزيارة ولكن المكوث و المبيت بحسب الناس غالبا ما تتقبل تسكن في مزارع يستاهل الزيارة لانه مكان غريب وكانت مرشحة ضمن عجائب الدنيا الطبيعية

وهل هي جميله لقضاء
اجازه العيد فيها

بحسب ناس تحب وناس فقط زيارة خاطفة لان المكان جميل وقريب وسط الاحساء بعد سوق قيصرية تكمل على الكراجات وتاخذ يمين وتكمل تلاقي اشارات على جبل قاره

[حسن]

شكرا ياولد البدر على هل الاضافه القيمه

مالهم الا الحسى استر لهم

[المحاميه]

للتوضيح بس

الحسا أو الاحساء وليس الحسى

بالتوفيق

[حسن]

للتوضيح بس

الحسا أو الاحساء وليس الحسى

بالتوفيق

الهفوف

شاريك فيها يالمحاميه مازرتيها
ولا وين مصيفه السنه ذي

:)

[المحاميه]

لا مازرتها أو يمكن زرتها قبل طعش سنه ماذكر
ماحب أسافر بالسياره
ولا أحب هالاماكن

:nice:

[bo_s3ood]

عندهم مجمعين تقريبا العثيم مول والهفوف مول
والقيصريه حق اقراض البيت
كلهم في يوم واحد تخلصهم
واول ماتدخل الحسا بتحصل الشقق الفندقيه يمينك ويسارك بعضهم جديد
وبالتوفيق

[R 7 A L]

هاه بشر يابوعلي رحت الحسى هههههههه

[Dana’1]

كتبت رد في تفاصيل عن الأحساء،،بس انسمح بعد المشكله الي صارت للمنتدى

،،،الحين بكتفي بالإستفسار زرت الأحساء ؟إذا نعم *إيش انطباعك عنها؟

[R 7 A L]

بوعلي
ترى ننتظر تقريرك عن الحسى

[معماري قطري]

بوعلي
ترى ننتظر تقريرك عن الحسى

ههههههههه سكروا الموضوع يا اخوي هناك بسبب غيرة البعض ولا كان الهدف بيعترف

[حسن]

كتبت رد في تفاصيل عن الأحساء،،بس انسمح بعد المشكله الي صارت للمنتدى

،،،الحين بكتفي بالإستفسار زرت الأحساء ؟إذا نعم *إيش انطباعك عنها؟

والله ياديور كفايه حضورك في الموضوع يكفي عن ألف تقرير

[R 7 A L]

ههههههههه سكروا الموضوع يا اخوي هناك بسبب غيرة البعض ولا كان الهدف بيعترف

انا كنسلت سفرتي لاوربا وغيرت الوجهه للحسا بعد هالموضوع على بالي بحصل حسن في قاره ولا السويق ولا الشارع الماجد اثاري الحبيب مصيف في ربوع ميونخ وسحب علينا وعلى متابعينه وعلى هل الخليج كلهم
بس لعبها صح بوعلي صرفنا على شان تفضى له ميونخ ههههههه

[معماري قطري]

انا كنسلت سفرتي لاوربا وغيرت الوجهه للحسا بعد هالموضوع على بالي بحصل حسن في قاره ولا السويق ولا الشارع الماجد اثاري الحبيب مصيف في ربوع ميونخ وسحب علينا وعلى متابعينه وعلى هل الخليج كلهم
بس لعبها صح بوعلي صرفنا على شان تفضى له ميونخ ههههههه

هو عنده حيل وخطط على مستويات عليا .. بس انت شوف الحسا شلون كاتبها .. ما اتوقع مر عليها كلش

[چواهر]

استغفر الله مطاعمها تلوع الجبد :(

[باراكودا]

الله يسامحك ياحسن مسوى تمويه أكيد كان قصدك الحسى شوربة العدس .

[R 7 A L]

هو عنده حيل وخطط على مستويات عليا .. بس انت شوف الحسا شلون كاتبها .. ما اتوقع مر عليها كلش



اكثر شي عجبني في الموضوع كتابة الحسا ( الحسى ) هههههههه

[غير البشر]

يعطيكم العافيه جميعا

الموضوع اخذ كفايته ويغلق

تحياتي